| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
১৩. সদ্ধম্মপ্পতিরূপকসুত্তৰণ্ণনা
13. Saddhammappatirūpakasuttavaṇṇanā
১৫৬. তেরসমে অঞ্ঞায সণ্ঠহিংসূতি অরহত্তে পতিট্ঠহিংসু। সদ্ধম্মপ্পতিরূপকন্তি দ্ৰে সদ্ধম্মপ্পতিরূপকানি অধিগমসদ্ধম্মপ্পতিরূপকঞ্চ পরিযত্তিসদ্ধম্মপ্পতিরূপকঞ্চ। তত্থ –
156. Terasame aññāya saṇṭhahiṃsūti arahatte patiṭṭhahiṃsu. Saddhammappatirūpakanti dve saddhammappatirūpakāni adhigamasaddhammappatirūpakañca pariyattisaddhammappatirūpakañca. Tattha –
‘‘ওভাসে চেৰ ঞাণে চ, পীতিযা চ ৰিকম্পতি।
‘‘Obhāse ceva ñāṇe ca, pītiyā ca vikampati;
পস্সদ্ধিযা সুখে চেৰ, যেহি চিত্তং পৰেধতি॥
Passaddhiyā sukhe ceva, yehi cittaṃ pavedhati.
‘‘অধিমোক্খে চ পগ্গাহে, উপট্ঠানে চ কম্পতি।
‘‘Adhimokkhe ca paggāhe, upaṭṭhāne ca kampati;
উপেক্খাৰজ্জনায চেৰ, উপেক্খায চ নিকন্তিযা॥
Upekkhāvajjanāya ceva, upekkhāya ca nikantiyā.
‘‘ইমানি দস ঠানানি, পঞ্ঞা যস্স পরিচিতা।
‘‘Imāni dasa ṭhānāni, paññā yassa paricitā;
ধম্মুদ্ধচ্চকুসলো হোতি, ন চ সম্মোহ গচ্ছতী’’তি॥ (পটি॰ ম॰ ২.৭)। –
Dhammuddhaccakusalo hoti, na ca sammoha gacchatī’’ti. (paṭi. ma. 2.7); –
ইদং ৰিপস্সনাঞাণস্স উপক্কিলেসজাতং অধিগমসদ্ধম্মপ্পতিরূপকং নাম। তিস্সো পন সঙ্গীতিযো অনারুল়্হং ধাতুকথা আরম্মণকথা অসুভকথা ঞাণৰত্থুকথা ৰিজ্জাকরণ্ডকোতি ইমেহি পঞ্চহি কথাৰত্থূহি পরিবাহিরং গুল়্হৰিনযং গুল়্হৰেস্সন্তরং গুল়্হমহোসধং ৰণ্ণপিটকং অঙ্গুলিমালপিটকং রট্ঠপালগজ্জিতং আল়ৰকগজ্জিতং ৰেদল্লপিটকন্তি অবুদ্ধৰচনং পরিযত্তিসদ্ধম্মপ্পতিরূপকং নাম।
Idaṃ vipassanāñāṇassa upakkilesajātaṃ adhigamasaddhammappatirūpakaṃ nāma. Tisso pana saṅgītiyo anāruḷhaṃ dhātukathā ārammaṇakathā asubhakathā ñāṇavatthukathā vijjākaraṇḍakoti imehi pañcahi kathāvatthūhi paribāhiraṃ guḷhavinayaṃ guḷhavessantaraṃ guḷhamahosadhaṃ vaṇṇapiṭakaṃ aṅgulimālapiṭakaṃ raṭṭhapālagajjitaṃ āḷavakagajjitaṃ vedallapiṭakanti abuddhavacanaṃ pariyattisaddhammappatirūpakaṃ nāma.
জাতরূপপ্পতিরূপকন্তি সুৰণ্ণরসৰিধানং আরকূটমযং সুৰণ্ণৰণ্ণং আভরণজাতং। ছণকালেসু হি মনুস্সা ‘‘আভরণভণ্ডকং গণ্হিস্সামা’’তি আপণং গচ্ছন্তি। অথ নে আপণিকা এৰং ৰদন্তি, ‘‘সচে তুম্হে আভরণত্থিকা, ইমানি গণ্হথ। ইমানি হি ঘনানি চেৰ ৰণ্ণৰন্তানি চ অপ্পগ্ঘানি চা’’তি। তে তেসং সুত্ৰা, ‘‘কারণং ইমে ৰদন্তি, ইমানি পিল়ন্ধিত্ৰা সক্কা নক্খত্তং কীল়িতুং, সোভন্তি চেৰ অপ্পগ্ঘানি চা’’তি তানি গহেত্ৰা গচ্ছন্তি। সুৰণ্ণভণ্ডং অৰিক্কিযমানং নিদহিত্ৰা ঠপেতব্বং হোতি। এৰং তং জাতরূপপ্পতিরূপকে উপ্পন্নে অন্তরধাযতি নাম।
Jātarūpappatirūpakanti suvaṇṇarasavidhānaṃ ārakūṭamayaṃ suvaṇṇavaṇṇaṃ ābharaṇajātaṃ. Chaṇakālesu hi manussā ‘‘ābharaṇabhaṇḍakaṃ gaṇhissāmā’’ti āpaṇaṃ gacchanti. Atha ne āpaṇikā evaṃ vadanti, ‘‘sace tumhe ābharaṇatthikā, imāni gaṇhatha. Imāni hi ghanāni ceva vaṇṇavantāni ca appagghāni cā’’ti. Te tesaṃ sutvā, ‘‘kāraṇaṃ ime vadanti, imāni piḷandhitvā sakkā nakkhattaṃ kīḷituṃ, sobhanti ceva appagghāni cā’’ti tāni gahetvā gacchanti. Suvaṇṇabhaṇḍaṃ avikkiyamānaṃ nidahitvā ṭhapetabbaṃ hoti. Evaṃ taṃ jātarūpappatirūpake uppanne antaradhāyati nāma.
অথ সদ্ধম্মস্স অন্তরধানং হোতীতি অধিগমসদ্ধম্মস্স পটিপত্তিসদ্ধম্মস্স পরিযত্তিসদ্ধম্মস্সাতি তিৰিধস্সাপি সদ্ধম্মস্স অন্তরধানং হোতি। পঠমবোধিযঞ্হি ভিক্খূ পটিসম্ভিদপ্পত্তা অহেসুং। অথ কালে গচ্ছন্তে পটিসম্ভিদা পাপুণিতুং ন সক্খিংসু, ছল়ভিঞ্ঞা অহেসুং। ততো ছ অভিঞ্ঞা পাপুণিতুং অসক্কোন্তা তিস্সো ৰিজ্জা পাপুণিংসু। ইদানি কালে গচ্ছন্তে তিস্সো ৰিজ্জা পাপুণিতুং অসক্কোন্তা আসৰক্খযমত্তং পাপুণিস্সন্তি। তম্পি অসক্কোন্তা অনাগামিফলং, তম্পি অসক্কোন্তা সকদাগামিফলং, তম্পি অসক্কোন্তা সোতাপত্তিফলং। গচ্ছন্তে কালে সোতাপত্তিফলম্পি পত্তুং ন সক্খিস্সন্তি। অথ নেসং যদা ৰিপস্সনা ইমেহি উপক্কিলেসেহি উপক্কিলিট্ঠা আরদ্ধমত্তাৰ ঠস্সতি, তদা অধিগমসদ্ধম্মো অন্তরহিতো নাম ভৰিস্সতি।
Atha saddhammassa antaradhānaṃ hotīti adhigamasaddhammassa paṭipattisaddhammassa pariyattisaddhammassāti tividhassāpi saddhammassa antaradhānaṃ hoti. Paṭhamabodhiyañhi bhikkhū paṭisambhidappattā ahesuṃ. Atha kāle gacchante paṭisambhidā pāpuṇituṃ na sakkhiṃsu, chaḷabhiññā ahesuṃ. Tato cha abhiññā pāpuṇituṃ asakkontā tisso vijjā pāpuṇiṃsu. Idāni kāle gacchante tisso vijjā pāpuṇituṃ asakkontā āsavakkhayamattaṃ pāpuṇissanti. Tampi asakkontā anāgāmiphalaṃ, tampi asakkontā sakadāgāmiphalaṃ, tampi asakkontā sotāpattiphalaṃ. Gacchante kāle sotāpattiphalampi pattuṃ na sakkhissanti. Atha nesaṃ yadā vipassanā imehi upakkilesehi upakkiliṭṭhā āraddhamattāva ṭhassati, tadā adhigamasaddhammo antarahito nāma bhavissati.
পঠমবোধিযঞ্হি ভিক্খূ চতুন্নং পটিসম্ভিদানং অনুচ্ছৰিকং পটিপত্তিং পূরযিংসু। গচ্ছন্তে কালে তং অসক্কোন্তা ছন্নং অভিঞ্ঞানং, তম্পি অসক্কোন্তা তিস্সন্নং ৰিজ্জানং, তম্পি অসক্কোন্তা অরহত্তফলমত্তস্স। গচ্ছন্তে পন কালে অরহত্তস্স অনুচ্ছৰিকং পটিপত্তিং পূরেতুং অসক্কোন্তা অনাগামিফলস্স অনুচ্ছৰিকং পটিপত্তিং পূরেস্সন্তি , তম্পি অসক্কোন্তা সকদাগামিফলস্স, তম্পি অসক্কোন্তা সোতাপত্তিফলস্স। যদা পন সোতাপত্তিফলস্সপি অনুচ্ছৰিকং পটিপদং পূরেতুং অসক্কোন্তা সীলপারিসুদ্ধিমত্তেৰ ঠস্সন্তি, তদা পটিপত্তিসদ্ধম্মো অন্তরহিতো নাম ভৰিস্সতি।
Paṭhamabodhiyañhi bhikkhū catunnaṃ paṭisambhidānaṃ anucchavikaṃ paṭipattiṃ pūrayiṃsu. Gacchante kāle taṃ asakkontā channaṃ abhiññānaṃ, tampi asakkontā tissannaṃ vijjānaṃ, tampi asakkontā arahattaphalamattassa. Gacchante pana kāle arahattassa anucchavikaṃ paṭipattiṃ pūretuṃ asakkontā anāgāmiphalassa anucchavikaṃ paṭipattiṃ pūressanti , tampi asakkontā sakadāgāmiphalassa, tampi asakkontā sotāpattiphalassa. Yadā pana sotāpattiphalassapi anucchavikaṃ paṭipadaṃ pūretuṃ asakkontā sīlapārisuddhimatteva ṭhassanti, tadā paṭipattisaddhammo antarahito nāma bhavissati.
যাৰ পন তেপিটকং বুদ্ধৰচনং ৰত্ততি, ন তাৰ সাসনং অন্তরহিতন্তি ৰত্তুং ৰট্টতি। তিট্ঠন্তু তীণি ৰা, অভিধম্মপিটকে অন্তরহিতে ইতরেসু দ্ৰীসু তিট্ঠন্তেসুপি অন্তরহিতন্তি ন ৰত্তব্বমেৰ। দ্ৰীসু অন্তরহিতেসু ৰিনযপিটকমত্তে ঠিতেপি, তত্রাপি খন্ধকপরিৰারেসু অন্তরহিতেসু উভতোৰিভঙ্গমত্তে, মহাৰিনযে অন্তরহিতে দ্ৰীসু পাতিমোক্খেসু ৰত্তমানেসুপি সাসনং অনন্তরহিতমেৰ। যদা পন দ্ৰে পাতিমোক্খা অন্তরধাযিস্সন্তি, অথ পরিযত্তিসদ্ধম্মস্স অন্তরধানং ভৰিস্সতি। তস্মিং অন্তরহিতে সাসনং অন্তরহিতং নাম হোতি। পরিযত্তিযা হি অন্তরহিতায পটিপত্তি অন্তরধাযতি, পটিপত্তিযা অন্তরহিতায অধিগমো অন্তরধাযতি। কিং কারণা? অযঞ্হি পরিযত্তি পটিপত্তিযা পচ্চযো হোতি, পটিপত্তি অধিগমস্স। ইতি পটিপত্তিতোপি পরিযত্তিমেৰ পমাণং।
Yāva pana tepiṭakaṃ buddhavacanaṃ vattati, na tāva sāsanaṃ antarahitanti vattuṃ vaṭṭati. Tiṭṭhantu tīṇi vā, abhidhammapiṭake antarahite itaresu dvīsu tiṭṭhantesupi antarahitanti na vattabbameva. Dvīsu antarahitesu vinayapiṭakamatte ṭhitepi, tatrāpi khandhakaparivāresu antarahitesu ubhatovibhaṅgamatte, mahāvinaye antarahite dvīsu pātimokkhesu vattamānesupi sāsanaṃ anantarahitameva. Yadā pana dve pātimokkhā antaradhāyissanti, atha pariyattisaddhammassa antaradhānaṃ bhavissati. Tasmiṃ antarahite sāsanaṃ antarahitaṃ nāma hoti. Pariyattiyā hi antarahitāya paṭipatti antaradhāyati, paṭipattiyā antarahitāya adhigamo antaradhāyati. Kiṃ kāraṇā? Ayañhi pariyatti paṭipattiyā paccayo hoti, paṭipatti adhigamassa. Iti paṭipattitopi pariyattimeva pamāṇaṃ.
ননু চ কস্সপসম্মাসম্বুদ্ধকালে কপিলো নাম অনারাধকভিক্খু ‘‘পাতিমোক্খং উদ্দিসিস্সামী’’তি বীজনিং গহেত্ৰা আসনে নিসিন্নো ‘‘অত্থি ইমস্মিং ৰত্তন্তা’’তি পুচ্ছি, অথ তস্স ভযেন যেসম্পি পাতিমোক্খো ৰত্ততি, তেপি ‘‘মযং ৰত্তামা’’তি অৰত্ৰা ‘‘ন ৰত্তামা’’তি ৰদিংসু, সো বীজনিং ঠপেত্ৰা উট্ঠাযাসনা গতো, তদা সম্মাসম্বুদ্ধস্স সাসনং ওসক্কিতন্তি? কিঞ্চাপি ওসক্কিতং, পরিযত্তি পন একন্তেনেৰ পমাণং। যথা হি মহতো তল়াকস্স পাল়িযা থিরায উদকং ন ঠস্সতীতি ন ৰত্তব্বং, উদকে সতি পদুমাদীনি পুপ্ফানি ন পুপ্ফিস্সন্তীতি ন ৰত্তব্বং, এৰমেৰ মহাতল়াকস্স থিরপাল়িসদিসে তেপিটকে বুদ্ধৰচনে সতি মহাতল়াকে উদকসদিসা পটিপত্তিপূরকা কুলপুত্তা নত্থীতি ন ৰত্তব্বা, তেসু সতি মহাতল়াকে পদুমাদীনি পুপ্ফানি ৰিয সোতাপন্নাদযো অরিযপুগ্গলা নত্থীতি ন ৰত্তব্বাতি এৰং একন্ততো পরিযত্তিযেৰ পমাণং।
Nanu ca kassapasammāsambuddhakāle kapilo nāma anārādhakabhikkhu ‘‘pātimokkhaṃ uddisissāmī’’ti bījaniṃ gahetvā āsane nisinno ‘‘atthi imasmiṃ vattantā’’ti pucchi, atha tassa bhayena yesampi pātimokkho vattati, tepi ‘‘mayaṃ vattāmā’’ti avatvā ‘‘na vattāmā’’ti vadiṃsu, so bījaniṃ ṭhapetvā uṭṭhāyāsanā gato, tadā sammāsambuddhassa sāsanaṃ osakkitanti? Kiñcāpi osakkitaṃ, pariyatti pana ekanteneva pamāṇaṃ. Yathā hi mahato taḷākassa pāḷiyā thirāya udakaṃ na ṭhassatīti na vattabbaṃ, udake sati padumādīni pupphāni na pupphissantīti na vattabbaṃ, evameva mahātaḷākassa thirapāḷisadise tepiṭake buddhavacane sati mahātaḷāke udakasadisā paṭipattipūrakā kulaputtā natthīti na vattabbā, tesu sati mahātaḷāke padumādīni pupphāni viya sotāpannādayo ariyapuggalā natthīti na vattabbāti evaṃ ekantato pariyattiyeva pamāṇaṃ.
পথৰীধাতূতি দ্ৰে সতসহস্সানি চত্তারি চ নহুতানি বহলা মহাপথৰী। আপোধাতূতি পথৰিতো পট্ঠায যাৰ সুভকিণ্হব্রহ্মলোকা উগ্গতং কপ্পৰিনাসকং উদকং। তেজোধাতূতি পথৰিতো পট্ঠায যাৰ আভস্সরব্রহ্মলোকা উগ্গতো কপ্পৰিনাসকো অগ্গি। ৰাযোধাতূতি পথৰিতো পট্ঠায যাৰ ৰেহপ্ফলব্রহ্মলোকা উগ্গতো কপ্পৰিনাসকো ৰাযু। এতেসু হি একধম্মোপি সত্থু সাসনং অন্তরধাপেতুং ন সক্কোতি, তস্মা এৰমাহ। ইধেৰ তে উপ্পজ্জন্তীতি লোহতো লোহখাদকং মলং ৰিয ইমস্মিং ময্হংযেৰ সাসনে তে উপ্পজ্জন্তি। মোঘপুরিসাতি তুচ্ছপুরিসা।
Pathavīdhātūti dve satasahassāni cattāri ca nahutāni bahalā mahāpathavī. Āpodhātūti pathavito paṭṭhāya yāva subhakiṇhabrahmalokā uggataṃ kappavināsakaṃ udakaṃ. Tejodhātūti pathavito paṭṭhāya yāva ābhassarabrahmalokā uggato kappavināsako aggi. Vāyodhātūti pathavito paṭṭhāya yāva vehapphalabrahmalokā uggato kappavināsako vāyu. Etesu hi ekadhammopi satthu sāsanaṃ antaradhāpetuṃ na sakkoti, tasmā evamāha. Idheva te uppajjantīti lohato lohakhādakaṃ malaṃ viya imasmiṃ mayhaṃyeva sāsane te uppajjanti. Moghapurisāti tucchapurisā.
আদিকেনেৰ ওপিলৰতীতি এত্থ আদিকেনাতি আদানেন গহণেন। ওপিলৰতীতি নিমুজ্জতি। ইদং ৰুত্তং হোতি – যথা উদকচরা নাৰা ভণ্ডং গণ্হন্তী নিমুজ্জতি, এৰং পরিযত্তিআদীনং পূরণেন সদ্ধম্মস্স অন্তরধানং ন হোতি। পরিযত্তিযা হি হাযমানায পটিপত্তি হাযতি, পটিপত্তিযা হাযমানায অধিগমো হাযতি। পরিযত্তিযা পূরযমানায পরিযত্তিধরা পুগ্গলা পটিপত্তিং পূরেন্তি, পটিপত্তিপূরকা অধিগমং পূরেন্তি। ইতি নৰচন্দো ৰিয পরিযত্তিযাদীসু ৰড্ঢমানাসু ময্হং সাসনং ৰড্ঢতি যেৰাতি দস্সেতি।
Ādikeneva opilavatīti ettha ādikenāti ādānena gahaṇena. Opilavatīti nimujjati. Idaṃ vuttaṃ hoti – yathā udakacarā nāvā bhaṇḍaṃ gaṇhantī nimujjati, evaṃ pariyattiādīnaṃ pūraṇena saddhammassa antaradhānaṃ na hoti. Pariyattiyā hi hāyamānāya paṭipatti hāyati, paṭipattiyā hāyamānāya adhigamo hāyati. Pariyattiyā pūrayamānāya pariyattidharā puggalā paṭipattiṃ pūrenti, paṭipattipūrakā adhigamaṃ pūrenti. Iti navacando viya pariyattiyādīsu vaḍḍhamānāsu mayhaṃ sāsanaṃ vaḍḍhati yevāti dasseti.
ইদানি যেহি ধম্মেহি সদ্ধম্মস্স অন্তরধানঞ্চেৰ ঠিতি চ হোতি, তে দস্সেন্তো পঞ্চ খোতিআদিমাহ। তত্থ ওক্কমনীযাতি অৰক্কমনীযা, হেট্ঠাগমনীযাতি অত্থো। সত্থরি অগারৰাতিআদীসু অগারৰাতি গারৰরহিতা। অপ্পতিস্সাতি অপ্পতিস্সযা অনীচৰুত্তিকা। তত্থ যো চেতিযঙ্গণং আরোহন্তো ছত্তং ধারেতি, উপাহনং ধারেতি, অঞ্ঞতো ওলোকেত্ৰা কথং কথেন্তো গচ্ছতি, অযং সত্থরি অগারৰো নাম।
Idāni yehi dhammehi saddhammassa antaradhānañceva ṭhiti ca hoti, te dassento pañca khotiādimāha. Tattha okkamanīyāti avakkamanīyā, heṭṭhāgamanīyāti attho. Satthari agāravātiādīsu agāravāti gāravarahitā. Appatissāti appatissayā anīcavuttikā. Tattha yo cetiyaṅgaṇaṃ ārohanto chattaṃ dhāreti, upāhanaṃ dhāreti, aññato oloketvā kathaṃ kathento gacchati, ayaṃ satthari agāravo nāma.
যো ধম্মস্সৰনস্স কালে সঙ্ঘুট্ঠে দহরসামণেরেহি পরিৰারিতো নিসীদতি, অঞ্ঞানি ৰা নৰকম্মাদীনি করোতি, ধম্মস্সৰনগ্গে নিসিন্নো নিদ্দাযতি, ৰিক্খিত্তো ৰা অঞ্ঞং কথেন্তো নিসীদতি, অযং ধম্মে অগারৰো নাম।
Yo dhammassavanassa kāle saṅghuṭṭhe daharasāmaṇerehi parivārito nisīdati, aññāni vā navakammādīni karoti, dhammassavanagge nisinno niddāyati, vikkhitto vā aññaṃ kathento nisīdati, ayaṃ dhamme agāravo nāma.
যো থেরুপট্ঠানং গন্ত্ৰা, অৰন্দিত্ৰা নিসীদতি, হত্থপল্লত্থিকং দুস্সপল্লত্থিকং করোতি, অঞ্ঞং ৰা পন হত্থপাদকুক্কুচ্চং করোতি, ৰুড্ঢানং সন্তিকে অনজ্ঝিট্ঠো কথেতি, অযং সঙ্ঘে অগারৰো নাম।
Yo therupaṭṭhānaṃ gantvā, avanditvā nisīdati, hatthapallatthikaṃ dussapallatthikaṃ karoti, aññaṃ vā pana hatthapādakukkuccaṃ karoti, vuḍḍhānaṃ santike anajjhiṭṭho katheti, ayaṃ saṅghe agāravo nāma.
তিস্সো পন সিক্খা অপূরেন্তোৰ সিক্খায অগারৰো নাম হোতি। অট্ঠ সমাপত্তিযো অনিব্বত্তেন্তো তাসং ৰা পন নিব্বত্তনত্থায পযোগং অকরোন্তো সমাধিস্মিং অগারৰো নাম। সুক্কপক্খো ৰুত্তৰিপল্লাসেনেৰ ৰেদিতব্বোতি। তেরসমং।
Tisso pana sikkhā apūrentova sikkhāya agāravo nāma hoti. Aṭṭha samāpattiyo anibbattento tāsaṃ vā pana nibbattanatthāya payogaṃ akaronto samādhismiṃ agāravo nāma. Sukkapakkho vuttavipallāseneva veditabboti. Terasamaṃ.
কস্সপসংযুত্তৰণ্ণনা নিট্ঠিতা।
Kassapasaṃyuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১৩. সদ্ধম্মপ্পতিরূপকসুত্তং • 13. Saddhammappatirūpakasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১৩. সদ্ধম্মপ্পতিরূপকসুত্তৰণ্ণনা • 13. Saddhammappatirūpakasuttavaṇṇanā
