| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১৩. সদ্ধম্মপ্পতিরূপকসুত্তৰণ্ণনা
13. Saddhammappatirūpakasuttavaṇṇanā
১৫৬. আজানাতি হেট্ঠিমমগ্গেহি ঞাতমরিযাদং অনতিক্কমিত্ৰাৰ জানাতি পটিৰিজ্ঝতীতি অঞ্ঞা, অগ্গমগ্গপঞ্ঞা। অঞ্ঞস্স অযন্তি অঞ্ঞা, অরহত্তফলং। তেনাহ ‘‘অরহত্তে’’তি।
156. Ājānāti heṭṭhimamaggehi ñātamariyādaṃ anatikkamitvāva jānāti paṭivijjhatīti aññā, aggamaggapaññā. Aññassa ayanti aññā, arahattaphalaṃ. Tenāha ‘‘arahatte’’ti.
ওভাসেতি ওভাসনিমিত্তং। ‘‘চিত্তং ৰিকম্পতী’’তি পদদ্ৰযং আনেত্ৰা সম্বন্ধো। ওভাসেতি ৰিসযভূতে। উপক্কিলেসেহি চিত্তং ৰিকম্পতীতি যোজনা। তেনাহ ‘‘যেহি চিত্তং পৰেধতী’’তি। সেসেসুপি এসেৰ নযো।
Obhāseti obhāsanimittaṃ. ‘‘Cittaṃ vikampatī’’ti padadvayaṃ ānetvā sambandho. Obhāseti visayabhūte. Upakkilesehi cittaṃ vikampatīti yojanā. Tenāha ‘‘yehi cittaṃ pavedhatī’’ti. Sesesupi eseva nayo.
উপট্ঠানেতি সতিযং। উপেক্খায চাতি ৰিপস্সনুপেক্খায চ। এত্থ চ ৰিপস্সনাচিত্তসমুট্ঠানসন্তানৰিনিমুত্তং পভাসনং রূপাযতনং ওভাসো। ঞাণাদযো ৰিপস্সনাচিত্তসম্পযুত্তাৰ। সকসককিচ্চে সৰিসেসো হুত্ৰা পৰত্তো অধিমোক্খো সদ্ধাধিমোক্খো। উপট্ঠানং সতি। উপেক্খাতি আৰজ্জনুপেক্খা। সা হি আৰজ্জনচিত্তসম্পযুত্তা চেতনা। আৰজ্জনঅজ্ঝুপেক্খনৰসেন পৰত্তিযা ইধ ‘‘আৰজ্জনুপেক্খা’’তি ৰুচ্চতি। পুন উপেক্খাযাতি ৰিপস্সনুপেক্খাৰ অনেন সমজ্ঝত্ততায এৰং ৰুত্তা। নিকন্তি নাম ৰিপস্সনায নিকামনা অপেক্খা। সুখুমতরকিলেসো ৰা সিযা দুৰিঞ্ঞেয্যো।
Upaṭṭhāneti satiyaṃ. Upekkhāya cāti vipassanupekkhāya ca. Ettha ca vipassanācittasamuṭṭhānasantānavinimuttaṃ pabhāsanaṃ rūpāyatanaṃ obhāso. Ñāṇādayo vipassanācittasampayuttāva. Sakasakakicce saviseso hutvā pavatto adhimokkho saddhādhimokkho. Upaṭṭhānaṃ sati. Upekkhāti āvajjanupekkhā. Sā hi āvajjanacittasampayuttā cetanā. Āvajjanaajjhupekkhanavasena pavattiyā idha ‘‘āvajjanupekkhā’’ti vuccati. Puna upekkhāyāti vipassanupekkhāva anena samajjhattatāya evaṃ vuttā. Nikanti nāma vipassanāya nikāmanā apekkhā. Sukhumatarakileso vā siyā duviññeyyo.
ইমানি দস ঠানানীতি ইমানি ওভাসাদীনি উপক্কিলেসুপ্পত্তিযা ঠানানি উপক্কিলেসৰত্থূনি। পঞ্ঞা যস্স পরিচিতাতি যস্স পঞ্ঞা পরিচিতৰতী যাথাৰতো জানাতি। ‘‘ইমানি নিস্সায অদ্ধা মগ্গপ্পত্তো ফলপ্পত্তো অহ’’ন্তি পৰত্তঅধিমানো ধম্মুদ্ধচ্চং ধম্মূপনিস্সযো ৰিক্খেপো। তত্থ কুসলো হি তং যাথাৰতো জানন্তো ন চ তত্থ সম্মোহং গচ্ছতি।
Imāni dasa ṭhānānīti imāni obhāsādīni upakkilesuppattiyā ṭhānāni upakkilesavatthūni. Paññā yassa paricitāti yassa paññā paricitavatī yāthāvato jānāti. ‘‘Imāni nissāya addhā maggappatto phalappatto aha’’nti pavattaadhimāno dhammuddhaccaṃ dhammūpanissayo vikkhepo. Tattha kusalo hi taṃ yāthāvato jānanto na ca tattha sammohaṃ gacchati.
অধিগমসদ্ধম্মপ্পতিরূপকং নাম অনধিগতে অধিগতমানিভাৰাৰহত্তা। যদগ্গেন ৰিপস্সনাঞাণস্স উপক্কিলেসো, তদগ্গেন পটিপত্তিসদ্ধম্মপ্পতিরূপকোতিপি সক্কা ৰিঞ্ঞাতুং। ধাতুকথাতি মহাধাতুকথং ৰদতি। ৰেদল্লপিটকন্তি ৰেতুল্লপিটকং। তং নাগভৰনতো আনীতন্তি ৰদন্তি। ৰাদভাসিতন্তি অপরে। অবুদ্ধৰচনং বুদ্ধৰচনেন ৰিরুজ্ঝনতো। ন হি সম্বুদ্ধো পুব্বাপরৰিরুদ্ধং ৰদতি। তত্থ সল্লং উপট্ঠপেন্তি কিলেসৰিনযং ন সন্দিস্সতি, অঞ্ঞদত্থু কিলেসুপ্পত্তিযা পচ্চযো হোতীতি।
Adhigamasaddhammappatirūpakaṃnāma anadhigate adhigatamānibhāvāvahattā. Yadaggena vipassanāñāṇassa upakkileso, tadaggena paṭipattisaddhammappatirūpakotipi sakkā viññātuṃ. Dhātukathāti mahādhātukathaṃ vadati. Vedallapiṭakanti vetullapiṭakaṃ. Taṃ nāgabhavanato ānītanti vadanti. Vādabhāsitanti apare. Abuddhavacanaṃ buddhavacanena virujjhanato. Na hi sambuddho pubbāparaviruddhaṃ vadati. Tattha sallaṃ upaṭṭhapenti kilesavinayaṃ na sandissati, aññadatthu kilesuppattiyā paccayo hotīti.
অৰিক্কযমানন্তি ৰিক্কযং অগচ্ছন্তং। তন্তি সুৰণ্ণভণ্ডং।
Avikkayamānanti vikkayaṃ agacchantaṃ. Tanti suvaṇṇabhaṇḍaṃ.
ন সক্খিংসু ঞাণস্স অৰিসদভাৰতো। এস নযো ইতো পরেসুপি।
Na sakkhiṃsu ñāṇassa avisadabhāvato. Esa nayo ito paresupi.
ইদানি ‘‘ভিক্খূ পটিসম্ভিদাপ্পত্তা অহেসু’’ন্তিআদিনা ৰুত্তমেৰ অত্থং কারণতো ৰিভাৰেতুং পুন ‘‘পঠমবোধিযং হী’’তিআদি ৰুত্তং। তত্থ পটিপত্তিং পূরযিংসূতি অতীতে কদা তে পটিসম্ভিদাৰহং পটিপত্তিং পূরযিংসু? পঠমবোধিকালিকা ভিক্খূ। ন হি অত্তসম্মাপণিধিযা পুব্বেকতপুঞ্ঞতায চ ৰিনা তাদিসং ভৰতি। এস নযো ইতো পরেসুপি। তদা পটিপত্তিসদ্ধম্মো অন্তরহিতো নাম ভৰিস্সতীতি এতেন অরিযমগ্গেন আসন্না এৰ পুব্বভাগপটিপদা পটিপত্তিসদ্ধম্মোতি দস্সেতি।
Idāni ‘‘bhikkhū paṭisambhidāppattā ahesu’’ntiādinā vuttameva atthaṃ kāraṇato vibhāvetuṃ puna ‘‘paṭhamabodhiyaṃ hī’’tiādi vuttaṃ. Tattha paṭipattiṃ pūrayiṃsūti atīte kadā te paṭisambhidāvahaṃ paṭipattiṃ pūrayiṃsu? Paṭhamabodhikālikā bhikkhū. Na hi attasammāpaṇidhiyā pubbekatapuññatāya ca vinā tādisaṃ bhavati. Esa nayo ito paresupi. Tadā paṭipattisaddhammo antarahito nāma bhavissatīti etena ariyamaggena āsannā eva pubbabhāgapaṭipadā paṭipattisaddhammoti dasseti.
দ্ৰীসূতি সুত্তাভিধম্মপিটকেসু অন্তরহিতেসুপি। অনন্তরহিতমেৰ অধিসীলসিক্খাযং ঠিতস্স ইতরসিক্খাদ্ৰযসমুট্ঠাপিততো। কিং কারণাতি কেন কারণেন, অঞ্ঞস্মিং ধম্মে অন্তরহিতে অঞ্ঞতরস্স ধম্মস্স অনন্তরধানং ৰুচ্চতীতি অধিপ্পাযো। পটিপত্তিযা পচ্চযো হোতি অনৰসেসতো পটিপত্তিক্কমস্স পরিদীপনতো। পটিপত্তি অধিগমস্স পচ্চযো ৰিসেসলক্খণপটিৰেধভাৰতো। পরিযত্তিযেৰ পমাণং সাসনস্স ঠিতিযাতি অধিপ্পাযো।
Dvīsūti suttābhidhammapiṭakesu antarahitesupi. Anantarahitameva adhisīlasikkhāyaṃ ṭhitassa itarasikkhādvayasamuṭṭhāpitato. Kiṃ kāraṇāti kena kāraṇena, aññasmiṃ dhamme antarahite aññatarassa dhammassa anantaradhānaṃ vuccatīti adhippāyo. Paṭipattiyā paccayo hoti anavasesato paṭipattikkamassa paridīpanato. Paṭipatti adhigamassa paccayo visesalakkhaṇapaṭivedhabhāvato. Pariyattiyeva pamāṇaṃ sāsanassa ṭhitiyāti adhippāyo.
ননু চ সাসনং ওসক্কিতং পরিযত্তিযা ৰত্তমানাযাতি অধিপ্পাযো। অনারাধকভিক্খূতি সীলমত্তস্সপি ন আরাধকো দুস্সীলো। ইমস্মিন্তি ইমস্মিং পাতিমোক্খে। ৰত্তন্তাতি ‘‘সীলং অকোপেত্ৰা ঠিতা অত্থী’’তি পুচ্ছি।
Nanu ca sāsanaṃ osakkitaṃ pariyattiyā vattamānāyāti adhippāyo. Anārādhakabhikkhūti sīlamattassapi na ārādhako dussīlo. Imasminti imasmiṃ pātimokkhe. Vattantāti ‘‘sīlaṃ akopetvā ṭhitā atthī’’ti pucchi.
এতেসূতি এৰং মহন্তেসু সকলং লোকং অজ্ঝোত্থরিতুং সমত্থেসু চতূসু মহাভূতেসু। তস্মাতি যস্মা অঞ্ঞেন কেনচি অতিমহন্তেনপি সদ্ধম্মো ন অন্তরধাযতি, সমযন্তরেন পন ৰত্তব্বমেৰ নত্থি, তস্মা। এৰমাহাতি ইদানি ৰুচ্চমানাকারং ৰদতি।
Etesūti evaṃ mahantesu sakalaṃ lokaṃ ajjhottharituṃ samatthesu catūsu mahābhūtesu. Tasmāti yasmā aññena kenaci atimahantenapi saddhammo na antaradhāyati, samayantarena pana vattabbameva natthi, tasmā. Evamāhāti idāni vuccamānākāraṃ vadati.
আদানং আদি, আদি এৰ আদিকন্তি আহ ‘‘আদিকেনাতি আদানেনা’’তি। হেট্ঠাগমনীযাতি অধোভাগগমনীযা, অপাযদুক্খস্স সংসারদুক্খস্স চ নিব্বত্তকাতি অত্থো। গারৰরহিতাতি গরুকাররহিতা। পতিস্সযনং নীচভাৰেন পতিবদ্ধৰুত্তিতা, পতিস্সো পতিস্সযোতি অত্থতো একং, সো এতেসং নত্থীতি আহ ‘‘অপ্পতিস্সাতি অপ্পতিস্সযা অনীচৰুত্তিকা’’তি। সেসং সুৰিঞ্ঞেয্যমেৰ।
Ādānaṃ ādi, ādi eva ādikanti āha ‘‘ādikenāti ādānenā’’ti. Heṭṭhāgamanīyāti adhobhāgagamanīyā, apāyadukkhassa saṃsāradukkhassa ca nibbattakāti attho. Gāravarahitāti garukārarahitā. Patissayanaṃ nīcabhāvena patibaddhavuttitā, patisso patissayoti atthato ekaṃ, so etesaṃ natthīti āha ‘‘appatissāti appatissayā anīcavuttikā’’ti. Sesaṃ suviññeyyameva.
সদ্ধম্মপ্পতিরূপকসুত্তৰণ্ণনা নিট্ঠিতা।
Saddhammappatirūpakasuttavaṇṇanā niṭṭhitā.
সারত্থপ্পকাসিনিযা সংযুত্তনিকায-অট্ঠকথায
Sāratthappakāsiniyā saṃyuttanikāya-aṭṭhakathāya
কস্সপসংযুত্তৰণ্ণনায লীনত্থপ্পকাসনা সমত্তা।
Kassapasaṃyuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১৩. সদ্ধম্মপ্পতিরূপকসুত্তং • 13. Saddhammappatirūpakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১৩. সদ্ধম্মপ্পতিরূপকসুত্তৰণ্ণনা • 13. Saddhammappatirūpakasuttavaṇṇanā
