| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
13. сад̣̇д̇хаммаббад̇ируубагасуд̇д̇аван̣н̣анаа
13. Saddhammappatirūpakasuttavaṇṇanā
156. ааж̇аанаад̇и хздтимамаг̇г̇зхи н̃аад̇амарияаад̣̇ам̣ анад̇иггамид̇ваава ж̇аанаад̇и бадивиж̇жхад̇ийд̇и ан̃н̃аа, аг̇г̇амаг̇г̇абан̃н̃аа. ан̃н̃асса аяанд̇и ан̃н̃аа, арахад̇д̇апалам̣. д̇знааха ‘‘арахад̇д̇з’’д̇и.
156. Ājānāti heṭṭhimamaggehi ñātamariyādaṃ anatikkamitvāva jānāti paṭivijjhatīti aññā, aggamaggapaññā. Aññassa ayanti aññā, arahattaphalaṃ. Tenāha ‘‘arahatte’’ti.
обхаасзд̇и обхаасанимид̇д̇ам̣. ‘‘жид̇д̇ам̣ вигамбад̇ий’’д̇и бад̣̇ад̣̇ваяам̣ аанзд̇ваа самб̣анд̇хо. обхаасзд̇и висаяабхууд̇з. убаггилзсзхи жид̇д̇ам̣ вигамбад̇ийд̇и яож̇анаа. д̇знааха ‘‘язхи жид̇д̇ам̣ бавзд̇хад̇ий’’д̇и. сзсзсуби зсзва наяо.
Obhāseti obhāsanimittaṃ. ‘‘Cittaṃ vikampatī’’ti padadvayaṃ ānetvā sambandho. Obhāseti visayabhūte. Upakkilesehi cittaṃ vikampatīti yojanā. Tenāha ‘‘yehi cittaṃ pavedhatī’’ti. Sesesupi eseva nayo.
убадтаанзд̇и сад̇ияам̣. убзгкааяа жаад̇и вибассанубзгкааяа жа. зд̇т̇а жа вибассанаажид̇д̇асамудтаанасанд̇аанавинимуд̇д̇ам̣ бабхаасанам̣ руубааяад̇анам̣ обхаасо. н̃аан̣аад̣̇аяо вибассанаажид̇д̇асамбаяуд̇д̇аава. сагасагагижжз сависзсо худ̇ваа бавад̇д̇о ад̇химогко сад̣̇д̇хаад̇химогко. убадтаанам̣ сад̇и. убзгкаад̇и ааваж̇ж̇анубзгкаа. саа хи ааваж̇ж̇анажид̇д̇асамбаяуд̇д̇аа жзд̇анаа. ааваж̇ж̇анааж̇жхубзгканавасзна бавад̇д̇ияаа ид̇ха ‘‘ааваж̇ж̇анубзгкаа’’д̇и вужжад̇и. буна убзгкааяаад̇и вибассанубзгкаава анзна самаж̇жхад̇д̇ад̇ааяа звам̣ вуд̇д̇аа. ниганд̇и наама вибассанааяа нигааманаа абзгкаа. сукумад̇арагилзсо ваа сияаа д̣̇увин̃н̃зяяо.
Upaṭṭhāneti satiyaṃ. Upekkhāya cāti vipassanupekkhāya ca. Ettha ca vipassanācittasamuṭṭhānasantānavinimuttaṃ pabhāsanaṃ rūpāyatanaṃ obhāso. Ñāṇādayo vipassanācittasampayuttāva. Sakasakakicce saviseso hutvā pavatto adhimokkho saddhādhimokkho. Upaṭṭhānaṃ sati. Upekkhāti āvajjanupekkhā. Sā hi āvajjanacittasampayuttā cetanā. Āvajjanaajjhupekkhanavasena pavattiyā idha ‘‘āvajjanupekkhā’’ti vuccati. Puna upekkhāyāti vipassanupekkhāva anena samajjhattatāya evaṃ vuttā. Nikanti nāma vipassanāya nikāmanā apekkhā. Sukhumatarakileso vā siyā duviññeyyo.
имаани д̣̇аса таанаанийд̇и имаани обхаасаад̣̇ийни убаггилзсуббад̇д̇ияаа таанаани убаггилзсавад̇т̇ууни. бан̃н̃аа яасса барижид̇аад̇и яасса бан̃н̃аа барижид̇авад̇ий яаат̇аавад̇о ж̇аанаад̇и. ‘‘имаани ниссааяа ад̣̇д̇хаа маг̇г̇аббад̇д̇о палаббад̇д̇о аха’’нд̇и бавад̇д̇аад̇химаано д̇хаммуд̣̇д̇хажжам̣ д̇хаммуубаниссаяо вигкзбо. д̇ад̇т̇а гусало хи д̇ам̣ яаат̇аавад̇о ж̇аананд̇о на жа д̇ад̇т̇а саммохам̣ г̇ажчад̇и.
Imāni dasa ṭhānānīti imāni obhāsādīni upakkilesuppattiyā ṭhānāni upakkilesavatthūni. Paññā yassa paricitāti yassa paññā paricitavatī yāthāvato jānāti. ‘‘Imāni nissāya addhā maggappatto phalappatto aha’’nti pavattaadhimāno dhammuddhaccaṃ dhammūpanissayo vikkhepo. Tattha kusalo hi taṃ yāthāvato jānanto na ca tattha sammohaṃ gacchati.
ад̇хиг̇амасад̣̇д̇хаммаббад̇ируубагам̣ наама анад̇хиг̇ад̇з ад̇хиг̇ад̇амаанибхааваавахад̇д̇аа. яад̣̇аг̇г̇зна вибассанаан̃аан̣асса убаггилзсо, д̇ад̣̇аг̇г̇зна бадибад̇д̇исад̣̇д̇хаммаббад̇ируубагод̇иби саггаа вин̃н̃аад̇ум̣. д̇хаад̇угат̇аад̇и махаад̇хаад̇угат̇ам̣ вад̣̇ад̇и. взд̣̇аллабидаганд̇и взд̇уллабидагам̣. д̇ам̣ нааг̇абхаванад̇о аанийд̇анд̇и вад̣̇анд̇и. ваад̣̇абхаасид̇анд̇и абарз. аб̣уд̣̇д̇хаважанам̣ б̣уд̣̇д̇хаважанзна вируж̇жханад̇о. на хи самб̣уд̣̇д̇хо буб̣б̣аабаравируд̣̇д̇хам̣ вад̣̇ад̇и. д̇ад̇т̇а саллам̣ убадтабзнд̇и гилзсавинаяам̣ на санд̣̇иссад̇и, ан̃н̃ад̣̇ад̇т̇у гилзсуббад̇д̇ияаа бажжаяо ход̇ийд̇и.
Adhigamasaddhammappatirūpakaṃnāma anadhigate adhigatamānibhāvāvahattā. Yadaggena vipassanāñāṇassa upakkileso, tadaggena paṭipattisaddhammappatirūpakotipi sakkā viññātuṃ. Dhātukathāti mahādhātukathaṃ vadati. Vedallapiṭakanti vetullapiṭakaṃ. Taṃ nāgabhavanato ānītanti vadanti. Vādabhāsitanti apare. Abuddhavacanaṃ buddhavacanena virujjhanato. Na hi sambuddho pubbāparaviruddhaṃ vadati. Tattha sallaṃ upaṭṭhapenti kilesavinayaṃ na sandissati, aññadatthu kilesuppattiyā paccayo hotīti.
авиггаяамаананд̇и виггаяам̣ аг̇ажчанд̇ам̣. д̇анд̇и суван̣н̣абхан̣д̣ам̣.
Avikkayamānanti vikkayaṃ agacchantaṃ. Tanti suvaṇṇabhaṇḍaṃ.
на сагким̣су н̃аан̣асса ависад̣̇абхаавад̇о. зса наяо ид̇о барзсуби.
Na sakkhiṃsu ñāṇassa avisadabhāvato. Esa nayo ito paresupi.
ид̣̇аани ‘‘бхигкуу бадисамбхид̣̇ааббад̇д̇аа ахзсу’’нд̇иаад̣̇инаа вуд̇д̇амзва ад̇т̇ам̣ гааран̣ад̇о вибхаавзд̇ум̣ буна ‘‘батамаб̣од̇хияам̣ хий’’д̇иаад̣̇и вуд̇д̇ам̣. д̇ад̇т̇а бадибад̇д̇им̣ буураяим̣сууд̇и ад̇ийд̇з гад̣̇аа д̇з бадисамбхид̣̇аавахам̣ бадибад̇д̇им̣ буураяим̣су? батамаб̣од̇хигаалигаа бхигкуу. на хи ад̇д̇асаммаабан̣ид̇хияаа буб̣б̣згад̇абун̃н̃ад̇ааяа жа винаа д̇аад̣̇исам̣ бхавад̇и. зса наяо ид̇о барзсуби. д̇ад̣̇аа бадибад̇д̇исад̣̇д̇хаммо анд̇арахид̇о наама бхависсад̇ийд̇и зд̇зна арияамаг̇г̇зна аасаннаа зва буб̣б̣абхааг̇абадибад̣̇аа бадибад̇д̇исад̣̇д̇хаммод̇и д̣̇ассзд̇и.
Idāni ‘‘bhikkhū paṭisambhidāppattā ahesu’’ntiādinā vuttameva atthaṃ kāraṇato vibhāvetuṃ puna ‘‘paṭhamabodhiyaṃ hī’’tiādi vuttaṃ. Tattha paṭipattiṃ pūrayiṃsūti atīte kadā te paṭisambhidāvahaṃ paṭipattiṃ pūrayiṃsu? Paṭhamabodhikālikā bhikkhū. Na hi attasammāpaṇidhiyā pubbekatapuññatāya ca vinā tādisaṃ bhavati. Esa nayo ito paresupi. Tadā paṭipattisaddhammo antarahito nāma bhavissatīti etena ariyamaggena āsannā eva pubbabhāgapaṭipadā paṭipattisaddhammoti dasseti.
д̣̇вийсууд̇и суд̇д̇аабхид̇хаммабидагзсу анд̇арахид̇зсуби. ананд̇арахид̇амзва ад̇хисийласигкааяам̣ тид̇асса ид̇арасигкаад̣̇ваяасамудтаабид̇ад̇о. гим̣ гааран̣аад̇и гзна гааран̣зна, ан̃н̃асмим̣ д̇хаммз анд̇арахид̇з ан̃н̃ад̇арасса д̇хаммасса ананд̇арад̇хаанам̣ вужжад̇ийд̇и ад̇хиббааяо. бадибад̇д̇ияаа бажжаяо ход̇и анавасзсад̇о бадибад̇д̇иггамасса барид̣̇ийбанад̇о. бадибад̇д̇и ад̇хиг̇амасса бажжаяо висзсалагкан̣абадивзд̇хабхаавад̇о. барияад̇д̇иязва бамаан̣ам̣ саасанасса тид̇ияаад̇и ад̇хиббааяо.
Dvīsūti suttābhidhammapiṭakesu antarahitesupi. Anantarahitameva adhisīlasikkhāyaṃ ṭhitassa itarasikkhādvayasamuṭṭhāpitato. Kiṃ kāraṇāti kena kāraṇena, aññasmiṃ dhamme antarahite aññatarassa dhammassa anantaradhānaṃ vuccatīti adhippāyo. Paṭipattiyā paccayo hoti anavasesato paṭipattikkamassa paridīpanato. Paṭipatti adhigamassa paccayo visesalakkhaṇapaṭivedhabhāvato. Pariyattiyeva pamāṇaṃ sāsanassa ṭhitiyāti adhippāyo.
нану жа саасанам̣ осаггид̇ам̣ барияад̇д̇ияаа вад̇д̇амаанааяаад̇и ад̇хиббааяо. анаараад̇хагабхигкууд̇и сийламад̇д̇ассаби на аараад̇хаго д̣̇уссийло. имасминд̇и имасмим̣ баад̇имогкз. вад̇д̇анд̇аад̇и ‘‘сийлам̣ агобзд̇ваа тид̇аа ад̇т̇ий’’д̇и бужчи.
Nanu ca sāsanaṃ osakkitaṃ pariyattiyā vattamānāyāti adhippāyo. Anārādhakabhikkhūti sīlamattassapi na ārādhako dussīlo. Imasminti imasmiṃ pātimokkhe. Vattantāti ‘‘sīlaṃ akopetvā ṭhitā atthī’’ti pucchi.
зд̇зсууд̇и звам̣ маханд̇зсу сагалам̣ логам̣ аж̇жход̇т̇арид̇ум̣ самад̇т̇зсу жад̇уусу махаабхууд̇зсу. д̇асмаад̇и яасмаа ан̃н̃зна гзнажи ад̇имаханд̇знаби сад̣̇д̇хаммо на анд̇арад̇хааяад̇и, самаяанд̇арзна бана вад̇д̇аб̣б̣амзва над̇т̇и, д̇асмаа. звамаахаад̇и ид̣̇аани вужжамаанаагаарам̣ вад̣̇ад̇и.
Etesūti evaṃ mahantesu sakalaṃ lokaṃ ajjhottharituṃ samatthesu catūsu mahābhūtesu. Tasmāti yasmā aññena kenaci atimahantenapi saddhammo na antaradhāyati, samayantarena pana vattabbameva natthi, tasmā. Evamāhāti idāni vuccamānākāraṃ vadati.
аад̣̇аанам̣ аад̣̇и, аад̣̇и зва аад̣̇иганд̇и ааха ‘‘аад̣̇игзнаад̇и аад̣̇аанзнаа’’д̇и. хздтааг̇аманийяаад̇и ад̇хобхааг̇аг̇аманийяаа, абааяад̣̇угкасса сам̣саарад̣̇угкасса жа ниб̣б̣ад̇д̇агаад̇и ад̇т̇о. г̇аараварахид̇аад̇и г̇аругаарарахид̇аа. бад̇иссаяанам̣ нийжабхаавзна бад̇иб̣ад̣̇д̇хавуд̇д̇ид̇аа, бад̇иссо бад̇иссаяод̇и ад̇т̇ад̇о згам̣, со зд̇зсам̣ над̇т̇ийд̇и ааха ‘‘аббад̇иссаад̇и аббад̇иссаяаа анийжавуд̇д̇игаа’’д̇и. сзсам̣ сувин̃н̃зяяамзва.
Ādānaṃ ādi, ādi eva ādikanti āha ‘‘ādikenāti ādānenā’’ti. Heṭṭhāgamanīyāti adhobhāgagamanīyā, apāyadukkhassa saṃsāradukkhassa ca nibbattakāti attho. Gāravarahitāti garukārarahitā. Patissayanaṃ nīcabhāvena patibaddhavuttitā, patisso patissayoti atthato ekaṃ, so etesaṃ natthīti āha ‘‘appatissāti appatissayā anīcavuttikā’’ti. Sesaṃ suviññeyyameva.
сад̣̇д̇хаммаббад̇ируубагасуд̇д̇аван̣н̣анаа нидтид̇аа.
Saddhammappatirūpakasuttavaṇṇanā niṭṭhitā.
саарад̇т̇аббагаасинияаа сам̣яуд̇д̇анигааяа-адтагат̇ааяа
Sāratthappakāsiniyā saṃyuttanikāya-aṭṭhakathāya
гассабасам̣яуд̇д̇аван̣н̣анааяа лийнад̇т̇аббагаасанаа самад̇д̇аа.
Kassapasaṃyuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 13. сад̣̇д̇хаммаббад̇ируубагасуд̇д̇ам̣ • 13. Saddhammappatirūpakasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 13. сад̣̇д̇хаммаббад̇ируубагасуд̇д̇аван̣н̣анаа • 13. Saddhammappatirūpakasuttavaṇṇanā
