१-१०. सद्धासुत्तादिवण्णना

1-10. Saddhāsuttādivaṇṇanā

७१-८०. अट्ठमस्स पठमादीनि उत्तानत्थानेव। दसमे कुच्छितं सीदतीति कुसीतो द-कारस्स त-कारं कत्वा। यस्स धम्मस्स वसेन पुग्गलो ‘‘कुसीतो’’ति वुच्‍चति, सो कुसितभावो इध कुसित-सद्देन वुत्तो। विनापि हि भावजोतनसद्दं भावत्थो विञ्‍ञायति यथा ‘‘पटस्स सुक्‍क’’न्ति, तस्मा कुसीतभाववत्थूनीति अत्थो। तेनाह ‘‘कोसज्‍जकारणानीति अत्थो’’ति। कम्मं नाम समणसारुप्पं ईदिसन्ति आह ‘‘चीवरविचारणादी’’ति। वीरियन्ति पधानवीरियं। तं पन चङ्कमनवसेन करणे कायिकन्तिपि वत्तब्बतं लभतीति आह ‘‘दुविधम्पी’’ति। पत्तियाति पापुणनत्थं। ओसीदनन्ति भावनानुयोगे सङ्कोचो। मासेहि आचितं निचितं वियाति मासाचितं, तं मञ्‍ञे। यस्मा मासा तिन्ता विसेसेन गरुका होन्ति, तस्मा ‘‘यथा तिन्तमासो’’तिआदि वुत्तं। वुट्ठितो होति गिलानभावाति अधिप्पायो।

71-80. Aṭṭhamassa paṭhamādīni uttānatthāneva. Dasame kucchitaṃ sīdatīti kusīto da-kārassa ta-kāraṃ katvā. Yassa dhammassa vasena puggalo ‘‘kusīto’’ti vuccati, so kusitabhāvo idha kusita-saddena vutto. Vināpi hi bhāvajotanasaddaṃ bhāvattho viññāyati yathā ‘‘paṭassa sukka’’nti, tasmā kusītabhāvavatthūnīti attho. Tenāha ‘‘kosajjakāraṇānīti attho’’ti. Kammaṃ nāma samaṇasāruppaṃ īdisanti āha ‘‘cīvaravicāraṇādī’’ti. Vīriyanti padhānavīriyaṃ. Taṃ pana caṅkamanavasena karaṇe kāyikantipi vattabbataṃ labhatīti āha ‘‘duvidhampī’’ti. Pattiyāti pāpuṇanatthaṃ. Osīdananti bhāvanānuyoge saṅkoco. Māsehi ācitaṃ nicitaṃ viyāti māsācitaṃ, taṃ maññe. Yasmā māsā tintā visesena garukā honti, tasmā ‘‘yathā tintamāso’’tiādi vuttaṃ. Vuṭṭhito hoti gilānabhāvāti adhippāyo.

तेसन्ति आरम्भवत्थूनं। इमिनाव नयेनाति इमिना कुसीतवत्थूसु वुत्तेनेव नयेन ‘‘दुविधम्पि वीरियं आरभती’’तिआदिना। इदं पठमन्ति ‘‘इदं, हन्दाहं, वीरियं आरभामी’’ति, ‘‘एवं भावनाय अब्भुस्सहनं पठमं आरम्भवत्थू’’तिआदिना च अत्थो वेदितब्बो। यथा तथा पठमं पवत्तं अब्भुस्सहनञ्हि उपरि वीरियारम्भस्स कारणं होति। अनुरूपपच्‍चवेक्खणसहितानि हि अब्भुस्सहनानि तम्मूलकानि वा पच्‍चवेक्खणानि अट्ठ आरम्भवत्थूनीति वेदितब्बानि।

Tesanti ārambhavatthūnaṃ. Imināva nayenāti iminā kusītavatthūsu vutteneva nayena ‘‘duvidhampi vīriyaṃ ārabhatī’’tiādinā. Idaṃ paṭhamanti ‘‘idaṃ, handāhaṃ, vīriyaṃ ārabhāmī’’ti, ‘‘evaṃ bhāvanāya abbhussahanaṃ paṭhamaṃ ārambhavatthū’’tiādinā ca attho veditabbo. Yathā tathā paṭhamaṃ pavattaṃ abbhussahanañhi upari vīriyārambhassa kāraṇaṃ hoti. Anurūpapaccavekkhaṇasahitāni hi abbhussahanāni tammūlakāni vā paccavekkhaṇāni aṭṭha ārambhavatthūnīti veditabbāni.

सद्धासुत्तादिवण्णना निट्ठिता।

Saddhāsuttādivaṇṇanā niṭṭhitā.

यमकवग्गवण्णना निट्ठिता।

Yamakavaggavaṇṇanā niṭṭhitā.

८१-६२६. सेसं उत्तानमेव।

81-626. Sesaṃ uttānameva.

इति मनोरथपूरणिया अङ्गुत्तरनिकाय-अट्ठकथाय

Iti manorathapūraṇiyā aṅguttaranikāya-aṭṭhakathāya

अट्ठकनिपातवण्णनाय अनुत्तानत्थदीपना समत्ता।

Aṭṭhakanipātavaṇṇanāya anuttānatthadīpanā samattā.

Next: १-२. सम्बोधिसुत्तादिवण्णना • 1-2. Sambodhisuttādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact