Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya

    ๘. สทฺธสุตฺตํ

    8. Saddhasuttaṃ

    ๓๘. ‘‘ปญฺจิเม , ภิกฺขเว, สเทฺธ กุลปุเตฺต อานิสํสาฯ กตเม ปญฺจ? เย เต, ภิกฺขเว, โลเก สโนฺต สปฺปุริสา เต สทฺธเญฺญว ปฐมํ อนุกมฺปนฺตา อนุกมฺปนฺติ, โน ตถา อสฺสทฺธํ; สทฺธเญฺญว ปฐมํ อุปสงฺกมนฺตา อุปสงฺกมนฺติ, โน ตถา อสฺสทฺธํ; สทฺธเญฺญว ปฐมํ ปฎิคฺคณฺหนฺตา ปฎิคฺคณฺหนฺติ, โน ตถา อสฺสทฺธํ; สทฺธเญฺญว ปฐมํ ธมฺมํ เทเสนฺตา เทเสนฺติ, โน ตถา อสฺสทฺธํ; สโทฺธ กายสฺส เภทา ปรํ มรณา สุคติํ สคฺคํ โลกํ อุปปชฺชติฯ อิเม โข, ภิกฺขเว, ปญฺจ สเทฺธ กุลปุเตฺต อานิสํสาฯ

    38. ‘‘Pañcime , bhikkhave, saddhe kulaputte ānisaṃsā. Katame pañca? Ye te, bhikkhave, loke santo sappurisā te saddhaññeva paṭhamaṃ anukampantā anukampanti, no tathā assaddhaṃ; saddhaññeva paṭhamaṃ upasaṅkamantā upasaṅkamanti, no tathā assaddhaṃ; saddhaññeva paṭhamaṃ paṭiggaṇhantā paṭiggaṇhanti, no tathā assaddhaṃ; saddhaññeva paṭhamaṃ dhammaṃ desentā desenti, no tathā assaddhaṃ; saddho kāyassa bhedā paraṃ maraṇā sugatiṃ saggaṃ lokaṃ upapajjati. Ime kho, bhikkhave, pañca saddhe kulaputte ānisaṃsā.

    ‘‘เสยฺยถาปิ, ภิกฺขเว, สุภูมิยํ จตุมหาปเถ มหานิโคฺรโธ สมนฺตา ปกฺขีนํ ปฎิสรณํ โหติ; เอวเมวํ โข, ภิกฺขเว, สโทฺธ กุลปุโตฺต พหุโน ชนสฺส ปฎิสรณํ โหติ ภิกฺขูนํ ภิกฺขุนีนํ อุปาสกานํ อุปาสิกาน’’นฺติฯ

    ‘‘Seyyathāpi, bhikkhave, subhūmiyaṃ catumahāpathe mahānigrodho samantā pakkhīnaṃ paṭisaraṇaṃ hoti; evamevaṃ kho, bhikkhave, saddho kulaputto bahuno janassa paṭisaraṇaṃ hoti bhikkhūnaṃ bhikkhunīnaṃ upāsakānaṃ upāsikāna’’nti.

    ‘‘สาขาปตฺตผลูเปโต 1, ขนฺธิมาว 2 มหาทุโม;

    ‘‘Sākhāpattaphalūpeto 3, khandhimāva 4 mahādumo;

    มูลวา ผลสมฺปโนฺน, ปติฎฺฐา โหติ ปกฺขินํฯ

    Mūlavā phalasampanno, patiṭṭhā hoti pakkhinaṃ.

    ‘‘มโนรเม อายตเน, เสวนฺติ นํ วิหงฺคมา;

    ‘‘Manorame āyatane, sevanti naṃ vihaṅgamā;

    ฉายํ ฉายตฺถิกา 5 ยนฺติ, ผลตฺถา ผลโภชิโนฯ

    Chāyaṃ chāyatthikā 6 yanti, phalatthā phalabhojino.

    ‘‘ตเถว สีลสมฺปนฺนํ, สทฺธํ ปุริสปุคฺคลํ;

    ‘‘Tatheva sīlasampannaṃ, saddhaṃ purisapuggalaṃ;

    นิวาตวุตฺติํ อตฺถทฺธํ, โสรตํ สขิลํ มุทุํฯ

    Nivātavuttiṃ atthaddhaṃ, sorataṃ sakhilaṃ muduṃ.

    ‘‘วีตราคา วีตโทสา, วีตโมหา อนาสวา;

    ‘‘Vītarāgā vītadosā, vītamohā anāsavā;

    ปุญฺญเกฺขตฺตานิ โลกสฺมิํ, เสวนฺติ ตาทิสํ นรํฯ

    Puññakkhettāni lokasmiṃ, sevanti tādisaṃ naraṃ.

    ‘‘เต ตสฺส ธมฺมํ เทเสนฺติ, สพฺพทุกฺขาปนูทนํ;

    ‘‘Te tassa dhammaṃ desenti, sabbadukkhāpanūdanaṃ;

    ยํ โส ธมฺมํ อิธญฺญาย, ปรินิพฺพาติ อนาสโว’’ติฯ อฎฺฐมํ;

    Yaṃ so dhammaṃ idhaññāya, parinibbāti anāsavo’’ti. aṭṭhamaṃ;




    Next: ๙. ปุตฺตสุตฺตํ • 9. Puttasuttaṃ




    Footnotes:
    1. สาขาปตฺตพหุเปโต (กตฺถจิ), สาขาปตฺตปลาสูเปโต (?)
    2. ขนฺธิมา จ (สี.)
    3. sākhāpattabahupeto (katthaci), sākhāpattapalāsūpeto (?)
    4. khandhimā ca (sī.)
    5. ฉายตฺถิโน (สี.)
    6. chāyatthino (sī.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๘. สทฺธสุตฺตวณฺณนา • 8. Saddhasuttavaṇṇanā

    ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๘. สทฺธสุตฺตวณฺณนา • 8. Saddhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact