| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. ஸத்³த⁴ஸுத்தவண்ணனா
9. Saddhasuttavaṇṇanā
9. நவமே தோ³ணியா ப³த்³தோ⁴தி யவஸஸ்ஸதோ³ணியா ஸமீபே ப³த்³தோ⁴. அந்தரங் கரித்வாதி அப்³ப⁴ந்தரே கத்வா. ஜா²யதீதி சிந்தேதி. பஜ்ஜா²யதீதி இதோ சிதோ ச நானப்பகாரகங் ஜா²யதி. நிஜ்ஜா²யதீதி நிரந்தரவஸேன நிப³த்³த⁴ங் ஜா²யதி. பத²விம்பி நிஸ்ஸாய ஜா²யதீதி ஸமாபத்தியங் ஸனிகந்திகவஸேனேதங் வுத்தங். ஸமாபத்தியஞ்ஹி ஸனிகந்திகத்தா ஏஸ க²ளுங்கோ நாம கதோ. ஆபாதீ³ஸுபி ஏஸேவ நயோ.
9. Navame doṇiyā baddhoti yavasassadoṇiyā samīpe baddho. Antaraṃ karitvāti abbhantare katvā. Jhāyatīti cinteti. Pajjhāyatīti ito cito ca nānappakārakaṃ jhāyati. Nijjhāyatīti nirantaravasena nibaddhaṃ jhāyati. Pathavimpi nissāya jhāyatīti samāpattiyaṃ sanikantikavasenetaṃ vuttaṃ. Samāpattiyañhi sanikantikattā esa khaḷuṅko nāma kato. Āpādīsupi eseva nayo.
கத²ஞ்ச ஸத்³த⁴ ஆஜானீயஜா²யிதங் ஹோதீதி கத²ங் காரணாகாரணங் ஜானந்தஸ்ஸ ஸிந்த⁴வஸ்ஸ ஜா²யிதங் ஹோதி. யதா² இணந்திஆதீ³ஸு இணஸதி³ஸங் ப³ந்த⁴னஸதி³ஸங் த⁴னஜானிஸதி³ஸங் கலிஸங்கா²தமஹாபராத⁴ஸதி³ஸஞ்ச கத்வா அத்தனோ அபி⁴முக²ஸ்ஸ பதோத³ஸ்ஸ அஜ்ஜோ²ஹரணஸங்கா²தங் பதனங் விபஸ்ஸதீதி அத்தோ². நேவ பத²விங் நிஸ்ஸாய ஜா²யதீதி ஸமாபத்திஸுக²னிகந்தியா அபா⁴வேன பத²விஆரம்மணாய சதுக்கபஞ்சகஜ்ஜா²னஸஞ்ஞாய ந ஜா²யதி, நியந்தியா அபா⁴வேனேவ ஸோ ஆஜானீயோ நாம ஹோதீதி. ஜா²யதி ச பனாதி நிப்³பா³னாரம்மணாய ப²லஸமாபத்தியா ஜா²யதி. பத²வியங் பத²விஸஞ்ஞா விபூ⁴தா ஹோதீதி பத²வாரம்மணே உப்பன்னா சதுக்கபஞ்சகஜ்ஜா²னஸஞ்ஞா விபூ⁴தா பாகடா ஹோதி. ‘‘விபூ⁴தா, ப⁴ந்தே, ரூபஸஞ்ஞா அவிபூ⁴தா அட்டி²கஸஞ்ஞா’’தி இமஸ்மிஞ்ஹி ஸுத்தே ஸமதிக்கமஸ்ஸ அத்தி²தாய விபூ⁴ததா வுத்தா, இத⁴ பன விபஸ்ஸனாவஸேன அனிச்சது³க்கா²னத்ததோ தி³ட்ட²த்தா விபூ⁴தா நாம ஜாதா. ஆபோஸஞ்ஞாதீ³ஸுபி ஏஸேவ நயோ. ஏவமெத்த² ஹெட்டா² விய ஸமாபத்திவஸேன ஸமதிக்கமங் அவத்வா விபஸ்ஸனாசாரவஸேன ஸமதிக்கமோ வுத்தோ. ஏவங் ஜா²யீதி ஏவங் விபஸ்ஸனாபடிபாடியா ஆக³ந்த்வா உப்பாதி³தாய ப²லஸமாபத்தியா ஜா²யந்தோ.
Kathañca saddha ājānīyajhāyitaṃ hotīti kathaṃ kāraṇākāraṇaṃ jānantassa sindhavassa jhāyitaṃ hoti. Yathā iṇantiādīsu iṇasadisaṃ bandhanasadisaṃ dhanajānisadisaṃ kalisaṅkhātamahāparādhasadisañca katvā attano abhimukhassa patodassa ajjhoharaṇasaṅkhātaṃ patanaṃ vipassatīti attho. Neva pathaviṃ nissāya jhāyatīti samāpattisukhanikantiyā abhāvena pathaviārammaṇāya catukkapañcakajjhānasaññāya na jhāyati, niyantiyā abhāveneva so ājānīyo nāma hotīti. Jhāyati ca panāti nibbānārammaṇāya phalasamāpattiyā jhāyati. Pathaviyaṃ pathavisaññā vibhūtā hotīti pathavārammaṇe uppannā catukkapañcakajjhānasaññā vibhūtā pākaṭā hoti. ‘‘Vibhūtā, bhante, rūpasaññā avibhūtā aṭṭhikasaññā’’ti imasmiñhi sutte samatikkamassa atthitāya vibhūtatā vuttā, idha pana vipassanāvasena aniccadukkhānattato diṭṭhattā vibhūtā nāma jātā. Āposaññādīsupi eseva nayo. Evamettha heṭṭhā viya samāpattivasena samatikkamaṃ avatvā vipassanācāravasena samatikkamo vutto. Evaṃ jhāyīti evaṃ vipassanāpaṭipāṭiyā āgantvā uppāditāya phalasamāpattiyā jhāyanto.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. ஸத்³த⁴ஸுத்தங் • 9. Saddhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-10. கிமத்தி²யஸுத்தாதி³வண்ணனா • 1-10. Kimatthiyasuttādivaṇṇanā
