| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. ஸத்³தா⁴ஸுத்தவண்ணனா
6. Saddhāsuttavaṇṇanā
36. ச²ட்டே² ஸத்³தா⁴ து³தியா புரிஸஸ்ஸ ஹோதீதி புரிஸஸ்ஸ தே³வலோகே மனுஸ்ஸலோகே சேவ நிப்³பா³னஞ்ச க³ச்ச²ந்தஸ்ஸ ஸத்³தா⁴ து³தியா ஹோதி, ஸஹாயகிச்சங் ஸாதே⁴தி. நோ சே அஸ்ஸத்³தி⁴யங் அவதிட்ட²தீதி யதி³ அஸ்ஸத்³தி⁴யங் ந திட்ட²தி. யஸோதி பரிவாரோ. கித்தீதி வண்ணப⁴ணனங். தத்வஸ்ஸ ஹோதீதி ததோ அஸ்ஸ ஹோதி. நானுபதந்தி ஸங்கா³தி ராக³ஸங்கா³த³யோ பஞ்ச ஸங்கா³ ந அனுபதந்தி. பமாத³மனுயுஞ்ஜந்தீதி யே பமாத³ங் கரொந்தி நிப்³ப³த்தெந்தி, தே தங் அனுயுஞ்ஜந்தி நாம. த⁴னங் ஸெட்ட²ங்வ ரக்க²தீதி முத்தாமணிஸாராதி³உத்தமத⁴னங் விய ரக்க²தி. ஜா²யந்தோதி லக்க²ணூபனிஜ்ஜா²னேன ச ஆரம்மணூபனிஜ்ஜா²னேன ச ஜா²யந்தோ. தத்த² லக்க²ணூபனிஜ்ஜா²னங் நாம விபஸ்ஸனாமக்³க³ப²லானி. விபஸ்ஸனா ஹி தீணி லக்க²ணானி உபனிஜ்ஜா²யதீதி லக்க²ணூபனிஜ்ஜா²னங். மக்³கோ³ விபஸ்ஸனாய ஆக³தகிச்சங் ஸாதே⁴தீதி லக்க²ணூபனிஜ்ஜா²னங். ப²லங் தத²லக்க²ணங் நிரோத⁴ஸச்சங் உபனிஜ்ஜா²யதீதி லக்க²ணூபனிஜ்ஜா²னங். அட்ட² ஸமாபத்தியோ பன கஸிணாரம்மணஸ்ஸ உபனிஜ்ஜா²யனதோ ஆரம்மணூபனிஜ்ஜா²னந்தி வேதி³தப்³பா³. பரமங் நாம அரஹத்தஸுக²ங் அதி⁴ப்பேதந்தி. ச²ட்ட²ங்.
36. Chaṭṭhe saddhā dutiyā purisassa hotīti purisassa devaloke manussaloke ceva nibbānañca gacchantassa saddhā dutiyā hoti, sahāyakiccaṃ sādheti. No ce assaddhiyaṃ avatiṭṭhatīti yadi assaddhiyaṃ na tiṭṭhati. Yasoti parivāro. Kittīti vaṇṇabhaṇanaṃ. Tatvassa hotīti tato assa hoti. Nānupatanti saṅgāti rāgasaṅgādayo pañca saṅgā na anupatanti. Pamādamanuyuñjantīti ye pamādaṃ karonti nibbattenti, te taṃ anuyuñjanti nāma. Dhanaṃ seṭṭhaṃva rakkhatīti muttāmaṇisārādiuttamadhanaṃ viya rakkhati. Jhāyantoti lakkhaṇūpanijjhānena ca ārammaṇūpanijjhānena ca jhāyanto. Tattha lakkhaṇūpanijjhānaṃ nāma vipassanāmaggaphalāni. Vipassanā hi tīṇi lakkhaṇāni upanijjhāyatīti lakkhaṇūpanijjhānaṃ. Maggo vipassanāya āgatakiccaṃ sādhetīti lakkhaṇūpanijjhānaṃ. Phalaṃ tathalakkhaṇaṃ nirodhasaccaṃ upanijjhāyatīti lakkhaṇūpanijjhānaṃ. Aṭṭha samāpattiyo pana kasiṇārammaṇassa upanijjhāyanato ārammaṇūpanijjhānanti veditabbā. Paramaṃ nāma arahattasukhaṃ adhippetanti. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 6. ஸத்³தா⁴ஸுத்தங் • 6. Saddhāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. ஸத்³தா⁴ஸுத்தவண்ணனா • 6. Saddhāsuttavaṇṇanā
