| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. ஸத்³த⁴ஸுத்தவண்ணனா
8. Saddhasuttavaṇṇanā
38. அட்ட²மே அனுகம்பந்தீதி ‘‘ஸப்³பே³ ஸத்தா ஸுகீ² ஹொந்து அவேரா அப்³யாபஜ்ஜா’’தி ஏவங் ஹிதப²ரணேன அனுக்³க³ண்ஹந்தி. அபிச உபட்டா²கானங் கே³ஹங் அஞ்ஞே ஸீலவந்தே ஸப்³ரஹ்மசாரினோ க³ஹெத்வா பவிஸந்தாபி அனுக்³க³ண்ஹந்தி நாம. நீசவுத்திந்தி பணிபாதஸீலங். கோத⁴மானத²த்³த⁴தாய ரஹிதந்தி கோத⁴மானவஸேன உப்பன்னோ யோ த²த்³த⁴பா⁴வோ சித்தஸ்ஸ உத்³து⁴மாதலக்க²ணோ, தேன விரஹிதந்தி அத்தோ². ஸோரச்சேனாதி ‘‘தத்த² கதமங் ஸோரச்சங்? யோ காயிகோ அவீதிக்கமோ, வாசஸிகோ அவீதிக்கமோ, காயிகவாசஸிகோ அவீதிக்கமோ, இத³ங் வுச்சதி ஸோரச்சங். ஸப்³போ³பி ஸீலஸங்வரோ ஸோரச்ச’’ந்தி ஏவமாக³தேன ஸீலஸங்வரஸங்கா²தேன ஸோரதபா⁴வேன. ஸகி²லந்தி ‘‘தத்த² கதமங் ஸாக²ல்யங்? யா ஸா வாசா த²த்³த⁴கா கக்கஸா ப²ருஸா கடுகா அபி⁴ஸஜ்ஜனீ கோத⁴ஸாமந்தா அஸமாதி⁴ஸங்வத்தனிகா, ததா²ரூபிங் வாசங் பஹாய யா ஸா வாசா நேலா கண்ணஸுகா² பேமனீயா ஹத³யங்க³மா போரீ ப³ஹுஜனகந்தா ப³ஹுஜனமனாபா, ததா²ரூபிங் வாசங் பா⁴ஸிதா ஹோதி. யா தத்த² ஸண்ஹவாசதா ஸகி²லவாசதா அப²ருஸவாசதா, இத³ங் வுச்சதி ஸாக²ல்ய’’ந்தி (த⁴॰ ஸ॰ 1350) ஏவங் வுத்தேன ஸம்மோத³கமுது³பா⁴வேன ஸமன்னாக³தங். தேனாஹ ‘‘ஸகி²லந்தி ஸம்மோத³க’’ந்தி.
38. Aṭṭhame anukampantīti ‘‘sabbe sattā sukhī hontu averā abyāpajjā’’ti evaṃ hitapharaṇena anuggaṇhanti. Apica upaṭṭhākānaṃ gehaṃ aññe sīlavante sabrahmacārino gahetvā pavisantāpi anuggaṇhanti nāma. Nīcavuttinti paṇipātasīlaṃ. Kodhamānathaddhatāya rahitanti kodhamānavasena uppanno yo thaddhabhāvo cittassa uddhumātalakkhaṇo, tena virahitanti attho. Soraccenāti ‘‘tattha katamaṃ soraccaṃ? Yo kāyiko avītikkamo, vācasiko avītikkamo, kāyikavācasiko avītikkamo, idaṃ vuccati soraccaṃ. Sabbopi sīlasaṃvaro soracca’’nti evamāgatena sīlasaṃvarasaṅkhātena soratabhāvena. Sakhilanti ‘‘tattha katamaṃ sākhalyaṃ? Yā sā vācā thaddhakā kakkasā pharusā kaṭukā abhisajjanī kodhasāmantā asamādhisaṃvattanikā, tathārūpiṃ vācaṃ pahāya yā sā vācā nelā kaṇṇasukhā pemanīyā hadayaṅgamā porī bahujanakantā bahujanamanāpā, tathārūpiṃ vācaṃ bhāsitā hoti. Yā tattha saṇhavācatā sakhilavācatā apharusavācatā, idaṃ vuccati sākhalya’’nti (dha. sa. 1350) evaṃ vuttena sammodakamudubhāvena samannāgataṃ. Tenāha ‘‘sakhilanti sammodaka’’nti.
ஸத்³த⁴ஸுத்தவண்ணனா நிட்டி²தா.
Saddhasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. ஸத்³த⁴ஸுத்தங் • 8. Saddhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. ஸத்³த⁴ஸுத்தவண்ணனா • 8. Saddhasuttavaṇṇanā
