| Library / Tipiṭaka / तिपिटक • Tipiṭaka / संयुत्तनिकाय (अट्ठकथा) • Saṃyuttanikāya (aṭṭhakathā) |
६. सद्धासुत्तवण्णना
6. Saddhāsuttavaṇṇanā
३६. छट्ठे सद्धा दुतिया पुरिसस्स होतीति पुरिसस्स देवलोके मनुस्सलोके चेव निब्बानञ्च गच्छन्तस्स सद्धा दुतिया होति, सहायकिच्चं साधेति। नो चे अस्सद्धियं अवतिट्ठतीति यदि अस्सद्धियं न तिट्ठति। यसोति परिवारो। कित्तीति वण्णभणनं। तत्वस्स होतीति ततो अस्स होति। नानुपतन्ति सङ्गाति रागसङ्गादयो पञ्च सङ्गा न अनुपतन्ति। पमादमनुयुञ्जन्तीति ये पमादं करोन्ति निब्बत्तेन्ति, ते तं अनुयुञ्जन्ति नाम। धनं सेट्ठंव रक्खतीति मुत्तामणिसारादिउत्तमधनं विय रक्खति। झायन्तोति लक्खणूपनिज्झानेन च आरम्मणूपनिज्झानेन च झायन्तो। तत्थ लक्खणूपनिज्झानं नाम विपस्सनामग्गफलानि। विपस्सना हि तीणि लक्खणानि उपनिज्झायतीति लक्खणूपनिज्झानं। मग्गो विपस्सनाय आगतकिच्चं साधेतीति लक्खणूपनिज्झानं। फलं तथलक्खणं निरोधसच्चं उपनिज्झायतीति लक्खणूपनिज्झानं। अट्ठ समापत्तियो पन कसिणारम्मणस्स उपनिज्झायनतो आरम्मणूपनिज्झानन्ति वेदितब्बा। परमं नाम अरहत्तसुखं अधिप्पेतन्ति। छट्ठं।
36. Chaṭṭhe saddhā dutiyā purisassa hotīti purisassa devaloke manussaloke ceva nibbānañca gacchantassa saddhā dutiyā hoti, sahāyakiccaṃ sādheti. No ce assaddhiyaṃ avatiṭṭhatīti yadi assaddhiyaṃ na tiṭṭhati. Yasoti parivāro. Kittīti vaṇṇabhaṇanaṃ. Tatvassa hotīti tato assa hoti. Nānupatanti saṅgāti rāgasaṅgādayo pañca saṅgā na anupatanti. Pamādamanuyuñjantīti ye pamādaṃ karonti nibbattenti, te taṃ anuyuñjanti nāma. Dhanaṃ seṭṭhaṃva rakkhatīti muttāmaṇisārādiuttamadhanaṃ viya rakkhati. Jhāyantoti lakkhaṇūpanijjhānena ca ārammaṇūpanijjhānena ca jhāyanto. Tattha lakkhaṇūpanijjhānaṃ nāma vipassanāmaggaphalāni. Vipassanā hi tīṇi lakkhaṇāni upanijjhāyatīti lakkhaṇūpanijjhānaṃ. Maggo vipassanāya āgatakiccaṃ sādhetīti lakkhaṇūpanijjhānaṃ. Phalaṃ tathalakkhaṇaṃ nirodhasaccaṃ upanijjhāyatīti lakkhaṇūpanijjhānaṃ. Aṭṭha samāpattiyo pana kasiṇārammaṇassa upanijjhāyanato ārammaṇūpanijjhānanti veditabbā. Paramaṃ nāma arahattasukhaṃ adhippetanti. Chaṭṭhaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ६. सद्धासुत्तं • 6. Saddhāsuttaṃ
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ६. सद्धासुत्तवण्णना • 6. Saddhāsuttavaṇṇanā
