| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
6. සද්‌ධාසුත්‌තවණ්‌ණනා
6. Saddhāsuttavaṇṇanā
36. ඡට්‌ඨෙ සද්‌ධා දුතියා පුරිසස්‌ස හොතීති පුරිසස්‌ස දෙවලොකෙ මනුස්‌සලොකෙ චෙව නිබ්‌බානඤ්‌ච ගච්‌ඡන්‌තස්‌ස සද්‌ධා දුතියා හොති, සහායකිච්‌චං සාධෙති. නො චෙ අස්‌සද්‌ධියං අවතිට්‌ඨතීති යදි අස්‌සද්‌ධියං න තිට්‌ඨති. යසොති පරිවාරො. කිත්‌තීති වණ්‌ණභණනං. තත්‌වස්‌ස හොතීති තතො අස්‌ස හොති. නානුපතන්‌ති සඞ්‌ගාති රාගසඞ්‌ගාදයො පඤ්‌ච සඞ්‌ගා න අනුපතන්‌ති. පමාදමනුයුඤ්‌ජන්‌තීති යෙ පමාදං කරොන්‌ති නිබ්‌බත්‌තෙන්‌ති, තෙ තං අනුයුඤ්‌ජන්‌ති නාම. ධනං සෙට්‌ඨංව රක්‌ඛතීති මුත්‌තාමණිසාරාදිඋත්‌තමධනං විය රක්‌ඛති. ඣායන්‌තොති ලක්‌ඛණූපනිජ්‌ඣානෙන ච ආරම්‌මණූපනිජ්‌ඣානෙන ච ඣායන්‌තො. තත්‌ථ ලක්‌ඛණූපනිජ්‌ඣානං නාම විපස්‌සනාමග්‌ගඵලානි. විපස්‌සනා හි තීණි ලක්‌ඛණානි උපනිජ්‌ඣායතීති ලක්‌ඛණූපනිජ්‌ඣානං. මග්‌ගො විපස්‌සනාය ආගතකිච්‌චං සාධෙතීති ලක්‌ඛණූපනිජ්‌ඣානං. ඵලං තථලක්‌ඛණං නිරොධසච්‌චං උපනිජ්‌ඣායතීති ලක්‌ඛණූපනිජ්‌ඣානං. අට්‌ඨ සමාපත්‌තියො පන කසිණාරම්‌මණස්‌ස උපනිජ්‌ඣායනතො ආරම්‌මණූපනිජ්‌ඣානන්‌ති වෙදිතබ්‌බා. පරමං නාම අරහත්‌තසුඛං අධිප්‌පෙතන්‌ති. ඡට්‌ඨං.
36. Chaṭṭhe saddhā dutiyā purisassa hotīti purisassa devaloke manussaloke ceva nibbānañca gacchantassa saddhā dutiyā hoti, sahāyakiccaṃ sādheti. No ce assaddhiyaṃ avatiṭṭhatīti yadi assaddhiyaṃ na tiṭṭhati. Yasoti parivāro. Kittīti vaṇṇabhaṇanaṃ. Tatvassa hotīti tato assa hoti. Nānupatanti saṅgāti rāgasaṅgādayo pañca saṅgā na anupatanti. Pamādamanuyuñjantīti ye pamādaṃ karonti nibbattenti, te taṃ anuyuñjanti nāma. Dhanaṃ seṭṭhaṃva rakkhatīti muttāmaṇisārādiuttamadhanaṃ viya rakkhati. Jhāyantoti lakkhaṇūpanijjhānena ca ārammaṇūpanijjhānena ca jhāyanto. Tattha lakkhaṇūpanijjhānaṃ nāma vipassanāmaggaphalāni. Vipassanā hi tīṇi lakkhaṇāni upanijjhāyatīti lakkhaṇūpanijjhānaṃ. Maggo vipassanāya āgatakiccaṃ sādhetīti lakkhaṇūpanijjhānaṃ. Phalaṃ tathalakkhaṇaṃ nirodhasaccaṃ upanijjhāyatīti lakkhaṇūpanijjhānaṃ. Aṭṭha samāpattiyo pana kasiṇārammaṇassa upanijjhāyanato ārammaṇūpanijjhānanti veditabbā. Paramaṃ nāma arahattasukhaṃ adhippetanti. Chaṭṭhaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 6. සද්‌ධාසුත්‌තං • 6. Saddhāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. සද්‌ධාසුත්‌තවණ්‌ණනා • 6. Saddhāsuttavaṇṇanā
