| Library / Tipiṭaka / တိပိဋက • Tipiṭaka / မဟာဝဂ္ဂ-အဋ္ဌကထာ • Mahāvagga-aṭṭhakathā |
သဒ္ဓိဝိဟာရိကဝတ္တကထာ
Saddhivihārikavattakathā
၆၇. ဥပဇ္ဈာယေန သဒ္ဓိဝိဟာရိကမ္ဟိ သမ္မာဝတ္တနာယံ – သင္ဂဟေတဗ္ဗော အနုဂ္ဂဟေတဗ္ဗောတိ ဥဒ္ဒေသာဒီဟိသ္သ သင္ဂဟော စ အနုဂ္ဂဟော စ ကတ္တဗ္ဗော။ တတ္ထ ဥဒ္ဒေသောတိ ပာဠိဝာစနံ။ ပရိပုစ္ဆာတိ ပာဠိယာ အတ္ထဝဏ္ဏနာ။ ဩဝာဒောတိ အနောတိဏ္ဏေ ဝတ္ထုသ္မိံ ‘‘ဣဒံ ကရောဟိ, ဣဒံ မာ ကရိတ္ထာ’’တိ ဝစနံ။ အနုသာသနီတိ ဩတိဏ္ဏေ ဝတ္ထုသ္မိံ။ အပိ စ ဩတိဏ္ဏေ ဝာ အနောတိဏ္ဏေ ဝာ ပဌမံ ဝစနံ ဩဝာဒော; ပုနပ္ပုနံ ဝစနံ အနုသာသနီတိ။ သစေ ဥပဇ္ဈာယသ္သ ပတ္တော ဟောတီတိ သစေ အတိရေကပတ္တော ဟောတိ။ ဧသ နယော သဗ္ဗတ္ထ။ ပရိက္ခာရောတိ အညောပိ သမဏပရိက္ခာရော။ ဣဓ ဥသ္သုက္ကံ နာမ ဓမ္မိကေန နယေန ဥပ္ပဇ္ဇမာနဥပာယပရိယေသနံ။ ဣတော ပရံ ဒန္တကဋ္ဌဒာနံ အာဒိံ ကတ္ဝာ အာစမနကုမ္ဘိယာ ဥဒကာသိဉ္စနပရိယောသာနံ ဝတ္တံ ဂိလာနသ္သေဝ သဒ္ဓိဝိဟာရိကသ္သ ကာတဗ္ဗံ။ အနဘိရတိဝူပကာသနာဒိ ပန အဂိလာနသ္သာပိ ကတ္တဗ္ဗမေဝ။ စီဝရံ ရဇန္တေနာတိ ‘‘ဧဝံ ရဇေယ္ယာသီ’’တိ ဥပဇ္ဈာယတော ဥပာယံ သုတ္ဝာ ရဇန္တေန။ သေသံ ဝုတ္တနယေနေဝ ဝေဒိတဗ္ဗံ။
67. Upajjhāyena saddhivihārikamhi sammāvattanāyaṃ – saṅgahetabbo anuggahetabboti uddesādīhissa saṅgaho ca anuggaho ca kattabbo. Tattha uddesoti pāḷivācanaṃ. Paripucchāti pāḷiyā atthavaṇṇanā. Ovādoti anotiṇṇe vatthusmiṃ ‘‘idaṃ karohi, idaṃ mā karitthā’’ti vacanaṃ. Anusāsanīti otiṇṇe vatthusmiṃ. Api ca otiṇṇe vā anotiṇṇe vā paṭhamaṃ vacanaṃ ovādo; punappunaṃ vacanaṃ anusāsanīti. Sace upajjhāyassa patto hotīti sace atirekapatto hoti. Esa nayo sabbattha. Parikkhāroti aññopi samaṇaparikkhāro. Idha ussukkaṃ nāma dhammikena nayena uppajjamānaupāyapariyesanaṃ. Ito paraṃ dantakaṭṭhadānaṃ ādiṃ katvā ācamanakumbhiyā udakāsiñcanapariyosānaṃ vattaṃ gilānasseva saddhivihārikassa kātabbaṃ. Anabhirativūpakāsanādi pana agilānassāpi kattabbameva. Cīvaraṃ rajantenāti ‘‘evaṃ rajeyyāsī’’ti upajjhāyato upāyaṃ sutvā rajantena. Sesaṃ vuttanayeneva veditabbaṃ.
သဒ္ဓိဝိဟာရိကဝတ္တကထာ နိဋ္ဌိတာ။
Saddhivihārikavattakathā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၆. သဒ္ဓိဝိဟာရိကဝတ္တကထာ • 16. Saddhivihārikavattakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဥပဇ္ဈာယဝတ္တကထာဝဏ္ဏနာ • Upajjhāyavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / သဒ္ဓိဝိဟာရိကဝတ္တကထာဝဏ္ဏနာ • Saddhivihārikavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၆. သဒ္ဓိဝိဟာရိကဝတ္တကထာ • 16. Saddhivihārikavattakathā
