| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
၁၂. သဒ္ဓိဝိဟာရိကဝတ္တကထာ
12. Saddhivihārikavattakathā
၃၇၇. တေန ခော ပန သမယေန ဥပဇ္ဈာယာ သဒ္ဓိဝိဟာရိကေသု န သမ္မာ ဝတ္တန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဥပဇ္ဈာယာ သဒ္ဓိဝိဟာရိကေသု န သမ္မာ ဝတ္တိသ္သန္တီ’’တိ! အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, ဥပဇ္ဈာယာ သဒ္ဓိဝိဟာရိကေသု န သမ္မာ ဝတ္တန္တီ’’တိ? ‘‘သစ္စံ ဘဂဝာ’’တိ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ –
377. Tena kho pana samayena upajjhāyā saddhivihārikesu na sammā vattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma upajjhāyā saddhivihārikesu na sammā vattissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, upajjhāyā saddhivihārikesu na sammā vattantī’’ti? ‘‘Saccaṃ bhagavā’’ti…pe… vigarahitvā…pe… dhammiṃ kathaṃ katvā bhikkhū āmantesi –
၃၇၈. ‘‘တေန ဟိ, ဘိက္ခဝေ, ဥပဇ္ဈာယာနံ သဒ္ဓိဝိဟာရိကေသု ဝတ္တံ ပညပေသ္သာမိ ယထာ ဥပဇ္ဈာယေဟိ သဒ္ဓိဝိဟာရိကေသု သမ္မာ ဝတ္တိတဗ္ဗံ။ 1 ဥပဇ္ဈာယေန, ဘိက္ခဝေ, သဒ္ဓိဝိဟာရိကမ္ဟိ သမ္မာ ဝတ္တိတဗ္ဗံ ။ တတ္ရာယံ သမ္မာဝတ္တနာ –
378. ‘‘Tena hi, bhikkhave, upajjhāyānaṃ saddhivihārikesu vattaṃ paññapessāmi yathā upajjhāyehi saddhivihārikesu sammā vattitabbaṃ. 2 Upajjhāyena, bhikkhave, saddhivihārikamhi sammā vattitabbaṃ . Tatrāyaṃ sammāvattanā –
‘‘ဥပဇ္ဈာယေန, ဘိက္ခဝေ, သဒ္ဓိဝိဟာရိကော သင္ဂဟေတဗ္ဗော အနုဂ္ဂဟေတဗ္ဗော ဥဒ္ဒေသေန ပရိပုစ္ဆာယ ဩဝာဒေန အနုသာသနိယာ။ သစေ ဥပဇ္ဈာယသ္သ ပတ္တော ဟောတိ, သဒ္ဓိဝိဟာရိကသ္သ ပတ္တော န ဟောတိ, ဥပဇ္ဈာယေန သဒ္ဓိဝိဟာရိကသ္သ ပတ္တော ဒာတဗ္ဗော, ဥသ္သုက္ကံ ဝာ ကာတဗ္ဗံ – ကိန္တိ နု ခော သဒ္ဓိဝိဟာရိကသ္သ ပတ္တော ဥပ္ပဇ္ဇိယေထာတိ။ သစေ ဥပဇ္ဈာယသ္သ စီဝရံ ဟောတိ, သဒ္ဓိဝိဟာရိကသ္သ စီဝရံ န ဟောတိ, ဥပဇ္ဈာယေန သဒ္ဓိဝိဟာရိကသ္သ စီဝရံ ဒာတဗ္ဗံ, ဥသ္သုက္ကံ ဝာ ကာတဗ္ဗံ – ကိန္တိ နု ခော သဒ္ဓိဝိဟာရိကသ္သ စီဝရံ ဥပ္ပဇ္ဇိယေထာတိ။ သစေ ဥပဇ္ဈာယသ္သ ပရိက္ခာရော ဟောတိ, သဒ္ဓိဝိဟာရိကသ္သ ပရိက္ခာရော န ဟောတိ, ဥပဇ္ဈာယေန သဒ္ဓိဝိဟာရိကသ္သ ပရိက္ခာရော ဒာတဗ္ဗော, ဥသ္သုက္ကံ ဝာ ကာတဗ္ဗံ – ကိန္တိ နု ခော သဒ္ဓိဝိဟာရိကသ္သ ပရိက္ခာရော ဥပ္ပဇ္ဇိယေထာတိ။
‘‘Upajjhāyena, bhikkhave, saddhivihāriko saṅgahetabbo anuggahetabbo uddesena paripucchāya ovādena anusāsaniyā. Sace upajjhāyassa patto hoti, saddhivihārikassa patto na hoti, upajjhāyena saddhivihārikassa patto dātabbo, ussukkaṃ vā kātabbaṃ – kinti nu kho saddhivihārikassa patto uppajjiyethāti. Sace upajjhāyassa cīvaraṃ hoti, saddhivihārikassa cīvaraṃ na hoti, upajjhāyena saddhivihārikassa cīvaraṃ dātabbaṃ, ussukkaṃ vā kātabbaṃ – kinti nu kho saddhivihārikassa cīvaraṃ uppajjiyethāti. Sace upajjhāyassa parikkhāro hoti, saddhivihārikassa parikkhāro na hoti, upajjhāyena saddhivihārikassa parikkhāro dātabbo, ussukkaṃ vā kātabbaṃ – kinti nu kho saddhivihārikassa parikkhāro uppajjiyethāti.
‘‘သစေ သဒ္ဓိဝိဟာရိကော ဂိလာနော ဟောတိ, ကာလသ္သေဝ ဥဋ္ဌာယ ဒန္တကဋ္ဌံ ဒာတဗ္ဗံ, မုခောဒကံ ဒာတဗ္ဗံ, အာသနံ ပညပေတဗ္ဗံ။ သစေ ယာဂု ဟောတိ, ဘာဇနံ ဓောဝိတ္ဝာ ယာဂု ဥပနာမေတဗ္ဗာ။ ယာဂုံ ပီတသ္သ ဥဒကံ ဒတ္ဝာ ဘာဇနံ ပဋိဂ္ဂဟေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန ဓောဝိတ္ဝာ ပဋိသာမေတဗ္ဗံ။ သဒ္ဓိဝိဟာရိကမ္ဟိ ဝုဋ္ဌိတေ အာသနံ ဥဒ္ဓရိတဗ္ဗံ။ သစေ သော ဒေသော ဥက္လာပော ဟောတိ, သော ဒေသော သမ္မဇ္ဇိတဗ္ဗော။
‘‘Sace saddhivihāriko gilāno hoti, kālasseva uṭṭhāya dantakaṭṭhaṃ dātabbaṃ, mukhodakaṃ dātabbaṃ, āsanaṃ paññapetabbaṃ. Sace yāgu hoti, bhājanaṃ dhovitvā yāgu upanāmetabbā. Yāguṃ pītassa udakaṃ datvā bhājanaṃ paṭiggahetvā nīcaṃ katvā sādhukaṃ appaṭighaṃsantena dhovitvā paṭisāmetabbaṃ. Saddhivihārikamhi vuṭṭhite āsanaṃ uddharitabbaṃ. Sace so deso uklāpo hoti, so deso sammajjitabbo.
‘‘သစေ သဒ္ဓိဝိဟာရိကော ဂာမံ ပဝိသိတုကာမော ဟောတိ, နိဝာသနံ ဒာတဗ္ဗံ, ပဋိနိဝာသနံ ပဋိဂ္ဂဟေတဗ္ဗံ , ကာယဗန္ဓနံ ဒာတဗ္ဗံ, သဂုဏံ ကတ္ဝာ သင္ဃာဋိယော ဒာတဗ္ဗာ , ဓောဝိတ္ဝာ ပတ္တော သောဒကော ဒာတဗ္ဗော။
‘‘Sace saddhivihāriko gāmaṃ pavisitukāmo hoti, nivāsanaṃ dātabbaṃ, paṭinivāsanaṃ paṭiggahetabbaṃ , kāyabandhanaṃ dātabbaṃ, saguṇaṃ katvā saṅghāṭiyo dātabbā , dhovitvā patto sodako dātabbo.
‘‘ဧတ္တာဝတာ နိဝတ္တိသ္သတီတိ အာသနံ ပညပေတဗ္ဗံ, ပာဒောဒကံ ပာဒပီဌံ ပာဒကထလိကံ ဥပနိက္ခိပိတဗ္ဗံ, ပစ္စုဂ္ဂန္တ္ဝာ ပတ္တစီဝရံ ပဋိဂ္ဂဟေတဗ္ဗံ, ပဋိနိဝာသနံ ဒာတဗ္ဗံ, နိဝာသနံ ပဋိဂ္ဂဟေတဗ္ဗံ။ သစေ စီဝရံ သိန္နံ ဟောတိ, မုဟုတ္တံ ဥဏ္ဟေ ဩတာပေတဗ္ဗံ, န စ ဥဏ္ဟေ စီဝရံ နိဒဟိတဗ္ဗံ။ စီဝရံ သင္ဃရိတဗ္ဗံ။ စီဝရံ သင္ဃရန္တေန စတုရင္ဂုလံ ကဏ္ဏံ ဥသ္သာရေတ္ဝာ စီဝရံ သင္ဃရိတဗ္ဗံ – မာ မဇ္ဈေ ဘင္ဂော အဟောသီတိ။ ဩဘောဂေ ကာယဗန္ဓနံ ကာတဗ္ဗံ။
‘‘Ettāvatā nivattissatīti āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ, paccuggantvā pattacīvaraṃ paṭiggahetabbaṃ, paṭinivāsanaṃ dātabbaṃ, nivāsanaṃ paṭiggahetabbaṃ. Sace cīvaraṃ sinnaṃ hoti, muhuttaṃ uṇhe otāpetabbaṃ, na ca uṇhe cīvaraṃ nidahitabbaṃ. Cīvaraṃ saṅgharitabbaṃ. Cīvaraṃ saṅgharantena caturaṅgulaṃ kaṇṇaṃ ussāretvā cīvaraṃ saṅgharitabbaṃ – mā majjhe bhaṅgo ahosīti. Obhoge kāyabandhanaṃ kātabbaṃ.
‘‘သစေ ပိဏ္ဍပာတော ဟောတိ, သဒ္ဓိဝိဟာရိကော စ ဘုဉ္ဇိတုကာမော ဟောတိ, ဥဒကံ ဒတ္ဝာ ပိဏ္ဍပာတော ဥပနာမေတဗ္ဗော။ သဒ္ဓိဝိဟာရိကော ပာနီယေန ပုစ္ဆိတဗ္ဗော။ ဘုတ္တာဝိသ္သ ဥဒကံ ဒတ္ဝာ ပတ္တံ ပဋိဂ္ဂဟေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန ဓောဝိတ္ဝာ ဝောဒကံ ကတ္ဝာ မုဟုတ္တံ ဥဏ္ဟေ ဩတာပေတဗ္ဗော, န စ ဥဏ္ဟေ ပတ္တော နိဒဟိတဗ္ဗော။ ပတ္တစီဝရံ နိက္ခိပိတဗ္ဗံ။ ပတ္တံ နိက္ခိပန္တေန ဧကေန ဟတ္ထေန ပတ္တံ ဂဟေတ္ဝာ ဧကေန ဟတ္ထေန ဟေဋ္ဌာမဉ္စံ ဝာ ဟေဋ္ဌာပီဌံ ဝာ ပရာမသိတ္ဝာ ပတ္တော နိက္ခိပိတဗ္ဗော။ န စ အနန္တရဟိတာယ ဘူမိယာ ပတ္တော နိက္ခိပိတဗ္ဗော။ စီဝရံ နိက္ခိပန္တေန ဧကေန ဟတ္ထေန စီဝရံ ဂဟေတ္ဝာ ဧကေန ဟတ္ထေန စီဝရဝံသံ ဝာ စီဝရရဇ္ဇုံ ဝာ ပမဇ္ဇိတ္ဝာ ပာရတော အန္တံ ဩရတော ဘောဂံ ကတ္ဝာ စီဝရံ နိက္ခိပိတဗ္ဗံ။ သဒ္ဓိဝိဟာရိကမ္ဟိ ဝုဋ္ဌိတေ အာသနံ ဥဒ္ဓရိတဗ္ဗံ, ပာဒောဒကံ ပာဒပီဌံ ပာဒကထလိကံ ပဋိသာမေတဗ္ဗံ။ သစေ သော ဒေသော ဥက္လာပော ဟောတိ, သော ဒေသော သမ္မဇ္ဇိတဗ္ဗော ။
‘‘Sace piṇḍapāto hoti, saddhivihāriko ca bhuñjitukāmo hoti, udakaṃ datvā piṇḍapāto upanāmetabbo. Saddhivihāriko pānīyena pucchitabbo. Bhuttāvissa udakaṃ datvā pattaṃ paṭiggahetvā nīcaṃ katvā sādhukaṃ appaṭighaṃsantena dhovitvā vodakaṃ katvā muhuttaṃ uṇhe otāpetabbo, na ca uṇhe patto nidahitabbo. Pattacīvaraṃ nikkhipitabbaṃ. Pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo. Na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ orato bhogaṃ katvā cīvaraṃ nikkhipitabbaṃ. Saddhivihārikamhi vuṭṭhite āsanaṃ uddharitabbaṃ, pādodakaṃ pādapīṭhaṃ pādakathalikaṃ paṭisāmetabbaṃ. Sace so deso uklāpo hoti, so deso sammajjitabbo .
‘‘သစေ သဒ္ဓိဝိဟာရိကော နဟာယိတုကာမော ဟောတိ, နဟာနံ ပဋိယာဒေတဗ္ဗံ။ သစေ သီတေန အတ္ထော ဟောတိ, သီတံ ပဋိယာဒေတဗ္ဗံ။ သစေ ဥဏ္ဟေန အတ္ထော ဟောတိ, ဥဏ္ဟံ ပဋိယာဒေတဗ္ဗံ။
‘‘Sace saddhivihāriko nahāyitukāmo hoti, nahānaṃ paṭiyādetabbaṃ. Sace sītena attho hoti, sītaṃ paṭiyādetabbaṃ. Sace uṇhena attho hoti, uṇhaṃ paṭiyādetabbaṃ.
‘‘သစေ သဒ္ဓိဝိဟာရိကော ဇန္တာဃရံ ပဝိသိတုကာမော ဟောတိ, စုဏ္ဏံ သန္နေတဗ္ဗံ, မတ္တိကာ တေမေတဗ္ဗာ, ဇန္တာဃရပီဌံ အာဒာယ 3 ဂန္တ္ဝာ ဇန္တာဃရပီဌံ ဒတ္ဝာ စီဝရံ ပဋိဂ္ဂဟေတ္ဝာ ဧကမန္တံ နိက္ခိပိတဗ္ဗံ, စုဏ္ဏံ ဒာတဗ္ဗံ, မတ္တိကာ ဒာတဗ္ဗာ။ သစေ ဥသ္သဟတိ ဇန္တာဃရံ ပဝိသိတဗ္ဗံ။ ဇန္တာဃရံ ပဝိသန္တေန မတ္တိကာယ မုခံ မက္ခေတ္ဝာ ပုရတော စ ပစ္ဆတော စ ပဋိစ္ဆာဒေတ္ဝာ ဇန္တာဃရံ ပဝိသိတဗ္ဗံ။ န ထေရေ ဘိက္ခူ အနုပခဇ္ဇ နိသီဒိတဗ္ဗံ, န နဝာ ဘိက္ခူ အာသနေန ပဋိဗာဟိတဗ္ဗာ။ ဇန္တာဃရေ သဒ္ဓိဝိဟာရိကသ္သ ပရိကမ္မံ ကာတဗ္ဗံ။ ဇန္တာဃရာ နိက္ခမန္တေန ဇန္တာဃရပီဌံ အာဒာယ ပုရတော စ ပစ္ဆတော စ ပဋိစ္ဆာဒေတ္ဝာ ဇန္တာဃရာ နိက္ခမိတဗ္ဗံ။
‘‘Sace saddhivihāriko jantāgharaṃ pavisitukāmo hoti, cuṇṇaṃ sannetabbaṃ, mattikā temetabbā, jantāgharapīṭhaṃ ādāya 4 gantvā jantāgharapīṭhaṃ datvā cīvaraṃ paṭiggahetvā ekamantaṃ nikkhipitabbaṃ, cuṇṇaṃ dātabbaṃ, mattikā dātabbā. Sace ussahati jantāgharaṃ pavisitabbaṃ. Jantāgharaṃ pavisantena mattikāya mukhaṃ makkhetvā purato ca pacchato ca paṭicchādetvā jantāgharaṃ pavisitabbaṃ. Na there bhikkhū anupakhajja nisīditabbaṃ, na navā bhikkhū āsanena paṭibāhitabbā. Jantāghare saddhivihārikassa parikammaṃ kātabbaṃ. Jantāgharā nikkhamantena jantāgharapīṭhaṃ ādāya purato ca pacchato ca paṭicchādetvā jantāgharā nikkhamitabbaṃ.
‘‘ဥဒကေပိ သဒ္ဓိဝိဟာရိကသ္သ ပရိကမ္မံ ကာတဗ္ဗံ။ နဟာတေန ပဌမတရံ ဥတ္တရိတ္ဝာ အတ္တနော ဂတ္တံ ဝောဒကံ ကတ္ဝာ နိဝာသေတ္ဝာ သဒ္ဓိဝိဟာရိကသ္သ ဂတ္တတော ဥဒကံ ပမဇ္ဇိတဗ္ဗံ, နိဝာသနံ ဒာတဗ္ဗံ, သင္ဃာဋိ ဒာတဗ္ဗာ, ဇန္တာဃရပီဌံ အာဒာယ ပဌမတရံ အာဂန္တ္ဝာ အာသနံ ပညပေတဗ္ဗံ, ပာဒောဒကံ ပာဒပီဌံ ပာဒကထလိကံ ဥပနိက္ခိပိတဗ္ဗံ။ သဒ္ဓိဝိဟာရိကော ပာနီယေန ပုစ္ဆိတဗ္ဗော။
‘‘Udakepi saddhivihārikassa parikammaṃ kātabbaṃ. Nahātena paṭhamataraṃ uttaritvā attano gattaṃ vodakaṃ katvā nivāsetvā saddhivihārikassa gattato udakaṃ pamajjitabbaṃ, nivāsanaṃ dātabbaṃ, saṅghāṭi dātabbā, jantāgharapīṭhaṃ ādāya paṭhamataraṃ āgantvā āsanaṃ paññapetabbaṃ, pādodakaṃ pādapīṭhaṃ pādakathalikaṃ upanikkhipitabbaṃ. Saddhivihāriko pānīyena pucchitabbo.
‘‘ယသ္မိံ ဝိဟာရေ သဒ္ဓိဝိဟာရိကော ဝိဟရတိ, သစေ သော ဝိဟာရော ဥက္လာပော ဟောတိ, သစေ ဥသ္သဟတိ, သောဓေတဗ္ဗော။ ဝိဟာရံ သောဓေန္တေန ပဌမံ ပတ္တစီဝရံ နီဟရိတ္ဝာ ဧကမန္တံ နိက္ခိပိတဗ္ဗံ။ပေ.။ သစေ အာစမနကုမ္ဘိယာ ဥဒကံ န ဟောတိ, အာစမနကုမ္ဘိယာ ဥဒကံ အာသိဉ္စိတဗ္ဗံ။
‘‘Yasmiṃ vihāre saddhivihāriko viharati, sace so vihāro uklāpo hoti, sace ussahati, sodhetabbo. Vihāraṃ sodhentena paṭhamaṃ pattacīvaraṃ nīharitvā ekamantaṃ nikkhipitabbaṃ…pe… sace ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ.
‘‘သစေ သဒ္ဓိဝိဟာရိကသ္သ အနဘိရတိ ဥပ္ပန္နာ ဟောတိ, ဥပဇ္ဈာယေန ဝူပကာသေတဗ္ဗော, ဝူပကာသာပေတဗ္ဗော, ဓမ္မကထာ ဝာသ္သ ကာတဗ္ဗာ။ သစေ သဒ္ဓိဝိဟာရိကသ္သ ကုက္ကုစ္စံ ဥပ္ပန္နံ ဟောတိ, ဥပဇ္ဈာယေန ဝိနောဒေတဗ္ဗံ, ဝိနောဒာပေတဗ္ဗံ, ဓမ္မကထာ ဝာသ္သ ကာတဗ္ဗာ။ သစေ သဒ္ဓိဝိဟာရိကသ္သ ဒိဋ္ဌိဂတံ ဥပ္ပန္နံ ဟောတိ, ဥပဇ္ဈာယေန ဝိဝေစေတဗ္ဗံ, ဝိဝေစာပေတဗ္ဗံ, ဓမ္မကထာ ဝာသ္သ ကာတဗ္ဗာ။ သစေ သဒ္ဓိဝိဟာရိကော ဂရုဓမ္မံ အဇ္ဈာပန္နော ဟောတိ ပရိဝာသာရဟော, ဥပဇ္ဈာယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော သဒ္ဓိဝိဟာရိကသ္သ ပရိဝာသံ ဒဒေယ္ယာတိ။ သစေ သဒ္ဓိဝိဟာရိကော မူလာယပဋိကသ္သနာရဟော ဟောတိ, ဥပဇ္ဈာယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော သဒ္ဓိဝိဟာရိကံ မူလာယ ပဋိကသ္သေယ္ယာတိ။ သစေ သဒ္ဓိဝိဟာရိကော မာနတ္တာရဟော ဟောတိ, ဥပဇ္ဈာယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော သဒ္ဓိဝိဟာရိကသ္သ မာနတ္တံ ဒဒေယ္ယာတိ။ သစေ သဒ္ဓိဝိဟာရိကော အဗ္ဘာနာရဟော ဟောတိ, ဥပဇ္ဈာယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော သဒ္ဓိဝိဟာရိကံ အဗ္ဘေယ္ယာတိ။ သစေ သင္ဃော သဒ္ဓိဝိဟာရိကသ္သ ကမ္မံ ကတ္တုကာမော ဟောတိ, တဇ္ဇနီယံ ဝာ နိယသ္သံ ဝာ ပဗ္ဗာဇနီယံ ဝာ ပဋိသာရဏီယံ ဝာ ဥက္ခေပနီယံ ဝာ, ဥပဇ္ဈာယေန ဥသ္သုက္ကံ ကာတဗ္ဗံ – ကိန္တိ နု ခော သင္ဃော သဒ္ဓိဝိဟာရိကသ္သ ကမ္မံ န ကရေယ္ယ, လဟုကာယ ဝာ ပရိဏာမေယ္ယာတိ။ ကတံ ဝာ ပနသ္သ ဟောတိ သင္ဃေန ကမ္မံ, တဇ္ဇနီယံ ဝာ နိယသ္သံ ဝာ ပဗ္ဗာဇနီယံ ဝာ ပဋိသာရဏီယံ ဝာ, ဥက္ခေပနီယံ ဝာ, ဥပဇ္ဈာယေန ဥသ္သုက္ကံ ကာတဗ္ဗံ – ကိန္တိ နု ခော သဒ္ဓိဝိဟာရိကော သမ္မာ ဝတ္တေယ္ယ လောမံ ပာတေယ္ယ, နေတ္ထာရံ ဝတ္တေယ္ယ, သင္ဃော တံ ကမ္မံ ပဋိပ္ပသ္သမ္ဘေယ္ယာတိ။
‘‘Sace saddhivihārikassa anabhirati uppannā hoti, upajjhāyena vūpakāsetabbo, vūpakāsāpetabbo, dhammakathā vāssa kātabbā. Sace saddhivihārikassa kukkuccaṃ uppannaṃ hoti, upajjhāyena vinodetabbaṃ, vinodāpetabbaṃ, dhammakathā vāssa kātabbā. Sace saddhivihārikassa diṭṭhigataṃ uppannaṃ hoti, upajjhāyena vivecetabbaṃ, vivecāpetabbaṃ, dhammakathā vāssa kātabbā. Sace saddhivihāriko garudhammaṃ ajjhāpanno hoti parivāsāraho, upajjhāyena ussukkaṃ kātabbaṃ – kinti nu kho saṅgho saddhivihārikassa parivāsaṃ dadeyyāti. Sace saddhivihāriko mūlāyapaṭikassanāraho hoti, upajjhāyena ussukkaṃ kātabbaṃ – kinti nu kho saṅgho saddhivihārikaṃ mūlāya paṭikasseyyāti. Sace saddhivihāriko mānattāraho hoti, upajjhāyena ussukkaṃ kātabbaṃ – kinti nu kho saṅgho saddhivihārikassa mānattaṃ dadeyyāti. Sace saddhivihāriko abbhānāraho hoti, upajjhāyena ussukkaṃ kātabbaṃ – kinti nu kho saṅgho saddhivihārikaṃ abbheyyāti. Sace saṅgho saddhivihārikassa kammaṃ kattukāmo hoti, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā, upajjhāyena ussukkaṃ kātabbaṃ – kinti nu kho saṅgho saddhivihārikassa kammaṃ na kareyya, lahukāya vā pariṇāmeyyāti. Kataṃ vā panassa hoti saṅghena kammaṃ, tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā, ukkhepanīyaṃ vā, upajjhāyena ussukkaṃ kātabbaṃ – kinti nu kho saddhivihāriko sammā vatteyya lomaṃ pāteyya, netthāraṃ vatteyya, saṅgho taṃ kammaṃ paṭippassambheyyāti.
‘‘သစေ သဒ္ဓိဝိဟာရိကသ္သ စီဝရံ ဓောဝိတဗ္ဗံ ဟောတိ, ဥပဇ္ဈာယေန အာစိက္ခိတဗ္ဗံ – ဧဝံ ဓောဝေယ္ယာသီတိ, ဥသ္သုက္ကံ ဝာ ကာတဗ္ဗံ – ကိန္တိ နု ခော သဒ္ဓိဝိဟာရိကသ္သ စီဝရံ ဓောဝိယေထာတိ။ သစေ သဒ္ဓိဝိဟာရိကသ္သ စီဝရံ ကာတဗ္ဗံ ဟောတိ, ဥပဇ္ဈာယေန အာစိက္ခိတဗ္ဗံ – ဧဝံ ကရေယ္ယာသီတိ, ဥသ္သုက္ကံ ဝာ ကာတဗ္ဗံ – ကိန္တိ နု ခော သဒ္ဓိဝိဟာရိကသ္သ စီဝရံ ကရိယေထာတိ။ သစေ သဒ္ဓိဝိဟာရိကသ္သ ရဇနံ ပစိတဗ္ဗံ ဟောတိ, ဥပဇ္ဈာယေန အာစိက္ခိတဗ္ဗံ – ဧဝံ ပစေယ္ယာသီတိ, ဥသ္သုက္ကံ ဝာ ကာတဗ္ဗံ – ကိန္တိ နု ခော သဒ္ဓိဝိဟာရိကသ္သ ရဇနံ ပစိယေထာတိ။ သစေ သဒ္ဓိဝိဟာရိကသ္သ စီဝရံ ရဇိတဗ္ဗံ ဟောတိ, ဥပဇ္ဈာယေန အာစိက္ခိတဗ္ဗံ – ဧဝံ ရဇေယ္ယာသီတိ, ဥသ္သုက္ကံ ဝာ ကာတဗ္ဗံ – ကိန္တိ နု ခော သဒ္ဓိဝိဟာရိကသ္သ စီဝရံ ရဇိယေထာတိ။ စီဝရံ ရဇန္တေန သာဓုကံ သမ္ပရိဝတ္တကံ သမ္ပရိဝတ္တကံ ရဇိတဗ္ဗံ, န စ အစ္ဆိန္နေ ထေဝေ ပက္ကမိတဗ္ဗံ။ သစေ သဒ္ဓိဝိဟာရိကော ဂိလာနော ဟောတိ, ယာဝဇီဝံ ဥပဋ္ဌာတဗ္ဗော, ဝုဋ္ဌာနမသ္သ အာဂမေတဗ္ဗံ။ ဣဒံ ခော, ဘိက္ခဝေ , ဥပဇ္ဈာယာနံ သဒ္ဓိဝိဟာရိကေသု ဝတ္တံ ယထာ ဥပဇ္ဈာယေဟိ သဒ္ဓိဝိဟာရိကေသု သမ္မာ ဝတ္တိတဗ္ဗ’’န္တိ။
‘‘Sace saddhivihārikassa cīvaraṃ dhovitabbaṃ hoti, upajjhāyena ācikkhitabbaṃ – evaṃ dhoveyyāsīti, ussukkaṃ vā kātabbaṃ – kinti nu kho saddhivihārikassa cīvaraṃ dhoviyethāti. Sace saddhivihārikassa cīvaraṃ kātabbaṃ hoti, upajjhāyena ācikkhitabbaṃ – evaṃ kareyyāsīti, ussukkaṃ vā kātabbaṃ – kinti nu kho saddhivihārikassa cīvaraṃ kariyethāti. Sace saddhivihārikassa rajanaṃ pacitabbaṃ hoti, upajjhāyena ācikkhitabbaṃ – evaṃ paceyyāsīti, ussukkaṃ vā kātabbaṃ – kinti nu kho saddhivihārikassa rajanaṃ paciyethāti. Sace saddhivihārikassa cīvaraṃ rajitabbaṃ hoti, upajjhāyena ācikkhitabbaṃ – evaṃ rajeyyāsīti, ussukkaṃ vā kātabbaṃ – kinti nu kho saddhivihārikassa cīvaraṃ rajiyethāti. Cīvaraṃ rajantena sādhukaṃ samparivattakaṃ samparivattakaṃ rajitabbaṃ, na ca acchinne theve pakkamitabbaṃ. Sace saddhivihāriko gilāno hoti, yāvajīvaṃ upaṭṭhātabbo, vuṭṭhānamassa āgametabbaṃ. Idaṃ kho, bhikkhave , upajjhāyānaṃ saddhivihārikesu vattaṃ yathā upajjhāyehi saddhivihārikesu sammā vattitabba’’nti.
ဒုတိယဘာဏဝာရော နိဋ္ဌိတော။
Dutiyabhāṇavāro niṭṭhito.
Footnotes:
