| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১২. দ্ৰাদসমৰগ্গো
12. Dvādasamavaggo
(১১৮) ৩. সদ্দো ৰিপাকোতিকথা
(118) 3. Saddo vipākotikathā
৬৩৬. সদ্দো ৰিপাকোতি? আমন্তা। সুখৰেদনিযো দুক্খৰেদনিযো অদুক্খমসুখৰেদনিযো, সুখায ৰেদনায সম্পযুত্তো, দুক্খায ৰেদনায সম্পযুত্তো , অদুক্খমসুখায ৰেদনায সম্পযুত্তো, ফস্সেন সম্পযুত্তো, ৰেদনায সম্পযুত্তো, সঞ্ঞায সম্পযুত্তো, চেতনায সম্পযুত্তো, চিত্তেন সম্পযুত্তো, সারম্মণো; অত্থি তস্স আৰট্টনা আভোগো সমন্নাহারো মনসিকারো চেতনা পত্থনা পণিধীতি? ন হেৰং ৰত্তব্বে…পে॰… ননু ন সুখৰেদনিযো ন দুক্খৰেদনিযো…পে॰… অনারম্মণো, নত্থি তস্স আৰট্টনা…পে॰… পণিধীতি? আমন্তা। হঞ্চি ন সুখৰেদনিযো…পে॰… অনারম্মণো, নত্থি তস্স আৰট্টনা…পে॰… পণিধি, নো চ ৰত রে ৰত্তব্বে – ‘‘সদ্দো ৰিপাকো’’তি।
636. Saddo vipākoti? Āmantā. Sukhavedaniyo dukkhavedaniyo adukkhamasukhavedaniyo, sukhāya vedanāya sampayutto, dukkhāya vedanāya sampayutto , adukkhamasukhāya vedanāya sampayutto, phassena sampayutto, vedanāya sampayutto, saññāya sampayutto, cetanāya sampayutto, cittena sampayutto, sārammaṇo; atthi tassa āvaṭṭanā ābhogo samannāhāro manasikāro cetanā patthanā paṇidhīti? Na hevaṃ vattabbe…pe… nanu na sukhavedaniyo na dukkhavedaniyo…pe… anārammaṇo, natthi tassa āvaṭṭanā…pe… paṇidhīti? Āmantā. Hañci na sukhavedaniyo…pe… anārammaṇo, natthi tassa āvaṭṭanā…pe… paṇidhi, no ca vata re vattabbe – ‘‘saddo vipāko’’ti.
ফস্সো ৰিপাকো, ফস্সো সুখৰেদনিযো…পে॰… সারম্মণো, অত্থি তস্স আৰট্টনা…পে॰… পণিধীতি? আমন্তা। সদ্দো ৰিপাকো, সদ্দো সুখৰেদনিযো…পে॰… সারম্মণো, অত্থি তস্স আৰট্টনা…পে॰… পণিধীতি? ন হেৰং ৰত্তব্বে…পে॰…।
Phasso vipāko, phasso sukhavedaniyo…pe… sārammaṇo, atthi tassa āvaṭṭanā…pe… paṇidhīti? Āmantā. Saddo vipāko, saddo sukhavedaniyo…pe… sārammaṇo, atthi tassa āvaṭṭanā…pe… paṇidhīti? Na hevaṃ vattabbe…pe….
সদ্দো ৰিপাকো, সদ্দো ন সুখৰেদনিযো…পে॰… অনারম্মণো, নত্থি তস্স আৰট্টনা…পে॰… পণিধীতি? আমন্তা। ফস্সো ৰিপাকো, ফস্সো ন সুখৰেদনিযো, ন দুক্খৰেদনিযো…পে॰… অনারম্মণো, নত্থি তস্স আৰট্টনা…পে॰… পণিধীতি? ন হেৰং ৰত্তব্বে…পে॰…।
Saddo vipāko, saddo na sukhavedaniyo…pe… anārammaṇo, natthi tassa āvaṭṭanā…pe… paṇidhīti? Āmantā. Phasso vipāko, phasso na sukhavedaniyo, na dukkhavedaniyo…pe… anārammaṇo, natthi tassa āvaṭṭanā…pe… paṇidhīti? Na hevaṃ vattabbe…pe….
৬৩৭. ন ৰত্তব্বং – ‘‘সদ্দো ৰিপাকো’’তি? আমন্তা। ননু ৰুত্তং ভগৰতা – ‘‘সো তস্স কম্মস্স কতত্তা উপচিতত্তা উস্সন্নত্তা ৰিপুলত্তা ব্রহ্মস্সরো হোতি করৰিকভাণী’’তি 1! অত্থেৰ সুত্তন্তোতি? আমন্তা । তেন হি সদ্দো ৰিপাকোতি।
637. Na vattabbaṃ – ‘‘saddo vipāko’’ti? Āmantā. Nanu vuttaṃ bhagavatā – ‘‘so tassa kammassa katattā upacitattā ussannattā vipulattā brahmassaro hoti karavikabhāṇī’’ti 2! Attheva suttantoti? Āmantā . Tena hi saddo vipākoti.
সদ্দো ৰিপাকোতিকথা নিট্ঠিতা।
Saddo vipākotikathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৩. সদ্দো ৰিপাকোতিকথাৰণ্ণনা • 3. Saddo vipākotikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৩. সদ্দোৰিপাকোতিকথাৰণ্ণনা • 3. Saddovipākotikathāvaṇṇanā
