| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၃. သဒ္ဒော ဝိပာကောတိကထာဝဏ္ဏနာ
3. Saddo vipākotikathāvaṇṇanā
၆၃၆-၆၃၇. ဣဒာနိ သဒ္ဒော ဝိပာကောတိကထာ နာမ ဟောတိ။ တတ္ထ ‘‘သော တသ္သ ကမ္မသ္သ ကတတ္တာ ဥပစိတတ္တာ ဥသ္သန္နတ္တာ ဝိပုလတ္တာ ဗ္ရဟ္မသ္သရော ဟောတီ’’တိအာဒီနိ (ဒီ. နိ. ၃.၂၃၆) အယောနိသော ဂဟေတ္ဝာ ‘‘သဒ္ဒော ဝိပာကော’’တိ ယေသံ လဒ္ဓိ, သေယ္ယထာပိ မဟာသံဃိကာနံ; တေသံ ‘‘ကမ္မသမုဋ္ဌာနာ အရူပဓမ္မာဝ ဝိပာကာတိ နာမံ လဘန္တိ။ ရူပဓမ္မေသု ပနာယံ ဝောဟာရော နတ္ထီ’’တိ ဒသ္သေတုံ ပုစ္ဆာ သကဝာဒိသ္သ, ပဋိညာ ဣတရသ္သ။ သုခဝေဒနီယောတိအာဒိ ‘‘ဝိပာကော နာမ ဧဝရူပော ဟောတီ’’တိ ဒသ္သနတ္ထံ ဝုတ္တံ။ ‘‘သော တသ္သ ကမ္မသ္သာ’’တိ သုတ္တံ လက္ခဏပဋိလာဘဒသ္သနတ္ထံ ဝုတ္တံ။ မဟာပုရိသော ဟိ ကမ္မသ္သ ကတတ္တာ သုစိပရိဝာရောပိ ဟောတိ, န စ ပရိဝာရော ဝိပာကော, တသ္မာ အသာဓကမေတန္တိ။
636-637. Idāni saddo vipākotikathā nāma hoti. Tattha ‘‘so tassa kammassa katattā upacitattā ussannattā vipulattā brahmassaro hotī’’tiādīni (dī. ni. 3.236) ayoniso gahetvā ‘‘saddo vipāko’’ti yesaṃ laddhi, seyyathāpi mahāsaṃghikānaṃ; tesaṃ ‘‘kammasamuṭṭhānā arūpadhammāva vipākāti nāmaṃ labhanti. Rūpadhammesu panāyaṃ vohāro natthī’’ti dassetuṃ pucchā sakavādissa, paṭiññā itarassa. Sukhavedanīyotiādi ‘‘vipāko nāma evarūpo hotī’’ti dassanatthaṃ vuttaṃ. ‘‘So tassa kammassā’’ti suttaṃ lakkhaṇapaṭilābhadassanatthaṃ vuttaṃ. Mahāpuriso hi kammassa katattā suciparivāropi hoti, na ca parivāro vipāko, tasmā asādhakametanti.
သဒ္ဒော ဝိပာကောတိကထာဝဏ္ဏနာ။
Saddo vipākotikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၁၈) ၃. သဒ္ဒော ဝိပာကောတိကထာ • (118) 3. Saddo vipākotikathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၃. သဒ္ဒောဝိပာကောတိကထာဝဏ္ဏနာ • 3. Saddovipākotikathāvaṇṇanā
