| Library / Tipiṭaka / ཏིཔིཊཀ • Tipiṭaka / དྭེམཱཏིཀཱཔཱལི༹ • Dvemātikāpāḷi |
སཱདྷཱརཎཔཱརཱཛིཀཾ
Sādhāraṇapārājikaṃ
༡…པེ॰…༤. མེཐུནདྷམྨསིཀྑཱཔདཝཎྞནཱ
1…Pe…4. methunadhammasikkhāpadavaṇṇanā
ཏཏྠ སུཎཱཏུ མེཏིཨཱདཱིནཾ བྷིཀྑུཔཱཏིམོཀྑཝཎྞནཱཡཾ ཝུཏྟནཡེནེཝ ཨཏྠོ ཝེདིཏབྦོ། ཀེཝལཉྷི, བྷནྟེ, ཨཡྻེཏིཨཱདིཝསེན ཏསྨིཉྩ ཨིདྷ ཙ ཨབྷིལཱཔམཏྟམེཝ ལིངྒབྷེདམཏྟཉྩ ཝིསེསོ ། ཡསྨཱ ཙ བྷིཀྑུནིཡཱ སིཀྑཱཔཙྩཀྑཱནཾ ནཱམ ནཏྠི, ཏསྨཱ བྷིཀྑུནཱིནཾ ‘‘སིཀྑཱསཱཛཱིཝསམཱཔནྣཱ སིཀྑཾ ཨཔཙྩཀྑཱཡ དུབྦལྱཾ ཨནཱཝིཀཏྭཱ’’ཏི ཨཝཏྭཱ ཡཱ པན བྷིཀྑུནཱི ཚནྡསོ མེཐུནཾ དྷམྨཾ པཊིསེཝེཡྻཱཏི ཝུཏྟཾ། ཏཏྠ ཚནྡསོཏི མེཐུནརཱགཔྤཊིསཾཡུཏྟེན ཚནྡེན ཙེཝ རུཙིཡཱ ཙ། ཚནྡེ པན ཨསཏི བལཀྐཱརེན པདྷཾསིཏཱཡ ཨནཱཔཏྟི, ཏསྨཱ ཡཱ པརིཔུཎྞཱུཔསམྤདཱ བྷིཀྑུནཱི མནུསྶཱམནུསྶཏིརཙྪཱནཛཱཏཱིསུ པུརིསཨུབྷཏོབྱཉྫནཀཔཎྜཀཱནཾ ཡསྶ ཀསྶཙི སཛཱིཝསྶ ཝཱ ནིཛྫཱིཝསྶ ཝཱ སནྠཏསྶ ཝཱ ཨསནྠཏསྶ ཝཱ ཨཀྑཱཡིཏསྶ ཝཱ ཡེབྷུཡྻེན ཨཀྑཱཡིཏསྶ ཝཱ ཨངྒཛཱཏསྶ ཨཏྟནོ ཝཙྩམགྒཔསྶཱཝམགྒམུཁེསུ ཏཱིསུ ཡཏྠཀཏྠཙི སནྠཏེ ཝཱ ཨསནྠཏེ ཝཱ པཀཏིཝཱཏེན ཨསཾཕུཊྛེ ཨལློཀཱསེ ཨནྟམསོ ཏིལཕལམཏྟམྤི པདེསཾ ཚནྡསོ པཝེསེཏི, པརེན ཝཱ པཝེསིཡམཱནཱ པཝེསནཔཝིཊྛཊྛིཏཨུདྡྷརཎེསུ ཡཾཀིཉྩི སཱདིཡཏི, ཨཡཾ པཱརཱཛིཀཱ ཧོཏི། སེསམེཏྠ ཨིཏོ པརེསུ ཙ སཱདྷཱརཎསིཀྑཱཔདེསུ ཝུཏྟནཡཱནུསཱརེནེཝ ཝེདིཏབྦཾ།
Tattha suṇātu metiādīnaṃ bhikkhupātimokkhavaṇṇanāyaṃ vuttanayeneva attho veditabbo. Kevalañhi, bhante, ayyetiādivasena tasmiñca idha ca abhilāpamattameva liṅgabhedamattañca viseso . Yasmā ca bhikkhuniyā sikkhāpaccakkhānaṃ nāma natthi, tasmā bhikkhunīnaṃ ‘‘sikkhāsājīvasamāpannā sikkhaṃ apaccakkhāya dubbalyaṃ anāvikatvā’’ti avatvā yā pana bhikkhunī chandaso methunaṃ dhammaṃ paṭiseveyyāti vuttaṃ. Tattha chandasoti methunarāgappaṭisaṃyuttena chandena ceva ruciyā ca. Chande pana asati balakkārena padhaṃsitāya anāpatti, tasmā yā paripuṇṇūpasampadā bhikkhunī manussāmanussatiracchānajātīsu purisaubhatobyañjanakapaṇḍakānaṃ yassa kassaci sajīvassa vā nijjīvassa vā santhatassa vā asanthatassa vā akkhāyitassa vā yebhuyyena akkhāyitassa vā aṅgajātassa attano vaccamaggapassāvamaggamukhesu tīsu yatthakatthaci santhate vā asanthate vā pakativātena asaṃphuṭṭhe allokāse antamaso tilaphalamattampi padesaṃ chandaso paveseti, parena vā pavesiyamānā pavesanapaviṭṭhaṭṭhitauddharaṇesu yaṃkiñci sādiyati, ayaṃ pārājikā hoti. Sesamettha ito paresu ca sādhāraṇasikkhāpadesu vuttanayānusāreneva veditabbaṃ.
