| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
ஸாதா⁴ரணாஸாதா⁴ரணகதா²வண்ணனா
Sādhāraṇāsādhāraṇakathāvaṇṇanā
779-80. ஸப்³ப³ஸிக்கா²பதா³னந்தி உப⁴தோவிப⁴ங்கா³க³தானங் ஸப்³ப³ஸிக்கா²பதா³னங். பி⁴க்கூ²ஹி பி⁴க்கு²னீஹீதி உப⁴யத்த² ஸஹத்தே² கரணவசனங். பி⁴க்கூ²ஹி பி⁴க்கு²னீனஞ்ச, பி⁴க்கு²னீஹி பி⁴க்கூ²னஞ்சாதி உப⁴யத்த² அஸாதா⁴ரணபஞ்ஞத்தஞ்ச, ததா² பி⁴க்கூ²ஹி பி⁴க்கு²னீனஞ்ச, பி⁴க்கு²னீஹி பி⁴க்கூ²னஞ்சாதி உப⁴யத்த² ஸாதா⁴ரணஸிக்கா²பத³ஞ்ச அஹங் வக்கா²மீதி யோஜனா. ஸமாஹிதாதி ஏகக்³க³சித்தா. தங் மயா வுச்சமானங் நிதா³னாதி³னயங். ஸுணாதா²தி ஸோதுஜனங் ஸக்கச்சஸவனே நியோஜேதி.
779-80.Sabbasikkhāpadānanti ubhatovibhaṅgāgatānaṃ sabbasikkhāpadānaṃ. Bhikkhūhi bhikkhunīhīti ubhayattha sahatthe karaṇavacanaṃ. Bhikkhūhi bhikkhunīnañca, bhikkhunīhi bhikkhūnañcāti ubhayattha asādhāraṇapaññattañca, tathā bhikkhūhi bhikkhunīnañca, bhikkhunīhi bhikkhūnañcāti ubhayattha sādhāraṇasikkhāpadañca ahaṃ vakkhāmīti yojanā. Samāhitāti ekaggacittā. Taṃ mayā vuccamānaṃ nidānādinayaṃ. Suṇāthāti sotujanaṃ sakkaccasavane niyojeti.
781. ‘‘நிதா³ன’’ந்திஆதி³கா³தா² வுத்தத்தா²வ.
781.‘‘Nidāna’’ntiādigāthā vuttatthāva.
782-3. ‘‘கதி வேஸாலியா’’திஆதி³ புச்சா²கா³தா² உத்தானத்தா²யேவ.
782-3.‘‘Kati vesāliyā’’tiādi pucchāgāthā uttānatthāyeva.
786. ‘‘த³ஸ வேஸாலியா’’திஆதி³விஸ்ஸஜ்ஜனகா³தா²னங் ‘‘மேது²ன’’ந்திஆத³யோ நித்³தே³ஸவஸேன வுத்தா. விக்³க³ஹோதி மனுஸ்ஸவிக்³க³ஹங் பாராஜிகங். சதுத்த²ந்திமவத்து²கந்தி உத்தரிமனுஸ்ஸத⁴ம்மபாராஜிகங். அதிரேகசீவரந்தி பட²மகதி²னங். ஸுத்³த⁴காளகேளகலோமகந்தி ஏளகலோமவக்³கே³ து³தியங்.
786. ‘‘Dasa vesāliyā’’tiādivissajjanagāthānaṃ ‘‘methuna’’ntiādayo niddesavasena vuttā. Viggahoti manussaviggahaṃ pārājikaṃ. Catutthantimavatthukanti uttarimanussadhammapārājikaṃ. Atirekacīvaranti paṭhamakathinaṃ. Suddhakāḷakeḷakalomakanti eḷakalomavagge dutiyaṃ.
787. பூ⁴தந்தி பட²மே முஸாவாத³வக்³கே³ அட்ட²மங். பரம்பரஞ்சேவாதி பரம்பரபோ⁴ஜனஸிக்கா²பத³ங். முக²த்³வாரந்தி சதுத்தே² போ⁴ஜனவக்³கே³ த³ஸமங். பி⁴க்கு²னீஸு ச அக்கோஸோதி பி⁴க்கு²னிபாதிமொக்கே² ச²ட்டே² ஆராமவக்³கே³ து³தியங்.
787.Bhūtanti paṭhame musāvādavagge aṭṭhamaṃ. Paramparañcevāti paramparabhojanasikkhāpadaṃ. Mukhadvāranti catutthe bhojanavagge dasamaṃ. Bhikkhunīsu ca akkosoti bhikkhunipātimokkhe chaṭṭhe ārāmavagge dutiyaṃ.
788. த்³வே அனுத்³த⁴ங்ஸனானீதி அட்ட²மனவமஸங்கா⁴தி³ஸேஸா. சீவரஸ்ஸ படிக்³க³ஹோதி சீவரவக்³கே³ பஞ்சமங்.
788.Dveanuddhaṃsanānīti aṭṭhamanavamasaṅghādisesā. Cīvarassa paṭiggahoti cīvaravagge pañcamaṃ.
789. ரூபியந்தி ஏளகலோமவக்³கே³ அட்ட²மங். ஸுத்தவிஞ்ஞத்தீதி பத்தவக்³கே³ ச²ட்ட²ங். உஜ்ஜா²பனந்தி து³தியே பூ⁴தகா³மவக்³கே³ ததியங். பரிபாசிதபிண்டோ³தி ததியே ஓவாத³வக்³கே³ நவமங். ததே²வ க³ணபோ⁴ஜனந்தி சதுத்தே² போ⁴ஜனவக்³கே³ து³தியங்.
789.Rūpiyanti eḷakalomavagge aṭṭhamaṃ. Suttaviññattīti pattavagge chaṭṭhaṃ. Ujjhāpananti dutiye bhūtagāmavagge tatiyaṃ. Paripācitapiṇḍoti tatiye ovādavagge navamaṃ. Tatheva gaṇabhojananti catutthe bhojanavagge dutiyaṃ.
790. விகாலே போ⁴ஜனஞ்சேவாதி தத்தே²வ ஸத்தமங். சாரித்தந்தி அசேலகவக்³கே³ பஞ்சமே ச²ட்ட²ங். ந்ஹானந்தி ஸுராபானவக்³கே³ ச²ட்டே² ஸத்தமங். ஊனவீஸதிவஸ்ஸந்தி ஸத்தமே ஸப்பாணகவக்³கே³ பஞ்சமங். த³த்வா ஸங்கே⁴ன சீவரந்தி அட்ட²மே ஸஹத⁴ம்மிகவக்³கே³ நவமங்.
790.Vikāle bhojanañcevāti tattheva sattamaṃ. Cārittanti acelakavagge pañcame chaṭṭhaṃ. Nhānanti surāpānavagge chaṭṭhe sattamaṃ. Ūnavīsativassanti sattame sappāṇakavagge pañcamaṃ. Datvā saṅghena cīvaranti aṭṭhame sahadhammikavagge navamaṃ.
791. வோஸாஸந்தீதி து³தியங் பி⁴க்கு²பாடிதே³ஸனீயங். நச்சங் வா கீ³தங் வாதி பட²மே லஸுணவக்³கே³ த³ஸமங். சாரிகத்³வயந்தி சதுத்தே² துவட்டவக்³கே³ ஸத்தமட்ட²மானி. ச²ந்த³தா³னேனாதி அட்ட²மே குமாரிபூ⁴தவக்³கே³ ஏகாத³ஸமங். ‘‘ச²ந்த³தா³னேதீ’’தி வா பாடோ². ‘‘ச²ந்த³தா³னங் இதி இமே’’தி பத³ச்சே²தோ³.
791.Vosāsantīti dutiyaṃ bhikkhupāṭidesanīyaṃ. Naccaṃ vā gītaṃ vāti paṭhame lasuṇavagge dasamaṃ. Cārikadvayanti catutthe tuvaṭṭavagge sattamaṭṭhamāni. Chandadānenāti aṭṭhame kumāribhūtavagge ekādasamaṃ. ‘‘Chandadānetī’’ti vā pāṭho. ‘‘Chandadānaṃ iti ime’’ti padacchedo.
792. குடீதி ச²ட்டோ² ஸங்கா⁴தி³ஸேஸோ. கோஸியந்தி நிஸ்ஸக்³கி³யேஸு து³தியே ஏளகலோமவக்³கே³ பட²மங். ஸெய்யந்தி முஸாவாத³வக்³கே³ பஞ்சமங். பத²வீதி முஸாவாத³வக்³கே³ த³ஸமங். பூ⁴தகா³மகந்தி பூ⁴தகா³மவக்³கே³ து³தியே பட²மங். ஸப்பாணகஞ்ச ஸிஞ்சந்தீதி பூ⁴தகா³மவக்³கே³ த³ஸமங்.
792.Kuṭīti chaṭṭho saṅghādiseso. Kosiyanti nissaggiyesu dutiye eḷakalomavagge paṭhamaṃ. Seyyanti musāvādavagge pañcamaṃ. Pathavīti musāvādavagge dasamaṃ. Bhūtagāmakanti bhūtagāmavagge dutiye paṭhamaṃ. Sappāṇakañca siñcantīti bhūtagāmavagge dasamaṃ.
800. ச²ஊனானி தீணேவ ஸதானீதி ச²ஹி ஊனானி தீணேவ ஸதானி, சதுனவுதாதி⁴கானி த்³விஸதானீதி அத்தோ². ஸமசேதஸாதி –
800.Chaūnāni tīṇeva satānīti chahi ūnāni tīṇeva satāni, catunavutādhikāni dvisatānīti attho. Samacetasāti –
‘‘வத⁴கே தே³வத³த்தம்ஹி, சோரே அங்கு³லிமாலகே;
‘‘Vadhake devadattamhi, core aṅgulimālake;
த⁴னபாலே ராஹுலே ச, ஸப்³ப³த்த² ஸமமானஸோ’’தி. (மி॰ ப॰ 6.6.5; த⁴॰ ப॰ அட்ட²॰ 1.16 தே³வத³த்தவத்து²; இதிவு॰ அட்ட²॰ 100) –
Dhanapāle rāhule ca, sabbattha samamānaso’’ti. (mi. pa. 6.6.5; dha. pa. aṭṭha. 1.16 devadattavatthu; itivu. aṭṭha. 100) –
வசனதோ ஸப்³பே³ஸு ஹிதாஹிதேஸு, லாபா⁴லாபா⁴தீ³ஸு ச அட்ட²ஸு லோகத⁴ம்மேஸு நிப்³பி³காரதாய ச ஸமானசித்தேன ததா²க³தேன.
Vacanato sabbesu hitāhitesu, lābhālābhādīsu ca aṭṭhasu lokadhammesu nibbikāratāya ca samānacittena tathāgatena.
வுத்தாவஸேஸாதி வேஸாலியாதீ³ஸு ச²ஸு நக³ரேஸு வுத்தேஹி அவஸிட்டா²னி. இமே ஸப்³பே³ இமானி ஸப்³பா³னி ஸிக்கா²பதா³னி ஸாவத்தி²யங் கதானி ப⁴வந்தி, பஞ்ஞத்தானி ஹொந்தீதி அத்தோ².
Vuttāvasesāti vesāliyādīsu chasu nagaresu vuttehi avasiṭṭhāni. Ime sabbe imāni sabbāni sikkhāpadāni sāvatthiyaṃ katāni bhavanti, paññattāni hontīti attho.
801. பாராஜிகானி சத்தாரீதி வேஸாலியங் வுத்தங் மேது²னமனுஸ்ஸவிக்³க³ஹஉத்தரிமனுஸ்ஸத⁴ம்மங், ராஜக³ஹே அதி³ன்னாதா³னந்தி சத்தாரி. ஸத்த ஸங்கா⁴தி³ஸேஸகாதி ராஜக³ஹே வுத்தா த்³வே அனுத்³த⁴ங்ஸனா, த்³வே ச பே⁴தா³, ஆளவியங் குடிகாரோ, கோஸம்பி³யங் மஹல்லகவிஹாரோ, தோ³வசஸ்ஸந்தி ஸத்த. நிஸ்ஸக்³கி³யானி அட்டே²வாதி வேஸாலியங் அதிரேகசீவரங், காளகஏளகலோமங், ராஜக³ஹே சீவரபடிக்³க³ஹணங், ரூபியபடிக்³க³ஹணங், ஸுத்தவிஞ்ஞத்தி, ஆளவியங் கோஸியமிஸ்ஸகங், கபிலவத்து²ம்ஹி ஏளகலோமதோ⁴வனங், ஊனபஞ்சப³ந்த⁴னந்தி அட்ட².
801.Pārājikāni cattārīti vesāliyaṃ vuttaṃ methunamanussaviggahauttarimanussadhammaṃ, rājagahe adinnādānanti cattāri. Satta saṅghādisesakāti rājagahe vuttā dve anuddhaṃsanā, dve ca bhedā, āḷaviyaṃ kuṭikāro, kosambiyaṃ mahallakavihāro, dovacassanti satta. Nissaggiyāni aṭṭhevāti vesāliyaṃ atirekacīvaraṃ, kāḷakaeḷakalomaṃ, rājagahe cīvarapaṭiggahaṇaṃ, rūpiyapaṭiggahaṇaṃ, suttaviññatti, āḷaviyaṃ kosiyamissakaṃ, kapilavatthumhi eḷakalomadhovanaṃ, ūnapañcabandhananti aṭṭha.
த்³வத்திங்ஸேவ ச கு²த்³த³காதி வேஸாலியங் பூ⁴தாரோசனங், பரம்பரபோ⁴ஜனங், அப்படிக்³க³ஹணங், அசேலகங், ‘‘யா பன பி⁴க்கு²னீ பி⁴க்கு²ங் அக்கோஸெய்யா’’தி பஞ்ச, ராஜக³ஹே உஜ்ஜா²பனகங், பி⁴க்கு²னிபரிபாசிதபிண்டோ³, க³ணபோ⁴ஜனங், விகாலபோ⁴ஜனங், ‘‘யோ பன பி⁴க்கு² நிமந்திதோ’’திஆதி³ ச, ‘‘ஓரேனட்³ட⁴மாஸங் நஹாயெய்யா’’தி, ஊனவீஸதிவஸ்ஸங், ‘‘ஸமக்³கே³ன ஸங்கே⁴ன சீவரங் த³த்வா’’தி பி⁴க்கூ²னங் அட்ட², பி⁴க்கு²னீனங் பன ‘‘நச்சங் வா கீ³தங் வா’’திஆதி³ ச, ‘‘யா பன பி⁴க்கு²னீ அந்தோவஸ்ஸ’’ந்திஆதி³ ச, ‘‘யா பன பி⁴க்கு²னீ வஸ்ஸங்வுத்தா²’’திஆதி³ சாதி த்³வயங், ‘‘யா பன பி⁴க்கு²னீ பாரிவாஸிகச²ந்த³தா³னேனா’’திஆதி³ சாதி சத்தாரி, ஆளவியங் அனுபஸம்பன்னேன உத்தரி தி³ரத்ததிரத்தங், ‘‘பத²விங் க²ணெய்ய வா’’திஆதி³, பூ⁴தகா³மபாதப்³யதாய, ‘‘ஜானங் ஸப்பாணகங் உத³க’’ந்தி சத்தாரி, கோஸம்பி³யங் அஞ்ஞவாத³கே விஹேஸகே, யாவத்³வாரகோஸா அக்³க³ளட்ட²பனாய, ஸுராமேரயபானே, அனாத³ரியே, ‘‘யோ பன பி⁴க்கு² பி⁴க்கூ²ஹி ஸஹத⁴ம்மிக’’ந்திஆதி³ சாதி பஞ்ச, கபிலவத்து²ம்ஹி ‘‘பி⁴க்கு²னுபஸ்ஸயங் க³ந்த்வா’’திஆதி³, ‘‘அகி³லானேன பி⁴க்கு²னா சாதுமாஸ’’ந்திஆதி³, ‘‘அட்டி²மயங் வா த³ந்தமயங் வா’’திஆதி³ தீணி பி⁴க்கூ²னங், பி⁴க்கு²னீனங் பன ‘‘உத³கஸுத்³தி⁴கங் பனா’’திஆதி³, ‘‘ஓவாதா³ய வா’’திஆதீ³தி த்³வே, ப⁴க்³கே³ஸு ‘‘அகி³லானோ விஸிப்³ப³னாபெக்கோ²’’திஆதி³ ஏகந்தி ஏதானி பா³த்திங்ஸேவ பாசித்தியானி.
Dvattiṃseva ca khuddakāti vesāliyaṃ bhūtārocanaṃ, paramparabhojanaṃ, appaṭiggahaṇaṃ, acelakaṃ, ‘‘yā pana bhikkhunī bhikkhuṃ akkoseyyā’’ti pañca, rājagahe ujjhāpanakaṃ, bhikkhuniparipācitapiṇḍo, gaṇabhojanaṃ, vikālabhojanaṃ, ‘‘yo pana bhikkhu nimantito’’tiādi ca, ‘‘orenaḍḍhamāsaṃ nahāyeyyā’’ti, ūnavīsativassaṃ, ‘‘samaggena saṅghena cīvaraṃ datvā’’ti bhikkhūnaṃ aṭṭha, bhikkhunīnaṃ pana ‘‘naccaṃ vā gītaṃ vā’’tiādi ca, ‘‘yā pana bhikkhunī antovassa’’ntiādi ca, ‘‘yā pana bhikkhunī vassaṃvutthā’’tiādi cāti dvayaṃ, ‘‘yā pana bhikkhunī pārivāsikachandadānenā’’tiādi cāti cattāri, āḷaviyaṃ anupasampannena uttari dirattatirattaṃ, ‘‘pathaviṃ khaṇeyya vā’’tiādi, bhūtagāmapātabyatāya, ‘‘jānaṃ sappāṇakaṃ udaka’’nti cattāri, kosambiyaṃ aññavādake vihesake, yāvadvārakosā aggaḷaṭṭhapanāya, surāmerayapāne, anādariye, ‘‘yo pana bhikkhu bhikkhūhi sahadhammika’’ntiādi cāti pañca, kapilavatthumhi ‘‘bhikkhunupassayaṃ gantvā’’tiādi, ‘‘agilānena bhikkhunā cātumāsa’’ntiādi, ‘‘aṭṭhimayaṃ vā dantamayaṃ vā’’tiādi tīṇi bhikkhūnaṃ, bhikkhunīnaṃ pana ‘‘udakasuddhikaṃ panā’’tiādi, ‘‘ovādāya vā’’tiādīti dve, bhaggesu ‘‘agilāno visibbanāpekkho’’tiādi ekanti etāni bāttiṃseva pācittiyāni.
802. த்³வே கா³ரய்ஹாதி ‘‘பி⁴க்கு² பனேவ குலேஸூ’’திஆதி³, ‘‘யானி கோ² பன தானி ஆரஞ்ஞகானீ’’திஆதி³ சாதி த்³வே பாடிதே³ஸனீயா. தயோ ஸேகா²தி கோஸம்பி³யங் ந ஸுருஸுருகாரகங், ப⁴க்³கே³ஸு ந ஸாமிஸேன ஹத்தே²ன பானீயதா²லகங், ந ஸஸித்த²கங் பத்ததோ⁴வனந்தி தீணி ஸேகி²யானி. ச²ப்பஞ்ஞாஸேவ ஸிக்கா²பதா³னி பிண்டி³தானி வேஸாலியாதீ³ஸு ச²ஸு நக³ரேஸு பஞ்ஞத்தானி ப⁴வந்தீதி யோஜனா.
802.Dvegārayhāti ‘‘bhikkhu paneva kulesū’’tiādi, ‘‘yāni kho pana tāni āraññakānī’’tiādi cāti dve pāṭidesanīyā. Tayo sekhāti kosambiyaṃ na surusurukārakaṃ, bhaggesu na sāmisena hatthena pānīyathālakaṃ, na sasitthakaṃ pattadhovananti tīṇi sekhiyāni. Chappaññāseva sikkhāpadāni piṇḍitāni vesāliyādīsu chasu nagaresu paññattāni bhavantīti yojanā.
803. ஸத்தஸு நக³ரேஸு பஞ்ஞத்தானி ஏதானி ஸப்³பா³னேவ ஸிக்கா²பதா³னி பன அட்³டு⁴ட்³டா⁴னி ஸதானேவ ப⁴வந்தி. ஸாவத்தி²யங் பஞ்ஞத்தேஹி சதுனவுதாதி⁴கத்³விஸதஸிக்கா²பதே³ஹி ஸத்³தி⁴ங் ச²ஸு நக³ரேஸு பஞ்ஞத்தானி ச²பஞ்ஞாஸ ஸிக்கா²பதா³னி பஞ்ஞாஸாதி⁴கானி தீணி ஸதானி ப⁴வந்தீதி அத்தோ². அட்³டே⁴ன சதுத்த²ங் யேஸங் தானி அட்³டு⁴ட்³டா⁴னி.
803. Sattasu nagaresu paññattāni etāni sabbāneva sikkhāpadāni pana aḍḍhuḍḍhāni satāneva bhavanti. Sāvatthiyaṃ paññattehi catunavutādhikadvisatasikkhāpadehi saddhiṃ chasu nagaresu paññattāni chapaññāsa sikkhāpadāni paññāsādhikāni tīṇi satāni bhavantīti attho. Aḍḍhena catutthaṃ yesaṃ tāni aḍḍhuḍḍhāni.
804-10. ஏவங் நிதா³னவஸேன நக³ரங் த³ஸ்ஸெத்வா இதா³னி நிதா³னமஞ்ஞமஸேஸெத்வா உப⁴தோவிப⁴ங்கா³க³தானங் ஸப்³பே³ஸங் ஸிக்கா²பதா³னங் கேவலங் பிண்ட³வஸேன க³ணனங் த³ஸ்ஸேதுமாஹ ‘‘ஸிக்கா²பதா³னி பி⁴க்கூ²ன’’ந்திஆதி³.
804-10. Evaṃ nidānavasena nagaraṃ dassetvā idāni nidānamaññamasesetvā ubhatovibhaṅgāgatānaṃ sabbesaṃ sikkhāpadānaṃ kevalaṃ piṇḍavasena gaṇanaṃ dassetumāha ‘‘sikkhāpadāni bhikkhūna’’ntiādi.
811. ஏவங் ஸப்³ப³ஸிக்கா²பதா³னங் நிதா³னஞ்ச க³ணனஞ்ச த³ஸ்ஸெத்வா இதா³னி அஸாதா⁴ரணானி த³ஸ்ஸேதுமாஹ ‘‘ச²சத்தாலீஸா’’திஆதி³. பி⁴க்கூ²னங் பி⁴க்கு²னீஹி அஸாதா⁴ரணபா⁴வங் மஹேஸினா க³மிதானி ஸிக்கா²பதா³னி ச²சத்தாலீஸேவ ஹொந்தீதி யோஜனா. இமினா உத்³தே³ஸமாஹ.
811. Evaṃ sabbasikkhāpadānaṃ nidānañca gaṇanañca dassetvā idāni asādhāraṇāni dassetumāha ‘‘chacattālīsā’’tiādi. Bhikkhūnaṃ bhikkhunīhi asādhāraṇabhāvaṃ mahesinā gamitāni sikkhāpadāni chacattālīseva hontīti yojanā. Iminā uddesamāha.
814. ‘‘ச² ச ஸங்கா⁴தி³ஸேஸா’’திஆதீ³ஹி த்³வீஹி கா³தா²ஹி நித்³தே³ஸங் த³ஸ்ஸெத்வா ‘‘விஸ்ஸட்டீ²’’திஆதி³னா படினித்³தே³ஸமாஹ.
814. ‘‘Cha ca saṅghādisesā’’tiādīhi dvīhi gāthāhi niddesaṃ dassetvā ‘‘vissaṭṭhī’’tiādinā paṭiniddesamāha.
815. ‘‘நிஸ்ஸக்³கி³யே ஆதி³வக்³க³ஸ்மி’’ந்தி பத³ச்சே²தோ³. தோ⁴வனந்தி அஞ்ஞாதிகாய பி⁴க்கு²னியா சீவரதோ⁴வனங். படிக்³க³ஹோதி தஸ்ஸாயேவ ஹத்த²தோ சீவரபடிக்³க³ஹணங்.
815. ‘‘Nissaggiye ādivaggasmi’’nti padacchedo. Dhovananti aññātikāya bhikkhuniyā cīvaradhovanaṃ. Paṭiggahoti tassāyeva hatthato cīvarapaṭiggahaṇaṃ.
816. ஆரஞ்ஞந்தி ஏகூனதிங்ஸதிமங் ஸிக்கா²பத³ங்.
816.Āraññanti ekūnatiṃsatimaṃ sikkhāpadaṃ.
817. பி⁴க்கூ²னங், பி⁴க்கு²னீனஞ்ச வுத்தானி ஸப்³பா³னி பாசித்தியானி க³ணனாவஸா அட்டா²ஸீதிஸதங் ப⁴வந்தீதி யோஜனா. அட்டா²ஸீதிஸதந்தி பி⁴க்கு²னிபாதிமொக்கா²க³தங் ச²ஸட்டி²ஸதபாசித்தியங் வக்க²மானேஹி பி⁴க்கு²னியதேஹி பா³வீஸதிபாசித்தியேஹி ஸத்³தி⁴ங் அட்டா²ஸீதிஸதங் ஹோதி. ததோதி அட்டா²ஸீதாதி⁴கஸதபாசித்தியதோ நித்³தா⁴ரிதானி ஏதானி த்³வாவீஸதி கு²த்³த³கானி பி⁴க்கூ²னங் பாதிமொக்க²கே ப⁴வந்தீதி யோஜனா.
817. Bhikkhūnaṃ, bhikkhunīnañca vuttāni sabbāni pācittiyāni gaṇanāvasā aṭṭhāsītisataṃ bhavantīti yojanā. Aṭṭhāsītisatanti bhikkhunipātimokkhāgataṃ chasaṭṭhisatapācittiyaṃ vakkhamānehi bhikkhuniyatehi bāvīsatipācittiyehi saddhiṃ aṭṭhāsītisataṃ hoti. Tatoti aṭṭhāsītādhikasatapācittiyato niddhāritāni etāni dvāvīsati khuddakāni bhikkhūnaṃ pātimokkhake bhavantīti yojanā.
818. பி⁴க்கு²னிவக்³கோ³தி பி⁴க்கு²னீனங் ஓவாத³வக்³கோ³. பரம்பரபோ⁴ஜனே பஞ்ஞத்தங் ஸிக்கா²பத³ங் பரம்பரபோ⁴ஜனங், பரம்பரபோ⁴ஜனேன ஸஹ வத்ததீதி ஸபரம்பரபோ⁴ஜனோ.
818.Bhikkhunivaggoti bhikkhunīnaṃ ovādavaggo. Paramparabhojane paññattaṃ sikkhāpadaṃ paramparabhojanaṃ, paramparabhojanena saha vattatīti saparamparabhojano.
822. ‘‘ஏகதோ பன பஞ்ஞத்தா’’திஆதி³ நிக³மனங். பி⁴க்கு²னீஹி அஸாதா⁴ரணதங் க³தா ஏகதோவ பஞ்ஞத்தா இமே இமானி ஸிக்கா²பதா³னி பிண்டி³தானி ச²சத்தாலீஸ ஹொந்தீதி யோஜனா.
822.‘‘Ekato pana paññattā’’tiādi nigamanaṃ. Bhikkhunīhi asādhāraṇataṃ gatā ekatova paññattā ime imāni sikkhāpadāni piṇḍitāni chacattālīsa hontīti yojanā.
823. மஹேஸினா பி⁴க்கூ²ஹி அஸாதா⁴ரணபா⁴வங் க³மிதானி பி⁴க்கு²னீனங் ஸிக்கா²பதா³னி பரிபிண்டி³தானி ஸதங், திங்ஸ ச ப⁴வந்தீதி யோஜனா.
823. Mahesinā bhikkhūhi asādhāraṇabhāvaṃ gamitāni bhikkhunīnaṃ sikkhāpadāni paripiṇḍitāni sataṃ, tiṃsa ca bhavantīti yojanā.
824. ஏவங் உத்³தி³ட்டா²னங் நித்³தே³ஸமாஹ ‘‘பாராஜிகானீ’’திஆதி³னா. பாராஜிகானி சத்தாரீதி உப்³ப⁴ஜாணுமண்ட³லிகவஜ்ஜபடிச்சா²தி³கஉக்கி²த்தானுவத்திகஅட்ட²வத்து²கஸங்கா²தானி சத்தாரி பாராஜிகானி.
824. Evaṃ uddiṭṭhānaṃ niddesamāha ‘‘pārājikānī’’tiādinā. Pārājikāni cattārīti ubbhajāṇumaṇḍalikavajjapaṭicchādikaukkhittānuvattikaaṭṭhavatthukasaṅkhātāni cattāri pārājikāni.
826. த்³வீஹி கா³தா²ஹி நித்³தி³ட்டா²னங் படினித்³தே³ஸோ ‘‘பி⁴க்கு²னீனங் து ஸங்கா⁴தி³ஸேஸேஹீ’’திஆதி³. சதுன்னங் பாராஜிகானங் உத்³தே³ஸவஸேனேவ பாகடத்தா படினித்³தே³ஸே அக்³க³ஹணங். ஆதி³தோ சா²தி உஸ்ஸயவாதி³காத³யோ ச² ஸங்கா⁴தி³ஸேஸா. ‘‘ஆதி³தோ’’தி இத³ங் ‘‘யாவததியகா’’தி இமினாபி யோஜேதப்³ப³ங், அட்ட²ஸு யாவததியகேஸு புரிமானி சத்தாரி ஸிக்கா²பதா³னீதி வுத்தங் ஹோதி.
826. Dvīhi gāthāhi niddiṭṭhānaṃ paṭiniddeso ‘‘bhikkhunīnaṃ tu saṅghādisesehī’’tiādi. Catunnaṃ pārājikānaṃ uddesavaseneva pākaṭattā paṭiniddese aggahaṇaṃ. Ādito chāti ussayavādikādayo cha saṅghādisesā. ‘‘Ādito’’ti idaṃ ‘‘yāvatatiyakā’’ti imināpi yojetabbaṃ, aṭṭhasu yāvatatiyakesu purimāni cattāri sikkhāpadānīti vuttaṃ hoti.
827. ஸத்தஞ்ஞத³த்தி²காதீ³னீதி ஆதி³-ஸத்³தே³ன அஞ்ஞத³த்தி²கஸிக்கா²பத³தோ பச்சி²மானி சத்தாரி, புரிமானி ‘‘அஞ்ஞங் விஞ்ஞாபெய்ய, அஞ்ஞங் சேதாபெய்யா’’தி த்³வே ச க³ஹிதானி. பத்தோ சேவாதி பட²மங் பத்தஸன்னிசயஸிக்கா²பத³மாஹ. து³தியவக்³கே³ புரிமஸிக்கா²பத³த்³வயங் ‘‘க³ருங் லஹு’’ந்தி இமினா க³ஹிதங்.
827.Sattaññadatthikādīnīti ādi-saddena aññadatthikasikkhāpadato pacchimāni cattāri, purimāni ‘‘aññaṃ viññāpeyya, aññaṃ cetāpeyyā’’ti dve ca gahitāni. Patto cevāti paṭhamaṃ pattasannicayasikkhāpadamāha. Dutiyavagge purimasikkhāpadadvayaṃ ‘‘garuṃ lahu’’nti iminā gahitaṃ.
828. இத⁴ பி⁴க்கு²னிபாதிமொக்கே² ஏதானி பன த்³வாத³ஸேவ நிஸ்ஸக்³கி³யானி ஸத்தா²ரா பி⁴க்கு²னீனங் வஸேன ஏகதோ பஞ்ஞத்தானீதி யோஜனா.
828.Idha bhikkhunipātimokkhe etāni pana dvādaseva nissaggiyāni satthārā bhikkhunīnaṃ vasena ekato paññattānīti yojanā.
829-30. ‘‘ஸப்³பே³வ க³ணனாவஸா’’திஆதி³ நிக³மனங். பி⁴க்கூ²ஹி அஸாதா⁴ரணதங் க³தா பி⁴க்கு²னீனங் ஏகதோ பஞ்ஞத்தா ஸதங், திங்ஸ ப⁴வந்தீதி யோஜனா.
829-30.‘‘Sabbeva gaṇanāvasā’’tiādi nigamanaṃ. Bhikkhūhi asādhāraṇataṃ gatā bhikkhunīnaṃ ekato paññattā sataṃ, tiṃsa bhavantīti yojanā.
831-3. ‘‘அஸாதா⁴ரணா உபி⁴ன்ன’’ந்தி பத³ச்சே²தோ³. உபி⁴ன்னங் அஸாதா⁴ரணஸிக்கா²பதா³னி ஸதஞ்ச ஸத்ததி ச ச² ச ப⁴வந்தி. ஏவமுத்³தி³ட்டா²னங் நித்³தே³ஸோ ‘‘பாராஜிகானி சத்தாரீ’’திஆதி³. பி⁴க்கூ²ஹி அஸாதா⁴ரணானி பி⁴க்கு²னீனங் சத்தாரி பாராஜிகானி. த³ஸச்ச² சாதி பி⁴க்கூ²ஹி அஸாதா⁴ரணானி பி⁴க்கு²னீனங் ஸங்கா⁴தி³ஸேஸா த³ஸ, பி⁴க்கு²னீஹி அஸாதா⁴ரணானி பி⁴க்கூ²னங் விஸ்ஸட்டி²ஆதி³கா ஸங்கா⁴தி³ஸேஸா ச² சாதி ஸங்கா⁴தி³ஸேஸா ஸோளஸ.
831-3. ‘‘Asādhāraṇā ubhinna’’nti padacchedo. Ubhinnaṃ asādhāraṇasikkhāpadāni satañca sattati ca cha ca bhavanti. Evamuddiṭṭhānaṃ niddeso ‘‘pārājikāni cattārī’’tiādi. Bhikkhūhi asādhāraṇāni bhikkhunīnaṃ cattāri pārājikāni. Dasacchacāti bhikkhūhi asādhāraṇāni bhikkhunīnaṃ saṅghādisesā dasa, bhikkhunīhi asādhāraṇāni bhikkhūnaṃ vissaṭṭhiādikā saṅghādisesā cha cāti saṅghādisesā soḷasa.
அனியதா து³வே சேவாதி பி⁴க்கு²னீஹி அஸாதா⁴ரணானி பி⁴க்கூ²னங் அனியதா த்³வே ச. நிஸ்ஸக்³கா³ சதுவீஸதீதி பி⁴க்கு²னீஹி அஸாதா⁴ரணானி பி⁴க்கூ²னங் த்³வாத³ஸ, பி⁴க்கூ²ஹி அஸாதா⁴ரணானி பி⁴க்கு²னீனங் த்³வாத³ஸாதி ஏவங் நிஸ்ஸக்³கி³யா சதுவீஸதி ச. ஸதங் அட்டா²ரஸ கு²த்³த³காதி பி⁴க்கு²னீஹி அஸாதா⁴ரணானி பி⁴க்கூ²னங் பா³வீஸதி, பி⁴க்கூ²ஹி அஸாதா⁴ரணானி பி⁴க்கு²னீனங் ச²ன்னவுதீதி அட்டா²ரஸாதி⁴கஸதங் கு²த்³த³கானி ச. எத்தா²தி இமஸ்மிங் அஸாதா⁴ரணஸங்க³ஹே.
Aniyatā duve cevāti bhikkhunīhi asādhāraṇāni bhikkhūnaṃ aniyatā dve ca. Nissaggā catuvīsatīti bhikkhunīhi asādhāraṇāni bhikkhūnaṃ dvādasa, bhikkhūhi asādhāraṇāni bhikkhunīnaṃ dvādasāti evaṃ nissaggiyā catuvīsati ca. Sataṃ aṭṭhārasa khuddakāti bhikkhunīhi asādhāraṇāni bhikkhūnaṃ bāvīsati, bhikkhūhi asādhāraṇāni bhikkhunīnaṃ channavutīti aṭṭhārasādhikasataṃ khuddakāni ca. Etthāti imasmiṃ asādhāraṇasaṅgahe.
த்³வாத³ஸேவ ச கா³ரய்ஹாதி பி⁴க்கு²னீஹி அஸாதா⁴ரணானி பி⁴க்கூ²னங் சத்தாரி, பி⁴க்கூ²ஹி அஸாதா⁴ரணானி பி⁴க்கு²னீனங் அட்டா²தி ஏதே பாடிதே³ஸனீயா சாதி இமே ச²ஸத்ததிஅதி⁴கானி ஸதஸிக்கா²பதா³னி உபி⁴ன்னம்பி அஸாதா⁴ரணானீதி யோஜனா.
Dvādaseva ca gārayhāti bhikkhunīhi asādhāraṇāni bhikkhūnaṃ cattāri, bhikkhūhi asādhāraṇāni bhikkhunīnaṃ aṭṭhāti ete pāṭidesanīyā cāti ime chasattatiadhikāni satasikkhāpadāni ubhinnampi asādhāraṇānīti yojanā.
834. உபி⁴ன்னம்பி ஸாதா⁴ரணானி ஸத்து²னா பஞ்ஞத்தானி ஸிக்கா²பதா³னி ஸதஞ்ச ஸத்ததி ச சத்தாரி ச ப⁴வந்தீதி பகாஸிதாதி யோஜனா.
834. Ubhinnampi sādhāraṇāni satthunā paññattāni sikkhāpadāni satañca sattati ca cattāri ca bhavantīti pakāsitāti yojanā.
835-6. பாராஜிகானி சத்தாரீதி மேது²னஅதி³ன்னாதா³னமனுஸ்ஸவிக்³க³ஹஉத்தரிமனுஸ்ஸத⁴ம்மபாராஜிகானி சத்தாரி ச. ஸத்த ஸங்கா⁴தி³ஸேஸகாதி ஸஞ்சரித்தஅமூலகஅஞ்ஞபா⁴கி³யா, சத்தாரோ யாவததியகா சாதி ஸங்கா⁴தி³ஸேஸா ஸத்த ச. அட்டா²ரஸ ச நிஸ்ஸக்³கா³தி நிஸ்ஸக்³கி³யேஸு பட²மே சீவரவக்³கே³ தோ⁴வனபடிக்³க³ஹணஸிக்கா²பத³த்³வயவஜ்ஜிதானி அட்ட², ஏளகலோமவக்³கே³ அட்ட²மனவமத³ஸமானீதி தயோ, பத்தவக்³கே³ பட²மபத்தவஸ்ஸிகஸாடிகஆரஞ்ஞகஸிக்கா²பத³த்தயஸ்ஸ வஜ்ஜிதானி ஸத்த சாதி இமானி அட்டா²ரஸ நிஸ்ஸக்³கி³யஸிக்கா²பதா³னி ச. ஸமஸத்ததி கு²த்³த³காதி –
835-6.Pārājikāni cattārīti methunaadinnādānamanussaviggahauttarimanussadhammapārājikāni cattāri ca. Satta saṅghādisesakāti sañcarittaamūlakaaññabhāgiyā, cattāro yāvatatiyakā cāti saṅghādisesā satta ca. Aṭṭhārasa ca nissaggāti nissaggiyesu paṭhame cīvaravagge dhovanapaṭiggahaṇasikkhāpadadvayavajjitāni aṭṭha, eḷakalomavagge aṭṭhamanavamadasamānīti tayo, pattavagge paṭhamapattavassikasāṭikaāraññakasikkhāpadattayassa vajjitāni satta cāti imāni aṭṭhārasa nissaggiyasikkhāpadāni ca. Samasattati khuddakāti –
‘‘ஸப்³போ³ பி⁴க்கு²னிவக்³கோ³பி…பே॰… த்³வாவீஸதி ப⁴வந்தி ஹீ’’தி. (உ॰ வி॰ 818-821) –
‘‘Sabbo bhikkhunivaggopi…pe… dvāvīsati bhavanti hī’’ti. (u. vi. 818-821) –
வுத்தா பி⁴க்கூ²னங் பி⁴க்கு²னீஹி அஸாதா⁴ரணாதி இமேஹி பா³வீஸதிபாசித்தியேஹி வஜ்ஜிதானி அவஸேஸானி ஸத்ததி பாசித்தியானி ச உப⁴யஸாதா⁴ரணவஸேன பஞ்ஞத்தானி. பஞ்சஸத்ததி ஸேகி²யாபி சாதி உபி⁴ன்னங் பி⁴க்கு²பி⁴க்கு²னீனங் ஸமஸிக்க²தா ஸாதா⁴ரணஸிக்கா²பதா³னி ஸப்³ப³ஸோ ஸதங், ஸத்ததி, சத்தாரி ச ஹொந்தீதி யோஜனா.
Vuttā bhikkhūnaṃ bhikkhunīhi asādhāraṇāti imehi bāvīsatipācittiyehi vajjitāni avasesāni sattati pācittiyāni ca ubhayasādhāraṇavasena paññattāni. Pañcasattati sekhiyāpi cāti ubhinnaṃ bhikkhubhikkhunīnaṃ samasikkhatā sādhāraṇasikkhāpadāni sabbaso sataṃ, sattati, cattāri ca hontīti yojanā.
இதி உத்தரே லீனத்த²பகாஸனியா
Iti uttare līnatthapakāsaniyā
ஸாதா⁴ரணாஸாதா⁴ரணகதா²வண்ணனா நிட்டி²தா.
Sādhāraṇāsādhāraṇakathāvaṇṇanā niṭṭhitā.
