| Library / Tipiṭaka / তিপিটক • Tipiṭaka / উদান-অট্ঠকথা • Udāna-aṭṭhakathā |
৯. সধাযমানসুত্তৰণ্ণনা
9. Sadhāyamānasuttavaṇṇanā
৪৯. নৰমে মাণৰকাতি তরুণা। পঠমে যোব্বনে ঠিতা ব্রাহ্মণকুমারকা ইধাধিপ্পেতা।
49. Navame māṇavakāti taruṇā. Paṭhame yobbane ṭhitā brāhmaṇakumārakā idhādhippetā.
সধাযমানরূপাতি উপ্পণ্ডনজাতিকং ৰচনং সন্ধায ৰুত্তং। অঞ্ঞেসং উপ্পণ্ডেন্তা সধন্তি, তদত্থৰচনসীলাতি অত্থো। তস্সাযং ৰচনত্থো – সধনং সধো, তং আচিক্খন্তীতি সধযমানাতি ৰত্তব্বে দীঘং কত্ৰা ‘‘সধাযমানা’’তি ৰুত্তং। অথ ৰা ৰিসেসতো সসেধে ৰিয অত্তানং আৰদন্তীতি সধাযমানা। তে এৰং সভাৰতায ‘‘সধাযমানরূপা’’তি ৰুত্তং। ‘‘সদ্দাযমানরূপা’’তিপি পাঠো, উচ্চাসদ্দমহাসদ্দং করোন্তাতি অত্থো। ভগৰতো অৰিদূরে অতিক্কমন্তীতি ভগৰতো সৰনৰিসযে তং তং মুখারুল়্হং ৰদন্তা অতিযন্তি।
Sadhāyamānarūpāti uppaṇḍanajātikaṃ vacanaṃ sandhāya vuttaṃ. Aññesaṃ uppaṇḍentā sadhanti, tadatthavacanasīlāti attho. Tassāyaṃ vacanattho – sadhanaṃ sadho, taṃ ācikkhantīti sadhayamānāti vattabbe dīghaṃ katvā ‘‘sadhāyamānā’’ti vuttaṃ. Atha vā visesato sasedhe viya attānaṃ āvadantīti sadhāyamānā. Te evaṃ sabhāvatāya ‘‘sadhāyamānarūpā’’ti vuttaṃ. ‘‘Saddāyamānarūpā’’tipi pāṭho, uccāsaddamahāsaddaṃ karontāti attho. Bhagavato avidūre atikkamantīti bhagavato savanavisaye taṃ taṃ mukhāruḷhaṃ vadantā atiyanti.
এতমত্থং ৰিদিত্ৰাতি এতং তেসং ৰাচায অসঞ্ঞতভাৰং জানিত্ৰা তদত্থদীপকং ধম্মসংৰেগৰসেন ইমং উদানং উদানেসি।
Etamatthaṃviditvāti etaṃ tesaṃ vācāya asaññatabhāvaṃ jānitvā tadatthadīpakaṃ dhammasaṃvegavasena imaṃ udānaṃ udānesi.
তত্থ পরিমুট্ঠাতি দন্ধা মুট্ঠস্সতিনো। পণ্ডিতাভাসাতি পণ্ডিতপতিরূপকা ‘‘কে অঞ্ঞে জানন্তি, মযমেৰেত্থ জানামা’’তি তস্মিং তস্মিং অত্থে অত্তানমেৰ জানন্তং কত্ৰা সমুদাচরণতো। ৰাচাগোচরভাণিনোতি যেসং ৰাচা এৰ গোচরো ৰিসযো, তে ৰাচাগোচরভাণিনো, ৰাচাৰত্থুমত্তস্সেৰ ভাণিনো অত্থস্স অপরিঞ্ঞাতত্তা। অথ ৰা ৰাচায অগোচরং অরিযানং কথায অৰিসযং মুসাৰাদং ভণন্তীতি ৰাচাগোচরভাণিনো। অথ ৰা ‘‘গোচরভাণিনো’’তি এত্থ আকারস্স রস্সভাৰো কতো। ৰাচাগোচরা, ন সতিপট্ঠানাদিগোচরা ভাণিনোৰ। কথং ভাণিনো? যাৰিচ্ছন্তি মুখাযামং অত্তনো যাৰ মুখাযামং যাৰ মুখপ্পসারণং ইচ্ছন্তি, তাৰ পসারেত্ৰা ভাণিনো, পরেসু গারৰেন, অত্তনো অৰিসযতায চ মুখসঙ্কোচং ন করোন্তীতি অত্থো। অথ ৰা ৰাচাগোচরা এৰ হুত্ৰা ভাণিনো, সযং অজানিত্ৰা পরপত্তিকা এৰ হুত্ৰা ৰত্তারোতি অত্থো। ততো এৰ যাৰিচ্ছন্তি মুখাযামং যেন ৰচনেন সাৰেতব্বা, তং অচিন্তেত্ৰা যাৰদেৰ অত্তনো মুখপ্পসারণমত্তং ইচ্ছন্তীতি অত্থো। যেন নীতা ন তং ৰিদূতি যেন মুট্ঠস্সচ্চাদিনা নিল্লজ্জভাৰং পণ্ডিতমানীভাৰঞ্চ নীতা ‘‘মযমেৰং ভণামা’’তি, তং তথা অত্তনো ভণন্তস্স কারণং ন ৰিদূ, অৰিদ্দসুনো অসূরা ন জানন্তীতি অত্থো।
Tattha parimuṭṭhāti dandhā muṭṭhassatino. Paṇḍitābhāsāti paṇḍitapatirūpakā ‘‘ke aññe jānanti, mayamevettha jānāmā’’ti tasmiṃ tasmiṃ atthe attānameva jānantaṃ katvā samudācaraṇato. Vācāgocarabhāṇinoti yesaṃ vācā eva gocaro visayo, te vācāgocarabhāṇino, vācāvatthumattasseva bhāṇino atthassa apariññātattā. Atha vā vācāya agocaraṃ ariyānaṃ kathāya avisayaṃ musāvādaṃ bhaṇantīti vācāgocarabhāṇino. Atha vā ‘‘gocarabhāṇino’’ti ettha ākārassa rassabhāvo kato. Vācāgocarā, na satipaṭṭhānādigocarā bhāṇinova. Kathaṃ bhāṇino? Yāvicchanti mukhāyāmaṃ attano yāva mukhāyāmaṃ yāva mukhappasāraṇaṃ icchanti, tāva pasāretvā bhāṇino, paresu gāravena, attano avisayatāya ca mukhasaṅkocaṃ na karontīti attho. Atha vā vācāgocarā eva hutvā bhāṇino, sayaṃ ajānitvā parapattikā eva hutvā vattāroti attho. Tato eva yāvicchanti mukhāyāmaṃ yena vacanena sāvetabbā, taṃ acintetvā yāvadeva attano mukhappasāraṇamattaṃ icchantīti attho. Yena nītā na taṃ vidūti yena muṭṭhassaccādinā nillajjabhāvaṃ paṇḍitamānībhāvañca nītā ‘‘mayamevaṃ bhaṇāmā’’ti, taṃ tathā attano bhaṇantassa kāraṇaṃ na vidū, aviddasuno asūrā na jānantīti attho.
নৰমসুত্তৰণ্ণনা নিট্ঠিতা।
Navamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / উদানপাল়ি • Udānapāḷi / ৯. সধাযমানসুত্তং • 9. Sadhāyamānasuttaṃ
