| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஸாது⁴ஸுத்தவண்ணனா
3. Sādhusuttavaṇṇanā
33. ததியே உதா³னங் உதா³னேஸீதி உதா³ஹாரங் உதா³ஹரி. யதா² ஹி யங் தேலங் மானங் க³ஹேதுங் ந ஸக்கோதி விஸ்ஸந்தி³த்வா க³ச்ச²தி, தங் அவஸேஸகோதி வுச்சதி. யஞ்ச ஜலங் தளாகங் க³ஹேதுங் ந ஸக்கோதி, அஜ்ஜொ²த்த²ரித்வா க³ச்ச²தி, தங் ஓகோ⁴தி வுச்சதி, ஏவமேவங் யங் பீதிவசனங் ஹத³யங் க³ஹேதுங் ந ஸக்கோதி, அதி⁴கங் ஹுத்வா அந்தோ அஸண்ட²ஹித்வா ப³ஹி நிக்க²மதி, தங் உதா³னந்தி வுச்சதி. ஏவரூபங் பீதிமயங் வசனங் நிச்சா²ரேஸீதி அத்தோ². ஸத்³தா⁴யபி ஸாஹு தா³னந்தி கம்மஞ்ச கம்மப²லஞ்ச ஸத்³த³ஹித்வாபி தி³ன்னதா³னங் ஸாஹு லத்³த⁴கங் ப⁴த்³த³கமேவ. ஆஹூதி கதெ²ந்தி. கத²ங் பனேதங் உப⁴யங் ஸமங் நாம ஹோதீதி? ஜீவிதபீ⁴ருகோ ஹி யுஜ்ஜி²துங் ந ஸக்கோதி, க²யபீ⁴ருகோ தா³துங் ந ஸக்கோதி. ‘‘ஜீவிதஞ்ச ரக்கி²ஸ்ஸாமி யுஜ்ஜி²ஸ்ஸாமி சா’’தி ஹி வத³ந்தோ ந யுஜ்ஜ²தி. ஜீவிதே பன ஆலயங் விஸ்ஸஜ்ஜெத்வா, ‘‘சே²ஜ்ஜங் வா ஹோது மரணங் வா, க³ண்ஹிஸ்ஸாமேதங் இஸ்ஸரிய’’ந்தி உஸ்ஸஹந்தோவ யுஜ்ஜ²தி. ‘‘போ⁴கே³ ச ரக்கி²ஸ்ஸாமி, தா³னஞ்ச த³ஸ்ஸாமீ’’தி வத³ந்தோ ந த³தா³தி. போ⁴கே³ஸு பன ஆலயங் விஸ்ஸஜ்ஜெத்வா மஹாதா³னங் த³ஸ்ஸாமீதி உஸ்ஸஹந்தோவ தே³தி. ஏவங் தா³னஞ்ச யுத்³த⁴ஞ்ச ஸமங் ஹோதி. கிஞ்ச பி⁴ய்யோ? அப்பாபி ஸந்தா ப³ஹுகே ஜினந்தீதி யதா² ச யுத்³தே⁴ அப்பகாபி வீரபுரிஸா ப³ஹுகே பீ⁴ருபுரிஸே ஜினந்தி, ஏவங் ஸத்³தா⁴தி³ஸம்பன்னோ அப்பகம்பி தா³னங் த³த³ந்தோ ப³ஹுமச்சே²ரங் மத்³த³தி, ப³ஹுஞ்ச தா³னவிபாகங் அதி⁴க³ச்ச²தி. ஏவம்பி தா³னஞ்ச யுத்³த⁴ஞ்ச ஸமானங். தேனேவாஹ –
33. Tatiye udānaṃ udānesīti udāhāraṃ udāhari. Yathā hi yaṃ telaṃ mānaṃ gahetuṃ na sakkoti vissanditvā gacchati, taṃ avasesakoti vuccati. Yañca jalaṃ taḷākaṃ gahetuṃ na sakkoti, ajjhottharitvā gacchati, taṃ oghoti vuccati, evamevaṃ yaṃ pītivacanaṃ hadayaṃ gahetuṃ na sakkoti, adhikaṃ hutvā anto asaṇṭhahitvā bahi nikkhamati, taṃ udānanti vuccati. Evarūpaṃ pītimayaṃ vacanaṃ nicchāresīti attho. Saddhāyapi sāhu dānanti kammañca kammaphalañca saddahitvāpi dinnadānaṃ sāhu laddhakaṃ bhaddakameva. Āhūti kathenti. Kathaṃ panetaṃ ubhayaṃ samaṃ nāma hotīti? Jīvitabhīruko hi yujjhituṃ na sakkoti, khayabhīruko dātuṃ na sakkoti. ‘‘Jīvitañca rakkhissāmi yujjhissāmi cā’’ti hi vadanto na yujjhati. Jīvite pana ālayaṃ vissajjetvā, ‘‘chejjaṃ vā hotu maraṇaṃ vā, gaṇhissāmetaṃ issariya’’nti ussahantova yujjhati. ‘‘Bhoge ca rakkhissāmi, dānañca dassāmī’’ti vadanto na dadāti. Bhogesu pana ālayaṃ vissajjetvā mahādānaṃ dassāmīti ussahantova deti. Evaṃ dānañca yuddhañca samaṃ hoti. Kiñca bhiyyo? Appāpi santā bahuke jinantīti yathā ca yuddhe appakāpi vīrapurisā bahuke bhīrupurise jinanti, evaṃ saddhādisampanno appakampi dānaṃ dadanto bahumaccheraṃ maddati, bahuñca dānavipākaṃ adhigacchati. Evampi dānañca yuddhañca samānaṃ. Tenevāha –
‘‘அப்பம்பி சே ஸத்³த³ஹானோ த³தா³தி,
‘‘Appampi ce saddahāno dadāti,
தேனேவ ஸோ ஹோதி ஸுகீ² பரத்தா²’’தி.
Teneva so hoti sukhī paratthā’’ti.
இமஸ்ஸ ச பனத்த²ஸ்ஸ பகாஸனத்த²ங் ஏகஸாடகப்³ராஹ்மணவத்து² ச அங்குரவத்து² ச வித்தா²ரேதப்³ப³ங்.
Imassa ca panatthassa pakāsanatthaṃ ekasāṭakabrāhmaṇavatthu ca aṅkuravatthu ca vitthāretabbaṃ.
த⁴ம்மலத்³த⁴ஸ்ஸாதி த⁴ம்மேன ஸமேன லத்³த⁴ஸ்ஸ போ⁴க³ஸ்ஸ த⁴ம்மலத்³த⁴ஸ்ஸ ச புக்³க³லஸ்ஸ. எத்த² புக்³க³லோ லத்³த⁴த⁴ம்மோ நாம அதி⁴க³தத⁴ம்மோ அரியபுக்³க³லோ. இதி யங் த⁴ம்மலத்³த⁴ஸ்ஸ போ⁴க³ஸ்ஸ தா³னங் த⁴ம்மலத்³த⁴ஸ்ஸ அரியபுக்³க³லஸ்ஸ தீ³யதி, தம்பி ஸாதூ⁴தி அத்தோ². யோ த⁴ம்மலத்³த⁴ஸ்ஸாதி இமஸ்மிம்பி கா³தா²பதே³ அயமேவ அத்தோ². உட்டா²னவீரியாதி⁴க³தஸ்ஸாதி உட்டா²னேன ச வீரியேன ச அதி⁴க³தஸ்ஸ போ⁴க³ஸ்ஸ. வேதரணிந்தி தே³ஸனாஸீஸமத்தமேதங். யமஸ்ஸ பன வேதரணிம்பி ஸஞ்ஜீவகாளஸுத்தாத³யோபி ஏகதிங்ஸமஹானிரயேபி ஸப்³ப³ஸோவ அதிக்கமித்வாதி அத்தோ².
Dhammaladdhassāti dhammena samena laddhassa bhogassa dhammaladdhassa ca puggalassa. Ettha puggalo laddhadhammo nāma adhigatadhammo ariyapuggalo. Iti yaṃ dhammaladdhassa bhogassa dānaṃ dhammaladdhassa ariyapuggalassa dīyati, tampi sādhūti attho. Yo dhammaladdhassāti imasmimpi gāthāpade ayameva attho. Uṭṭhānavīriyādhigatassāti uṭṭhānena ca vīriyena ca adhigatassa bhogassa. Vetaraṇinti desanāsīsamattametaṃ. Yamassa pana vetaraṇimpi sañjīvakāḷasuttādayopi ekatiṃsamahānirayepi sabbasova atikkamitvāti attho.
விசெய்ய தா³னந்தி விசினித்வா தி³ன்னதா³னங். தத்த² த்³வே விசினநா த³க்கி²ணாவிசினநங் த³க்கி²ணெய்யவிசினநஞ்ச. தேஸு லாமகலாமகே பச்சயே அபனெத்வா பணீதபணீதே விசினித்வா தேஸங் தா³னங் த³க்கி²ணாவிசினநங் நாம. விபன்னஸீலே இதோ ப³ஹித்³தா⁴ பஞ்சனவுதிபாஸண்ட³பே⁴தே³ வா த³க்கி²ணெய்யே பஹாய ஸீலாதி³கு³ணஸம்பன்னானங் ஸாஸனே பப்³ப³ஜிதானங் தா³னங் த³க்கி²ணெய்யவிசினநங் நாம. ஏவங் த்³வீஹாகாரேஹி விசெய்ய தா³னங். ஸுக³தப்பஸத்த²ந்தி ஸுக³தேன வண்ணிதங். தத்த² த³க்கி²ணெய்யவிசினநங் த³ஸ்ஸெந்தோ யே த³க்கி²ணெய்யாதிஆதி³மாஹ. பீ³ஜானி வுத்தானி யதா²தி இமினா பன த³க்கி²ணாவிசினநங் ஆஹ. அவிபன்னபீ³ஜஸதி³ஸா ஹி விசினித்வா க³ஹிதா பணீதபணீதா தெ³ய்யத⁴ம்மாதி.
Viceyya dānanti vicinitvā dinnadānaṃ. Tattha dve vicinanā dakkhiṇāvicinanaṃ dakkhiṇeyyavicinanañca. Tesu lāmakalāmake paccaye apanetvā paṇītapaṇīte vicinitvā tesaṃ dānaṃ dakkhiṇāvicinanaṃ nāma. Vipannasīle ito bahiddhā pañcanavutipāsaṇḍabhede vā dakkhiṇeyye pahāya sīlādiguṇasampannānaṃ sāsane pabbajitānaṃ dānaṃ dakkhiṇeyyavicinanaṃ nāma. Evaṃ dvīhākārehi viceyya dānaṃ. Sugatappasatthanti sugatena vaṇṇitaṃ. Tattha dakkhiṇeyyavicinanaṃ dassento ye dakkhiṇeyyātiādimāha. Bījāni vuttāni yathāti iminā pana dakkhiṇāvicinanaṃ āha. Avipannabījasadisā hi vicinitvā gahitā paṇītapaṇītā deyyadhammāti.
பாணேஸுபி ஸாது⁴ ஸங்யமோதி பாணேஸு ஸங்யதபா⁴வோபி ப⁴த்³த³கோ. அயங் தே³வதா இதராஹி கதி²தங் தா³னானிஸங்ஸங் அதிக்கமித்வா ஸீலானிஸங்ஸங் கதே²துமாரத்³தா⁴. அஹேட²யங் சரந்தி அவிஹிங்ஸந்தோ சரமானோ. பரூபவாதா³தி பரஸ்ஸ உபவாத³ப⁴யேன. ப⁴யாதி உபவாத³ப⁴யா. தா³னா ச கோ² த⁴ம்மபத³ங்வ ஸெய்யோதி தா³னதோ நிப்³பா³னஸங்கா²தங் த⁴ம்மபத³மேவ ஸெய்யோ. புப்³பே³ ச ஹி புப்³ப³தரே ச ஸந்தோதி புப்³பே³ ச கஸ்ஸபபு³த்³தா⁴தி³காலே புப்³ப³தரே ச கோணாக³மனபு³த்³தா⁴தி³காலே, ஸப்³பே³பி வா ஏதே புப்³பே³ ச புப்³ப³தரே ச ஸந்தோ நாமாதி. ததியங்.
Pāṇesupi sādhu saṃyamoti pāṇesu saṃyatabhāvopi bhaddako. Ayaṃ devatā itarāhi kathitaṃ dānānisaṃsaṃ atikkamitvā sīlānisaṃsaṃ kathetumāraddhā. Aheṭhayaṃ caranti avihiṃsanto caramāno. Parūpavādāti parassa upavādabhayena. Bhayāti upavādabhayā. Dānā ca kho dhammapadaṃva seyyoti dānato nibbānasaṅkhātaṃ dhammapadameva seyyo. Pubbe ca hi pubbatare ca santoti pubbe ca kassapabuddhādikāle pubbatare ca koṇāgamanabuddhādikāle, sabbepi vā ete pubbe ca pubbatare ca santo nāmāti. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஸாது⁴ஸுத்தங் • 3. Sādhusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஸாது⁴ஸுத்தவண்ணனா • 3. Sādhusuttavaṇṇanā
