| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. সাধুসুত্তৰণ্ণনা
3. Sādhusuttavaṇṇanā
৩৩. ততিযে উদানং উদানেসীতি উদাহারং উদাহরি। যথা হি যং তেলং মানং গহেতুং ন সক্কোতি ৰিস্সন্দিত্ৰা গচ্ছতি, তং অৰসেসকোতি ৰুচ্চতি। যঞ্চ জলং তল়াকং গহেতুং ন সক্কোতি, অজ্ঝোত্থরিত্ৰা গচ্ছতি, তং ওঘোতি ৰুচ্চতি, এৰমেৰং যং পীতিৰচনং হদযং গহেতুং ন সক্কোতি, অধিকং হুত্ৰা অন্তো অসণ্ঠহিত্ৰা বহি নিক্খমতি, তং উদানন্তি ৰুচ্চতি। এৰরূপং পীতিমযং ৰচনং নিচ্ছারেসীতি অত্থো। সদ্ধাযপি সাহু দানন্তি কম্মঞ্চ কম্মফলঞ্চ সদ্দহিত্ৰাপি দিন্নদানং সাহু লদ্ধকং ভদ্দকমেৰ। আহূতি কথেন্তি। কথং পনেতং উভযং সমং নাম হোতীতি? জীৰিতভীরুকো হি যুজ্ঝিতুং ন সক্কোতি, খযভীরুকো দাতুং ন সক্কোতি। ‘‘জীৰিতঞ্চ রক্খিস্সামি যুজ্ঝিস্সামি চা’’তি হি ৰদন্তো ন যুজ্ঝতি। জীৰিতে পন আলযং ৰিস্সজ্জেত্ৰা, ‘‘ছেজ্জং ৰা হোতু মরণং ৰা, গণ্হিস্সামেতং ইস্সরিয’’ন্তি উস্সহন্তোৰ যুজ্ঝতি। ‘‘ভোগে চ রক্খিস্সামি, দানঞ্চ দস্সামী’’তি ৰদন্তো ন দদাতি। ভোগেসু পন আলযং ৰিস্সজ্জেত্ৰা মহাদানং দস্সামীতি উস্সহন্তোৰ দেতি। এৰং দানঞ্চ যুদ্ধঞ্চ সমং হোতি। কিঞ্চ ভিয্যো? অপ্পাপি সন্তা বহুকে জিনন্তীতি যথা চ যুদ্ধে অপ্পকাপি ৰীরপুরিসা বহুকে ভীরুপুরিসে জিনন্তি, এৰং সদ্ধাদিসম্পন্নো অপ্পকম্পি দানং দদন্তো বহুমচ্ছেরং মদ্দতি, বহুঞ্চ দানৰিপাকং অধিগচ্ছতি। এৰম্পি দানঞ্চ যুদ্ধঞ্চ সমানং। তেনেৰাহ –
33. Tatiye udānaṃ udānesīti udāhāraṃ udāhari. Yathā hi yaṃ telaṃ mānaṃ gahetuṃ na sakkoti vissanditvā gacchati, taṃ avasesakoti vuccati. Yañca jalaṃ taḷākaṃ gahetuṃ na sakkoti, ajjhottharitvā gacchati, taṃ oghoti vuccati, evamevaṃ yaṃ pītivacanaṃ hadayaṃ gahetuṃ na sakkoti, adhikaṃ hutvā anto asaṇṭhahitvā bahi nikkhamati, taṃ udānanti vuccati. Evarūpaṃ pītimayaṃ vacanaṃ nicchāresīti attho. Saddhāyapi sāhu dānanti kammañca kammaphalañca saddahitvāpi dinnadānaṃ sāhu laddhakaṃ bhaddakameva. Āhūti kathenti. Kathaṃ panetaṃ ubhayaṃ samaṃ nāma hotīti? Jīvitabhīruko hi yujjhituṃ na sakkoti, khayabhīruko dātuṃ na sakkoti. ‘‘Jīvitañca rakkhissāmi yujjhissāmi cā’’ti hi vadanto na yujjhati. Jīvite pana ālayaṃ vissajjetvā, ‘‘chejjaṃ vā hotu maraṇaṃ vā, gaṇhissāmetaṃ issariya’’nti ussahantova yujjhati. ‘‘Bhoge ca rakkhissāmi, dānañca dassāmī’’ti vadanto na dadāti. Bhogesu pana ālayaṃ vissajjetvā mahādānaṃ dassāmīti ussahantova deti. Evaṃ dānañca yuddhañca samaṃ hoti. Kiñca bhiyyo? Appāpi santā bahuke jinantīti yathā ca yuddhe appakāpi vīrapurisā bahuke bhīrupurise jinanti, evaṃ saddhādisampanno appakampi dānaṃ dadanto bahumaccheraṃ maddati, bahuñca dānavipākaṃ adhigacchati. Evampi dānañca yuddhañca samānaṃ. Tenevāha –
‘‘অপ্পম্পি চে সদ্দহানো দদাতি,
‘‘Appampi ce saddahāno dadāti,
তেনেৰ সো হোতি সুখী পরত্থা’’তি॥
Teneva so hoti sukhī paratthā’’ti.
ইমস্স চ পনত্থস্স পকাসনত্থং একসাটকব্রাহ্মণৰত্থু চ অঙ্কুরৰত্থু চ ৰিত্থারেতব্বং।
Imassa ca panatthassa pakāsanatthaṃ ekasāṭakabrāhmaṇavatthu ca aṅkuravatthu ca vitthāretabbaṃ.
ধম্মলদ্ধস্সাতি ধম্মেন সমেন লদ্ধস্স ভোগস্স ধম্মলদ্ধস্স চ পুগ্গলস্স। এত্থ পুগ্গলো লদ্ধধম্মো নাম অধিগতধম্মো অরিযপুগ্গলো। ইতি যং ধম্মলদ্ধস্স ভোগস্স দানং ধম্মলদ্ধস্স অরিযপুগ্গলস্স দীযতি, তম্পি সাধূতি অত্থো। যো ধম্মলদ্ধস্সাতি ইমস্মিম্পি গাথাপদে অযমেৰ অত্থো। উট্ঠানৰীরিযাধিগতস্সাতি উট্ঠানেন চ ৰীরিযেন চ অধিগতস্স ভোগস্স। ৰেতরণিন্তি দেসনাসীসমত্তমেতং। যমস্স পন ৰেতরণিম্পি সঞ্জীৰকাল়সুত্তাদযোপি একতিংসমহানিরযেপি সব্বসোৰ অতিক্কমিত্ৰাতি অত্থো।
Dhammaladdhassāti dhammena samena laddhassa bhogassa dhammaladdhassa ca puggalassa. Ettha puggalo laddhadhammo nāma adhigatadhammo ariyapuggalo. Iti yaṃ dhammaladdhassa bhogassa dānaṃ dhammaladdhassa ariyapuggalassa dīyati, tampi sādhūti attho. Yo dhammaladdhassāti imasmimpi gāthāpade ayameva attho. Uṭṭhānavīriyādhigatassāti uṭṭhānena ca vīriyena ca adhigatassa bhogassa. Vetaraṇinti desanāsīsamattametaṃ. Yamassa pana vetaraṇimpi sañjīvakāḷasuttādayopi ekatiṃsamahānirayepi sabbasova atikkamitvāti attho.
ৰিচেয্য দানন্তি ৰিচিনিত্ৰা দিন্নদানং। তত্থ দ্ৰে ৰিচিননা দক্খিণাৰিচিননং দক্খিণেয্যৰিচিননঞ্চ। তেসু লামকলামকে পচ্চযে অপনেত্ৰা পণীতপণীতে ৰিচিনিত্ৰা তেসং দানং দক্খিণাৰিচিননং নাম। ৰিপন্নসীলে ইতো বহিদ্ধা পঞ্চনৰুতিপাসণ্ডভেদে ৰা দক্খিণেয্যে পহায সীলাদিগুণসম্পন্নানং সাসনে পব্বজিতানং দানং দক্খিণেয্যৰিচিননং নাম। এৰং দ্ৰীহাকারেহি ৰিচেয্য দানং। সুগতপ্পসত্থন্তি সুগতেন ৰণ্ণিতং। তত্থ দক্খিণেয্যৰিচিননং দস্সেন্তো যে দক্খিণেয্যাতিআদিমাহ। বীজানি ৰুত্তানি যথাতি ইমিনা পন দক্খিণাৰিচিননং আহ। অৰিপন্নবীজসদিসা হি ৰিচিনিত্ৰা গহিতা পণীতপণীতা দেয্যধম্মাতি।
Viceyya dānanti vicinitvā dinnadānaṃ. Tattha dve vicinanā dakkhiṇāvicinanaṃ dakkhiṇeyyavicinanañca. Tesu lāmakalāmake paccaye apanetvā paṇītapaṇīte vicinitvā tesaṃ dānaṃ dakkhiṇāvicinanaṃ nāma. Vipannasīle ito bahiddhā pañcanavutipāsaṇḍabhede vā dakkhiṇeyye pahāya sīlādiguṇasampannānaṃ sāsane pabbajitānaṃ dānaṃ dakkhiṇeyyavicinanaṃ nāma. Evaṃ dvīhākārehi viceyya dānaṃ. Sugatappasatthanti sugatena vaṇṇitaṃ. Tattha dakkhiṇeyyavicinanaṃ dassento ye dakkhiṇeyyātiādimāha. Bījāni vuttāni yathāti iminā pana dakkhiṇāvicinanaṃ āha. Avipannabījasadisā hi vicinitvā gahitā paṇītapaṇītā deyyadhammāti.
পাণেসুপি সাধু সংযমোতি পাণেসু সংযতভাৰোপি ভদ্দকো। অযং দেৰতা ইতরাহি কথিতং দানানিসংসং অতিক্কমিত্ৰা সীলানিসংসং কথেতুমারদ্ধা। অহেঠযং চরন্তি অৰিহিংসন্তো চরমানো। পরূপৰাদাতি পরস্স উপৰাদভযেন। ভযাতি উপৰাদভযা। দানা চ খো ধম্মপদংৰ সেয্যোতি দানতো নিব্বানসঙ্খাতং ধম্মপদমেৰ সেয্যো। পুব্বে চ হি পুব্বতরে চ সন্তোতি পুব্বে চ কস্সপবুদ্ধাদিকালে পুব্বতরে চ কোণাগমনবুদ্ধাদিকালে, সব্বেপি ৰা এতে পুব্বে চ পুব্বতরে চ সন্তো নামাতি। ততিযং।
Pāṇesupi sādhu saṃyamoti pāṇesu saṃyatabhāvopi bhaddako. Ayaṃ devatā itarāhi kathitaṃ dānānisaṃsaṃ atikkamitvā sīlānisaṃsaṃ kathetumāraddhā. Aheṭhayaṃ caranti avihiṃsanto caramāno. Parūpavādāti parassa upavādabhayena. Bhayāti upavādabhayā. Dānā ca kho dhammapadaṃva seyyoti dānato nibbānasaṅkhātaṃ dhammapadameva seyyo. Pubbe ca hi pubbatare ca santoti pubbe ca kassapabuddhādikāle pubbatare ca koṇāgamanabuddhādikāle, sabbepi vā ete pubbe ca pubbatare ca santo nāmāti. Tatiyaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. সাধুসুত্তং • 3. Sādhusuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. সাধুসুত্তৰণ্ণনা • 3. Sādhusuttavaṇṇanā
