| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
3. саад̇хусуд̇д̇аван̣н̣анаа
3. Sādhusuttavaṇṇanā
33. д̇ад̇ияз уд̣̇аанам̣ уд̣̇аанзсийд̇и уд̣̇аахаарам̣ уд̣̇аахари. яат̇аа хи яам̣ д̇злам̣ маанам̣ г̇ахзд̇ум̣ на саггод̇и виссанд̣̇ид̇ваа г̇ажчад̇и, д̇ам̣ авасзсагод̇и вужжад̇и. яан̃жа ж̇алам̣ д̇ал̣аагам̣ г̇ахзд̇ум̣ на саггод̇и, аж̇жход̇т̇арид̇ваа г̇ажчад̇и, д̇ам̣ огход̇и вужжад̇и, звамзвам̣ яам̣ бийд̇иважанам̣ хад̣̇аяам̣ г̇ахзд̇ум̣ на саггод̇и, ад̇хигам̣ худ̇ваа анд̇о асан̣тахид̇ваа б̣ахи нигкамад̇и, д̇ам̣ уд̣̇аананд̇и вужжад̇и. зваруубам̣ бийд̇имаяам̣ важанам̣ нижчаарзсийд̇и ад̇т̇о. сад̣̇д̇хааяаби сааху д̣̇аананд̇и гамман̃жа гаммапалан̃жа сад̣̇д̣̇ахид̇вааби д̣̇иннад̣̇аанам̣ сааху лад̣̇д̇хагам̣ бхад̣̇д̣̇агамзва. аахууд̇и гат̇знд̇и. гат̇ам̣ банзд̇ам̣ убхаяам̣ самам̣ наама ход̇ийд̇и? ж̇ийвид̇абхийруго хи яуж̇жхид̇ум̣ на саггод̇и, каяабхийруго д̣̇аад̇ум̣ на саггод̇и. ‘‘ж̇ийвид̇ан̃жа рагкиссаами яуж̇жхиссаами жаа’’д̇и хи вад̣̇анд̇о на яуж̇жхад̇и. ж̇ийвид̇з бана аалаяам̣ виссаж̇ж̇зд̇ваа, ‘‘чзж̇ж̇ам̣ ваа ход̇у маран̣ам̣ ваа, г̇ан̣хиссаамзд̇ам̣ иссарияа’’нд̇и уссаханд̇ова яуж̇жхад̇и. ‘‘бхог̇з жа рагкиссаами, д̣̇аанан̃жа д̣̇ассаамий’’д̇и вад̣̇анд̇о на д̣̇ад̣̇аад̇и. бхог̇зсу бана аалаяам̣ виссаж̇ж̇зд̇ваа махаад̣̇аанам̣ д̣̇ассаамийд̇и уссаханд̇ова д̣̇зд̇и. звам̣ д̣̇аанан̃жа яуд̣̇д̇хан̃жа самам̣ ход̇и. гин̃жа бхияяо? аббааби санд̇аа б̣ахугз ж̇инанд̇ийд̇и яат̇аа жа яуд̣̇д̇хз аббагааби вийрабурисаа б̣ахугз бхийрубурисз ж̇инанд̇и, звам̣ сад̣̇д̇хаад̣̇исамбанно аббагамби д̣̇аанам̣ д̣̇ад̣̇анд̇о б̣ахумажчзрам̣ мад̣̇д̣̇ад̇и, б̣ахун̃жа д̣̇аанавибаагам̣ ад̇хиг̇ажчад̇и. звамби д̣̇аанан̃жа яуд̣̇д̇хан̃жа самаанам̣. д̇знзвааха –
33. Tatiye udānaṃ udānesīti udāhāraṃ udāhari. Yathā hi yaṃ telaṃ mānaṃ gahetuṃ na sakkoti vissanditvā gacchati, taṃ avasesakoti vuccati. Yañca jalaṃ taḷākaṃ gahetuṃ na sakkoti, ajjhottharitvā gacchati, taṃ oghoti vuccati, evamevaṃ yaṃ pītivacanaṃ hadayaṃ gahetuṃ na sakkoti, adhikaṃ hutvā anto asaṇṭhahitvā bahi nikkhamati, taṃ udānanti vuccati. Evarūpaṃ pītimayaṃ vacanaṃ nicchāresīti attho. Saddhāyapi sāhu dānanti kammañca kammaphalañca saddahitvāpi dinnadānaṃ sāhu laddhakaṃ bhaddakameva. Āhūti kathenti. Kathaṃ panetaṃ ubhayaṃ samaṃ nāma hotīti? Jīvitabhīruko hi yujjhituṃ na sakkoti, khayabhīruko dātuṃ na sakkoti. ‘‘Jīvitañca rakkhissāmi yujjhissāmi cā’’ti hi vadanto na yujjhati. Jīvite pana ālayaṃ vissajjetvā, ‘‘chejjaṃ vā hotu maraṇaṃ vā, gaṇhissāmetaṃ issariya’’nti ussahantova yujjhati. ‘‘Bhoge ca rakkhissāmi, dānañca dassāmī’’ti vadanto na dadāti. Bhogesu pana ālayaṃ vissajjetvā mahādānaṃ dassāmīti ussahantova deti. Evaṃ dānañca yuddhañca samaṃ hoti. Kiñca bhiyyo? Appāpi santā bahuke jinantīti yathā ca yuddhe appakāpi vīrapurisā bahuke bhīrupurise jinanti, evaṃ saddhādisampanno appakampi dānaṃ dadanto bahumaccheraṃ maddati, bahuñca dānavipākaṃ adhigacchati. Evampi dānañca yuddhañca samānaṃ. Tenevāha –
‘‘аббамби жз сад̣̇д̣̇ахаано д̣̇ад̣̇аад̇и,
‘‘Appampi ce saddahāno dadāti,
д̇знзва со ход̇и сукий барад̇т̇аа’’д̇и.
Teneva so hoti sukhī paratthā’’ti.
имасса жа банад̇т̇асса багаасанад̇т̇ам̣ згасаадагаб̣раахман̣авад̇т̇у жа ан̇гуравад̇т̇у жа вид̇т̇аарзд̇аб̣б̣ам̣.
Imassa ca panatthassa pakāsanatthaṃ ekasāṭakabrāhmaṇavatthu ca aṅkuravatthu ca vitthāretabbaṃ.
д̇хаммалад̣̇д̇хассаад̇и д̇хаммзна самзна лад̣̇д̇хасса бхог̇асса д̇хаммалад̣̇д̇хасса жа буг̇г̇аласса. зд̇т̇а буг̇г̇ало лад̣̇д̇хад̇хаммо наама ад̇хиг̇ад̇ад̇хаммо арияабуг̇г̇ало. ид̇и яам̣ д̇хаммалад̣̇д̇хасса бхог̇асса д̣̇аанам̣ д̇хаммалад̣̇д̇хасса арияабуг̇г̇аласса д̣̇ийяад̇и, д̇амби саад̇хууд̇и ад̇т̇о. яо д̇хаммалад̣̇д̇хассаад̇и имасмимби г̇аат̇аабад̣̇з аяамзва ад̇т̇о. удтаанавийрияаад̇хиг̇ад̇ассаад̇и удтаанзна жа вийриязна жа ад̇хиг̇ад̇асса бхог̇асса. взд̇аран̣инд̇и д̣̇зсанаасийсамад̇д̇амзд̇ам̣. яамасса бана взд̇аран̣имби сан̃ж̇ийвагаал̣асуд̇д̇аад̣̇аяоби згад̇им̣самахаанираязби саб̣б̣асова ад̇иггамид̇ваад̇и ад̇т̇о.
Dhammaladdhassāti dhammena samena laddhassa bhogassa dhammaladdhassa ca puggalassa. Ettha puggalo laddhadhammo nāma adhigatadhammo ariyapuggalo. Iti yaṃ dhammaladdhassa bhogassa dānaṃ dhammaladdhassa ariyapuggalassa dīyati, tampi sādhūti attho. Yo dhammaladdhassāti imasmimpi gāthāpade ayameva attho. Uṭṭhānavīriyādhigatassāti uṭṭhānena ca vīriyena ca adhigatassa bhogassa. Vetaraṇinti desanāsīsamattametaṃ. Yamassa pana vetaraṇimpi sañjīvakāḷasuttādayopi ekatiṃsamahānirayepi sabbasova atikkamitvāti attho.
вижзяяа д̣̇аананд̇и вижинид̇ваа д̣̇иннад̣̇аанам̣. д̇ад̇т̇а д̣̇вз вижинанаа д̣̇агкин̣аавижинанам̣ д̣̇агкин̣зяяавижинанан̃жа. д̇зсу лаамагалаамагз бажжаяз абанзд̇ваа бан̣ийд̇абан̣ийд̇з вижинид̇ваа д̇зсам̣ д̣̇аанам̣ д̣̇агкин̣аавижинанам̣ наама. вибаннасийлз ид̇о б̣ахид̣̇д̇хаа бан̃жанавуд̇ибаасан̣д̣абхзд̣̇з ваа д̣̇агкин̣зяяз бахааяа сийлаад̣̇иг̇ун̣асамбаннаанам̣ саасанз баб̣б̣аж̇ид̇аанам̣ д̣̇аанам̣ д̣̇агкин̣зяяавижинанам̣ наама. звам̣ д̣̇вийхаагаарзхи вижзяяа д̣̇аанам̣. суг̇ад̇аббасад̇т̇анд̇и суг̇ад̇зна ван̣н̣ид̇ам̣. д̇ад̇т̇а д̣̇агкин̣зяяавижинанам̣ д̣̇ассзнд̇о яз д̣̇агкин̣зяяаад̇иаад̣̇имааха. б̣ийж̇аани вуд̇д̇аани яат̇аад̇и иминаа бана д̣̇агкин̣аавижинанам̣ ааха. авибаннаб̣ийж̇асад̣̇исаа хи вижинид̇ваа г̇ахид̇аа бан̣ийд̇абан̣ийд̇аа д̣̇зяяад̇хаммаад̇и.
Viceyya dānanti vicinitvā dinnadānaṃ. Tattha dve vicinanā dakkhiṇāvicinanaṃ dakkhiṇeyyavicinanañca. Tesu lāmakalāmake paccaye apanetvā paṇītapaṇīte vicinitvā tesaṃ dānaṃ dakkhiṇāvicinanaṃ nāma. Vipannasīle ito bahiddhā pañcanavutipāsaṇḍabhede vā dakkhiṇeyye pahāya sīlādiguṇasampannānaṃ sāsane pabbajitānaṃ dānaṃ dakkhiṇeyyavicinanaṃ nāma. Evaṃ dvīhākārehi viceyya dānaṃ. Sugatappasatthanti sugatena vaṇṇitaṃ. Tattha dakkhiṇeyyavicinanaṃ dassento ye dakkhiṇeyyātiādimāha. Bījāni vuttāni yathāti iminā pana dakkhiṇāvicinanaṃ āha. Avipannabījasadisā hi vicinitvā gahitā paṇītapaṇītā deyyadhammāti.
баан̣зсуби саад̇ху сам̣яамод̇и баан̣зсу сам̣яад̇абхаавоби бхад̣̇д̣̇аго. аяам̣ д̣̇звад̇аа ид̇араахи гат̇ид̇ам̣ д̣̇аанаанисам̣сам̣ ад̇иггамид̇ваа сийлаанисам̣сам̣ гат̇зд̇умаарад̣̇д̇хаа. ахзтаяам̣ жаранд̇и авихим̣санд̇о жарамаано. баруубаваад̣̇аад̇и барасса убаваад̣̇абхаязна. бхаяаад̇и убаваад̣̇абхаяаа. д̣̇аанаа жа ко д̇хаммабад̣̇ам̣ва сзяяод̇и д̣̇аанад̇о ниб̣б̣аанасан̇каад̇ам̣ д̇хаммабад̣̇амзва сзяяо. буб̣б̣з жа хи буб̣б̣ад̇арз жа санд̇од̇и буб̣б̣з жа гассабаб̣уд̣̇д̇хаад̣̇игаалз буб̣б̣ад̇арз жа гон̣ааг̇аманаб̣уд̣̇д̇хаад̣̇игаалз, саб̣б̣зби ваа зд̇з буб̣б̣з жа буб̣б̣ад̇арз жа санд̇о наамаад̇и. д̇ад̇ияам̣.
Pāṇesupi sādhu saṃyamoti pāṇesu saṃyatabhāvopi bhaddako. Ayaṃ devatā itarāhi kathitaṃ dānānisaṃsaṃ atikkamitvā sīlānisaṃsaṃ kathetumāraddhā. Aheṭhayaṃ caranti avihiṃsanto caramāno. Parūpavādāti parassa upavādabhayena. Bhayāti upavādabhayā. Dānā ca kho dhammapadaṃva seyyoti dānato nibbānasaṅkhātaṃ dhammapadameva seyyo. Pubbe ca hi pubbatare ca santoti pubbe ca kassapabuddhādikāle pubbatare ca koṇāgamanabuddhādikāle, sabbepi vā ete pubbe ca pubbatare ca santo nāmāti. Tatiyaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 3. саад̇хусуд̇д̇ам̣ • 3. Sādhusuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 3. саад̇хусуд̇д̇аван̣н̣анаа • 3. Sādhusuttavaṇṇanā
