| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๒. สาคตเตฺถรอปทานํ
2. Sāgatattheraapadānaṃ
๑๗.
17.
‘‘โสภิโต นาม นาเมน, อโหสิํ พฺราหฺมโณ ตทา;
‘‘Sobhito nāma nāmena, ahosiṃ brāhmaṇo tadā;
ปุรกฺขโต สสิเสฺสหิ, อารามํ อคมาสหํฯ
Purakkhato sasissehi, ārāmaṃ agamāsahaṃ.
๑๘.
18.
‘‘ภควา ตมฺหิ สมเย, ภิกฺขุสงฺฆปุรกฺขโต;
‘‘Bhagavā tamhi samaye, bhikkhusaṅghapurakkhato;
อารามทฺวารา นิกฺขมฺม, อฎฺฐาสิ ปุริสุตฺตโมฯ
Ārāmadvārā nikkhamma, aṭṭhāsi purisuttamo.
๑๙.
19.
‘‘ตมทฺทสาสิํ สมฺพุทฺธํ, ทนฺตํ ทนฺตปุรกฺขตํ;
‘‘Tamaddasāsiṃ sambuddhaṃ, dantaṃ dantapurakkhataṃ;
สกํ จิตฺตํ ปสาเทตฺวา, สนฺถวิํ โลกนายกํฯ
Sakaṃ cittaṃ pasādetvā, santhaviṃ lokanāyakaṃ.
๒๐.
20.
‘‘เย เกจิ ปาทปา สเพฺพ, มหิยา เต วิรูหเร;
‘‘Ye keci pādapā sabbe, mahiyā te virūhare;
พุทฺธิมโนฺต ตถา สตฺตา, รุหนฺติ ชินสาสเนฯ
Buddhimanto tathā sattā, ruhanti jinasāsane.
๒๑.
21.
‘‘สตฺถวาโหสิ สปฺปโญฺญ, มเหสิ พหุเก ชเน;
‘‘Satthavāhosi sappañño, mahesi bahuke jane;
วิปถา อุทฺธริตฺวาน, ปถํ อาจิกฺขเส ตุวํฯ
Vipathā uddharitvāna, pathaṃ ācikkhase tuvaṃ.
๒๒.
22.
อาตาปี ปหิตเตฺตหิ, อุปสเนฺตหิ ตาทิภิฯ
Ātāpī pahitattehi, upasantehi tādibhi.
๒๓.
23.
‘‘อลงฺกโต ปริสาหิ, ปุญฺญญาเณหิ โสภติ;
‘‘Alaṅkato parisāhi, puññañāṇehi sobhati;
ปภา นิทฺธาวเต ตุยฺหํ, สูริโยทยเน ยถาฯ
Pabhā niddhāvate tuyhaṃ, sūriyodayane yathā.
๒๔.
24.
‘‘ปสนฺนจิตฺตํ ทิสฺวาน, มเหสี ปทุมุตฺตโร;
‘‘Pasannacittaṃ disvāna, mahesī padumuttaro;
ภิกฺขุสเงฺฆ ฐิโต สตฺถา, อิมา คาถา อภาสถฯ
Bhikkhusaṅghe ṭhito satthā, imā gāthā abhāsatha.
๒๕.
25.
‘‘‘โย โส หาสํ ชเนตฺวาน, มมํ กิเตฺตสิ พฺราหฺมโณ;
‘‘‘Yo so hāsaṃ janetvāna, mamaṃ kittesi brāhmaṇo;
กปฺปานํ สตสหสฺสํ, เทวโลเก รมิสฺสติฯ
Kappānaṃ satasahassaṃ, devaloke ramissati.
๒๖.
26.
‘‘‘ตุสิตา หิ จวิตฺวาน, สุกฺกมูเลน โจทิโต;
‘‘‘Tusitā hi cavitvāna, sukkamūlena codito;
โคตมสฺส ภควโต, สาสเน ปพฺพชิสฺสติฯ
Gotamassa bhagavato, sāsane pabbajissati.
๒๗.
27.
สาคโต นาม นาเมน, เหสฺสติ สตฺถุ สาวโก’ฯ
Sāgato nāma nāmena, hessati satthu sāvako’.
๒๘.
28.
‘‘ปพฺพชิตฺวาน กาเยน, ปาปกมฺมํ วิวชฺชยิํ;
‘‘Pabbajitvāna kāyena, pāpakammaṃ vivajjayiṃ;
วจีทุจฺจริตํ หิตฺวา, อาชีวํ ปริโสธยิํฯ
Vacīduccaritaṃ hitvā, ājīvaṃ parisodhayiṃ.
๒๙.
29.
‘‘เอวํ วิหรมาโนหํ, เตโชธาตูสุ โกวิโท;
‘‘Evaṃ viharamānohaṃ, tejodhātūsu kovido;
สพฺพาสเว ปริญฺญาย, วิหรามิ อนาสโวฯ
Sabbāsave pariññāya, viharāmi anāsavo.
๓๐.
30.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา สาคโต เถโร อิมา คาถาโย อภาสิตฺถาติฯ
Itthaṃ sudaṃ āyasmā sāgato thero imā gāthāyo abhāsitthāti.
สาคตเตฺถรสฺสาปทานํ ทุติยํฯ
Sāgatattherassāpadānaṃ dutiyaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๒. สาคตเตฺถรอปทานวณฺณนา • 2. Sāgatattheraapadānavaṇṇanā
