| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. ஸாக³தத்தே²ரஅபதா³னவண்ணனா
2. Sāgatattheraapadānavaṇṇanā
ஸோபி⁴தோ நாம நாமேனாதிஆதி³கங் ஆயஸ்மதோ ஸாக³தத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஏகஸ்மிங் ப்³ராஹ்மணகுலே நிப்³ப³த்தோ ஸப்³ப³ஸிப்பேஸு நிப்ப²த்திங் பத்தோ நாமேன ஸோபி⁴தோ நாம ஹுத்வா திண்ணங் வேதா³னங் பாரகூ³ ஸனிக⁴ண்டு³கேடுபா⁴னங் ஸாக்க²ரப்பபே⁴தா³னங் இதிஹாஸபஞ்சமானங் பத³கோ வெய்யாகரணோ லோகாயதமஹாபுரிஸலக்க²ணேஸு அனவயோ. ஸோ ஏகதி³வஸங் பது³முத்தரங் ப⁴க³வந்தங் த்³வத்திங்ஸமஹாபுரிஸலக்க²ணஸிரியா ஸோப⁴மானங் உய்யானத்³வாரேன க³ச்ச²ந்தங் தி³ஸ்வா அதீவ பஸன்னமானஸோ அனேகேஹி உபாயேஹி அனேகேஹி கு³ணவண்ணேஹி தோ²மனங் அகாஸி. ப⁴க³வா தஸ்ஸ தோ²மனங் ஸுத்வா ‘‘அனாக³தே கோ³தமஸ்ஸ ப⁴க³வதோ ஸாஸனே ஸாக³தோ நாம ஸாவகோ ப⁴விஸ்ஸதீ’’தி ப்³யாகரணங் அதா³ஸி. ஸோ ததோ பட்டா²ய புஞ்ஞானி கரொந்தோ யாவதாயுகங் ட²த்வா ததோ சுதோ தே³வலோகே நிப்³ப³த்தோ. கப்பஸதஸஹஸ்ஸதே³வமனுஸ்ஸேஸு உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ. தஸ்ஸ மாதாபிதரோ ஸோமனஸ்ஸங் வட்³டெ⁴ந்தோ ஸுஜாதோ ஆக³தோதி ஸாக³தோதி நாமங் கரிங்ஸு. ஸோ ஸாஸனே பஸீதி³த்வா பப்³ப³ஜித்வா விபஸ்ஸனங் வட்³டெ⁴த்வா அரஹத்தங் பத்தோ.
Sobhito nāma nāmenātiādikaṃ āyasmato sāgatattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ brāhmaṇakule nibbatto sabbasippesu nipphattiṃ patto nāmena sobhito nāma hutvā tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo. So ekadivasaṃ padumuttaraṃ bhagavantaṃ dvattiṃsamahāpurisalakkhaṇasiriyā sobhamānaṃ uyyānadvārena gacchantaṃ disvā atīva pasannamānaso anekehi upāyehi anekehi guṇavaṇṇehi thomanaṃ akāsi. Bhagavā tassa thomanaṃ sutvā ‘‘anāgate gotamassa bhagavato sāsane sāgato nāma sāvako bhavissatī’’ti byākaraṇaṃ adāsi. So tato paṭṭhāya puññāni karonto yāvatāyukaṃ ṭhatvā tato cuto devaloke nibbatto. Kappasatasahassadevamanussesu ubhayasampattiyo anubhavitvā imasmiṃ buddhuppāde ekasmiṃ kulagehe nibbatto. Tassa mātāpitaro somanassaṃ vaḍḍhento sujāto āgatoti sāgatoti nāmaṃ kariṃsu. So sāsane pasīditvā pabbajitvā vipassanaṃ vaḍḍhetvā arahattaṃ patto.
17. ஏவங் ஸோ புஞ்ஞஸம்பா⁴ரானுரூபேன பத்தஅரஹத்தப²லோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸோபி⁴தோ நாம நாமேனாதிஆதி³மாஹ. தத்த² ததா³ புஞ்ஞஸம்பா⁴ரஸ்ஸ பரிபூரணஸமயே நாமேன ஸோபி⁴தோ நாம ப்³ராஹ்மணோ அஹோஸிந்தி ஸம்ப³ந்தோ⁴.
17. Evaṃ so puññasambhārānurūpena pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento sobhito nāma nāmenātiādimāha. Tattha tadā puññasambhārassa paripūraṇasamaye nāmena sobhito nāma brāhmaṇo ahosinti sambandho.
21. விபதா² உத்³த⁴ரித்வானாதி விருத்³த⁴பதா² குமக்³கா³, உப்பதா² வா உத்³த⁴ரித்வா அபனெத்வா. பத²ங் ஆசிக்க²ஸேதி, ப⁴ந்தே, ஸப்³ப³ஞ்ஞு துவங் பத²ங் ஸப்புரிஸமக்³க³ங் நிப்³பா³னாதி⁴க³மனுபாயங் ஆசிக்க²ஸே கதே²ஸி தே³ஸேஸி விப⁴ஜி உத்தானிங் அகாஸீதி அத்தோ². ஸேஸங் உத்தானத்த²மேவாதி.
21.Vipathā uddharitvānāti viruddhapathā kumaggā, uppathā vā uddharitvā apanetvā. Pathaṃ ācikkhaseti, bhante, sabbaññu tuvaṃ pathaṃ sappurisamaggaṃ nibbānādhigamanupāyaṃ ācikkhase kathesi desesi vibhaji uttāniṃ akāsīti attho. Sesaṃ uttānatthamevāti.
ஸாக³தத்தே²ரஅபதா³னவண்ணனா ஸமத்தா.
Sāgatattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. ஸாக³தத்தே²ரஅபதா³னங் • 2. Sāgatattheraapadānaṃ
