| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২. সাগতত্থেরঅপদানৰণ্ণনা
2. Sāgatattheraapadānavaṇṇanā
সোভিতো নাম নামেনাতিআদিকং আযস্মতো সাগতত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে একস্মিং ব্রাহ্মণকুলে নিব্বত্তো সব্বসিপ্পেসু নিপ্ফত্তিং পত্তো নামেন সোভিতো নাম হুত্ৰা তিণ্ণং ৰেদানং পারগূ সনিঘণ্ডুকেটুভানং সাক্খরপ্পভেদানং ইতিহাসপঞ্চমানং পদকো ৰেয্যাকরণো লোকাযতমহাপুরিসলক্খণেসু অনৰযো। সো একদিৰসং পদুমুত্তরং ভগৰন্তং দ্ৰত্তিংসমহাপুরিসলক্খণসিরিযা সোভমানং উয্যানদ্ৰারেন গচ্ছন্তং দিস্ৰা অতীৰ পসন্নমানসো অনেকেহি উপাযেহি অনেকেহি গুণৰণ্ণেহি থোমনং অকাসি। ভগৰা তস্স থোমনং সুত্ৰা ‘‘অনাগতে গোতমস্স ভগৰতো সাসনে সাগতো নাম সাৰকো ভৰিস্সতী’’তি ব্যাকরণং অদাসি। সো ততো পট্ঠায পুঞ্ঞানি করোন্তো যাৰতাযুকং ঠত্ৰা ততো চুতো দেৰলোকে নিব্বত্তো। কপ্পসতসহস্সদেৰমনুস্সেসু উভযসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো। তস্স মাতাপিতরো সোমনস্সং ৰড্ঢেন্তো সুজাতো আগতোতি সাগতোতি নামং করিংসু। সো সাসনে পসীদিত্ৰা পব্বজিত্ৰা ৰিপস্সনং ৰড্ঢেত্ৰা অরহত্তং পত্তো।
Sobhito nāma nāmenātiādikaṃ āyasmato sāgatattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ brāhmaṇakule nibbatto sabbasippesu nipphattiṃ patto nāmena sobhito nāma hutvā tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo. So ekadivasaṃ padumuttaraṃ bhagavantaṃ dvattiṃsamahāpurisalakkhaṇasiriyā sobhamānaṃ uyyānadvārena gacchantaṃ disvā atīva pasannamānaso anekehi upāyehi anekehi guṇavaṇṇehi thomanaṃ akāsi. Bhagavā tassa thomanaṃ sutvā ‘‘anāgate gotamassa bhagavato sāsane sāgato nāma sāvako bhavissatī’’ti byākaraṇaṃ adāsi. So tato paṭṭhāya puññāni karonto yāvatāyukaṃ ṭhatvā tato cuto devaloke nibbatto. Kappasatasahassadevamanussesu ubhayasampattiyo anubhavitvā imasmiṃ buddhuppāde ekasmiṃ kulagehe nibbatto. Tassa mātāpitaro somanassaṃ vaḍḍhento sujāto āgatoti sāgatoti nāmaṃ kariṃsu. So sāsane pasīditvā pabbajitvā vipassanaṃ vaḍḍhetvā arahattaṃ patto.
১৭. এৰং সো পুঞ্ঞসম্ভারানুরূপেন পত্তঅরহত্তফলো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সোভিতো নাম নামেনাতিআদিমাহ। তত্থ তদা পুঞ্ঞসম্ভারস্স পরিপূরণসমযে নামেন সোভিতো নাম ব্রাহ্মণো অহোসিন্তি সম্বন্ধো।
17. Evaṃ so puññasambhārānurūpena pattaarahattaphalo attano pubbakammaṃ saritvā somanassajāto pubbacaritāpadānaṃ pakāsento sobhito nāma nāmenātiādimāha. Tattha tadā puññasambhārassa paripūraṇasamaye nāmena sobhito nāma brāhmaṇo ahosinti sambandho.
২১. ৰিপথা উদ্ধরিত্ৰানাতি ৰিরুদ্ধপথা কুমগ্গা, উপ্পথা ৰা উদ্ধরিত্ৰা অপনেত্ৰা। পথং আচিক্খসেতি, ভন্তে, সব্বঞ্ঞু তুৰং পথং সপ্পুরিসমগ্গং নিব্বানাধিগমনুপাযং আচিক্খসে কথেসি দেসেসি ৰিভজি উত্তানিং অকাসীতি অত্থো। সেসং উত্তানত্থমেৰাতি।
21.Vipathā uddharitvānāti viruddhapathā kumaggā, uppathā vā uddharitvā apanetvā. Pathaṃ ācikkhaseti, bhante, sabbaññu tuvaṃ pathaṃ sappurisamaggaṃ nibbānādhigamanupāyaṃ ācikkhase kathesi desesi vibhaji uttāniṃ akāsīti attho. Sesaṃ uttānatthamevāti.
সাগতত্থেরঅপদানৰণ্ণনা সমত্তা।
Sāgatattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ২. সাগতত্থেরঅপদানং • 2. Sāgatattheraapadānaṃ
