| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. සගාථාසුත්‌තං
6. Sagāthāsuttaṃ
100. සාවත්‌ථියං විහරති…පෙ.… ‘‘ධාතුසොව, භික්‌ඛවෙ, සත්‌තා සංසන්‌දන්‌ති සමෙන්‌ති. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දන්‌ති සමෙන්‌ති. අතීතම්‌පි ඛො, භික්‌ඛවෙ, අද්‌ධානං ධාතුසොව සත්‌තා සංසන්‌දිංසු සමිංසු. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දිංසු සමිංසු’’.
100. Sāvatthiyaṃ viharati…pe… ‘‘dhātusova, bhikkhave, sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti. Atītampi kho, bhikkhave, addhānaṃ dhātusova sattā saṃsandiṃsu samiṃsu. Hīnādhimuttikā hīnādhimuttikehi saddhiṃ saṃsandiṃsu samiṃsu’’.
‘‘අනාගතම්‌පි ඛො, භික්‌ඛවෙ, අද්‌ධානං ධාතුසොව සත්‌තා සංසන්‌දිස්‌සන්‌ති සමෙස්‌සන්‌ති. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දිස්‌සන්‌ති සමෙස්‌සන්‌ති.
‘‘Anāgatampi kho, bhikkhave, addhānaṃ dhātusova sattā saṃsandissanti samessanti. Hīnādhimuttikā hīnādhimuttikehi saddhiṃ saṃsandissanti samessanti.
‘‘එතරහිපි ඛො, භික්‌ඛවෙ, පච්‌චුප්‌පන්‌නං අද්‌ධානං ධාතුසොව සත්‌තා සංසන්‌දන්‌ති සමෙන්‌ති. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දන්‌ති සමෙන්‌ති.
‘‘Etarahipi kho, bhikkhave, paccuppannaṃ addhānaṃ dhātusova sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti.
‘‘සෙය්‍යථාපි, භික්‌ඛවෙ, ගූථො ගූථෙන සංසන්‌දති සමෙති; මුත්‌තං මුත්‌තෙන සංසන්‌දති සමෙති; ඛෙළො ඛෙළෙන සංසන්‌දති සමෙති; පුබ්‌බො පුබ්‌බෙන සංසන්‌දති සමෙති; ලොහිතං ලොහිතෙන සංසන්‌දති සමෙති ; එවමෙව ඛො, භික්‌ඛවෙ, ධාතුසොව 1 සත්‌තා සංසන්‌දන්‌ති සමෙන්‌ති. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දන්‌ති සමෙන්‌ති. අතීතම්‌පි ඛො අද්‌ධානං…පෙ.… අනාගතම්‌පි ඛො අද්‌ධානං…පෙ.… එතරහිපි ඛො පච්‌චුප්‌පන්‌නං අද්‌ධානං ධාතුසොව සත්‌තා සංසන්‌දන්‌ති සමෙන්‌ති. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දන්‌ති සමෙන්‌ති.
‘‘Seyyathāpi, bhikkhave, gūtho gūthena saṃsandati sameti; muttaṃ muttena saṃsandati sameti; kheḷo kheḷena saṃsandati sameti; pubbo pubbena saṃsandati sameti; lohitaṃ lohitena saṃsandati sameti ; evameva kho, bhikkhave, dhātusova 2 sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti. Atītampi kho addhānaṃ…pe… anāgatampi kho addhānaṃ…pe… etarahipi kho paccuppannaṃ addhānaṃ dhātusova sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti.
‘‘ධාතුසොව භික්‌ඛවෙ, සත්‌තා සංසන්‌දන්‌ති සමෙන්‌ති. කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දන්‌ති සමෙන්‌ති. අතීතම්‌පි ඛො, භික්‌ඛවෙ, අද්‌ධානං ධාතුසොව සත්‌තා සංසන්‌දිංසු සමිංසු. කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දිංසු සමිංසු.
‘‘Dhātusova bhikkhave, sattā saṃsandanti samenti. Kalyāṇādhimuttikā kalyāṇādhimuttikehi saddhiṃ saṃsandanti samenti. Atītampi kho, bhikkhave, addhānaṃ dhātusova sattā saṃsandiṃsu samiṃsu. Kalyāṇādhimuttikā kalyāṇādhimuttikehi saddhiṃ saṃsandiṃsu samiṃsu.
‘‘අනාගතම්‌පි ඛො, භික්‌ඛවෙ, අද්‌ධානං…පෙ.… එතරහිපි ඛො, භික්‌ඛවෙ, පච්‌චුප්‌පන්‌නං අද්‌ධානං ධාතුසොව සත්‌තා සංසන්‌දන්‌ති සමෙන්‌ති. කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දන්‌ති සමෙන්‌ති.
‘‘Anāgatampi kho, bhikkhave, addhānaṃ…pe… etarahipi kho, bhikkhave, paccuppannaṃ addhānaṃ dhātusova sattā saṃsandanti samenti. Kalyāṇādhimuttikā kalyāṇādhimuttikehi saddhiṃ saṃsandanti samenti.
‘‘සෙය්‍යථාපි, භික්‌ඛවෙ, ඛීරං ඛීරෙන සංසන්‌දති සමෙති; තෙලං තෙලෙන සංසන්‌දති සමෙති; සප්‌පි සප්‌පිනා සංසන්‌දති සමෙති; මධු මධුනා සංසන්‌දති සමෙති; ඵාණිතං ඵාණිතෙන සංසන්‌දති සමෙති; එවමෙව ඛො, භික්‌ඛවෙ, ධාතුසොව සත්‌තා සංසන්‌දන්‌ති සමෙන්‌ති. කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දන්‌ති සමෙන්‌ති. අතීතම්‌පි ඛො අද්‌ධානං… අනාගතම්‌පි ඛො අද්‌ධානං… එතරහිපි ඛො පච්‌චුප්‌පන්‌නං අද්‌ධානං ධාතුසොව සත්‌තා සංසන්‌දන්‌ති සමෙන්‌ති. කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දන්‌ති සමෙන්‌තී’’ති.
‘‘Seyyathāpi, bhikkhave, khīraṃ khīrena saṃsandati sameti; telaṃ telena saṃsandati sameti; sappi sappinā saṃsandati sameti; madhu madhunā saṃsandati sameti; phāṇitaṃ phāṇitena saṃsandati sameti; evameva kho, bhikkhave, dhātusova sattā saṃsandanti samenti. Kalyāṇādhimuttikā kalyāṇādhimuttikehi saddhiṃ saṃsandanti samenti. Atītampi kho addhānaṃ… anāgatampi kho addhānaṃ… etarahipi kho paccuppannaṃ addhānaṃ dhātusova sattā saṃsandanti samenti. Kalyāṇādhimuttikā kalyāṇādhimuttikehi saddhiṃ saṃsandanti samentī’’ti.
ඉදමවොච භගවා. ඉදං වත්‌වාන සුගතො අථාපරං එතදවොච සත්‌ථා –
Idamavoca bhagavā. Idaṃ vatvāna sugato athāparaṃ etadavoca satthā –
‘‘සංසග්‌ගා වනථො ජාතො, අසංසග්‌ගෙන ඡිජ්‌ජති;
‘‘Saṃsaggā vanatho jāto, asaṃsaggena chijjati;
පරිත්‌තං දාරුමාරුය්‌හ, යථා සීදෙ මහණ්‌ණවෙ.
Parittaṃ dārumāruyha, yathā sīde mahaṇṇave.
‘‘එවං කුසීතමාගම්‌ම, සාධුජීවිපි සීදති;
‘‘Evaṃ kusītamāgamma, sādhujīvipi sīdati;
තස්‌මා තං පරිවජ්‌ජෙය්‍ය, කුසීතං හීනවීරියං.
Tasmā taṃ parivajjeyya, kusītaṃ hīnavīriyaṃ.
නිච්‌චං ආරද්‌ධවීරියෙහි, පණ්‌ඩිතෙහි සහාවසෙ’’ති.
Niccaṃ āraddhavīriyehi, paṇḍitehi sahāvase’’ti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. සගාථාසුත්‌තවණ්‌ණනා • 6. Sagāthāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. සගාථාසුත්‌තවණ්‌ණනා • 6. Sagāthāsuttavaṇṇanā
