| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৬. সগাথাসুত্তৰণ্ণনা
6. Sagāthāsuttavaṇṇanā
১০০. ছট্ঠে গূথো গূথেন সংসন্দতি সমেতীতি সমুদ্দন্তরে জনপদন্তরে চক্কৰাল়ন্তরে ঠিতোপি ৰণ্ণেনপি গন্ধেনপি রসেনপি নানত্তং অনুপগচ্ছন্তো সংসন্দতি সমেতি, একসদিসোৰ হোতি নিরন্তরো। সেসেসুপি এসেৰ নযো। অযং পন অনিট্ঠউপমা হীনজ্ঝাসযানং হীনঅজ্ঝাসযস্স সরিক্খভাৰদস্সনত্থং আহটা, খীরাদিৰিসিট্ঠোপমা কল্যাণজ্ঝাসযানং অজ্ঝাসযস্স সরিক্খভাৰদস্সনত্থং।
100. Chaṭṭhe gūtho gūthena saṃsandati sametīti samuddantare janapadantare cakkavāḷantare ṭhitopi vaṇṇenapi gandhenapi rasenapi nānattaṃ anupagacchanto saṃsandati sameti, ekasadisova hoti nirantaro. Sesesupi eseva nayo. Ayaṃ pana aniṭṭhaupamā hīnajjhāsayānaṃ hīnaajjhāsayassa sarikkhabhāvadassanatthaṃ āhaṭā, khīrādivisiṭṭhopamā kalyāṇajjhāsayānaṃ ajjhāsayassa sarikkhabhāvadassanatthaṃ.
সংসগ্গাতি দস্সনসৰনসংসগ্গাদিৰত্থুকেন তণ্হাস্নেহেন। ৰনথো জাতোতি কিলেসৰনং জাতং । অসংসগ্গেন ছিজ্জতীতি একতো ঠাননিসজ্জাদীনি অকরোন্তস্স অসংসগ্গেন অদস্সনেন ছিজ্জতি। সাধুজীৰীতি পরিসুদ্ধজীৰিতং জীৰমানো। সহাৰসেতি সহৰাসং ৰসেয্য। ছট্ঠং।
Saṃsaggāti dassanasavanasaṃsaggādivatthukena taṇhāsnehena. Vanatho jātoti kilesavanaṃ jātaṃ . Asaṃsaggena chijjatīti ekato ṭhānanisajjādīni akarontassa asaṃsaggena adassanena chijjati. Sādhujīvīti parisuddhajīvitaṃ jīvamāno. Sahāvaseti sahavāsaṃ vaseyya. Chaṭṭhaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৬. সগাথাসুত্তং • 6. Sagāthāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. সগাথাসুত্তৰণ্ণনা • 6. Sagāthāsuttavaṇṇanā
