| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. ஸஹத⁴ம்மிகவக்³கோ³
8. Sahadhammikavaggo
1. ஸஹத⁴ம்மிகஸிக்கா²பத³வண்ணனா
1. Sahadhammikasikkhāpadavaṇṇanā
ஸஹத⁴ம்மிகங் வுச்சமானோதி ஸஹத⁴ம்மிகேன வுச்சமானோ. கரணத்தே² சேதங் உபயோக³வசனங். ‘‘பஞ்சஹி ஸஹத⁴ம்மிகேஹி ஸிக்கி²தப்³ப³த்தா, தேஸங் வா ஸந்தகத்தா ‘ஸஹத⁴ம்மிக’ந்தி லத்³த⁴னாமேன பு³த்³த⁴பஞ்ஞத்தேன ஸிக்கா²பதே³ன வுச்சமானோதி அத்தோ²’’தி (கங்கா²॰ அட்ட²॰ து³ப்³ப³சஸிக்கா²பத³வண்ணனா; பாரா॰ அட்ட²॰ 2.425-426) து³ப்³ப³சஸிக்கா²பதே³ வுத்தத்தா ‘‘ஸஹத⁴ம்மிகங் வுச்சமானோதி இமஸ்ஸத்தோ² து³ப்³ப³சஸிக்கா²பதே³ வுத்தோ’’தி வுத்தங். அனாத³ரியப⁴யாதி அனாத³ரகரணே ப⁴யா, தத்த² பாசித்தியப⁴யாதி அத்தோ². லேஸேன ஏவங் வத³ந்தஸ்ஸாதி உஜுகங் ‘‘ந ஸிக்கி²ஸ்ஸாமீ’’தி அவத்வா ‘‘யாவ ந அஞ்ஞங் பி⁴க்கு²’’ந்திஆதி³னா லேஸேன வத³ந்தஸ்ஸ.
Sahadhammikaṃ vuccamānoti sahadhammikena vuccamāno. Karaṇatthe cetaṃ upayogavacanaṃ. ‘‘Pañcahi sahadhammikehi sikkhitabbattā, tesaṃ vā santakattā ‘sahadhammika’nti laddhanāmena buddhapaññattena sikkhāpadena vuccamānoti attho’’ti (kaṅkhā. aṭṭha. dubbacasikkhāpadavaṇṇanā; pārā. aṭṭha. 2.425-426) dubbacasikkhāpade vuttattā ‘‘sahadhammikaṃ vuccamānoti imassattho dubbacasikkhāpade vutto’’ti vuttaṃ. Anādariyabhayāti anādarakaraṇe bhayā, tattha pācittiyabhayāti attho. Lesena evaṃ vadantassāti ujukaṃ ‘‘na sikkhissāmī’’ti avatvā ‘‘yāva na aññaṃ bhikkhu’’ntiādinā lesena vadantassa.
ஸஹத⁴ம்மிகஸிக்கா²பத³வண்ணனா நிட்டி²தா.
Sahadhammikasikkhāpadavaṇṇanā niṭṭhitā.
