| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
८. सहधम्मिकवग्गो
8. Sahadhammikavaggo
१. सहधम्मिकसिक्खापदवण्णना
1. Sahadhammikasikkhāpadavaṇṇanā
सहधम्मिकं वुच्चमानोति सहधम्मिकेन वुच्चमानो। करणत्थे चेतं उपयोगवचनं। ‘‘पञ्चहि सहधम्मिकेहि सिक्खितब्बत्ता, तेसं वा सन्तकत्ता ‘सहधम्मिक’न्ति लद्धनामेन बुद्धपञ्ञत्तेन सिक्खापदेन वुच्चमानोति अत्थो’’ति (कङ्खा॰ अट्ठ॰ दुब्बचसिक्खापदवण्णना; पारा॰ अट्ठ॰ २.४२५-४२६) दुब्बचसिक्खापदे वुत्तत्ता ‘‘सहधम्मिकं वुच्चमानोति इमस्सत्थो दुब्बचसिक्खापदे वुत्तो’’ति वुत्तं। अनादरियभयाति अनादरकरणे भया, तत्थ पाचित्तियभयाति अत्थो। लेसेन एवं वदन्तस्साति उजुकं ‘‘न सिक्खिस्सामी’’ति अवत्वा ‘‘याव न अञ्ञं भिक्खु’’न्तिआदिना लेसेन वदन्तस्स।
Sahadhammikaṃ vuccamānoti sahadhammikena vuccamāno. Karaṇatthe cetaṃ upayogavacanaṃ. ‘‘Pañcahi sahadhammikehi sikkhitabbattā, tesaṃ vā santakattā ‘sahadhammika’nti laddhanāmena buddhapaññattena sikkhāpadena vuccamānoti attho’’ti (kaṅkhā. aṭṭha. dubbacasikkhāpadavaṇṇanā; pārā. aṭṭha. 2.425-426) dubbacasikkhāpade vuttattā ‘‘sahadhammikaṃ vuccamānoti imassattho dubbacasikkhāpade vutto’’ti vuttaṃ. Anādariyabhayāti anādarakaraṇe bhayā, tattha pācittiyabhayāti attho. Lesena evaṃ vadantassāti ujukaṃ ‘‘na sikkhissāmī’’ti avatvā ‘‘yāva na aññaṃ bhikkhu’’ntiādinā lesena vadantassa.
सहधम्मिकसिक्खापदवण्णना निट्ठिता।
Sahadhammikasikkhāpadavaṇṇanā niṭṭhitā.
