| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៨. សហធម្មិកវគ្គោ
8. Sahadhammikavaggo
១. សហធម្មិកសិក្ខាបទវណ្ណនា
1. Sahadhammikasikkhāpadavaṇṇanā
សហធម្មិកំ វុច្ចមានោតិ សហធម្មិកេន វុច្ចមានោ។ ករណត្ថេ ចេតំ ឧបយោគវចនំ។ ‘‘បញ្ចហិ សហធម្មិកេហិ សិក្ខិតព្ពត្តា, តេសំ វា សន្តកត្តា ‘សហធម្មិក’ន្តិ លទ្ធនាមេន ពុទ្ធបញ្ញត្តេន សិក្ខាបទេន វុច្ចមានោតិ អត្ថោ’’តិ (កង្ខា. អដ្ឋ. ទុព្ពចសិក្ខាបទវណ្ណនា; បារា. អដ្ឋ. ២.៤២៥-៤២៦) ទុព្ពចសិក្ខាបទេ វុត្តត្តា ‘‘សហធម្មិកំ វុច្ចមានោតិ ឥមស្សត្ថោ ទុព្ពចសិក្ខាបទេ វុត្តោ’’តិ វុត្តំ។ អនាទរិយភយាតិ អនាទរករណេ ភយា, តត្ថ បាចិត្តិយភយាតិ អត្ថោ។ លេសេន ឯវំ វទន្តស្សាតិ ឧជុកំ ‘‘ន សិក្ខិស្សាមី’’តិ អវត្វា ‘‘យាវ ន អញ្ញំ ភិក្ខុ’’ន្តិអាទិនា លេសេន វទន្តស្ស។
Sahadhammikaṃ vuccamānoti sahadhammikena vuccamāno. Karaṇatthe cetaṃ upayogavacanaṃ. ‘‘Pañcahi sahadhammikehi sikkhitabbattā, tesaṃ vā santakattā ‘sahadhammika’nti laddhanāmena buddhapaññattena sikkhāpadena vuccamānoti attho’’ti (kaṅkhā. aṭṭha. dubbacasikkhāpadavaṇṇanā; pārā. aṭṭha. 2.425-426) dubbacasikkhāpade vuttattā ‘‘sahadhammikaṃ vuccamānoti imassattho dubbacasikkhāpade vutto’’ti vuttaṃ. Anādariyabhayāti anādarakaraṇe bhayā, tattha pācittiyabhayāti attho. Lesena evaṃ vadantassāti ujukaṃ ‘‘na sikkhissāmī’’ti avatvā ‘‘yāva na aññaṃ bhikkhu’’ntiādinā lesena vadantassa.
សហធម្មិកសិក្ខាបទវណ្ណនា និដ្ឋិតា។
Sahadhammikasikkhāpadavaṇṇanā niṭṭhitā.
