| Library / Tipiṭaka / ਤਿਪਿਟਕ • Tipiṭaka / ਕਙ੍ਖਾવਿਤਰਣੀ-ਅਭਿਨવ-ਟੀਕਾ • Kaṅkhāvitaraṇī-abhinava-ṭīkā |
੮. ਸਹਧਮ੍ਮਿਕવਗ੍ਗੋ
8. Sahadhammikavaggo
੧. ਸਹਧਮ੍ਮਿਕਸਿਕ੍ਖਾਪਦવਣ੍ਣਨਾ
1. Sahadhammikasikkhāpadavaṇṇanā
ਸਹਧਮ੍ਮਿਕਂ વੁਚ੍ਚਮਾਨੋਤਿ ਸਹਧਮ੍ਮਿਕੇਨ વੁਚ੍ਚਮਾਨੋ। ਕਰਣਤ੍ਥੇ ਚੇਤਂ ਉਪਯੋਗવਚਨਂ। ‘‘ਪਞ੍ਚਹਿ ਸਹਧਮ੍ਮਿਕੇਹਿ ਸਿਕ੍ਖਿਤਬ੍ਬਤ੍ਤਾ, ਤੇਸਂ વਾ ਸਨ੍ਤਕਤ੍ਤਾ ‘ਸਹਧਮ੍ਮਿਕ’ਨ੍ਤਿ ਲਦ੍ਧਨਾਮੇਨ ਬੁਦ੍ਧਪਞ੍ਞਤ੍ਤੇਨ ਸਿਕ੍ਖਾਪਦੇਨ વੁਚ੍ਚਮਾਨੋਤਿ ਅਤ੍ਥੋ’’ਤਿ (ਕਙ੍ਖਾ॰ ਅਟ੍ਠ॰ ਦੁਬ੍ਬਚਸਿਕ੍ਖਾਪਦવਣ੍ਣਨਾ; ਪਾਰਾ॰ ਅਟ੍ਠ॰ ੨.੪੨੫-੪੨੬) ਦੁਬ੍ਬਚਸਿਕ੍ਖਾਪਦੇ વੁਤ੍ਤਤ੍ਤਾ ‘‘ਸਹਧਮ੍ਮਿਕਂ વੁਚ੍ਚਮਾਨੋਤਿ ਇਮਸ੍ਸਤ੍ਥੋ ਦੁਬ੍ਬਚਸਿਕ੍ਖਾਪਦੇ વੁਤ੍ਤੋ’’ਤਿ વੁਤ੍ਤਂ। ਅਨਾਦਰਿਯਭਯਾਤਿ ਅਨਾਦਰਕਰਣੇ ਭਯਾ, ਤਤ੍ਥ ਪਾਚਿਤ੍ਤਿਯਭਯਾਤਿ ਅਤ੍ਥੋ। ਲੇਸੇਨ ਏવਂ વਦਨ੍ਤਸ੍ਸਾਤਿ ਉਜੁਕਂ ‘‘ਨ ਸਿਕ੍ਖਿਸ੍ਸਾਮੀ’’ਤਿ ਅવਤ੍વਾ ‘‘ਯਾવ ਨ ਅਞ੍ਞਂ ਭਿਕ੍ਖੁ’’ਨ੍ਤਿਆਦਿਨਾ ਲੇਸੇਨ વਦਨ੍ਤਸ੍ਸ।
Sahadhammikaṃ vuccamānoti sahadhammikena vuccamāno. Karaṇatthe cetaṃ upayogavacanaṃ. ‘‘Pañcahi sahadhammikehi sikkhitabbattā, tesaṃ vā santakattā ‘sahadhammika’nti laddhanāmena buddhapaññattena sikkhāpadena vuccamānoti attho’’ti (kaṅkhā. aṭṭha. dubbacasikkhāpadavaṇṇanā; pārā. aṭṭha. 2.425-426) dubbacasikkhāpade vuttattā ‘‘sahadhammikaṃ vuccamānoti imassattho dubbacasikkhāpade vutto’’ti vuttaṃ. Anādariyabhayāti anādarakaraṇe bhayā, tattha pācittiyabhayāti attho. Lesena evaṃ vadantassāti ujukaṃ ‘‘na sikkhissāmī’’ti avatvā ‘‘yāva na aññaṃ bhikkhu’’ntiādinā lesena vadantassa.
ਸਹਧਮ੍ਮਿਕਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Sahadhammikasikkhāpadavaṇṇanā niṭṭhitā.
