| Library / Tipiṭaka / திபிடக • Tipiṭaka / த்³வேமாதிகாபாளி • Dvemātikāpāḷi |
8. ஸஹத⁴ம்மிகவக்³கோ³
8. Sahadhammikavaggo
1. ஸஹத⁴ம்மிகஸிக்கா²பத³வண்ணனா
1. Sahadhammikasikkhāpadavaṇṇanā
ஸஹத⁴ம்மிகவக்³க³ஸ்ஸ பட²மே ஸஹத⁴ம்மிகங் வுச்சமானோதி இமஸ்ஸத்தோ² து³ப்³ப³சஸிக்கா²பதே³ வுத்தோ. ஏதஸ்மிங் ஸிக்கா²பதே³தி ஏதஸ்மிங் ஸிக்கா²பதே³ யங் வுத்தங், தங் ந தாவ ஸிக்கி²ஸ்ஸாமீதி அத்தோ². பாசித்தியந்தி எத்த² பன அனாத³ரியப⁴யா லேஸேன ஏவங் வத³ந்தஸ்ஸ வாசாய வாசாய பாசித்தியங் வேதி³தப்³ப³ங். ஸிக்க²மானேனாதி ஓவாத³ங் ஸிரஸா ஸம்படிச்சி²த்வா ஸிக்கி²துகாமேனேவ ஹுத்வா. அஞ்ஞாதப்³ப³ந்தி ஆஜானிதப்³ப³ங். பரிபுச்சி²தப்³ப³ந்தி ‘‘இமஸ்ஸ கோ அத்தோ²’’தி பரிபுச்சி²தப்³ப³ங். பரிபஞ்ஹிதப்³ப³ந்தி சிந்தேதப்³ப³ங் துலயிதப்³ப³ங்.
Sahadhammikavaggassa paṭhame sahadhammikaṃ vuccamānoti imassattho dubbacasikkhāpade vutto. Etasmiṃ sikkhāpadeti etasmiṃ sikkhāpade yaṃ vuttaṃ, taṃ na tāva sikkhissāmīti attho. Pācittiyanti ettha pana anādariyabhayā lesena evaṃ vadantassa vācāya vācāya pācittiyaṃ veditabbaṃ. Sikkhamānenāti ovādaṃ sirasā sampaṭicchitvā sikkhitukāmeneva hutvā. Aññātabbanti ājānitabbaṃ. Paripucchitabbanti ‘‘imassa ko attho’’ti paripucchitabbaṃ. Paripañhitabbanti cintetabbaṃ tulayitabbaṃ.
கோஸம்பி³யங் ச²ன்னத்தே²ரங் ஆரப்³ப⁴ ஏவங் ப⁴ணனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங் , திகபாசித்தியங், அனுபஸம்பன்னே திகது³க்கடங், உபோ⁴ஹிபி ‘‘இத³ங் ந ஸல்லேகா²யா’’திஆதி³னா (பாசி॰ 436) நயேனேவ அப்பஞ்ஞத்தேன வுச்சமானஸ்ஸாபி ஏவங் வத³தோ து³க்கடமேவ. ‘‘ஜானிஸ்ஸாமி ஸிக்கி²ஸ்ஸாமீ’’தி ப⁴ணந்தஸ்ஸ, உம்மத்தகாதீ³னஞ்ச அனாபத்தி. உபஸம்பன்னஸ்ஸ பஞ்ஞத்தேன வசனங், அஸிக்கி²துகாமதாய ஏவங் வசனந்தி இமானெத்த² த்³வே அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன து³க்க²வேத³னந்தி.
Kosambiyaṃ channattheraṃ ārabbha evaṃ bhaṇanavatthusmiṃ paññattaṃ, sādhāraṇapaññatti, anāṇattikaṃ , tikapācittiyaṃ, anupasampanne tikadukkaṭaṃ, ubhohipi ‘‘idaṃ na sallekhāyā’’tiādinā (pāci. 436) nayeneva appaññattena vuccamānassāpi evaṃ vadato dukkaṭameva. ‘‘Jānissāmi sikkhissāmī’’ti bhaṇantassa, ummattakādīnañca anāpatti. Upasampannassa paññattena vacanaṃ, asikkhitukāmatāya evaṃ vacananti imānettha dve aṅgāni. Samuṭṭhānādīni adinnādānasadisāni, idaṃ pana dukkhavedananti.
ஸஹத⁴ம்மிகஸிக்கா²பத³வண்ணனா நிட்டி²தா.
Sahadhammikasikkhāpadavaṇṇanā niṭṭhitā.
2. விலேக²னஸிக்கா²பத³வண்ணனா
2. Vilekhanasikkhāpadavaṇṇanā
து³தியே உத்³தி³ஸ்ஸமானேதி ஆசரியேன அந்தேவாஸிகஸ்ஸ வுச்சமானே வா ஸஜ்ஜா²யவஸேன பரிவத்தியமானே வா. கு²த்³தா³னுகு²த்³த³கேஹீதி கு²த்³த³கேஹி ச அனுகு²த்³த³கேஹி ச. யாவதே³வாதி தேஸங் ஸங்வத்தனமரியாத³பரிச்சே²த³வசனங். இத³ங் வுத்தங் ஹோதி – ஏதானி ஹி யே உத்³தி³ஸந்தி வா உத்³தி³ஸாபெந்தி வா ஸஜ்ஜா²யந்தி வா, தேஸங் தாவ ஸங்வத்தந்தி, யாவ ‘‘கப்பதி நு கோ², ந கப்பதி நு கோ²’’தி குக்குச்சவிப்படிஸாரோ, விஹேஸா, விசிகிச்சா² மனோவிலேகா² ச உப்பஜ்ஜந்தியேவ. அத² வா யாவதே³வாதி அதிஸயவவத்தா²பனங். தஸ்ஸ ‘ஸங்வத்தந்தீ’திஇமினா ஸம்ப³ந்தோ⁴, குக்குச்சாய விஹேஸாய விலேகா²ய அதிவிய ஸங்வத்தந்தியேவாதி வுத்தங் ஹோதி. ஸிக்கா²பத³விவண்ணகேதி ஏவங் ஸிக்கா²பதா³னங் விவண்ணகே க³ரஹணே பாசித்தியங் ஹோதீதி அத்தோ².
Dutiye uddissamāneti ācariyena antevāsikassa vuccamāne vā sajjhāyavasena parivattiyamāne vā. Khuddānukhuddakehīti khuddakehi ca anukhuddakehi ca. Yāvadevāti tesaṃ saṃvattanamariyādaparicchedavacanaṃ. Idaṃ vuttaṃ hoti – etāni hi ye uddisanti vā uddisāpenti vā sajjhāyanti vā, tesaṃ tāva saṃvattanti, yāva ‘‘kappati nu kho, na kappati nu kho’’ti kukkuccavippaṭisāro, vihesā, vicikicchā manovilekhā ca uppajjantiyeva. Atha vā yāvadevāti atisayavavatthāpanaṃ. Tassa ‘saṃvattantī’tiiminā sambandho, kukkuccāya vihesāya vilekhāya ativiya saṃvattantiyevāti vuttaṃ hoti. Sikkhāpadavivaṇṇaketi evaṃ sikkhāpadānaṃ vivaṇṇake garahaṇe pācittiyaṃ hotīti attho.
ஸாவத்தி²யங் ச²ப்³ப³க்³கி³யே ஆரப்³ப⁴ வினயவிவண்ணனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், அனுபஸம்பன்னஸ்ஸ விவண்ணனே திகது³க்கடங், உபி⁴ன்னம்பி அஞ்ஞத⁴ம்மவிவண்ணனே து³க்கடமேவ. ந விவண்ணேதுகாமஸ்ஸ, ‘‘இங்க⁴ தாவ ஸுத்தந்தே வா கா³தா²யோ வா அபி⁴த⁴ம்மங் வா பரியாபுணஸ்ஸு, பச்சா²பி வினயங் பரியாபுணிஸ்ஸஸீ’’தி ப⁴ணதோ, உம்மத்தகாதீ³னஞ்ச அனாபத்தி. க³ரஹிதுகாமதா ச, உபஸம்பன்னஸ்ஸ ஸந்திகே ஸிக்கா²பத³விவண்ணனஞ்சாதி இமானெத்த² த்³வே அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன து³க்க²வேத³னந்தி.
Sāvatthiyaṃ chabbaggiye ārabbha vinayavivaṇṇanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, anupasampannassa vivaṇṇane tikadukkaṭaṃ, ubhinnampi aññadhammavivaṇṇane dukkaṭameva. Na vivaṇṇetukāmassa, ‘‘iṅgha tāva suttante vā gāthāyo vā abhidhammaṃ vā pariyāpuṇassu, pacchāpi vinayaṃ pariyāpuṇissasī’’ti bhaṇato, ummattakādīnañca anāpatti. Garahitukāmatā ca, upasampannassa santike sikkhāpadavivaṇṇanañcāti imānettha dve aṅgāni. Samuṭṭhānādīni adinnādānasadisāni, idaṃ pana dukkhavedananti.
விலேக²னஸிக்கா²பத³வண்ணனா நிட்டி²தா.
Vilekhanasikkhāpadavaṇṇanā niṭṭhitā.
3. மோஹனஸிக்கா²பத³வண்ணனா
3. Mohanasikkhāpadavaṇṇanā
ததியே அன்வட்³ட⁴மாஸந்தி அனுபடிபாடியா அத்³த⁴மாஸே அத்³த⁴மாஸே. உத்³தி³ஸ்ஸமானேதி உபோஸத²வஸேன உத்³தி³ஸியமானே. யஞ்ச தத்த² ஆபத்திங் ஆபன்னோதி யங் ஸோ அனாசாரங் ஆசரித்வா அஞ்ஞாணகேன ஆபன்னபா⁴வங் ஜானாபேதுகாமோ ஏவமாஹ, தஸ்மிங் அனாசாரே யங் ஆபத்திங் ஆபன்னோ. தஞ்ச யதா²த⁴ம்மோ காரேதப்³போ³தி அஞ்ஞாணகேன ஆபன்னத்தா மொக்கோ² நத்தி², யதா² பன த⁴ம்மோ ச வினயோ ச டி²தோ, ததா² தங் ஆபத்திங் காரேதப்³போ³, தே³ஸனாகா³மினியா தே³ஸாபேதப்³போ³, வுட்டா²னகா³மினியா வுட்டா²பேதப்³போ³தி அத்தோ². உத்தரி சஸ்ஸ மோஹோ ஆரோபேதப்³போ³தி யதா²த⁴ம்மகரணதோ ச உத்தரி ‘‘தஸ்ஸ தே, ஆவுஸோ’’திஆதி³வசனேஹி நிந்தி³த்வா தஸ்ஸ புக்³க³லஸ்ஸ ஞத்திது³தியகம்மேன மோஹோ ஆரோபேதப்³போ³. இத³ங் தஸ்மிங் மோஹனகே பாசித்தியந்தி யோ ஏவங் ஆரோபிதே மோஹே புன மோஹேதி, தஸ்மிங் மோஹனகே புக்³க³லே இத³ங் பாசித்தியங் வேதி³தப்³ப³ங், ந அனாரோபிதே மோஹேதி அத்தோ².
Tatiye anvaḍḍhamāsanti anupaṭipāṭiyā addhamāse addhamāse. Uddissamāneti uposathavasena uddisiyamāne. Yañca tattha āpattiṃ āpannoti yaṃ so anācāraṃ ācaritvā aññāṇakena āpannabhāvaṃ jānāpetukāmo evamāha, tasmiṃ anācāre yaṃ āpattiṃ āpanno. Tañca yathādhammo kāretabboti aññāṇakena āpannattā mokkho natthi, yathā pana dhammo ca vinayo ca ṭhito, tathā taṃ āpattiṃ kāretabbo, desanāgāminiyā desāpetabbo, vuṭṭhānagāminiyā vuṭṭhāpetabboti attho. Uttari cassa moho āropetabboti yathādhammakaraṇato ca uttari ‘‘tassa te, āvuso’’tiādivacanehi ninditvā tassa puggalassa ñattidutiyakammena moho āropetabbo. Idaṃ tasmiṃ mohanake pācittiyanti yo evaṃ āropite mohe puna moheti, tasmiṃ mohanake puggale idaṃ pācittiyaṃ veditabbaṃ, na anāropite moheti attho.
ஸாவத்தி²யங் ச²ப்³ப³க்³கி³யே ஆரப்³ப⁴ மோஹனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், அத⁴ம்மகம்மே திகது³க்கடங், அனாரோபிதே மோஹே து³க்கடமேவ. யேன ந வித்தா²ரேன ஸுதங், ஊனகத்³வத்திக்க²த்துங் வா வித்தா²ரேன ஸுதங், யே ச ந மோஹேதுகாமா தேஸங், உம்மத்தகாதீ³னஞ்ச அனாபத்தி. மோஹாரோபனங், மோஹேதுகாமதா, வுத்தனயேன ஸுதபா⁴வோ, மோஹனந்தி இமானெத்த² சத்தாரி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன து³க்க²வேத³னந்தி.
Sāvatthiyaṃ chabbaggiye ārabbha mohanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, adhammakamme tikadukkaṭaṃ, anāropite mohe dukkaṭameva. Yena na vitthārena sutaṃ, ūnakadvattikkhattuṃ vā vitthārena sutaṃ, ye ca na mohetukāmā tesaṃ, ummattakādīnañca anāpatti. Mohāropanaṃ, mohetukāmatā, vuttanayena sutabhāvo, mohananti imānettha cattāri aṅgāni. Samuṭṭhānādīni adinnādānasadisāni, idaṃ pana dukkhavedananti.
மோஹனஸிக்கா²பத³வண்ணனா நிட்டி²தா.
Mohanasikkhāpadavaṇṇanā niṭṭhitā.
4. பஹாரஸிக்கா²பத³வண்ணனா
4. Pahārasikkhāpadavaṇṇanā
சதுத்தே² பஹாரங் த³தெ³ய்யாதி எத்த² பஹரிதுகாமதாய பஹாரே தி³ன்னே ஸசேபி மரதி, பாசித்தியமேவ.
Catutthe pahāraṃ dadeyyāti ettha paharitukāmatāya pahāre dinne sacepi marati, pācittiyameva.
ஸாவத்தி²யங் ச²ப்³ப³க்³கி³யே ஆரப்³ப⁴ பஹாரதா³னவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், அனுபஸம்பன்னே திகது³க்கடங், விரூபகரணாதி⁴ப்பாயேன பன உபஸம்பன்னஸ்ஸபி கண்ணாதி³ச்சே²த³னே து³க்கடமேவ. கேனசி விஹேடி²யமானஸ்ஸ பன மொக்கா²தி⁴ப்பாயஸ்ஸ, உம்மத்தகாதீ³னஞ்ச அனாபத்தி. குபிததா, ந மொக்கா²தி⁴ப்பாயதா, உபஸம்பன்னஸ்ஸ பஹாரதா³னந்தி இமானெத்த² தீணி அங்கா³னி. ஸமுட்டா²னாதீ³னி பட²மபாராஜிகஸதி³ஸானி, இத³ங் பன து³க்க²வேத³னந்தி.
Sāvatthiyaṃ chabbaggiye ārabbha pahāradānavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, anupasampanne tikadukkaṭaṃ, virūpakaraṇādhippāyena pana upasampannassapi kaṇṇādicchedane dukkaṭameva. Kenaci viheṭhiyamānassa pana mokkhādhippāyassa, ummattakādīnañca anāpatti. Kupitatā, na mokkhādhippāyatā, upasampannassa pahāradānanti imānettha tīṇi aṅgāni. Samuṭṭhānādīni paṭhamapārājikasadisāni, idaṃ pana dukkhavedananti.
பஹாரஸிக்கா²பத³வண்ணனா நிட்டி²தா.
Pahārasikkhāpadavaṇṇanā niṭṭhitā.
5. தலஸத்திகஸிக்கா²பத³வண்ணனா
5. Talasattikasikkhāpadavaṇṇanā
பஞ்சமே தலஸத்திகங் உக்³கி³ரெய்யாதி பஹாரதா³னாகாரங் த³ஸ்ஸெந்தோ காயங் வா காயப்படிப³த்³த⁴ங் வா உச்சாரெய்ய. எத்த² ச உக்³கி³ரணபச்சயா பாசித்தியங். ஸசே பன உக்³கி³ரித்வா விரத்³தோ⁴ பஹாரங் தே³தி, ந பஹரிதுகாமதாய தி³ன்னத்தா து³க்கடமேவ, தேன பஹாரேன ஹத்தா²தீ³ஸு யங்கிஞ்சி பி⁴ஜ்ஜதி, து³க்கடமேவ. ஸேஸமெத்த² ஸப்³ப³ங் புரிமஸிக்கா²பதே³ வுத்தனயேனேவ வேதி³தப்³ப³ந்தி.
Pañcame talasattikaṃ uggireyyāti pahāradānākāraṃ dassento kāyaṃ vā kāyappaṭibaddhaṃ vā uccāreyya. Ettha ca uggiraṇapaccayā pācittiyaṃ. Sace pana uggiritvā viraddho pahāraṃ deti, na paharitukāmatāya dinnattā dukkaṭameva, tena pahārena hatthādīsu yaṃkiñci bhijjati, dukkaṭameva. Sesamettha sabbaṃ purimasikkhāpade vuttanayeneva veditabbanti.
தலஸத்திகஸிக்கா²பத³வண்ணனா நிட்டி²தா.
Talasattikasikkhāpadavaṇṇanā niṭṭhitā.
6. அமூலகஸிக்கா²பத³வண்ணனா
6. Amūlakasikkhāpadavaṇṇanā
ச²ட்டே² அமூலகேனாதி தி³ட்டா²தி³மூலவிரஹிதேன. அனுத்³த⁴ங்ஸெய்யாதி சோதெ³ய்ய வா சோதா³பெய்ய வா. பாசித்தியந்தி ஸசே சுதி³தகோ தங்க²ணஞ்ஞேவ ‘‘சோதே³தி ம’’ந்தி ஜானாதி, சோத³கஸ்ஸ பாசித்தியங்.
Chaṭṭhe amūlakenāti diṭṭhādimūlavirahitena. Anuddhaṃseyyāti codeyya vā codāpeyya vā. Pācittiyanti sace cuditako taṅkhaṇaññeva ‘‘codeti ma’’nti jānāti, codakassa pācittiyaṃ.
ஸாவத்தி²யங் ச²ப்³ப³க்³கி³யே ஆரப்³ப⁴ அமூலகேன ஸங்கா⁴தி³ஸேஸேன அனுத்³த⁴ங்ஸனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, ஸாணத்திகங், திகபாசித்தியங், ஆசாரவிபத்தியா வா தி³ட்டி²விபத்தியா வா அனுத்³த⁴ங்ஸனே து³க்கடங், அனுபஸம்பன்னே திகது³க்கடங். ததா²ஸஞ்ஞிஸ்ஸ, உம்மத்தகாதீ³னஞ்ச அனாபத்தி. உபஸம்பன்னதா, ஸங்கா⁴தி³ஸேஸஸ்ஸ அமூலகதா, அனுத்³த⁴ங்ஸனா, தங்க²ணவிஜானநாதி இமானெத்த² சத்தாரி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன து³க்க²வேத³னந்தி.
Sāvatthiyaṃ chabbaggiye ārabbha amūlakena saṅghādisesena anuddhaṃsanavatthusmiṃ paññattaṃ, sādhāraṇapaññatti, sāṇattikaṃ, tikapācittiyaṃ, ācāravipattiyā vā diṭṭhivipattiyā vā anuddhaṃsane dukkaṭaṃ, anupasampanne tikadukkaṭaṃ. Tathāsaññissa, ummattakādīnañca anāpatti. Upasampannatā, saṅghādisesassa amūlakatā, anuddhaṃsanā, taṅkhaṇavijānanāti imānettha cattāri aṅgāni. Samuṭṭhānādīni adinnādānasadisāni, idaṃ pana dukkhavedananti.
அமூலகஸிக்கா²பத³வண்ணனா நிட்டி²தா.
Amūlakasikkhāpadavaṇṇanā niṭṭhitā.
7. ஸஞ்சிச்சஸிக்கா²பத³வண்ணனா
7. Sañciccasikkhāpadavaṇṇanā
ஸத்தமே குக்குச்சங் உபத³ஹெய்யாதி ‘‘ஊனவீஸதிவஸ்ஸோ த்வங் மஞ்ஞே’’திஆதீ³னி (பாசி॰ 466) ப⁴ணந்தோ உப்பாதெ³ய்ய. ஏவங் அஞ்ஞஸ்மிங் உப்பாத³னபச்சயே அஸதி ஸஞ்சிச்ச உப்பாதெ³ந்தஸ்ஸ வாசாய வாசாய பாசித்தியங்.
Sattame kukkuccaṃ upadaheyyāti ‘‘ūnavīsativasso tvaṃ maññe’’tiādīni (pāci. 466) bhaṇanto uppādeyya. Evaṃ aññasmiṃ uppādanapaccaye asati sañcicca uppādentassa vācāya vācāya pācittiyaṃ.
ஸாவத்தி²யங் ச²ப்³ப³க்³கி³யே ஆரப்³ப⁴ குக்குச்சஉப்பாத³னவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், அனுபஸம்பன்னே திகது³க்கடங். நஉப்பாதே³துகாமஸ்ஸ, கேவலங் ஹிதேஸிதாய ததா² வத³ந்தஸ்ஸ, உம்மத்தகாதீ³னஞ்ச அனாபத்தி. உபஸம்பன்னதா, அபா²ஸுகாமதா , குக்குச்சுப்பாத³னந்தி இமானெத்த² தீணி அங்கா³னி. ஸமுட்டா²னாதீ³னி அனந்தரஸதி³ஸானேவாதி.
Sāvatthiyaṃ chabbaggiye ārabbha kukkuccauppādanavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, anupasampanne tikadukkaṭaṃ. Nauppādetukāmassa, kevalaṃ hitesitāya tathā vadantassa, ummattakādīnañca anāpatti. Upasampannatā, aphāsukāmatā , kukkuccuppādananti imānettha tīṇi aṅgāni. Samuṭṭhānādīni anantarasadisānevāti.
ஸஞ்சிச்சஸிக்கா²பத³வண்ணனா நிட்டி²தா.
Sañciccasikkhāpadavaṇṇanā niṭṭhitā.
8. உபஸ்ஸுதிஸிக்கா²பத³வண்ணனா
8. Upassutisikkhāpadavaṇṇanā
அட்ட²மே விவாதா³பன்னானந்தி ப⁴ண்ட³னகலஹேஹி விவட்³டி⁴தங் விவாதா³தி⁴கரணங் ஆபன்னானங். உபஸ்ஸுதிந்தி ஸுதிஸமீபங், யத்த² ட²த்வா ஸக்கா ஹோதி தேஸங் வசனங் ஸோதுங், தத்த² திட்டெ²ய்யாதி அத்தோ². ‘‘தத்த² ஸொஸ்ஸாமீ’’தி சோதே³துகாமதாய க³ச்ச²தோ பதே³ பதே³ து³க்கடங், துரிதக³மனேபி ஓஹீயமானேபி ஏஸேவ நயோ. யத்த² பன டி²தோ ஸுணாதி, தத்த² டி²தஸ்ஸ பாசித்தியங், அத்தனோ டி²தோகாஸங் ஆக³ந்த்வா தேஸு மந்தயமானேஸுபி உக்காஸித்வா, ‘‘அஹங் எத்தா²’’தி வா வத்வா ஜானாபேதப்³ப³ங், ஏவங் அகரொந்தஸ்ஸாபி ஸவனே பாசித்தியமேவ.
Aṭṭhame vivādāpannānanti bhaṇḍanakalahehi vivaḍḍhitaṃ vivādādhikaraṇaṃ āpannānaṃ. Upassutinti sutisamīpaṃ, yattha ṭhatvā sakkā hoti tesaṃ vacanaṃ sotuṃ, tattha tiṭṭheyyāti attho. ‘‘Tattha sossāmī’’ti codetukāmatāya gacchato pade pade dukkaṭaṃ, turitagamanepi ohīyamānepi eseva nayo. Yattha pana ṭhito suṇāti, tattha ṭhitassa pācittiyaṃ, attano ṭhitokāsaṃ āgantvā tesu mantayamānesupi ukkāsitvā, ‘‘ahaṃ etthā’’ti vā vatvā jānāpetabbaṃ, evaṃ akarontassāpi savane pācittiyameva.
ஸாவத்தி²யங் ச²ப்³ப³க்³கி³யே ஆரப்³ப⁴ உபஸ்ஸுதிட்டா²னவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், திகபாசித்தியங், அனுபஸம்பன்னே திகது³க்கடங், ‘‘இமேஸங் ஸுத்வா ஓரமிஸ்ஸாமி விரமிஸ்ஸாமி வூபஸமிஸ்ஸாமி அத்தானங் பரிமோசெஸ்ஸாமீ’’தி (பாசி॰ 473) க³ச்ச²தோ, உம்மத்தகாதீ³னஞ்ச அனாபத்தி. உபஸம்பன்னதா, சோத³னாதி⁴ப்பாயோ, ஸவனந்தி இமானெத்த² தீணி அங்கா³னி. தெ²ய்யஸத்த²ஸமுட்டா²னங் இத³ங் பன ஸியா கிரியங், ஸியா அகிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Sāvatthiyaṃ chabbaggiye ārabbha upassutiṭṭhānavatthusmiṃ paññattaṃ, sādhāraṇapaññatti, anāṇattikaṃ, tikapācittiyaṃ, anupasampanne tikadukkaṭaṃ, ‘‘imesaṃ sutvā oramissāmi viramissāmi vūpasamissāmi attānaṃ parimocessāmī’’ti (pāci. 473) gacchato, ummattakādīnañca anāpatti. Upasampannatā, codanādhippāyo, savananti imānettha tīṇi aṅgāni. Theyyasatthasamuṭṭhānaṃ idaṃ pana siyā kiriyaṃ, siyā akiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
உபஸ்ஸுதிஸிக்கா²பத³வண்ணனா நிட்டி²தா.
Upassutisikkhāpadavaṇṇanā niṭṭhitā.
9. கம்மப்படிபா³ஹனஸிக்கா²பத³வண்ணனா
9. Kammappaṭibāhanasikkhāpadavaṇṇanā
நவமே த⁴ம்மிகானங் கம்மானந்தி த⁴ம்மேன வினயேன ஸத்து²ஸாஸனேன கதானங் அபலோகனகம்மங் ஞத்திகம்மங் ஞத்திது³தியகம்மங் ஞத்திசதுத்த²கம்மந்தி இமேஸங் சதுன்னங் கம்மானங். தத்ராயங் ஸங்கே²பதோ கம்மவினிச்ச²யோ – தத்ர அபலோகனகம்மங் நாம ஸமக்³க³ஸ்ஸ ஸங்க⁴ஸ்ஸ அனுமதியா தங் தங் வத்து²ங் கித்தெத்வா ‘‘ருச்சதி ஸங்க⁴ஸ்ஸா’’தி திக்க²த்துங் ஸாவெத்வா கத்தப்³ப³ங் கம்மங் வுச்சதி. ஸமக்³க³ஸ்ஸேவ பன ஸங்க⁴ஸ்ஸ அனுமதியா ஏகாய ஞத்தியா கத்தப்³ப³ங் கம்மங் ஞத்திகம்மங் நாம. ஏகாய ஞத்தியா சேவ அனுஸ்ஸாவனாய ச கத்தப்³ப³ங் கம்மங் ஞத்திது³தியகம்மங் நாம. ஏகாய பன ஞத்தியா தீஹி ச அனுஸ்ஸாவனாஹி கத்தப்³ப³ங் கம்மங் ஞத்திசதுத்த²கம்மங் நாம.
Navame dhammikānaṃ kammānanti dhammena vinayena satthusāsanena katānaṃ apalokanakammaṃ ñattikammaṃ ñattidutiyakammaṃ ñatticatutthakammanti imesaṃ catunnaṃ kammānaṃ. Tatrāyaṃ saṅkhepato kammavinicchayo – tatra apalokanakammaṃ nāma samaggassa saṅghassa anumatiyā taṃ taṃ vatthuṃ kittetvā ‘‘ruccati saṅghassā’’ti tikkhattuṃ sāvetvā kattabbaṃ kammaṃ vuccati. Samaggasseva pana saṅghassa anumatiyā ekāya ñattiyā kattabbaṃ kammaṃ ñattikammaṃ nāma. Ekāya ñattiyā ceva anussāvanāya ca kattabbaṃ kammaṃ ñattidutiyakammaṃ nāma. Ekāya pana ñattiyā tīhi ca anussāvanāhi kattabbaṃ kammaṃ ñatticatutthakammaṃ nāma.
தேஸு அபலோகனகம்மங் (பரி॰ 496; பரி॰ அட்ட²॰ 495-496) பஞ்ச டா²னானி க³ச்ச²தி ஓஸாரணங் நிஸ்ஸாரணங் ப⁴ண்டு³கம்மங் ப்³ரஹ்மத³ண்ட³ங் கம்மலக்க²ணந்தி. தத்த² கண்டகஸாமணேரஸ்ஸ நாஸனா விய நிஸ்ஸாரணா, தாதி³ஸங்யேவ ஸம்மாவத்தந்தங் தி³ஸ்வா பவேஸனா ‘ஓஸாரணா’தி வேதி³தப்³பா³. பப்³ப³ஜ்ஜாபெக்க²ஸ்ஸ கேஸச்சே²த³னாபுச்ச²னங் ப⁴ண்டு³கம்மங் (மஹாவ॰ 98) நாம. முக²ரஸ்ஸ பி⁴க்கு²னோ பி⁴க்கூ² து³ருத்தவசனேஹி க⁴ட்டெந்தஸ்ஸ ‘‘இத்த²ன்னாமோ பி⁴க்கு² முக²ரோ பி⁴க்கூ² து³ருத்தவசனேஹி க⁴ட்டெந்தோ விஹரதி, ஸோ பி⁴க்கு² யங் இச்செ²ய்ய, தங் வதெ³ய்ய, பி⁴க்கூ²ஹி இத்த²ன்னாமோ பி⁴க்கு² நேவ வத்தப்³போ³, ந ஓவாதா³னுஸாஸனிங் கத்தப்³போ³, ந ஓவதி³தப்³போ³’’தி ‘‘ஸங்க⁴ங், ப⁴ந்தே , புச்சா²மி ‘இத்த²ன்னாமஸ்ஸ பி⁴க்கு²னோ ப்³ரஹ்மத³ண்ட³ஸ்ஸ தா³னங் ருச்சதி ஸங்க⁴ஸ்ஸா’தி, து³தியம்பி புச்சா²மி, ததியம்பி புச்சா²மி ‘இத்த²ன்னாமஸ்ஸ, ப⁴ந்தே, பி⁴க்கு²னோ ப்³ரஹ்மத³ண்ட³ஸ்ஸ தா³னங் ருச்சதி ஸங்க⁴ஸ்ஸா’’’தி ஏவங் கத்தப்³ப³ங் கம்மங் ப்³ரஹ்மத³ண்ட³ங் (சூளவ॰ 445) நாம. யங் பன ப⁴க³வதா பி⁴க்கு²னீனங் ஊருங் விவரித்வா த³ஸ்ஸனாதி³வத்தூ²ஸு ‘‘அவந்தி³யோ ஸோ, பி⁴க்க²வே, பி⁴க்கு² பி⁴க்கு²னிஸங்கே⁴ன காதப்³போ³’’தி (சூளவ॰ 411) ஏவங் அவந்தி³யகம்மங் அனுஞ்ஞாதங், யங் பி⁴க்கு²னீஹி ‘‘அய்யே, அஸுகோ நாம அய்யோ பி⁴க்கு²னீனங் அப்பஸாத³னீயங் த³ஸ்ஸேதி, ஏதஸ்ஸ அய்யஸ்ஸ அவந்தி³யகரணங் ‘ருச்சதி பி⁴க்கு²னிஸங்க⁴ஸ்ஸா’’’தி ஏவங் உபஸ்ஸயே நிஸின்னாஹேவ பி⁴க்கு²னீஹி கத்தப்³ப³ங், ஏவரூபங் கம்மங் யஸ்மா தஸ்ஸ கம்மங்யேவ லக்க²ணங் ந ஓஸாரணாதீ³னி, தஸ்மா கம்மலக்க²ணந்தி வுச்சதி. இத³ஞ்ச கம்மலக்க²ணங் நாம பி⁴க்கு²னிமூலகங் பஞ்ஞத்தங், அபிச பி⁴க்கூ²னம்பி லப்³ப⁴தி, தஸ்மா பி⁴க்கூ²ஹிபி அச்சி²ன்னசீவரகாதீ³னங் சீவராதீ³னி வா தெ³ந்தேஹி, பரிபு⁴ஞ்ஜிதப்³பா³னி அபனேதப்³பா³னிபி வத்தூ²னி பரிபு⁴ஞ்ஜந்தேஹி வா, அபனெந்தேஹி வா, ததா²ரூபங் வா த⁴ம்மிகங் கதிகங் கரொந்தேஹி திக்க²த்துங் ஸாவெத்வா அபலோகனகம்மங் காதப்³ப³ங், ஸப்³ப³ஞ்ஹேதங் கம்மலக்க²ணமேவ பவிஸதி, இதி அபலோகனகம்மங் பஞ்ச டா²னானி க³ச்ச²தி.
Tesu apalokanakammaṃ (pari. 496; pari. aṭṭha. 495-496) pañca ṭhānāni gacchati osāraṇaṃ nissāraṇaṃ bhaṇḍukammaṃ brahmadaṇḍaṃ kammalakkhaṇanti. Tattha kaṇṭakasāmaṇerassa nāsanā viya nissāraṇā, tādisaṃyeva sammāvattantaṃ disvā pavesanā ‘osāraṇā’ti veditabbā. Pabbajjāpekkhassa kesacchedanāpucchanaṃ bhaṇḍukammaṃ (mahāva. 98) nāma. Mukharassa bhikkhuno bhikkhū duruttavacanehi ghaṭṭentassa ‘‘itthannāmo bhikkhu mukharo bhikkhū duruttavacanehi ghaṭṭento viharati, so bhikkhu yaṃ iccheyya, taṃ vadeyya, bhikkhūhi itthannāmo bhikkhu neva vattabbo, na ovādānusāsaniṃ kattabbo, na ovaditabbo’’ti ‘‘saṅghaṃ, bhante , pucchāmi ‘itthannāmassa bhikkhuno brahmadaṇḍassa dānaṃ ruccati saṅghassā’ti, dutiyampi pucchāmi, tatiyampi pucchāmi ‘itthannāmassa, bhante, bhikkhuno brahmadaṇḍassa dānaṃ ruccati saṅghassā’’’ti evaṃ kattabbaṃ kammaṃ brahmadaṇḍaṃ (cūḷava. 445) nāma. Yaṃ pana bhagavatā bhikkhunīnaṃ ūruṃ vivaritvā dassanādivatthūsu ‘‘avandiyo so, bhikkhave, bhikkhu bhikkhunisaṅghena kātabbo’’ti (cūḷava. 411) evaṃ avandiyakammaṃ anuññātaṃ, yaṃ bhikkhunīhi ‘‘ayye, asuko nāma ayyo bhikkhunīnaṃ appasādanīyaṃ dasseti, etassa ayyassa avandiyakaraṇaṃ ‘ruccati bhikkhunisaṅghassā’’’ti evaṃ upassaye nisinnāheva bhikkhunīhi kattabbaṃ, evarūpaṃ kammaṃ yasmā tassa kammaṃyeva lakkhaṇaṃ na osāraṇādīni, tasmā kammalakkhaṇanti vuccati. Idañca kammalakkhaṇaṃ nāma bhikkhunimūlakaṃ paññattaṃ, apica bhikkhūnampi labbhati, tasmā bhikkhūhipi acchinnacīvarakādīnaṃ cīvarādīni vā dentehi, paribhuñjitabbāni apanetabbānipi vatthūni paribhuñjantehi vā, apanentehi vā, tathārūpaṃ vā dhammikaṃ katikaṃ karontehi tikkhattuṃ sāvetvā apalokanakammaṃ kātabbaṃ, sabbañhetaṃ kammalakkhaṇameva pavisati, iti apalokanakammaṃ pañca ṭhānāni gacchati.
ஞத்திகம்மங் பன நவ டா²னானி க³ச்ச²தி ஓஸாரணங் நிஸ்ஸாரணங் உபோஸத²ங் பவாரணங் ஸம்முதிங் தா³னங் படிக்³க³ஹங் பச்சுக்கட்³ட⁴னங் கம்மலக்க²ணந்தி. தத்த² ‘‘ஸுணாது மே, ப⁴ந்தே, ஸங்கோ⁴, இத்த²ன்னாமோ இத்த²ன்னாமஸ்ஸ ஆயஸ்மதோ உபஸம்பதா³பெக்கோ², அனுஸிட்டோ² ஸோ மயா, யதி³ ஸங்க⁴ஸ்ஸ பத்தகல்லங், இத்த²ன்னாமோ ஆக³ச்செ²ய்ய , ‘ஆக³ச்சா²ஹீ’தி வத்தப்³போ³’’தி (மஹாவ॰ 126) ஏவங் உபஸம்பதா³பெக்க²ஸ்ஸ ஓஸாரணா ஓஸாரணா நாம. ‘‘ஸுணந்து மே ஆயஸ்மந்தா, அயங் இத்த²ன்னாமோ பி⁴க்கு² த⁴ம்மகதி²கோ, இமஸ்ஸ நேவ ஸுத்தங் ஆக³ச்ச²தி, நோ ஸுத்தவிப⁴ங்கோ³, ஸோ அத்த²ங் அஸல்லக்கெ²த்வா ப்³யஞ்ஜனச்சா²யாய அத்த²ங் படிபா³ஹதி, யதா³யஸ்மந்தானங் பத்தகல்லங், இத்த²ன்னாமங் பி⁴க்கு²ங் வுட்டா²பெத்வா அவஸேஸா இமங் அதி⁴கரணங் வூபஸமெய்யாமா’’தி ஏவங் உப்³பா⁴ஹிகவினிச்ச²யே (சூளவ॰ 233) த⁴ம்மகதி²கஸ்ஸ பி⁴க்கு²னோ நிஸ்ஸாரணா நிஸ்ஸாரணா நாம. ‘‘ஸுணாது மே, ப⁴ந்தே, ஸங்கோ⁴, அஜ்ஜுபோஸதோ²…பே॰… உபோஸத²ங் கரெய்யா’’தி ஏவங் உபோஸத²கம்மவஸேன ட²பிதா ஞத்தி உபோஸதோ² நாம. ‘‘ஸுணாது மே, ப⁴ந்தே, ஸங்கோ⁴, அஜ்ஜ பவாரணா பன்னரஸீ, யதி³ ஸங்க⁴ஸ்ஸ பத்தகல்லங், ஸங்கோ⁴ பவாரெய்யா’’தி (மஹாவ॰ 210) ஏவங் பவாரணாகம்மவஸேன ட²பிதா ஞத்தி பவாரணா நாம. ‘‘ஸுணாது மே, ப⁴ந்தே, ஸங்கோ⁴, இத்த²ன்னாமோ இத்த²ன்னாமஸ்ஸ உபஸம்பதா³பெக்கோ², யதி³ ஸங்க⁴ஸ்ஸ பத்தகல்லங், அஹங் இத்த²ன்னாமங் அனுஸாஸெய்ய’’ந்தி, ‘‘யதி³ ஸங்க⁴ஸ்ஸ பத்தகல்லங், இத்த²ன்னாமோ இத்த²ன்னாமங் அனுஸாஸெய்யா’’தி (மஹாவ॰ 126) ஏவங் அத்தானங் வா பரங் வா ஸம்மன்னிதுங் ட²பிதா ஞத்தி ஸம்முதி நாம. ‘‘ஸுணாது மே, ப⁴ந்தே, ஸங்கோ⁴, இமங் சீவரங் இத்த²ன்னாமஸ்ஸ பி⁴க்கு²னோ நிஸ்ஸக்³கி³யங் ஸங்க⁴ஸ்ஸ நிஸ்ஸட்ட²ங், யதி³ ஸங்க⁴ஸ்ஸ பத்தகல்லங், ஸங்கோ⁴ இமங் சீவரங் இத்த²ன்னாமஸ்ஸ பி⁴க்கு²னோ த³தெ³ய்யா’’தி (பாரா॰ 464) ஏவங் நிஸ்ஸட்ட²சீவரபத்தாதீ³னங் தா³னங் தா³னங் நாம. ‘‘ஸுணாது மே, ப⁴ந்தே, ஸங்கோ⁴, அயங் இத்த²ன்னாமோ பி⁴க்கு² ஆபத்திங் ஸரதி விவரதி உத்தானிங் கரோதி தே³ஸேதி, யதி³ ஸங்க⁴ஸ்ஸ பத்தகல்லங், அஹங் இத்த²ன்னாமஸ்ஸ பி⁴க்கு²னோ ஆபத்திங் படிக்³க³ண்ஹெய்ய’’ந்தி, தேன வத்தப்³போ³ ‘பஸ்ஸஸீ’தி, ‘ஆம, பஸ்ஸாமீ’தி, ‘‘ஆயதிங் ஸங்வரெய்யாஸீ’’தி (சூளவ॰ 239) ஏவங் ஆபத்திப்படிக்³க³ஹோ படிக்³க³ஹோ நாம. ‘‘ஸுணந்து மே ஆயஸ்மந்தா ஆவாஸிகா, யதா³யஸ்மந்தானங் பத்தகல்லங், இதா³னி உபோஸத²ங் கரெய்யாம, பாதிமொக்க²ங் உத்³தி³ஸெய்யாம, ஆக³மே காலே பவாரெய்யாமா’’தி (மஹாவ॰ 240) ஏவங் கதப்பவாரணப்பச்சுக்கட்³ட⁴னா பச்சுக்கட்³ட⁴னா நாம. திணவத்தாரகஸமதே² (சூளவ॰ 212) ஸப்³ப³ஸங்கா³ஹிகஞத்தி, ஏகேகஸ்மிங் பக்கே² ஏகேகா ஞத்தி சாதி திஸ்ஸோபி ஞத்தியோ கம்மலக்க²ணங் நாம. இதி ஞத்திகம்மங் நவ டா²னானி க³ச்ச²தி.
Ñattikammaṃ pana nava ṭhānāni gacchati osāraṇaṃ nissāraṇaṃ uposathaṃ pavāraṇaṃ sammutiṃ dānaṃ paṭiggahaṃ paccukkaḍḍhanaṃ kammalakkhaṇanti. Tattha ‘‘suṇātu me, bhante, saṅgho, itthannāmo itthannāmassa āyasmato upasampadāpekkho, anusiṭṭho so mayā, yadi saṅghassa pattakallaṃ, itthannāmo āgaccheyya , ‘āgacchāhī’ti vattabbo’’ti (mahāva. 126) evaṃ upasampadāpekkhassa osāraṇā osāraṇā nāma. ‘‘Suṇantu me āyasmantā, ayaṃ itthannāmo bhikkhu dhammakathiko, imassa neva suttaṃ āgacchati, no suttavibhaṅgo, so atthaṃ asallakkhetvā byañjanacchāyāya atthaṃ paṭibāhati, yadāyasmantānaṃ pattakallaṃ, itthannāmaṃ bhikkhuṃ vuṭṭhāpetvā avasesā imaṃ adhikaraṇaṃ vūpasameyyāmā’’ti evaṃ ubbhāhikavinicchaye (cūḷava. 233) dhammakathikassa bhikkhuno nissāraṇā nissāraṇā nāma. ‘‘Suṇātu me, bhante, saṅgho, ajjuposatho…pe… uposathaṃ kareyyā’’ti evaṃ uposathakammavasena ṭhapitā ñatti uposatho nāma. ‘‘Suṇātu me, bhante, saṅgho, ajja pavāraṇā pannarasī, yadi saṅghassa pattakallaṃ, saṅgho pavāreyyā’’ti (mahāva. 210) evaṃ pavāraṇākammavasena ṭhapitā ñatti pavāraṇā nāma. ‘‘Suṇātu me, bhante, saṅgho, itthannāmo itthannāmassa upasampadāpekkho, yadi saṅghassa pattakallaṃ, ahaṃ itthannāmaṃ anusāseyya’’nti, ‘‘yadi saṅghassa pattakallaṃ, itthannāmo itthannāmaṃ anusāseyyā’’ti (mahāva. 126) evaṃ attānaṃ vā paraṃ vā sammannituṃ ṭhapitā ñatti sammuti nāma. ‘‘Suṇātu me, bhante, saṅgho, imaṃ cīvaraṃ itthannāmassa bhikkhuno nissaggiyaṃ saṅghassa nissaṭṭhaṃ, yadi saṅghassa pattakallaṃ, saṅgho imaṃ cīvaraṃ itthannāmassa bhikkhuno dadeyyā’’ti (pārā. 464) evaṃ nissaṭṭhacīvarapattādīnaṃ dānaṃ dānaṃ nāma. ‘‘Suṇātu me, bhante, saṅgho, ayaṃ itthannāmo bhikkhu āpattiṃ sarati vivarati uttāniṃ karoti deseti, yadi saṅghassa pattakallaṃ, ahaṃ itthannāmassa bhikkhuno āpattiṃ paṭiggaṇheyya’’nti, tena vattabbo ‘passasī’ti, ‘āma, passāmī’ti, ‘‘āyatiṃ saṃvareyyāsī’’ti (cūḷava. 239) evaṃ āpattippaṭiggaho paṭiggaho nāma. ‘‘Suṇantu me āyasmantā āvāsikā, yadāyasmantānaṃ pattakallaṃ, idāni uposathaṃ kareyyāma, pātimokkhaṃ uddiseyyāma, āgame kāle pavāreyyāmā’’ti (mahāva. 240) evaṃ katappavāraṇappaccukkaḍḍhanā paccukkaḍḍhanā nāma. Tiṇavattārakasamathe (cūḷava. 212) sabbasaṅgāhikañatti, ekekasmiṃ pakkhe ekekā ñatti cāti tissopi ñattiyo kammalakkhaṇaṃ nāma. Iti ñattikammaṃ nava ṭhānāni gacchati.
ஞத்திது³தியகம்மங் ஸத்த டா²னானி க³ச்ச²தி ஓஸாரணங் நிஸ்ஸாரணங் ஸம்முதிங் தா³னங் உத்³தா⁴ரங் தே³ஸனங் கம்மலக்க²ணந்தி. தத்த² பி⁴க்கூ²னங் அலாபா⁴ய பரிஸக்கனாதி³கேஹி அட்ட²ஹி அங்கே³ஹி ஸமன்னாக³தஸ்ஸ உபாஸகஸ்ஸ ஸங்கே⁴ன அஸம்போ⁴க³கரணத்த²ங் பத்தனிக்குஜ்ஜனவஸேன நிஸ்ஸாரணா நிஸ்ஸாரணா நாம. தஸ்ஸேவ ஸம்மாவத்தந்தஸ்ஸ பத்துக்குஜ்ஜனவஸேன ஓஸாரணா ச வேதி³தப்³பா³, ஸா கு²த்³த³கக்க²ந்த⁴கே வட்³ட⁴லிச்ச²விவத்து²ஸ்மிங் (சூளவ॰ 265-266) வுத்தா. ஸீமாஸம்முதி திசீவரேன அவிப்பவாஸஸம்முதிஸந்த²தஸம்முதிப⁴த்துத்³தே³ஸகஸேனாஸனக்³கா³ஹாபகப⁴ண்டா³கா³ரிகசீவரப்படிக்³கா³ஹகயாகு³பா⁴ஜகப²லபா⁴ஜகக²ஜ்ஜபா⁴ஜகஅப்பமத்தகவிஸ்ஸஜ்ஜகஸாடியக்³கா³ஹபகபத்தக்³கா³ஹாபகஆராமிகபேஸகஸாமணேரபேஸகஸம்முதீதி ஏதாஸங் ஸம்முதீனங் வஸேன ஸம்முதி வேதி³தப்³பா³. கதி²னசீவரமதகசீவரதா³னவஸேன தா³னங் வேதி³தப்³ப³ங். கதி²னுத்³தா⁴ரவஸேன உத்³தா⁴ரோ வேதி³தப்³போ³. குடிவத்து²விஹாரவத்து²தே³ஸனாவஸேன தே³ஸனா வேதி³தப்³பா³. யா பன திணவத்தா²ரகஸமதே² (சூளவ॰ 212 ஆத³யோ) ஏகஸ்மிங் பக்கே² ஏகா, ஏகஸ்மிங் பக்கே² ஏகாதி த்³வே ஞத்திது³தியகம்மவாசா வுத்தா, யா ச மோஹாரோபனாதீ³ஸு கம்மவாசா (பாசி॰ 446) வுத்தா, தாஸங் வஸேன கம்மலக்க²ணங் வேதி³தப்³ப³ங், இதி ஞத்திது³தியகம்மங் ஸத்த டா²னானி க³ச்ச²தி.
Ñattidutiyakammaṃ satta ṭhānāni gacchati osāraṇaṃ nissāraṇaṃ sammutiṃ dānaṃ uddhāraṃ desanaṃ kammalakkhaṇanti. Tattha bhikkhūnaṃ alābhāya parisakkanādikehi aṭṭhahi aṅgehi samannāgatassa upāsakassa saṅghena asambhogakaraṇatthaṃ pattanikkujjanavasena nissāraṇā nissāraṇā nāma. Tasseva sammāvattantassa pattukkujjanavasena osāraṇā ca veditabbā, sā khuddakakkhandhake vaḍḍhalicchavivatthusmiṃ (cūḷava. 265-266) vuttā. Sīmāsammuti ticīvarena avippavāsasammutisanthatasammutibhattuddesakasenāsanaggāhāpakabhaṇḍāgārikacīvarappaṭiggāhakayāgubhājakaphalabhājakakhajjabhājakaappamattakavissajjakasāṭiyaggāhapakapattaggāhāpakaārāmikapesakasāmaṇerapesakasammutīti etāsaṃ sammutīnaṃ vasena sammuti veditabbā. Kathinacīvaramatakacīvaradānavasena dānaṃ veditabbaṃ. Kathinuddhāravasena uddhāro veditabbo. Kuṭivatthuvihāravatthudesanāvasena desanā veditabbā. Yā pana tiṇavatthārakasamathe (cūḷava. 212 ādayo) ekasmiṃ pakkhe ekā, ekasmiṃ pakkhe ekāti dve ñattidutiyakammavācā vuttā, yā ca mohāropanādīsu kammavācā (pāci. 446) vuttā, tāsaṃ vasena kammalakkhaṇaṃ veditabbaṃ, iti ñattidutiyakammaṃ satta ṭhānāni gacchati.
ஞத்திசதுத்த²கம்மம்பி ஸத்தேவ டா²னானி க³ச்ச²தி ஓஸாரணங் நிஸ்ஸாரணங் ஸம்முதிங் தா³னங் நிக்³க³ஹங் ஸமனுபா⁴ஸனங் கம்மலக்க²ணந்தி. தத்த² தஜ்ஜனீயகம்மாதீ³னங் (சூளவ॰ 1 ஆத³யோ) ஸத்தன்னங் கம்மானங் வஸேன நிஸ்ஸாரணா, தேஸங்யேவ கம்மானங் படிப்பஸ்ஸம்ப⁴னவஸேன ஓஸாரணா ச வேதி³தப்³பா³, பி⁴க்கு²னோவாத³கஸம்முதிவஸேன (பாசி॰ 146-147) ஸம்முதி, பரிவாஸதா³ன(சஊளவ॰ 102) மானத்ததா³னவஸேன (சூளவ॰ 105) தா³னங், மூலாயபடிகஸ்ஸனவஸேன (சூளவ॰ 110) நிக்³க³ஹோ, உக்கி²த்தானுவத்திகா , அட்ட² யாவததியகா, அரிட்டோ² (பாசி॰ 417), சண்ட³காளீ (பாசி॰ 709) சாதி இமே தே யாவததியகாதி இமாஸங் ஏகாத³ஸன்னங் ஸமனுபா⁴ஸனானங் வஸேன ஸமனுபா⁴ஸனா, உபஸம்பதா³கம்மஅப்³பா⁴னகம்மவஸேன கம்மலக்க²ணங் வேதி³தப்³ப³ங். இதி ஞத்திசதுத்த²கம்மங் ஸத்த டா²னானி க³ச்ச²தி.
Ñatticatutthakammampi satteva ṭhānāni gacchati osāraṇaṃ nissāraṇaṃ sammutiṃ dānaṃ niggahaṃ samanubhāsanaṃ kammalakkhaṇanti. Tattha tajjanīyakammādīnaṃ (cūḷava. 1 ādayo) sattannaṃ kammānaṃ vasena nissāraṇā, tesaṃyeva kammānaṃ paṭippassambhanavasena osāraṇā ca veditabbā, bhikkhunovādakasammutivasena (pāci. 146-147) sammuti, parivāsadāna(caūḷava. 102) mānattadānavasena (cūḷava. 105) dānaṃ, mūlāyapaṭikassanavasena (cūḷava. 110) niggaho, ukkhittānuvattikā , aṭṭha yāvatatiyakā, ariṭṭho (pāci. 417), caṇḍakāḷī (pāci. 709) cāti ime te yāvatatiyakāti imāsaṃ ekādasannaṃ samanubhāsanānaṃ vasena samanubhāsanā, upasampadākammaabbhānakammavasena kammalakkhaṇaṃ veditabbaṃ. Iti ñatticatutthakammaṃ satta ṭhānāni gacchati.
இமேஸு பன சதூஸு கம்மேஸு அபலோகனகம்மங் அபலோகெத்வாவ காதப்³ப³ங், ஞத்திகம்மாதி³வஸேன ந காதப்³ப³ங். ஞத்திகம்மம்பி ஏகங் ஞத்திங் ட²பெத்வாவ காதப்³ப³ங், அபலோகனகம்மாதி³வஸேன ந காதப்³ப³ங். ஞத்திது³தியகம்மங் பன அபலோகெத்வா காதப்³ப³ம்பி அத்தி² அகாதப்³ப³ம்பி, தத்த² ஸீமாஸம்முதி ஸீமாஸமூஹனநங் (மஹாவ॰ 139-140, 144 ஆத³யோ) கதி²னசீவரதா³னங் கதி²னுத்³தா⁴ரோ குடிவத்து²தே³ஸனா விஹாரவத்து²தே³ஸனாதி இமானி ச² கம்மானி க³ருகானி அபலோகெத்வா காதுங் ந வட்டந்தி, ஞத்திது³தியகம்மவாசங் ஸாவெத்வாவ காதப்³பா³னி. அவஸேஸா தேரஸ ஸம்முதியோ ஸேனாஸனக்³கா³ஹாபகமதகசீவரதா³னஸம்முதியோ சாதி ஏதானி லஹுகம்மானி அபலோகெத்வாபி காதுங் வட்டந்தி, ஞத்திகம்மாதி³வஸேன பன ந காதப்³பா³னேவ. ஞத்திசதுத்த²கம்மம்பி ஸகலக்க²ணேனேவ காதப்³ப³ங், ந ஸேஸகம்மவஸேன. ஏவங் அத்தனோ அத்தனோ லக்க²ணேனேவ வத்து²ஞத்திஅனுஸ்ஸாவனாஸீமாபரிஸாஸம்பத்தியா கதானி ஏதானி கம்மானி த⁴ம்மேன வினயேன ஸத்து²ஸாஸனேன கதத்தா த⁴ம்மோ ஏதேஸு அத்தீ²தி த⁴ம்மிகானி நாம ஹொந்தி, இதி ஏதேஸங் த⁴ம்மிகானங் கம்மானங் ச²ந்த³ங் த³த்வா பச்சா² கீ²யனத⁴ம்மங் ஆபஜ்ஜந்தஸ்ஸ வாசாய வாசாய பாசித்தியங்.
Imesu pana catūsu kammesu apalokanakammaṃ apaloketvāva kātabbaṃ, ñattikammādivasena na kātabbaṃ. Ñattikammampi ekaṃ ñattiṃ ṭhapetvāva kātabbaṃ, apalokanakammādivasena na kātabbaṃ. Ñattidutiyakammaṃ pana apaloketvā kātabbampi atthi akātabbampi, tattha sīmāsammuti sīmāsamūhananaṃ (mahāva. 139-140, 144 ādayo) kathinacīvaradānaṃ kathinuddhāro kuṭivatthudesanā vihāravatthudesanāti imāni cha kammāni garukāni apaloketvā kātuṃ na vaṭṭanti, ñattidutiyakammavācaṃ sāvetvāva kātabbāni. Avasesā terasa sammutiyo senāsanaggāhāpakamatakacīvaradānasammutiyo cāti etāni lahukammāni apaloketvāpi kātuṃ vaṭṭanti, ñattikammādivasena pana na kātabbāneva. Ñatticatutthakammampi sakalakkhaṇeneva kātabbaṃ, na sesakammavasena. Evaṃ attano attano lakkhaṇeneva vatthuñattianussāvanāsīmāparisāsampattiyā katāni etāni kammāni dhammena vinayena satthusāsanena katattā dhammo etesu atthīti dhammikāni nāma honti, iti etesaṃ dhammikānaṃ kammānaṃ chandaṃ datvā pacchā khīyanadhammaṃ āpajjantassa vācāya vācāya pācittiyaṃ.
ஸாவத்தி²யங் ச²ப்³ப³க்³கி³யே ஆரப்³ப⁴ கீ²யனத⁴ம்மாபஜ்ஜனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், த⁴ம்மகம்மே வேமதிகஸ்ஸ, அத⁴ம்மகம்மே த⁴ம்மகம்மஸஞ்ஞினோ, வேமதிகஸ்ஸ ச து³க்கடங். அத⁴ம்மகம்மஸஞ்ஞிஸ்ஸ , ‘‘அத⁴ம்மேன வா வக்³கே³ன வா நகம்மாரஹஸ்ஸ வா கம்மங் கரொந்தீ’’தி ஞத்வா கீ²யந்தஸ்ஸ, உம்மத்தகாதீ³னஞ்ச அனாபத்தி. த⁴ம்மகம்மதா, த⁴ம்மகம்மஸஞ்ஞிதா, ச²ந்த³ங் த³த்வா கீ²யனந்தி இமானெத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானேவ, இத³ங் பன து³க்க²வேத³னந்தி.
Sāvatthiyaṃ chabbaggiye ārabbha khīyanadhammāpajjanavatthusmiṃ paññattaṃ, sādhāraṇapaññatti, anāṇattikaṃ, dhammakamme vematikassa, adhammakamme dhammakammasaññino, vematikassa ca dukkaṭaṃ. Adhammakammasaññissa , ‘‘adhammena vā vaggena vā nakammārahassa vā kammaṃ karontī’’ti ñatvā khīyantassa, ummattakādīnañca anāpatti. Dhammakammatā, dhammakammasaññitā, chandaṃ datvā khīyananti imānettha tīṇi aṅgāni. Samuṭṭhānādīni adinnādānasadisāneva, idaṃ pana dukkhavedananti.
கம்மப்படிபா³ஹனஸிக்கா²பத³வண்ணனா நிட்டி²தா.
Kammappaṭibāhanasikkhāpadavaṇṇanā niṭṭhitā.
10. ச²ந்த³ங்அத³த்வாக³மனஸிக்கா²பத³வண்ணனா
10. Chandaṃadatvāgamanasikkhāpadavaṇṇanā
த³ஸமே வினிச்ச²யகதா²யாதி யாவ ஆரோசிதங் வத்து² அவினிச்சி²கங், ஞத்திங் வா ட²பெத்வா கம்மவாசா அனிட்டா²பிதா, தாவ வினிச்ச²யகதா² வத்தமானா நாம ஹோதி. யோ பி⁴க்கு² ஏதஸ்மிங் அந்தரே கம்மங் கோபேதுகாமதாய பரிஸாய ஹத்த²பாஸங் விஜஹதி, தஸ்ஸ விஜஹனே து³க்கடங், விஜஹிதே பாசித்தியங்.
Dasame vinicchayakathāyāti yāva ārocitaṃ vatthu avinicchikaṃ, ñattiṃ vā ṭhapetvā kammavācā aniṭṭhāpitā, tāva vinicchayakathā vattamānā nāma hoti. Yo bhikkhu etasmiṃ antare kammaṃ kopetukāmatāya parisāya hatthapāsaṃ vijahati, tassa vijahane dukkaṭaṃ, vijahite pācittiyaṃ.
ஸாவத்தி²யங் அஞ்ஞதரங் பி⁴க்கு²ங் ஆரப்³ப⁴ ச²ந்த³ங் அத³த்வா பக்கமனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், த⁴ம்மகம்மே வேமதிகஸ்ஸ, அத⁴ம்மகம்மே த⁴ம்மகம்மஸஞ்ஞினோ, வேமதிகஸ்ஸ ச து³க்கடங். அத⁴ம்மகம்மஸஞ்ஞிஸ்ஸ பன, யோ ச ‘‘ஸங்க⁴ஸ்ஸ ப⁴ண்ட³னாதீ³னி வா ப⁴விஸ்ஸந்தி, அத⁴ம்மேன வா வக்³கே³ன வா நகம்மாரஹஸ்ஸ வா கம்மங் கரிஸ்ஸந்தீ’’தி (பாசி॰ 483) ஞத்வா, கி³லானோ வா ஹுத்வா, கி³லானஸ்ஸ வா கரணீயேன, உச்சாராதீ³ஹி வா பீளிதோ, ந ச கம்மங் கோபேதுகாமோ ‘‘புன பச்சாக³மிஸ்ஸாமீ’’தி க³ச்ச²தி, தஸ்ஸ, உம்மத்தகாதீ³னஞ்ச அனாபத்தி. வினிச்ச²யகதா²ய வத்தமானதா, த⁴ம்மகம்மதா, த⁴ம்மகம்மஸஞ்ஞிதா, ஸமானஸீமாயங் டி²ததா, ஸமானஸங்வாஸகதா, கோபேதுகாமதாய ஹத்த²பாஸவிஜஹனந்தி இமானெத்த² ச² அங்கா³னி. ஸமனுபா⁴ஸனஸமுட்டா²னங், கிரியாகிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
Sāvatthiyaṃ aññataraṃ bhikkhuṃ ārabbha chandaṃ adatvā pakkamanavatthusmiṃ paññattaṃ, sādhāraṇapaññatti, anāṇattikaṃ, dhammakamme vematikassa, adhammakamme dhammakammasaññino, vematikassa ca dukkaṭaṃ. Adhammakammasaññissa pana, yo ca ‘‘saṅghassa bhaṇḍanādīni vā bhavissanti, adhammena vā vaggena vā nakammārahassa vā kammaṃ karissantī’’ti (pāci. 483) ñatvā, gilāno vā hutvā, gilānassa vā karaṇīyena, uccārādīhi vā pīḷito, na ca kammaṃ kopetukāmo ‘‘puna paccāgamissāmī’’ti gacchati, tassa, ummattakādīnañca anāpatti. Vinicchayakathāya vattamānatā, dhammakammatā, dhammakammasaññitā, samānasīmāyaṃ ṭhitatā, samānasaṃvāsakatā, kopetukāmatāya hatthapāsavijahananti imānettha cha aṅgāni. Samanubhāsanasamuṭṭhānaṃ, kiriyākiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
ச²ந்த³ங்அத³த்வாக³மனஸிக்கா²பத³வண்ணனா நிட்டி²தா.
Chandaṃadatvāgamanasikkhāpadavaṇṇanā niṭṭhitā.
11. து³ப்³ப³லஸிக்கா²பத³வண்ணனா
11. Dubbalasikkhāpadavaṇṇanā
ஏகாத³ஸமே ஸமக்³கே³ன ஸங்கே⁴னாதி ஸமானஸங்வாஸகேன ஸமானஸீமாயங் டி²தேன ஸங்கே⁴ன ஸத்³தி⁴ங் சீவரங் த³த்வா. யதா²ஸந்து²தந்தி யோ யோ மித்தஸந்தி³ட்ட²ஸம்ப⁴த்தவஸேன ஸந்து²தோ, தஸ்ஸ தஸ்ஸாதி அத்தோ². பாசித்தியந்தி ஏவங் ஸங்கே⁴ன ஸத்³தி⁴ங் ஸயமேவ ஸேனாஸனபஞ்ஞாபனாதி³வஸேன ஸம்மதஸ்ஸ பி⁴க்கு²னோ சீவரங் த³த்வா பச்சா² கீ²யந்தஸ்ஸ வாசாய வாசாய பாசித்தியங்.
Ekādasame samaggena saṅghenāti samānasaṃvāsakena samānasīmāyaṃ ṭhitena saṅghena saddhiṃ cīvaraṃ datvā. Yathāsanthutanti yo yo mittasandiṭṭhasambhattavasena santhuto, tassa tassāti attho. Pācittiyanti evaṃ saṅghena saddhiṃ sayameva senāsanapaññāpanādivasena sammatassa bhikkhuno cīvaraṃ datvā pacchā khīyantassa vācāya vācāya pācittiyaṃ.
ராஜக³ஹே ச²ப்³ப³க்³கி³யே ஆரப்³ப⁴ சீவரங் த³த்வா பச்சா² கீ²யனவத்து²ஸ்மிங் பஞ்ஞத்தங், ஸாதா⁴ரணபஞ்ஞத்தி, அனாணத்திகங், த⁴ம்மகம்மே திகபாசித்தியங், சீவரங் ட²பெத்வா அஞ்ஞங் விஸ்ஸஜ்ஜியவேப⁴ங்கி³யங் பரிக்கா²ரங் த³த்வா பச்சா²கீ²யந்தஸ்ஸ து³க்கடங், விஸ்ஸஜ்ஜியவேப⁴ங்கி³யோ நாம ட²பெத்வா பஞ்ச க³ருப⁴ண்டா³னி அவஸேஸோ. ராஸிவஸேன ஹி பஞ்ச க³ருப⁴ண்டா³னி வுத்தானி, தத்த² ஆராமோ ஆராமவத்தூ²தி ஏகங், விஹாரோ விஹாரவத்தூ²தி து³தியங், மஞ்சோ பீட²ங் பி⁴ஸி பி³ம்போ³ஹனந்தி ததியங், லோஹகும்பீ⁴ லோஹபா⁴ணகங் லோஹவாரகோ லோஹகடாஹங் வாஸி பரஸு குடா²ரீ குதா³லோ நிகா²த³னந்தி சதுத்த²ங், வல்லி வேளு முஞ்ஜங் பப்³ப³ஜங் திணங் மத்திகா தா³ருப⁴ண்ட³ங் மத்திகாப⁴ண்ட³ந்தி பஞ்சமங். ஏதானி ஹி பஞ்ச ஸங்க⁴ஸந்தகானி நேவ ஸங்க⁴ஸ்ஸ, ந க³ணபுக்³க³லானங் விஸ்ஸஜ்ஜேதுங் வா விப⁴ஜிதுங் வா வட்டந்தி, விஸ்ஸஜ்ஜிதவிப⁴த்தானிபி ஸங்கி⁴கானேவ ஹொந்தி. தா²வரேன பன தா²வரங், இதரேன ச அகப்பியேன மஹக்³க⁴கப்பியேன வா இதரங் ஸங்க⁴ஸ்ஸ உபகாரங் ஸல்லக்கெ²த்வா கப்பியபரிவத்தனேன பரிவத்தேதுங் வட்டதி, வரஸேனாஸனாதீ³னங் ஸங்ரக்க²ணத்த²ங் லாமகானி விஸ்ஸஜ்ஜேதுங் விஸ்ஸஜ்ஜெத்வா பரிபு⁴ஞ்ஜிதுஞ்ச வட்டதி. எத்த² ச புரிமேஸு தீஸு ராஸீஸு அக³ருப⁴ண்ட³ங் நாம கிஞ்சி நத்தி², சதுத்தே² லோஹகும்பீ⁴ அரஞ்ஜரஸண்டா²னங் லோஹபா⁴ணகங் லோஹகடாஹந்தி இமானி தீணி அந்தமஸோ பஸதமத்தஉத³கக்³க³ண்ஹனகானிபி க³ருப⁴ண்டா³னி. லோஹவாரகோ பன காளலோஹதம்ப³லோஹகங்ஸலோஹவட்டலோஹானங் யேன கேனசி கதோ ஸீஹளதீ³பே பாத³க்³க³ண்ஹனகோ பா⁴ஜேதப்³போ³, பாதோ³ ச நாம மக³த⁴னாளியா பஞ்சனாளிமத்தங் க³ண்ஹாதி, ததோ அதிரேகங் க³ருப⁴ண்ட³ங், இமானி தாவ பாளியங் ஆக³தானி லோஹபா⁴ஜனானி.
Rājagahe chabbaggiye ārabbha cīvaraṃ datvā pacchā khīyanavatthusmiṃ paññattaṃ, sādhāraṇapaññatti, anāṇattikaṃ, dhammakamme tikapācittiyaṃ, cīvaraṃ ṭhapetvā aññaṃ vissajjiyavebhaṅgiyaṃ parikkhāraṃ datvā pacchākhīyantassa dukkaṭaṃ, vissajjiyavebhaṅgiyo nāma ṭhapetvā pañca garubhaṇḍāni avaseso. Rāsivasena hi pañca garubhaṇḍāni vuttāni, tattha ārāmo ārāmavatthūti ekaṃ, vihāro vihāravatthūti dutiyaṃ, mañco pīṭhaṃ bhisi bimbohananti tatiyaṃ, lohakumbhī lohabhāṇakaṃ lohavārako lohakaṭāhaṃ vāsi parasu kuṭhārī kudālo nikhādananti catutthaṃ, valli veḷu muñjaṃ pabbajaṃ tiṇaṃ mattikā dārubhaṇḍaṃ mattikābhaṇḍanti pañcamaṃ. Etāni hi pañca saṅghasantakāni neva saṅghassa, na gaṇapuggalānaṃ vissajjetuṃ vā vibhajituṃ vā vaṭṭanti, vissajjitavibhattānipi saṅghikāneva honti. Thāvarena pana thāvaraṃ, itarena ca akappiyena mahagghakappiyena vā itaraṃ saṅghassa upakāraṃ sallakkhetvā kappiyaparivattanena parivattetuṃ vaṭṭati, varasenāsanādīnaṃ saṃrakkhaṇatthaṃ lāmakāni vissajjetuṃ vissajjetvā paribhuñjituñca vaṭṭati. Ettha ca purimesu tīsu rāsīsu agarubhaṇḍaṃ nāma kiñci natthi, catutthe lohakumbhī arañjarasaṇṭhānaṃ lohabhāṇakaṃ lohakaṭāhanti imāni tīṇi antamaso pasatamattaudakaggaṇhanakānipi garubhaṇḍāni. Lohavārako pana kāḷalohatambalohakaṃsalohavaṭṭalohānaṃ yena kenaci kato sīhaḷadīpe pādaggaṇhanako bhājetabbo, pādo ca nāma magadhanāḷiyā pañcanāḷimattaṃ gaṇhāti, tato atirekaṃ garubhaṇḍaṃ, imāni tāva pāḷiyaṃ āgatāni lohabhājanāni.
பாளியங் பன அனாக³தானிபி பி⁴ங்கா³ரபடிக்³க³ஹஉளுங்கத³ப்³பி³கடச்சு²பாதி தட்டகஸரகஸமுக்³க³அங்கா³ரகபல்லதூ⁴மகடச்சு²ஆதீ³னி கு²த்³த³கானிபி க³ருப⁴ண்டா³னேவ, அயபத்தோ அயதா²லகங் தம்ப³லோஹதா²லகந்தி இமானி பன பா⁴ஜனீயானி, கங்ஸலோஹவட்டலோஹபா⁴ஜனவிகதி ஸங்கி⁴கபரிபோ⁴கே³ன வா கி³ஹிவிகடா வா வட்டதி, புக்³க³லிகபரிபோ⁴கே³ன ந வட்டதி. ட²பெத்வா பன தங் பா⁴ஜனவிகதிங் அஞ்ஞஸ்மிம்பி கப்பியலோஹப⁴ண்டே³ அஞ்ஜனீ அஞ்ஜனிஸலாகா நத்து²தா³னங் கண்ணமலஹரணீ ஸூசி கு²த்³த³கோ பிப்ப²லிகோ கு²த்³த³கங் ஆரகண்டகங் குஞ்சிகா தாளங் கத்தரயட்டி² வேத⁴கோ பி⁴ந்தி³வாலகோ யதா²ததா²க⁴னகதலோஹங்விப்பகதலோஹப⁴ண்ட³ஞ்ச ஸப்³ப³ங் பா⁴ஜனீயங். தூ⁴மனெத்தபா²லதீ³பருக்க²தீ³பகபல்லிகஓலம்ப³கதீ³பஇத்தி²புரிஸதிரச்சா²னரூபகானி பன அஞ்ஞானி வா பி⁴த்திச்ச²த³னகவாடாதீ³ஸு உபனேதப்³பா³னி, அந்தமஸோ லோஹகி²லகங் உபாதா³ய ஸப்³பா³னிபி லோஹப⁴ண்டா³னி க³ருப⁴ண்டா³னியேவ, அத்தனா லத்³தா⁴னி பரிஹரித்வாபி புக்³க³லிகபரிபோ⁴கே³ன ந பரிபு⁴ஞ்ஜிதப்³பா³னி, ஸங்கி⁴கபரிபோ⁴கே³ன வா கி³ஹிவிகடானி வா வட்டந்தி, திபுப⁴ண்டே³பி ஏஸேவ நயோ. கீ²ரபாஸாணமயானி தட்டகஸரகாதீ³னி க³ருப⁴ண்டா³னியேவ.
Pāḷiyaṃ pana anāgatānipi bhiṅgārapaṭiggahauḷuṅkadabbikaṭacchupāti taṭṭakasarakasamuggaaṅgārakapalladhūmakaṭacchuādīni khuddakānipi garubhaṇḍāneva, ayapatto ayathālakaṃ tambalohathālakanti imāni pana bhājanīyāni, kaṃsalohavaṭṭalohabhājanavikati saṅghikaparibhogena vā gihivikaṭā vā vaṭṭati, puggalikaparibhogena na vaṭṭati. Ṭhapetvā pana taṃ bhājanavikatiṃ aññasmimpi kappiyalohabhaṇḍe añjanī añjanisalākā natthudānaṃ kaṇṇamalaharaṇī sūci khuddako pipphaliko khuddakaṃ ārakaṇṭakaṃ kuñcikā tāḷaṃ kattarayaṭṭhi vedhako bhindivālako yathātathāghanakatalohaṃvippakatalohabhaṇḍañca sabbaṃ bhājanīyaṃ. Dhūmanettaphāladīparukkhadīpakapallikaolambakadīpaitthipurisatiracchānarūpakāni pana aññāni vā bhitticchadanakavāṭādīsu upanetabbāni, antamaso lohakhilakaṃ upādāya sabbānipi lohabhaṇḍāni garubhaṇḍāniyeva, attanā laddhāni pariharitvāpi puggalikaparibhogena na paribhuñjitabbāni, saṅghikaparibhogena vā gihivikaṭāni vā vaṭṭanti, tipubhaṇḍepi eseva nayo. Khīrapāsāṇamayāni taṭṭakasarakādīni garubhaṇḍāniyeva.
க⁴டகோ பன தேலபா⁴ஜனங் வா பாத³க்³க³ண்ஹனகதோ அதிரேகமேவ க³ருப⁴ண்ட³ங், ஸுவண்ணரஜதஆரகூடஜாதிப²லிகபா⁴ஜனானி கி³ஹிவிகடானிபி ந வட்டந்தி. ஸேனாஸனபரிபோ⁴கே³ பன ஆமாஸம்பி அனாமாஸம்பி ஸப்³ப³ங் வட்டதி.
Ghaṭako pana telabhājanaṃ vā pādaggaṇhanakato atirekameva garubhaṇḍaṃ, suvaṇṇarajataārakūṭajātiphalikabhājanāni gihivikaṭānipi na vaṭṭanti. Senāsanaparibhoge pana āmāsampi anāmāsampi sabbaṃ vaṭṭati.
வாஸியாதீ³ஸு பன யாய வாஸியா த³ந்தகட்ட²ச்சே²த³னஉச்சு²தச்ச²னமத்ததோ அஞ்ஞங் மஹாகம்மங் காதுங் ந ஸக்கா, அயங் பா⁴ஜனீயா. ஸேஸா யேன கேனசி ஆகாரேன கதா க³ருப⁴ண்ட³ங், பரஸு பன அந்தமஸோ வேஜ்ஜானங் ஸிராவேத⁴கோபி க³ருப⁴ண்ட³மேவ, ததா² குடா²ரீ. யா பன ஆவுத⁴ஸங்கே²பேன கதா, அயங் அனாமாஸா, குதா³லோ த³ண்ட³ப³ந்த⁴னிகா²த³னங் வா அக³ருப⁴ண்ட³ங் நாம நத்தி². ஸம்முஞ்ஜனித³ண்ட³க²ணனகங் பன அத³ண்ட³கங் ப²லமத்தகமேவ, யங் ஸக்கா ஸிபாடிகாய பக்கி²பித்வா பரிஹரிதுங், தங் பா⁴ஜனீயங். ஸிக²ரம்பி நிகா²த³னேனேவ ஸங்க³ஹிதங், யேஹி மனுஸ்ஸேஹி விஹாரே வாஸிஆதீ³னி தி³ன்னானி ஹொந்தி, தே சே க⁴ரே த³ட்³டே⁴ வா விலுத்தே வா ‘‘தே³த² நோ, ப⁴ந்தே, உபக்க²ரே, புன ஆஹரிஸ்ஸாமா’’தி வத³ந்தி, தா³தப்³பா³. ஸசே ஹரந்தி, ந வாரேதப்³பா³, அனாஹரந்தாபி ந சோதே³தப்³பா³.
Vāsiyādīsu pana yāya vāsiyā dantakaṭṭhacchedanaucchutacchanamattato aññaṃ mahākammaṃ kātuṃ na sakkā, ayaṃ bhājanīyā. Sesā yena kenaci ākārena katā garubhaṇḍaṃ, parasu pana antamaso vejjānaṃ sirāvedhakopi garubhaṇḍameva, tathā kuṭhārī. Yā pana āvudhasaṅkhepena katā, ayaṃ anāmāsā, kudālo daṇḍabandhanikhādanaṃ vā agarubhaṇḍaṃ nāma natthi. Sammuñjanidaṇḍakhaṇanakaṃ pana adaṇḍakaṃ phalamattakameva, yaṃ sakkā sipāṭikāya pakkhipitvā pariharituṃ, taṃ bhājanīyaṃ. Sikharampi nikhādaneneva saṅgahitaṃ, yehi manussehi vihāre vāsiādīni dinnāni honti, te ce ghare daḍḍhe vā vilutte vā ‘‘detha no, bhante, upakkhare, puna āharissāmā’’ti vadanti, dātabbā. Sace haranti, na vāretabbā, anāharantāpi na codetabbā.
கம்மாரதட்டகாரசுந்த³காரனளகாரமணிகாரபத்தப³ந்த⁴கானங் அதி⁴கரணிமுட்டி²ஸண்டா³ஸதுலாதீ³னி ஸப்³பா³னி லோஹமயானி உபகரணானி ஸங்கே⁴ தி³ன்னகாலதோ பட்டா²ய க³ருப⁴ண்டா³னி. திபுகொட்டகஸுவண்ணகாரசம்மகாரஉபகரணேஸுபி ஏஸேவ நயோ. அயங் பன விஸேஸோ, திபுகொட்டகஉபகரணேஸு திபுச்சே²த³னகஸத்த²கங், ஸுவண்ணகாரஉபகரணேஸு ஸுவண்ணச்சே²த³னகஸத்த²கங், சம்மகாரஉபகரணேஸு கதபரிகம்மசம்மச்சே²த³னகு²த்³த³கஸத்த²ந்தி இமானி பா⁴ஜனீயானி. ந்ஹாபிததுன்னகாரஉபகரணேஸுபி ட²பெத்வா மஹாகத்தரிங் மஹாஸண்டா³ஸங் மஹாபிப்ப²லிகஞ்ச ஸப்³ப³ங் வட்டதி, இதரானி க³ருப⁴ண்டா³னி.
Kammārataṭṭakāracundakāranaḷakāramaṇikārapattabandhakānaṃ adhikaraṇimuṭṭhisaṇḍāsatulādīni sabbāni lohamayāni upakaraṇāni saṅghe dinnakālato paṭṭhāya garubhaṇḍāni. Tipukoṭṭakasuvaṇṇakāracammakāraupakaraṇesupi eseva nayo. Ayaṃ pana viseso, tipukoṭṭakaupakaraṇesu tipucchedanakasatthakaṃ, suvaṇṇakāraupakaraṇesu suvaṇṇacchedanakasatthakaṃ, cammakāraupakaraṇesu kataparikammacammacchedanakhuddakasatthanti imāni bhājanīyāni. Nhāpitatunnakāraupakaraṇesupi ṭhapetvā mahākattariṃ mahāsaṇḍāsaṃ mahāpipphalikañca sabbaṃ vaṭṭati, itarāni garubhaṇḍāni.
வல்லிஆதீ³ஸு வெத்தவல்லிஆதி³கா யா காசி அட்³ட⁴பா³ஹுப்பமாணா வல்லி ஸங்க⁴ஸ்ஸ தி³ன்னா வா தத்த²ஜாதகா வா ரக்கி²தகோ³பிதாவ க³ருப⁴ண்ட³ங், ஸா ஸங்க⁴கம்மே ச சேதியகம்மே ச கதே ஸசே அதிரேகா ஹோதி, புக்³க³லிககம்மேபி உபனேதுங் வட்டதி, ஸுத்தமகசிவாகனாளிகேரஹீரசம்மமயா ரஜ்ஜுகா வா யொத்தானி வா வாகே ச நாளிகேரஹீரே ச வட்டெத்வா கதா ஏகவட்டா வா த்³விவட்டா வா ஸங்க⁴ஸ்ஸ ஸந்தகா க³ருப⁴ண்ட³ங். ஸுத்தங் பன அவட்டெத்வா தி³ன்னங் மகசிவாகனாளிகேரஹீரா ச பா⁴ஜனீயா . யேஹி பனேதானி ரஜ்ஜுகாதீ³னி தி³ன்னானி ஹொந்தி, தே அத்தனோ கரணீயேன ஹரந்தா ந வாரேதப்³பா³.
Valliādīsu vettavalliādikā yā kāci aḍḍhabāhuppamāṇā valli saṅghassa dinnā vā tatthajātakā vā rakkhitagopitāva garubhaṇḍaṃ, sā saṅghakamme ca cetiyakamme ca kate sace atirekā hoti, puggalikakammepi upanetuṃ vaṭṭati, suttamakacivākanāḷikerahīracammamayā rajjukā vā yottāni vā vāke ca nāḷikerahīre ca vaṭṭetvā katā ekavaṭṭā vā dvivaṭṭā vā saṅghassa santakā garubhaṇḍaṃ. Suttaṃ pana avaṭṭetvā dinnaṃ makacivākanāḷikerahīrā ca bhājanīyā . Yehi panetāni rajjukādīni dinnāni honti, te attano karaṇīyena harantā na vāretabbā.
யோ கோசி அட்ட²ங்கு³லஸூசித³ண்ட³கமத்தோபி வேளு ஸங்க⁴ஸ்ஸ தி³ன்னோ வா தத்த²ஜாதகோ வா ரக்கி²தகோ³பிதோ க³ருப⁴ண்ட³ங், ஸோபி ஸங்க⁴ஸ்ஸ கம்மே ச சேதியகம்மே ச கதே அதிரேகோ புக்³க³லிககம்மே தா³துங் வட்டதி. பாத³க்³க³ண்ஹனகதேலனாளி பன கத்தரயட்டி² உபாஹனத³ண்ட³கோ ச²த்தத³ண்டோ³ ச²த்தஸலாகாதி இத³மெத்த² பா⁴ஜனீயப⁴ண்ட³ங், த³ட்³ட⁴கே³ஹமனுஸ்ஸா க³ண்ஹித்வா க³ச்ச²ந்தா ந வாரேதப்³பா³.
Yo koci aṭṭhaṅgulasūcidaṇḍakamattopi veḷu saṅghassa dinno vā tatthajātako vā rakkhitagopito garubhaṇḍaṃ, sopi saṅghassa kamme ca cetiyakamme ca kate atireko puggalikakamme dātuṃ vaṭṭati. Pādaggaṇhanakatelanāḷi pana kattarayaṭṭhi upāhanadaṇḍako chattadaṇḍo chattasalākāti idamettha bhājanīyabhaṇḍaṃ, daḍḍhagehamanussā gaṇhitvā gacchantā na vāretabbā.
முஞ்ஜஞ்ச பப்³ப³ஜஞ்ச அவஸேஸஞ்ச ச²த³னதிணங் முட்டி²ப்பமாணம்பி ச²த³னதிணஸங்கே²பக³தேஸு தாலபண்ணாதீ³ஸு யங்கிஞ்சி ஏகபண்ணம்பி ஸங்க⁴ஸ்ஸ தி³ன்னங் வா தத்த²ஜாதகங் வா ப³ஹிஆராமே ஸங்கி⁴கே திணவத்து²ஸ்மிங் ஜாதகங் வா ரக்கி²தகோ³பிதங் க³ருப⁴ண்ட³ங், தம்பி ஸங்க⁴கம்மே ச சேதியகம்மே ச கதே அதிரேகங் புக்³க³லிககம்மே தா³துங் வட்டதி. த³ட்³ட⁴கே³ஹமனுஸ்ஸா க³ஹெத்வா க³ச்ச²ந்தா ந வாரேதப்³பா³, அட்ட²ங்கு³லப்பமாணோபி ரித்தகபொத்த²கோ க³ருப⁴ண்ட³மேவ.
Muñjañca pabbajañca avasesañca chadanatiṇaṃ muṭṭhippamāṇampi chadanatiṇasaṅkhepagatesu tālapaṇṇādīsu yaṃkiñci ekapaṇṇampi saṅghassa dinnaṃ vā tatthajātakaṃ vā bahiārāme saṅghike tiṇavatthusmiṃ jātakaṃ vā rakkhitagopitaṃ garubhaṇḍaṃ, tampi saṅghakamme ca cetiyakamme ca kate atirekaṃ puggalikakamme dātuṃ vaṭṭati. Daḍḍhagehamanussā gahetvā gacchantā na vāretabbā, aṭṭhaṅgulappamāṇopi rittakapotthako garubhaṇḍameva.
மத்திகா பகதிமத்திகா வா ஹோது பஞ்சவண்ணா வா ஸுதா⁴ வா ஸஜ்ஜுரஸகங்கு³ட்ட²ஸிலேஸாதீ³ஸு வா யங்கிஞ்சி து³ல்லப⁴ட்டா²னே ஆனெத்வா வா தி³ன்னங் தத்த²ஜாதகங் வா ரக்கி²தகோ³பிதங் தாலபக்கமத்தங் க³ருப⁴ண்ட³ங் ஹோதி, தம்பி ஸங்க⁴கம்மே ச சேதியகம்மே ச கதே அதிரேகங் புக்³க³லிககம்மே தா³துங் வட்டதி. ஹிங்கு³ஹிங்கு³லகஹரிதாலமனோஸிலஞ்ஜனாதீ³னி பன பா⁴ஜனீயானி.
Mattikā pakatimattikā vā hotu pañcavaṇṇā vā sudhā vā sajjurasakaṅguṭṭhasilesādīsu vā yaṃkiñci dullabhaṭṭhāne ānetvā vā dinnaṃ tatthajātakaṃ vā rakkhitagopitaṃ tālapakkamattaṃ garubhaṇḍaṃ hoti, tampi saṅghakamme ca cetiyakamme ca kate atirekaṃ puggalikakamme dātuṃ vaṭṭati. Hiṅguhiṅgulakaharitālamanosilañjanādīni pana bhājanīyāni.
தா³ருப⁴ண்டே³ யோ கோசி வேளும்ஹி வுத்தப்பமாணோ தா³ருப⁴ண்ட³கோ ஸங்க⁴ஸ்ஸ தி³ன்னோ வா தத்த²ஜாதகோ வா ரக்கி²தகோ³பிதோ க³ருப⁴ண்ட³ங், அபி ச ஸப்³பா³பி தா³ருவேளுசம்மபாஸாணாதி³விகதி தா³ருப⁴ண்டே³ன ஸங்க³ஹிதா, தத்த² மஞ்சபீடே²ஹி அஸங்க³ஹிதானி ஆஸந்தி³காதீ³னி அந்தமஸோ சோளேன வா பலாலேஹி வா பண்ணேஹி வா கதபீட²ங் உபாதா³ய ஸப்³பா³னி ஆஸனானி.
Dārubhaṇḍe yo koci veḷumhi vuttappamāṇo dārubhaṇḍako saṅghassa dinno vā tatthajātako vā rakkhitagopito garubhaṇḍaṃ, api ca sabbāpi dāruveḷucammapāsāṇādivikati dārubhaṇḍena saṅgahitā, tattha mañcapīṭhehi asaṅgahitāni āsandikādīni antamaso coḷena vā palālehi vā paṇṇehi vā katapīṭhaṃ upādāya sabbāni āsanāni.
வங்கப²லகங் தீ³க⁴ப²லகங் சீவரதோ⁴வனப²லகங் க⁴ட்டனப²லகங் க⁴ட்டனமுக்³க³ரோ த³ந்தகட்ட²ச்சே²த³னக³ண்டி²கா த³ண்ட³முக்³க³ரோ நாவா அம்ப³ணங் ரஜனதோ³ணி உத³கபடிச்ச²கோ தா³ருமயோ வா த³ந்தமயோ வா வேளுமயோ வா ஸபாத³கோபி அபாத³கோபி ஸமுக்³கோ³ மஞ்ஜூஸா பாத³க்³க³ண்ஹனகதோ அதிரேகப்பமாணோ கரண்டோ³ உத³கதோ³ணி உத³ககடாஹங் உளுங்கோ கடச்சு²பானீயஸராவங் பானீயஸங்கோ²தி ஏதேஸு யங்கிஞ்சி ஸங்கே⁴ தி³ன்னங் க³ருப⁴ண்ட³ங். ஸங்க²தா²லகங் பன பா⁴ஜனீயங், ததா² தா³ருமயோ உத³கதும்போ³.
Vaṅkaphalakaṃ dīghaphalakaṃ cīvaradhovanaphalakaṃ ghaṭṭanaphalakaṃ ghaṭṭanamuggaro dantakaṭṭhacchedanagaṇṭhikā daṇḍamuggaro nāvā ambaṇaṃ rajanadoṇi udakapaṭicchako dārumayo vā dantamayo vā veḷumayo vā sapādakopi apādakopi samuggo mañjūsā pādaggaṇhanakato atirekappamāṇo karaṇḍo udakadoṇi udakakaṭāhaṃ uḷuṅko kaṭacchupānīyasarāvaṃ pānīyasaṅkhoti etesu yaṃkiñci saṅghe dinnaṃ garubhaṇḍaṃ. Saṅkhathālakaṃ pana bhājanīyaṃ, tathā dārumayo udakatumbo.
பாத³கத²லிகமண்ட³லங் தா³ருமயங் வா ஹோது சோளபண்ணாதி³மயங் வா ஸப்³ப³ங் க³ருப⁴ண்ட³ங். ஆதா⁴ரகோ பத்தபிதா⁴னங் தாலவண்டங் பீ³ஜனீ சங்கோடகங் பச்சி² யட்டி²ஸம்முஞ்ஜனீ முட்டி²ஸம்முஞ்ஜனீதி ஏதேஸுபி யங்கிஞ்சி கு²த்³த³கங் வா மஹந்தங் வா தா³ருவேளுபண்ணசம்மாதீ³ஸு யேன கேனசி கதங் க³ருப⁴ண்ட³மேவ.
Pādakathalikamaṇḍalaṃ dārumayaṃ vā hotu coḷapaṇṇādimayaṃ vā sabbaṃ garubhaṇḍaṃ. Ādhārako pattapidhānaṃ tālavaṇṭaṃ bījanī caṅkoṭakaṃ pacchi yaṭṭhisammuñjanī muṭṭhisammuñjanīti etesupi yaṃkiñci khuddakaṃ vā mahantaṃ vā dāruveḷupaṇṇacammādīsu yena kenaci kataṃ garubhaṇḍameva.
த²ம்ப⁴துலாஸோபானப²லகாதீ³ஸு யங்கிஞ்சி தா³ருமயங் வா பாஸாணமயங் வா கே³ஹஸம்பா⁴ரூபக³ங் யோ கோசி கடஸாரகோ யங்கிஞ்சி பூ⁴மத்த²ரணங் யங்கிஞ்சி அகப்பியசம்மங், ஸப்³ப³ங் ஸங்கி⁴கங் க³ருப⁴ண்ட³ங், பூ⁴மத்த²ரணங் காதுங் வட்டதி. ஏளகசம்மங் பன பச்சத்த²ரணக³திகங் ஹோதி, தம்பி க³ருப⁴ண்ட³மேவ, கப்பியசம்மானி பா⁴ஜனீயானி, குருந்தி³யங் பன ஸப்³ப³ங் மஞ்சப்பமாணங் சம்மங் க³ருப⁴ண்ட³ந்தி வுத்தங்.
Thambhatulāsopānaphalakādīsu yaṃkiñci dārumayaṃ vā pāsāṇamayaṃ vā gehasambhārūpagaṃ yo koci kaṭasārako yaṃkiñci bhūmattharaṇaṃ yaṃkiñci akappiyacammaṃ, sabbaṃ saṅghikaṃ garubhaṇḍaṃ, bhūmattharaṇaṃ kātuṃ vaṭṭati. Eḷakacammaṃ pana paccattharaṇagatikaṃ hoti, tampi garubhaṇḍameva, kappiyacammāni bhājanīyāni, kurundiyaṃ pana sabbaṃ mañcappamāṇaṃ cammaṃ garubhaṇḍanti vuttaṃ.
உது³க்க²லங் முஸலங் ஸுப்பங் நிஸத³ங் நிஸத³போதோ பாஸாணதோ³ணி பாஸாணகடாஹங் ஸப்³ப³ங் கஸிப⁴ண்ட³ம்பி க³ருப⁴ண்ட³ங், ஸப்³ப³ங் சக்கயுத்தயானங் க³ருப⁴ண்ட³மேவ. மஞ்சபீடா²னங் பாதா³ ச அடனியோ ச வாஸிபரஸுஆதீ³னங் த³ண்டா³ சாதி ஏதேஸு யங்கிஞ்சி அனிட்டி²தங் பா⁴ஜனீயங், தச்சி²தமட்ட²ங் பன க³ருப⁴ண்ட³ங் ஹோதி, அனுஞ்ஞாதவாஸியா த³ண்டோ³ ச²த்தங் முட்டி²பண்ணங் கத்தரயட்டி² உபாஹனா அரணிஸஹிதங் த⁴ம்மகரணோ பாத³க்³க³ண்ஹனகதோ அனதிரித்தங் ஆமலகதும்ப³ங் ஆமலகக⁴டோ லாபு³கதும்ப³ங் லாபு³கக⁴டோ விஸாணதும்ப³ந்தி ஸப்³ப³மேதங் பா⁴ஜனீயங், ததோ பரங் க³ருப⁴ண்ட³ங்.
Udukkhalaṃ musalaṃ suppaṃ nisadaṃ nisadapoto pāsāṇadoṇi pāsāṇakaṭāhaṃ sabbaṃ kasibhaṇḍampi garubhaṇḍaṃ, sabbaṃ cakkayuttayānaṃ garubhaṇḍameva. Mañcapīṭhānaṃ pādā ca aṭaniyo ca vāsiparasuādīnaṃ daṇḍā cāti etesu yaṃkiñci aniṭṭhitaṃ bhājanīyaṃ, tacchitamaṭṭhaṃ pana garubhaṇḍaṃ hoti, anuññātavāsiyā daṇḍo chattaṃ muṭṭhipaṇṇaṃ kattarayaṭṭhi upāhanā araṇisahitaṃ dhammakaraṇo pādaggaṇhanakato anatirittaṃ āmalakatumbaṃ āmalakaghaṭo lābukatumbaṃ lābukaghaṭo visāṇatumbanti sabbametaṃ bhājanīyaṃ, tato paraṃ garubhaṇḍaṃ.
ஹத்தி²த³ந்தோ வா யங்கிஞ்சி விஸாணங் வா அதச்சி²தங் யதா²க³தமேவ பா⁴ஜனீயங், தேஹி கதமஞ்சபீட²பாதா³தீ³ஸு புரிமஸதி³ஸோவ வினிச்ச²யோ. தச்சி²தனிட்டி²தோபி ஹிங்கு³கரண்ட³கோ அஞ்ஜனிகரண்ட³கோ க³ண்டி²கா விதோ⁴ அஞ்ஜனீ அஞ்ஜனிஸலாகா உத³கபுஞ்ச²னீதி இத³ங் ஸப்³ப³ங் பா⁴ஜனீயமேவ.
Hatthidanto vā yaṃkiñci visāṇaṃ vā atacchitaṃ yathāgatameva bhājanīyaṃ, tehi katamañcapīṭhapādādīsu purimasadisova vinicchayo. Tacchitaniṭṭhitopi hiṅgukaraṇḍako añjanikaraṇḍako gaṇṭhikā vidho añjanī añjanisalākā udakapuñchanīti idaṃ sabbaṃ bhājanīyameva.
மத்திகாப⁴ண்டே³ ஸப்³ப³ங் மனுஸ்ஸானங் உபபோ⁴க³பரிபோ⁴க³ங் க⁴டபிட²ராதி³குலாலபா⁴ஜனங், பத்தகடாஹங் அங்கா³ரகடாஹங் தூ⁴மதா³னகங் தீ³பருக்க²கோ தீ³பகபல்லிகா சயனிட்ட²கா ச²த³னிட்ட²கா து²பிகாதி ஸப்³ப³ங் க³ருப⁴ண்ட³ங், ஏதேஸு பன வுத்தனயேஸு க³ருப⁴ண்டே³ஸு யங்கிஞ்சி வேளுஆதி³ங் அத்தனோ அத்தா²ய க³ண்ஹந்தேன ஸமகங் வா அதிரேகங் வா பா²திகம்மங் கத்வா க³ஹேதப்³ப³ங். பாத³க்³க³ண்ஹனகதோ அனதிரித்தப்பமாணோ பன க⁴டகோ பத்தோ தா²லகங் கஞ்சனகோ குண்டி³காதி இத³மெத்த² பா⁴ஜனீயங், யதா² ச மத்திகாப⁴ண்டே³ ஏவங் லோஹப⁴ண்டே³பி குண்டி³கா பா⁴ஜனீயகொட்டா²ஸமேவ ப⁴ஜதி. இதி யங் பா⁴ஜனீயங் விஸ்ஸஜ்ஜனீயம்பி தங் ஏவங் விஸ்ஸஜ்ஜியவேப⁴ங்கி³யஸங்கா²தங் அஞ்ஞங் பரிக்கா²ரங் த³த்வா கீ²யந்தஸ்ஸ து³க்கடங், இதரங் பன தா³துமேவ ந வட்டதி. இஸ்ஸரவதாய தெ³ந்தோ து²ல்லச்சயங் ஆபஜ்ஜதி, தெ²ய்யசித்தேன க³ண்ஹந்தோ ப⁴ண்ட³ங் அக்³கா⁴பெத்வா காரேதப்³போ³. யதா² ச அஞ்ஞங் பரிக்கா²ரங் த³த்வா கீ²யந்தஸ்ஸ து³க்கடங், ததா² ஸங்கே⁴ன அஸம்மதஸ்ஸ சீவரங் வா அஞ்ஞங் வா பரிக்கா²ரங் த³த்வா கீ²யந்தஸ்ஸ து³க்கடமேவ, அனுபஸம்பன்னே ஸப்³ப³த்த² திகது³க்கடங். பகதியா பன ச²ந்தா³தி³வஸேன (பாசி॰ 488) கரொந்தங் தி³ஸ்வா ‘‘கோ அத்தோ² தஸ்ஸ தி³ன்னேன, லத்³தா⁴பி வினிபாதெஸ்ஸதி, ந ஸம்மா உபனெஸ்ஸதீ’’தி கீ²யந்தஸ்ஸ, உம்மத்தகாதீ³னஞ்ச அனாபத்தி. உபஸம்பன்னதா, த⁴ம்மேன லத்³த⁴ஸம்முதிதா, ஸங்கே⁴ன ஸத்³தி⁴ங் விகப்பனுபக³சீவரதா³னங், பச்சா² கீ²யிதுகாமதாய கீ²யனாதி இமானெத்த² சத்தாரி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ங் பன து³க்க²வேத³னந்தி.
Mattikābhaṇḍe sabbaṃ manussānaṃ upabhogaparibhogaṃ ghaṭapiṭharādikulālabhājanaṃ, pattakaṭāhaṃ aṅgārakaṭāhaṃ dhūmadānakaṃ dīparukkhako dīpakapallikā cayaniṭṭhakā chadaniṭṭhakā thupikāti sabbaṃ garubhaṇḍaṃ, etesu pana vuttanayesu garubhaṇḍesu yaṃkiñci veḷuādiṃ attano atthāya gaṇhantena samakaṃ vā atirekaṃ vā phātikammaṃ katvā gahetabbaṃ. Pādaggaṇhanakato anatirittappamāṇo pana ghaṭako patto thālakaṃ kañcanako kuṇḍikāti idamettha bhājanīyaṃ, yathā ca mattikābhaṇḍe evaṃ lohabhaṇḍepi kuṇḍikā bhājanīyakoṭṭhāsameva bhajati. Iti yaṃ bhājanīyaṃ vissajjanīyampi taṃ evaṃ vissajjiyavebhaṅgiyasaṅkhātaṃ aññaṃ parikkhāraṃ datvā khīyantassa dukkaṭaṃ, itaraṃ pana dātumeva na vaṭṭati. Issaravatāya dento thullaccayaṃ āpajjati, theyyacittena gaṇhanto bhaṇḍaṃ agghāpetvā kāretabbo. Yathā ca aññaṃ parikkhāraṃ datvā khīyantassa dukkaṭaṃ, tathā saṅghena asammatassa cīvaraṃ vā aññaṃ vā parikkhāraṃ datvā khīyantassa dukkaṭameva, anupasampanne sabbattha tikadukkaṭaṃ. Pakatiyā pana chandādivasena (pāci. 488) karontaṃ disvā ‘‘ko attho tassa dinnena, laddhāpi vinipātessati, na sammā upanessatī’’ti khīyantassa, ummattakādīnañca anāpatti. Upasampannatā, dhammena laddhasammutitā, saṅghena saddhiṃ vikappanupagacīvaradānaṃ, pacchā khīyitukāmatāya khīyanāti imānettha cattāri aṅgāni. Samuṭṭhānādīni adinnādānasadisāni, idaṃ pana dukkhavedananti.
து³ப்³ப³லஸிக்கா²பத³வண்ணனா நிட்டி²தா.
Dubbalasikkhāpadavaṇṇanā niṭṭhitā.
12. பரிணாமனஸிக்கா²பத³வண்ணனா
12. Pariṇāmanasikkhāpadavaṇṇanā
த்³வாத³ஸமே ஸப்³ப³ங் திங்ஸககண்டே³ பரிணாமனஸிக்கா²பதே³ வுத்தனயமேவ. அயமேவ ஹி விஸேஸோ, தத்த² அத்தனோ பரிணாமிதத்தா நிஸ்ஸக்³கி³யங் பாசித்தியங், இத⁴ புக்³க³லஸ்ஸ பரிணாமிதத்தா ஸுத்³தி⁴கபாசித்தியந்தி.
Dvādasame sabbaṃ tiṃsakakaṇḍe pariṇāmanasikkhāpade vuttanayameva. Ayameva hi viseso, tattha attano pariṇāmitattā nissaggiyaṃ pācittiyaṃ, idha puggalassa pariṇāmitattā suddhikapācittiyanti.
பரிணாமனஸிக்கா²பத³வண்ணனா நிட்டி²தா.
Pariṇāmanasikkhāpadavaṇṇanā niṭṭhitā.
ஸஹத⁴ம்மிகவக்³கோ³ அட்ட²மோ.
Sahadhammikavaggo aṭṭhamo.
