| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৮. সহধম্মিকৰগ্গো
8. Sahadhammikavaggo
১৭২. ভিক্খূহি সহধম্মিকং ৰুচ্চমানো – ‘‘ন তাৰাহং, আৰুসো, এতস্মিং সিক্খাপদে সিক্খিস্সামি যাৰ ন অঞ্ঞং ভিক্খুং ব্যত্তং ৰিনযধরং পরিপুচ্ছিস্সামী’’তি ভণন্তো দ্ৰে আপত্তিযো আপজ্জতি। ভণতি, পযোগে দুক্কটং; ভণিতে আপত্তি পাচিত্তিযস্স।
172. Bhikkhūhi sahadhammikaṃ vuccamāno – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchissāmī’’ti bhaṇanto dve āpattiyo āpajjati. Bhaṇati, payoge dukkaṭaṃ; bhaṇite āpatti pācittiyassa.
ৰিনযং ৰিৰণ্ণেন্তো দ্ৰে আপত্তিযো আপজ্জতি। ৰিৰণ্ণেতি, পযোগে দুক্কটং; ৰিৰণ্ণিতে আপত্তি পাচিত্তিযস্স।
Vinayaṃ vivaṇṇento dve āpattiyo āpajjati. Vivaṇṇeti, payoge dukkaṭaṃ; vivaṇṇite āpatti pācittiyassa.
মোহেন্তো দ্ৰে আপত্তিযো আপজ্জতি। অনারোপিতে মোহে মোহেতি, আপত্তি দুক্কটস্স; আরোপিতে মোহে মোহেতি, আপত্তি পাচিত্তিযস্স।
Mohento dve āpattiyo āpajjati. Anāropite mohe moheti, āpatti dukkaṭassa; āropite mohe moheti, āpatti pācittiyassa.
ভিক্খুস্স কুপিতো অনত্তমনো পহারং দেন্তো দ্ৰে আপত্তিযো আপজ্জতি। পহরতি, পযোগে দুক্কটং; পহতে আপত্তি পাচিত্তিযস্স ।
Bhikkhussa kupito anattamano pahāraṃ dento dve āpattiyo āpajjati. Paharati, payoge dukkaṭaṃ; pahate āpatti pācittiyassa .
ভিক্খুস্স কুপিতো অনত্তমনো তলসত্তিকং উগ্গিরন্তো দ্ৰে আপত্তিযো আপজ্জতি। উগ্গিরতি, পযোগে দুক্কটং; উগ্গিরিতে আপত্তি পাচিত্তিযস্স।
Bhikkhussa kupito anattamano talasattikaṃ uggiranto dve āpattiyo āpajjati. Uggirati, payoge dukkaṭaṃ; uggirite āpatti pācittiyassa.
ভিক্খুং অমূলকেন সঙ্ঘাদিসেসেন অনুদ্ধংসেন্তো দ্ৰে আপত্তিযো আপজ্জতি। অনুদ্ধংসেতি, পযোগে দুক্কটং; অনুদ্ধংসিতে আপত্তি পাচিত্তিযস্স।
Bhikkhuṃ amūlakena saṅghādisesena anuddhaṃsento dve āpattiyo āpajjati. Anuddhaṃseti, payoge dukkaṭaṃ; anuddhaṃsite āpatti pācittiyassa.
ভিক্খুস্স সঞ্চিচ্চ কুক্কুচ্চং উপদহন্তো দ্ৰে আপত্তিযো আপজ্জতি। উপদহতি, পযোগে দুক্কটং; উপদহিতে আপত্তি পাচিত্তিযস্স।
Bhikkhussa sañcicca kukkuccaṃ upadahanto dve āpattiyo āpajjati. Upadahati, payoge dukkaṭaṃ; upadahite āpatti pācittiyassa.
ভিক্খূনং ভণ্ডনজাতানং কলহজাতানং ৰিৰাদাপন্নানং উপস্সুতিং তিট্ঠন্তো দ্ৰে আপত্তিযো আপজ্জতি। ‘‘সোস্সামী’’তি গচ্ছতি, আপত্তি দুক্কটস্স; যত্থ ঠিতো সুণাতি, আপত্তি পাচিত্তিযস্স।
Bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭhanto dve āpattiyo āpajjati. ‘‘Sossāmī’’ti gacchati, āpatti dukkaṭassa; yattha ṭhito suṇāti, āpatti pācittiyassa.
ধম্মিকানং কম্মানং ছন্দং দত্ৰা পচ্ছা খীযনধম্মং আপজ্জন্তো দ্ৰে আপত্তিযো আপজ্জতি। খিয্যতি, পযোগে দুক্কটং; খিয্যিতে আপত্তি পাচিত্তিযস্স।
Dhammikānaṃ kammānaṃ chandaṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
সঙ্ঘে ৰিনিচ্ছযকথায ৰত্তমানায ছন্দং অদত্ৰা উট্ঠাযাসনা পক্কমন্তো দ্ৰে আপত্তিযো আপজ্জতি। পরিসায হত্থপাসং ৰিজহন্তস্স আপত্তি দুক্কটস্স; ৰিজহিতে আপত্তি পাচিত্তিযস্স।
Saṅghe vinicchayakathāya vattamānāya chandaṃ adatvā uṭṭhāyāsanā pakkamanto dve āpattiyo āpajjati. Parisāya hatthapāsaṃ vijahantassa āpatti dukkaṭassa; vijahite āpatti pācittiyassa.
সমগ্গেন সঙ্ঘেন চীৰরং দত্ৰা পচ্ছা খীযনধম্মং আপজ্জন্তো দ্ৰে আপত্তিযো আপজ্জতি। খিয্যতি, পযোগে দুক্কটং; খিয্যিতে আপত্তি পাচিত্তিযস্স।
Samaggena saṅghena cīvaraṃ datvā pacchā khīyanadhammaṃ āpajjanto dve āpattiyo āpajjati. Khiyyati, payoge dukkaṭaṃ; khiyyite āpatti pācittiyassa.
জানং সঙ্ঘিকং লাভং পরিণতং পুগ্গলস্স পরিণামেন্তো দ্ৰে আপত্তিযো আপজ্জতি। পরিণামেতি, পযোগে দুক্কটং; পরিণামিতে আপত্তি পাচিত্তিযস্স।
Jānaṃ saṅghikaṃ lābhaṃ pariṇataṃ puggalassa pariṇāmento dve āpattiyo āpajjati. Pariṇāmeti, payoge dukkaṭaṃ; pariṇāmite āpatti pācittiyassa.
সহধম্মিকৰগ্গো অট্ঠমো।
Sahadhammikavaggo aṭṭhamo.
