| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༨. སཧདྷམྨིཀཝགྒོ
8. Sahadhammikavaggo
༡. སཧདྷམྨིཀསིཀྑཱཔདཾ
1. Sahadhammikasikkhāpadaṃ
༤༣༣. ཏེན སམཡེན བུདྡྷོ བྷགཝཱ ཀོསམྦིཡཾ ཝིཧརཏི གྷོསིཏཱརཱམེ། ཏེན ཁོ པན སམཡེན ཨཱཡསྨཱ ཚནྣོ ཨནཱཙཱརཾ ཨཱཙརཏི། བྷིཀྑཱུ ཨེཝམཱཧཾསུ – ‘‘མཱཝུསོ ཚནྣ, ཨེཝརཱུཔཾ ཨཀཱསི། ནེཏཾ ཀཔྤཏཱི’’ཏི། སོ ཨེཝཾ ཝདེཏི – ‘‘ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པརིཔུཙྪཱམཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ ཚནྣོ བྷིཀྑཱུཧི སཧདྷམྨིཀཾ ཝུཙྩམཱནོ ཨེཝཾ ཝཀྑཏི – ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པརིཔུཙྪཱམཱི’’ཏི…པེ॰… སཙྩཾ ཀིར ཏྭཾ, ཚནྣ, བྷིཀྑཱུཧི སཧདྷམྨིཀཾ ཝུཙྩམཱནོ ཨེཝཾ ཝདེསི – ‘‘ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པརིཔུཙྪཱམཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏྭཾ, མོགྷཔུརིས, བྷིཀྑཱུཧི སཧདྷམྨིཀཾ ཝུཙྩམཱནོ ཨེཝཾ ཝཀྑསི – ‘‘ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པརིཔུཙྪཱམཱི’’ཏི། ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
433. Tena samayena buddho bhagavā kosambiyaṃ viharati ghositārāme. Tena kho pana samayena āyasmā channo anācāraṃ ācarati. Bhikkhū evamāhaṃsu – ‘‘māvuso channa, evarūpaṃ akāsi. Netaṃ kappatī’’ti. So evaṃ vadeti – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchāmī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā channo bhikkhūhi sahadhammikaṃ vuccamāno evaṃ vakkhati – na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchāmī’’ti…pe… saccaṃ kira tvaṃ, channa, bhikkhūhi sahadhammikaṃ vuccamāno evaṃ vadesi – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchāmī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, bhikkhūhi sahadhammikaṃ vuccamāno evaṃ vakkhasi – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchāmī’’ti. Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༣༤. ‘‘ཡོ པན བྷིཀྑུ བྷིཀྑཱུཧི སཧདྷམྨིཀཾ ཝུཙྩམཱནོ ཨེཝཾ ཝདེཡྻ – ‘ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པརིཔུཙྪཱམཱི’ཏི, པཱཙིཏྟིཡཾ། སིཀྑམཱནེན, བྷིཀྑཝེ, བྷིཀྑུནཱ ཨཉྙཱཏབྦཾ པརིཔུཙྪིཏབྦཾ པརིཔཉྷིཏབྦཾ། ཨཡཾ ཏཏྠ སཱམཱིཙཱི’’ཏི།
434.‘‘Yo pana bhikkhu bhikkhūhi sahadhammikaṃ vuccamāno evaṃ vadeyya – ‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchāmī’ti, pācittiyaṃ. Sikkhamānena, bhikkhave, bhikkhunā aññātabbaṃ paripucchitabbaṃ paripañhitabbaṃ. Ayaṃ tattha sāmīcī’’ti.
༤༣༥. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
435.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
བྷིཀྑཱུཧཱིཏི ཨཉྙེཧི བྷིཀྑཱུཧི།
Bhikkhūhīti aññehi bhikkhūhi.
སཧདྷམྨིཀཾ ནཱམ ཡཾ བྷགཝཏཱ པཉྙཏྟཾ སིཀྑཱཔདཾ ཨེཏཾ སཧདྷམྨིཀཾ ནཱམ། ཏེན ཝུཙྩམཱནོ ཨེཝཾ ཝདེཏི 1 – ‘‘ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པརིཔུཙྪཱམཱི’’ཏི 2། པཎྜིཏཾ བྱཏྟཾ 3 མེདྷཱཝིཾ བཧུསྶུཏཾ དྷམྨཀཐིཀཾ པརིཔུཙྪཱམཱིཏི བྷཎཏི, ཨཱཔཏྟི པཱཙིཏྟིཡསྶ།
Sahadhammikaṃ nāma yaṃ bhagavatā paññattaṃ sikkhāpadaṃ etaṃ sahadhammikaṃ nāma. Tena vuccamāno evaṃ vadeti 4 – ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paripucchāmī’’ti 5. Paṇḍitaṃ byattaṃ 6 medhāviṃ bahussutaṃ dhammakathikaṃ paripucchāmīti bhaṇati, āpatti pācittiyassa.
༤༣༦. ཨུཔསམྤནྣེ ཨུཔསམྤནྣསཉྙཱི ཨེཝཾ ཝདེཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཝེམཏིཀོ ཨེཝཾ ཝདེཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཨནུཔསམྤནྣསཉྙཱི ཨེཝཾ ཝདེཏི, ཨཱཔཏྟི པཱཙིཏྟིཡསྶ།
436. Upasampanne upasampannasaññī evaṃ vadeti, āpatti pācittiyassa. Upasampanne vematiko evaṃ vadeti, āpatti pācittiyassa. Upasampanne anupasampannasaññī evaṃ vadeti, āpatti pācittiyassa.
ཨཔཉྙཏྟེན ཝུཙྩམཱནོ – ‘‘ཨིདཾ ན སལླེཁཱཡ ན དྷུཏཏྠཱཡ ན པཱསཱདིཀཏཱཡ ན ཨཔཙཡཱཡ ན ཝཱིརིཡཱརམྦྷཱཡ སཾཝཏྟཏཱི’’ཏི ཨེཝཾ ཝདེཏི, ‘‘ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པཎྜིཏཾ མེདྷཱཝིཾ བཧུསྶུཏཾ དྷམྨཀཐིཀཾ པརིཔུཙྪཱམཱི’’ཏི བྷཎཏི, ཨཱཔཏྟི དུཀྐཊསྶ།
Apaññattena vuccamāno – ‘‘idaṃ na sallekhāya na dhutatthāya na pāsādikatāya na apacayāya na vīriyārambhāya saṃvattatī’’ti evaṃ vadeti, ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paṇḍitaṃ medhāviṃ bahussutaṃ dhammakathikaṃ paripucchāmī’’ti bhaṇati, āpatti dukkaṭassa.
ཨནུཔསམྤནྣེན པཉྙཏྟེན ཝཱ ཨཔཉྙཏྟེན ཝཱ ཝུཙྩམཱནོ – ‘‘ཨིདཾ ན སལླེཁཱཡ ན དྷུཏཏྠཱཡ ན པཱསཱདིཀཏཱཡ ན ཨཔཙཡཱཡ ན ཝཱིརིཡཱརམྦྷཱཡ སཾཝཏྟཏཱི’’ཏི ཨེཝཾ ཝདེཏི, ‘‘ན ཏཱཝཱཧཾ, ཨཱཝུསོ, ཨེཏསྨིཾ སིཀྑཱཔདེ སིཀྑིསྶཱམི ཡཱཝ ན ཨཉྙཾ བྷིཀྑུཾ བྱཏྟཾ ཝིནཡདྷརཾ པཎྜིཏཾ མེདྷཱཝིཾ བཧུསྶུཏཾ དྷམྨཀཐིཀཾ པརིཔུཙྪཱམཱི’’ཏི བྷཎཏི, ཨཱཔཏྟི དུཀྐཊསྶ། ཨནུཔསམྤནྣེ ཨུཔསམྤནྣསཉྙཱི, ཨཱཔཏྟི དུཀྐཊསྶ། ཨནུཔསམྤནྣེ ཝེམཏིཀོ, ཨཱཔཏྟི དུཀྐཊསྶ། ཨནུཔསམྤནྣེ ཨནུཔསམྤནྣསཉྙཱི, ཨཱཔཏྟི དུཀྐཊསྶ།
Anupasampannena paññattena vā apaññattena vā vuccamāno – ‘‘idaṃ na sallekhāya na dhutatthāya na pāsādikatāya na apacayāya na vīriyārambhāya saṃvattatī’’ti evaṃ vadeti, ‘‘na tāvāhaṃ, āvuso, etasmiṃ sikkhāpade sikkhissāmi yāva na aññaṃ bhikkhuṃ byattaṃ vinayadharaṃ paṇḍitaṃ medhāviṃ bahussutaṃ dhammakathikaṃ paripucchāmī’’ti bhaṇati, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
སིཀྑམཱནེནཱཏི སིཀྑིཏུཀཱམེན།
Sikkhamānenāti sikkhitukāmena.
ཨཉྙཱཏབྦནྟི ཛཱནིཏབྦཾ།
Aññātabbanti jānitabbaṃ.
པརིཔུཙྪིཏབྦནྟི ‘‘ཨིདཾ, བྷནྟེ, ཀཐཾ; ཨིམསྶ ཝཱ ཀྭཏྠོ’’ཏི?
Paripucchitabbanti ‘‘idaṃ, bhante, kathaṃ; imassa vā kvattho’’ti?
པརིཔཉྷིཏབྦནྟི ཙིནྟེཏབྦཾ ཏུལཡིཏབྦཾ།
Paripañhitabbanti cintetabbaṃ tulayitabbaṃ.
ཨཡཾ ཏཏྠ སཱམཱིཙཱིཏི ཨཡཾ ཏཏྠ ཨནུདྷམྨཏཱ།
Ayaṃ tattha sāmīcīti ayaṃ tattha anudhammatā.
༤༣༧. ཨནཱཔཏྟི ‘‘ཛཱནིསྶཱམི སིཀྑིསྶཱམཱི’’ཏི བྷཎཏི, ཨུམྨཏྟཀསྶ, ཨཱདིཀམྨིཀསྶཱཏི།
437. Anāpatti ‘‘jānissāmi sikkhissāmī’’ti bhaṇati, ummattakassa, ādikammikassāti.
སཧདྷམྨིཀསིཀྑཱཔདཾ ནིཊྛིཏཾ པཋམཾ།
Sahadhammikasikkhāpadaṃ niṭṭhitaṃ paṭhamaṃ.
༢. ཝིལེཁནསིཀྑཱཔདཾ
2. Vilekhanasikkhāpadaṃ
༤༣༨. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། 7 ཏེན ཁོ པན སམཡེན བྷགཝཱ བྷིཀྑཱུནཾ ཨནེཀཔརིཡཱཡེན ཝིནཡཀཐཾ ཀཐེཏི, ཝིནཡསྶ ཝཎྞཾ བྷཱསཏི, ཝིནཡཔརིཡཏྟིཡཱ ཝཎྞཾ བྷཱསཏི, ཨཱདིསྶ ཨཱདིསྶ ཨཱཡསྨཏོ ཨུཔཱལིསྶ ཝཎྞཾ བྷཱསཏི། བྷིཀྑཱུནཾ ཨེཏདཧོསི 8 – ‘‘བྷགཝཱ ཁོ ཨནེཀཔརིཡཱཡེན ཝིནཡཀཐཾ ཀཐེཏི, ཝིནཡསྶ ཝཎྞཾ བྷཱསཏི, ཝིནཡཔརིཡཏྟིཡཱ ཝཎྞཾ བྷཱསཏི, ཨཱདིསྶ ཨཱདིསྶ ཨཱཡསྨཏོ ཨུཔཱལིསྶ ཝཎྞཾ བྷཱསཏི། ཧནྡ མཡཾ, ཨཱཝུསོ, ཨཱཡསྨཏོ ཨུཔཱལིསྶ སནྟིཀེ ཝིནཡཾ པརིཡཱཔུཎཱམཱ’’ཏི, ཏེ ཙ བཧཱུ བྷིཀྑཱུ ཐེརཱ ཙ ནཝཱ ཙ མཛ྄ཛྷིམཱ ཙ ཨཱཡསྨཏོ ཨུཔཱལིསྶ སནྟིཀེ ཝིནཡཾ པརིཡཱཔུཎནྟི།
438. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. 9 Tena kho pana samayena bhagavā bhikkhūnaṃ anekapariyāyena vinayakathaṃ katheti, vinayassa vaṇṇaṃ bhāsati, vinayapariyattiyā vaṇṇaṃ bhāsati, ādissa ādissa āyasmato upālissa vaṇṇaṃ bhāsati. Bhikkhūnaṃ etadahosi 10 – ‘‘bhagavā kho anekapariyāyena vinayakathaṃ katheti, vinayassa vaṇṇaṃ bhāsati, vinayapariyattiyā vaṇṇaṃ bhāsati, ādissa ādissa āyasmato upālissa vaṇṇaṃ bhāsati. Handa mayaṃ, āvuso, āyasmato upālissa santike vinayaṃ pariyāpuṇāmā’’ti, te ca bahū bhikkhū therā ca navā ca majjhimā ca āyasmato upālissa santike vinayaṃ pariyāpuṇanti.
ཨཐ ཁོ ཚབྦགྒིཡཱནཾ བྷིཀྑཱུནཾ ཨེཏདཧོསི – ‘‘ཨེཏརཧི ཁོ, ཨཱཝུསོ, བཧཱུ བྷིཀྑཱུ ཐེརཱ ཙ ནཝཱ ཙ མཛ྄ཛྷིམཱ ཙ ཨཱཡསྨཏོ ཨུཔཱལིསྶ སནྟིཀེ ཝིནཡཾ པརིཡཱཔུཎནྟི། སཙེ ཨིམེ ཝིནཡེ པཀཏཉྙུནོ བྷཝིསྶནྟི ཨམྷེ ཡེནིཙྪཀཾ ཡདིཙྪཀཾ ཡཱཝདིཙྪཀཾ ཨཱཀཌྜྷིསྶནྟི པརིཀཌྜྷིསྶནྟི། ཧནྡ མཡཾ, ཨཱཝུསོ, ཝིནཡཾ ཝིཝཎྞེམཱ’’ཏི། ཨཐ ཁོ ཚབྦགྒིཡཱ བྷིཀྑཱུ བྷིཀྑཱུ ཨུཔསངྐམིཏྭཱ ཨེཝཾ ཝདནྟི – ‘‘ཀིཾ པནིམེཧི ཁུདྡཱནུཁུདྡཀེཧི སིཀྑཱཔདེཧི ཨུདྡིཊྛེཧི, ཡཱཝདེཝ ཀུཀྐུཙྩཱཡ ཝིཧེསཱཡ ཝིལེཁཱཡ སཾཝཏྟནྟཱི’’ཏི! ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ཀཐཉྷི ནཱམ ཚབྦགྒིཡཱ བྷིཀྑཱུ ཝིནཡཾ ཝིཝཎྞེསྶནྟཱིཏི…པེ॰… སཙྩཾ ཀིར ཏུམྷེ, བྷིཀྑཝེ, ཝིནཡཾ ཝིཝཎྞེཐཱཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, ཝིནཡཾ ཝིཝཎྞེསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Atha kho chabbaggiyānaṃ bhikkhūnaṃ etadahosi – ‘‘etarahi kho, āvuso, bahū bhikkhū therā ca navā ca majjhimā ca āyasmato upālissa santike vinayaṃ pariyāpuṇanti. Sace ime vinaye pakataññuno bhavissanti amhe yenicchakaṃ yadicchakaṃ yāvadicchakaṃ ākaḍḍhissanti parikaḍḍhissanti. Handa mayaṃ, āvuso, vinayaṃ vivaṇṇemā’’ti. Atha kho chabbaggiyā bhikkhū bhikkhū upasaṅkamitvā evaṃ vadanti – ‘‘kiṃ panimehi khuddānukhuddakehi sikkhāpadehi uddiṭṭhehi, yāvadeva kukkuccāya vihesāya vilekhāya saṃvattantī’’ti! Ye te bhikkhū appicchā…pe… te ujjhāyanti khiyyanti vipācenti – kathañhi nāma chabbaggiyā bhikkhū vinayaṃ vivaṇṇessantīti…pe… saccaṃ kira tumhe, bhikkhave, vinayaṃ vivaṇṇethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, vinayaṃ vivaṇṇessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༣༩. ‘‘ཡོ པན བྷིཀྑུ པཱཏིམོཀྑེ ཨུདྡིསྶམཱནེ ཨེཝཾ ཝདེཡྻ – ‘ཀིཾ པནིམེཧི ཁུདྡཱནུཁུདྡཀེཧི སིཀྑཱཔདེཧི ཨུདྡིཊྛེཧི, ཡཱཝདེཝ ཀུཀྐུཙྩཱཡ ཝིཧེསཱཡ ཝིལེཁཱཡ སཾཝཏྟནྟཱི’ཏི, སིཀྑཱཔདཝིཝཎྞཀེ པཱཙིཏྟིཡ’’ནྟི།
439.‘‘Yo pana bhikkhu pātimokkhe uddissamāne evaṃ vadeyya – ‘kiṃ panimehi khuddānukhuddakehi sikkhāpadehi uddiṭṭhehi, yāvadeva kukkuccāya vihesāya vilekhāya saṃvattantī’ti, sikkhāpadavivaṇṇake pācittiya’’nti.
༤༤༠. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
440.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
པཱཏིམོཀྑེ ཨུདྡིསྶམཱནེཏི ཨུདྡིསནྟེ ཝཱ ཨུདྡིསཱཔེནྟེ ཝཱ སཛ྄ཛྷཱཡཾ ཝཱ ཀརོནྟེ།
Pātimokkhe uddissamāneti uddisante vā uddisāpente vā sajjhāyaṃ vā karonte.
ཨེཝཾ ཝདེཡྻཱཏི – ‘‘ཀིཾ པནིམེཧི ཁུདྡཱནུཁུདྡཀེཧི སིཀྑཱཔདེཧི ཨུདྡིཊྛེཧི, ཡཱཝདེཝ ཀུཀྐུཙྩཱཡ ཝིཧེསཱཡ ཝིལེཁཱཡ སཾཝཏྟནྟཱིཏི། ‘‘ཡེ ཨིམཾ པརིཡཱཔུཎནྟི ཏེསཾ ཀུཀྐུཙྩཾ ཧོཏི, ཝིཧེསཱ ཧོཏི, ཝིལེཁཱ ཧོཏི, ཡེ ཨིམཾ ན པརིཡཱཔུཎནྟི ཏེསཾ ཀུཀྐུཙྩཾ ན ཧོཏི ཝིཧེསཱ ན ཧོཏི ཝིལེཁཱ ན ཧོཏི། ཨནུདྡིཊྛཾ ཨིདཾ ཝརཾ, ཨནུགྒཧིཏཾ ཨིདཾ ཝརཾ, ཨཔརིཡཱཔུཊཾ ཨིདཾ ཝརཾ, ཨདྷཱརིཏཾ ཨིདཾ ཝརཾ, ཝིནཡོ ཝཱ ཨནྟརདྷཱཡཏུ, ཨིམེ ཝཱ བྷིཀྑཱུ ཨཔཀཏཉྙུནོ ཧོནྟཱུ’’ཏི ཨུཔསམྤནྣསྶ ཝིནཡཾ ཝིཝཎྞེཏི, ཨཱཔཏྟི པཱཙིཏྟིཡསྶ།
Evaṃvadeyyāti – ‘‘kiṃ panimehi khuddānukhuddakehi sikkhāpadehi uddiṭṭhehi, yāvadeva kukkuccāya vihesāya vilekhāya saṃvattantīti. ‘‘Ye imaṃ pariyāpuṇanti tesaṃ kukkuccaṃ hoti, vihesā hoti, vilekhā hoti, ye imaṃ na pariyāpuṇanti tesaṃ kukkuccaṃ na hoti vihesā na hoti vilekhā na hoti. Anuddiṭṭhaṃ idaṃ varaṃ, anuggahitaṃ idaṃ varaṃ, apariyāpuṭaṃ idaṃ varaṃ, adhāritaṃ idaṃ varaṃ, vinayo vā antaradhāyatu, ime vā bhikkhū apakataññuno hontū’’ti upasampannassa vinayaṃ vivaṇṇeti, āpatti pācittiyassa.
༤༤༡. ཨུཔསམྤནྣེ ཨུཔསམྤནྣསཉྙཱི ཝིནཡཾ ཝིཝཎྞེཏི, ཨཱཔཏྟི པཱཙིཏྟིཡསྶ ། ཨུཔསམྤནྣེ ཝེམཏིཀོ ཝིནཡཾ ཝིཝཎྞེཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཨནུཔསམྤནྣསཉྙཱི ཝིནཡཾ ཝིཝཎྞེཏི, ཨཱཔཏྟི པཱཙིཏྟིཡསྶ།
441. Upasampanne upasampannasaññī vinayaṃ vivaṇṇeti, āpatti pācittiyassa . Upasampanne vematiko vinayaṃ vivaṇṇeti, āpatti pācittiyassa. Upasampanne anupasampannasaññī vinayaṃ vivaṇṇeti, āpatti pācittiyassa.
ཨཉྙཾ དྷམྨཾ ཝིཝཎྞེཏི, ཨཱཔཏྟི དུཀྐཊསྶ། ཨནུཔསམྤནྣསྶ ཝིནཡཾ ཝཱ ཨཉྙཾ ཝཱ དྷམྨཾ ཝིཝཎྞེཏི, ཨཱཔཏྟི དུཀྐཊསྶ། ཨནུཔསམྤནྣེ ཨུཔསམྤནྣསཉྙཱི, ཨཱཔཏྟི དུཀྐཊསྶ། ཨནུཔསམྤནྣེ ཝེམཏིཀོ, ཨཱཔཏྟི དུཀྐཊསྶ། ཨནུཔསམྤནྣེ ཨནུཔསམྤནྣསཉྙཱི, ཨཱཔཏྟི དུཀྐཊསྶ།
Aññaṃ dhammaṃ vivaṇṇeti, āpatti dukkaṭassa. Anupasampannassa vinayaṃ vā aññaṃ vā dhammaṃ vivaṇṇeti, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
༤༤༢. ཨནཱཔཏྟི ན ཝིཝཎྞེཏུཀཱམོ, ‘‘ཨིངྒྷ ཏྭཾ སུཏྟནྟེ ཝཱ གཱཐཱཡོ ཝཱ ཨབྷིདྷམྨཾ ཝཱ པརིཡཱཔུཎསྶུ, པཙྪཱ ཝིནཡཾ པརིཡཱཔུཎིསྶསཱི’’ཏི བྷཎཏི, ཨུམྨཏྟཀསྶ, ཨཱདིཀམྨིཀསྶཱཏི།
442. Anāpatti na vivaṇṇetukāmo, ‘‘iṅgha tvaṃ suttante vā gāthāyo vā abhidhammaṃ vā pariyāpuṇassu, pacchā vinayaṃ pariyāpuṇissasī’’ti bhaṇati, ummattakassa, ādikammikassāti.
ཝིལེཁནསིཀྑཱཔདཾ ནིཊྛིཏཾ དུཏིཡཾ།
Vilekhanasikkhāpadaṃ niṭṭhitaṃ dutiyaṃ.
༣. མོཧནསིཀྑཱཔདཾ
3. Mohanasikkhāpadaṃ
༤༤༣. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ ཨནཱཙཱརཾ ཨཱཙརིཏྭཱ ‘‘ཨཉྙཱཎཀེན ཨཱཔནྣཱཏི ཛཱནནྟཱུ’’ཏི པཱཏིམོཀྑེ ཨུདྡིསྶམཱནེ ཨེཝཾ ཝདནྟི – ‘‘ཨིདཱནེཝ ཁོ མཡཾ ཛཱནཱམ, ཨཡམྤི ཀིར དྷམྨོ སུཏྟཱགཏོ སུཏྟཔརིཡཱཔནྣོ ཨནྭདྡྷམཱསཾ ཨུདྡེསཾ ཨཱགཙྪཏཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ པཱཏིམོཀྑེ ཨུདྡིསྶམཱནེ ཨེཝཾ ཝཀྑནྟི – ཨིདཱནེཝ ཁོ མཡཾ ཛཱནཱམ , ཨཡམྤི ཀིར དྷམྨོ སུཏྟཱགཏོ སུཏྟཔརིཡཱཔནྣོ ཨནྭདྡྷམཱསཾ ཨུདྡེསཾ ཨཱགཙྪཏཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, པཱཏིམོཀྑེ ཨུདྡིསྶམཱནེ ཨེཝཾ ཝདེཐ – ‘‘ཨིདཱནེཝ ཁོ མཡཾ ཛཱནཱམ, ཨཡམྤི ཀིར དྷམྨོ སུཏྟཱགཏོ སུཏྟཔརིཡཱཔནྣོ ཨནྭདྡྷམཱསཾ ཨུདྡེསཾ ཨཱགཙྪཏཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, པཱཏིམོཀྑེ ཨུདྡིསྶམཱནེ ཨེཝཾ ཝཀྑཐ – ‘‘ཨིདཱནེཝ ཁོ མཡཾ ཛཱནཱམ, ཨཡམྤི ཀིར དྷམྨོ སུཏྟཱགཏོ སུཏྟཔརིཡཱཔནྣོ ཨནྭདྡྷམཱསཾ ཨུདྡེསཾ ཨཱགཙྪཏཱི’’ཏི! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
443. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū anācāraṃ ācaritvā ‘‘aññāṇakena āpannāti jānantū’’ti pātimokkhe uddissamāne evaṃ vadanti – ‘‘idāneva kho mayaṃ jānāma, ayampi kira dhammo suttāgato suttapariyāpanno anvaddhamāsaṃ uddesaṃ āgacchatī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū pātimokkhe uddissamāne evaṃ vakkhanti – idāneva kho mayaṃ jānāma , ayampi kira dhammo suttāgato suttapariyāpanno anvaddhamāsaṃ uddesaṃ āgacchatī’’ti…pe… saccaṃ kira tumhe, bhikkhave, pātimokkhe uddissamāne evaṃ vadetha – ‘‘idāneva kho mayaṃ jānāma, ayampi kira dhammo suttāgato suttapariyāpanno anvaddhamāsaṃ uddesaṃ āgacchatī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, pātimokkhe uddissamāne evaṃ vakkhatha – ‘‘idāneva kho mayaṃ jānāma, ayampi kira dhammo suttāgato suttapariyāpanno anvaddhamāsaṃ uddesaṃ āgacchatī’’ti! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༤༤. ‘‘ཡོ པན བྷིཀྑུ ཨནྭདྡྷམཱསཾ པཱཏིམོཀྑེ ཨུདྡིསྶམཱནེ ཨེཝཾ ཝདེཡྻ – ‘ཨིདཱནེཝ ཁོ ཨཧཾ ཛཱནཱམི, ཨཡམྤི ཀིར དྷམྨོ སུཏྟཱགཏོ སུཏྟཔརིཡཱཔནྣོ ཨནྭདྡྷམཱསཾ ཨུདྡེསཾ ཨཱགཙྪཏཱི’ཏི། ཏཉྩེ བྷིཀྑུཾ ཨཉྙེ བྷིཀྑཱུ ཛཱནེཡྻུཾ ནིསིནྣཔུབྦཾ ཨིམིནཱ བྷིཀྑུནཱ དྭཏྟིཀྑཏྟུཾ པཱཏིམོཀྑེ ཨུདྡིསྶམཱནེ, ཀོ པན ཝཱདོ བྷིཡྻོ 11, ན ཙ ཏསྶ བྷིཀྑུནོ ཨཉྙཱཎཀེན མུཏྟི ཨཏྠི, ཡཉྩ ཏཏྠ ཨཱཔཏྟིཾ ཨཱཔནྣོ ཏཉྩ ཡཐཱདྷམྨོ ཀཱརེཏབྦོ, ཨུཏྟརི ཙསྶ མོཧོ ཨཱརོཔེཏབྦོ – ‘ཏསྶ ཏེ, ཨཱཝུསོ, ཨལཱབྷཱ, ཏསྶ ཏེ དུལླདྡྷཾ, ཡཾ ཏྭཾ པཱཏིམོཀྑེ ཨུདྡིསྶམཱནེ ན སཱདྷུཀཾ ཨཊྛིཾ ཀཏྭཱ 12 མནསི ཀརོསཱི’ཏི། ཨིདཾ ཏསྨིཾ མོཧནཀེ པཱཙིཏྟིཡ’’ནྟི།
444.‘‘Yo pana bhikkhu anvaddhamāsaṃpātimokkhe uddissamāne evaṃ vadeyya – ‘idāneva kho ahaṃ jānāmi, ayampi kira dhammo suttāgato suttapariyāpanno anvaddhamāsaṃ uddesaṃ āgacchatī’ti. Tañce bhikkhuṃ aññe bhikkhū jāneyyuṃ nisinnapubbaṃ iminā bhikkhunā dvattikkhattuṃ pātimokkhe uddissamāne, ko pana vādo bhiyyo 13, na ca tassa bhikkhuno aññāṇakena mutti atthi, yañca tattha āpattiṃ āpanno tañca yathādhammo kāretabbo, uttari cassa moho āropetabbo – ‘tassa te, āvuso, alābhā, tassa te dulladdhaṃ, yaṃ tvaṃ pātimokkhe uddissamāne na sādhukaṃ aṭṭhiṃ katvā 14 manasi karosī’ti. Idaṃ tasmiṃ mohanake pācittiya’’nti.
༤༤༥. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
445.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ཨནྭདྡྷམཱསནྟི ཨནུཔོསཐིཀཾ།
Anvaddhamāsanti anuposathikaṃ.
པཱཏིམོཀྑེ ཨུདྡིསྶམཱནེཏི ཨུདྡིསནྟེ།
Pātimokkhe uddissamāneti uddisante.
ཨེཝཾ ཝདེཡྻཱཏི ཨནཱཙཱརཾ ཨཱཙརིཏྭཱ – ‘‘ཨཉྙཱཎཀེན ཨཱཔནྣོཏི ཛཱནནྟཱུ’’ཏི པཱཏིམོཀྑེ ཨུདྡིསྶམཱནེ ཨེཝཾ ཝདེཏི – ‘‘ཨིདཱནེཝ ཁོ ཨཧཾ ཛཱནཱམི, ཨཡམྤི ཀིར དྷམྨོ སུཏྟཱགཏོ སུཏྟཔརིཡཱཔནྣོ ཨནྭདྡྷམཱསཾ ཨུདྡེསཾ ཨཱགཙྪཏཱི’’ཏི, ཨཱཔཏྟི དུཀྐཊསྶ།
Evaṃvadeyyāti anācāraṃ ācaritvā – ‘‘aññāṇakena āpannoti jānantū’’ti pātimokkhe uddissamāne evaṃ vadeti – ‘‘idāneva kho ahaṃ jānāmi, ayampi kira dhammo suttāgato suttapariyāpanno anvaddhamāsaṃ uddesaṃ āgacchatī’’ti, āpatti dukkaṭassa.
ཏཉྩེ མོཧེཏུཀཱམཾ བྷིཀྑུཾ ཨཉྙེ བྷིཀྑཱུ ཛཱནེཡྻུཾ ནིསིནྣཔུབྦཾ ཨིམིནཱ བྷིཀྑུནཱ དྭཏྟིཀྑཏྟུཾ པཱཏིམོཀྑེ ཨུདྡིསྶམཱནེ, ཀོ པན ཝཱདོ བྷིཡྻོ, ན ཙ ཏསྶ བྷིཀྑུནོ ཨཉྙཱཎཀེན མུཏྟི ཨཏྠི, ཡཉྩ ཏཏྠ ཨཱཔཏྟིཾ ཨཱཔནྣོ, ཏཉྩ ཡཐཱདྷམྨོ ཀཱརེཏབྦོ, ཨུཏྟརི ཙསྶ མོཧོ ཨཱརོཔེཏབྦོ། ཨེཝཉྩ པན, བྷིཀྑཝེ, ཨཱརོཔེཏབྦོ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
Tañce mohetukāmaṃ bhikkhuṃ aññe bhikkhū jāneyyuṃ nisinnapubbaṃ iminā bhikkhunā dvattikkhattuṃ pātimokkhe uddissamāne, ko pana vādo bhiyyo, na ca tassa bhikkhuno aññāṇakena mutti atthi, yañca tattha āpattiṃ āpanno, tañca yathādhammo kāretabbo, uttari cassa moho āropetabbo. Evañca pana, bhikkhave, āropetabbo. Byattena bhikkhunā paṭibalena saṅgho ñāpetabbo –
༤༤༦. ‘‘སུཎཱཏུ མེ, བྷནྟེ, སངྒྷོ། ཨཡཾ ཨིཏྠནྣཱམོ བྷིཀྑུ པཱཏིམོཀྑེ ཨུདྡིསྶམཱནེ ན སཱདྷུཀཾ ཨཊྛིཾ ཀཏྭཱ མནསི ཀརོཏི། ཡདི སངྒྷསྶ པཏྟཀལླཾ, སངྒྷོ ཨིཏྠནྣཱམསྶ བྷིཀྑུནོ མོཧཾ ཨཱརོཔེཡྻ། ཨེསཱ ཉཏྟི།
446. ‘‘Suṇātu me, bhante, saṅgho. Ayaṃ itthannāmo bhikkhu pātimokkhe uddissamāne na sādhukaṃ aṭṭhiṃ katvā manasi karoti. Yadi saṅghassa pattakallaṃ, saṅgho itthannāmassa bhikkhuno mohaṃ āropeyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ ཨིཏྠནྣཱམོ བྷིཀྑུ པཱཏིམོཀྑེ ཨུདྡིསྶམཱནེ ན སཱདྷུཀཾ ཨཊྛིཾ ཀཏྭཱ མནསི ཀརོཏི། སངྒྷོ ཨིཏྠནྣཱམསྶ བྷིཀྑུནོ མོཧཾ ཨཱརོཔེཏི། ཡསྶཱཡསྨཏོ ཁམཏི ཨིཏྠནྣཱམསྶ བྷིཀྑུནོ མོཧསྶ ཨཱརོཔནཱ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ itthannāmo bhikkhu pātimokkhe uddissamāne na sādhukaṃ aṭṭhiṃ katvā manasi karoti. Saṅgho itthannāmassa bhikkhuno mohaṃ āropeti. Yassāyasmato khamati itthannāmassa bhikkhuno mohassa āropanā, so tuṇhassa; yassa nakkhamati, so bhāseyya.
‘‘ཨཱརོཔིཏོ སངྒྷེན ཨིཏྠནྣཱམསྶ བྷིཀྑུནོ མོཧོ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Āropito saṅghena itthannāmassa bhikkhuno moho. Khamati saṅghassa, tasmā tuṇhī, evametaṃ dhārayāmī’’ti.
ཨནཱརོཔིཏེ མོཧེ མོཧེཏི, ཨཱཔཏྟི དུཀྐཊསྶ། ཨཱརོཔིཏེ མོཧེ མོཧེཏི, ཨཱཔཏྟི པཱཙིཏྟིཡསྶ།
Anāropite mohe moheti, āpatti dukkaṭassa. Āropite mohe moheti, āpatti pācittiyassa.
༤༤༧. དྷམྨཀམྨེ དྷམྨཀམྨསཉྙཱི, ཨཱཔཏྟི པཱཙིཏྟིཡསྶ། དྷམྨཀམྨེ ཝེམཏིཀོ, ཨཱཔཏྟི པཱཙིཏྟིཡསྶ། དྷམྨཀམྨེ ཨདྷམྨཀམྨསཉྙཱི མོཧེཏི, ཨཱཔཏྟི པཱཙིཏྟིཡསྶ།
447. Dhammakamme dhammakammasaññī, āpatti pācittiyassa. Dhammakamme vematiko, āpatti pācittiyassa. Dhammakamme adhammakammasaññī moheti, āpatti pācittiyassa.
ཨདྷམྨཀམྨེ དྷམྨཀམྨསཉྙཱི, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀོ , ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱི, ཨཱཔཏྟི དུཀྐཊསྶ།
Adhammakamme dhammakammasaññī, āpatti dukkaṭassa. Adhammakamme vematiko , āpatti dukkaṭassa. Adhammakamme adhammakammasaññī, āpatti dukkaṭassa.
༤༤༨. ཨནཱཔཏྟི ན ཝིཏྠཱརེན སུཏཾ ཧོཏི, ཨཱུནཀདྭཏྟིཀྑཏྟུཾ ཝིཏྠཱརེན སུཏཾ ཧོཏི, ན མོཧེཏུཀཱམསྶ, ཨུམྨཏྟཀསྶ, ཨཱདིཀམྨིཀསྶཱཏི།
448. Anāpatti na vitthārena sutaṃ hoti, ūnakadvattikkhattuṃ vitthārena sutaṃ hoti, na mohetukāmassa, ummattakassa, ādikammikassāti.
མོཧནསིཀྑཱཔདཾ ནིཊྛིཏཾ ཏཏིཡཾ།
Mohanasikkhāpadaṃ niṭṭhitaṃ tatiyaṃ.
༤. པཧཱརསིཀྑཱཔདཾ
4. Pahārasikkhāpadaṃ
༤༤༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ ཀུཔིཏཱ ཨནཏྟམནཱ སཏྟརསཝགྒིཡཱནཾ བྷིཀྑཱུནཾ པཧཱརཾ དེནྟི། ཏེ རོདནྟི། བྷིཀྑཱུ ཨེཝམཱཧཾསུ – ‘‘ཀིསྶ ཏུམྷེ, ཨཱཝུསོ, རོདཐཱ’’ཏི? ‘‘ཨིམེ, ཨཱཝུསོ, ཚབྦགྒིཡཱ བྷིཀྑཱུ ཀུཔིཏཱ ཨནཏྟམནཱ ཨམྷཱཀཾ པཧཱརཾ དེནྟཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ ཀུཔིཏཱ ཨནཏྟམནཱ བྷིཀྑཱུནཾ པཧཱརཾ དསྶནྟཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, ཀུཔིཏཱ ཨནཏྟམནཱ བྷིཀྑཱུནཾ པཧཱརཾ དེཐཱཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, ཀུཔིཏཱ ཨནཏྟམནཱ བྷིཀྑཱུནཾ པཧཱརཾ དསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
449. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū kupitā anattamanā sattarasavaggiyānaṃ bhikkhūnaṃ pahāraṃ denti. Te rodanti. Bhikkhū evamāhaṃsu – ‘‘kissa tumhe, āvuso, rodathā’’ti? ‘‘Ime, āvuso, chabbaggiyā bhikkhū kupitā anattamanā amhākaṃ pahāraṃ dentī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū kupitā anattamanā bhikkhūnaṃ pahāraṃ dassantī’’ti…pe… saccaṃ kira tumhe, bhikkhave, kupitā anattamanā bhikkhūnaṃ pahāraṃ dethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, kupitā anattamanā bhikkhūnaṃ pahāraṃ dassatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༥༠. ‘‘ཡོ པན བྷིཀྑུ བྷིཀྑུསྶ ཀུཔིཏོ ཨནཏྟམནོ པཧཱརཾ དདེཡྻ, པཱཙིཏྟིཡ’’ནྟི།
450.‘‘Yo pana bhikkhu bhikkhussa kupito anattamano pahāraṃ dadeyya, pācittiya’’nti.
༤༥༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
451.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
བྷིཀྑུསྶཱཏི ཨཉྙསྶ བྷིཀྑུསྶ།
Bhikkhussāti aññassa bhikkhussa.
ཀུཔིཏོ ཨནཏྟམནོཏི ཨནབྷིརདྡྷོ ཨཱཧཏཙིཏྟོ ཁིལཛཱཏོ།
Kupito anattamanoti anabhiraddho āhatacitto khilajāto.
པཧཱརཾ དདེཡྻཱཏི ཀཱཡེན ཝཱ ཀཱཡཔཊིབདྡྷེན ཝཱ ནིསྶགྒིཡེན ཝཱ ཨནྟམསོ ཨུཔྤལཔཏྟེནཔི པཧཱརཾ དེཏི, ཨཱཔཏྟི པཱཙིཏྟིཡསྶ།
Pahāraṃ dadeyyāti kāyena vā kāyapaṭibaddhena vā nissaggiyena vā antamaso uppalapattenapi pahāraṃ deti, āpatti pācittiyassa.
༤༥༢. ཨུཔསམྤནྣེ ཨུཔསམྤནྣསཉྙཱི ཀུཔིཏོ ཨནཏྟམནོ པཧཱརཾ དེཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཝེམཏིཀོ ཀུཔིཏོ ཨནཏྟམནོ པཧཱརཾ དེཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཨནུཔསམྤནྣསཉྙཱི ཀུཔིཏོ ཨནཏྟམནོ པཧཱརཾ དེཏི, ཨཱཔཏྟི པཱཙིཏྟིཡསྶ།
452. Upasampanne upasampannasaññī kupito anattamano pahāraṃ deti, āpatti pācittiyassa. Upasampanne vematiko kupito anattamano pahāraṃ deti, āpatti pācittiyassa. Upasampanne anupasampannasaññī kupito anattamano pahāraṃ deti, āpatti pācittiyassa.
ཨནུཔསམྤནྣསྶ ཀུཔིཏོ ཨནཏྟམནོ པཧཱརཾ དེཏི, ཨཱཔཏྟི དུཀྐཊསྶ། ཨནུཔསམྤནྣེ ཨུཔསམྤནྣསཉྙཱི, ཨཱཔཏྟི དུཀྐཊསྶ། ཨནུཔསམྤནྣེ ཝེམཏིཀོ , ཨཱཔཏྟི དུཀྐཊསྶ། ཨནུཔསམྤནྣེ ཨནུཔསམྤནྣསཉྙཱི, ཨཱཔཏྟི དུཀྐཊསྶ།
Anupasampannassa kupito anattamano pahāraṃ deti, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko , āpatti dukkaṭassa. Anupasampanne anupasampannasaññī, āpatti dukkaṭassa.
༤༥༣. ཨནཱཔཏྟི ཀེནཙི ཝིཧེཋཱིཡམཱནོ མོཀྑཱདྷིཔྤཱཡོ པཧཱརཾ དེཏི, ཨུམྨཏྟཀསྶ, ཨཱདིཀམྨིཀསྶཱཏི།
453. Anāpatti kenaci viheṭhīyamāno mokkhādhippāyo pahāraṃ deti, ummattakassa, ādikammikassāti.
པཧཱརསིཀྑཱཔདཾ ནིཊྛིཏཾ ཙཏུཏྠཾ།
Pahārasikkhāpadaṃ niṭṭhitaṃ catutthaṃ.
༥. ཏལསཏྟིཀསིཀྑཱཔདཾ
5. Talasattikasikkhāpadaṃ
༤༥༤. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ ཀུཔིཏཱ ཨནཏྟམནཱ སཏྟརསཝགྒིཡཱནཾ བྷིཀྑཱུནཾ ཏལསཏྟིཀཾ ཨུགྒིརནྟི། ཏེ པཧཱརསམུཙྩིཏཱ རོདནྟི། བྷིཀྑཱུ ཨེཝམཱཧཾསུ – ‘‘ཀིསྶ ཏུམྷེ, ཨཱཝུསོ, རོདཐཱ’’ཏི? ‘‘ཨིམེ, ཨཱཝུསོ, ཚབྦགྒིཡཱ བྷིཀྑཱུ ཀུཔིཏཱ ཨནཏྟམནཱ ཨམྷཱཀཾ ཏལསཏྟིཀཾ ཨུགྒིརནྟཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ ཀུཔིཏཱ ཨནཏྟམནཱ སཏྟརསཝགྒིཡཱནཾ བྷིཀྑཱུནཾ ཏལསཏྟིཀཾ ཨུགྒིརིསྶནྟཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, ཀུཔིཏཱ ཨནཏྟམནཱ སཏྟརསཝགྒིཡཱནཾ བྷིཀྑཱུནཾ ཏལསཏྟིཀཾ ཨུགྒིརཐཱཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, ཀུཔིཏཱ ཨནཏྟམནཱ སཏྟརསཝགྒིཡཱནཾ བྷིཀྑཱུནཾ ཏལསཏྟིཀཾ ཨུགྒིརིསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
454. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū kupitā anattamanā sattarasavaggiyānaṃ bhikkhūnaṃ talasattikaṃ uggiranti. Te pahārasamuccitā rodanti. Bhikkhū evamāhaṃsu – ‘‘kissa tumhe, āvuso, rodathā’’ti? ‘‘Ime, āvuso, chabbaggiyā bhikkhū kupitā anattamanā amhākaṃ talasattikaṃ uggirantī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū kupitā anattamanā sattarasavaggiyānaṃ bhikkhūnaṃ talasattikaṃ uggirissantī’’ti…pe… saccaṃ kira tumhe, bhikkhave, kupitā anattamanā sattarasavaggiyānaṃ bhikkhūnaṃ talasattikaṃ uggirathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, kupitā anattamanā sattarasavaggiyānaṃ bhikkhūnaṃ talasattikaṃ uggirissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༥༥. ‘‘ཡོ པན བྷིཀྑུ བྷིཀྑུསྶ ཀུཔིཏོ ཨནཏྟམནོ ཏལསཏྟིཀཾ ཨུགྒིརེཡྻ, པཱཙིཏྟིཡ’’ནྟི།
455.‘‘Yo pana bhikkhu bhikkhussa kupito anattamano talasattikaṃ uggireyya, pācittiya’’nti.
༤༥༦. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
456.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
བྷིཀྑུསྶཱཏི ཨཉྙསྶ བྷིཀྑུསྶ།
Bhikkhussāti aññassa bhikkhussa.
ཀུཔིཏོ ཨནཏྟམནོཏི ཨནབྷིརདྡྷོ ཨཱཧཏཙིཏྟོ ཁིལཛཱཏོ།
Kupito anattamanoti anabhiraddho āhatacitto khilajāto.
ཏལསཏྟིཀཾ ཨུགྒིརེཡྻཱཏི ཀཱཡཾ ཝཱ ཀཱཡཔཊིབདྡྷཾ ཝཱ ཨནྟམསོ ཨུཔྤལཔཏྟམྤི ཨུཙྩཱརེཏི, ཨཱཔཏྟི པཱཙིཏྟིཡསྶ།
Talasattikaṃuggireyyāti kāyaṃ vā kāyapaṭibaddhaṃ vā antamaso uppalapattampi uccāreti, āpatti pācittiyassa.
༤༥༧. ཨུཔསམྤནྣེ ཨུཔསམྤནྣསཉྙཱི ཀུཔིཏོ ཨནཏྟམནོ ཏལསཏྟིཀཾ ཨུགྒིརཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཝེམཏིཀོ ཀུཔིཏོ ཨནཏྟམནོ ཏལསཏྟིཀཾ ཨུགྒིརཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཨནུཔསམྤནྣསཉྙཱི ཀུཔིཏོ ཨནཏྟམནོ ཏལསཏྟིཀཾ ཨུགྒིརཏི, ཨཱཔཏྟི པཱཙིཏྟིཡསྶ།
457. Upasampanne upasampannasaññī kupito anattamano talasattikaṃ uggirati, āpatti pācittiyassa. Upasampanne vematiko kupito anattamano talasattikaṃ uggirati, āpatti pācittiyassa. Upasampanne anupasampannasaññī kupito anattamano talasattikaṃ uggirati, āpatti pācittiyassa.
ཨནུཔསམྤནྣསྶ ཀུཔིཏོ ཨནཏྟམནོ ཏལསཏྟིཀཾ ཨུགྒིརཏི, ཨཱཔཏྟི དུཀྐཊསྶ། ཨནུཔསམྤནྣེ ཨུཔསམྤནྣསཉྙཱི, ཨཱཔཏྟི དུཀྐཊསྶ། ཨནུཔསམྤནྣེ ཝེམཏིཀོ, ཨཱཔཏྟི དུཀྐཊསྶ། ཨནུཔསམྤནྣེ ཨནུཔསམྤནྣསཉྙཱི, ཨཱཔཏྟི དུཀྐཊསྶ།
Anupasampannassa kupito anattamano talasattikaṃ uggirati, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
༤༥༨. ཨནཱཔཏྟི ཀེནཙི ཝིཧེཋཱིཡམཱནོ མོཀྑཱདྷིཔྤཱཡོ ཏལསཏྟིཀཾ ཨུགྒིརཏི, ཨུམྨཏྟཀསྶ, ཨཱདིཀམྨིཀསྶཱཏི།
458. Anāpatti kenaci viheṭhīyamāno mokkhādhippāyo talasattikaṃ uggirati, ummattakassa, ādikammikassāti.
ཏལསཏྟིཀསིཀྑཱཔདཾ ནིཊྛིཏཾ པཉྩམཾ།
Talasattikasikkhāpadaṃ niṭṭhitaṃ pañcamaṃ.
༦. ཨམཱུལཀསིཀྑཱཔདཾ
6. Amūlakasikkhāpadaṃ
༤༥༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ བྷིཀྑུཾ ཨམཱུལཀེན སངྒྷཱདིསེསེན ཨནུདྡྷཾསེནྟི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ བྷིཀྑུཾ ཨམཱུལཀེན སངྒྷཱདིསེསེན ཨནུདྡྷཾསེསྶནྟཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, བྷིཀྑུཾ ཨམཱུལཀེན སངྒྷཱདིསེསེན ཨནུདྡྷཾསེཐཱཏི ? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, བྷིཀྑུཾ ཨམཱུལཀེན སངྒྷཱདིསེསེན ཨནུདྡྷཾསེསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
459. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū bhikkhuṃ amūlakena saṅghādisesena anuddhaṃsenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū bhikkhuṃ amūlakena saṅghādisesena anuddhaṃsessantī’’ti…pe… saccaṃ kira tumhe, bhikkhave, bhikkhuṃ amūlakena saṅghādisesena anuddhaṃsethāti ? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, bhikkhuṃ amūlakena saṅghādisesena anuddhaṃsessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༦༠. ‘‘ཡོ པན བྷིཀྑུ བྷིཀྑུཾ ཨམཱུལཀེན སངྒྷཱདིསེསེན ཨནུདྡྷཾསེཡྻ, པཱཙིཏྟིཡ’’ནྟི།
460.‘‘Yo pana bhikkhu bhikkhuṃ amūlakena saṅghādisesena anuddhaṃseyya, pācittiya’’nti.
༤༦༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
461.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
བྷིཀྑུནྟི ཨཉྙཾ བྷིཀྑུཾ།
Bhikkhunti aññaṃ bhikkhuṃ.
ཨམཱུལཀཾ ནཱམ ཨདིཊྛཾ ཨསྶུཏཾ ཨཔརིསངྐིཏཾ།
Amūlakaṃ nāma adiṭṭhaṃ assutaṃ aparisaṅkitaṃ.
སངྒྷཱདིསེསེནཱཏི ཏེརསནྣཾ ཨཉྙཏརེན།
Saṅghādisesenāti terasannaṃ aññatarena.
ཨནུདྡྷཾསེཡྻཱཏི ཙོདེཏི ཝཱ ཙོདཱཔེཏི ཝཱ, ཨཱཔཏྟི པཱཙིཏྟིཡསྶ།
Anuddhaṃseyyāti codeti vā codāpeti vā, āpatti pācittiyassa.
༤༦༢. ཨུཔསམྤནྣེ ཨུཔསམྤནྣསཉྙཱི ཨམཱུལཀེན སངྒྷཱདིསེསེན ཨནུདྡྷཾསེཏི , ཨཱཔཏྟི པཱཙིཏྟིཡསྶ། ཨུཔསམྤནྣེ ཝེམཏིཀོ ཨམཱུལཀེན སངྒྷཱདིསེསེན ཨནུདྡྷཾསེཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཨནུཔསམྤནྣསཉྙཱི ཨམཱུལཀེན སངྒྷཱདིསེསེན ཨནུདྡྷཾསེཏི, ཨཱཔཏྟི པཱཙིཏྟིཡསྶ།
462. Upasampanne upasampannasaññī amūlakena saṅghādisesena anuddhaṃseti , āpatti pācittiyassa. Upasampanne vematiko amūlakena saṅghādisesena anuddhaṃseti, āpatti pācittiyassa. Upasampanne anupasampannasaññī amūlakena saṅghādisesena anuddhaṃseti, āpatti pācittiyassa.
ཨཱཙཱརཝིཔཏྟིཡཱ ཝཱ དིཊྛིཝིཔཏྟིཡཱ ཝཱ ཨནུདྡྷཾསེཏི, ཨཱཔཏྟི དུཀྐཊསྶ། ཨནུཔསམྤནྣཾ ཨནུདྡྷཾསེཏི, ཨཱཔཏྟི དུཀྐཊསྶ། ཨནུཔསམྤནྣེ ཨུཔསམྤནྣསཉྙཱི, ཨཱཔཏྟི དུཀྐཊསྶ། ཨནུཔསམྤནྣེ ཝེམཏིཀོ, ཨཱཔཏྟི དུཀྐཊསྶ། ཨནུཔསམྤནྣེ ཨནུཔསམྤནྣསཉྙཱི, ཨཱཔཏྟི དུཀྐཊསྶ།
Ācāravipattiyā vā diṭṭhivipattiyā vā anuddhaṃseti, āpatti dukkaṭassa. Anupasampannaṃ anuddhaṃseti, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
༤༦༣. ཨནཱཔཏྟི ཏཐཱསཉྙཱི ཙོདེཏི, ཝཱ ཙོདཱཔེཏི ཝཱ, ཨུམྨཏྟཀསྶ, ཨཱདིཀམྨིཀསྶཱཏི།
463. Anāpatti tathāsaññī codeti, vā codāpeti vā, ummattakassa, ādikammikassāti.
ཨམཱུལཀསིཀྑཱཔདཾ ནིཊྛིཏཾ ཚཊྛཾ།
Amūlakasikkhāpadaṃ niṭṭhitaṃ chaṭṭhaṃ.
༧. སཉྩིཙྩསིཀྑཱཔདཾ
7. Sañciccasikkhāpadaṃ
༤༦༤. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ སཏྟརསཝགྒིཡཱནཾ བྷིཀྑཱུནཾ སཉྩིཙྩ ཀུཀྐུཙྩཾ ཨུཔདཧནྟི – ‘‘བྷགཝཏཱ, ཨཱཝུསོ, སིཀྑཱཔདཾ པཉྙཏྟཾ – ‘ན ཨཱུནཝཱིསཏིཝསྶོ པུགྒལོ ཨུཔསམྤཱདེཏབྦོ’ཏི། ཏུམྷེ ཙ ཨཱུནཝཱིསཏིཝསྶཱ ཨུཔསམྤནྣཱ། ཀཙྩི ནོ ཏུམྷེ ཨནུཔསམྤནྣཱ’’ཏི? ཏེ རོདནྟི། བྷིཀྑཱུ ཨེཝམཱཧཾསུ – ‘‘ཀིསྶ ཏུམྷེ, ཨཱཝུསོ, རོདཐཱ’’ཏི? ‘‘ཨིམེ , ཨཱཝུསོ, ཚབྦགྒིཡཱ བྷིཀྑཱུ ཨམྷཱཀཾ སཉྩིཙྩ ཀུཀྐུཙྩཾ ཨུཔདཧནྟཱི’’ཏི ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ བྷིཀྑཱུནཾ སཉྩིཙྩ ཀུཀྐུཙྩཾ ཨུཔདཧིསྶནྟཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, བྷིཀྑཱུནཾ སཉྩིཙྩ ཀུཀྐུཙྩཾ ཨུཔདཧཐཱཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, བྷིཀྑཱུནཾ སཉྩིཙྩ ཀུཀྐུཙྩཾ ཨུཔདཧིསྶཐ! ནེཏཾ, མོགྷཔུརིསཱ ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
464. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū sattarasavaggiyānaṃ bhikkhūnaṃ sañcicca kukkuccaṃ upadahanti – ‘‘bhagavatā, āvuso, sikkhāpadaṃ paññattaṃ – ‘na ūnavīsativasso puggalo upasampādetabbo’ti. Tumhe ca ūnavīsativassā upasampannā. Kacci no tumhe anupasampannā’’ti? Te rodanti. Bhikkhū evamāhaṃsu – ‘‘kissa tumhe, āvuso, rodathā’’ti? ‘‘Ime , āvuso, chabbaggiyā bhikkhū amhākaṃ sañcicca kukkuccaṃ upadahantī’’ti . Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū bhikkhūnaṃ sañcicca kukkuccaṃ upadahissantī’’ti…pe… saccaṃ kira tumhe, bhikkhave, bhikkhūnaṃ sañcicca kukkuccaṃ upadahathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, bhikkhūnaṃ sañcicca kukkuccaṃ upadahissatha! Netaṃ, moghapurisā appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༦༥. ‘‘ཡོ པན བྷིཀྑུ བྷིཀྑུསྶ སཉྩིཙྩ ཀུཀྐུཙྩཾ ཨུཔདཧེཡྻ 15 – ‘ཨིཏིསྶ མུཧུཏྟམྤི ཨཕཱསུ བྷཝིསྶཏཱི’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡ’’ནྟི།
465.‘‘Yo pana bhikkhu bhikkhussa sañcicca kukkuccaṃ upadaheyya 16 – ‘itissa muhuttampi aphāsu bhavissatī’ti etadeva paccayaṃ karitvā anaññaṃ, pācittiya’’nti.
༤༦༦. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
466.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
བྷིཀྑུསྶཱཏི ཨཉྙསྶ བྷིཀྑུསྶ།
Bhikkhussāti aññassa bhikkhussa.
སཉྩིཙྩཱཏི ཛཱནནྟོ སཉྫཱནནྟོ ཙེཙྩ ཨབྷིཝིཏརིཏྭཱ ཝཱིཏིཀྐམོ།
Sañciccāti jānanto sañjānanto cecca abhivitaritvā vītikkamo.
ཀུཀྐུཙྩཾ ཨུཔདཧེཡྻཱཏི ‘‘ཨཱུནཝཱིསཏིཝསྶོ མཉྙེ ཏྭཾ ཨུཔསམྤནྣོ, ཝིཀཱལེ མཉྙེ ཏཡཱ བྷུཏྟཾ, མཛྫཾ མཉྙེ ཏཡཱ པཱིཏཾ, མཱཏུགཱམེན སདྡྷིཾ རཧོ མཉྙེ ཏཡཱ ནིསིནྣ’’ནྟི ཀུཀྐུཙྩཾ ཨུཔདཧཏི, ཨཱཔཏྟི པཱཙིཏྟིཡསྶ།
Kukkuccaṃ upadaheyyāti ‘‘ūnavīsativasso maññe tvaṃ upasampanno, vikāle maññe tayā bhuttaṃ, majjaṃ maññe tayā pītaṃ, mātugāmena saddhiṃ raho maññe tayā nisinna’’nti kukkuccaṃ upadahati, āpatti pācittiyassa.
ཨེཏདེཝ པཙྩཡཾ ཀརིཏྭཱ, ཨནཉྙནྟི ན ཨཉྙོ ཀོཙི པཙྩཡོ ཧོཏི ཀུཀྐུཙྩཾ ཨུཔདཧིཏུཾ།
Etadevapaccayaṃ karitvā, anaññanti na añño koci paccayo hoti kukkuccaṃ upadahituṃ.
༤༦༧. ཨུཔསམྤནྣེ ཨུཔསམྤནྣསཉྙཱི སཉྩིཙྩ ཀུཀྐུཙྩཾ ཨུཔདཧཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཝེམཏིཀོ སཉྩིཙྩ ཀུཀྐུཙྩཾ ཨུཔདཧཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཨནུཔསམྤནྣསཉྙཱི སཉྩིཙྩ ཀུཀྐུཙྩཾ ཨུཔདཧཏི, ཨཱཔཏྟི པཱཙིཏྟིཡསྶ།
467. Upasampanne upasampannasaññī sañcicca kukkuccaṃ upadahati, āpatti pācittiyassa. Upasampanne vematiko sañcicca kukkuccaṃ upadahati, āpatti pācittiyassa. Upasampanne anupasampannasaññī sañcicca kukkuccaṃ upadahati, āpatti pācittiyassa.
ཨནུཔསམྤནྣསྶ སཉྩིཙྩ ཀུཀྐུཙྩཾ ཨུཔདཧཏི, ཨཱཔཏྟི དུཀྐཊསྶ། ཨནུཔསམྤནྣེ ཨུཔསམྤནྣསཉྙཱི, ཨཱཔཏྟི དུཀྐཊསྶ། ཨནུཔསམྤནྣེ ཝེམཏིཀོ, ཨཱཔཏྟི དུཀྐཊསྶ། ཨནུཔསམྤནྣེ ཨནུཔསམྤནྣསཉྙཱི, ཨཱཔཏྟི དུཀྐཊསྶ།
Anupasampannassa sañcicca kukkuccaṃ upadahati, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
༤༦༨. ཨནཱཔཏྟི ན ཀུཀྐུཙྩཾ ཨུཔདཧིཏུཀཱམོ ‘‘ཨཱུནཝཱིསཏིཝསྶོ མཉྙེ ཏྭཾ ཨུཔསམྤནྣོ, ཝིཀཱལེ མཉྙེ ཏཡཱ བྷུཏྟཾ, མཛྫཾ མཉྙེ ཏཡཱ པཱིཏཾ, མཱཏུགཱམེན སདྡྷིཾ རཧོ མཉྙེ ཏཡཱ ནིསིནྣཾ, ཨིངྒྷ ཛཱནཱཧི, མཱ ཏེ པཙྪཱ ཀུཀྐུཙྩཾ ཨཧོསཱི’’ཏི བྷཎཏི, ཨུམྨཏྟཀསྶ, ཨཱདིཀམྨིཀསྶཱཏི།
468. Anāpatti na kukkuccaṃ upadahitukāmo ‘‘ūnavīsativasso maññe tvaṃ upasampanno, vikāle maññe tayā bhuttaṃ, majjaṃ maññe tayā pītaṃ, mātugāmena saddhiṃ raho maññe tayā nisinnaṃ, iṅgha jānāhi, mā te pacchā kukkuccaṃ ahosī’’ti bhaṇati, ummattakassa, ādikammikassāti.
སཉྩིཙྩསིཀྑཱཔདཾ ནིཊྛིཏཾ སཏྟམཾ།
Sañciccasikkhāpadaṃ niṭṭhitaṃ sattamaṃ.
༨. ཨུཔསྶུཏིསིཀྑཱཔདཾ
8. Upassutisikkhāpadaṃ
༤༦༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ པེསལེཧི བྷིཀྑཱུཧི སདྡྷིཾ བྷཎྜནྟི། པེསལཱ བྷིཀྑཱུ ཨེཝཾ ཝདནྟི – ‘‘ཨལཛྫིནོ ཨིམེ, ཨཱཝུསོ, ཚབྦགྒིཡཱ བྷིཀྑཱུ། ན སཀྐཱ ཨིམེཧི སཧ བྷཎྜིཏུ’’ནྟི། ཚབྦགྒིཡཱ བྷིཀྑཱུ ཨེཝཾ ཝདནྟི – ‘‘ཀིསྶ ཏུམྷེ, ཨཱཝུསོ, ཨམྷེ ཨལཛྫིཝཱདེན པཱཔེཐཱ’’ཏི? ‘‘ཀཧཾ པན ཏུམྷེ, ཨཱཝུསོ, ཨསྶུཏྠཱ’’ཏི? ‘‘མཡཾ ཨཱཡསྨནྟཱནཾ ཨུཔསྶུཏིཾ 17 ཏིཊྛམྷཱ’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ བྷིཀྑཱུནཾ བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནཾ ཨུཔསྶུཏིཾ 18 ཏིཊྛིསྶནྟཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, བྷིཀྑཱུནཾ བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནཾ ཨུཔསྶུཏིཾ 19 ཏིཊྛཐཱཏི? ‘‘སཙྩ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, བྷིཀྑཱུནཾ བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནཾ ཨུཔསྶུཏིཾ 20 ཏིཊྛིསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
469. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū pesalehi bhikkhūhi saddhiṃ bhaṇḍanti. Pesalā bhikkhū evaṃ vadanti – ‘‘alajjino ime, āvuso, chabbaggiyā bhikkhū. Na sakkā imehi saha bhaṇḍitu’’nti. Chabbaggiyā bhikkhū evaṃ vadanti – ‘‘kissa tumhe, āvuso, amhe alajjivādena pāpethā’’ti? ‘‘Kahaṃ pana tumhe, āvuso, assutthā’’ti? ‘‘Mayaṃ āyasmantānaṃ upassutiṃ 21 tiṭṭhamhā’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ 22 tiṭṭhissantī’’ti…pe… saccaṃ kira tumhe, bhikkhave, bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ 23 tiṭṭhathāti? ‘‘Sacca, bhagavā’’ti. Vigarahi buddho bhagavā…pe… kathañhi nāma tumhe, moghapurisā, bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ 24 tiṭṭhissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༧༠. ‘‘ཡོ པན བྷིཀྑུ བྷིཀྑཱུནཾ བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནཾ ཨུཔསྶུཏིཾ ཏིཊྛེཡྻ – ‘ཡཾ ཨིམེ བྷཎིསྶནྟི ཏཾ སོསྶཱམཱི’ཏི ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡ’’ནྟི།
470.‘‘Yo pana bhikkhu bhikkhūnaṃ bhaṇḍanajātānaṃ kalahajātānaṃ vivādāpannānaṃ upassutiṃ tiṭṭheyya – ‘yaṃ ime bhaṇissanti taṃ sossāmī’ti etadeva paccayaṃ karitvā anaññaṃ, pācittiya’’nti.
༤༧༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
471.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
བྷིཀྑཱུནནྟི ཨཉྙེསཾ བྷིཀྑཱུནཾ།
Bhikkhūnanti aññesaṃ bhikkhūnaṃ.
བྷཎྜནཛཱཏཱནཾ ཀལཧཛཱཏཱནཾ ཝིཝཱདཱཔནྣཱནནྟི ཨདྷིཀརཎཛཱཏཱནཾ།
Bhaṇḍanajātānaṃ kalahajātānaṃ vivādāpannānanti adhikaraṇajātānaṃ.
ཨུཔསྶུཏིཾ ཏིཊྛེཡྻཱཏི ‘‘ཨིམེསཾ སུཏྭཱ ཙོདེསྶཱམི སཱརེསྶཱམི པཊིཙོདེསྶཱམི པཊིསཱརེསྶཱམི མངྐཱུ ཀརིསྶཱམཱི’’ཏི གཙྪཏི, ཨཱཔཏྟི དུཀྐཊསྶ། ཡཏྠ ཋིཏོ སུཎཱཏི, ཨཱཔཏྟི པཱཙིཏྟིཡསྶ། པཙྪཏོ གཙྪནྟོ ཏུརིཏོ གཙྪཏི སོསྶཱམཱིཏི, ཨཱཔཏྟི དུཀྐཊསྶ། ཡཏྠ ཋིཏོ སུཎཱཏི, ཨཱཔཏྟི པཱཙིཏྟིཡསྶ། པུརཏོ གཙྪནྟོ ཨོཧིཡྻཏི སོསྶཱམཱིཏི, ཨཱཔཏྟི དུཀྐཊསྶ། ཡཏྠ ཋིཏོ སུཎཱཏི, ཨཱཔཏྟི པཱཙིཏྟིཡསྶ། བྷིཀྑུསྶ ཋིཏོཀཱསཾ ཝཱ ནིསིནྣོཀཱསཾ ཝཱ ནིཔནྣོཀཱསཾ ཝཱ ཨཱགནྟྭཱ མནྟེནྟཾ ཨུཀྐཱསིཏབྦཾ , ཝིཛཱནཱཔེཏབྦཾ, ནོ ཙེ ཨུཀྐཱསེཡྻ ཝཱ ཝིཛཱནཱཔེཡྻ ཝཱ, ཨཱཔཏྟི པཱཙིཏྟིཡསྶ།
Upassutiṃ tiṭṭheyyāti ‘‘imesaṃ sutvā codessāmi sāressāmi paṭicodessāmi paṭisāressāmi maṅkū karissāmī’’ti gacchati, āpatti dukkaṭassa. Yattha ṭhito suṇāti, āpatti pācittiyassa. Pacchato gacchanto turito gacchati sossāmīti, āpatti dukkaṭassa. Yattha ṭhito suṇāti, āpatti pācittiyassa. Purato gacchanto ohiyyati sossāmīti, āpatti dukkaṭassa. Yattha ṭhito suṇāti, āpatti pācittiyassa. Bhikkhussa ṭhitokāsaṃ vā nisinnokāsaṃ vā nipannokāsaṃ vā āgantvā mantentaṃ ukkāsitabbaṃ , vijānāpetabbaṃ, no ce ukkāseyya vā vijānāpeyya vā, āpatti pācittiyassa.
ཨེཏདེཝ པཙྩཡཾ ཀརིཏྭཱ ཨནཉྙནྟི ན ཨཉྙོ ཀོཙི པཙྩཡོ ཧོཏི ཨུཔསྶུཏིཾ ཏིཊྛིཏུཾ།
Etadeva paccayaṃ karitvā anaññanti na añño koci paccayo hoti upassutiṃ tiṭṭhituṃ.
༤༧༢. ཨུཔསམྤནྣེ ཨུཔསམྤནྣསཉྙཱི ཨུཔསྶུཏིཾ ཏིཊྛཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཝེམཏིཀོ ཨུཔསྶུཏིཾ ཏིཊྛཏི, ཨཱཔཏྟི པཱཙིཏྟིཡསྶ། ཨུཔསམྤནྣེ ཨནུཔསམྤནྣསཉྙཱི ཨུཔསྶུཏིཾ ཏིཊྛཏི, ཨཱཔཏྟི པཱཙིཏྟིཡསྶ།
472. Upasampanne upasampannasaññī upassutiṃ tiṭṭhati, āpatti pācittiyassa. Upasampanne vematiko upassutiṃ tiṭṭhati, āpatti pācittiyassa. Upasampanne anupasampannasaññī upassutiṃ tiṭṭhati, āpatti pācittiyassa.
ཨནུཔསམྤནྣསྶ ཨུཔསྶུཏིཾ ཏིཊྛཏི, ཨཱཔཏྟི དུཀྐཊསྶ། ཨནུཔསམྤནྣེ ཨུཔསམྤནྣསཉྙཱི, ཨཱཔཏྟི དུཀྐཊསྶ། ཨནུཔསམྤནྣེ ཝེམཏིཀོ, ཨཱཔཏྟི དུཀྐཊསྶ། ཨནུཔསམྤནྣེ ཨནུཔསམྤནྣསཉྙཱི, ཨཱཔཏྟི དུཀྐཊསྶ།
Anupasampannassa upassutiṃ tiṭṭhati, āpatti dukkaṭassa. Anupasampanne upasampannasaññī, āpatti dukkaṭassa. Anupasampanne vematiko, āpatti dukkaṭassa. Anupasampanne anupasampannasaññī, āpatti dukkaṭassa.
༤༧༣. ཨནཱཔཏྟི – ‘‘ཨིམེསཾ སུཏྭཱ ཨོརམིསྶཱམི ཝིརམིསྶཱམི ཝཱུཔསམིསྶཱམི 25 ཨཏྟཱནཾ པརིམོཙེསྶཱམཱི’’ཏི གཙྪཏི, ཨུམྨཏྟཀསྶ, ཨཱདིཀམྨིཀསྶཱཏི།
473. Anāpatti – ‘‘imesaṃ sutvā oramissāmi viramissāmi vūpasamissāmi 26 attānaṃ parimocessāmī’’ti gacchati, ummattakassa, ādikammikassāti.
ཨུཔསྶུཏིསིཀྑཱཔདཾ ནིཊྛིཏཾ ཨཊྛམཾ།
Upassutisikkhāpadaṃ niṭṭhitaṃ aṭṭhamaṃ.
༩. ཀམྨཔཊིབཱཧནསིཀྑཱཔདཾ
9. Kammapaṭibāhanasikkhāpadaṃ
༤༧༤. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ ཨནཱཙཱརཾ ཨཱཙརིཏྭཱ ཨེཀམེཀསྶ ཀམྨེ ཀཡིརམཱནེ པཊིཀྐོསནྟི། ཏེན ཁོ པན སམཡེན སངྒྷོ སནྣིཔཏིཏོ ཧོཏི ཀེནཙིདེཝ ཀརཎཱིཡེན། ཚབྦགྒིཡཱ བྷིཀྑཱུ ཙཱིཝརཀམྨཾ ཀརོནྟཱ ཨེཀསྶ ཚནྡཾ ཨདཾསུ། ཨཐ ཁོ སངྒྷོ – ‘‘ཨཡཾ, ཨཱཝུསོ, ཚབྦགྒིཡོ བྷིཀྑུ ཨེཀཀོ ཨཱགཏོ, ཧནྡསྶ མཡཾ ཀམྨཾ ཀརོམཱ’’ཏི ཏསྶ ཀམྨཾ ཨཀཱསི། ཨཐ ཁོ སོ བྷིཀྑུ ཡེན ཚབྦགྒིཡཱ བྷིཀྑཱུ ཏེནུཔསངྐམི། ཚབྦགྒིཡཱ བྷིཀྑཱུ ཏཾ བྷིཀྑུཾ ཨེཏདཝོཙུཾ – ‘‘ཀིཾ, ཨཱཝུསོ, སངྒྷོ ཨཀཱསཱི’’ཏི? ‘‘སངྒྷོ མེ, ཨཱཝུསོ, ཀམྨཾ ཨཀཱསཱི’’ཏི། ‘‘ན མཡཾ, ཨཱཝུསོ, ཨེཏདཏྠཱཡ ཚནྡཾ ཨདམྷཱ – ‘‘ཏུཡ྄ཧཾ ཀམྨཾ ཀརིསྶཏཱི’’ཏི། སཙེ ཙ མཡཾ ཛཱནེཡྻཱམ ‘‘ཏུཡ྄ཧཾ ཀམྨཾ ཀརིསྶཏཱི’’ཏི, ན མཡཾ ཚནྡཾ དདེཡྻཱམཱ’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ དྷམྨིཀཱནཾ ཀམྨཱནཾ ཚནྡཾ དཏྭཱ པཙྪཱ ཁཱིཡནདྷམྨཾ 27 ཨཱཔཛྫིསྶནྟཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, དྷམྨིཀཱནཾ ཀམྨཱནཾ ཚནྡཾ དཏྭཱ པཙྪཱ ཁཱིཡནདྷམྨཾ 28 ཨཱཔཛྫཐཱཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, དྷམྨིཀཱནཾ ཀམྨཱནཾ ཚནྡཾ དཏྭཱ པཙྪཱ ཁཱིཡནདྷམྨཾ 29 ཨཱཔཛྫིསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
474. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū anācāraṃ ācaritvā ekamekassa kamme kayiramāne paṭikkosanti. Tena kho pana samayena saṅgho sannipatito hoti kenacideva karaṇīyena. Chabbaggiyā bhikkhū cīvarakammaṃ karontā ekassa chandaṃ adaṃsu. Atha kho saṅgho – ‘‘ayaṃ, āvuso, chabbaggiyo bhikkhu ekako āgato, handassa mayaṃ kammaṃ karomā’’ti tassa kammaṃ akāsi. Atha kho so bhikkhu yena chabbaggiyā bhikkhū tenupasaṅkami. Chabbaggiyā bhikkhū taṃ bhikkhuṃ etadavocuṃ – ‘‘kiṃ, āvuso, saṅgho akāsī’’ti? ‘‘Saṅgho me, āvuso, kammaṃ akāsī’’ti. ‘‘Na mayaṃ, āvuso, etadatthāya chandaṃ adamhā – ‘‘tuyhaṃ kammaṃ karissatī’’ti. Sace ca mayaṃ jāneyyāma ‘‘tuyhaṃ kammaṃ karissatī’’ti, na mayaṃ chandaṃ dadeyyāmā’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū dhammikānaṃ kammānaṃ chandaṃ datvā pacchā khīyanadhammaṃ 30 āpajjissantī’’ti…pe… saccaṃ kira tumhe, bhikkhave, dhammikānaṃ kammānaṃ chandaṃ datvā pacchā khīyanadhammaṃ 31 āpajjathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, dhammikānaṃ kammānaṃ chandaṃ datvā pacchā khīyanadhammaṃ 32 āpajjissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༧༥. ‘‘ཡོ པན བྷིཀྑུ དྷམྨིཀཱནཾ ཀམྨཱནཾ ཚནྡཾ དཏྭཱ པཙྪཱ ཁཱིཡནདྷམྨཾ ཨཱཔཛྫེཡྻ, པཱཙིཏྟིཡ’’ནྟི།
475.‘‘Yo pana bhikkhu dhammikānaṃ kammānaṃ chandaṃ datvā pacchā khīyanadhammaṃ āpajjeyya, pācittiya’’nti.
༤༧༦. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
476.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
དྷམྨིཀཾ ནཱམ ཀམྨཾ ཨཔལོཀནཀམྨཾ ཉཏྟིཀམྨཾ ཉཏྟིདུཏིཡཀམྨཾ ཉཏྟིཙཏུཏྠཀམྨཾ དྷམྨེན ཝིནཡེན སཏྠུསཱསནེན ཀཏཾ, ཨེཏཾ དྷམྨིཀཾ ནཱམ ཀམྨཾ། ཚནྡཾ དཏྭཱ ཁིཡྻཏི ཨཱཔཏྟི པཱཙིཏྟིཡསྶ།
Dhammikaṃ nāma kammaṃ apalokanakammaṃ ñattikammaṃ ñattidutiyakammaṃ ñatticatutthakammaṃ dhammena vinayena satthusāsanena kataṃ, etaṃ dhammikaṃ nāma kammaṃ. Chandaṃ datvā khiyyati āpatti pācittiyassa.
༤༧༧. དྷམྨཀམྨེ དྷམྨཀམྨསཉྙཱི ཚནྡཾ དཏྭཱ ཁིཡྻཏི, ཨཱཔཏྟི པཱཙིཏྟིཡསྶ། དྷམྨཀམྨེ ཝེམཏིཀོ ཚནྡཾ དཏྭཱ ཁིཡྻཏི, ཨཱཔཏྟི དུཀྐཊསྶ། དྷམྨཀམྨེ ཨདྷམྨཀམྨསཉྙཱི ཚནྡཾ དཏྭཱ ཁིཡྻཏི, ཨནཱཔཏྟི། ཨདྷམྨཀམྨེ དྷམྨཀམྨསཉྙཱི, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀོ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱི, ཨནཱཔཏྟི།
477. Dhammakamme dhammakammasaññī chandaṃ datvā khiyyati, āpatti pācittiyassa. Dhammakamme vematiko chandaṃ datvā khiyyati, āpatti dukkaṭassa. Dhammakamme adhammakammasaññī chandaṃ datvā khiyyati, anāpatti. Adhammakamme dhammakammasaññī, āpatti dukkaṭassa. Adhammakamme vematiko, āpatti dukkaṭassa. Adhammakamme adhammakammasaññī, anāpatti.
༤༧༨. ཨནཱཔཏྟི – ‘‘ཨདྷམྨེན ཝཱ ཝགྒེན ཝཱ ན ཀམྨཱརཧསྶ ཝཱ ཀམྨཾ ཀཏ’’ནྟི ཛཱནནྟོ ཁིཡྻཏི, ཨུམྨཏྟཀསྶ, ཨཱདིཀམྨིཀསྶཱཏི།
478. Anāpatti – ‘‘adhammena vā vaggena vā na kammārahassa vā kammaṃ kata’’nti jānanto khiyyati, ummattakassa, ādikammikassāti.
ཀམྨཔཊིབཱཧནསིཀྑཱཔདཾ ནིཊྛིཏཾ ནཝམཾ།
Kammapaṭibāhanasikkhāpadaṃ niṭṭhitaṃ navamaṃ.
༡༠. ཚནྡཾཨདཏྭཱགམནསིཀྑཱཔདཾ
10. Chandaṃadatvāgamanasikkhāpadaṃ
༤༧༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན སངྒྷོ སནྣིཔཏིཏོ ཧོཏི ཀེནཙིདེཝ ཀརཎཱིཡེན། ཚབྦགྒིཡཱ བྷིཀྑཱུ ཙཱིཝརཀམྨཾ ཀརོནྟཱ ཨེཀསྶ ཚནྡཾ ཨདཾསུ། ཨཐ ཁོ སངྒྷོ ‘‘ཡསྶཏྠཱཡ སནྣིཔཏིཏོ ཏཾ ཀམྨཾ ཀརིསྶཱམཱི’’ཏི ཉཏྟིཾ ཋཔེསི། ཨཐ ཁོ སོ བྷིཀྑུ – ‘‘ཨེཝམེཝིམེ ཨེཀམེཀསྶ ཀམྨཾ ཀརོནྟི, ཀསྶ ཏུམྷེ ཀམྨཾ ཀརིསྶཐཱ’’ཏི ཚནྡཾ ཨདཏྭཱ ཨུཊྛཱཡཱསནཱ པཀྐཱམི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུ སངྒྷེ ཝིནིཙྪཡཀཐཱཡ ཝཏྟམཱནཱཡ ཚནྡཾ ཨདཏྭཱ ཨུཊྛཱཡཱསནཱ པཀྐམིསྶཏཱི’’ཏི…པེ॰… སཙྩཾ ཀིར ཏྭཾ, བྷིཀྑུ, སངྒྷེ ཝིནིཙྪཡཀཐཱཡ ཝཏྟམཱནཱཡ ཚནྡཾ ཨདཏྭཱ ཨུཊྛཱཡཱསནཱ པཀྐམསཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏྭཾ, མོགྷཔུརིས, སངྒྷེ ཝིནིཙྪཡཀཐཱཡ ཝཏྟམཱནཱཡ ཚནྡཾ ཨདཏྭཱ ཨུཊྛཱཡཱསནཱ པཀྐམིསྶསི ! ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
479. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena saṅgho sannipatito hoti kenacideva karaṇīyena. Chabbaggiyā bhikkhū cīvarakammaṃ karontā ekassa chandaṃ adaṃsu. Atha kho saṅgho ‘‘yassatthāya sannipatito taṃ kammaṃ karissāmī’’ti ñattiṃ ṭhapesi. Atha kho so bhikkhu – ‘‘evamevime ekamekassa kammaṃ karonti, kassa tumhe kammaṃ karissathā’’ti chandaṃ adatvā uṭṭhāyāsanā pakkāmi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhu saṅghe vinicchayakathāya vattamānāya chandaṃ adatvā uṭṭhāyāsanā pakkamissatī’’ti…pe… saccaṃ kira tvaṃ, bhikkhu, saṅghe vinicchayakathāya vattamānāya chandaṃ adatvā uṭṭhāyāsanā pakkamasīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, saṅghe vinicchayakathāya vattamānāya chandaṃ adatvā uṭṭhāyāsanā pakkamissasi ! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༨༠. ‘‘ཡོ པན བྷིཀྑུ སངྒྷེ ཝིནིཙྪཡཀཐཱཡ ཝཏྟམཱནཱཡ ཚནྡཾ ཨདཏྭཱ ཨུཊྛཱཡཱསནཱ པཀྐམེཡྻ, པཱཙིཏྟིཡ’’ནྟི།
480.‘‘Yo pana bhikkhu saṅghe vinicchayakathāya vattamānāya chandaṃ adatvā uṭṭhāyāsanā pakkameyya, pācittiya’’nti.
༤༨༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
481.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
སངྒྷེ ཝིནིཙྪཡཀཐཱ ནཱམ ཝཏྠུ ཝཱ ཨཱརོཙིཏཾ ཧོཏི ཨཝིནིཙྪིཏཾ, ཉཏྟི ཝཱ ཋཔིཏཱ ཧོཏི, ཀམྨཝཱཙཱ ཝཱ ཝིཔྤཀཏཱ ཧོཏི།
Saṅghe vinicchayakathā nāma vatthu vā ārocitaṃ hoti avinicchitaṃ, ñatti vā ṭhapitā hoti, kammavācā vā vippakatā hoti.
ཚནྡཾ ཨདཏྭཱ ཨུཊྛཱཡཱསནཱ པཀྐམེཡྻཱཏི – ‘‘ཀཐཾ ཨིདཾ ཀམྨཾ ཀུཔྤཾ ཨསྶ ཝགྒཾ ཨསྶ ན ཀརེཡྻཱ’’ཏི གཙྪཏི, ཨཱཔཏྟི དུཀྐཊསྶ། པརིསཱཡ ཧཏྠཔཱསཾ ཝིཛཧནྟསྶ ཨཱཔཏྟི དུཀྐཊསྶ། ཝིཛཧིཏེ ཨཱཔཏྟི པཱཙིཏྟིཡསྶ།
Chandaṃ adatvā uṭṭhāyāsanā pakkameyyāti – ‘‘kathaṃ idaṃ kammaṃ kuppaṃ assa vaggaṃ assa na kareyyā’’ti gacchati, āpatti dukkaṭassa. Parisāya hatthapāsaṃ vijahantassa āpatti dukkaṭassa. Vijahite āpatti pācittiyassa.
༤༨༢. དྷམྨཀམྨེ དྷམྨཀམྨསཉྙཱི ཚནྡཾ ཨདཏྭཱ ཨུཊྛཱཡཱསནཱ པཀྐམཏི, ཨཱཔཏྟི པཱཙིཏྟིཡསྶ། དྷམྨཀམྨེ ཝེམཏིཀོ ཚནྡཾ ཨདཏྭཱ ཨུཊྛཱཡཱསནཱ པཀྐམཏི, ཨཱཔཏྟི དུཀྐཊསྶ། དྷམྨཀམྨེ ཨདྷམྨཀམྨསཉྙཱི ཚནྡཾ ཨདཏྭཱ ཨུཊྛཱཡཱསནཱ པཀྐམཏི, ཨནཱཔཏྟི། ཨདྷམྨཀམྨེ དྷམྨཀམྨསཉྙཱི, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀོ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱི, ཨནཱཔཏྟི།
482. Dhammakamme dhammakammasaññī chandaṃ adatvā uṭṭhāyāsanā pakkamati, āpatti pācittiyassa. Dhammakamme vematiko chandaṃ adatvā uṭṭhāyāsanā pakkamati, āpatti dukkaṭassa. Dhammakamme adhammakammasaññī chandaṃ adatvā uṭṭhāyāsanā pakkamati, anāpatti. Adhammakamme dhammakammasaññī, āpatti dukkaṭassa. Adhammakamme vematiko, āpatti dukkaṭassa. Adhammakamme adhammakammasaññī, anāpatti.
༤༨༣. ཨནཱཔཏྟི – ‘‘སངྒྷསྶ བྷཎྜནཾ ཝཱ ཀལཧོ ཝཱ ཝིགྒཧོ ཝཱ ཝིཝཱདོ ཝཱ བྷཝིསྶཏཱི’’ཏི གཙྪཏི, ‘‘སངྒྷབྷེདོ ཝཱ སངྒྷརཱཛི ཝཱ བྷཝིསྶཏཱི’’ཏི གཙྪཏི, ‘‘ཨདྷམྨེན ཝཱ ཝགྒེན ཝཱ ན ཀམྨཱརཧསྶ ཝཱ ཀམྨཾ ཀརིསྶཏཱི’’ཏི གཙྪཏི, གིལཱནོ གཙྪཏི, གིལཱནསྶ ཀརཎཱིཡེན གཙྪཏི, ཨུཙྩཱརེན ཝཱ པསྶཱཝེན ཝཱ པཱིལི༹ཏོ གཙྪཏི, ‘‘ན ཀམྨཾ ཀོཔེཏུཀཱམོ པུན པཙྩཱགམིསྶཱམཱི’’ཏི གཙྪཏི, ཨུམྨཏྟཀསྶ, ཨཱདིཀམྨིཀསྶཱཏི།
483. Anāpatti – ‘‘saṅghassa bhaṇḍanaṃ vā kalaho vā viggaho vā vivādo vā bhavissatī’’ti gacchati, ‘‘saṅghabhedo vā saṅgharāji vā bhavissatī’’ti gacchati, ‘‘adhammena vā vaggena vā na kammārahassa vā kammaṃ karissatī’’ti gacchati, gilāno gacchati, gilānassa karaṇīyena gacchati, uccārena vā passāvena vā pīḷito gacchati, ‘‘na kammaṃ kopetukāmo puna paccāgamissāmī’’ti gacchati, ummattakassa, ādikammikassāti.
ཚནྡཾ ཨདཏྭཱ གམནསིཀྑཱཔདཾ ནིཊྛིཏཾ དསམཾ།
Chandaṃ adatvā gamanasikkhāpadaṃ niṭṭhitaṃ dasamaṃ.
༡༡. དུབྦལསིཀྑཱཔདཾ
11. Dubbalasikkhāpadaṃ
༤༨༤. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཏེན ཁོ པན སམཡེན ཨཱཡསྨཱ དབྦོ མལླཔུཏྟོ སངྒྷསྶ སེནཱསནཉྩ པཉྙཔེཏི བྷཏྟཱནི ཙ ཨུདྡིསཏི། སོ ཙཱཡསྨཱ དུབྦལཙཱིཝརོ ཧོཏི། ཏེན ཁོ པན སམཡེན སངྒྷསྶ ཨེཀཾ ཙཱིཝརཾ ཨུཔྤནྣཾ ཧོཏི། ཨཐ ཁོ སངྒྷོ ཏཾ ཙཱིཝརཾ ཨཱཡསྨཏོ དབྦསྶ མལླཔུཏྟསྶ ཨདཱསི ། ཚབྦགྒིཡཱ བྷིཀྑཱུ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཡཐཱསནྠུཏཾ བྷིཀྑཱུ སངྒྷིཀཾ ལཱབྷཾ པརིཎཱམེནྟཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ སམགྒེན སངྒྷེན ཙཱིཝརཾ དཏྭཱ པཙྪཱ ཁཱིཡནདྷམྨཾ ཨཱཔཛྫིསྶནྟཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, སམགྒེན སངྒྷེན ཙཱིཝརཾ དཏྭཱ པཙྪཱ ཁཱིཡནདྷམྨཾ ཨཱཔཛྫཐཱཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, སམགྒེན སངྒྷེན ཙཱིཝརཾ དཏྭཱ པཙྪཱ ཁཱིཡནདྷམྨཾ ཨཱཔཛྫིསྶཐ! ནེཏཾ, མོགྷཔུརིསཱ, ཨཔྤསནྣཱནཾ, ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
484. Tena samayena buddho bhagavā rājagahe viharati veḷuvane kalandakanivāpe. Tena kho pana samayena āyasmā dabbo mallaputto saṅghassa senāsanañca paññapeti bhattāni ca uddisati. So cāyasmā dubbalacīvaro hoti. Tena kho pana samayena saṅghassa ekaṃ cīvaraṃ uppannaṃ hoti. Atha kho saṅgho taṃ cīvaraṃ āyasmato dabbassa mallaputtassa adāsi . Chabbaggiyā bhikkhū ujjhāyanti khiyyanti vipācenti – ‘‘yathāsanthutaṃ bhikkhū saṅghikaṃ lābhaṃ pariṇāmentī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū samaggena saṅghena cīvaraṃ datvā pacchā khīyanadhammaṃ āpajjissantī’’ti…pe… saccaṃ kira tumhe, bhikkhave, samaggena saṅghena cīvaraṃ datvā pacchā khīyanadhammaṃ āpajjathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, samaggena saṅghena cīvaraṃ datvā pacchā khīyanadhammaṃ āpajjissatha! Netaṃ, moghapurisā, appasannānaṃ, vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༨༥. ‘‘ཡོ པན བྷིཀྑུ སམགྒེན སངྒྷེན ཙཱིཝརཾ དཏྭཱ པཙྪཱ ཁཱིཡནདྷམྨཾ ཨཱཔཛྫེཡྻ ‘ཡཐཱསནྠུཏཾ བྷིཀྑཱུ སངྒྷིཀཾ ལཱབྷཾ པརིཎཱམེནྟཱི’ཏི, པཱཙིཏྟིཡ’’ནྟི།
485.‘‘Yo pana bhikkhu samaggena saṅghena cīvaraṃ datvā pacchā khīyanadhammaṃ āpajjeyya ‘yathāsanthutaṃ bhikkhū saṅghikaṃ lābhaṃ pariṇāmentī’ti, pācittiya’’nti.
༤༨༦. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
486.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
སམགྒོ ནཱམ སངྒྷོ སམཱནསཾཝཱསཀོ སམཱནསཱིམཱཡཾ ཋིཏོ།
Samaggo nāma saṅgho samānasaṃvāsako samānasīmāyaṃ ṭhito.
ཙཱིཝརཾ ནཱམ ཚནྣཾ ཙཱིཝརཱནཾ ཨཉྙཏརཾ ཙཱིཝརཾ ཝིཀཔྤནུཔགཾ པཙྪིམཾ།
Cīvaraṃ nāma channaṃ cīvarānaṃ aññataraṃ cīvaraṃ vikappanupagaṃ pacchimaṃ.
དཏྭཱཏི སཡཾ དཏྭཱ།
Datvāti sayaṃ datvā.
ཡཐཱསནྠུཏཾ ནཱམ ཡཐཱམིཏྟཏཱ ཡཐཱསནྡིཊྛཏཱ ཡཐཱསམྦྷཏྟཏཱ ཡཐཱསམཱནུཔཛ྄ཛྷཱཡཀཏཱ ཡཐཱསམཱནཱཙརིཡཀཏཱ།
Yathāsanthutaṃ nāma yathāmittatā yathāsandiṭṭhatā yathāsambhattatā yathāsamānupajjhāyakatā yathāsamānācariyakatā.
སངྒྷིཀཾ ནཱམ སངྒྷསྶ དིནྣཾ ཧོཏི པརིཙྩཏྟཾ།
Saṅghikaṃ nāma saṅghassa dinnaṃ hoti pariccattaṃ.
ལཱབྷོ ནཱམ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ, ཨནྟམསོ ཙུཎྞཔིཎྜོཔི, དནྟཀཊྛམྤི, དསིཀསུཏྟམྤི།
Lābho nāma cīvarapiṇḍapātasenāsanagilānappaccayabhesajjaparikkhārā, antamaso cuṇṇapiṇḍopi, dantakaṭṭhampi, dasikasuttampi.
པཙྪཱ ཁཱིཡནདྷམྨཾ ཨཱཔཛྫེཡྻཱཏི ཨུཔསམྤནྣསྶ སངྒྷེན སམྨཏསྶ སེནཱསནཔཉྙཱཔཀསྶ ཝཱ བྷཏྟུདྡེསཀསྶ ཝཱ ཡཱགུབྷཱཛཀསྶ ཝཱ ཕལབྷཱཛཀསྶ ཝཱ ཁཛྫབྷཱཛཀསྶ ཝཱ ཨཔྤམཏྟཀཝིསྶཛྫཀསྶ ཝཱ ཙཱིཝརཾ དིནྣེ ཁིཡྻཏི, ཨཱཔཏྟི པཱཙིཏྟིཡསྶ།
Pacchākhīyanadhammaṃ āpajjeyyāti upasampannassa saṅghena sammatassa senāsanapaññāpakassa vā bhattuddesakassa vā yāgubhājakassa vā phalabhājakassa vā khajjabhājakassa vā appamattakavissajjakassa vā cīvaraṃ dinne khiyyati, āpatti pācittiyassa.
༤༨༧. དྷམྨཀམྨེ དྷམྨཀམྨསཉྙཱི ཙཱིཝརཾ དིནྣེ ཁིཡྻཏི, ཨཱཔཏྟི པཱཙིཏྟིཡསྶ། དྷམྨཀམྨེ ཝེམཏིཀོ ཙཱིཝརཾ དིནྣེ ཁིཡྻཏི, ཨཱཔཏྟི པཱཙིཏྟིཡསྶ། དྷམྨཀམྨེ ཨདྷམྨཀམྨསཉྙཱི ཙཱིཝརཾ དིནྣེ ཁིཡྻཏི, ཨཱཔཏྟི པཱཙིཏྟིཡསྶ།
487. Dhammakamme dhammakammasaññī cīvaraṃ dinne khiyyati, āpatti pācittiyassa. Dhammakamme vematiko cīvaraṃ dinne khiyyati, āpatti pācittiyassa. Dhammakamme adhammakammasaññī cīvaraṃ dinne khiyyati, āpatti pācittiyassa.
ཨཉྙཾ པརིཀྑཱརཾ དིནྣེ ཁིཡྻཏི, ཨཱཔཏྟི དུཀྐཊསྶ། ཨུཔསམྤནྣསྶ སངྒྷེན ཨསམྨཏསྶ སེནཱསནཔཉྙཱཔཀསྶ ཝཱ བྷཏྟུདྡེསཀསྶ ཝཱ ཡཱགུབྷཱཛཀསྶ ཝཱ ཕལབྷཱཛཀསྶ ཝཱ ཁཛྫབྷཱཛཀསྶ ཝཱ ཨཔྤམཏྟཀཝིསྶཛྫཀསྶ ཝཱ ཙཱིཝརཾ ཝཱ ཨཉྙཾ ཝཱ པརིཀྑཱརཾ དིནྣེ ཁིཡྻཏི, ཨཱཔཏྟི དུཀྐཊསྶ། ཨནུཔསམྤནྣསྶ སངྒྷེན སམྨཏསྶ ཝཱ ཨསམྨཏསྶ ཝཱ སེནཱསནཔཉྙཱཔཀསྶ ཝཱ བྷཏྟུདྡེསཀསྶ ཝཱ ཡཱགུབྷཱཛཀསྶ ཝཱ ཕལབྷཱཛཀསྶ ཝཱ ཁཛྫབྷཱཛཀསྶ ཝཱ ཨཔྤམཏྟཀཝིསྶཛྫཀསྶ ཝཱ ཙཱིཝརཾ ཝཱ ཨཉྙཾ ཝཱ པརིཀྑཱརཾ དིནྣེ ཁིཡྻཏི, ཨཱཔཏྟི དུཀྐཊསྶ། ཨདྷམྨཀམྨེ དྷམྨཀམྨསཉྙཱི, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀོ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱི, ཨནཱཔཏྟི།
Aññaṃ parikkhāraṃ dinne khiyyati, āpatti dukkaṭassa. Upasampannassa saṅghena asammatassa senāsanapaññāpakassa vā bhattuddesakassa vā yāgubhājakassa vā phalabhājakassa vā khajjabhājakassa vā appamattakavissajjakassa vā cīvaraṃ vā aññaṃ vā parikkhāraṃ dinne khiyyati, āpatti dukkaṭassa. Anupasampannassa saṅghena sammatassa vā asammatassa vā senāsanapaññāpakassa vā bhattuddesakassa vā yāgubhājakassa vā phalabhājakassa vā khajjabhājakassa vā appamattakavissajjakassa vā cīvaraṃ vā aññaṃ vā parikkhāraṃ dinne khiyyati, āpatti dukkaṭassa. Adhammakamme dhammakammasaññī, āpatti dukkaṭassa. Adhammakamme vematiko, āpatti dukkaṭassa. Adhammakamme adhammakammasaññī, anāpatti.
༤༨༨. ཨནཱཔཏྟི – པཀཏིཡཱ ཚནྡཱ དོསཱ མོཧཱ བྷཡཱ ཀརོནྟཾ ‘‘ཀྭཏྠོ ཏསྶ དིནྣེན ལདྡྷཱཔི ཝིནིཔཱཏེསྶཏི ན སམྨཱ ཨུཔནེསྶཏཱི’’ཏི ཁིཡྻཏི, ཨུམྨཏྟཀསྶ, ཨཱདིཀམྨིཀསྶཱཏི།
488. Anāpatti – pakatiyā chandā dosā mohā bhayā karontaṃ ‘‘kvattho tassa dinnena laddhāpi vinipātessati na sammā upanessatī’’ti khiyyati, ummattakassa, ādikammikassāti.
དུབྦལསིཀྑཱཔདཾ ནིཊྛིཏཾ ཨེཀཱདསམཾ།
Dubbalasikkhāpadaṃ niṭṭhitaṃ ekādasamaṃ.
༡༢. པརིཎཱམནསིཀྑཱཔདཾ
12. Pariṇāmanasikkhāpadaṃ
༤༨༩. 33 ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན སཱཝཏྠིཡཾ ཨཉྙཏརསྶ པཱུགསྶ སངྒྷསྶ སཙཱིཝརབྷཏྟཾ པཊིཡཏྟཾ ཧོཏི – ‘‘བྷོཛེཏྭཱ ཙཱིཝརེན ཨཙྪཱདེསྶཱམཱ’’ཏི། ཨཐ ཁོ ཚབྦགྒིཡཱ བྷིཀྑཱུ ཡེན སོ པཱུགོ ཏེནུཔསངྐམིཾསུ; ཨུཔསངྐམིཏྭཱ ཏཾ པཱུགཾ ཨེཏདཝོཙུཾ – ‘‘དེཐཱཝུསོ, ཨིམཱནི ཙཱིཝརཱནི ཨིམེསཾ བྷིཀྑཱུན’’ནྟི། ‘‘ན མཡཾ, བྷནྟེ, དསྶཱམ། ཨམྷཱཀཾ སངྒྷསྶ ཨནུཝསྶཾ སཙཱིཝརབྷིཀྑཱ པཉྙཏྟཱ’’ཏི། ‘‘བཧཱུ, ཨཱཝུསོ, སངྒྷསྶ དཱཡཀཱ, བཧཱུ སངྒྷསྶ བྷཏྟཱ 34། ཨིམེ ཏུམྷེ ནིསྶཱཡ ཏུམྷེ སམྤསྶནྟཱ ཨིདྷ ཝིཧརནྟི། ཏུམྷེ ཙེ ཨིམེསཾ ན དསྶཐ, ཨཐ ཀོ ཙརཧི ཨིམེསཾ དསྶཏི? དེཐཱཝུསོ, ཨིམཱནི ཙཱིཝརཱནི ཨིམེསཾ བྷིཀྑཱུན’’ནྟི། ཨཐ ཁོ སོ པཱུགོ ཚབྦགྒིཡེཧི བྷིཀྑཱུཧི ནིཔྤཱིལི༹ཡམཱནོ ཡཐཱཔཊིཡཏྟཾ ཙཱིཝརཾ ཚབྦགྒིཡཱནཾ བྷིཀྑཱུནཾ དཏྭཱ སངྒྷཾ བྷཏྟེན པརིཝིསི། ཡེ ཏེ བྷིཀྑཱུ ཛཱནནྟི སངྒྷསྶ སཙཱིཝརབྷཏྟཾ པཊིཡཏྟཾ ‘‘ན ཙ ཛཱནནྟི ཚབྦགྒིཡཱནཾ བྷིཀྑཱུནཾ དིནྣ’’ནྟི ཏེ ཨེཝམཱཧཾསུ – ‘‘ཨོཎོཛེཐཱཝུསོ, སངྒྷསྶ ཙཱིཝར’’ནྟི། ‘‘ནཏྠི, བྷནྟེ། ཡཐཱཔཊིཡཏྟཾ ཙཱིཝརཾ ཨཡྻཱ ཚབྦགྒིཡཱ ཨཡྻཱནཾ ཚབྦགྒིཡཱནཾ པརིཎཱམེསུ’’ནྟི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ ཛཱནཾ སངྒྷིཀཾ ལཱབྷཾ པརིཎཏཾ པུགྒལསྶ པརིཎཱམེསྶནྟཱི’’ཏི…པེ॰… སཙྩཾ ཀིར ཏུམྷེ, བྷིཀྑཝེ, ཛཱནཾ སངྒྷིཀཾ ལཱབྷཾ པརིཎཏཾ པུགྒལསྶ པརིཎཱམེཐཱཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, ཛཱནཾ སངྒྷིཀཾ ལཱབྷཾ པརིཎཏཾ པུགྒལསྶ པརིཎཱམེསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
489.35 Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāvatthiyaṃ aññatarassa pūgassa saṅghassa sacīvarabhattaṃ paṭiyattaṃ hoti – ‘‘bhojetvā cīvarena acchādessāmā’’ti. Atha kho chabbaggiyā bhikkhū yena so pūgo tenupasaṅkamiṃsu; upasaṅkamitvā taṃ pūgaṃ etadavocuṃ – ‘‘dethāvuso, imāni cīvarāni imesaṃ bhikkhūna’’nti. ‘‘Na mayaṃ, bhante, dassāma. Amhākaṃ saṅghassa anuvassaṃ sacīvarabhikkhā paññattā’’ti. ‘‘Bahū, āvuso, saṅghassa dāyakā, bahū saṅghassa bhattā 36. Ime tumhe nissāya tumhe sampassantā idha viharanti. Tumhe ce imesaṃ na dassatha, atha ko carahi imesaṃ dassati? Dethāvuso, imāni cīvarāni imesaṃ bhikkhūna’’nti. Atha kho so pūgo chabbaggiyehi bhikkhūhi nippīḷiyamāno yathāpaṭiyattaṃ cīvaraṃ chabbaggiyānaṃ bhikkhūnaṃ datvā saṅghaṃ bhattena parivisi. Ye te bhikkhū jānanti saṅghassa sacīvarabhattaṃ paṭiyattaṃ ‘‘na ca jānanti chabbaggiyānaṃ bhikkhūnaṃ dinna’’nti te evamāhaṃsu – ‘‘oṇojethāvuso, saṅghassa cīvara’’nti. ‘‘Natthi, bhante. Yathāpaṭiyattaṃ cīvaraṃ ayyā chabbaggiyā ayyānaṃ chabbaggiyānaṃ pariṇāmesu’’nti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū jānaṃ saṅghikaṃ lābhaṃ pariṇataṃ puggalassa pariṇāmessantī’’ti…pe… saccaṃ kira tumhe, bhikkhave, jānaṃ saṅghikaṃ lābhaṃ pariṇataṃ puggalassa pariṇāmethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, jānaṃ saṅghikaṃ lābhaṃ pariṇataṃ puggalassa pariṇāmessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༤༩༠. ‘‘ཡོ པན བྷིཀྑུ ཛཱནཾ སངྒྷིཀཾ ལཱབྷཾ པརིཎཏཾ པུགྒལསྶ པརིཎཱམེཡྻ, པཱཙིཏྟིཡ’’ནྟི།
490.‘‘Yo pana bhikkhu jānaṃ saṅghikaṃ lābhaṃ pariṇataṃ puggalassa pariṇāmeyya, pācittiya’’nti.
༤༩༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
491.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ཛཱནཱཏི ནཱམ སཱམཾ ཝཱ ཛཱནཱཏི, ཨཉྙེ ཝཱ ཏསྶ ཨཱརོཙེནྟི, སོ ཝཱ ཨཱརོཙེཏི།
Jānāti nāma sāmaṃ vā jānāti, aññe vā tassa ārocenti, so vā āroceti.
སངྒྷིཀཾ ནཱམ སངྒྷསྶ དིནྣཾ ཧོཏི པརིཙྩཏྟཾ།
Saṅghikaṃ nāma saṅghassa dinnaṃ hoti pariccattaṃ.
ལཱབྷོ ནཱམ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱ, ཨནྟམསོ ཙུཎྞཔིཎྜོཔི, དནྟཀཊྛམྤི, དསིཀསུཏྟམྤི།
Lābho nāma cīvarapiṇḍapātasenāsanagilānappaccayabhesajjaparikkhārā, antamaso cuṇṇapiṇḍopi, dantakaṭṭhampi, dasikasuttampi.
པརིཎཏཾ ནཱམ ‘‘དསྶཱམ ཀརིསྶཱམཱ’’ཏི ཝཱཙཱ བྷིནྣཱ ཧོཏི, ཏཾ པུགྒལསྶ པརིཎཱམེཏི, ཨཱཔཏྟི པཱཙིཏྟིཡསྶ།
Pariṇataṃ nāma ‘‘dassāma karissāmā’’ti vācā bhinnā hoti, taṃ puggalassa pariṇāmeti, āpatti pācittiyassa.
༤༩༢. པརིཎཏེ པརིཎཏསཉྙཱི པུགྒལསྶ པརིཎཱམེཏི, ཨཱཔཏྟི པཱཙིཏྟིཡསྶ། པརིཎཏེ ཝེམཏིཀོ པུགྒལསྶ པརིཎཱམེཏི, ཨཱཔཏྟི དུཀྐཊསྶ། པརིཎཏེ ཨཔརིཎཏསཉྙཱི པུགྒལསྶ པརིཎཱམེཏི, ཨནཱཔཏྟི། སངྒྷསྶ པརིཎཏཾ ཨཉྙསངྒྷསྶ ཝཱ ཙེཏིཡསྶ ཝཱ པརིཎཱམེཏི, ཨཱཔཏྟི དུཀྐཊསྶ། ཙེཏིཡསྶ པརིཎཏཾ ཨཉྙཙེཏིཡསྶ ཝཱ སངྒྷསྶ ཝཱ པུགྒལསྶ ཝཱ པརིཎཱམེཏི, ཨཱཔཏྟི དུཀྐཊསྶ། པུགྒལསྶ པརིཎཏཾ ཨཉྙཔུགྒལསྶ ཝཱ སངྒྷསྶ ཝཱ ཙེཏིཡསྶ ཝཱ པརིཎཱམེཏི, ཨཱཔཏྟི དུཀྐཊསྶ ། ཨཔརིཎཏེ པརིཎཏསཉྙཱི, ཨཱཔཏྟི དུཀྐཊསྶ། ཨཔརིཎཏེ ཝེམཏིཀོ , ཨཱཔཏྟི དུཀྐཊསྶ། ཨཔརིཎཏེ ཨཔརིཎཏསཉྙཱི, ཨནཱཔཏྟི།
492. Pariṇate pariṇatasaññī puggalassa pariṇāmeti, āpatti pācittiyassa. Pariṇate vematiko puggalassa pariṇāmeti, āpatti dukkaṭassa. Pariṇate apariṇatasaññī puggalassa pariṇāmeti, anāpatti. Saṅghassa pariṇataṃ aññasaṅghassa vā cetiyassa vā pariṇāmeti, āpatti dukkaṭassa. Cetiyassa pariṇataṃ aññacetiyassa vā saṅghassa vā puggalassa vā pariṇāmeti, āpatti dukkaṭassa. Puggalassa pariṇataṃ aññapuggalassa vā saṅghassa vā cetiyassa vā pariṇāmeti, āpatti dukkaṭassa . Apariṇate pariṇatasaññī, āpatti dukkaṭassa. Apariṇate vematiko , āpatti dukkaṭassa. Apariṇate apariṇatasaññī, anāpatti.
༤༩༣. ཨནཱཔཏྟི – ‘‘ཀཏྠ དེམཱ’’ཏི པུཙྪཱིཡམཱནོ – ‘‘ཡཏྠ ཏུམྷཱཀཾ དེཡྻདྷམྨོ པརིབྷོགཾ ཝཱ ལབྷེཡྻ པཊིསངྑཱརཾ ཝཱ ལབྷེཡྻ ཙིརཊྛིཏིཀོ ཝཱ ཨསྶ ཡཏྠ ཝཱ པན ཏུམྷཱཀཾ ཙིཏྟཾ པསཱིདཏི ཏཏྠ དེཐཱ’’ཏི བྷཎཏི, ཨུམྨཏྟཀསྶ, ཨཱདིཀམྨིཀསྶཱཏི།
493. Anāpatti – ‘‘kattha demā’’ti pucchīyamāno – ‘‘yattha tumhākaṃ deyyadhammo paribhogaṃ vā labheyya paṭisaṅkhāraṃ vā labheyya ciraṭṭhitiko vā assa yattha vā pana tumhākaṃ cittaṃ pasīdati tattha dethā’’ti bhaṇati, ummattakassa, ādikammikassāti.
པརིཎཱམནསིཀྑཱཔདཾ ནིཊྛིཏཾ དྭཱདསམཾ།
Pariṇāmanasikkhāpadaṃ niṭṭhitaṃ dvādasamaṃ.
སཧདྷམྨིཀཝགྒོ ཨཊྛམོ།
Sahadhammikavaggo aṭṭhamo.
ཏསྶུདྡཱནཾ –
Tassuddānaṃ –
སཧདྷམྨ-ཝིཝཎྞཉྩ, མོཧཱཔནཾ པཧཱརཀཾ།
Sahadhamma-vivaṇṇañca, mohāpanaṃ pahārakaṃ;
ཏལསཏྟི ཨམཱུལཉྩ, སཉྩིཙྩ ཙ ཨུཔསྶུཏི།
Talasatti amūlañca, sañcicca ca upassuti;
པཊིབཱཧནཚནྡཉྩ, དབྦཉྩ པརིཎཱམནནྟི༎
Paṭibāhanachandañca, dabbañca pariṇāmananti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā
༡. སཧདྷམྨིཀསིཀྑཱཔདཝཎྞནཱ • 1. Sahadhammikasikkhāpadavaṇṇanā
༢. ཝིལེཁནསིཀྑཱཔདཝཎྞནཱ • 2. Vilekhanasikkhāpadavaṇṇanā
༣. མོཧནསིཀྑཱཔདཝཎྞནཱ • 3. Mohanasikkhāpadavaṇṇanā
༤. པཧཱརསིཀྑཱཔདཝཎྞནཱ • 4. Pahārasikkhāpadavaṇṇanā
༥. ཏལསཏྟིཀསིཀྑཱཔདཝཎྞནཱ • 5. Talasattikasikkhāpadavaṇṇanā
༦. ཨམཱུལཀསིཀྑཱཔདཝཎྞནཱ • 6. Amūlakasikkhāpadavaṇṇanā
༧. སཉྩིཙྩསིཀྑཱཔདཝཎྞནཱ • 7. Sañciccasikkhāpadavaṇṇanā
༨. ཨུཔསྶུཏིསིཀྑཱཔདཝཎྞནཱ • 8. Upassutisikkhāpadavaṇṇanā
༩. ཀམྨཔཊིབཱཧནསིཀྑཱཔདཝཎྞནཱ • 9. Kammapaṭibāhanasikkhāpadavaṇṇanā
༡༠. ཚནྡཾཨདཏྭཱགམནསིཀྑཱཔདཝཎྞནཱ • 10. Chandaṃadatvāgamanasikkhāpadavaṇṇanā
༡༡. དུབྦལསིཀྑཱཔདཝཎྞནཱ • 11. Dubbalasikkhāpadavaṇṇanā
༡༢. པརིཎཱམནསིཀྑཱཔདཝཎྞནཱ • 12. Pariṇāmanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā
༡. སཧདྷམྨིཀསིཀྑཱཔདཝཎྞནཱ • 1. Sahadhammikasikkhāpadavaṇṇanā
༢. ཝིལེཁནསིཀྑཱཔདཝཎྞནཱ • 2. Vilekhanasikkhāpadavaṇṇanā
༣. མོཧནསིཀྑཱཔདཝཎྞནཱ • 3. Mohanasikkhāpadavaṇṇanā
༤. པཧཱརསིཀྑཱཔདཝཎྞནཱ • 4. Pahārasikkhāpadavaṇṇanā
༥. ཏལསཏྟིཀསིཀྑཱཔདཝཎྞནཱ • 5. Talasattikasikkhāpadavaṇṇanā
༦. ཨམཱུལཀསིཀྑཱཔདཝཎྞནཱ • 6. Amūlakasikkhāpadavaṇṇanā
༧. སཉྩིཙྩསིཀྑཱཔདཝཎྞནཱ • 7. Sañciccasikkhāpadavaṇṇanā
༨. ཨུཔསྶུཏིསིཀྑཱཔདཝཎྞནཱ • 8. Upassutisikkhāpadavaṇṇanā
༩. ཀམྨཔཊིབཱཧནསིཀྑཱཔདཝཎྞནཱ • 9. Kammapaṭibāhanasikkhāpadavaṇṇanā
༡༠. ཚནྡཾ ཨདཏྭཱ གམནསིཀྑཱཔདཝཎྞནཱ • 10. Chandaṃ adatvā gamanasikkhāpadavaṇṇanā
༡༡. དུབྦལསིཀྑཱཔདཝཎྞནཱ • 11. Dubbalasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā
༡. སཧདྷམྨིཀསིཀྑཱཔདཝཎྞནཱ • 1. Sahadhammikasikkhāpadavaṇṇanā
༢. ཝིལེཁནསིཀྑཱཔདཝཎྞནཱ • 2. Vilekhanasikkhāpadavaṇṇanā
༣. མོཧནསིཀྑཱཔདཝཎྞནཱ • 3. Mohanasikkhāpadavaṇṇanā
༤. པཧཱརསིཀྑཱཔདཝཎྞནཱ • 4. Pahārasikkhāpadavaṇṇanā
༥. ཏལསཏྟིཀསིཀྑཱཔདཝཎྞནཱ • 5. Talasattikasikkhāpadavaṇṇanā
༦. ཨམཱུལཀསིཀྑཱཔདཝཎྞནཱ • 6. Amūlakasikkhāpadavaṇṇanā
༧. སཉྩིཙྩསིཀྑཱཔདཝཎྞནཱ • 7. Sañciccasikkhāpadavaṇṇanā
༨. ཨུཔསྶུཏིསིཀྑཱཔདཝཎྞནཱ • 8. Upassutisikkhāpadavaṇṇanā
༩. ཀམྨཔཊིབཱཧནསིཀྑཱཔདཝཎྞནཱ • 9. Kammapaṭibāhanasikkhāpadavaṇṇanā
༡༠. ཚནྡཾཨདཏྭཱགམནསིཀྑཱཔདཝཎྞནཱ • 10. Chandaṃadatvāgamanasikkhāpadavaṇṇanā
༡༡. དུབྦལསིཀྑཱཔདཝཎྞནཱ • 11. Dubbalasikkhāpadavaṇṇanā
༡༢. པརིཎཱམནསིཀྑཱཔདཝཎྞནཱ • 12. Pariṇāmanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā
༡. སཧདྷམྨིཀསིཀྑཱཔདཝཎྞནཱ • 1. Sahadhammikasikkhāpadavaṇṇanā
༢. ཝིལེཁནསིཀྑཱཔདཝཎྞནཱ • 2. Vilekhanasikkhāpadavaṇṇanā
༣. མོཧནསིཀྑཱཔདཝཎྞནཱ • 3. Mohanasikkhāpadavaṇṇanā
༤. པཧཱརསིཀྑཱཔདཝཎྞནཱ • 4. Pahārasikkhāpadavaṇṇanā
༥. ཏལསཏྟིཀསིཀྑཱཔདཝཎྞནཱ • 5. Talasattikasikkhāpadavaṇṇanā
༦. ཨམཱུལཀསིཀྑཱཔདཝཎྞནཱ • 6. Amūlakasikkhāpadavaṇṇanā
༧. ཀུཀྐུཙྩུཔྤཱདནསིཀྑཱཔདཝཎྞནཱ • 7. Kukkuccuppādanasikkhāpadavaṇṇanā
༨. ཨུཔསྶུཏིསིཀྑཱཔདཝཎྞནཱ • 8. Upassutisikkhāpadavaṇṇanā
༩. ཁིཡྻནསིཀྑཱཔདཝཎྞནཱ • 9. Khiyyanasikkhāpadavaṇṇanā
༡༠. པཀྐམནསིཀྑཱཔདཝཎྞནཱ • 10. Pakkamanasikkhāpadavaṇṇanā
༡༡. དུབྦལསིཀྑཱཔདཝཎྞནཱ • 11. Dubbalasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi
༡. སཧདྷམྨིཀསིཀྑཱཔད-ཨཏྠཡོཛནཱ • 1. Sahadhammikasikkhāpada-atthayojanā
༢. ཝིལེཁནསིཀྑཱཔདཾ • 2. Vilekhanasikkhāpadaṃ
༣. མོཧནསིཀྑཱཔདཾ • 3. Mohanasikkhāpadaṃ
༤. པཧཱརསིཀྑཱཔདཾ • 4. Pahārasikkhāpadaṃ
༥. ཏལསཏྟིཀསིཀྑཱཔདཾ • 5. Talasattikasikkhāpadaṃ
༦. ཨམཱུལཀསིཀྑཱཔདཾ • 6. Amūlakasikkhāpadaṃ
༧. སཉྩིཙྩསིཀྑཱཔདཾ • 7. Sañciccasikkhāpadaṃ
༨. ཨུཔསྶུཏིསིཀྑཱཔདཾ • 8. Upassutisikkhāpadaṃ
༩. ཀམྨཔཊིབཱཧནསིཀྑཱཔདཾ • 9. Kammapaṭibāhanasikkhāpadaṃ
༡༠. ཚནྡཾ ཨདཏྭཱགམནསིཀྑཱཔདཾ • 10. Chandaṃ adatvāgamanasikkhāpadaṃ
༡༡. དུབྦལསིཀྑཱཔདཾ • 11. Dubbalasikkhāpadaṃ
༡༢. པརིཎཱམནསིཀྑཱཔདཾ • 12. Pariṇāmanasikkhāpadaṃ
