| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
6. ஸஹஜாதபச்சயனித்³தே³ஸவண்ணனா
6. Sahajātapaccayaniddesavaṇṇanā
6. ஸஹஜாதபச்சயனித்³தே³ஸே அஞ்ஞமஞ்ஞந்தி அஞ்ஞோ அஞ்ஞஸ்ஸ. இமினா ஏதேஸங் த⁴ம்மானங் ஏகக்க²ணே பச்சயபா⁴வஞ்சேவ பச்சயுப்பன்னபா⁴வஞ்ச தீ³பேதி. ஓக்கந்திக்க²ணேதி பஞ்சவோகாரப⁴வே படிஸந்தி⁴க்க²ணே. தஸ்மிஞ்ஹி க²ணே நாமரூபங் ஓக்கந்தங் விய பக்க²ந்த³ந்தங் விய பரலோகதோ இமங் லோகங் ஆக³ந்த்வா பவிஸந்தங் விய உப்பஜ்ஜதி, தஸ்மா ஸோ க²ணோ ‘‘ஓக்கந்திக்க²ணோ’’தி வுச்சதி. எத்த² ச ரூபந்தி ஹத³யவத்து²மத்தமேவ அதி⁴ப்பேதங். தஞ்ஹி நாமஸ்ஸ, நாமஞ்ச தஸ்ஸ அஞ்ஞமஞ்ஞங் ஸஹஜாதபச்சயட்ட²ங் ப²ரதி. சித்தசேதஸிகாதி பவத்தியங் சத்தாரோ க²ந்தா⁴. ஸஹஜாதபச்சயேனாதி எத்த² சித்தஸமுட்டா²னரூபா சித்தசேதஸிகானங் பச்சயட்ட²ங் ந ப²ரந்தி, தஸ்மா ‘‘அஞ்ஞமஞ்ஞ’’ந்தி ந வுத்தங். ததா² உபாதா³ரூபா பூ⁴தானங். ரூபினோ த⁴ம்மா அரூபீனங் த⁴ம்மானந்தி ஹத³யவத்து² சதுன்னங் க²ந்தா⁴னங். கிஞ்சி காலேதி கிஸ்மிஞ்சி காலே. ஸஹஜாதபச்சயேனாதி படிஸந்தி⁴ங் ஸந்தா⁴ய வுத்தங். ந ஸஹஜாதபச்சயேனாதி பவத்திங் ஸந்தா⁴ய வுத்தங்.
6. Sahajātapaccayaniddese aññamaññanti añño aññassa. Iminā etesaṃ dhammānaṃ ekakkhaṇe paccayabhāvañceva paccayuppannabhāvañca dīpeti. Okkantikkhaṇeti pañcavokārabhave paṭisandhikkhaṇe. Tasmiñhi khaṇe nāmarūpaṃ okkantaṃ viya pakkhandantaṃ viya paralokato imaṃ lokaṃ āgantvā pavisantaṃ viya uppajjati, tasmā so khaṇo ‘‘okkantikkhaṇo’’ti vuccati. Ettha ca rūpanti hadayavatthumattameva adhippetaṃ. Tañhi nāmassa, nāmañca tassa aññamaññaṃ sahajātapaccayaṭṭhaṃ pharati. Cittacetasikāti pavattiyaṃ cattāro khandhā. Sahajātapaccayenāti ettha cittasamuṭṭhānarūpā cittacetasikānaṃ paccayaṭṭhaṃ na pharanti, tasmā ‘‘aññamañña’’nti na vuttaṃ. Tathā upādārūpā bhūtānaṃ. Rūpino dhammā arūpīnaṃ dhammānanti hadayavatthu catunnaṃ khandhānaṃ. Kiñci kāleti kismiñci kāle. Sahajātapaccayenāti paṭisandhiṃ sandhāya vuttaṃ. Na sahajātapaccayenāti pavattiṃ sandhāya vuttaṃ.
அயங் பன ‘சத்தாரோ க²ந்தா⁴ அரூபினோ அஞ்ஞமஞ்ஞங் ஸஹஜாதபச்சயேன பச்சயோ’தி ஏவங் ச²ஹி கொட்டா²ஸேஹி டி²தோ. தத்த² தயோ கொட்டா²ஸா அஞ்ஞமஞ்ஞவஸேன வுத்தா, தயோ ந அஞ்ஞமஞ்ஞவஸேன. தத்த² பட²மகொட்டா²ஸே அரூபமேவ பச்சயோ சேவ பச்சயுப்பன்னஞ்ச, து³தியே ரூபமேவ, ததியே நாமரூபங், சதுத்தே² பச்சயோ அரூபங், பச்சயுப்பன்னங் ரூபங்; பஞ்சமே பச்சயோபி பச்சயுப்பன்னம்பி ரூபமேவ; ச²ட்டே² பச்சயோ ரூபங், பச்சயுப்பன்னங் அரூபந்தி அயங் தாவெத்த² பாளிவண்ணனா.
Ayaṃ pana ‘cattāro khandhā arūpino aññamaññaṃ sahajātapaccayena paccayo’ti evaṃ chahi koṭṭhāsehi ṭhito. Tattha tayo koṭṭhāsā aññamaññavasena vuttā, tayo na aññamaññavasena. Tattha paṭhamakoṭṭhāse arūpameva paccayo ceva paccayuppannañca, dutiye rūpameva, tatiye nāmarūpaṃ, catutthe paccayo arūpaṃ, paccayuppannaṃ rūpaṃ; pañcame paccayopi paccayuppannampi rūpameva; chaṭṭhe paccayo rūpaṃ, paccayuppannaṃ arūpanti ayaṃ tāvettha pāḷivaṇṇanā.
அயங் பன ஸஹஜாதபச்சயோ ஜாதிவஸேன குஸலோ அகுஸலோ விபாகோ கிரியங் ரூபந்தி பஞ்சதா⁴ பி⁴ஜ்ஜதி. தத்த² குஸலோ பூ⁴மிதோ சதுப்³பி³தோ⁴ ஹோதி, அகுஸலோ ஏகவிதோ⁴வ விபாகோ சதுப்³பி³தோ⁴, கிரியஸங்கா²தோ திவிதோ⁴, ரூபங் ஏகவித⁴ங் காமாவசரமேவாதி ஏவங் தாவெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
Ayaṃ pana sahajātapaccayo jātivasena kusalo akusalo vipāko kiriyaṃ rūpanti pañcadhā bhijjati. Tattha kusalo bhūmito catubbidho hoti, akusalo ekavidhova vipāko catubbidho, kiriyasaṅkhāto tividho, rūpaṃ ekavidhaṃ kāmāvacaramevāti evaṃ tāvettha nānappakārabhedato viññātabbo vinicchayo.
ஏவங் பி⁴ன்னே பனெத்த² சதுபூ⁴மகம்பி குஸலங் பஞ்சவோகாரப⁴வே அத்தனா ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச ஸஹஜாதபச்சயோ ஹோதி, ததா² அகுஸலங். யங் பனெத்த² அரூபே உப்பஜ்ஜதி, தங் அரூபத⁴ம்மானங்யேவ ஸஹஜாதபச்சயோ ஹோதி.
Evaṃ bhinne panettha catubhūmakampi kusalaṃ pañcavokārabhave attanā sampayuttadhammānañceva cittasamuṭṭhānarūpassa ca sahajātapaccayo hoti, tathā akusalaṃ. Yaṃ panettha arūpe uppajjati, taṃ arūpadhammānaṃyeva sahajātapaccayo hoti.
காமாவசரரூபாவசரவிபாகங் சித்தஸமுட்டா²னரூபஸ்ஸ சேவ ஸம்பயுத்தத⁴ம்மானஞ்ச ஸஹஜாதபச்சயோ ஹோதி. யங் பனெத்த² ரூபங் ந ஸமுட்டா²பேதி, தங் ஸம்பயுத்தத⁴ம்மானஞ்ஞேவ. யங் படிஸந்தி⁴யங் உப்பஜ்ஜதி, தங் கடத்தாரூபானஞ்சாபி ஸஹஜாதபச்சயோ ஹோதி. அரூபாவசரவிபாகங் ஸம்பயுத்தத⁴ம்மானஞ்ஞேவ. லோகுத்தரவிபாகங் பஞ்சவோகாரே ஸம்பயுத்தத⁴ம்மானஞ்சேவ சித்தஸமுட்டா²னரூபானஞ்ச, சதுவோகாரே அரூபானஞ்ஞேவ. காமாவசரஅரூபாவசரகிரியா பஞ்சவோகாரே ஸம்பயுத்தகானஞ்சேவ சித்தஸமுட்டா²னரூபானஞ்ச ஸஹஜாதபச்சயோ ஹோதி, சதுவோகாரே அரூபானஞ்ஞேவ. ரூபாவசரகிரியா ஸம்பயுத்தத⁴ம்மானஞ்சேவ சித்தஸமுட்டா²னரூபானஞ்ச ஏகந்தேன ஸஹஜாதபச்சயோ ஹோதி.
Kāmāvacararūpāvacaravipākaṃ cittasamuṭṭhānarūpassa ceva sampayuttadhammānañca sahajātapaccayo hoti. Yaṃ panettha rūpaṃ na samuṭṭhāpeti, taṃ sampayuttadhammānaññeva. Yaṃ paṭisandhiyaṃ uppajjati, taṃ kaṭattārūpānañcāpi sahajātapaccayo hoti. Arūpāvacaravipākaṃ sampayuttadhammānaññeva. Lokuttaravipākaṃ pañcavokāre sampayuttadhammānañceva cittasamuṭṭhānarūpānañca, catuvokāre arūpānaññeva. Kāmāvacaraarūpāvacarakiriyā pañcavokāre sampayuttakānañceva cittasamuṭṭhānarūpānañca sahajātapaccayo hoti, catuvokāre arūpānaññeva. Rūpāvacarakiriyā sampayuttadhammānañceva cittasamuṭṭhānarūpānañca ekantena sahajātapaccayo hoti.
சதுஸமுட்டா²னிகஸ்ஸ ரூபஸ்ஸ கம்மஸமுட்டா²னரூபே ஏகங் மஹாபூ⁴தங் திண்ணங், தீணி ஏகஸ்ஸ, த்³வே த்³வின்னங் மஹாபூ⁴தானங், மஹாபூ⁴தா உபாதா³ரூபஸ்ஸ ஸஹஜாதபச்சயேன பச்சயோ. காமாவசரரூபாவசரபடிஸந்தி⁴க்க²ணே வத்து²ரூபங் விபாகக்க²ந்தா⁴னங் ஸஹஜாதபச்சயேன பச்சயோ. உதுசித்தாஹாரஸமுட்டா²னேஸு பன மஹாபூ⁴தானி அஞ்ஞமஞ்ஞஞ்சேவ உபாதா³ரூபஸ்ஸ ச ஸஹஜாதபச்சயேன பச்சயோதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Catusamuṭṭhānikassa rūpassa kammasamuṭṭhānarūpe ekaṃ mahābhūtaṃ tiṇṇaṃ, tīṇi ekassa, dve dvinnaṃ mahābhūtānaṃ, mahābhūtā upādārūpassa sahajātapaccayena paccayo. Kāmāvacararūpāvacarapaṭisandhikkhaṇe vatthurūpaṃ vipākakkhandhānaṃ sahajātapaccayena paccayo. Utucittāhārasamuṭṭhānesu pana mahābhūtāni aññamaññañceva upādārūpassa ca sahajātapaccayena paccayoti evamettha paccayuppannatopi viññātabbo vinicchayoti.
ஸஹஜாதபச்சயனித்³தே³ஸவண்ணனா.
Sahajātapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
