| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
6. ஸஹஜாதபச்சயனித்³தே³ஸவண்ணனா
6. Sahajātapaccayaniddesavaṇṇanā
6. ‘‘அஞ்ஞமஞ்ஞஸ்ஸாதி அஞ்ஞோ அஞ்ஞஸ்ஸா’’தி போராணபாடோ². பாளியங் பன ‘‘அஞ்ஞமஞ்ஞங் ஸஹஜாதபச்சயேன பச்சயோ’’தி எத்த² வுத்தஸ்ஸ ‘‘அஞ்ஞமஞ்ஞ’’ந்தி இமஸ்ஸ அத்தோ² வத்தப்³போ³ , ந அவுத்தஸ்ஸ ‘‘அஞ்ஞமஞ்ஞஸ்ஸா’’தி இமஸ்ஸ, ந ச ஸமானத்த²ஸ்ஸபி ஸத்³த³ந்தரஸ்ஸ அத்தே² வுத்தே ஸத்³த³ந்தரஸ்ஸ அத்தோ² வுத்தோ ஹோதி, தஸ்மா ‘‘அஞ்ஞமஞ்ஞந்தி அஞ்ஞோ அஞ்ஞஸ்ஸா’’தி பட²ந்தி. ஓக்கந்தீதி பஞ்சவோகாரபடிஸந்தி⁴யேவ வுச்சதி, ந இதராதி இமினா அதி⁴ப்பாயேனாஹ ‘‘பஞ்சவோகாரப⁴வே படிஸந்தி⁴க்க²ணே’’தி. ரூபினோ த⁴ம்மா அரூபீனங் த⁴ம்மானந்தி இத³ங் யதி³பி புப்³பே³ ‘‘ஓக்கந்திக்க²ணே நாமரூப’’ந்தி வுத்தங், ததா²பி ந தேன க²ணந்தரே பச்சயபா⁴வோ ரூபீனங் நிவாரிதோதி தன்னிவாரணத்த²ங் வுத்தங். கஞ்சி காலேதி கேசி கிஸ்மிஞ்சி காலேதி வா அத்தோ². தேன ரூபினோ த⁴ம்மா கேசி வத்து²பூ⁴தா கிஸ்மிஞ்சி படிஸந்தி⁴காலேதி ரூபந்தரானங் வத்து²ஸ்ஸ ச காலந்தரே அரூபீனங் ஸஹஜாதபச்சயங் புப்³பே³ அனிவாரிதங் நிவாரேதி. ஏவஞ்ச கத்வா ‘‘கஞ்சி கால’’ந்தி வா ‘‘கிஸ்மிஞ்சி காலே’’தி வா வத்தப்³பே³ விப⁴த்திவிபல்லாஸோ கதோ. தேன ஹி ‘‘கஞ்சீ’’தி உபயோகே³கவசனங் ‘‘ரூபினோ த⁴ம்மா’’தி ஏதேன ஸஹ ஸம்ப³ந்தே⁴ன பச்சத்தப³ஹுவசனஸ்ஸ ஆதே³ஸோ, ‘‘காலே’’தி இமினா ஸம்ப³ந்தே⁴ன பு⁴ம்மேகவசனஸ்ஸாதி விஞ்ஞாயதி. புரிமேன ச ‘‘ஏகோ க²ந்தோ⁴ வத்து² ச திண்ணன்னங் க²ந்தா⁴ன’’ந்திஆதி³னா நாமஸஹிதஸ்ஸேவ வத்து²ஸ்ஸ ‘‘நாமஸ்ஸ பச்சயோ’’தி வத்தப்³ப³த்தே ஆபன்னே ஏதேன கேவலஸ்ஸேவ ததா² வத்தப்³ப³தங் த³ஸ்ஸேதி.
6. ‘‘Aññamaññassāti añño aññassā’’ti porāṇapāṭho. Pāḷiyaṃ pana ‘‘aññamaññaṃ sahajātapaccayena paccayo’’ti ettha vuttassa ‘‘aññamañña’’nti imassa attho vattabbo , na avuttassa ‘‘aññamaññassā’’ti imassa, na ca samānatthassapi saddantarassa atthe vutte saddantarassa attho vutto hoti, tasmā ‘‘aññamaññanti añño aññassā’’ti paṭhanti. Okkantīti pañcavokārapaṭisandhiyeva vuccati, na itarāti iminā adhippāyenāha ‘‘pañcavokārabhave paṭisandhikkhaṇe’’ti. Rūpino dhammā arūpīnaṃ dhammānanti idaṃ yadipi pubbe ‘‘okkantikkhaṇe nāmarūpa’’nti vuttaṃ, tathāpi na tena khaṇantare paccayabhāvo rūpīnaṃ nivāritoti tannivāraṇatthaṃ vuttaṃ. Kañci kāleti keci kismiñci kāleti vā attho. Tena rūpino dhammā keci vatthubhūtā kismiñci paṭisandhikāleti rūpantarānaṃ vatthussa ca kālantare arūpīnaṃ sahajātapaccayaṃ pubbe anivāritaṃ nivāreti. Evañca katvā ‘‘kañci kāla’’nti vā ‘‘kismiñci kāle’’ti vā vattabbe vibhattivipallāso kato. Tena hi ‘‘kañcī’’ti upayogekavacanaṃ ‘‘rūpino dhammā’’ti etena saha sambandhena paccattabahuvacanassa ādeso, ‘‘kāle’’ti iminā sambandhena bhummekavacanassāti viññāyati. Purimena ca ‘‘eko khandho vatthu ca tiṇṇannaṃ khandhāna’’ntiādinā nāmasahitasseva vatthussa ‘‘nāmassa paccayo’’ti vattabbatte āpanne etena kevalasseva tathā vattabbataṃ dasseti.
தயோ ந அஞ்ஞமஞ்ஞவஸேனாதி லப்³ப⁴மானேபி கத்த²சி அஞ்ஞமஞ்ஞஸஹஜாதபச்சயபா⁴வே வசனேன அஸங்க³ஹிதத்தா தஸ்ஸ ஏவங் வுத்தந்தி த³ட்ட²ப்³ப³ங். சதுஸமுட்டா²னிகஸ்ஸ ரூபஸ்ஸ ஏகதே³ஸபூ⁴தே கம்மஸமுட்டா²னரூபே ஸமுதா³யேகதே³ஸவஸேன ஸாமிவசனங் த³ட்ட²ப்³ப³ங், நித்³தா⁴ரணே வா.
Tayo na aññamaññavasenāti labbhamānepi katthaci aññamaññasahajātapaccayabhāve vacanena asaṅgahitattā tassa evaṃ vuttanti daṭṭhabbaṃ. Catusamuṭṭhānikassa rūpassa ekadesabhūte kammasamuṭṭhānarūpe samudāyekadesavasena sāmivacanaṃ daṭṭhabbaṃ, niddhāraṇe vā.
ஸஹஜாதபச்சயனித்³தே³ஸவண்ணனா நிட்டி²தா.
Sahajātapaccayaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 6. ஸஹஜாதபச்சயனித்³தே³ஸவண்ணனா • 6. Sahajātapaccayaniddesavaṇṇanā
