| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
2. ஸஹஜாதவாரவண்ணனா
2. Sahajātavāravaṇṇanā
234-242. ஸஹஜாதபச்சயகரணந்தி ஸஹஜாதங் பச்சயத⁴ம்மங் பச்சயங் கத்வா பவத்தி. ஸஹஜாதாயத்தபா⁴வக³மனந்தி ஸஹஜாதே பச்சயத⁴ம்மே ஆயத்தபா⁴வஸ்ஸ க³மனங் பச்சயுப்பன்னஸ்ஸ அத்தனா ஸஹஜாதபச்சயாயத்தவுத்திதா . எத்த² ச ஸஹஜாதபச்சயஸங்கா²தங் ஸஹஜாதங் கரோதீதி ஸஹஜாதோ, ததா²பவத்தோ பச்சயுப்பன்னத⁴ம்மோ. தத்த² பவத்தமானோ ஸஹஜாதஸத்³தோ³ யஸ்மா தஸ்ஸ பச்சயுப்பன்னஸ்ஸ அத்தனா ஸஹஜாதங் பச்சயத⁴ம்மங் பச்சயங் கத்வா பவத்திங் ததா³யத்தபா⁴வூபக³மனஞ்ச வத³தீதி வுச்சதி, தஸ்மா வுத்தங் ‘‘ஸஹஜாதஸத்³தே³ன…பே॰… வுத்த’’ந்தி. தஸ்ஸ கரணஸ்ஸ க³மனஸ்ஸ வாதி தஸ்ஸ யதா²வுத்தஸ்ஸ ஸஹஜாதபச்சயகரணஸ்ஸ ஸஹஜாதாயத்தபா⁴வூபக³மனஸ்ஸ வா. ‘‘குஸலங் த⁴ம்மங் ஸஹஜாதோ’’தி இமஸ்ஸ குஸலங் த⁴ம்மங் ஸஹஜாதங் தங்ஸஹபா⁴விதஞ்ச பச்சயங் கத்வாதி அயமத்தோ²தி ஆஹ ‘‘குஸலாதீ³னங் கம்மபா⁴வதோ’’தி. ஸஹஜாதபச்சயஸஹபா⁴வீனங் பச்சயானங் ஸங்க³ண்ஹத்த²ஞ்ஹெத்த² ‘‘ஸஹஜாதாயத்தபா⁴வக³மனங் வா’’தி வுத்தங்.
234-242. Sahajātapaccayakaraṇanti sahajātaṃ paccayadhammaṃ paccayaṃ katvā pavatti. Sahajātāyattabhāvagamananti sahajāte paccayadhamme āyattabhāvassa gamanaṃ paccayuppannassa attanā sahajātapaccayāyattavuttitā . Ettha ca sahajātapaccayasaṅkhātaṃ sahajātaṃ karotīti sahajāto, tathāpavatto paccayuppannadhammo. Tattha pavattamāno sahajātasaddo yasmā tassa paccayuppannassa attanā sahajātaṃ paccayadhammaṃ paccayaṃ katvā pavattiṃ tadāyattabhāvūpagamanañca vadatīti vuccati, tasmā vuttaṃ ‘‘sahajātasaddena…pe… vutta’’nti. Tassa karaṇassa gamanassa vāti tassa yathāvuttassa sahajātapaccayakaraṇassa sahajātāyattabhāvūpagamanassa vā. ‘‘Kusalaṃ dhammaṃ sahajāto’’ti imassa kusalaṃ dhammaṃ sahajātaṃ taṃsahabhāvitañca paccayaṃ katvāti ayamatthoti āha ‘‘kusalādīnaṃ kammabhāvato’’ti. Sahajātapaccayasahabhāvīnaṃ paccayānaṃ saṅgaṇhatthañhettha ‘‘sahajātāyattabhāvagamanaṃ vā’’ti vuttaṃ.
தங்கம்மபா⁴வதோதி தேஸங் யதா²வுத்தபச்சயகரணததா³யத்தபா⁴வக³மனானங் கம்மபா⁴வதோ. அட்ட²கதா²யங் பன ‘‘குஸலங் த⁴ம்மங் ஸஹஜாதோதி குஸலங் த⁴ம்மங் படிச்ச தேன ஸஹஜாதோ ஹுத்வா’’தி படிச்சஸத்³த³ங் ஆஹரித்வா அத்தோ² வுத்தோ, தங் ‘‘படிச்சத்தோ² ஸஹஜாதத்தோ²’’தி கத்வா வுத்தங். ஸஹஜாதஸத்³த³யோகே³ குஸலங் த⁴ம்மந்தி உபயோக³வசனஸ்ஸ யுத்தி ந வுத்தா, ‘‘தேன ஸஹஜாதோ ஹுத்வா’’தி பன வுத்தத்தா கரணத்தே² உபயோக³வசனந்தி த³ஸ்ஸிதந்தி கேசி. நிஸ்ஸயவாரே பன குஸலங் த⁴ம்மங் நிஸ்ஸயத்தே²ன பச்சயங் கத்வாதி வத³ந்தேன இதா⁴பி ‘‘குஸலங் த⁴ம்மங் ஸஹஜாதத்தே²ன பச்சயங் கத்வா’’தி அயமத்தோ² வுத்தோயேவ ஹோதி, படிச்சஸத்³தா³ஹரணம்பி இமமேவத்த²ங் ஞாபேதீதி த³ட்ட²ப்³ப³ங். உபாதா³ரூபங் கிஞ்சி பூ⁴தரூபஸ்ஸ அனுபாலகங் உபத்த²ம்ப⁴கஞ்ச ஹொந்தம்பி ஸஹஜாதலக்க²ணேன ந ஹோதி, தஸ்மா படிச்சத்த²ங் ந ப²ரதீதி ஆஹ ‘‘படிச்சாதி இமினா வசனேன தீ³பிதோ பச்சயோ ந ஹோதீ’’தி. நித³ஸ்ஸனவஸேன வுத்தந்தி உதா³ஹரணவஸேன வுத்தங், ந அனவஸேஸதோதி அத்தோ². யதா²வுத்தோதி படிச்சத்த²ப²ரணவஸேன வுத்தோ. யதா² ச உபாதா³ரூபங் பூ⁴தரூபஸ்ஸ உபாதா³ரூபஸ்ஸ ச பச்சயோ ந ஹோதி, ஏவங் ட²பெத்வா ச² வத்தூ²னி ஸேஸரூபானி அரூபத⁴ம்மானங் பச்சயோ ந ஹோதீதி த³ஸ்ஸெந்தோ ‘‘வத்து²வஜ்ஜானி ரூபானி ச அரூபான’’ந்தி ஆஹ.
Taṃkammabhāvatoti tesaṃ yathāvuttapaccayakaraṇatadāyattabhāvagamanānaṃ kammabhāvato. Aṭṭhakathāyaṃ pana ‘‘kusalaṃ dhammaṃ sahajātoti kusalaṃ dhammaṃ paṭicca tena sahajāto hutvā’’ti paṭiccasaddaṃ āharitvā attho vutto, taṃ ‘‘paṭiccattho sahajātattho’’ti katvā vuttaṃ. Sahajātasaddayoge kusalaṃ dhammanti upayogavacanassa yutti na vuttā, ‘‘tena sahajāto hutvā’’ti pana vuttattā karaṇatthe upayogavacananti dassitanti keci. Nissayavāre pana kusalaṃ dhammaṃ nissayatthena paccayaṃ katvāti vadantena idhāpi ‘‘kusalaṃ dhammaṃ sahajātatthena paccayaṃ katvā’’ti ayamattho vuttoyeva hoti, paṭiccasaddāharaṇampi imamevatthaṃ ñāpetīti daṭṭhabbaṃ. Upādārūpaṃ kiñci bhūtarūpassa anupālakaṃ upatthambhakañca hontampi sahajātalakkhaṇena na hoti, tasmā paṭiccatthaṃ na pharatīti āha ‘‘paṭiccāti iminā vacanena dīpito paccayo na hotī’’ti. Nidassanavasena vuttanti udāharaṇavasena vuttaṃ, na anavasesatoti attho. Yathāvuttoti paṭiccatthapharaṇavasena vutto. Yathā ca upādārūpaṃ bhūtarūpassa upādārūpassa ca paccayo na hoti, evaṃ ṭhapetvā cha vatthūni sesarūpāni arūpadhammānaṃ paccayo na hotīti dassento ‘‘vatthuvajjāni rūpāni ca arūpāna’’nti āha.
ஸஹஜாதவாரவண்ணனா நிட்டி²தா.
Sahajātavāravaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / 1. குஸலத்திகங் • 1. Kusalattikaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. ஸஹஜாதவாரவண்ணனா • 2. Sahajātavāravaṇṇanā
