| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
២. សហជាតវារវណ្ណនា
2. Sahajātavāravaṇṇanā
២៣៤-២៤២. សហជាតវារេ កុសលំ ធម្មំ សហជាតោតិ កុសលំ ធម្មំ បដិច្ច តេន សហជាតោ ហុត្វាតិ អត្ថោ។ សេសមេត្ថ បដិច្ចវារេ វុត្តនយេនេវ វេទិតព្ពំ។ អវសានេ បនស្ស ‘‘បដិច្ចត្តំ នាម សហជាតត្តំ, សហជាតត្តំ នាម បដិច្ចត្ត’’ន្តិ ឥទំ ឧភិន្នម្បិ ឯតេសំ វារានំ អត្ថតោ និន្នានាករណភាវទស្សនត្ថំ វុត្តំ។ អត្ថតោ ហិ ឯតេ ទ្វេបិ និន្នានាករណា។ ឯវំ សន្តេបិ អញ្ញមញ្ញស្ស អត្ថនិយមនត្ថំ វុត្តា។ ‘‘ចក្ខុញ្ច បដិច្ច រូបេ ចា’’តិអាទីសុ ហិ អសហជាតម្បិ បដិច្ច ឧប្បជ្ជតីតិ វុច្ចតិ។ សហជាតម្បិ ច ឧបាទារូបំ ភូតរូបស្ស បច្ចយោ ន ហោតិ។ ឥតិ បដិច្ចវារេន សហជាតបច្ចយភាវំ, សហជាតវារេន ច បដិច្ចាតិ វុត្តស្ស សហជាតភាវំ និយមេតុំ ឧភោបេតេ វុត្តា។ អបិច តថា ពុជ្ឈនកានំ អជ្ឈាសយវសេន ទេសនាវិលាសេន និរុត្តិបដិសម្ភិទាប្បភេទជាននវសេន ចាបិ ឯតេ ឧភោបិ វុត្តាតិ។
234-242. Sahajātavāre kusalaṃ dhammaṃ sahajātoti kusalaṃ dhammaṃ paṭicca tena sahajāto hutvāti attho. Sesamettha paṭiccavāre vuttanayeneva veditabbaṃ. Avasāne panassa ‘‘paṭiccattaṃ nāma sahajātattaṃ, sahajātattaṃ nāma paṭiccatta’’nti idaṃ ubhinnampi etesaṃ vārānaṃ atthato ninnānākaraṇabhāvadassanatthaṃ vuttaṃ. Atthato hi ete dvepi ninnānākaraṇā. Evaṃ santepi aññamaññassa atthaniyamanatthaṃ vuttā. ‘‘Cakkhuñca paṭicca rūpe cā’’tiādīsu hi asahajātampi paṭicca uppajjatīti vuccati. Sahajātampi ca upādārūpaṃ bhūtarūpassa paccayo na hoti. Iti paṭiccavārena sahajātapaccayabhāvaṃ, sahajātavārena ca paṭiccāti vuttassa sahajātabhāvaṃ niyametuṃ ubhopete vuttā. Apica tathā bujjhanakānaṃ ajjhāsayavasena desanāvilāsena niruttipaṭisambhidāppabhedajānanavasena cāpi ete ubhopi vuttāti.
សហជាតវារវណ្ណនា និដ្ឋិតា។
Sahajātavāravaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / បដ្ឋានបាឡិ • Paṭṭhānapāḷi / ១. កុសលត្តិកំ • 1. Kusalattikaṃ
