| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
7. සහම්‌පතිබ්‍රහ්‌මසුත්‌තං
7. Sahampatibrahmasuttaṃ
527. එකං සමයං භගවා උරුවෙලායං විහරති නජ්‌ජා නෙරඤ්‌ජරාය තීරෙ අජපාලනිග්‍රොධෙ පඨමාභිසම්‌බුද්‌ධො. අථ ඛො භගවතො රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි – ‘‘පඤ්‌චින්‌ද්‍රියානි භාවිතානි බහුලීකතානි අමතොගධානි හොන්‌ති අමතපරායණානි අමතපරියොසානානි. කතමානි පඤ්‌ච? සද්‌ධින්‌ද්‍රියං භාවිතං බහුලීකතං අමතොගධං හොති අමතපරායණං අමතපරියොසානං. වීරියින්‌ද්‍රියං…පෙ.… සතින්‌ද්‍රියං…පෙ.… සමාධින්‌ද්‍රියං…පෙ.… පඤ්‌ඤින්‌ද්‍රියං භාවිතං බහුලීකතං අමතොගධං හොති අමතපරායණං අමතපරියොසානං. ඉමානි පඤ්‌චින්‌ද්‍රියානි භාවිතානි බහුලීකතානි අමතොගධානි හොන්‌ති අමතපරායණානි අමතපරියොසානානී’’ති.
527. Ekaṃ samayaṃ bhagavā uruvelāyaṃ viharati najjā nerañjarāya tīre ajapālanigrodhe paṭhamābhisambuddho. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘pañcindriyāni bhāvitāni bahulīkatāni amatogadhāni honti amataparāyaṇāni amatapariyosānāni. Katamāni pañca? Saddhindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ. Vīriyindriyaṃ…pe… satindriyaṃ…pe… samādhindriyaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ. Imāni pañcindriyāni bhāvitāni bahulīkatāni amatogadhāni honti amataparāyaṇāni amatapariyosānānī’’ti.
අථ ඛො බ්‍රහ්‌මා සහම්‌පති භගවතො චෙතසා චෙතොපරිවිතක්‌කමඤ්‌ඤාය – සෙය්‍යථාපි නාම බලවා පුරිසො සමිඤ්‌ජිතං වා බාහං පසාරෙය්‍ය, පසාරිතං වා බාහං සමිඤ්‌ජෙය්‍ය; එවමෙව බ්‍රහ්‌මලොකෙ අන්‌තරහිතො භගවතො පුරතො පාතුරහොසි. අථ ඛො බ්‍රහ්‌මා සහම්‌පති එකංසං උත්‌තරාසඞ්‌ගං කරිත්‌වා යෙන භගවා තෙනඤ්‌ජලිං පණාමෙත්‌වා භගවන්‌තං එතදවොච – ‘‘එවමෙතං, භගවා, එවමෙතං සුගත! පඤ්‌චින්‌ද්‍රියානි භාවිතානි බහුලීකතානි අමතොගධානි හොන්‌ති අමතපරායණානි අමතපරියොසානානි. කතමානි පඤ්‌ච? සද්‌ධින්‌ද්‍රියං භාවිතං බහුලීකතං අමතොගධං හොති අමතපරායණං අමතපරියොසානං…පෙ.… පඤ්‌ඤින්‌ද්‍රියං භාවිතං බහුලීකතං අමතොගධං හොති අමතපරායණං අමතපරියොසානං. ඉමානි පඤ්‌චින්‌ද්‍රියානි භාවිතානි බහුලීකතානි අමතොගධානි හොන්‌ති අමතපරායණානි අමතපරියොසානානි’’.
Atha kho brahmā sahampati bhagavato cetasā cetoparivitakkamaññāya – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya; evameva brahmaloke antarahito bhagavato purato pāturahosi. Atha kho brahmā sahampati ekaṃsaṃ uttarāsaṅgaṃ karitvā yena bhagavā tenañjaliṃ paṇāmetvā bhagavantaṃ etadavoca – ‘‘evametaṃ, bhagavā, evametaṃ sugata! Pañcindriyāni bhāvitāni bahulīkatāni amatogadhāni honti amataparāyaṇāni amatapariyosānāni. Katamāni pañca? Saddhindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ…pe… paññindriyaṃ bhāvitaṃ bahulīkataṃ amatogadhaṃ hoti amataparāyaṇaṃ amatapariyosānaṃ. Imāni pañcindriyāni bhāvitāni bahulīkatāni amatogadhāni honti amataparāyaṇāni amatapariyosānāni’’.
‘‘භූතපුබ්‌බාහං , භන්‌තෙ, කස්‌සපෙ සම්‌මාසම්‌බුද්‌ධෙ බ්‍රහ්‌මචරියං අචරිං. තත්‍රපි මං එවං ජානන්‌ති – ‘සහකො භික්‌ඛු, සහකො භික්‌ඛූ’ති. සො ඛ්‌වාහං, භන්‌තෙ, ඉමෙසංයෙව පඤ්‌චන්‌නං ඉන්‌ද්‍රියානං භාවිතත්‌තා බහුලීකතත්‌තා කාමෙසු කාමච්‌ඡන්‌දං විරාජෙත්‌වා කායස්‌ස භෙදා පරං මරණා සුගතිං බ්‍රහ්‌මලොකං උපපන්‌නො. තත්‍රපි මං එවං ජානන්‌ති – ‘බ්‍රහ්‌මා සහම්‌පති, බ්‍රහ්‌මා සහම්‌පතී’’’ති. ‘‘එවමෙතං, භගවා, එවමෙතං සුගත! අහමෙතං ජානාමි, අහමෙතං පස්‌සාමි යථා ඉමානි පඤ්‌චින්‌ද්‍රියානි භාවිතානි බහුලීකතානි අමතොගධානි හොන්‌ති අමතපරායණානි අමතපරියොසානානී’’ති. සත්‌තමං.
‘‘Bhūtapubbāhaṃ , bhante, kassape sammāsambuddhe brahmacariyaṃ acariṃ. Tatrapi maṃ evaṃ jānanti – ‘sahako bhikkhu, sahako bhikkhū’ti. So khvāhaṃ, bhante, imesaṃyeva pañcannaṃ indriyānaṃ bhāvitattā bahulīkatattā kāmesu kāmacchandaṃ virājetvā kāyassa bhedā paraṃ maraṇā sugatiṃ brahmalokaṃ upapanno. Tatrapi maṃ evaṃ jānanti – ‘brahmā sahampati, brahmā sahampatī’’’ti. ‘‘Evametaṃ, bhagavā, evametaṃ sugata! Ahametaṃ jānāmi, ahametaṃ passāmi yathā imāni pañcindriyāni bhāvitāni bahulīkatāni amatogadhāni honti amataparāyaṇāni amatapariyosānānī’’ti. Sattamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6-7. පතිට්‌ඨිතසුත්‌තාදිවණ්‌ණනා • 6-7. Patiṭṭhitasuttādivaṇṇanā
