| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
5. ஸஹஸெய்யஸிக்கா²பத³ங்
5. Sahaseyyasikkhāpadaṃ
49. பஞ்சமே முட்டா² ஸதி ஏதேஸந்தி முட்ட²ஸ்ஸதீ. நத்தி² ஸம்பஜானங் ஏதேஸந்தி அஸம்பஜானா. ப⁴வங்கோ³திண்ணகாலேதி நித்³தோ³க்கமனகாலே.
49. Pañcame muṭṭhā sati etesanti muṭṭhassatī. Natthi sampajānaṃ etesanti asampajānā. Bhavaṅgotiṇṇakāleti niddokkamanakāle.
50. ‘‘பகதியா’’தி பத³ங் ‘‘தெ³ந்தீ’’தி பதே³ விஸேஸனங். தே பி⁴க்கூ² தெ³ந்தீதி ஸம்ப³ந்தோ⁴. ‘‘கா³ரவேனா’’தி பத³ஞ்ச ‘‘ஸிக்கா²காமதாயா’’தி பத³ஞ்ச ‘‘தெ³ந்தீ’’தி பதே³ ஹேது. ஸீஸஸ்ஸ உபதா⁴னங் உஸ்ஸீஸங், தஸ்ஸ கரீயதே உஸ்ஸீஸகரணங் , தங்யேவ அத்தோ² பயோஜனங் உஸ்ஸீஸகரணத்தோ², தத³த்தா²ய. தத்ராதி புரிமவசனாபெக்க²ங், ‘‘ஸிக்கா²காமதாயா’’தி வசனேதி அத்தோ². நித³ஸ்ஸனந்தி ஸேஸோ. அத² வா ஸிக்கா²காமதாயாதி பச்சத்தே பு⁴ம்மவசனங். ‘‘இத³ம்பிஸ்ஸ ஹோதி ஸீலஸ்மி’’ந்திஆதீ³ஸு (தீ³॰ நி॰ 1.195 ஆத³யோ) விய. இத³ம்பி ஸிக்கா²காமதாய அயங் ஸிக்கா²காமதா ஸிக்கா²காமபா⁴வோ ஹோதீதி யோஜனா. ஏஸ நயோ ‘‘தத்ரித³ங் ஸமந்தபாஸாதி³காய ஸமந்தபாஸாதி³கத்தஸ்மி’’ந்திஆதீ³ஸுபி. பி⁴க்கூ² கி²பந்தீதி யோஜனா. தந்தி ஆயஸ்மந்தங் ராஹுலங். அதா²தி கி²பனதோ பச்சா². இத³ந்தி வத்து². ஸம்முஞ்சனிகசவரச²ட்³ட³னகானி ஸந்தா⁴ய வுத்தங். தேனாயஸ்மதா ராஹுலேன பாதிதங் நு கோ²தி யோஜனா. ஸோ பனாயஸ்மா க³ச்ச²தீதி ஸம்ப³ந்தோ⁴. அபரிபோ⁴கா³ அஞ்ஞேஸந்தி அஞ்ஞேஹி ந பரிபு⁴ஞ்ஜிதப்³பா³.
50. ‘‘Pakatiyā’’ti padaṃ ‘‘dentī’’ti pade visesanaṃ. Te bhikkhū dentīti sambandho. ‘‘Gāravenā’’ti padañca ‘‘sikkhākāmatāyā’’ti padañca ‘‘dentī’’ti pade hetu. Sīsassa upadhānaṃ ussīsaṃ, tassa karīyate ussīsakaraṇaṃ, taṃyeva attho payojanaṃ ussīsakaraṇattho, tadatthāya. Tatrāti purimavacanāpekkhaṃ, ‘‘sikkhākāmatāyā’’ti vacaneti attho. Nidassananti seso. Atha vā sikkhākāmatāyāti paccatte bhummavacanaṃ. ‘‘Idampissa hoti sīlasmi’’ntiādīsu (dī. ni. 1.195 ādayo) viya. Idampi sikkhākāmatāya ayaṃ sikkhākāmatā sikkhākāmabhāvo hotīti yojanā. Esa nayo ‘‘tatridaṃ samantapāsādikāya samantapāsādikattasmi’’ntiādīsupi. Bhikkhū khipantīti yojanā. Tanti āyasmantaṃ rāhulaṃ. Athāti khipanato pacchā. Idanti vatthu. Sammuñcanikacavarachaḍḍanakāni sandhāya vuttaṃ. Tenāyasmatā rāhulena pātitaṃ nu khoti yojanā. So panāyasmā gacchatīti sambandho. Aparibhogā aññesanti aññehi na paribhuñjitabbā.
51. ஹீதி ஸச்சங், யஸ்மா வா. ஸயனங் ஸெய்யா, காயபஸாரணகிரியா, ஸயந்தி எத்தா²தி ஸெய்யா, மஞ்சபீடா²தி³. தது³ப⁴யம்பி ஏகஸேஸேன வா ஸாமஞ்ஞனித்³தே³ஸேன வா ஏகதோ கத்வா ‘‘ஸஹஸெய்ய’’ந்தி வுத்தந்தி த³ஸ்ஸெந்தோ ஆஹ ‘‘ஸெய்யா’’திஆதி³. தத்தா²தி த்³வீஸு ஸெய்யாஸு. தஸ்மாதி யஸ்மா த்³வே ஸெய்யா த³ஸ்ஸிதா, தஸ்மா. ‘‘ஸப்³ப³ச்ச²ன்னா’’திஆதி³னா லக்க²ணங் வுத்தந்தி யோஜனா. பாகடவோஹாரந்தி லோகே விதி³தங் வசனங். து³ஸ்ஸகுடியந்தி து³ஸ்ஸேன சா²தி³தகுடியங். அட்ட²கதா²ஸு யதா²வுத்தே பஞ்சவித⁴ச்ச²த³னேயேவ க³ய்ஹமானே கோ தோ³ஸோதி ஆஹ ‘‘பஞ்சவித⁴ச்ச²த³னேயேவா’’திஆதி³. யங் பன ஸேனாஸனங் பரிக்கி²த்தந்தி ஸம்ப³ந்தோ⁴. பாகாரேன வாதி இட்ட²கஸிலாதா³ருனா வா. அஞ்ஞேன வாதி கிலஞ்ஜாதி³னா வா. வத்தே²னபீதி பிஸத்³தோ³ பகே³வ இட்ட²காதி³னாதி த³ஸ்ஸேதி. யஸ்ஸாதி ஸேனாஸனஸங்கா²தாய ஸெய்யாய. உபரீதி வா ஸமந்ததோதி வா யோஜனா. ஏகேன த்³வாரேன பவிஸித்வா ஸப்³ப³பாஸாத³ஸ்ஸ வளஞ்ஜிதப்³ப³தங் ஸந்தா⁴ய வுத்தங் ‘‘ஏகூபசாரோ’’தி. ஸதக³ப்³ப⁴ங் வா சதுஸ்ஸாலங் ஏகூபசாரங் ஹோதீதி ஸம்ப³ந்தோ⁴. தந்தி ஸேனாஸனஸங்கா²தங் ஸெய்யங்.
51.Hīti saccaṃ, yasmā vā. Sayanaṃ seyyā, kāyapasāraṇakiriyā, sayanti etthāti seyyā, mañcapīṭhādi. Tadubhayampi ekasesena vā sāmaññaniddesena vā ekato katvā ‘‘sahaseyya’’nti vuttanti dassento āha ‘‘seyyā’’tiādi. Tatthāti dvīsu seyyāsu. Tasmāti yasmā dve seyyā dassitā, tasmā. ‘‘Sabbacchannā’’tiādinā lakkhaṇaṃ vuttanti yojanā. Pākaṭavohāranti loke viditaṃ vacanaṃ. Dussakuṭiyanti dussena chāditakuṭiyaṃ. Aṭṭhakathāsu yathāvutte pañcavidhacchadaneyeva gayhamāne ko dosoti āha ‘‘pañcavidhacchadaneyevā’’tiādi. Yaṃ pana senāsanaṃ parikkhittanti sambandho. Pākārena vāti iṭṭhakasilādārunā vā. Aññena vāti kilañjādinā vā. Vatthenapīti pisaddo pageva iṭṭhakādināti dasseti. Yassāti senāsanasaṅkhātāya seyyāya. Uparīti vā samantatoti vā yojanā. Ekena dvārena pavisitvā sabbapāsādassa vaḷañjitabbataṃ sandhāya vuttaṃ ‘‘ekūpacāro’’ti. Satagabbhaṃ vā catussālaṃ ekūpacāraṃ hotīti sambandho. Tanti senāsanasaṅkhātaṃ seyyaṃ.
தத்தா²தி ஸேனாஸனஸங்கா²தாயங் ஸெய்யாயங். ஸம்ப³ஹுலா ஸாமணேரா ஸசே ஹொந்தி, ஏகோ பி⁴க்கு² ஸசே ஹோதீதி யோஜனா. ‘‘ஸாமணேரா’’தி இத³ங் பச்சாஸன்னவஸேன வுத்தங், உபலக்க²ணவஸேன வா அஞ்ஞேஹிபி ஸஹஸெய்யானங் ஆபத்திஸம்ப⁴வதோ. தேதி ஸாமணேரா. ஸப்³பே³ஸந்தி பி⁴க்கூ²னங். தஸ்ஸாதி ஸாமணேரஸ்ஸ. ஏஸேவ நயோதி ஏஸோ ஏவ நயோ, ந அஞ்ஞோ நயோதி அத்தோ². அத² வா ஏஸேவ நயோதி ஏஸோ இவ நயோ, ஏஸோ ஏதாதி³ஸோ நயோ இவ அயங் நயோ த³ட்ட²ப்³போ³தி அத்தோ².
Tatthāti senāsanasaṅkhātāyaṃ seyyāyaṃ. Sambahulā sāmaṇerā sace honti, eko bhikkhu sace hotīti yojanā. ‘‘Sāmaṇerā’’ti idaṃ paccāsannavasena vuttaṃ, upalakkhaṇavasena vā aññehipi sahaseyyānaṃ āpattisambhavato. Teti sāmaṇerā. Sabbesanti bhikkhūnaṃ. Tassāti sāmaṇerassa. Eseva nayoti eso eva nayo, na añño nayoti attho. Atha vā eseva nayoti eso iva nayo, eso etādiso nayo iva ayaṃ nayo daṭṭhabboti attho.
அபி சாதி ஏகங்ஸேன. எத்தா²தி இமஸ்மிங் ஸிக்கா²பதே³. சதுக்கந்தி ஏகாவாஸஏகானுபஸம்பன்னங், ஏகாவாஸனானுபஸம்பன்னங், நானாவாஸஏகானுபஸம்பன்னங், நானாவாஸனானுபஸம்பன்னந்தி சதுஸமூஹங், சதுபரிமாணங் வா. யோதி பி⁴க்கு². ஹிஸத்³தோ³ வித்தா²ரஜோதகோ, தங் வசனங் வித்தா²ரயிஸ்ஸாமீதி அத்தோ², வித்தா²ரோ மயா வுச்சதேதி வா. தே³வஸிகந்தி தி³வஸே தி³வஸே. ணிகபச்சயோ ஹி விச்ச²த்த²வாசகோ. யோபி ஸஹஸெய்யங் கப்பேதி, தஸ்ஸாபி ஆபத்தீதி யோஜேதப்³போ³. தத்ராதி ‘‘திரச்சா²னக³தேனாபீ’’தி வசனே.
Api cāti ekaṃsena. Etthāti imasmiṃ sikkhāpade. Catukkanti ekāvāsaekānupasampannaṃ, ekāvāsanānupasampannaṃ, nānāvāsaekānupasampannaṃ, nānāvāsanānupasampannanti catusamūhaṃ, catuparimāṇaṃ vā. Yoti bhikkhu. Hisaddo vitthārajotako, taṃ vacanaṃ vitthārayissāmīti attho, vitthāro mayā vuccateti vā. Devasikanti divase divase. Ṇikapaccayo hi vicchatthavācako. Yopi sahaseyyaṃ kappeti, tassāpi āpattīti yojetabbo. Tatrāti ‘‘tiracchānagatenāpī’’ti vacane.
‘‘அபதா³னங் அஹிமச்சா², த்³விபதா³னஞ்ச குக்குடீ;
‘‘Apadānaṃ ahimacchā, dvipadānañca kukkuṭī;
சதுப்பதா³னங் மஜ்ஜாரீ, வத்து² பாராஜிகஸ்ஸிமா’’தி. (பாரா॰ அட்ட²॰ 1.55);
Catuppadānaṃ majjārī, vatthu pārājikassimā’’ti. (pārā. aṭṭha. 1.55);
இமங் கா³த²ங் ஸந்தா⁴ய வுத்தங் ‘‘வுத்தனயேனேவா’’தி. தஸ்மாதி யஸ்மா வேதி³தப்³போ³, தஸ்மா. கோ³தா⁴தி குண்டோ³. பி³ளாலோதி ஆகு²பு⁴ஜோ. மங்கு³ஸோதி நகுலோ.
Imaṃ gāthaṃ sandhāya vuttaṃ ‘‘vuttanayenevā’’ti. Tasmāti yasmā veditabbo, tasmā. Godhāti kuṇḍo. Biḷāloti ākhubhujo. Maṅgusoti nakulo.
அஸம்ப³த்³த⁴பி⁴த்திகஸ்ஸ கதபாஸாத³ஸ்ஸாதி யோஜனா. துலாதி எத்த² துலா நாம த²ம்பா⁴ன, முபரி த³க்கி²ணுத்தரவித்தா²ரவஸேன ட²பிதோ தா³ருவிஸேஸோ த²லதி த²ம்பே⁴ஸு பதிட்டா²தீதி கத்வா. தா பன ஹெட்டி²மபரிச்சே²த³தோ திஸ்ஸோ, உக்கட்ட²பரிச்சே²தே³ன பன பஞ்சஸத்தனவாத³யோ. நானூபசாரே பாஸாதே³தி ஸம்ப³ந்தோ⁴.
Asambaddhabhittikassa katapāsādassāti yojanā. Tulāti ettha tulā nāma thambhāna, mupari dakkhiṇuttaravitthāravasena ṭhapito dāruviseso thalati thambhesu patiṭṭhātīti katvā. Tā pana heṭṭhimaparicchedato tisso, ukkaṭṭhaparicchedena pana pañcasattanavādayo. Nānūpacāre pāsādeti sambandho.
வாளஸங்கா⁴டாதீ³ஸூதி வாளரூபங் த³ஸ்ஸெத்வா கதேஸு ஸங்கா⁴டாதீ³ஸு. ஆதி³ஸத்³தே³ன துலங் ஸங்க³ண்ஹாதி. எத்த² ச ஸங்கா⁴டோ நாம துலான, முபரி புப்³ப³பச்சி²மாயாமவஸேன ட²பிதோ கட்ட²விஸேஸோ ஸம்மா க⁴டெந்தி எத்த² கோ³பானஸ்யாத³யோதி கத்வா. தே பன தயோ ஹொந்தி. நிப்³ப³கோஸப்³ப⁴ந்தரேதி ச²த³னகோடிஅப்³ப⁴ந்தரே. பரிமண்ட³லங் வா சதுரஸ்ஸங் வா ஸேனாஸனங் ஹோதீதி ஸம்ப³ந்தோ⁴. தத்ராதி தஸ்மிங் ஸேனாஸனே. அபரிச்சி²ன்னோ க³ப்³ப⁴ஸ்ஸ உபசாரோ ஏதேஸந்தி அபரிச்சி²ன்னக³ப்³பூ⁴பசாரா ஸப்³ப³க³ப்³பா⁴, தே பவிஸந்தீதி அத்தோ². நிபன்னானங் பி⁴க்கூ²னந்தி யோஜனா. தத்ராதி தஸ்மிங் பமுகே². பமுக²ஸ்ஸ ஸப்³ப³ச்ச²ன்னத்தா, ஸப்³ப³பரிச்ச²ன்னத்தா ச ஆபத்திங் கரோதீதி யோஜனா. நனு பமுகே² ச²ன்னமேவ அத்தி², நோ பரிச்ச²ன்னந்தி ஆஹ ‘‘க³ப்³ப⁴பரிக்கே²போ’’திஆதி³. ஹீதி ஸச்சங்.
Vāḷasaṅghāṭādīsūti vāḷarūpaṃ dassetvā katesu saṅghāṭādīsu. Ādisaddena tulaṃ saṅgaṇhāti. Ettha ca saṅghāṭo nāma tulāna, mupari pubbapacchimāyāmavasena ṭhapito kaṭṭhaviseso sammā ghaṭenti ettha gopānasyādayoti katvā. Te pana tayo honti. Nibbakosabbhantareti chadanakoṭiabbhantare. Parimaṇḍalaṃ vā caturassaṃ vā senāsanaṃ hotīti sambandho. Tatrāti tasmiṃ senāsane. Aparicchinno gabbhassa upacāro etesanti aparicchinnagabbhūpacārā sabbagabbhā, te pavisantīti attho. Nipannānaṃ bhikkhūnanti yojanā. Tatrāti tasmiṃ pamukhe. Pamukhassa sabbacchannattā, sabbaparicchannattā ca āpattiṃ karotīti yojanā. Nanu pamukhe channameva atthi, no paricchannanti āha ‘‘gabbhaparikkhepo’’tiādi. Hīti saccaṃ.
யங் பன அந்த⁴கட்ட²கதா²யங் வுத்தந்தி ஸம்ப³ந்தோ⁴. ஜக³தீதி பத²வியா ச மந்தி³ராலிந்த³வத்து²ஸ்ஸ ச நாமமேதங். இத⁴ பன மந்தி³ராலிந்த³வத்து²ஸங்கா²தா பூ⁴பே⁴தா³ க³ஹிதா. தத்தா²தி அந்த⁴கட்ட²கதா²யங். கஸ்மா பாளியா ந ஸமேதீதி ஆஹ ‘‘த³ஸஹத்து²ப்³பே³தா⁴பீ’’திஆதி³. ஹீதி யஸ்மா. தத்தா²தி அந்த⁴கட்ட²கதா²யங். யேபி மஹாபாஸாதா³ ஹொந்தீதி யோஜனா. தேஸுபீதி மஹாபாஸாதே³ஸுபி.
Yaṃ pana andhakaṭṭhakathāyaṃ vuttanti sambandho. Jagatīti pathaviyā ca mandirālindavatthussa ca nāmametaṃ. Idha pana mandirālindavatthusaṅkhātā bhūbhedā gahitā. Tatthāti andhakaṭṭhakathāyaṃ. Kasmā pāḷiyā na sametīti āha ‘‘dasahatthubbedhāpī’’tiādi. Hīti yasmā. Tatthāti andhakaṭṭhakathāyaṃ. Yepi mahāpāsādā hontīti yojanā. Tesupīti mahāpāsādesupi.
ஸுதா⁴ச²த³னமண்ட³பஸ்ஸாதி எத்த² ‘‘ஸுதா⁴’’தி இத³ங் உபலக்க²ணவஸேன வுத்தங் யேன கேனசி ச²த³னமண்ட³பஸ்ஸாபி அதி⁴ப்பேதத்தா. மண்ட³ங் வுச்சதி ஸூரியரஸ்மி, தங் பாதி ரக்க²தி, ததோ வா ஜனந்தி மண்ட³பங். நனு ஏகூபசாரங் ஹோதி பாகாரஸ்ஸ சி²த்³த³த்தாதி ஆஹ ‘‘ந ஹீ’’திஆதி³. ஹீதி ஸச்சங், யஸ்மா வா. வளஞ்ஜனத்தா²ய ஏவாதி ஏவகாரோ யோஜேதப்³போ³. தேனாஹ ‘‘ந வளஞ்ஜனூபச்சே²த³னத்தா²யா’’தி. அத² வா ‘‘ஸத்³த³ந்தரத்தா²போஹனேன ஸத்³தோ³ அத்த²ங் வத³தீ’’தி (உதா³॰ அட்ட²॰ 1; தீ³॰ நி॰ டி॰ 1.1; ம॰ நி॰ டீ॰ 1.மூலபரியாயஸுத்தவண்ணனா; ஸங்॰ நி॰ டீ॰ 1.1.ஓக⁴தரணஸுத்தவண்ணனா; அ॰ நி॰ டீ॰ 1.1.ருபாதி³வக்³க³வண்ணனா) வுத்தத்தா ‘‘ந வளஞ்ஜனூபச்சே²த³னத்தா²யா’’தி வுத்தங். கவாடந்தி எத்த² த்³வாரமேவ அதி⁴ப்பேதங் பரியாயேன வுத்தத்தா, அஸதி ச த்³வாரே கவாடஸ்ஸாபா⁴வதோ. ஸங்வரணவிவரணகாலே கவதி ஸத்³த³ங் கரோதீதி கவாடங்.
Sudhāchadanamaṇḍapassāti ettha ‘‘sudhā’’ti idaṃ upalakkhaṇavasena vuttaṃ yena kenaci chadanamaṇḍapassāpi adhippetattā. Maṇḍaṃ vuccati sūriyarasmi, taṃ pāti rakkhati, tato vā jananti maṇḍapaṃ. Nanu ekūpacāraṃ hoti pākārassa chiddattāti āha ‘‘na hī’’tiādi. Hīti saccaṃ, yasmā vā. Vaḷañjanatthāya evāti evakāro yojetabbo. Tenāha ‘‘na vaḷañjanūpacchedanatthāyā’’ti. Atha vā ‘‘saddantaratthāpohanena saddo atthaṃ vadatī’’ti (udā. aṭṭha. 1; dī. ni. ṭi. 1.1; ma. ni. ṭī. 1.mūlapariyāyasuttavaṇṇanā; saṃ. ni. ṭī. 1.1.oghataraṇasuttavaṇṇanā; a. ni. ṭī. 1.1.rupādivaggavaṇṇanā) vuttattā ‘‘na vaḷañjanūpacchedanatthāyā’’ti vuttaṃ. Kavāṭanti ettha dvārameva adhippetaṃ pariyāyena vuttattā, asati ca dvāre kavāṭassābhāvato. Saṃvaraṇavivaraṇakāle kavati saddaṃ karotīti kavāṭaṃ.
தத்ராதி ‘‘ஏகூபசாரத்தா’’தி வசனே. யஸ்ஸாதி பரவாதி³னோ. அனுயோகோ³ ஸியாதி யோஜனா. இதா⁴தி இமஸ்மிங் ஸஹஸெய்யஸிக்கா²பதே³, வுத்தந்தி ஸம்ப³ந்தோ⁴. தத்தா²தி பிஹிதத்³வாரே க³ப்³பே⁴. ஸோதி பரவாதீ³. ஸப்³ப³ச்ச²ன்னத்தா ஆபத்தி இதி வுத்தேதி யோஜனா. ஏஸேவ நயோ ‘‘ஸப்³ப³பரிச்ச²ன்னதா ந ஹோதீ’’தி எத்தா²பி. பச்சாக³மிஸ்ஸதீதி பதி ஆக³மிஸ்ஸதி, புன ஆக³மிஸ்ஸதீதி அத்தோ².
Tatrāti ‘‘ekūpacārattā’’ti vacane. Yassāti paravādino. Anuyogo siyāti yojanā. Idhāti imasmiṃ sahaseyyasikkhāpade, vuttanti sambandho. Tatthāti pihitadvāre gabbhe. Soti paravādī. Sabbacchannattā āpatti iti vutteti yojanā. Eseva nayo ‘‘sabbaparicchannatā na hotī’’ti etthāpi. Paccāgamissatīti pati āgamissati, puna āgamissatīti attho.
ப்³யஞ்ஜனமத்தேனேவாதி ‘‘ஸப்³ப³ச்ச²ன்னா’’திஆதி³அக்க²ரபத³மத்தேனேவ, ந அத்த²வஸேன. ‘‘ஏவஞ்ச ஸதீ’’தி இமினா அப்³யாபிததோ³ஸங் த³ஸ்ஸேதி. ததோதி அனாபத்திதோ, பரிஹாயெய்யாதி ஸம்ப³ந்தோ⁴. தஸ்மாதி யஸ்மா அனியதேஸு வுத்தங், தஸ்மா. தத்தா²தி அனியதேஸு. இதா⁴பீதி இமஸ்மிங் ஸிக்கா²பதே³பி. யங் யந்தி ஸேனாஸனங். ஸப்³ப³த்தா²தி ஸப்³பே³ஸு ஸேனாஸனேஸு, ஸஹஸெய்யாபத்தி ஹோதீதி ஸம்ப³ந்தோ⁴.
Byañjanamattenevāti ‘‘sabbacchannā’’tiādiakkharapadamatteneva, na atthavasena. ‘‘Evañca satī’’ti iminā abyāpitadosaṃ dasseti. Tatoti anāpattito, parihāyeyyāti sambandho. Tasmāti yasmā aniyatesu vuttaṃ, tasmā. Tatthāti aniyatesu. Idhāpīti imasmiṃ sikkhāpadepi. Yaṃ yanti senāsanaṃ. Sabbatthāti sabbesu senāsanesu, sahaseyyāpatti hotīti sambandho.
53. த்³வீஸு அட்ட²கதா²வாதே³ஸு மஹாஅட்ட²கதா²வாதோ³வ யுத்தோதி ஸோ பச்சா² வுத்தோ.
53. Dvīsu aṭṭhakathāvādesu mahāaṭṭhakathāvādova yuttoti so pacchā vutto.
இமினாபீதி ஸேனம்ப³மண்ட³பேனாபி. ஏதந்தி ஜக³தியா அபரிக்கி²த்ததங். யதா²தி யங்ஸத்³த³த்தோ² ததியந்தனிபாதோ, யேன ஸேனம்ப³மண்ட³பேனாதி அத்தோ²தி. பஞ்சமங்.
Imināpīti senambamaṇḍapenāpi. Etanti jagatiyā aparikkhittataṃ. Yathāti yaṃsaddattho tatiyantanipāto, yena senambamaṇḍapenāti atthoti. Pañcamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. பட²மஸஹஸெய்யஸிக்கா²பத³வண்ணனா • 5. Paṭhamasahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
