| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๕. สหเสยฺยสิกฺขาปทํ
5. Sahaseyyasikkhāpadaṃ
๔๙. ปญฺจเม มุฎฺฐา สติ เอเตสนฺติ มุฎฺฐสฺสตีฯ นตฺถิ สมฺปชานํ เอเตสนฺติ อสมฺปชานาฯ ภวโงฺคติณฺณกาเลติ นิโทฺทกฺกมนกาเลฯ
49. Pañcame muṭṭhā sati etesanti muṭṭhassatī. Natthi sampajānaṃ etesanti asampajānā. Bhavaṅgotiṇṇakāleti niddokkamanakāle.
๕๐. ‘‘ปกติยา’’ติ ปทํ ‘‘เทนฺตี’’ติ ปเท วิเสสนํฯ เต ภิกฺขู เทนฺตีติ สมฺพโนฺธฯ ‘‘คารเวนา’’ติ ปทญฺจ ‘‘สิกฺขากามตายา’’ติ ปทญฺจ ‘‘เทนฺตี’’ติ ปเท เหตุฯ สีสสฺส อุปธานํ อุสฺสีสํ, ตสฺส กรียเต อุสฺสีสกรณํ , ตํเยว อโตฺถ ปโยชนํ อุสฺสีสกรณโตฺถ, ตทตฺถายฯ ตตฺราติ ปุริมวจนาเปกฺขํ, ‘‘สิกฺขากามตายา’’ติ วจเนติ อโตฺถฯ นิทสฺสนนฺติ เสโสฯ อถ วา สิกฺขากามตายาติ ปจฺจเตฺต ภุมฺมวจนํฯ ‘‘อิทมฺปิสฺส โหติ สีลสฺมิ’’นฺติอาทีสุ (ที. นิ. ๑.๑๙๕ อาทโย) วิยฯ อิทมฺปิ สิกฺขากามตาย อยํ สิกฺขากามตา สิกฺขากามภาโว โหตีติ โยชนาฯ เอส นโย ‘‘ตตฺริทํ สมนฺตปาสาทิกาย สมนฺตปาสาทิกตฺตสฺมิ’’นฺติอาทีสุปิฯ ภิกฺขู ขิปนฺตีติ โยชนาฯ ตนฺติ อายสฺมนฺตํ ราหุลํฯ อถาติ ขิปนโต ปจฺฉาฯ อิทนฺติ วตฺถุฯ สมฺมุญฺจนิกจวรฉฑฺฑนกานิ สนฺธาย วุตฺตํฯ เตนายสฺมตา ราหุเลน ปาติตํ นุ โขติ โยชนาฯ โส ปนายสฺมา คจฺฉตีติ สมฺพโนฺธฯ อปริโภคา อเญฺญสนฺติ อเญฺญหิ น ปริภุญฺชิตพฺพาฯ
50. ‘‘Pakatiyā’’ti padaṃ ‘‘dentī’’ti pade visesanaṃ. Te bhikkhū dentīti sambandho. ‘‘Gāravenā’’ti padañca ‘‘sikkhākāmatāyā’’ti padañca ‘‘dentī’’ti pade hetu. Sīsassa upadhānaṃ ussīsaṃ, tassa karīyate ussīsakaraṇaṃ, taṃyeva attho payojanaṃ ussīsakaraṇattho, tadatthāya. Tatrāti purimavacanāpekkhaṃ, ‘‘sikkhākāmatāyā’’ti vacaneti attho. Nidassananti seso. Atha vā sikkhākāmatāyāti paccatte bhummavacanaṃ. ‘‘Idampissa hoti sīlasmi’’ntiādīsu (dī. ni. 1.195 ādayo) viya. Idampi sikkhākāmatāya ayaṃ sikkhākāmatā sikkhākāmabhāvo hotīti yojanā. Esa nayo ‘‘tatridaṃ samantapāsādikāya samantapāsādikattasmi’’ntiādīsupi. Bhikkhū khipantīti yojanā. Tanti āyasmantaṃ rāhulaṃ. Athāti khipanato pacchā. Idanti vatthu. Sammuñcanikacavarachaḍḍanakāni sandhāya vuttaṃ. Tenāyasmatā rāhulena pātitaṃ nu khoti yojanā. So panāyasmā gacchatīti sambandho. Aparibhogā aññesanti aññehi na paribhuñjitabbā.
๕๑. หีติ สจฺจํ, ยสฺมา วาฯ สยนํ เสยฺยา, กายปสารณกิริยา, สยนฺติ เอตฺถาติ เสยฺยา, มญฺจปีฐาทิฯ ตทุภยมฺปิ เอกเสเสน วา สามญฺญนิเทฺทเสน วา เอกโต กตฺวา ‘‘สหเสยฺย’’นฺติ วุตฺตนฺติ ทเสฺสโนฺต อาห ‘‘เสยฺยา’’ติอาทิฯ ตตฺถาติ ทฺวีสุ เสยฺยาสุฯ ตสฺมาติ ยสฺมา เทฺว เสยฺยา ทสฺสิตา, ตสฺมาฯ ‘‘สพฺพจฺฉนฺนา’’ติอาทินา ลกฺขณํ วุตฺตนฺติ โยชนาฯ ปากฎโวหารนฺติ โลเก วิทิตํ วจนํฯ ทุสฺสกุฎิยนฺติ ทุเสฺสน ฉาทิตกุฎิยํฯ อฎฺฐกถาสุ ยถาวุเตฺต ปญฺจวิธจฺฉทเนเยว คยฺหมาเน โก โทโสติ อาห ‘‘ปญฺจวิธจฺฉทเนเยวา’’ติอาทิฯ ยํ ปน เสนาสนํ ปริกฺขิตฺตนฺติ สมฺพโนฺธฯ ปากาเรน วาติ อิฎฺฐกสิลาทารุนา วาฯ อเญฺญน วาติ กิลญฺชาทินา วาฯ วเตฺถนปีติ ปิสโทฺท ปเคว อิฎฺฐกาทินาติ ทเสฺสติฯ ยสฺสาติ เสนาสนสงฺขาตาย เสยฺยายฯ อุปรีติ วา สมนฺตโตติ วา โยชนาฯ เอเกน ทฺวาเรน ปวิสิตฺวา สพฺพปาสาทสฺส วฬญฺชิตพฺพตํ สนฺธาย วุตฺตํ ‘‘เอกูปจาโร’’ติฯ สตคพฺภํ วา จตุสฺสาลํ เอกูปจารํ โหตีติ สมฺพโนฺธฯ ตนฺติ เสนาสนสงฺขาตํ เสยฺยํฯ
51.Hīti saccaṃ, yasmā vā. Sayanaṃ seyyā, kāyapasāraṇakiriyā, sayanti etthāti seyyā, mañcapīṭhādi. Tadubhayampi ekasesena vā sāmaññaniddesena vā ekato katvā ‘‘sahaseyya’’nti vuttanti dassento āha ‘‘seyyā’’tiādi. Tatthāti dvīsu seyyāsu. Tasmāti yasmā dve seyyā dassitā, tasmā. ‘‘Sabbacchannā’’tiādinā lakkhaṇaṃ vuttanti yojanā. Pākaṭavohāranti loke viditaṃ vacanaṃ. Dussakuṭiyanti dussena chāditakuṭiyaṃ. Aṭṭhakathāsu yathāvutte pañcavidhacchadaneyeva gayhamāne ko dosoti āha ‘‘pañcavidhacchadaneyevā’’tiādi. Yaṃ pana senāsanaṃ parikkhittanti sambandho. Pākārena vāti iṭṭhakasilādārunā vā. Aññena vāti kilañjādinā vā. Vatthenapīti pisaddo pageva iṭṭhakādināti dasseti. Yassāti senāsanasaṅkhātāya seyyāya. Uparīti vā samantatoti vā yojanā. Ekena dvārena pavisitvā sabbapāsādassa vaḷañjitabbataṃ sandhāya vuttaṃ ‘‘ekūpacāro’’ti. Satagabbhaṃ vā catussālaṃ ekūpacāraṃ hotīti sambandho. Tanti senāsanasaṅkhātaṃ seyyaṃ.
ตตฺถาติ เสนาสนสงฺขาตายํ เสยฺยายํฯ สมฺพหุลา สามเณรา สเจ โหนฺติ, เอโก ภิกฺขุ สเจ โหตีติ โยชนาฯ ‘‘สามเณรา’’ติ อิทํ ปจฺจาสนฺนวเสน วุตฺตํ, อุปลกฺขณวเสน วา อเญฺญหิปิ สหเสยฺยานํ อาปตฺติสมฺภวโตฯ เตติ สามเณราฯ สเพฺพสนฺติ ภิกฺขูนํฯ ตสฺสาติ สามเณรสฺสฯ เอเสว นโยติ เอโส เอว นโย, น อโญฺญ นโยติ อโตฺถฯ อถ วา เอเสว นโยติ เอโส อิว นโย, เอโส เอตาทิโส นโย อิว อยํ นโย ทฎฺฐโพฺพติ อโตฺถฯ
Tatthāti senāsanasaṅkhātāyaṃ seyyāyaṃ. Sambahulā sāmaṇerā sace honti, eko bhikkhu sace hotīti yojanā. ‘‘Sāmaṇerā’’ti idaṃ paccāsannavasena vuttaṃ, upalakkhaṇavasena vā aññehipi sahaseyyānaṃ āpattisambhavato. Teti sāmaṇerā. Sabbesanti bhikkhūnaṃ. Tassāti sāmaṇerassa. Eseva nayoti eso eva nayo, na añño nayoti attho. Atha vā eseva nayoti eso iva nayo, eso etādiso nayo iva ayaṃ nayo daṭṭhabboti attho.
อปิ จาติ เอกํเสนฯ เอตฺถาติ อิมสฺมิํ สิกฺขาปเทฯ จตุกฺกนฺติ เอกาวาสเอกานุปสมฺปนฺนํ, เอกาวาสนานุปสมฺปนฺนํ, นานาวาสเอกานุปสมฺปนฺนํ, นานาวาสนานุปสมฺปนฺนนฺติ จตุสมูหํ, จตุปริมาณํ วาฯ โยติ ภิกฺขุฯ หิสโทฺท วิตฺถารโชตโก, ตํ วจนํ วิตฺถารยิสฺสามีติ อโตฺถ, วิตฺถาโร มยา วุจฺจเตติ วาฯ เทวสิกนฺติ ทิวเส ทิวเสฯ ณิกปจฺจโย หิ วิจฺฉตฺถวาจโกฯ โยปิ สหเสยฺยํ กเปฺปติ, ตสฺสาปิ อาปตฺตีติ โยเชตโพฺพฯ ตตฺราติ ‘‘ติรจฺฉานคเตนาปี’’ติ วจเนฯ
Api cāti ekaṃsena. Etthāti imasmiṃ sikkhāpade. Catukkanti ekāvāsaekānupasampannaṃ, ekāvāsanānupasampannaṃ, nānāvāsaekānupasampannaṃ, nānāvāsanānupasampannanti catusamūhaṃ, catuparimāṇaṃ vā. Yoti bhikkhu. Hisaddo vitthārajotako, taṃ vacanaṃ vitthārayissāmīti attho, vitthāro mayā vuccateti vā. Devasikanti divase divase. Ṇikapaccayo hi vicchatthavācako. Yopi sahaseyyaṃ kappeti, tassāpi āpattīti yojetabbo. Tatrāti ‘‘tiracchānagatenāpī’’ti vacane.
‘‘อปทานํ อหิมจฺฉา, ทฺวิปทานญฺจ กุกฺกุฎี;
‘‘Apadānaṃ ahimacchā, dvipadānañca kukkuṭī;
จตุปฺปทานํ มชฺชารี, วตฺถุ ปาราชิกสฺสิมา’’ติฯ (ปารา. อฎฺฐ. ๑.๕๕);
Catuppadānaṃ majjārī, vatthu pārājikassimā’’ti. (pārā. aṭṭha. 1.55);
อิมํ คาถํ สนฺธาย วุตฺตํ ‘‘วุตฺตนเยเนวา’’ติฯ ตสฺมาติ ยสฺมา เวทิตโพฺพ, ตสฺมาฯ โคธาติ กุโณฺฑฯ พิฬาโลติ อาขุภุโชฯ มงฺคุโสติ นกุโลฯ
Imaṃ gāthaṃ sandhāya vuttaṃ ‘‘vuttanayenevā’’ti. Tasmāti yasmā veditabbo, tasmā. Godhāti kuṇḍo. Biḷāloti ākhubhujo. Maṅgusoti nakulo.
อสมฺพทฺธภิตฺติกสฺส กตปาสาทสฺสาติ โยชนาฯ ตุลาติ เอตฺถ ตุลา นาม ถมฺภาน, มุปริ ทกฺขิณุตฺตรวิตฺถารวเสน ฐปิโต ทารุวิเสโส ถลติ ถเมฺภสุ ปติฎฺฐาตีติ กตฺวาฯ ตา ปน เหฎฺฐิมปริเจฺฉทโต ติโสฺส, อุกฺกฎฺฐปริเจฺฉเทน ปน ปญฺจสตฺตนวาทโยฯ นานูปจาเร ปาสาเทติ สมฺพโนฺธฯ
Asambaddhabhittikassa katapāsādassāti yojanā. Tulāti ettha tulā nāma thambhāna, mupari dakkhiṇuttaravitthāravasena ṭhapito dāruviseso thalati thambhesu patiṭṭhātīti katvā. Tā pana heṭṭhimaparicchedato tisso, ukkaṭṭhaparicchedena pana pañcasattanavādayo. Nānūpacāre pāsādeti sambandho.
วาฬสงฺฆาฎาทีสูติ วาฬรูปํ ทเสฺสตฺวา กเตสุ สงฺฆาฎาทีสุฯ อาทิสเทฺทน ตุลํ สงฺคณฺหาติฯ เอตฺถ จ สงฺฆาโฎ นาม ตุลาน, มุปริ ปุพฺพปจฺฉิมายามวเสน ฐปิโต กฎฺฐวิเสโส สมฺมา ฆเฎนฺติ เอตฺถ โคปานสฺยาทโยติ กตฺวาฯ เต ปน ตโย โหนฺติฯ นิพฺพโกสพฺภนฺตเรติ ฉทนโกฎิอพฺภนฺตเรฯ ปริมณฺฑลํ วา จตุรสฺสํ วา เสนาสนํ โหตีติ สมฺพโนฺธฯ ตตฺราติ ตสฺมิํ เสนาสเนฯ อปริจฺฉิโนฺน คพฺภสฺส อุปจาโร เอเตสนฺติ อปริจฺฉินฺนคพฺภูปจารา สพฺพคพฺภา, เต ปวิสนฺตีติ อโตฺถฯ นิปนฺนานํ ภิกฺขูนนฺติ โยชนาฯ ตตฺราติ ตสฺมิํ ปมุเขฯ ปมุขสฺส สพฺพจฺฉนฺนตฺตา, สพฺพปริจฺฉนฺนตฺตา จ อาปตฺติํ กโรตีติ โยชนาฯ นนุ ปมุเข ฉนฺนเมว อตฺถิ, โน ปริจฺฉนฺนนฺติ อาห ‘‘คพฺภปริเกฺขโป’’ติอาทิฯ หีติ สจฺจํฯ
Vāḷasaṅghāṭādīsūti vāḷarūpaṃ dassetvā katesu saṅghāṭādīsu. Ādisaddena tulaṃ saṅgaṇhāti. Ettha ca saṅghāṭo nāma tulāna, mupari pubbapacchimāyāmavasena ṭhapito kaṭṭhaviseso sammā ghaṭenti ettha gopānasyādayoti katvā. Te pana tayo honti. Nibbakosabbhantareti chadanakoṭiabbhantare. Parimaṇḍalaṃ vā caturassaṃ vā senāsanaṃ hotīti sambandho. Tatrāti tasmiṃ senāsane. Aparicchinno gabbhassa upacāro etesanti aparicchinnagabbhūpacārā sabbagabbhā, te pavisantīti attho. Nipannānaṃ bhikkhūnanti yojanā. Tatrāti tasmiṃ pamukhe. Pamukhassa sabbacchannattā, sabbaparicchannattā ca āpattiṃ karotīti yojanā. Nanu pamukhe channameva atthi, no paricchannanti āha ‘‘gabbhaparikkhepo’’tiādi. Hīti saccaṃ.
ยํ ปน อนฺธกฎฺฐกถายํ วุตฺตนฺติ สมฺพโนฺธฯ ชคตีติ ปถวิยา จ มนฺทิราลินฺทวตฺถุสฺส จ นามเมตํฯ อิธ ปน มนฺทิราลินฺทวตฺถุสงฺขาตา ภูเภทา คหิตาฯ ตตฺถาติ อนฺธกฎฺฐกถายํฯ กสฺมา ปาฬิยา น สเมตีติ อาห ‘‘ทสหตฺถุเพฺพธาปี’’ติอาทิฯ หีติ ยสฺมาฯ ตตฺถาติ อนฺธกฎฺฐกถายํฯ เยปิ มหาปาสาทา โหนฺตีติ โยชนาฯ เตสุปีติ มหาปาสาเทสุปิฯ
Yaṃ pana andhakaṭṭhakathāyaṃ vuttanti sambandho. Jagatīti pathaviyā ca mandirālindavatthussa ca nāmametaṃ. Idha pana mandirālindavatthusaṅkhātā bhūbhedā gahitā. Tatthāti andhakaṭṭhakathāyaṃ. Kasmā pāḷiyā na sametīti āha ‘‘dasahatthubbedhāpī’’tiādi. Hīti yasmā. Tatthāti andhakaṭṭhakathāyaṃ. Yepi mahāpāsādā hontīti yojanā. Tesupīti mahāpāsādesupi.
สุธาฉทนมณฺฑปสฺสาติ เอตฺถ ‘‘สุธา’’ติ อิทํ อุปลกฺขณวเสน วุตฺตํ เยน เกนจิ ฉทนมณฺฑปสฺสาปิ อธิเปฺปตตฺตาฯ มณฺฑํ วุจฺจติ สูริยรสฺมิ, ตํ ปาติ รกฺขติ, ตโต วา ชนนฺติ มณฺฑปํฯ นนุ เอกูปจารํ โหติ ปาการสฺส ฉิทฺทตฺตาติ อาห ‘‘น หี’’ติอาทิฯ หีติ สจฺจํ, ยสฺมา วาฯ วฬญฺชนตฺถาย เอวาติ เอวกาโร โยเชตโพฺพฯ เตนาห ‘‘น วฬญฺชนูปเจฺฉทนตฺถายา’’ติฯ อถ วา ‘‘สทฺทนฺตรตฺถาโปหเนน สโทฺท อตฺถํ วทตี’’ติ (อุทา. อฎฺฐ. ๑; ที. นิ. ฎิ. ๑.๑; ม. นิ. ฎี. ๑.มูลปริยายสุตฺตวณฺณนา; สํ. นิ. ฎี. ๑.๑.โอฆตรณสุตฺตวณฺณนา; อ. นิ. ฎี. ๑.๑.รุปาทิวคฺควณฺณนา) วุตฺตตฺตา ‘‘น วฬญฺชนูปเจฺฉทนตฺถายา’’ติ วุตฺตํฯ กวาฎนฺติ เอตฺถ ทฺวารเมว อธิเปฺปตํ ปริยาเยน วุตฺตตฺตา, อสติ จ ทฺวาเร กวาฎสฺสาภาวโตฯ สํวรณวิวรณกาเล กวติ สทฺทํ กโรตีติ กวาฎํฯ
Sudhāchadanamaṇḍapassāti ettha ‘‘sudhā’’ti idaṃ upalakkhaṇavasena vuttaṃ yena kenaci chadanamaṇḍapassāpi adhippetattā. Maṇḍaṃ vuccati sūriyarasmi, taṃ pāti rakkhati, tato vā jananti maṇḍapaṃ. Nanu ekūpacāraṃ hoti pākārassa chiddattāti āha ‘‘na hī’’tiādi. Hīti saccaṃ, yasmā vā. Vaḷañjanatthāya evāti evakāro yojetabbo. Tenāha ‘‘na vaḷañjanūpacchedanatthāyā’’ti. Atha vā ‘‘saddantaratthāpohanena saddo atthaṃ vadatī’’ti (udā. aṭṭha. 1; dī. ni. ṭi. 1.1; ma. ni. ṭī. 1.mūlapariyāyasuttavaṇṇanā; saṃ. ni. ṭī. 1.1.oghataraṇasuttavaṇṇanā; a. ni. ṭī. 1.1.rupādivaggavaṇṇanā) vuttattā ‘‘na vaḷañjanūpacchedanatthāyā’’ti vuttaṃ. Kavāṭanti ettha dvārameva adhippetaṃ pariyāyena vuttattā, asati ca dvāre kavāṭassābhāvato. Saṃvaraṇavivaraṇakāle kavati saddaṃ karotīti kavāṭaṃ.
ตตฺราติ ‘‘เอกูปจารตฺตา’’ติ วจเนฯ ยสฺสาติ ปรวาทิโนฯ อนุโยโค สิยาติ โยชนาฯ อิธาติ อิมสฺมิํ สหเสยฺยสิกฺขาปเท, วุตฺตนฺติ สมฺพโนฺธฯ ตตฺถาติ ปิหิตทฺวาเร คเพฺภฯ โสติ ปรวาทีฯ สพฺพจฺฉนฺนตฺตา อาปตฺติ อิติ วุเตฺตติ โยชนาฯ เอเสว นโย ‘‘สพฺพปริจฺฉนฺนตา น โหตี’’ติ เอตฺถาปิฯ ปจฺจาคมิสฺสตีติ ปติ อาคมิสฺสติ, ปุน อาคมิสฺสตีติ อโตฺถฯ
Tatrāti ‘‘ekūpacārattā’’ti vacane. Yassāti paravādino. Anuyogo siyāti yojanā. Idhāti imasmiṃ sahaseyyasikkhāpade, vuttanti sambandho. Tatthāti pihitadvāre gabbhe. Soti paravādī. Sabbacchannattā āpatti iti vutteti yojanā. Eseva nayo ‘‘sabbaparicchannatā na hotī’’ti etthāpi. Paccāgamissatīti pati āgamissati, puna āgamissatīti attho.
พฺยญฺชนมเตฺตเนวาติ ‘‘สพฺพจฺฉนฺนา’’ติอาทิอกฺขรปทมเตฺตเนว, น อตฺถวเสนฯ ‘‘เอวญฺจ สตี’’ติ อิมินา อพฺยาปิตโทสํ ทเสฺสติฯ ตโตติ อนาปตฺติโต, ปริหาเยยฺยาติ สมฺพโนฺธฯ ตสฺมาติ ยสฺมา อนิยเตสุ วุตฺตํ, ตสฺมาฯ ตตฺถาติ อนิยเตสุฯ อิธาปีติ อิมสฺมิํ สิกฺขาปเทปิฯ ยํ ยนฺติ เสนาสนํฯ สพฺพตฺถาติ สเพฺพสุ เสนาสเนสุ, สหเสยฺยาปตฺติ โหตีติ สมฺพโนฺธฯ
Byañjanamattenevāti ‘‘sabbacchannā’’tiādiakkharapadamatteneva, na atthavasena. ‘‘Evañca satī’’ti iminā abyāpitadosaṃ dasseti. Tatoti anāpattito, parihāyeyyāti sambandho. Tasmāti yasmā aniyatesu vuttaṃ, tasmā. Tatthāti aniyatesu. Idhāpīti imasmiṃ sikkhāpadepi. Yaṃ yanti senāsanaṃ. Sabbatthāti sabbesu senāsanesu, sahaseyyāpatti hotīti sambandho.
๕๓. ทฺวีสุ อฎฺฐกถาวาเทสุ มหาอฎฺฐกถาวาโทว ยุโตฺตติ โส ปจฺฉา วุโตฺตฯ
53. Dvīsu aṭṭhakathāvādesu mahāaṭṭhakathāvādova yuttoti so pacchā vutto.
อิมินาปีติ เสนมฺพมณฺฑเปนาปิฯ เอตนฺติ ชคติยา อปริกฺขิตฺตตํฯ ยถาติ ยํสทฺทโตฺถ ตติยนฺตนิปาโต, เยน เสนมฺพมณฺฑเปนาติ อโตฺถติฯ ปญฺจมํฯ
Imināpīti senambamaṇḍapenāpi. Etanti jagatiyā aparikkhittataṃ. Yathāti yaṃsaddattho tatiyantanipāto, yena senambamaṇḍapenāti atthoti. Pañcamaṃ.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๑. มุสาวาทวโคฺค • 1. Musāvādavaggo
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวิภงฺค-อฎฺฐกถา • Mahāvibhaṅga-aṭṭhakathā / ๕. สหเสยฺยสิกฺขาปทวณฺณนา • 5. Sahaseyyasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๕. สหเสยฺยสิกฺขาปทวณฺณนา • 5. Sahaseyyasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๕. ปฐมสหเสยฺยสิกฺขาปทวณฺณนา • 5. Paṭhamasahaseyyasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๕. สหเสยฺยสิกฺขาปทวณฺณนา • 5. Sahaseyyasikkhāpadavaṇṇanā
