| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
5. ஸஹஸெய்யஸிக்கா²பத³வண்ணனா
5. Sahaseyyasikkhāpadavaṇṇanā
49-50. பஞ்சமே விகூஜமானாதி நித்து²னந்தா. காகச்ச²மானாதி ரோத³ந்தா. தத்ரித³ங் வத்து²னித³ஸ்ஸனங் வா. தேன நு கோ² பாதிதந்தி புச்சா²வஸேன கதி²தத்தா நத்தி² முஸாவாதோ³. கேசி பன ‘‘ஸந்தே³ஹவஸேன வசனங் முஸா நாம ந ஹோதி, தஸ்மா ஏவங் வுத்த’’ந்தி வத³ந்தி. ஸந்திகங் அக³ந்த்வாதி ‘‘யங் ஏதேஸங் ந கப்பதி, தங் தேஸம்பி ந கப்பதீ’’தி அதி⁴ப்பாயேன அக³ந்த்வா.
49-50. Pañcame vikūjamānāti nitthunantā. Kākacchamānāti rodantā. Tatridaṃ vatthunidassanaṃ vā. Tena nu kho pātitanti pucchāvasena kathitattā natthi musāvādo. Keci pana ‘‘sandehavasena vacanaṃ musā nāma na hoti, tasmā evaṃ vutta’’nti vadanti. Santikaṃ agantvāti ‘‘yaṃ etesaṃ na kappati, taṃ tesampi na kappatī’’ti adhippāyena agantvā.
51. தி³ரத்ததிரத்தந்தி எத்த² வசனஸிலிட்ட²தாமத்தேன தி³ரத்த-க்³க³ஹணங் கதந்தி வேதி³தப்³ப³ங். திரத்தஞ்ஹி ஸஹவாஸே லப்³ப⁴மானே தி³ரத்தே வத்தப்³ப³மேவ நத்தீ²தி தி³ரத்தக்³க³ஹணங் விஸுங் ந யோஜேதி. தேனேவாஹ ‘‘உத்தரிதி³ரத்ததிரத்தந்தி ப⁴க³வா ஸாமணேரானங் ஸங்க³ஹகரணத்தா²ய திரத்தபரிஹாரங் அதா³ஸீ’’தி. நிரந்தரங் திரத்தத³ஸ்ஸனத்த²ங் வா தி³ரத்தக்³க³ஹணங் கதங். கேவலஞ்ஹி திரத்தந்தி வுத்தே அஞ்ஞத்த² வாஸேன அந்தரிகம்பி திரத்தங் க³ண்ஹெய்ய, தி³ரத்தவிஸிட்ட²ங் பன திரத்தங் வுச்சமானங் தேன அனந்தரிகமேவ திரத்தங் தீ³பேதி. ஸயனங் ஸெய்யா, ஸயந்தி எத்தா²திபி ஸெய்யாதி ஆஹ ‘‘காயப்பஸாரணஸங்கா²த’’ந்திஆதி³. தஸ்மாதி யஸ்மா உப⁴யம்பி பரிக்³க³ஹிதங், தஸ்மா. பஞ்சஹி ச²த³னேஹீதி இட்ட²கஸிலாஸுதா⁴திணபண்ணஸங்க²ஆதேஹி பஞ்சஹி ச²த³னேஹி. வாசுக்³க³தவஸேனாதி பகு³ணவஸேன. தி³யட்³ட⁴ஹத்து²ப்³பே³தோ⁴ வட்³ட⁴கீஹத்தே²ன க³ஹேதப்³போ³. ஏகூபசாரோதி வளஞ்ஜனத்³வாரஸ்ஸ ஏகத்தங் ஸந்தா⁴ய வுத்தங். ஸதக³ப்³ப⁴ங் வா சதுஸ்ஸாலங் ஏகூபசாரங் ஹோதீதி ஸம்ப³ந்தோ⁴.
51.Dirattatirattanti ettha vacanasiliṭṭhatāmattena diratta-ggahaṇaṃ katanti veditabbaṃ. Tirattañhi sahavāse labbhamāne diratte vattabbameva natthīti dirattaggahaṇaṃ visuṃ na yojeti. Tenevāha ‘‘uttaridirattatirattanti bhagavā sāmaṇerānaṃ saṅgahakaraṇatthāya tirattaparihāraṃ adāsī’’ti. Nirantaraṃ tirattadassanatthaṃ vā dirattaggahaṇaṃ kataṃ. Kevalañhi tirattanti vutte aññattha vāsena antarikampi tirattaṃ gaṇheyya, dirattavisiṭṭhaṃ pana tirattaṃ vuccamānaṃ tena anantarikameva tirattaṃ dīpeti. Sayanaṃ seyyā, sayanti etthātipi seyyāti āha ‘‘kāyappasāraṇasaṅkhāta’’ntiādi. Tasmāti yasmā ubhayampi pariggahitaṃ, tasmā. Pañcahi chadanehīti iṭṭhakasilāsudhātiṇapaṇṇasaṅkhaātehi pañcahi chadanehi. Vācuggatavasenāti paguṇavasena. Diyaḍḍhahatthubbedho vaḍḍhakīhatthena gahetabbo. Ekūpacāroti vaḷañjanadvārassa ekattaṃ sandhāya vuttaṃ. Satagabbhaṃ vā catussālaṃ ekūpacāraṃ hotīti sambandho.
உபரிமதலேன ஸத்³தி⁴ங் அஸம்ப³த்³த⁴பி⁴த்திகஸ்ஸாதி இத³ங் துலாய அப்³ப⁴ந்தரே ஸயித்வா புன தேனேவ ஸுஸிரேன நிக்க²மித்வா பி⁴த்திஅந்தரேன ஹெட்டி²மதலங் பவிஸிதுங் யொக்³கே³பி உபரிமதலேன அஸம்ப³த்³த⁴பி⁴த்திகே ஸேனாஸனே அனாபத்தியா வுத்தாய ததா² பவிஸிதுங் அஸக்குணெய்யே ஸம்ப³த்³த⁴பி⁴த்திகே வத்தப்³ப³மேவ நத்தீ²தி த³ஸ்ஸனத்த²ங் வுத்தங், ந பன ஸம்ப³த்³த⁴பி⁴த்திகே ஆபத்தீதி த³ஸ்ஸனத்த²ங் வுத்தங். ஹெட்டா²பாஸாதே³ ஸயிதபி⁴க்கு²ஸ்ஸ அனாபத்தீதி இத³ம்பி தாதி³ஸே ஸேனாஸனே ஹெட்டி²மதலே ஸயிதஸ்ஸேவ ஆபத்திப்பஸங்கா ஸியாதி தங்னிவாரணத்த²ங் வுத்தங், ந பன உபரிமதலே ஸயிதஸ்ஸ ஆபத்தீதி த³ஸ்ஸனத்த²ங். நானூபசாரேதி யத்த² ப³ஹி நிஸ்ஸேணிங் கத்வா உபரிமதலங் ஆரோஹந்தி, தாதி³ஸங் ஸந்தா⁴ய வுத்தங். உபரிமதலேபி ஆகாஸங்க³ணே நிபஜ்ஜந்தஸ்ஸ ஆபத்தியா அபா⁴வதோ ‘‘ச²த³னப்³ப⁴ந்தரே’’தி வுத்தங்.
Uparimatalena saddhiṃ asambaddhabhittikassāti idaṃ tulāya abbhantare sayitvā puna teneva susirena nikkhamitvā bhittiantarena heṭṭhimatalaṃ pavisituṃ yoggepi uparimatalena asambaddhabhittike senāsane anāpattiyā vuttāya tathā pavisituṃ asakkuṇeyye sambaddhabhittike vattabbameva natthīti dassanatthaṃ vuttaṃ, na pana sambaddhabhittike āpattīti dassanatthaṃ vuttaṃ. Heṭṭhāpāsāde sayitabhikkhussa anāpattīti idampi tādise senāsane heṭṭhimatale sayitasseva āpattippasaṅkā siyāti taṃnivāraṇatthaṃ vuttaṃ, na pana uparimatale sayitassa āpattīti dassanatthaṃ. Nānūpacāreti yattha bahi nisseṇiṃ katvā uparimatalaṃ ārohanti, tādisaṃ sandhāya vuttaṃ. Uparimatalepi ākāsaṅgaṇe nipajjantassa āpattiyā abhāvato ‘‘chadanabbhantare’’ti vuttaṃ.
ஸபா⁴ஸங்கே²பேனாதி ஸபா⁴காரேன. அட்³ட⁴குட்டகே ஸேனாஸனேதி எத்த² ‘‘அட்³ட⁴குட்டகங் நாம யத்த² ஏகங் பஸ்ஸங் முஞ்சித்வா தீஸு பஸ்ஸேஸு பி⁴த்தியோ ப³த்³தா⁴ ஹொந்தி, யத்த² வா ஏகஸ்மிங் பஸ்ஸே பி⁴த்திங் உட்டா²பெத்வா உபோ⁴ஸு பஸ்ஸேஸு உபட்³ட⁴ங் உபட்³ட⁴ங் கத்வா பி⁴த்தியோ உட்டா²பெந்தி, தாதி³ஸங் ஸேனாஸன’’ந்தி தீஸுபி க³ண்டி²பதே³ஸு வுத்தங். க³ண்டி²பதே³ பன ‘‘அட்³ட⁴குட்டகேதி ச²த³னங் அட்³டே⁴ன அஸம்பத்தகுட்டகே’’தி வுத்தங், தம்பி நோ ந யுத்தங். ‘‘வாளஸங்கா⁴டோ நாம த²ம்பா⁴னங் உபரி வாளரூபேஹி கதஸங்கா⁴டோ வுச்சதீ’’தி வத³ந்தி. பரிக்கே²பஸ்ஸ ப³ஹிக³தேதி எத்த² யஸ்மிங் பஸ்ஸே பரிக்கே²போ நத்தி², தத்தா²பி பரிக்கே²பாரஹப்பதே³ஸதோ ப³ஹிக³தே அனாபத்தியேவாதி த³ட்ட²ப்³ப³ங். அபரிச்சி²ன்னக³ப்³பூ⁴பசாரேதி எத்த² மஜ்ஜே² விவடங்க³ணவந்தாஸு பமுக²மஹாசதுஸ்ஸாலாஸு யதா² ஆகாஸங்க³ணங் அனோதரித்வா பமுகே²னேவ க³ந்த்வா ஸப்³ப³க³ப்³பே⁴ பவிஸிதுங் ந ஸக்கா ஹோதி, ஏவங் ஏகேகக³ப்³ப⁴ஸ்ஸ த்³வீஸு பஸ்ஸேஸு குட்டங் நீஹரித்வா கதங் பரிச்சி²ன்னக³ப்³பூ⁴பசாரங் நாம, இத³ங் பன தாதி³ஸங் ந ஹோதீதி ‘‘அபரிச்சி²ன்னக³ப்³பூ⁴பசாரே’’தி வுத்தங். ஸப்³ப³க³ப்³பே⁴ பவிஸந்தீதி க³ப்³பூ⁴பசாரஸ்ஸ அபரிச்சி²ன்னத்தா ஆகாஸங்க³ணங் அனோதரித்வா பமுகே²னேவ க³ந்த்வா தங் தங் க³ப்³ப⁴ங் பவிஸந்தி. அத² குதோ தஸ்ஸ பரிக்கே²போயேவ ஸப்³ப³பரிச்ச²ன்னத்தாதி வுத்தந்தி ஆஹ ‘‘க³ப்³ப⁴பரிக்கே²போயேவ ஹிஸ்ஸ பரிக்கே²போ’’தி. இத³ஞ்ச ஸமந்தா க³ப்³ப⁴பி⁴த்தியோ ஸந்தா⁴ய வுத்தங். சதுஸ்ஸாலவஸேன ஸன்னிவிட்டே²பி ஸேனாஸனே க³ப்³ப⁴பமுக²ங் விஸுங் அபரிக்கி²த்தம்பி ஸமந்தா டி²தக³ப்³ப⁴பி⁴த்தீனங் வஸேன பரிக்கி²த்தங் நாம ஹோதி.
Sabhāsaṅkhepenāti sabhākārena. Aḍḍhakuṭṭake senāsaneti ettha ‘‘aḍḍhakuṭṭakaṃ nāma yattha ekaṃ passaṃ muñcitvā tīsu passesu bhittiyo baddhā honti, yattha vā ekasmiṃ passe bhittiṃ uṭṭhāpetvā ubhosu passesu upaḍḍhaṃ upaḍḍhaṃ katvā bhittiyo uṭṭhāpenti, tādisaṃ senāsana’’nti tīsupi gaṇṭhipadesu vuttaṃ. Gaṇṭhipade pana ‘‘aḍḍhakuṭṭaketi chadanaṃ aḍḍhena asampattakuṭṭake’’ti vuttaṃ, tampi no na yuttaṃ. ‘‘Vāḷasaṅghāṭo nāma thambhānaṃ upari vāḷarūpehi katasaṅghāṭo vuccatī’’ti vadanti. Parikkhepassa bahigateti ettha yasmiṃ passe parikkhepo natthi, tatthāpi parikkhepārahappadesato bahigate anāpattiyevāti daṭṭhabbaṃ. Aparicchinnagabbhūpacāreti ettha majjhe vivaṭaṅgaṇavantāsu pamukhamahācatussālāsu yathā ākāsaṅgaṇaṃ anotaritvā pamukheneva gantvā sabbagabbhe pavisituṃ na sakkā hoti, evaṃ ekekagabbhassa dvīsu passesu kuṭṭaṃ nīharitvā kataṃ paricchinnagabbhūpacāraṃ nāma, idaṃ pana tādisaṃ na hotīti ‘‘aparicchinnagabbhūpacāre’’ti vuttaṃ. Sabbagabbhe pavisantīti gabbhūpacārassa aparicchinnattā ākāsaṅgaṇaṃ anotaritvā pamukheneva gantvā taṃ taṃ gabbhaṃ pavisanti. Atha kuto tassa parikkhepoyeva sabbaparicchannattāti vuttanti āha ‘‘gabbhaparikkhepoyeva hissa parikkhepo’’ti. Idañca samantā gabbhabhittiyo sandhāya vuttaṃ. Catussālavasena sanniviṭṭhepi senāsane gabbhapamukhaṃ visuṃ aparikkhittampi samantā ṭhitagabbhabhittīnaṃ vasena parikkhittaṃ nāma hoti.
‘‘நனு ச ‘அபரிக்கி²த்தே பமுகே² அனாபத்தீ’தி அந்த⁴கட்ட²கதா²யங் அவிஸேஸேன வுத்தங், தஸ்மா சதுஸ்ஸாலவஸேன ஸன்னிவிட்டே²பி ஸேனாஸனே விஸுங் அபரிக்கி²த்தே பமுகே² அனாபத்தியேவா’’தி யோ வதெ³ய்ய, தஸ்ஸ வாத³பரிமோசனத்த²ங் இத³ங் வுத்தங் ‘‘யங் பன…பே॰… பாடேக்கஸன்னிவேஸா ஏகச்ச²த³னா க³ப்³ப⁴பாளியோ ஸந்தா⁴ய வுத்த’’ந்தி. இத³ங் வுத்தங் ஹோதி – ‘‘அபரிக்கி²த்தே பமுகே² அனாபத்தீதி யங் வுத்தங், தங் ந சதுஸ்ஸாலவஸேன ஸன்னிவிட்டா² க³ப்³ப⁴பாளியோ ஸந்தா⁴ய வுத்தங், கிஞ்சரஹி விஸுங் ஸன்னிவிட்ட²ங் ஏகமேவ க³ப்³ப⁴பாளிங் ஸந்தா⁴ய. தாதி³ஸாய ஹி க³ப்³ப⁴பாளியா அபரிக்கி²த்தே பமுகே² அனாபத்தி, ந சதுஸ்ஸாலவஸேன ஸன்னிவிட்டா²யா’’தி. ஏகாய ச க³ப்³ப⁴பாளியா தஸ்ஸ தஸ்ஸ க³ப்³ப⁴ஸ்ஸ உபசாரங் பரிச்சி²ந்தி³த்வா அந்தமஸோ உபோ⁴ஸு பஸ்ஸேஸு கு²த்³த³கபி⁴த்தீனங் உட்டா²பனமத்தேனபி பமுக²ங் பரிக்கி²த்தங் நாம ஹோதி, சதுஸ்ஸாலவஸேன ஸன்னிவிட்டா²ஸு பன க³ப்³ப⁴பாளீஸு உபோ⁴ஸு பஸ்ஸேஸு க³ப்³ப⁴பி⁴த்தீனங் வஸேனபி பமுக²ங் பரிக்கி²த்தங் நாம ஹோதி. தஸ்மா யங் இமினா லக்க²ணேன பரிக்கி²த்தங் பமுக²ங், தத்த² ஆபத்தி, இதரத்த² அனாபத்தீதி இத³மெத்த² ஸன்னிட்டா²னங்.
‘‘Nanu ca ‘aparikkhitte pamukhe anāpattī’ti andhakaṭṭhakathāyaṃ avisesena vuttaṃ, tasmā catussālavasena sanniviṭṭhepi senāsane visuṃ aparikkhitte pamukhe anāpattiyevā’’ti yo vadeyya, tassa vādaparimocanatthaṃ idaṃ vuttaṃ ‘‘yaṃ pana…pe… pāṭekkasannivesā ekacchadanā gabbhapāḷiyo sandhāya vutta’’nti. Idaṃ vuttaṃ hoti – ‘‘aparikkhitte pamukhe anāpattīti yaṃ vuttaṃ, taṃ na catussālavasena sanniviṭṭhā gabbhapāḷiyo sandhāya vuttaṃ, kiñcarahi visuṃ sanniviṭṭhaṃ ekameva gabbhapāḷiṃ sandhāya. Tādisāya hi gabbhapāḷiyā aparikkhitte pamukhe anāpatti, na catussālavasena sanniviṭṭhāyā’’ti. Ekāya ca gabbhapāḷiyā tassa tassa gabbhassa upacāraṃ paricchinditvā antamaso ubhosu passesu khuddakabhittīnaṃ uṭṭhāpanamattenapi pamukhaṃ parikkhittaṃ nāma hoti, catussālavasena sanniviṭṭhāsu pana gabbhapāḷīsu ubhosu passesu gabbhabhittīnaṃ vasenapi pamukhaṃ parikkhittaṃ nāma hoti. Tasmā yaṃ iminā lakkhaṇena parikkhittaṃ pamukhaṃ, tattha āpatti, itarattha anāpattīti idamettha sanniṭṭhānaṃ.
இதா³னி ‘‘அபரிக்கி²த்தே பமுகே² அனாபத்தீ’’தி வத்வா தஸ்ஸேவ வசனஸ்ஸ அதி⁴ப்பாயங் பகாஸெந்தேன யங் வுத்தங் ‘‘பூ⁴மியங் வினா ஜக³தியா பமுக²ங் ஸந்தா⁴ய கதி²த’’ந்தி, தஸ்ஸ அயுத்ததாவிபா⁴வனத்த²ங் ‘‘யஞ்ச தத்தா²’’திஆதி³ ஆரத்³த⁴ங். பூ⁴மியங் வினா ஜக³தியா பமுக²ங் ஸந்தா⁴ய கதி²தந்தி ஹி இமஸ்ஸ வசனஸ்ஸ அயமதி⁴ப்பாயோ – ‘‘அபரிக்கி²த்தே பமுகே² அனாபத்தீ’’தி யங் வுத்தங், தங் வினா வத்து²ங் பூ⁴மியங் கதகே³ஹஸ்ஸ பமுக²ங் ஸந்தா⁴ய கதி²தங். ஸசே பன உச்சவத்து²கங் பமுக²ங் ஹோதி, பரிக்கி²த்தஸங்க்²யங் ந க³ச்ச²தீதி. தேனேவாஹ ‘‘த³ஸஹத்து²ப்³பே³தா⁴பி ஹி ஜக³தி பரிக்கே²பஸங்க்²யங் ந க³ச்ச²தீ’’தி. ஹெட்டா²பி இத³மேவ மனஸி ஸன்னிதா⁴ய வுத்தங் ‘‘உச்சவத்து²கங் சேபி ஹோதி, பமுகே² ஸயிதோ க³ப்³பே⁴ ஸயிதானங் ஆபத்திங் ந கரோதீ’’தி. தத்தா²தி அந்த⁴கட்ட²கதா²யங். ஜக³தியா பமாணங் வத்வாதி ‘‘ஸசே ஜக³தியா ஓதரித்வா பூ⁴மியங் ஸயிதோ, ஜக³தியா உபரி ஸயிதங் ந பஸ்ஸதீ’’தி ஏவங் ஜக³தியா உப்³பே³தே⁴ன பமாணங் வத்வா. ஏகஸாலாதீ³ஸு உஜுகமேவ தீ³க⁴ங் கத்வா ஸன்னிவேஸிதோ பாஸாதோ³ ஏகஸாலஸன்னிவேஸோ. த்³விஸாலஸன்னிவேஸாத³யோபி வுத்தானுஸாரதோ வேதி³தப்³பா³. ஸாலப்பபே⁴த³தீ³பனமேவ செத்த² ஹெட்டா² வுத்ததோ விஸேஸோ.
Idāni ‘‘aparikkhitte pamukhe anāpattī’’ti vatvā tasseva vacanassa adhippāyaṃ pakāsentena yaṃ vuttaṃ ‘‘bhūmiyaṃ vinā jagatiyā pamukhaṃ sandhāya kathita’’nti, tassa ayuttatāvibhāvanatthaṃ ‘‘yañca tatthā’’tiādi āraddhaṃ. Bhūmiyaṃ vinā jagatiyā pamukhaṃ sandhāya kathitanti hi imassa vacanassa ayamadhippāyo – ‘‘aparikkhitte pamukhe anāpattī’’ti yaṃ vuttaṃ, taṃ vinā vatthuṃ bhūmiyaṃ katagehassa pamukhaṃ sandhāya kathitaṃ. Sace pana uccavatthukaṃ pamukhaṃ hoti, parikkhittasaṅkhyaṃ na gacchatīti. Tenevāha ‘‘dasahatthubbedhāpi hi jagati parikkhepasaṅkhyaṃ na gacchatī’’ti. Heṭṭhāpi idameva manasi sannidhāya vuttaṃ ‘‘uccavatthukaṃ cepi hoti, pamukhe sayito gabbhe sayitānaṃ āpattiṃ na karotī’’ti. Tatthāti andhakaṭṭhakathāyaṃ. Jagatiyā pamāṇaṃ vatvāti ‘‘sace jagatiyā otaritvā bhūmiyaṃ sayito, jagatiyā upari sayitaṃ na passatī’’ti evaṃ jagatiyā ubbedhena pamāṇaṃ vatvā. Ekasālādīsu ujukameva dīghaṃ katvā sannivesito pāsādo ekasālasanniveso. Dvisālasannivesādayopi vuttānusārato veditabbā. Sālappabhedadīpanameva cettha heṭṭhā vuttato viseso.
மஜ்ஜே²பாகாரங் கரொந்தீதி எத்தா²பி பரிக்கே²பஸ்ஸ ஹெட்டி²மபரிச்சே²தே³ன தி³யட்³ட⁴ஹத்து²ப்³பே³த⁴த்தா தி³யட்³ட⁴ஹத்த²ங் சேபி மஜ்ஜே² பாகாரங் கரொந்தி, நானூபசாரமேவ ஹோதீதி வேதி³தப்³ப³ங். ந ஹி சி²த்³தே³ன கே³ஹங் ஏகூபசாரங் நாம ஹோதீதி எத்த² ஸசே உப்³பே³தே⁴ன தி³யட்³ட⁴ஹத்த²ப்³ப⁴ந்தரே மனுஸ்ஸானங் ஸஞ்சாரப்பஹோனகங் சி²த்³த³ங் ஹோதி, தம்பி த்³வாரமேவாதி ஏகூபசாரங் ஹோதி. கிங் பரிக்கே²போவித்³த⁴ஸ்தோதி பமுக²ஸ்ஸ பரிக்கே²பங் ஸந்தா⁴ய வத³தி. ஸப்³ப³த்த² பஞ்சன்னங்யேவ ச²த³னானங் ஆக³தத்தா வத³தி ‘‘பஞ்சன்னங் அஞ்ஞதரேன ச²த³னேன ச²ன்னா’’தி.
Majjhepākāraṃ karontīti etthāpi parikkhepassa heṭṭhimaparicchedena diyaḍḍhahatthubbedhattā diyaḍḍhahatthaṃ cepi majjhe pākāraṃ karonti, nānūpacārameva hotīti veditabbaṃ. Na hi chiddena gehaṃ ekūpacāraṃ nāma hotīti ettha sace ubbedhena diyaḍḍhahatthabbhantare manussānaṃ sañcārappahonakaṃ chiddaṃ hoti, tampi dvāramevāti ekūpacāraṃ hoti. Kiṃ parikkhepoviddhastoti pamukhassa parikkhepaṃ sandhāya vadati. Sabbattha pañcannaṃyeva chadanānaṃ āgatattā vadati ‘‘pañcannaṃ aññatarena chadanena channā’’ti.
53. பாளியங் ‘‘ஸெய்யா நாம ஸப்³ப³ச்ச²ன்னா ஸப்³ப³பரிச்ச²ன்னா யேபு⁴ய்யேனச்ச²ன்னா யேபு⁴ய்யேனபரிச்ச²ன்னா’’தி வத³ந்தேன யேபு⁴ய்யேனச்ச²ன்னயேபு⁴ய்யேனபரிச்ச²ன்னஸேனாஸனங் பாசித்தியஸ்ஸ அவஸானங் விய கத்வா த³ஸ்ஸிதங், ‘‘உபட்³ட⁴ச்ச²ன்னே உபட்³ட⁴பரிச்ச²ன்னே ஆபத்தி து³க்கடஸ்ஸா’’தி வத³ந்தேன ச உபட்³ட⁴ச்ச²ன்னஉபட்³ட⁴பரிச்ச²ன்னஸேனாஸனங் து³க்கடஸ்ஸ ஆதி³ங் கத்வா த³ஸ்ஸிதங், உபி⁴ன்னமந்தரா கேன ப⁴விதப்³ப³ங் பாசித்தியேன, உதா³ஹு து³க்கடேனாதி? லோகவஜ்ஜஸிக்கா²பத³ஸ்ஸேவ அனவஸேஸங் கத்வா பஞ்ஞாபனதோ இமஸ்ஸ ச பண்ணத்திவஜ்ஜத்தா யேபு⁴ய்யேனச்ச²ன்னயேபு⁴ய்யேனபரிச்ச²ன்னஸ்ஸ உபட்³ட⁴ச்ச²ன்னஉபட்³ட⁴பரிச்ச²ன்னஸ்ஸ ச அந்தரா பாசித்தியங் அனிவாரிதமேவ, தஸ்மா வினயவினிச்ச²யே ச க³ருகேயேவ டா²தப்³ப³த்தா அட்ட²கதா²யம்பி பாசித்தியமேவ த³ஸ்ஸிதங். ஸத்த பாசித்தியானீதி பாளியங் வுத்தபாசித்தியங் ஸாமஞ்ஞதோ ஏகத்தேன க³ஹெத்வா வுத்தங். விஸுங் பன க³ய்ஹமானே ‘‘ஸப்³ப³ச்ச²ன்னே ஸப்³ப³பரிச்ச²ன்னே பாசித்தியங், யேபு⁴ய்யேனச்ச²ன்னே யேபு⁴ய்யேனபரிச்ச²ன்னே பாசித்திய’’ந்தி அட்டே²வ பாசித்தியானி ஹொந்தி.
53. Pāḷiyaṃ ‘‘seyyā nāma sabbacchannā sabbaparicchannā yebhuyyenacchannā yebhuyyenaparicchannā’’ti vadantena yebhuyyenacchannayebhuyyenaparicchannasenāsanaṃ pācittiyassa avasānaṃ viya katvā dassitaṃ, ‘‘upaḍḍhacchanne upaḍḍhaparicchanne āpatti dukkaṭassā’’ti vadantena ca upaḍḍhacchannaupaḍḍhaparicchannasenāsanaṃ dukkaṭassa ādiṃ katvā dassitaṃ, ubhinnamantarā kena bhavitabbaṃ pācittiyena, udāhu dukkaṭenāti? Lokavajjasikkhāpadasseva anavasesaṃ katvā paññāpanato imassa ca paṇṇattivajjattā yebhuyyenacchannayebhuyyenaparicchannassa upaḍḍhacchannaupaḍḍhaparicchannassa ca antarā pācittiyaṃ anivāritameva, tasmā vinayavinicchaye ca garukeyeva ṭhātabbattā aṭṭhakathāyampi pācittiyameva dassitaṃ. Satta pācittiyānīti pāḷiyaṃ vuttapācittiyaṃ sāmaññato ekattena gahetvā vuttaṃ. Visuṃ pana gayhamāne ‘‘sabbacchanne sabbaparicchanne pācittiyaṃ, yebhuyyenacchanne yebhuyyenaparicchanne pācittiya’’nti aṭṭheva pācittiyāni honti.
ஸேனம்ப³மண்ட³பவண்ணங் ஹோதீதி ஸீஹளதீ³பே கிர உச்சவத்து²கோ ஸப்³ப³ச்ச²ன்னோ ஸப்³ப³அபரிச்ச²ன்னோ ஏவங்னாமகோ ஸன்னிபாதமண்ட³போ அத்தி², தங் ஸந்தா⁴யேதங் வுத்தங். யதி³ ஜக³திபரிக்கே²பஸங்க்²யங் க³ச்ச²தி, உச்சவத்து²கத்தா மண்ட³பஸ்ஸ ஸப்³ப³அபரிச்ச²ன்னதா ந யுஜ்ஜதீதி ஆஹ ‘‘இமினாபேதங் வேதி³தப்³ப³’’ந்திஆதி³. சூளகச்ச²ன்னாதீ³னி செத்த² ஏவங் வேதி³தப்³பா³னி – யஸ்ஸ சதூஸு பா⁴கே³ஸு ஏகோ ச²ன்னோ, ஸேஸா அச்ச²ன்னா, இத³ங் சூளகச்ச²ன்னங். யஸ்ஸ தீஸு பா⁴கே³ஸு த்³வே ச²ன்னா, ஏகோ அச்ச²ன்னோ, இத³ங் யேபு⁴ய்யேனச்ச²ன்னங். யஸ்ஸ த்³வீஸு பா⁴கே³ஸு ஏகோ ச²ன்னோ, ஏகோ அச்ச²ன்னோ, இத³ங் உபட்³ட⁴ச்ச²ன்னங் நாம ஸேனாஸனங். சூளகபரிச்ச²ன்னாதீ³னிபி இமினாவ நயேன வேதி³தப்³பா³னி. ஸேஸங் உத்தானமேவ. பாசித்தியவத்து²கஸேனாஸனங், தத்த² தத்த² அனுபஸம்பன்னேன ஸஹ நிபஜ்ஜனங், சதுத்த²தி³வஸே ஸூரியத்த²ங்க³மனந்தி இமானெத்த² தீணி அங்கா³னி.
Senambamaṇḍapavaṇṇaṃ hotīti sīhaḷadīpe kira uccavatthuko sabbacchanno sabbaaparicchanno evaṃnāmako sannipātamaṇḍapo atthi, taṃ sandhāyetaṃ vuttaṃ. Yadi jagatiparikkhepasaṅkhyaṃ gacchati, uccavatthukattā maṇḍapassa sabbaaparicchannatā na yujjatīti āha ‘‘imināpetaṃ veditabba’’ntiādi. Cūḷakacchannādīni cettha evaṃ veditabbāni – yassa catūsu bhāgesu eko channo, sesā acchannā, idaṃ cūḷakacchannaṃ. Yassa tīsu bhāgesu dve channā, eko acchanno, idaṃ yebhuyyenacchannaṃ. Yassa dvīsu bhāgesu eko channo, eko acchanno, idaṃ upaḍḍhacchannaṃ nāma senāsanaṃ. Cūḷakaparicchannādīnipi imināva nayena veditabbāni. Sesaṃ uttānameva. Pācittiyavatthukasenāsanaṃ, tattha tattha anupasampannena saha nipajjanaṃ, catutthadivase sūriyatthaṅgamananti imānettha tīṇi aṅgāni.
ஸஹஸெய்யஸிக்கா²பத³வண்ணனா நிட்டி²தா.
Sahaseyyasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. பட²மஸஹஸெய்யஸிக்கா²பத³வண்ணனா • 5. Paṭhamasahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ஸஹஸெய்யஸிக்கா²பத³ங் • 5. Sahaseyyasikkhāpadaṃ
