| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
5. ஸஹஸெய்யஸிக்கா²பத³வண்ணனா
5. Sahaseyyasikkhāpadavaṇṇanā
50-51. பஞ்சமே தத்ரித³ங் நித³ஸ்ஸனந்தி ஸேஸோ. தி³ரத்ததிரத்தந்தி எத்த² தி³ரத்தக்³க³ஹணங் வசனாலங்காரத்த²ங், நிரந்தரங் திஸ்ஸோவ ரத்தியோ வஸித்வா சதுத்த²தி³வஸாதீ³ஸு ஸயந்தஸ்ஸேவ ஆபத்தி, ந ஏகந்தரிகாதி³வஸேன ஸயந்தஸ்ஸாதி த³ஸ்ஸனத்த²ம்பீதி த³ட்ட²ப்³ப³ங். தி³ரத்தவிஸிட்ட²ஞ்ஹி திரத்தங் வுச்சமானங், தேன அனந்தரிகமேவ திரத்தங் தீ³பேதீதி. பஞ்சஹி ச²த³னேஹீதி இட்ட²கஸிலாஸுதா⁴திணபண்ணேஹி. வாசுக்³க³தவஸேனாதி பகு³ணவஸேன. தி³யட்³ட⁴ஹத்து²ப்³பே³தோ⁴ வட்³ட⁴கீஹத்தே²ன க³ஹேதப்³போ³. ஏகூபசாரோ ஏகேன மக்³கே³ன பவிஸித்வா அப்³போ⁴காஸங் அனுக்கமித்வா ஸப்³ப³த்த² அனுபரிக³மனயொக்³கோ³, ஏதங் ப³ஹுத்³வாரம்பி ஏகூபசாரோவ. தத்த² பன குட்டாதீ³ஹி ருந்தி⁴த்வா விஸுங் த்³வாரங் யோஜெந்தி, நானூபசாரோ ஹோதி. ஸசே பன ருந்த⁴தி ஏவ, விஸுங் த்³வாரங் ந யோஜெந்தி, ‘‘ஏதம்பி ஏகூபசாரமேவ மத்திகாதீ³ஹி பிஹிதத்³வாரோ விய க³ப்³போ⁴’’தி க³ஹேதப்³ப³ங். அஞ்ஞதா² க³ப்³பே⁴ பவிஸித்வா பமுகா²தீ³ஸு நிபன்னானுபஸம்பன்னேஹி ஸஹஸெய்யாபரிமுத்தியா க³ப்³ப⁴த்³வாரங் மத்திகாதீ³ஹி பித³ஹாபெத்வா உட்டி²தே அருணே விவராபெந்தஸ்ஸபி அனாபத்தி ப⁴வெய்யாதி.
50-51. Pañcame tatridaṃ nidassananti seso. Dirattatirattanti ettha dirattaggahaṇaṃ vacanālaṅkāratthaṃ, nirantaraṃ tissova rattiyo vasitvā catutthadivasādīsu sayantasseva āpatti, na ekantarikādivasena sayantassāti dassanatthampīti daṭṭhabbaṃ. Dirattavisiṭṭhañhi tirattaṃ vuccamānaṃ, tena anantarikameva tirattaṃ dīpetīti. Pañcahi chadanehīti iṭṭhakasilāsudhātiṇapaṇṇehi. Vācuggatavasenāti paguṇavasena. Diyaḍḍhahatthubbedho vaḍḍhakīhatthena gahetabbo. Ekūpacāro ekena maggena pavisitvā abbhokāsaṃ anukkamitvā sabbattha anuparigamanayoggo, etaṃ bahudvārampi ekūpacārova. Tattha pana kuṭṭādīhi rundhitvā visuṃ dvāraṃ yojenti, nānūpacāro hoti. Sace pana rundhati eva, visuṃ dvāraṃ na yojenti, ‘‘etampi ekūpacārameva mattikādīhi pihitadvāro viya gabbho’’ti gahetabbaṃ. Aññathā gabbhe pavisitvā pamukhādīsu nipannānupasampannehi sahaseyyāparimuttiyā gabbhadvāraṃ mattikādīhi pidahāpetvā uṭṭhite aruṇe vivarāpentassapi anāpatti bhaveyyāti.
தேஸங் பயோகே³ பயோகே³ பி⁴க்கு²ஸ்ஸ ஆபத்தீதி எத்த² கேசி ‘‘அனுட்ட²ஹனேன அகிரியஸமுட்டா²னா ஆபத்தி வுத்தா தஸ்மிங் க²ணே ஸயந்தஸ்ஸ கிரியாபா⁴வா. இத³ஞ்ஹி ஸிக்கா²பத³ங் ஸியா கிரியாய ஸமுட்டா²தி, ஸியா அகிரியாய ஸமுட்டா²தி. கிரியாஸமுட்டா²னதா சஸ்ஸ தப்³ப³ஹுலவஸேன வுத்தாதி வத³தி. யதா² சேதங், ஏவங் தி³வாஸயனம்பி. அனுட்ட²ஹனேன, ஹி த்³வாராஸங்வரணேன சேதங் அகிரியஸமஉட்டா²னம்பி ஹோதீ’’தி வத³ந்தி. இத³ஞ்ச யுத்தங் விய தி³ஸ்ஸதி, வீமங்ஸித்வா க³ஹேதப்³ப³ங்.
Tesaṃ payoge payoge bhikkhussa āpattīti ettha keci ‘‘anuṭṭhahanena akiriyasamuṭṭhānā āpatti vuttā tasmiṃ khaṇe sayantassa kiriyābhāvā. Idañhi sikkhāpadaṃ siyā kiriyāya samuṭṭhāti, siyā akiriyāya samuṭṭhāti. Kiriyāsamuṭṭhānatā cassa tabbahulavasena vuttāti vadati. Yathā cetaṃ, evaṃ divāsayanampi. Anuṭṭhahanena, hi dvārāsaṃvaraṇena cetaṃ akiriyasamauṭṭhānampi hotī’’ti vadanti. Idañca yuttaṃ viya dissati, vīmaṃsitvā gahetabbaṃ.
‘‘உபரிமதலேன ஸத்³தி⁴ங் அஸம்ப³த்³த⁴பி⁴த்திகஸ்ஸா’’தி இத³ங் ஸம்ப³த்³த⁴பி⁴த்திகே வத்தப்³ப³மேவ நத்தீ²தி த³ஸ்ஸனத்த²ங் வுத்தங். உபரிமதலே ஸயிதஸ்ஸ ஸங்கா ஏவ நத்தீ²தி ‘‘ஹெட்டா²பாஸாதே³’’திஆதி³ வுத்தங். நானூபசாரேதி ப³ஹி நிஸ்ஸேணியா ஆரோஹணீயே.
‘‘Uparimatalenasaddhiṃ asambaddhabhittikassā’’ti idaṃ sambaddhabhittike vattabbameva natthīti dassanatthaṃ vuttaṃ. Uparimatale sayitassa saṅkā eva natthīti ‘‘heṭṭhāpāsāde’’tiādi vuttaṃ. Nānūpacāreti bahi nisseṇiyā ārohaṇīye.
ஸபா⁴ஸங்கே²பேனாதி ஸபா⁴காரேன. ‘‘அட்³ட⁴குட்டகே’’தி இமினா ஸண்டா²னங் த³ஸ்ஸேதி. யத்த² தீஸு த்³வீஸு வா பஸ்ஸேஸு பி⁴த்தியோ ப³த்³தா⁴, ச²த³னங் வா அஸம்பத்தா அட்³ட⁴பி⁴த்தி, இத³ங் அட்³ட⁴குட்டகங் நாம. வாளஸங்கா⁴டோ நாம பரிக்கே²பஸ்ஸ அந்தோ த²ம்பா⁴தீ³னங் உபரி வாளரூபேஹி கதஸங்கா⁴டோ. பரிக்கே²பஸ்ஸ ப³ஹிக³தேதி எத்த² யஸ்மிங் பஸ்ஸே பரிக்கே²போ நத்தி², தத்த² ஸசே பூ⁴மிதோ வத்து² உச்சங் ஹோதி, உப⁴தோ உச்சவத்து²தோ ஹெட்டா² பூ⁴மியங் நிப்³ப³கோஸப்³ப⁴ந்தரேபி அனாபத்தி ஏவ தத்த² ஸேனாஸனவோஹாராபா⁴வதோ. அத² வத்து² நீசங் பூ⁴மிஸமமேவ ஸேனாஸனஸ்ஸ ஹெட்டி²மதலே திட்ட²தி, தத்த² பரிக்கே²பரஹிததி³ஸாய நிப்³ப³கோஸப்³ப⁴ந்தரே ஸப்³ப³த்த² ஆபத்தி ஹோதி, பரிச்சே²தா³பா⁴வதோ பரிக்கே²பஸ்ஸ ப³ஹி ஏவ அனாபத்தீதி த³ட்ட²ப்³ப³ங். பரிமண்ட³லங் வாதிஆதி³ மஜ்ஜே² உத³கபதனத்தா²ய ஆகாஸங்க³ணவந்தங் ஸேனாஸனங் ஸந்தா⁴ய வுத்தங். தத்த² அபரிச்சி²ன்னக³ப்³பூ⁴பசாரேதி ஏகேகக³ப்³ப⁴ஸ்ஸ த்³வீஸு பஸ்ஸேஸு பமுகே²ன க³மனங் பரிச்சி²ந்தி³த்வா தி³யட்³ட⁴ஹத்து²ப்³பே³த⁴தோ அனூனங் குட்டங் கத்வா ஆகாஸங்க³ணேன பவேஸங் கரொந்தி, ஏவங் அகதோதி அத்தோ². க³ப்³ப⁴பரிக்கே²போதி சதுரஸ்ஸபாஸாதா³தீ³ஸு ஸமந்தா டி²தக³ப்³ப⁴பி⁴த்தியோ ஸந்தா⁴ய வுத்தங்.
Sabhāsaṅkhepenāti sabhākārena. ‘‘Aḍḍhakuṭṭake’’ti iminā saṇṭhānaṃ dasseti. Yattha tīsu dvīsu vā passesu bhittiyo baddhā, chadanaṃ vā asampattā aḍḍhabhitti, idaṃ aḍḍhakuṭṭakaṃ nāma. Vāḷasaṅghāṭo nāma parikkhepassa anto thambhādīnaṃ upari vāḷarūpehi katasaṅghāṭo. Parikkhepassa bahigateti ettha yasmiṃ passe parikkhepo natthi, tattha sace bhūmito vatthu uccaṃ hoti, ubhato uccavatthuto heṭṭhā bhūmiyaṃ nibbakosabbhantarepi anāpatti eva tattha senāsanavohārābhāvato. Atha vatthu nīcaṃ bhūmisamameva senāsanassa heṭṭhimatale tiṭṭhati, tattha parikkheparahitadisāya nibbakosabbhantare sabbattha āpatti hoti, paricchedābhāvato parikkhepassa bahi eva anāpattīti daṭṭhabbaṃ. Parimaṇḍalaṃ vātiādi majjhe udakapatanatthāya ākāsaṅgaṇavantaṃ senāsanaṃ sandhāya vuttaṃ. Tattha aparicchinnagabbhūpacāreti ekekagabbhassa dvīsu passesu pamukhena gamanaṃ paricchinditvā diyaḍḍhahatthubbedhato anūnaṃ kuṭṭaṃ katvā ākāsaṅgaṇena pavesaṃ karonti, evaṃ akatoti attho. Gabbhaparikkhepoti caturassapāsādādīsu samantā ṭhitagabbhabhittiyo sandhāya vuttaṃ.
பாடேக்கஸன்னிவேஸாதி ஏகேகதி³ஸாய க³ப்³ப⁴பாளியோ இதரதி³ஸாஸு க³ப்³ப⁴பாளீனங் அபா⁴வேன, பா⁴வேபி வா அஞ்ஞமஞ்ஞபி⁴த்திச்ச²த³னேஹி அஸம்ப³ந்த⁴தாய பாடேக்கஸன்னிவேஸா நாம வுச்சதி. தங்…பே॰… ஸந்தா⁴ய வுத்தந்தி தத்த² பாசித்தியேன அனாபத்தீதி வுத்தங், ந து³க்கடேன. தாதி³ஸாய ஹி க³ப்³ப⁴பாளியா பமுக²ங் தீஸு தி³ஸாஸு பி⁴த்தீனங் அபா⁴வேன ஏகதி³ஸாய க³ப்³ப⁴பி⁴த்திமத்தேன ஸப்³ப³ச்ச²ன்னங் சூளபரிச்ச²ன்னங் நாம ஹோதி. தஸ்மா து³க்கடமேவ. யதி³ பன தஸ்ஸ பமுக²ஸ்ஸ இதரதி³ஸாஸுபி ஏகிஸ்ஸங், ஸப்³பா³ஸு வா பி⁴த்திங் கரொந்தி, ததா³ ஸப்³ப³ச்ச²ன்னஉபட்³ட⁴பரிச்ச²ன்னாதி³பா⁴வதோ பாசித்தியமேவ ஹோதீதி த³ட்ட²ப்³ப³ங். பூ⁴மியங் வினா ஜக³தியா பமுக²ங் ஸந்தா⁴யாதி எத்த² உச்சவத்து²ங் அகத்வா பூ⁴மியங் கதகே³ஹஸ்ஸ பமுக²ங் ஸந்தா⁴ய அபரிக்கி²த்தே பாசித்தியேன அனாபத்தீதி இத³ங் கதி²தங் . உச்சவத்து²கங் சே பமுக²ங் ஹோதி, தேன வத்து²னா பரிக்கி²த்தஸங்க்²யமேவ பமுக²ங் க³ச்ச²தீதி அதி⁴ப்பாயோ. தத்தா²தி அந்த⁴கட்ட²கதா²யங். ஜக³தியா பமாணங் வத்வாதி பகதிபூ⁴மியா நிபன்னோ யதா² ஜக³தியா உபரி ஸயிதங் ந பஸ்ஸதி, ஏவங் உச்சாதிஉச்சவத்து²ஸ்ஸ உப்³பே³த⁴ப்பமாணங் வத்வா. ஏகதி³ஸாய உஜுகமேவ தீ³க⁴ங் கத்வா ஸன்னிவேஸிதோ பாஸாதோ³ ஏகஸாலஸன்னிவேஸோ. த்³வீஸு, தீஸு வா சதூஸுபி வா தி³ஸாஸு ஸிங்கா⁴டகஸண்டா²னாதி³வஸேன கதா த்³விஸாலாதி³ஸன்னிவேஸா வேதி³தப்³பா³. ஸாலப்பபே⁴த³தீ³பனமேவ செத்த² புரிமதோ விஸேஸோதி. பரிக்கே²போ வித்³த⁴ஸ்தோதி பமுக²ஸ்ஸ பரிக்கே²பங் ஸந்தா⁴ய வத³தி.
Pāṭekkasannivesāti ekekadisāya gabbhapāḷiyo itaradisāsu gabbhapāḷīnaṃ abhāvena, bhāvepi vā aññamaññabhitticchadanehi asambandhatāya pāṭekkasannivesā nāma vuccati. Taṃ…pe… sandhāya vuttanti tattha pācittiyena anāpattīti vuttaṃ, na dukkaṭena. Tādisāya hi gabbhapāḷiyā pamukhaṃ tīsu disāsu bhittīnaṃ abhāvena ekadisāya gabbhabhittimattena sabbacchannaṃ cūḷaparicchannaṃ nāma hoti. Tasmā dukkaṭameva. Yadi pana tassa pamukhassa itaradisāsupi ekissaṃ, sabbāsu vā bhittiṃ karonti, tadā sabbacchannaupaḍḍhaparicchannādibhāvato pācittiyameva hotīti daṭṭhabbaṃ. Bhūmiyaṃ vinā jagatiyā pamukhaṃ sandhāyāti ettha uccavatthuṃ akatvā bhūmiyaṃ katagehassa pamukhaṃ sandhāya aparikkhitte pācittiyena anāpattīti idaṃ kathitaṃ . Uccavatthukaṃ ce pamukhaṃ hoti, tena vatthunā parikkhittasaṅkhyameva pamukhaṃ gacchatīti adhippāyo. Tatthāti andhakaṭṭhakathāyaṃ. Jagatiyā pamāṇaṃ vatvāti pakatibhūmiyā nipanno yathā jagatiyā upari sayitaṃ na passati, evaṃ uccātiuccavatthussa ubbedhappamāṇaṃ vatvā. Ekadisāya ujukameva dīghaṃ katvā sannivesito pāsādo ekasālasanniveso. Dvīsu, tīsu vā catūsupi vā disāsu siṅghāṭakasaṇṭhānādivasena katā dvisālādisannivesā veditabbā. Sālappabhedadīpanameva cettha purimato visesoti. Parikkhepo viddhastoti pamukhassa parikkhepaṃ sandhāya vadati.
53. உபட்³ட⁴ச்ச²ன்னஉபட்³ட⁴பரிச்ச²ன்னங் ஸேனாஸனங் து³க்கடஸ்ஸ ஆதி³ங் வத்வா பாளியங் த³ஸ்ஸிதத்தா ததோ அதி⁴கங் ஸப்³ப³ச்ச²ன்னஉபட்³ட⁴பரிச்ச²ன்னாதி³கம்பி ஸப்³ப³ங் பாளியங் அவுத்தம்பி பாசித்தியஸ்ஸேவ வத்து²பா⁴வேன த³ஸ்ஸிதங் ஸிக்கா²பத³ஸ்ஸ பண்ணத்திவஜ்ஜத்தா, க³ருகே டா²தப்³ப³தோ சாதி வேதி³தப்³ப³ங். ஸத்த பாசித்தியானீதி பாளியங் வுத்தபாசித்தியத்³வயங் ஸாமஞ்ஞதோ ஏகத்தேன க³ஹெத்வா வுத்தங்.
53. Upaḍḍhacchannaupaḍḍhaparicchannaṃ senāsanaṃ dukkaṭassa ādiṃ vatvā pāḷiyaṃ dassitattā tato adhikaṃ sabbacchannaupaḍḍhaparicchannādikampi sabbaṃ pāḷiyaṃ avuttampi pācittiyasseva vatthubhāvena dassitaṃ sikkhāpadassa paṇṇattivajjattā, garuke ṭhātabbato cāti veditabbaṃ. Satta pācittiyānīti pāḷiyaṃ vuttapācittiyadvayaṃ sāmaññato ekattena gahetvā vuttaṃ.
54. பாளியங் ‘‘ததியாய ரத்தியா புராருணா நிக்க²மித்வா புன வஸதீ’’தி இத³ங் உக்கட்ட²வஸேன வுத்தங், அனிக்க²மித்வா பன புராருணா உட்ட²ஹித்வா அந்தோச²த³னே நிஸின்னஸ்ஸாபி புனதி³வஸே ஸஹஸெய்யேன அனாபத்தி ஏவ. ஸேனம்ப³மண்ட³பவண்ணங் ஹோதீதி ஸீஹளதீ³பே கிர உச்சவத்து²கோ ஸப்³ப³ச்ச²ன்னோ ஸப்³ப³அபரிச்ச²ன்னோ ஏவங்னாமகோ ஸன்னிபாதமண்ட³போ அத்தி², தங் ஸந்தா⁴யேதங் வுத்தங். எத்த² சதுத்த²பா⁴கோ³ சூளகங், த்³வே பா⁴கா³ உபட்³ட⁴ங், தீஸு பா⁴கே³ஸு த்³வே பா⁴கா³ யேபு⁴ய்யந்தி இமினா நயேன சூளகச்ச²ன்னபரிச்ச²ன்னதாதீ³னி வேதி³தப்³பா³னி. பாசித்தியவத்து²கஸேனாஸனங், தத்த² அனுபஸம்பன்னேன ஸஹ நிபஜ்ஜனங், சதுத்த²தி³வஸே ஸூரியத்த²ங்க³மனந்தி இமானெத்த² தீணி அங்கா³னி.
54. Pāḷiyaṃ ‘‘tatiyāya rattiyā purāruṇā nikkhamitvā puna vasatī’’ti idaṃ ukkaṭṭhavasena vuttaṃ, anikkhamitvā pana purāruṇā uṭṭhahitvā antochadane nisinnassāpi punadivase sahaseyyena anāpatti eva. Senambamaṇḍapavaṇṇaṃ hotīti sīhaḷadīpe kira uccavatthuko sabbacchanno sabbaaparicchanno evaṃnāmako sannipātamaṇḍapo atthi, taṃ sandhāyetaṃ vuttaṃ. Ettha catutthabhāgo cūḷakaṃ, dve bhāgā upaḍḍhaṃ, tīsu bhāgesu dve bhāgā yebhuyyanti iminā nayena cūḷakacchannaparicchannatādīni veditabbāni. Pācittiyavatthukasenāsanaṃ, tattha anupasampannena saha nipajjanaṃ, catutthadivase sūriyatthaṅgamananti imānettha tīṇi aṅgāni.
ஸஹஸெய்யஸிக்கா²பத³வண்ணனா நிட்டி²தா.
Sahaseyyasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. ஸஹஸெய்யஸிக்கா²பத³வண்ணனா • 5. Sahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. பட²மஸஹஸெய்யஸிக்கா²பத³வண்ணனா • 5. Paṭhamasahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ஸஹஸெய்யஸிக்கா²பத³ங் • 5. Sahaseyyasikkhāpadaṃ
