| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༥. སཧསེཡྻསིཀྑཱཔདཝཎྞནཱ
5. Sahaseyyasikkhāpadavaṇṇanā
༤༩-༥༠. པཉྩམེ ཝིཀཱུཛམཱནཱཏི ནིཏྠུནནྟཱ། ཀཱཀཙྪམཱནཱཏི རོདནྟཱ། ཏཏྲིདཾ ཝཏྠུནིདསྶནཾ ཝཱ། ཏེན ནུ ཁོ པཱཏིཏནྟི པུཙྪཱཝསེན ཀཐིཏཏྟཱ ནཏྠི མུསཱཝཱདོ། ཀེཙི པན ‘‘སནྡེཧཝསེན ཝཙནཾ མུསཱ ནཱམ ན ཧོཏི, ཏསྨཱ ཨེཝཾ ཝུཏྟ’’ནྟི ཝདནྟི། སནྟིཀཾ ཨགནྟྭཱཏི ‘‘ཡཾ ཨེཏེསཾ ན ཀཔྤཏི, ཏཾ ཏེསམྤི ན ཀཔྤཏཱི’’ཏི ཨདྷིཔྤཱཡེན ཨགནྟྭཱ།
49-50. Pañcame vikūjamānāti nitthunantā. Kākacchamānāti rodantā. Tatridaṃ vatthunidassanaṃ vā. Tena nu kho pātitanti pucchāvasena kathitattā natthi musāvādo. Keci pana ‘‘sandehavasena vacanaṃ musā nāma na hoti, tasmā evaṃ vutta’’nti vadanti. Santikaṃ agantvāti ‘‘yaṃ etesaṃ na kappati, taṃ tesampi na kappatī’’ti adhippāyena agantvā.
༥༡. དིརཏྟཏིརཏྟནྟི ཨེཏྠ ཝཙནསིལིཊྛཏཱམཏྟེན དིརཏྟ-གྒཧཎཾ ཀཏནྟི ཝེདིཏབྦཾ། ཏིརཏྟཉྷི སཧཝཱསེ ལབྦྷམཱནེ དིརཏྟེ ཝཏྟབྦམེཝ ནཏྠཱིཏི དིརཏྟགྒཧཎཾ ཝིསུཾ ན ཡོཛེཏི། ཏེནེཝཱཧ ‘‘ཨུཏྟརིདིརཏྟཏིརཏྟནྟི བྷགཝཱ སཱམཎེརཱནཾ སངྒཧཀརཎཏྠཱཡ ཏིརཏྟཔརིཧཱརཾ ཨདཱསཱི’’ཏི། ནིརནྟརཾ ཏིརཏྟདསྶནཏྠཾ ཝཱ དིརཏྟགྒཧཎཾ ཀཏཾ། ཀེཝལཉྷི ཏིརཏྟནྟི ཝུཏྟེ ཨཉྙཏྠ ཝཱསེན ཨནྟརིཀམྤི ཏིརཏྟཾ གཎྷེཡྻ, དིརཏྟཝིསིཊྛཾ པན ཏིརཏྟཾ ཝུཙྩམཱནཾ ཏེན ཨནནྟརིཀམེཝ ཏིརཏྟཾ དཱིཔེཏི། སཡནཾ སེཡྻཱ, སཡནྟི ཨེཏྠཱཏིཔི སེཡྻཱཏི ཨཱཧ ‘‘ཀཱཡཔྤསཱརཎསངྑཱཏ’’ནྟིཨཱདི། ཏསྨཱཏི ཡསྨཱ ཨུབྷཡམྤི པརིགྒཧིཏཾ, ཏསྨཱ། པཉྩཧི ཚདནེཧཱིཏི ཨིཊྛཀསིལཱསུདྷཱཏིཎཔཎྞསངྑཨཱཏེཧི པཉྩཧི ཚདནེཧི། ཝཱཙུགྒཏཝསེནཱཏི པགུཎཝསེན། དིཡཌྜྷཧཏྠུབྦེདྷོ ཝཌྜྷཀཱིཧཏྠེན གཧེཏབྦོ། ཨེཀཱུཔཙཱརོཏི ཝལ༹ཉྫནདྭཱརསྶ ཨེཀཏྟཾ སནྡྷཱཡ ཝུཏྟཾ། སཏགབྦྷཾ ཝཱ ཙཏུསྶཱལཾ ཨེཀཱུཔཙཱརཾ ཧོཏཱིཏི སམྦནྡྷོ།
51.Dirattatirattanti ettha vacanasiliṭṭhatāmattena diratta-ggahaṇaṃ katanti veditabbaṃ. Tirattañhi sahavāse labbhamāne diratte vattabbameva natthīti dirattaggahaṇaṃ visuṃ na yojeti. Tenevāha ‘‘uttaridirattatirattanti bhagavā sāmaṇerānaṃ saṅgahakaraṇatthāya tirattaparihāraṃ adāsī’’ti. Nirantaraṃ tirattadassanatthaṃ vā dirattaggahaṇaṃ kataṃ. Kevalañhi tirattanti vutte aññattha vāsena antarikampi tirattaṃ gaṇheyya, dirattavisiṭṭhaṃ pana tirattaṃ vuccamānaṃ tena anantarikameva tirattaṃ dīpeti. Sayanaṃ seyyā, sayanti etthātipi seyyāti āha ‘‘kāyappasāraṇasaṅkhāta’’ntiādi. Tasmāti yasmā ubhayampi pariggahitaṃ, tasmā. Pañcahi chadanehīti iṭṭhakasilāsudhātiṇapaṇṇasaṅkhaātehi pañcahi chadanehi. Vācuggatavasenāti paguṇavasena. Diyaḍḍhahatthubbedho vaḍḍhakīhatthena gahetabbo. Ekūpacāroti vaḷañjanadvārassa ekattaṃ sandhāya vuttaṃ. Satagabbhaṃ vā catussālaṃ ekūpacāraṃ hotīti sambandho.
ཨུཔརིམཏལེན སདྡྷིཾ ཨསམྦདྡྷབྷིཏྟིཀསྶཱཏི ཨིདཾ ཏུལཱཡ ཨབྦྷནྟརེ སཡིཏྭཱ པུན ཏེནེཝ སུསིརེན ནིཀྑམིཏྭཱ བྷིཏྟིཨནྟརེན ཧེཊྛིམཏལཾ པཝིསིཏུཾ ཡོགྒེཔི ཨུཔརིམཏལེན ཨསམྦདྡྷབྷིཏྟིཀེ སེནཱསནེ ཨནཱཔཏྟིཡཱ ཝུཏྟཱཡ ཏཐཱ པཝིསིཏུཾ ཨསཀྐུཎེཡྻེ སམྦདྡྷབྷིཏྟིཀེ ཝཏྟབྦམེཝ ནཏྠཱིཏི དསྶནཏྠཾ ཝུཏྟཾ, ན པན སམྦདྡྷབྷིཏྟིཀེ ཨཱཔཏྟཱིཏི དསྶནཏྠཾ ཝུཏྟཾ། ཧེཊྛཱཔཱསཱདེ སཡིཏབྷིཀྑུསྶ ཨནཱཔཏྟཱིཏི ཨིདམྤི ཏཱདིསེ སེནཱསནེ ཧེཊྛིམཏལེ སཡིཏསྶེཝ ཨཱཔཏྟིཔྤསངྐཱ སིཡཱཏི ཏཾནིཝཱརཎཏྠཾ ཝུཏྟཾ, ན པན ཨུཔརིམཏལེ སཡིཏསྶ ཨཱཔཏྟཱིཏི དསྶནཏྠཾ། ནཱནཱུཔཙཱརེཏི ཡཏྠ བཧི ནིསྶེཎིཾ ཀཏྭཱ ཨུཔརིམཏལཾ ཨཱརོཧནྟི, ཏཱདིསཾ སནྡྷཱཡ ཝུཏྟཾ། ཨུཔརིམཏལེཔི ཨཱཀཱསངྒཎེ ནིཔཛྫནྟསྶ ཨཱཔཏྟིཡཱ ཨབྷཱཝཏོ ‘‘ཚདནབྦྷནྟརེ’’ཏི ཝུཏྟཾ།
Uparimatalena saddhiṃ asambaddhabhittikassāti idaṃ tulāya abbhantare sayitvā puna teneva susirena nikkhamitvā bhittiantarena heṭṭhimatalaṃ pavisituṃ yoggepi uparimatalena asambaddhabhittike senāsane anāpattiyā vuttāya tathā pavisituṃ asakkuṇeyye sambaddhabhittike vattabbameva natthīti dassanatthaṃ vuttaṃ, na pana sambaddhabhittike āpattīti dassanatthaṃ vuttaṃ. Heṭṭhāpāsāde sayitabhikkhussa anāpattīti idampi tādise senāsane heṭṭhimatale sayitasseva āpattippasaṅkā siyāti taṃnivāraṇatthaṃ vuttaṃ, na pana uparimatale sayitassa āpattīti dassanatthaṃ. Nānūpacāreti yattha bahi nisseṇiṃ katvā uparimatalaṃ ārohanti, tādisaṃ sandhāya vuttaṃ. Uparimatalepi ākāsaṅgaṇe nipajjantassa āpattiyā abhāvato ‘‘chadanabbhantare’’ti vuttaṃ.
སབྷཱསངྑེཔེནཱཏི སབྷཱཀཱརེན། ཨཌྜྷཀུཊྚཀེ སེནཱསནེཏི ཨེཏྠ ‘‘ཨཌྜྷཀུཊྚཀཾ ནཱམ ཡཏྠ ཨེཀཾ པསྶཾ མུཉྩིཏྭཱ ཏཱིསུ པསྶེསུ བྷིཏྟིཡོ བདྡྷཱ ཧོནྟི, ཡཏྠ ཝཱ ཨེཀསྨིཾ པསྶེ བྷིཏྟིཾ ཨུཊྛཱཔེཏྭཱ ཨུབྷོསུ པསྶེསུ ཨུཔཌྜྷཾ ཨུཔཌྜྷཾ ཀཏྭཱ བྷིཏྟིཡོ ཨུཊྛཱཔེནྟི, ཏཱདིསཾ སེནཱསན’’ནྟི ཏཱིསུཔི གཎྛིཔདེསུ ཝུཏྟཾ། གཎྛིཔདེ པན ‘‘ཨཌྜྷཀུཊྚཀེཏི ཚདནཾ ཨཌྜྷེན ཨསམྤཏྟཀུཊྚཀེ’’ཏི ཝུཏྟཾ, ཏམྤི ནོ ན ཡུཏྟཾ། ‘‘ཝཱལ༹སངྒྷཱཊོ ནཱམ ཐམྦྷཱནཾ ཨུཔརི ཝཱལ༹རཱུཔེཧི ཀཏསངྒྷཱཊོ ཝུཙྩཏཱི’’ཏི ཝདནྟི། པརིཀྑེཔསྶ བཧིགཏེཏི ཨེཏྠ ཡསྨིཾ པསྶེ པརིཀྑེཔོ ནཏྠི, ཏཏྠཱཔི པརིཀྑེཔཱརཧཔྤདེསཏོ བཧིགཏེ ཨནཱཔཏྟིཡེཝཱཏི དཊྛབྦཾ། ཨཔརིཙྪིནྣགབྦྷཱུཔཙཱརེཏི ཨེཏྠ མཛ྄ཛྷེ ཝིཝཊངྒཎཝནྟཱསུ པམུཁམཧཱཙཏུསྶཱལཱསུ ཡཐཱ ཨཱཀཱསངྒཎཾ ཨནོཏརིཏྭཱ པམུཁེནེཝ གནྟྭཱ སབྦགབྦྷེ པཝིསིཏུཾ ན སཀྐཱ ཧོཏི, ཨེཝཾ ཨེཀེཀགབྦྷསྶ དྭཱིསུ པསྶེསུ ཀུཊྚཾ ནཱིཧརིཏྭཱ ཀཏཾ པརིཙྪིནྣགབྦྷཱུཔཙཱརཾ ནཱམ, ཨིདཾ པན ཏཱདིསཾ ན ཧོཏཱིཏི ‘‘ཨཔརིཙྪིནྣགབྦྷཱུཔཙཱརེ’’ཏི ཝུཏྟཾ། སབྦགབྦྷེ པཝིསནྟཱིཏི གབྦྷཱུཔཙཱརསྶ ཨཔརིཙྪིནྣཏྟཱ ཨཱཀཱསངྒཎཾ ཨནོཏརིཏྭཱ པམུཁེནེཝ གནྟྭཱ ཏཾ ཏཾ གབྦྷཾ པཝིསནྟི། ཨཐ ཀུཏོ ཏསྶ པརིཀྑེཔོཡེཝ སབྦཔརིཙྪནྣཏྟཱཏི ཝུཏྟནྟི ཨཱཧ ‘‘གབྦྷཔརིཀྑེཔོཡེཝ ཧིསྶ པརིཀྑེཔོ’’ཏི། ཨིདཉྩ སམནྟཱ གབྦྷབྷིཏྟིཡོ སནྡྷཱཡ ཝུཏྟཾ། ཙཏུསྶཱལཝསེན སནྣིཝིཊྛེཔི སེནཱསནེ གབྦྷཔམུཁཾ ཝིསུཾ ཨཔརིཀྑིཏྟམྤི སམནྟཱ ཋིཏགབྦྷབྷིཏྟཱིནཾ ཝསེན པརིཀྑིཏྟཾ ནཱམ ཧོཏི།
Sabhāsaṅkhepenāti sabhākārena. Aḍḍhakuṭṭake senāsaneti ettha ‘‘aḍḍhakuṭṭakaṃ nāma yattha ekaṃ passaṃ muñcitvā tīsu passesu bhittiyo baddhā honti, yattha vā ekasmiṃ passe bhittiṃ uṭṭhāpetvā ubhosu passesu upaḍḍhaṃ upaḍḍhaṃ katvā bhittiyo uṭṭhāpenti, tādisaṃ senāsana’’nti tīsupi gaṇṭhipadesu vuttaṃ. Gaṇṭhipade pana ‘‘aḍḍhakuṭṭaketi chadanaṃ aḍḍhena asampattakuṭṭake’’ti vuttaṃ, tampi no na yuttaṃ. ‘‘Vāḷasaṅghāṭo nāma thambhānaṃ upari vāḷarūpehi katasaṅghāṭo vuccatī’’ti vadanti. Parikkhepassa bahigateti ettha yasmiṃ passe parikkhepo natthi, tatthāpi parikkhepārahappadesato bahigate anāpattiyevāti daṭṭhabbaṃ. Aparicchinnagabbhūpacāreti ettha majjhe vivaṭaṅgaṇavantāsu pamukhamahācatussālāsu yathā ākāsaṅgaṇaṃ anotaritvā pamukheneva gantvā sabbagabbhe pavisituṃ na sakkā hoti, evaṃ ekekagabbhassa dvīsu passesu kuṭṭaṃ nīharitvā kataṃ paricchinnagabbhūpacāraṃ nāma, idaṃ pana tādisaṃ na hotīti ‘‘aparicchinnagabbhūpacāre’’ti vuttaṃ. Sabbagabbhe pavisantīti gabbhūpacārassa aparicchinnattā ākāsaṅgaṇaṃ anotaritvā pamukheneva gantvā taṃ taṃ gabbhaṃ pavisanti. Atha kuto tassa parikkhepoyeva sabbaparicchannattāti vuttanti āha ‘‘gabbhaparikkhepoyeva hissa parikkhepo’’ti. Idañca samantā gabbhabhittiyo sandhāya vuttaṃ. Catussālavasena sanniviṭṭhepi senāsane gabbhapamukhaṃ visuṃ aparikkhittampi samantā ṭhitagabbhabhittīnaṃ vasena parikkhittaṃ nāma hoti.
‘‘ནནུ ཙ ‘ཨཔརིཀྑིཏྟེ པམུཁེ ཨནཱཔཏྟཱི’ཏི ཨནྡྷཀཊྛཀཐཱཡཾ ཨཝིསེསེན ཝུཏྟཾ, ཏསྨཱ ཙཏུསྶཱལཝསེན སནྣིཝིཊྛེཔི སེནཱསནེ ཝིསུཾ ཨཔརིཀྑིཏྟེ པམུཁེ ཨནཱཔཏྟིཡེཝཱ’’ཏི ཡོ ཝདེཡྻ, ཏསྶ ཝཱདཔརིམོཙནཏྠཾ ཨིདཾ ཝུཏྟཾ ‘‘ཡཾ པན…པེ॰… པཱཊེཀྐསནྣིཝེསཱ ཨེཀཙྪདནཱ གབྦྷཔཱལི༹ཡོ སནྡྷཱཡ ཝུཏྟ’’ནྟི། ཨིདཾ ཝུཏྟཾ ཧོཏི – ‘‘ཨཔརིཀྑིཏྟེ པམུཁེ ཨནཱཔཏྟཱིཏི ཡཾ ཝུཏྟཾ, ཏཾ ན ཙཏུསྶཱལཝསེན སནྣིཝིཊྛཱ གབྦྷཔཱལི༹ཡོ སནྡྷཱཡ ཝུཏྟཾ, ཀིཉྩརཧི ཝིསུཾ སནྣིཝིཊྛཾ ཨེཀམེཝ གབྦྷཔཱལི༹ཾ སནྡྷཱཡ། ཏཱདིསཱཡ ཧི གབྦྷཔཱལི༹ཡཱ ཨཔརིཀྑིཏྟེ པམུཁེ ཨནཱཔཏྟི, ན ཙཏུསྶཱལཝསེན སནྣིཝིཊྛཱཡཱ’’ཏི། ཨེཀཱཡ ཙ གབྦྷཔཱལི༹ཡཱ ཏསྶ ཏསྶ གབྦྷསྶ ཨུཔཙཱརཾ པརིཙྪིནྡིཏྭཱ ཨནྟམསོ ཨུབྷོསུ པསྶེསུ ཁུདྡཀབྷིཏྟཱིནཾ ཨུཊྛཱཔནམཏྟེནཔི པམུཁཾ པརིཀྑིཏྟཾ ནཱམ ཧོཏི, ཙཏུསྶཱལཝསེན སནྣིཝིཊྛཱསུ པན གབྦྷཔཱལཱི༹སུ ཨུབྷོསུ པསྶེསུ གབྦྷབྷིཏྟཱིནཾ ཝསེནཔི པམུཁཾ པརིཀྑིཏྟཾ ནཱམ ཧོཏི། ཏསྨཱ ཡཾ ཨིམིནཱ ལཀྑཎེན པརིཀྑིཏྟཾ པམུཁཾ, ཏཏྠ ཨཱཔཏྟི, ཨིཏརཏྠ ཨནཱཔཏྟཱིཏི ཨིདམེཏྠ སནྣིཊྛཱནཾ།
‘‘Nanu ca ‘aparikkhitte pamukhe anāpattī’ti andhakaṭṭhakathāyaṃ avisesena vuttaṃ, tasmā catussālavasena sanniviṭṭhepi senāsane visuṃ aparikkhitte pamukhe anāpattiyevā’’ti yo vadeyya, tassa vādaparimocanatthaṃ idaṃ vuttaṃ ‘‘yaṃ pana…pe… pāṭekkasannivesā ekacchadanā gabbhapāḷiyo sandhāya vutta’’nti. Idaṃ vuttaṃ hoti – ‘‘aparikkhitte pamukhe anāpattīti yaṃ vuttaṃ, taṃ na catussālavasena sanniviṭṭhā gabbhapāḷiyo sandhāya vuttaṃ, kiñcarahi visuṃ sanniviṭṭhaṃ ekameva gabbhapāḷiṃ sandhāya. Tādisāya hi gabbhapāḷiyā aparikkhitte pamukhe anāpatti, na catussālavasena sanniviṭṭhāyā’’ti. Ekāya ca gabbhapāḷiyā tassa tassa gabbhassa upacāraṃ paricchinditvā antamaso ubhosu passesu khuddakabhittīnaṃ uṭṭhāpanamattenapi pamukhaṃ parikkhittaṃ nāma hoti, catussālavasena sanniviṭṭhāsu pana gabbhapāḷīsu ubhosu passesu gabbhabhittīnaṃ vasenapi pamukhaṃ parikkhittaṃ nāma hoti. Tasmā yaṃ iminā lakkhaṇena parikkhittaṃ pamukhaṃ, tattha āpatti, itarattha anāpattīti idamettha sanniṭṭhānaṃ.
ཨིདཱནི ‘‘ཨཔརིཀྑིཏྟེ པམུཁེ ཨནཱཔཏྟཱི’’ཏི ཝཏྭཱ ཏསྶེཝ ཝཙནསྶ ཨདྷིཔྤཱཡཾ པཀཱསེནྟེན ཡཾ ཝུཏྟཾ ‘‘བྷཱུམིཡཾ ཝིནཱ ཛགཏིཡཱ པམུཁཾ སནྡྷཱཡ ཀཐིཏ’’ནྟི, ཏསྶ ཨཡུཏྟཏཱཝིབྷཱཝནཏྠཾ ‘‘ཡཉྩ ཏཏྠཱ’’ཏིཨཱདི ཨཱརདྡྷཾ། བྷཱུམིཡཾ ཝིནཱ ཛགཏིཡཱ པམུཁཾ སནྡྷཱཡ ཀཐིཏནྟི ཧི ཨིམསྶ ཝཙནསྶ ཨཡམདྷིཔྤཱཡོ – ‘‘ཨཔརིཀྑིཏྟེ པམུཁེ ཨནཱཔཏྟཱི’’ཏི ཡཾ ཝུཏྟཾ, ཏཾ ཝིནཱ ཝཏྠུཾ བྷཱུམིཡཾ ཀཏགེཧསྶ པམུཁཾ སནྡྷཱཡ ཀཐིཏཾ། སཙེ པན ཨུཙྩཝཏྠུཀཾ པམུཁཾ ཧོཏི, པརིཀྑིཏྟསངྑྱཾ ན གཙྪཏཱིཏི། ཏེནེཝཱཧ ‘‘དསཧཏྠུབྦེདྷཱཔི ཧི ཛགཏི པརིཀྑེཔསངྑྱཾ ན གཙྪཏཱི’’ཏི། ཧེཊྛཱཔི ཨིདམེཝ མནསི སནྣིདྷཱཡ ཝུཏྟཾ ‘‘ཨུཙྩཝཏྠུཀཾ ཙེཔི ཧོཏི, པམུཁེ སཡིཏོ གབྦྷེ སཡིཏཱནཾ ཨཱཔཏྟིཾ ན ཀརོཏཱི’’ཏི། ཏཏྠཱཏི ཨནྡྷཀཊྛཀཐཱཡཾ། ཛགཏིཡཱ པམཱཎཾ ཝཏྭཱཏི ‘‘སཙེ ཛགཏིཡཱ ཨོཏརིཏྭཱ བྷཱུམིཡཾ སཡིཏོ, ཛགཏིཡཱ ཨུཔརི སཡིཏཾ ན པསྶཏཱི’’ཏི ཨེཝཾ ཛགཏིཡཱ ཨུབྦེདྷེན པམཱཎཾ ཝཏྭཱ། ཨེཀསཱལཱདཱིསུ ཨུཛུཀམེཝ དཱིགྷཾ ཀཏྭཱ སནྣིཝེསིཏོ པཱསཱདོ ཨེཀསཱལསནྣིཝེསོ། དྭིསཱལསནྣིཝེསཱདཡོཔི ཝུཏྟཱནུསཱརཏོ ཝེདིཏབྦཱ། སཱལཔྤབྷེདདཱིཔནམེཝ ཙེཏྠ ཧེཊྛཱ ཝུཏྟཏོ ཝིསེསོ།
Idāni ‘‘aparikkhitte pamukhe anāpattī’’ti vatvā tasseva vacanassa adhippāyaṃ pakāsentena yaṃ vuttaṃ ‘‘bhūmiyaṃ vinā jagatiyā pamukhaṃ sandhāya kathita’’nti, tassa ayuttatāvibhāvanatthaṃ ‘‘yañca tatthā’’tiādi āraddhaṃ. Bhūmiyaṃ vinā jagatiyā pamukhaṃ sandhāya kathitanti hi imassa vacanassa ayamadhippāyo – ‘‘aparikkhitte pamukhe anāpattī’’ti yaṃ vuttaṃ, taṃ vinā vatthuṃ bhūmiyaṃ katagehassa pamukhaṃ sandhāya kathitaṃ. Sace pana uccavatthukaṃ pamukhaṃ hoti, parikkhittasaṅkhyaṃ na gacchatīti. Tenevāha ‘‘dasahatthubbedhāpi hi jagati parikkhepasaṅkhyaṃ na gacchatī’’ti. Heṭṭhāpi idameva manasi sannidhāya vuttaṃ ‘‘uccavatthukaṃ cepi hoti, pamukhe sayito gabbhe sayitānaṃ āpattiṃ na karotī’’ti. Tatthāti andhakaṭṭhakathāyaṃ. Jagatiyā pamāṇaṃ vatvāti ‘‘sace jagatiyā otaritvā bhūmiyaṃ sayito, jagatiyā upari sayitaṃ na passatī’’ti evaṃ jagatiyā ubbedhena pamāṇaṃ vatvā. Ekasālādīsu ujukameva dīghaṃ katvā sannivesito pāsādo ekasālasanniveso. Dvisālasannivesādayopi vuttānusārato veditabbā. Sālappabhedadīpanameva cettha heṭṭhā vuttato viseso.
མཛ྄ཛྷེཔཱཀཱརཾ ཀརོནྟཱིཏི ཨེཏྠཱཔི པརིཀྑེཔསྶ ཧེཊྛིམཔརིཙྪེདེན དིཡཌྜྷཧཏྠུབྦེདྷཏྟཱ དིཡཌྜྷཧཏྠཾ ཙེཔི མཛ྄ཛྷེ པཱཀཱརཾ ཀརོནྟི, ནཱནཱུཔཙཱརམེཝ ཧོཏཱིཏི ཝེདིཏབྦཾ། ན ཧི ཚིདྡེན གེཧཾ ཨེཀཱུཔཙཱརཾ ནཱམ ཧོཏཱིཏི ཨེཏྠ སཙེ ཨུབྦེདྷེན དིཡཌྜྷཧཏྠབྦྷནྟརེ མནུསྶཱནཾ སཉྩཱརཔྤཧོནཀཾ ཚིདྡཾ ཧོཏི, ཏམྤི དྭཱརམེཝཱཏི ཨེཀཱུཔཙཱརཾ ཧོཏི། ཀིཾ པརིཀྑེཔོཝིདྡྷསྟོཏི པམུཁསྶ པརིཀྑེཔཾ སནྡྷཱཡ ཝདཏི། སབྦཏྠ པཉྩནྣཾཡེཝ ཚདནཱནཾ ཨཱགཏཏྟཱ ཝདཏི ‘‘པཉྩནྣཾ ཨཉྙཏརེན ཚདནེན ཚནྣཱ’’ཏི།
Majjhepākāraṃ karontīti etthāpi parikkhepassa heṭṭhimaparicchedena diyaḍḍhahatthubbedhattā diyaḍḍhahatthaṃ cepi majjhe pākāraṃ karonti, nānūpacārameva hotīti veditabbaṃ. Na hi chiddena gehaṃ ekūpacāraṃ nāma hotīti ettha sace ubbedhena diyaḍḍhahatthabbhantare manussānaṃ sañcārappahonakaṃ chiddaṃ hoti, tampi dvāramevāti ekūpacāraṃ hoti. Kiṃ parikkhepoviddhastoti pamukhassa parikkhepaṃ sandhāya vadati. Sabbattha pañcannaṃyeva chadanānaṃ āgatattā vadati ‘‘pañcannaṃ aññatarena chadanena channā’’ti.
༥༣. པཱལི༹ཡཾ ‘‘སེཡྻཱ ནཱམ སབྦཙྪནྣཱ སབྦཔརིཙྪནྣཱ ཡེབྷུཡྻེནཙྪནྣཱ ཡེབྷུཡྻེནཔརིཙྪནྣཱ’’ཏི ཝདནྟེན ཡེབྷུཡྻེནཙྪནྣཡེབྷུཡྻེནཔརིཙྪནྣསེནཱསནཾ པཱཙིཏྟིཡསྶ ཨཝསཱནཾ ཝིཡ ཀཏྭཱ དསྶིཏཾ, ‘‘ཨུཔཌྜྷཙྪནྣེ ཨུཔཌྜྷཔརིཙྪནྣེ ཨཱཔཏྟི དུཀྐཊསྶཱ’’ཏི ཝདནྟེན ཙ ཨུཔཌྜྷཙྪནྣཨུཔཌྜྷཔརིཙྪནྣསེནཱསནཾ དུཀྐཊསྶ ཨཱདིཾ ཀཏྭཱ དསྶིཏཾ, ཨུབྷིནྣམནྟརཱ ཀེན བྷཝིཏབྦཾ པཱཙིཏྟིཡེན, ཨུདཱཧུ དུཀྐཊེནཱཏི? ལོཀཝཛྫསིཀྑཱཔདསྶེཝ ཨནཝསེསཾ ཀཏྭཱ པཉྙཱཔནཏོ ཨིམསྶ ཙ པཎྞཏྟིཝཛྫཏྟཱ ཡེབྷུཡྻེནཙྪནྣཡེབྷུཡྻེནཔརིཙྪནྣསྶ ཨུཔཌྜྷཙྪནྣཨུཔཌྜྷཔརིཙྪནྣསྶ ཙ ཨནྟརཱ པཱཙིཏྟིཡཾ ཨནིཝཱརིཏམེཝ, ཏསྨཱ ཝིནཡཝིནིཙྪཡེ ཙ གརུཀེཡེཝ ཋཱཏབྦཏྟཱ ཨཊྛཀཐཱཡམྤི པཱཙིཏྟིཡམེཝ དསྶིཏཾ། སཏྟ པཱཙིཏྟིཡཱནཱིཏི པཱལི༹ཡཾ ཝུཏྟཔཱཙིཏྟིཡཾ སཱམཉྙཏོ ཨེཀཏྟེན གཧེཏྭཱ ཝུཏྟཾ། ཝིསུཾ པན གཡ྄ཧམཱནེ ‘‘སབྦཙྪནྣེ སབྦཔརིཙྪནྣེ པཱཙིཏྟིཡཾ, ཡེབྷུཡྻེནཙྪནྣེ ཡེབྷུཡྻེནཔརིཙྪནྣེ པཱཙིཏྟིཡ’’ནྟི ཨཊྛེཝ པཱཙིཏྟིཡཱནི ཧོནྟི།
53. Pāḷiyaṃ ‘‘seyyā nāma sabbacchannā sabbaparicchannā yebhuyyenacchannā yebhuyyenaparicchannā’’ti vadantena yebhuyyenacchannayebhuyyenaparicchannasenāsanaṃ pācittiyassa avasānaṃ viya katvā dassitaṃ, ‘‘upaḍḍhacchanne upaḍḍhaparicchanne āpatti dukkaṭassā’’ti vadantena ca upaḍḍhacchannaupaḍḍhaparicchannasenāsanaṃ dukkaṭassa ādiṃ katvā dassitaṃ, ubhinnamantarā kena bhavitabbaṃ pācittiyena, udāhu dukkaṭenāti? Lokavajjasikkhāpadasseva anavasesaṃ katvā paññāpanato imassa ca paṇṇattivajjattā yebhuyyenacchannayebhuyyenaparicchannassa upaḍḍhacchannaupaḍḍhaparicchannassa ca antarā pācittiyaṃ anivāritameva, tasmā vinayavinicchaye ca garukeyeva ṭhātabbattā aṭṭhakathāyampi pācittiyameva dassitaṃ. Satta pācittiyānīti pāḷiyaṃ vuttapācittiyaṃ sāmaññato ekattena gahetvā vuttaṃ. Visuṃ pana gayhamāne ‘‘sabbacchanne sabbaparicchanne pācittiyaṃ, yebhuyyenacchanne yebhuyyenaparicchanne pācittiya’’nti aṭṭheva pācittiyāni honti.
སེནམྦམཎྜཔཝཎྞཾ ཧོཏཱིཏི སཱིཧལ༹དཱིཔེ ཀིར ཨུཙྩཝཏྠུཀོ སབྦཙྪནྣོ སབྦཨཔརིཙྪནྣོ ཨེཝཾནཱམཀོ སནྣིཔཱཏམཎྜཔོ ཨཏྠི, ཏཾ སནྡྷཱཡེཏཾ ཝུཏྟཾ། ཡདི ཛགཏིཔརིཀྑེཔསངྑྱཾ གཙྪཏི, ཨུཙྩཝཏྠུཀཏྟཱ མཎྜཔསྶ སབྦཨཔརིཙྪནྣཏཱ ན ཡུཛྫཏཱིཏི ཨཱཧ ‘‘ཨིམིནཱཔེཏཾ ཝེདིཏབྦ’’ནྟིཨཱདི། ཙཱུལ༹ཀཙྪནྣཱདཱིནི ཙེཏྠ ཨེཝཾ ཝེདིཏབྦཱནི – ཡསྶ ཙཏཱུསུ བྷཱགེསུ ཨེཀོ ཚནྣོ, སེསཱ ཨཙྪནྣཱ, ཨིདཾ ཙཱུལ༹ཀཙྪནྣཾ། ཡསྶ ཏཱིསུ བྷཱགེསུ དྭེ ཚནྣཱ, ཨེཀོ ཨཙྪནྣོ, ཨིདཾ ཡེབྷུཡྻེནཙྪནྣཾ། ཡསྶ དྭཱིསུ བྷཱགེསུ ཨེཀོ ཚནྣོ, ཨེཀོ ཨཙྪནྣོ, ཨིདཾ ཨུཔཌྜྷཙྪནྣཾ ནཱམ སེནཱསནཾ། ཙཱུལ༹ཀཔརིཙྪནྣཱདཱིནིཔི ཨིམིནཱཝ ནཡེན ཝེདིཏབྦཱནི། སེསཾ ཨུཏྟཱནམེཝ། པཱཙིཏྟིཡཝཏྠུཀསེནཱསནཾ, ཏཏྠ ཏཏྠ ཨནུཔསམྤནྣེན སཧ ནིཔཛྫནཾ, ཙཏུཏྠདིཝསེ སཱུརིཡཏྠངྒམནནྟི ཨིམཱནེཏྠ ཏཱིཎི ཨངྒཱནི།
Senambamaṇḍapavaṇṇaṃ hotīti sīhaḷadīpe kira uccavatthuko sabbacchanno sabbaaparicchanno evaṃnāmako sannipātamaṇḍapo atthi, taṃ sandhāyetaṃ vuttaṃ. Yadi jagatiparikkhepasaṅkhyaṃ gacchati, uccavatthukattā maṇḍapassa sabbaaparicchannatā na yujjatīti āha ‘‘imināpetaṃ veditabba’’ntiādi. Cūḷakacchannādīni cettha evaṃ veditabbāni – yassa catūsu bhāgesu eko channo, sesā acchannā, idaṃ cūḷakacchannaṃ. Yassa tīsu bhāgesu dve channā, eko acchanno, idaṃ yebhuyyenacchannaṃ. Yassa dvīsu bhāgesu eko channo, eko acchanno, idaṃ upaḍḍhacchannaṃ nāma senāsanaṃ. Cūḷakaparicchannādīnipi imināva nayena veditabbāni. Sesaṃ uttānameva. Pācittiyavatthukasenāsanaṃ, tattha tattha anupasampannena saha nipajjanaṃ, catutthadivase sūriyatthaṅgamananti imānettha tīṇi aṅgāni.
སཧསེཡྻསིཀྑཱཔདཝཎྞནཱ ནིཊྛིཏཱ།
Sahaseyyasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༡. མུསཱཝཱདཝགྒོ • 1. Musāvādavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༥. སཧསེཡྻསིཀྑཱཔདཝཎྞནཱ • 5. Sahaseyyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. པཋམསཧསེཡྻསིཀྑཱཔདཝཎྞནཱ • 5. Paṭhamasahaseyyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༥. སཧསེཡྻསིཀྑཱཔདཝཎྞནཱ • 5. Sahaseyyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༥. སཧསེཡྻསིཀྑཱཔདཾ • 5. Sahaseyyasikkhāpadaṃ
