| Library / Tipiṭaka / ਤਿਪਿਟਕ • Tipiṭaka / ਮਹਾવਿਭਙ੍ਗ-ਅਟ੍ਠਕਥਾ • Mahāvibhaṅga-aṭṭhakathā |
੫. ਸਹਸੇਯ੍ਯਸਿਕ੍ਖਾਪਦવਣ੍ਣਨਾ
5. Sahaseyyasikkhāpadavaṇṇanā
੪੯. ਪਞ੍ਚਮਸਿਕ੍ਖਾਪਦੇ – ਮੁਟ੍ਠਸ੍ਸਤੀ ਅਸਮ੍ਪਜਾਨਾਤਿ ਪੁਬ੍ਬਭਾਗੇ ਸਤਿਸਮ੍ਪਜਞ੍ਞਸ੍ਸ ਅਕਰਣવਸੇਨੇਤਂ વੁਤ੍ਤਂ, ਭવਙ੍ਗੋਤਿਣ੍ਣਕਾਲੇ ਪਨ ਕੁਤੋ ਸਤਿਸਮ੍ਪਜਞ੍ਞਨ੍ਤਿ! વਿਕੂਜਮਾਨਾਤਿ વਿਪ੍ਪਲਪਮਾਨਾ । ਕਾਕਚ੍ਛਮਾਨਾਤਿ ਨਾਸਾਯ ਕਾਕਸਦ੍ਦਂ વਿਯ ਨਿਰਤ੍ਥਕਸਦ੍ਦਂ ਮੁਞ੍ਚਮਾਨਾ। ਉਪਾਸਕਾਤਿ ਪਠਮਤਰਂ ਉਟ੍ਠਿਤਉਪਾਸਕਾ।
49. Pañcamasikkhāpade – muṭṭhassatī asampajānāti pubbabhāge satisampajaññassa akaraṇavasenetaṃ vuttaṃ, bhavaṅgotiṇṇakāle pana kuto satisampajaññanti! Vikūjamānāti vippalapamānā . Kākacchamānāti nāsāya kākasaddaṃ viya niratthakasaddaṃ muñcamānā. Upāsakāti paṭhamataraṃ uṭṭhitaupāsakā.
੫੦. ਏਤਦવੋਚੁਨ੍ਤਿ ‘‘ਭਗવਤਾ ਆવੁਸੋ ਰਾਹੁਲ ਸਿਕ੍ਖਾਪਦਂ ਪਞ੍ਞਤ੍ਤ’’ਨ੍ਤਿ ਭਿਕ੍ਖੂ ਸਿਕ੍ਖਾਪਦਗਾਰવੇਨੇવ ਏਤਂ ਅવੋਚੁਂ। ਪਕਤਿਯਾ ਪਨ ਤੇ ਭਗવਤਿ ਚ ਗਾਰવੇਨ ਆਯਸ੍ਮਤੋ ਚ ਰਾਹੁਲਸ੍ਸ ਸਿਕ੍ਖਾਕਾਮਤਾਯ ਤਸ੍ਸ ਆਯਸ੍ਮਤੋ વਸਨਟ੍ਠਾਨਂ ਆਗਤਸ੍ਸ ਚੂਲ਼ਮਞ੍ਚਕਂ વਾ ਅਪਸ੍ਸੇਨਂ વਾ ਯਂ ਅਤ੍ਥਿ ਤਂ ਪਞ੍ਞਪੇਤ੍વਾ ਚੀવਰਂ વਾ ਉਤ੍ਤਰਾਸਙ੍ਗਂ વਾ ਉਸ੍ਸੀਸਕਰਣਤ੍ਥਾਯ ਦੇਨ੍ਤਿ । ਤਤ੍ਰਿਦਂ ਤਸ੍ਸਾਯਸ੍ਮਤੋ ਸਿਕ੍ਖਾਕਾਮਤਾਯ – ਭਿਕ੍ਖੂ ਕਿਰ ਤਂ ਦੂਰਤੋવ ਆਗਚ੍ਛਨ੍ਤਂ ਦਿਸ੍વਾ ਮੁਟ੍ਠਿਸਮ੍ਮੁਞ੍ਜਨਿਞ੍ਚ ਕਚવਰਛਡ੍ਡਨਕਞ੍ਚ ਬਹਿ ਖਿਪਨ੍ਤਿ। ਅਥਞ੍ਞੇਹਿ ‘‘ਆવੁਸੋ ਕੇਨਿਦਂ ਪਾਤਿਤ’’ਨ੍ਤਿ વੁਤ੍ਤੇ ਅਞ੍ਞੇ ਏવਂ વਦਨ੍ਤਿ – ‘‘ਭਨ੍ਤੇ, ਰਾਹੁਲੋ ਇਮਸ੍ਮਿਂ ਪਦੇਸੇ ਸਞ੍ਚਰਿ, ਤੇਨ ਨੁ ਖੋ ਪਾਤਿਤ’’ਨ੍ਤਿ। ਸੋ ਪਨਾਯਸ੍ਮਾ ‘‘ਨ ਮਯ੍ਹਂ ਭਨ੍ਤੇ ਇਦਂ ਕਮ੍ਮ’’ਨ੍ਤਿ ਏਕਦਿવਸਮ੍ਪਿ ਅવਤ੍વਾ ਤਂ ਪਟਿਸਾਮੇਤ੍વਾ ਭਿਕ੍ਖੂ ਖਮਾਪੇਤ੍વਾ ਗਚ੍ਛਤਿ। વਚ੍ਚਕੁਟਿਯਾ ਸੇਯ੍ਯਂ ਕਪ੍ਪੇਸੀਤਿ ਤਂਯੇવ ਸਿਕ੍ਖਾਕਾਮਤਂ ਅਨੁਬ੍ਰੂਹਨ੍ਤੋ ਧਮ੍ਮਸੇਨਾਪਤਿਮਹਾਮੋਗ੍ਗਲ੍ਲਾਨਆਨਨ੍ਦਤ੍ਥੇਰਾਦੀਨਂ ਸਨ੍ਤਿਕਂ ਅਗਨ੍ਤ੍વਾ ਭਗવਤੋ વਲ਼ਞ੍ਜਨਕવਚ੍ਚਕੁਟਿਯਂ ਸੇਯ੍ਯਂ ਕਪ੍ਪੇਸਿ। ਸਾ ਕਿਰ ਕੁਟਿ ਕવਾਟਬਦ੍ਧਾ ਗਨ੍ਧਪਰਿਭਣ੍ਡਕਤਾ ਸਮੋਸਰਿਤਪੁਪ੍ਫਦਾਮਾ ਚੇਤਿਯਟ੍ਠਾਨਮਿવ ਤਿਟ੍ਠਤਿ, ਅਪਰਿਭੋਗਾ ਅਞ੍ਞੇਸਂ।
50.Etadavocunti ‘‘bhagavatā āvuso rāhula sikkhāpadaṃ paññatta’’nti bhikkhū sikkhāpadagāraveneva etaṃ avocuṃ. Pakatiyā pana te bhagavati ca gāravena āyasmato ca rāhulassa sikkhākāmatāya tassa āyasmato vasanaṭṭhānaṃ āgatassa cūḷamañcakaṃ vā apassenaṃ vā yaṃ atthi taṃ paññapetvā cīvaraṃ vā uttarāsaṅgaṃ vā ussīsakaraṇatthāya denti . Tatridaṃ tassāyasmato sikkhākāmatāya – bhikkhū kira taṃ dūratova āgacchantaṃ disvā muṭṭhisammuñjaniñca kacavarachaḍḍanakañca bahi khipanti. Athaññehi ‘‘āvuso kenidaṃ pātita’’nti vutte aññe evaṃ vadanti – ‘‘bhante, rāhulo imasmiṃ padese sañcari, tena nu kho pātita’’nti. So panāyasmā ‘‘na mayhaṃ bhante idaṃ kamma’’nti ekadivasampi avatvā taṃ paṭisāmetvā bhikkhū khamāpetvā gacchati. Vaccakuṭiyā seyyaṃ kappesīti taṃyeva sikkhākāmataṃ anubrūhanto dhammasenāpatimahāmoggallānaānandattherādīnaṃ santikaṃ agantvā bhagavato vaḷañjanakavaccakuṭiyaṃ seyyaṃ kappesi. Sā kira kuṭi kavāṭabaddhā gandhaparibhaṇḍakatā samosaritapupphadāmā cetiyaṭṭhānamiva tiṭṭhati, aparibhogā aññesaṃ.
੫੧. ਉਤ੍ਤਰਿਦਿਰਤ੍ਤਤਿਰਤ੍ਤਨ੍ਤਿ ਭਗવਾ ਸਾਮਣੇਰਾਨਂ ਸਙ੍ਗਹਕਰਣਤ੍ਥਾਯ ਤਿਰਤ੍ਤਂ ਪਰਿਹਾਰਂ ਅਦਾਸਿ। ਨ ਹਿ ਯੁਤ੍ਤਂ ਕੁਲਦਾਰਕੇ ਪਬ੍ਬਾਜੇਤ੍વਾ ਨਾਨੁਗ੍ਗਹੇਤੁਨ੍ਤਿ। ਸਹਸੇਯ੍ਯਨ੍ਤਿ ਏਕਤੋ ਸੇਯ੍ਯਂ। ਸੇਯ੍ਯਾਤਿ ਕਾਯਪ੍ਪਸਾਰਣਸਙ੍ਖਾਤਂ ਸਯਨਮ੍ਪਿ વੁਚ੍ਚਤਿ, ਯਸ੍ਮਿਂ ਸੇਨਾਸਨੇ ਸਯਨ੍ਤਿ, ਤਮ੍ਪਿ। ਤਤ੍ਥ ਸੇਨਾਸਨਂ ਤਾવ ਦਸ੍ਸੇਤੁਂ ‘‘ਸੇਯ੍ਯਾ ਨਾਮ ਸਬ੍ਬਚ੍ਛਨ੍ਨਾ’’ਤਿਆਦਿ વੁਤ੍ਤਂ। ਕਾਯਪ੍ਪਸਾਰਣਂ ਦਸ੍ਸੇਤੁਂ ਅਨੁਪਸਮ੍ਪਨ੍ਨੇ ਨਿਪਨ੍ਨੇ ਭਿਕ੍ਖੁ ਨਿਪਜ੍ਜਤੀ’’ਤਿਆਦਿ વੁਤ੍ਤਂ। ਤਸ੍ਮਾ ਅਯਮੇਤ੍ਥ ਅਤ੍ਥੋ – ‘‘ਸੇਨਾਸਨਸਙ੍ਖਾਤਂ ਸੇਯ੍ਯਂ ਪવਿਸਿਤ੍વਾ ਕਾਯਪ੍ਪਸਾਰਣਸਙ੍ਖਾਤਂ ਸੇਯ੍ਯਂ ਕਪ੍ਪੇਯ੍ਯ વਿਦਹੇਯ੍ਯ ਸਮ੍ਪਾਦੇਯ੍ਯਾ’’ਤਿ। ਸਬ੍ਬਚ੍ਛਨ੍ਨਾਤਿਆਦਿਨਾ ਪਨ ਤਸ੍ਸਾ ਸੇਨਾਸਨਸਙ੍ਖਾਤਾਯ ਸੇਯ੍ਯਾਯ ਲਕ੍ਖਣਂ વੁਤ੍ਤਂ। ਤਸ੍ਮਾ ਯਂ ਸੇਨਾਸਨਂ ਉਪਰਿ ਪਞ੍ਚਹਿ ਛਦਨੇਹਿ ਅਞ੍ਞੇਨ વਾ ਕੇਨਚਿ ਸਬ੍ਬਮੇવ ਪਟਿਚ੍ਛਨ੍ਨਂ, ਅਯਂ ਸਬ੍ਬਚ੍ਛਨ੍ਨਾ ਨਾਮ ਸੇਯ੍ਯਾ। ਅਟ੍ਠਕਥਾਸੁ ਪਨ ਪਾਕਟવੋਹਾਰਂ ਗਹੇਤ੍વਾ વਾਚੁਗ੍ਗਤવਸੇਨ ‘‘ਸਬ੍ਬਚ੍ਛਨ੍ਨਾ ਨਾਮ ਪਞ੍ਚਹਿ ਛਦਨੇਹਿ ਛਨ੍ਨਾ’’ਤਿ વੁਤ੍ਤਂ। ਕਿਞ੍ਚਾਪਿ વੁਤ੍ਤਂ? ਅਥ ਖੋ ਦੁਸ੍ਸਕੁਟਿਯਂ વਸਨ੍ਤਸ੍ਸਾਪਿ ਨ ਸਕ੍ਕਾ ਅਨਾਪਤ੍ਤਿ ਕਾਤੁਂ, ਤਸ੍ਮਾ ਯਂ ਕਿਞ੍ਚਿ ਪਟਿਚ੍ਛਾਦਨਸਮਤ੍ਥਂ ਇਧ ਛਦਨਞ੍ਚ ਪਰਿਚ੍ਛਨ੍ਨਞ੍ਚ વੇਦਿਤਬ੍ਬਂ। ਪਞ੍ਚવਿਧਚ੍ਛਦਨੇਯੇવ ਹਿ ਗਯ੍ਹਮਾਨੇ ਪਦਰਚ੍ਛਨ੍ਨੇਪਿ ਸਹਸੇਯ੍ਯਾ ਨ ਭવੇਯ੍ਯ। ਯਂ ਪਨ ਸੇਨਾਸਨਂ ਭੂਮਿਤੋ ਪਟ੍ਠਾਯ ਯਾવ ਛਦਨਂ ਆਹਚ੍ਚ ਪਾਕਾਰੇਨ વਾ ਅਞ੍ਞੇਨ વਾ ਕੇਨਚਿ ਅਨ੍ਤਮਸੋ વਤ੍ਥੇਨਾਪਿ ਪਰਿਕ੍ਖਿਤ੍ਤਂ, ਅਯਂ ਸਬ੍ਬਪਰਿਚ੍ਛਨ੍ਨਾ ਨਾਮ ਸੇਯ੍ਯਾ। ਛਦਨਂ ਅਨਾਹਚ੍ਚ ਸਬ੍ਬਨ੍ਤਿਮੇਨ ਪਰਿਯਾਯੇਨ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਪਰਿਕ੍ਖਿਤ੍ਤਾਪਿ ਸਬ੍ਬਪਰਿਚ੍ਛਨ੍ਨਾਯੇવਾਤਿ ਕੁਰੁਨ੍ਦਟ੍ਠਕਥਾਯਂ વੁਤ੍ਤਂ। ਯਸ੍ਸਾ ਪਨ ਉਪਰਿ ਬਹੁਤਰਂ ਠਾਨਂ ਛਨ੍ਨਂ, ਅਪ੍ਪਂ ਅਚ੍ਛਨ੍ਨਂ, ਸਮਨ੍ਤਤੋ વਾ ਬਹੁਤਰਂ ਪਰਿਕ੍ਖਿਤ੍ਤਂ, ਅਪ੍ਪਂ ਅਪਰਿਕ੍ਖਿਤ੍ਤਂ, ਅਯਂ ਯੇਭੁਯ੍ਯੇਨ ਛਨ੍ਨਾ ਯੇਭੁਯ੍ਯੇਨ ਪਰਿਚ੍ਛਨ੍ਨਾ ਨਾਮ। ਇਮਿਨਾ ਹਿ ਲਕ੍ਖਣੇਨ ਸਮਨ੍ਨਾਗਤੋ ਸਚੇਪਿ ਸਤ੍ਤਭੂਮਕੋ ਪਾਸਾਦੋ ਏਕੂਪਚਾਰੋ ਹੋਤਿ, ਸਤਗਬ੍ਭਂ વਾ ਚਤੁਸ੍ਸਾਲਂ વਾ, ਏਕਸੇਯ੍ਯਾਇਚ੍ਚੇવ ਸਙ੍ਖ੍ਯਂ ਗਚ੍ਛਤਿ। ਤਂ ਸਨ੍ਧਾਯ વੁਤ੍ਤਂ ‘‘ਚਤੁਤ੍ਥੇ ਦਿવਸੇ ਅਤ੍ਥਙ੍ਗਤੇ ਸੂਰਿਯੇ ਅਨੁਪਸਮ੍ਪਨ੍ਨੇ ਨਿਪਨ੍ਨੇ ਭਿਕ੍ਖੁ ਨਿਪਜ੍ਜਤਿ, ਆਪਤ੍ਤਿ ਪਾਚਿਤ੍ਤਿਯਸ੍ਸਾ’’ਤਿਆਦਿ।
51.Uttaridirattatirattanti bhagavā sāmaṇerānaṃ saṅgahakaraṇatthāya tirattaṃ parihāraṃ adāsi. Na hi yuttaṃ kuladārake pabbājetvā nānuggahetunti. Sahaseyyanti ekato seyyaṃ. Seyyāti kāyappasāraṇasaṅkhātaṃ sayanampi vuccati, yasmiṃ senāsane sayanti, tampi. Tattha senāsanaṃ tāva dassetuṃ ‘‘seyyā nāma sabbacchannā’’tiādi vuttaṃ. Kāyappasāraṇaṃ dassetuṃ anupasampanne nipanne bhikkhu nipajjatī’’tiādi vuttaṃ. Tasmā ayamettha attho – ‘‘senāsanasaṅkhātaṃ seyyaṃ pavisitvā kāyappasāraṇasaṅkhātaṃ seyyaṃ kappeyya vidaheyya sampādeyyā’’ti. Sabbacchannātiādinā pana tassā senāsanasaṅkhātāya seyyāya lakkhaṇaṃ vuttaṃ. Tasmā yaṃ senāsanaṃ upari pañcahi chadanehi aññena vā kenaci sabbameva paṭicchannaṃ, ayaṃ sabbacchannā nāma seyyā. Aṭṭhakathāsu pana pākaṭavohāraṃ gahetvā vācuggatavasena ‘‘sabbacchannā nāma pañcahi chadanehi channā’’ti vuttaṃ. Kiñcāpi vuttaṃ? Atha kho dussakuṭiyaṃ vasantassāpi na sakkā anāpatti kātuṃ, tasmā yaṃ kiñci paṭicchādanasamatthaṃ idha chadanañca paricchannañca veditabbaṃ. Pañcavidhacchadaneyeva hi gayhamāne padaracchannepi sahaseyyā na bhaveyya. Yaṃ pana senāsanaṃ bhūmito paṭṭhāya yāva chadanaṃ āhacca pākārena vā aññena vā kenaci antamaso vatthenāpi parikkhittaṃ, ayaṃ sabbaparicchannā nāma seyyā. Chadanaṃ anāhacca sabbantimena pariyāyena diyaḍḍhahatthubbedhena pākārādinā parikkhittāpi sabbaparicchannāyevāti kurundaṭṭhakathāyaṃ vuttaṃ. Yassā pana upari bahutaraṃ ṭhānaṃ channaṃ, appaṃ acchannaṃ, samantato vā bahutaraṃ parikkhittaṃ, appaṃ aparikkhittaṃ, ayaṃ yebhuyyena channā yebhuyyena paricchannā nāma. Iminā hi lakkhaṇena samannāgato sacepi sattabhūmako pāsādo ekūpacāro hoti, satagabbhaṃ vā catussālaṃ vā, ekaseyyāicceva saṅkhyaṃ gacchati. Taṃ sandhāya vuttaṃ ‘‘catutthe divase atthaṅgate sūriye anupasampanne nipanne bhikkhu nipajjati, āpatti pācittiyassā’’tiādi.
ਤਤ੍ਥ ਚ ਨਿਪਜ੍ਜਨਮਤ੍ਤੇਨੇવ ਪਾਚਿਤ੍ਤਿਯਂ। ਸਚੇ ਪਨ ਸਮ੍ਬਹੁਲਾ ਸਾਮਣੇਰਾ, ਏਕੋ ਭਿਕ੍ਖੁ, ਸਾਮਣੇਰਗਣਨਾਯ ਪਾਚਿਤ੍ਤਿਯਾ। ਤੇ ਚੇ ਉਟ੍ਠਾਯੁਟ੍ਠਾਯ ਨਿਪਜ੍ਜਨ੍ਤਿ, ਤੇਸਂ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਆਪਤ੍ਤਿ। ਭਿਕ੍ਖੁਸ੍ਸ ਉਟ੍ਠਾਯੁਟ੍ਠਾਯ ਨਿਪਜ੍ਜਨੇ ਪਨ ਭਿਕ੍ਖੁਸ੍ਸੇવ ਪਯੋਗੇਨ ਭਿਕ੍ਖੁਸ੍ਸ ਆਪਤ੍ਤਿ। ਸਚੇ ਪਨ ਸਮ੍ਬਹੁਲਾ ਭਿਕ੍ਖੂ ਏਕੋ ਸਾਮਣੇਰੋ ਸਬ੍ਬੇਸਂ ਆਪਤ੍ਤਿਂ ਕਰੋਤਿ, ਤਸ੍ਸ ਉਟ੍ਠਾਯੁਟ੍ਠਾਯ ਨਿਪਜ੍ਜਨੇਨਪਿ ਭਿਕ੍ਖੂਨਂ ਆਪਤ੍ਤਿਯੇવ। ਉਭਯੇਸਂ ਸਮ੍ਬਹੁਲਭਾવੇਪਿ ਏਸੇવ ਨਯੋ।
Tattha ca nipajjanamatteneva pācittiyaṃ. Sace pana sambahulā sāmaṇerā, eko bhikkhu, sāmaṇeragaṇanāya pācittiyā. Te ce uṭṭhāyuṭṭhāya nipajjanti, tesaṃ payoge payoge bhikkhussa āpatti. Bhikkhussa uṭṭhāyuṭṭhāya nipajjane pana bhikkhusseva payogena bhikkhussa āpatti. Sace pana sambahulā bhikkhū eko sāmaṇero sabbesaṃ āpattiṃ karoti, tassa uṭṭhāyuṭṭhāya nipajjanenapi bhikkhūnaṃ āpattiyeva. Ubhayesaṃ sambahulabhāvepi eseva nayo.
ਅਪਿਚੇਤ੍ਥ ਏਕਾવਾਸਾਦਿਕਮ੍ਪਿ ਚਤੁਕ੍ਕਂ વੇਦਿਤਬ੍ਬਂ। ਯੋ ਹਿ ਏਕਸ੍ਮਿਂ ਆવਾਸੇ ਏਕੇਨੇવ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸ ਚਤੁਤ੍ਥਦਿવਸਤੋ ਪਟ੍ਠਾਯ ਦੇવਸਿਕਾ ਆਪਤ੍ਤਿ। ਯੋਪਿ ਏਕਸ੍ਮਿਂਯੇવ ਆવਾਸੇ ਨਾਨਾਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ। ਯੋਪਿ ਨਾਨਾਆવਾਸੇਸੁ ਏਕੇਨੇવ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ। ਯੋਪਿ ਨਾਨਾਆવਾਸੇਸੁ ਨਾਨਾਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਯੋਜਨਸਤਮ੍ਪਿ ਗਨ੍ਤ੍વਾ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ ਚਤੁਤ੍ਥਦਿવਸਤੋ ਪਟ੍ਠਾਯ ਦੇવਸਿਕਾ ਆਪਤ੍ਤਿ।
Apicettha ekāvāsādikampi catukkaṃ veditabbaṃ. Yo hi ekasmiṃ āvāse ekeneva anupasampannena saddhiṃ tirattaṃ sahaseyyaṃ kappeti, tassa catutthadivasato paṭṭhāya devasikā āpatti. Yopi ekasmiṃyeva āvāse nānāanupasampannehi saddhiṃ tirattaṃ sahaseyyaṃ kappeti, tassapi. Yopi nānāāvāsesu ekeneva anupasampannena saddhiṃ tirattaṃ sahaseyyaṃ kappeti, tassapi. Yopi nānāāvāsesu nānāanupasampannehi saddhiṃ yojanasatampi gantvā sahaseyyaṃ kappeti, tassapi catutthadivasato paṭṭhāya devasikā āpatti.
ਅਯਞ੍ਚ ਸਹਸੇਯ੍ਯਾਪਤ੍ਤਿ ਨਾਮ ‘‘ਭਿਕ੍ਖੁਂ ਠਪੇਤ੍વਾ ਅવਸੇਸੋ ਅਨੁਪਸਮ੍ਪਨ੍ਨੋ ਨਾਮਾ’’ਤਿ વਚਨਤੋ ਤਿਰਚ੍ਛਾਨਗਤੇਨਪਿ ਸਦ੍ਧਿਂ ਹੋਤਿ, ਤਤ੍ਰ ਤਿਰਚ੍ਛਾਨਗਤਸ੍ਸ ਪਰਿਚ੍ਛੇਦੋ ਮੇਥੁਨਧਮ੍ਮਾਪਤ੍ਤਿਯਾ વੁਤ੍ਤਨਯੇਨੇવ વੇਦਿਤਬ੍ਬੋ। ਤਸ੍ਮਾ ਸਚੇਪਿ ਗੋਧਾਬਿਲ਼ਾਲਮਙ੍ਗੁਸਾਦੀਸੁ ਕੋਚਿ ਪવਿਸਿਤ੍વਾ ਭਿਕ੍ਖੁਨੋ વਸਨਸੇਨਾਸਨੇ ਏਕੂਪਚਾਰਟ੍ਠਾਨੇ ਸਯਤਿ, ਸਹਸੇਯ੍ਯਾવ ਹੋਤਿ।
Ayañca sahaseyyāpatti nāma ‘‘bhikkhuṃ ṭhapetvā avaseso anupasampanno nāmā’’ti vacanato tiracchānagatenapi saddhiṃ hoti, tatra tiracchānagatassa paricchedo methunadhammāpattiyā vuttanayeneva veditabbo. Tasmā sacepi godhābiḷālamaṅgusādīsu koci pavisitvā bhikkhuno vasanasenāsane ekūpacāraṭṭhāne sayati, sahaseyyāva hoti.
ਯਦਿ ਪਨ ਥਮ੍ਭਾਨਂ ਉਪਰਿ ਕਤਪਾਸਾਦਸ੍ਸ ਉਪਰਿਮਤਲੇਨ ਸਦ੍ਧਿਂ ਅਸਮ੍ਬਦ੍ਧਭਿਤ੍ਤਿਕਸ੍ਸ ਭਿਤ੍ਤਿਯਾ ਉਪਰਿ ਠਿਤਸੁਸਿਰਤੁਲਾਸੀਸਸ੍ਸ ਸੁਸਿਰੇਨ ਪવਿਸਿਤ੍વਾ ਤੁਲਾਯ ਅਬ੍ਭਨ੍ਤਰੇ ਸਯਿਤ੍વਾ ਤੇਨੇવ ਸੁਸਿਰੇਨ ਨਿਕ੍ਖਮਿਤ੍વਾ ਗਚ੍ਛਤਿ , ਹੇਟ੍ਠਾਪਾਸਾਦੇ ਸਯਿਤਭਿਕ੍ਖੁਸ੍ਸ ਅਨਾਪਤ੍ਤਿ। ਸਚੇ ਛਦਨੇ ਛਿਦ੍ਦਂ ਹੋਤਿ, ਤੇਨ ਪવਿਸਿਤ੍વਾ ਅਨ੍ਤੋਛਦਨੇ વਸਿਤ੍વਾ ਤੇਨੇવ ਪਕ੍ਕਮਤਿ, ਨਾਨੂਪਚਾਰੇ ਉਪਰਿਮਤਲੇ ਛਦਨਬ੍ਭਨ੍ਤਰੇ ਸਯਿਤਸ੍ਸ ਆਪਤ੍ਤਿ, ਹੇਟ੍ਠਿਮਤਲੇ ਸਯਿਤਸ੍ਸ ਅਨਾਪਤ੍ਤਿ। ਸਚੇ ਅਨ੍ਤੋਪਾਸਾਦੇਨੇવ ਆਰੋਹਿਤ੍વਾ ਸਬ੍ਬਤਲਾਨਿ ਪਰਿਭੁਞ੍ਜਨ੍ਤਿ, ਏਕੂਪਚਾਰਾਨਿ ਹੋਨ੍ਤਿ, ਤੇਸੁ ਯਤ੍ਥ ਕਤ੍ਥਚਿ ਸਯਿਤਸ੍ਸ ਆਪਤ੍ਤਿ।
Yadi pana thambhānaṃ upari katapāsādassa uparimatalena saddhiṃ asambaddhabhittikassa bhittiyā upari ṭhitasusiratulāsīsassa susirena pavisitvā tulāya abbhantare sayitvā teneva susirena nikkhamitvā gacchati , heṭṭhāpāsāde sayitabhikkhussa anāpatti. Sace chadane chiddaṃ hoti, tena pavisitvā antochadane vasitvā teneva pakkamati, nānūpacāre uparimatale chadanabbhantare sayitassa āpatti, heṭṭhimatale sayitassa anāpatti. Sace antopāsādeneva ārohitvā sabbatalāni paribhuñjanti, ekūpacārāni honti, tesu yattha katthaci sayitassa āpatti.
ਸਭਾਸਙ੍ਖੇਪੇਨ ਕਤੇ ਅਡ੍ਢਕੁਟ੍ਟਕਸੇਨਾਸਨੇ ਸਯਿਤਸ੍ਸ વਾਲ਼ਸਙ੍ਘਾਟਾਦੀਸੁ ਕਪੋਤਾਦਯੋ ਪવਿਸਿਤ੍વਾ ਸਯਨ੍ਤਿ, ਆਪਤ੍ਤਿਯੇવ। ਪਰਿਕ੍ਖੇਪਸ੍ਸ ਬਹਿਗਤੇ ਨਿਬ੍ਬਕੋਸਬ੍ਭਨ੍ਤਰੇ ਸਯਨ੍ਤਿ, ਅਨਾਪਤ੍ਤਿ। ਪਰਿਮਣ੍ਡਲਂ વਾ ਚਤੁਰਸ੍ਸਂ વਾ ਏਕਚ੍ਛਦਨਾਯ ਗਬ੍ਭਮਾਲਾਯ ਸਤਗਬ੍ਭਂ ਚੇਪਿ ਸੇਨਾਸਨਂ ਹੋਤਿ, ਤਤ੍ਰ ਚੇ ਏਕੇਨ ਸਾਧਾਰਣਦ੍વਾਰੇਨ ਪવਿਸਿਤ੍વਾ વਿਸੁਂ ਪਾਕਾਰੇਨ ਅਪਰਿਚ੍ਛਿਨ੍ਨਗਬ੍ਭੂਪਚਾਰੇ ਸਬ੍ਬਗਬ੍ਭੇ ਪવਿਸਨ੍ਤਿ, ਏਕਗਬ੍ਭੇਪਿ ਅਨੁਪਸਮ੍ਪਨ੍ਨੇ ਨਿਪਨ੍ਨੇ ਸਬ੍ਬਗਬ੍ਭੇਸੁ ਨਿਪਨ੍ਨਾਨਂ ਆਪਤ੍ਤਿ। ਸਚੇ ਸਪਮੁਖਾ ਗਬ੍ਭਾ ਹੋਨ੍ਤਿ, ਪਮੁਖਸ੍ਸ ਉਪਰਿ ਅਚ੍ਛਨ੍ਨਂ ਉਚ੍ਚવਤ੍ਥੁਕਂ ਚੇਪਿ ਹੋਤਿ, ਪਮੁਖੇ ਸਯਿਤੋ ਗਬ੍ਭੇ ਸਯਿਤਾਨਂ ਆਪਤ੍ਤਿਂ ਨ ਕਰੋਤਿ। ਸਚੇ ਪਨ ਗਬ੍ਭਚ੍ਛਦਨੇਨੇવ ਸਦ੍ਧਿਂ ਸਮ੍ਬਦ੍ਧਚ੍ਛਦਨਂ ਹੋਤਿ, ਤਤ੍ਰ ਸਯਿਤੋ ਸਬ੍ਬੇਸਂ ਆਪਤ੍ਤਿਂ ਕਰੋਤਿ। ਕਸ੍ਮਾ? ਸਬ੍ਬਚ੍ਛਨ੍ਨਤ੍ਤਾ ਸਬ੍ਬਪਰਿਚ੍ਛਨ੍ਨਤ੍ਤਾ ਚ, ਗਬ੍ਭਪਰਿਕ੍ਖੇਪੋਯੇવ ਹਿਸ੍ਸ ਪਰਿਕ੍ਖੇਪੋਤਿ। ਏਤੇਨੇવ ਹਿ ਨਯੇਨ ਅਟ੍ਠਕਥਾਸੁ ਲੋਹਪਾਸਾਦਪਰਿਕ੍ਖੇਪਸ੍ਸ ਚਤੂਸੁ ਦ੍વਾਰਕੋਟ੍ਠਕੇਸੁ ਆਪਤ੍ਤਿ વੁਤ੍ਤਾ।
Sabhāsaṅkhepena kate aḍḍhakuṭṭakasenāsane sayitassa vāḷasaṅghāṭādīsu kapotādayo pavisitvā sayanti, āpattiyeva. Parikkhepassa bahigate nibbakosabbhantare sayanti, anāpatti. Parimaṇḍalaṃ vā caturassaṃ vā ekacchadanāya gabbhamālāya satagabbhaṃ cepi senāsanaṃ hoti, tatra ce ekena sādhāraṇadvārena pavisitvā visuṃ pākārena aparicchinnagabbhūpacāre sabbagabbhe pavisanti, ekagabbhepi anupasampanne nipanne sabbagabbhesu nipannānaṃ āpatti. Sace sapamukhā gabbhā honti, pamukhassa upari acchannaṃ uccavatthukaṃ cepi hoti, pamukhe sayito gabbhe sayitānaṃ āpattiṃ na karoti. Sace pana gabbhacchadaneneva saddhiṃ sambaddhacchadanaṃ hoti, tatra sayito sabbesaṃ āpattiṃ karoti. Kasmā? Sabbacchannattā sabbaparicchannattā ca, gabbhaparikkhepoyeva hissa parikkhepoti. Eteneva hi nayena aṭṭhakathāsu lohapāsādaparikkhepassa catūsu dvārakoṭṭhakesu āpatti vuttā.
ਯਂ ਪਨ ਅਨ੍ਧਕਟ੍ਠਕਥਾਯਂ ‘‘ਅਪਰਿਕ੍ਖਿਤ੍ਤੇ ਪਮੁਖੇ ਅਨਾਪਤ੍ਤੀਤਿ ਭੂਮਿਯਂ વਿਨਾ ਜਗਤਿਯਾ ਪਮੁਖਂ ਸਨ੍ਧਾਯ ਕਥਿਨ’’ਨ੍ਤਿ વੁਤ੍ਤਂ, ਤਂ ਅਨ੍ਧਕਰਟ੍ਠੇ ਪਾਟੇਕ੍ਕਸਨ੍ਨਿવੇਸਾ ਏਕਚ੍ਛਦਨਾ ਗਬ੍ਭਪਾਲ਼ਿਯੋ ਸਨ੍ਧਾਯ વੁਤ੍ਤਂ। ਯਞ੍ਚ ਤਤ੍ਥ ‘‘ਭੂਮਿਯਂ વਿਨਾ ਜਗਤਿਯਾ’’ਤਿ વੁਤ੍ਤਂ, ਤਂ ਨੇવ ਅਟ੍ਠਕਥਾਸੁ ਅਤ੍ਥਿ; ਨ ਪਾਲ਼ਿਯਾ ਸਮੇਤਿ। ਦਸਹਤ੍ਥੁਬ੍ਬੇਧਾਪਿ ਹਿ ਜਗਤਿ ਪਰਿਕ੍ਖੇਪਸਙ੍ਖ੍ਯਂ ਨ ਗਚ੍ਛਤਿ। ਤਸ੍ਮਾ ਯਮ੍ਪਿ ਤਤ੍ਥ ਦੁਤਿਯਸਿਕ੍ਖਾਪਦੇ ਜਗਤਿਯਾ ਪਮਾਣਂ વਤ੍વਾ ‘‘ਏਤਂ ਏਕੂਪਚਾਰਂ ਪਰਿਚ੍ਛਨ੍ਨਂ ਨਾਮ ਹੋਤੀ’’ਤਿ વੁਤ੍ਤਂ, ਤਂ ਨ ਗਹੇਤਬ੍ਬਂ। ਯੇਪਿ ਏਕਸਾਲਦ੍વਿਸਾਲਤਿਸਾਲਚਤੁਸ੍ਸਾਲਸਨ੍ਨਿવੇਸਾ ਮਹਾਪਾਸਾਦਾ ਏਕਸ੍ਮਿਂ ਓਕਾਸੇ ਪਾਦੇ ਧੋવਿਤ੍વਾ ਪવਿਟ੍ਠੇਨ ਸਕ੍ਕਾ ਹੋਨ੍ਤਿ ਸਬ੍ਬਤ੍ਥ ਅਨੁਪਰਿਗਨ੍ਤੁਂ , ਤੇਸੁਪਿ ਸਹਸੇਯ੍ਯਾਪਤ੍ਤਿਯਾ ਨ ਮੁਚ੍ਚਤਿ। ਸਚੇ ਤਸ੍ਮਿਂ ਤਸ੍ਮਿਂ ਠਾਨੇ ਉਪਚਾਰਂ ਪਰਿਚ੍ਛਿਨ੍ਦਿਤ੍વਾ ਕਤਾ ਹੋਨ੍ਤਿ, ਏਕੂਪਚਾਰਟ੍ਠਾਨੇਯੇવ ਆਪਤ੍ਤਿ।
Yaṃ pana andhakaṭṭhakathāyaṃ ‘‘aparikkhitte pamukhe anāpattīti bhūmiyaṃ vinā jagatiyā pamukhaṃ sandhāya kathina’’nti vuttaṃ, taṃ andhakaraṭṭhe pāṭekkasannivesā ekacchadanā gabbhapāḷiyo sandhāya vuttaṃ. Yañca tattha ‘‘bhūmiyaṃ vinā jagatiyā’’ti vuttaṃ, taṃ neva aṭṭhakathāsu atthi; na pāḷiyā sameti. Dasahatthubbedhāpi hi jagati parikkhepasaṅkhyaṃ na gacchati. Tasmā yampi tattha dutiyasikkhāpade jagatiyā pamāṇaṃ vatvā ‘‘etaṃ ekūpacāraṃ paricchannaṃ nāma hotī’’ti vuttaṃ, taṃ na gahetabbaṃ. Yepi ekasāladvisālatisālacatussālasannivesā mahāpāsādā ekasmiṃ okāse pāde dhovitvā paviṭṭhena sakkā honti sabbattha anuparigantuṃ , tesupi sahaseyyāpattiyā na muccati. Sace tasmiṃ tasmiṃ ṭhāne upacāraṃ paricchinditvā katā honti, ekūpacāraṭṭhāneyeva āpatti.
ਦ੍વੀਹਿ ਦ੍વਾਰੇਹਿ ਯੁਤ੍ਤਸ੍ਸ ਸੁਧਾਛਦਨਮਣ੍ਡਪਸ੍ਸ ਮਜ੍ਝੇ ਪਾਕਾਰਂ ਕਰੋਨ੍ਤਿ, ਏਕੇਨ ਦ੍વਾਰੇਨ ਪવਿਸਿਤ੍વਾ ਏਕਸ੍ਮਿਂ ਪਰਿਚ੍ਛੇਦੇ ਅਨੁਪਸਮ੍ਪਨ੍ਨੋ ਸਯਤਿ, ਏਕਸ੍ਮਿਂ ਭਿਕ੍ਖੁ, ਅਨਾਪਤ੍ਤਿ। ਪਾਕਾਰੇ ਗੋਧਾਦੀਨਂ ਪવਿਸਨਮਤ੍ਤਮ੍ਪਿ ਛਿਦ੍ਦਂ ਹੋਤਿ, ਏਕਸ੍ਮਿਞ੍ਚ ਪਰਿਚ੍ਛੇਦੇ ਗੋਧਾ ਸਯਨ੍ਤਿ, ਅਨਾਪਤ੍ਤਿਯੇવ। ਨ ਹਿ ਛਿਦ੍ਦੇਨ ਗੇਹਂ ਏਕੂਪਚਾਰਂ ਨਾਮ ਹੋਤਿ। ਸਚੇ ਪਾਕਾਰਮਜ੍ਝੇ ਛਿਨ੍ਦਿਤ੍વਾ ਦ੍વਾਰਂ ਯੋਜੇਨ੍ਤਿ, ਏਕੂਪਚਾਰਤਾਯ ਆਪਤ੍ਤਿ। ਤਂ ਦ੍વਾਰਂ ਕવਾਟੇਨ ਪਿਦਹਿਤ੍વਾ ਸਯਨ੍ਤਿ, ਆਪਤ੍ਤਿਯੇવ। ਨ ਹਿ ਦ੍વਾਰਪਿਦਹਨੇਨ ਗੇਹਂ ਨਾਨੂਪਚਾਰਂ ਨਾਮ ਹੋਤਿ, ਦ੍વਾਰਂ વਾ ਅਦ੍વਾਰਂ। ਕવਾਟਞ੍ਹਿ ਸਂવਰਣવਿવਰਣੇਹਿ ਯਥਾਸੁਖਂ વਲ਼ਞ੍ਜਨਤ੍ਥਾਯ ਕਤਂ, ਨ વਲ਼ਞ੍ਜਨੂਪਚ੍ਛੇਦਨਤ੍ਥਾਯ। ਸਚੇ ਪਨ ਤਂ ਦ੍વਾਰਂ ਪੁਨ ਇਟ੍ਠਕਾਹਿ ਪਿਦਹਨ੍ਤਿ, ਅਦ੍વਾਰਂ ਹੋਤਿ, ਪੁਰਿਮੇ ਨਾਨੂਪਚਾਰਭਾવੇਯੇવ ਤਿਟ੍ਠਤਿ। ਦੀਘਪਮੁਖਂ ਚੇਤਿਯਘਰਂ ਹੋਤਿ। ਏਕਂ ਕવਾਟਂ ਅਨ੍ਤੋ, ਏਕਂ ਬਹਿ, ਦ੍વਿਨ੍ਨਂ ਕવਾਟਾਨਂ ਅਨ੍ਤਰੇ ਅਨੁਪਸਮ੍ਪਨ੍ਨੋ ਅਨ੍ਤੋਚੇਤਿਯਘਰੇ ਸਯਨ੍ਤਸ੍ਸ ਆਪਤ੍ਤਿਂ ਕਰੋਤਿ, ਏਕੂਪਚਾਰਤ੍ਤਾ।
Dvīhi dvārehi yuttassa sudhāchadanamaṇḍapassa majjhe pākāraṃ karonti, ekena dvārena pavisitvā ekasmiṃ paricchede anupasampanno sayati, ekasmiṃ bhikkhu, anāpatti. Pākāre godhādīnaṃ pavisanamattampi chiddaṃ hoti, ekasmiñca paricchede godhā sayanti, anāpattiyeva. Na hi chiddena gehaṃ ekūpacāraṃ nāma hoti. Sace pākāramajjhe chinditvā dvāraṃ yojenti, ekūpacāratāya āpatti. Taṃ dvāraṃ kavāṭena pidahitvā sayanti, āpattiyeva. Na hi dvārapidahanena gehaṃ nānūpacāraṃ nāma hoti, dvāraṃ vā advāraṃ. Kavāṭañhi saṃvaraṇavivaraṇehi yathāsukhaṃ vaḷañjanatthāya kataṃ, na vaḷañjanūpacchedanatthāya. Sace pana taṃ dvāraṃ puna iṭṭhakāhi pidahanti, advāraṃ hoti, purime nānūpacārabhāveyeva tiṭṭhati. Dīghapamukhaṃ cetiyagharaṃ hoti. Ekaṃ kavāṭaṃ anto, ekaṃ bahi, dvinnaṃ kavāṭānaṃ antare anupasampanno antocetiyaghare sayantassa āpattiṃ karoti, ekūpacārattā.
ਤਤ੍ਰ ਯਸ੍ਸ ‘‘ਸਿਯਾ ਅਯਂ ਏਕੂਪਚਾਰਨਾਨੂਪਚਾਰਤਾ ਨਾਮ ਉਦੋਸਿਤਸਿਕ੍ਖਾਪਦੇ વੁਤ੍ਤਾ, ਇਧ ਪਨ ‘ਸੇਯ੍ਯਾ ਨਾਮ ਸਬ੍ਬਚ੍ਛਨ੍ਨਾ ਸਬ੍ਬਪਰਿਚ੍ਛਨ੍ਨਾ ਯੇਭੁਯ੍ਯੇਨ ਛਨ੍ਨਾ ਯੇਭੁਯ੍ਯੇਨ ਪਰਿਚ੍ਛਨ੍ਨਾ’ਤਿ ਏਤ੍ਤਕਮੇવ વੁਤ੍ਤਂ, ਪਿਹਿਤਦ੍વਾਰੋ ਚ ਗਬ੍ਭੋ ਸਬ੍ਬਪਰਿਚ੍ਛਨ੍ਨੋવ ਹੋਤਿ। ਤਸ੍ਮਾ ਤਤ੍ਥ ਅਨ੍ਤੋ ਸਯਿਤੇਨੇવ ਸਦ੍ਧਿਂ ਆਪਤ੍ਤਿ, ਬਹਿ ਸਯਿਤੇਨ ਅਨਾਪਤ੍ਤੀ’’ਤਿ। ਸੋ ਏવਂ વਤ੍ਤਬ੍ਬੋ – ‘‘ਅਪਿਹਿਤਦ੍વਾਰੇ ਪਨ ਕਸ੍ਮਾ ਬਹਿ ਸਯਿਤੇਨ ਆਪਤ੍ਤੀ’’ਤਿ? ਪਮੁਖਸ੍ਸ ਗਬ੍ਭੇਨ ਸਦ੍ਧਿਂ ਸਬ੍ਬਚ੍ਛਨ੍ਨਤ੍ਤਾ। ‘‘ਕਿਂ ਪਨ ਗਬ੍ਭੇ ਪਿਹਿਤੇ ਛਦਨਂ વਿਦ੍ਧਸ੍ਤਂ ਹੋਤੀ’’ਤਿ? ਨ વਿਦ੍ਧਸ੍ਤਂ, ਗਬ੍ਭੇਨ ਸਦ੍ਧਿਂ ਪਮੁਖਸ੍ਸ ਸਬ੍ਬਪਰਿਚ੍ਛਨ੍ਨਤਾ ਨ ਹੋਤਿ। ‘‘ਕਿਂ ਪਰਿਕ੍ਖੇਪੋ વਿਦ੍ਧਸ੍ਤੋ’’ਤਿ? ਅਦ੍ਧਾ વਕ੍ਖਤਿ ‘‘ਨ વਿਦ੍ਧਸ੍ਤੋ, ਕવਾਟੇਨ ਉਪਚਾਰੋ ਪਰਿਚ੍ਛਨ੍ਨੋ’’ਤਿ। ਏવਂ ਦੂਰਮ੍ਪਿ ਗਨ੍ਤ੍વਾ ਪੁਨ ਏਕੂਪਚਾਰਨਾਨੂਪਚਾਰਤਂਯੇવ ਪਚ੍ਚਾਗਮਿਸ੍ਸਤਿ।
Tatra yassa ‘‘siyā ayaṃ ekūpacāranānūpacāratā nāma udositasikkhāpade vuttā, idha pana ‘seyyā nāma sabbacchannā sabbaparicchannā yebhuyyena channā yebhuyyena paricchannā’ti ettakameva vuttaṃ, pihitadvāro ca gabbho sabbaparicchannova hoti. Tasmā tattha anto sayiteneva saddhiṃ āpatti, bahi sayitena anāpattī’’ti. So evaṃ vattabbo – ‘‘apihitadvāre pana kasmā bahi sayitena āpattī’’ti? Pamukhassa gabbhena saddhiṃ sabbacchannattā. ‘‘Kiṃ pana gabbhe pihite chadanaṃ viddhastaṃ hotī’’ti? Na viddhastaṃ, gabbhena saddhiṃ pamukhassa sabbaparicchannatā na hoti. ‘‘Kiṃ parikkhepo viddhasto’’ti? Addhā vakkhati ‘‘na viddhasto, kavāṭena upacāro paricchanno’’ti. Evaṃ dūrampi gantvā puna ekūpacāranānūpacārataṃyeva paccāgamissati.
ਅਪਿਚ ਯਦਿ ਬ੍ਯਞ੍ਜਨਮਤ੍ਤੇਯੇવ ਅਤ੍ਥੋ ਸੁવਿਞ੍ਞੇਯ੍ਯੋ ਸਿਯਾ, ਸਬ੍ਬਚ੍ਛਨ੍ਨਾਤਿ વਚਨਤੋ ਪਞ੍ਚਨ੍ਨਂ ਅਞ੍ਞਤਰੇਨ ਛਦਨੇਨ ਛਨ੍ਨਾ ਏવ ਸੇਯ੍ਯਾ ਸਿਯਾ, ਨ ਅਞ੍ਞੇਨ। ਏવਞ੍ਚ ਸਤਿ ਪਦਰਚ੍ਛਨ੍ਨਾਦੀਸੁ ਅਨਾਪਤ੍ਤਿ ਸਿਯਾ। ਤਤੋ ਯਦਤ੍ਥਂ ਸਿਕ੍ਖਾਪਦਂ ਪਞ੍ਞਤ੍ਤਂ, ਸ੍વੇવ ਅਤ੍ਥੋ ਪਰਿਹਾਯੇਯ੍ਯ । ਪਰਿਹਾਯਤੁ વਾ ਮਾ વਾ, ਕਥਂ ਅવੁਤ੍ਤਂ ਗਹੇਤਬ੍ਬਨ੍ਤਿ; ਕੋ વਾ વਦਤਿ ‘‘ਅવੁਤ੍ਤਂ ਗਹੇਤਬ੍ਬ’’ਨ੍ਤਿ? વੁਤ੍ਤਞ੍ਹੇਤਂ ਅਨਿਯਤੇਸੁ – ‘‘ਪਟਿਚ੍ਛਨ੍ਨਂ ਨਾਮ ਆਸਨਂ ਕੁਟ੍ਟੇਨ વਾ ਕવਾਟੇਨ વਾ ਕਿਲਞ੍ਜੇਨ વਾ ਸਾਣਿਪਾਕਾਰੇਨ વਾ ਰੁਕ੍ਖੇਨ વਾ ਥਮ੍ਭੇਨ વਾ ਕੋਟ੍ਠਲਿਕਾਯ વਾ ਯੇਨ ਕੇਨਚਿ ਪਟਿਚ੍ਛਨ੍ਨਂ ਹੋਤੀ’’ਤਿ। ਤਸ੍ਮਾ ਯਥਾ ਤਤ੍ਥ ਯੇਨ ਕੇਨਚਿ ਪਟਿਚ੍ਛਨ੍ਨਂ ਪਟਿਚ੍ਛਨ੍ਨਮੇવ, ਏવਮਿਧਾਪਿ ਗਹੇਤਬ੍ਬਂ। ਤਸ੍ਮਾ ਸੇਨਾਸਨਂ ਖੁਦ੍ਦਕਂ વਾ ਹੋਤੁ ਮਹਨ੍ਤਂ વਾ ਅਞ੍ਞੇਨ ਸਦ੍ਧਿਂ ਸਮ੍ਬਦ੍ਧਂ વਾ ਅਸਮ੍ਬਦ੍ਧਂ વਾ ਦੀਘਂ વਾ વਟ੍ਟਂ વਾ ਚਤੁਰਸ੍ਸਂ વਾ ਏਕਭੂਮਕਂ વਾ, ਅਨੇਕਭੂਮਕਂ વਾ, ਯਂ ਯਂ ਏਕੂਪਚਾਰਂ ਸਬ੍ਬਤ੍ਥ ਯੇਨ ਕੇਨਚਿ ਪਟਿਚ੍ਛਾਦਨੇਨ ਸਬ੍ਬਚ੍ਛਨ੍ਨੇ ਸਬ੍ਬਪਰਿਚ੍ਛਨ੍ਨੇ ਯੇਭੁਯ੍ਯੇਨ વਾ ਛਨ੍ਨੇ ਯੇਭੁਯ੍ਯੇਨ વਾ ਪਰਿਚ੍ਛਨ੍ਨੇ ਸਹਸੇਯ੍ਯਾਪਤ੍ਤਿ ਹੋਤੀਤਿ।
Apica yadi byañjanamatteyeva attho suviññeyyo siyā, sabbacchannāti vacanato pañcannaṃ aññatarena chadanena channā eva seyyā siyā, na aññena. Evañca sati padaracchannādīsu anāpatti siyā. Tato yadatthaṃ sikkhāpadaṃ paññattaṃ, sveva attho parihāyeyya . Parihāyatu vā mā vā, kathaṃ avuttaṃ gahetabbanti; ko vā vadati ‘‘avuttaṃ gahetabba’’nti? Vuttañhetaṃ aniyatesu – ‘‘paṭicchannaṃ nāma āsanaṃ kuṭṭena vā kavāṭena vā kilañjena vā sāṇipākārena vā rukkhena vā thambhena vā koṭṭhalikāya vā yena kenaci paṭicchannaṃ hotī’’ti. Tasmā yathā tattha yena kenaci paṭicchannaṃ paṭicchannameva, evamidhāpi gahetabbaṃ. Tasmā senāsanaṃ khuddakaṃ vā hotu mahantaṃ vā aññena saddhiṃ sambaddhaṃ vā asambaddhaṃ vā dīghaṃ vā vaṭṭaṃ vā caturassaṃ vā ekabhūmakaṃ vā, anekabhūmakaṃ vā, yaṃ yaṃ ekūpacāraṃ sabbattha yena kenaci paṭicchādanena sabbacchanne sabbaparicchanne yebhuyyena vā channe yebhuyyena vā paricchanne sahaseyyāpatti hotīti.
੫੩. ਉਪਡ੍ਢਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਆਪਤ੍ਤਿ ਦੁਕ੍ਕਟਸ੍ਸਾਤਿ ਏਤ੍ਥ ਸਬ੍ਬਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇਤਿ ਏવਮਾਦੀਸੁਪਿ ਮਹਾਪਚ੍ਚਰਿਯਂ ਦੁਕ੍ਕਟਮੇવਾਤਿ વੁਤ੍ਤਂ। ਮਹਾਅਟ੍ਠਕਥਾਯਂ ਪਨ ‘‘ਸਬ੍ਬਚ੍ਛਨ੍ਨੇ ਯੇਭੁਯ੍ਯੇਨਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਪਰਿਚ੍ਛਨ੍ਨੇ ਯੇਭੁਯ੍ਯੇਨਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਪਰਿਛਨ੍ਨੇ ਉਪਡ੍ਢਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਪਰਿਚ੍ਛਨ੍ਨੇ ਉਪਡ੍ਢਚ੍ਛਨ੍ਨੇ ਪਾਚਿਤ੍ਤਿਯਂ, ਪਾਲ਼ਿਯਂ વੁਤ੍ਤਪਾਚਿਤ੍ਤਿਯੇਨ ਸਦ੍ਧਿਂ ਸਤ੍ਤ ਪਾਚਿਤ੍ਤਿਯਾਨੀ’’ਤਿ વੁਤ੍ਤਂ। ‘‘ਸਬ੍ਬਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਦੁਕ੍ਕਟਂ, ਯੇਭੁਯ੍ਯੇਨਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਦੁਕ੍ਕਟਂ, ਸਬ੍ਬਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਦੁਕ੍ਕਟਂ, ਯੇਭੁਯ੍ਯੇਨਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਦੁਕ੍ਕਟਂ, ਪਾਲ਼ਿਯਂ ਦੁਕ੍ਕਟੇਨ ਸਹ ਪਞ੍ਚ ਦੁਕ੍ਕਟਾਨੀ’’ਤਿ વੁਤ੍ਤਂ।
53.Upaḍḍhacchanne upaḍḍhaparicchanne āpatti dukkaṭassāti ettha sabbacchanne upaḍḍhaparicchanneti evamādīsupi mahāpaccariyaṃ dukkaṭamevāti vuttaṃ. Mahāaṭṭhakathāyaṃ pana ‘‘sabbacchanne yebhuyyenaparicchanne pācittiyaṃ, sabbacchanne upaḍḍhaparicchanne pācittiyaṃ, yebhuyyenachanne upaḍḍhaparicchanne pācittiyaṃ, sabbaparicchanne yebhuyyenachanne pācittiyaṃ, sabbaparichanne upaḍḍhacchanne pācittiyaṃ, yebhuyyenaparicchanne upaḍḍhacchanne pācittiyaṃ, pāḷiyaṃ vuttapācittiyena saddhiṃ satta pācittiyānī’’ti vuttaṃ. ‘‘Sabbacchanne cūḷakaparicchanne dukkaṭaṃ, yebhuyyenachanne cūḷakaparicchanne dukkaṭaṃ, sabbaparicchanne cūḷakacchanne dukkaṭaṃ, yebhuyyenaparicchanne cūḷakacchanne dukkaṭaṃ, pāḷiyaṃ dukkaṭena saha pañca dukkaṭānī’’ti vuttaṃ.
‘‘ਉਪਡ੍ਢਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਅਨਾਪਤ੍ਤਿ, ਉਪਡ੍ਢਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਅਨਾਪਤ੍ਤਿ, ਚੂਲ਼ਕਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਅਨਾਪਤ੍ਤਿ, ਸਬ੍ਬਚ੍ਛਨ੍ਨੇ ਸਬ੍ਬਅਪਰਿਚ੍ਛਨ੍ਨੇਤਿ ਚ ਏਤ੍ਥ ਸੇਨਮ੍ਬਮਣ੍ਡਪવਣ੍ਣਂ ਹੋਤੀ’’ਤਿ વੁਤ੍ਤਂ। ਇਮਿਨਾਪੇਤਂ વੇਦਿਤਬ੍ਬਂ – ‘‘ਯਥਾ ਜਗਤਿ ਪਰਿਕ੍ਖੇਪਸਙ੍ਖਯ ਨ ਗਚ੍ਛਤੀ’’ਤਿ। ਸੇਸਂ ਉਤ੍ਤਾਨਤ੍ਥਮੇવ।
‘‘Upaḍḍhacchanne cūḷakaparicchanne anāpatti, upaḍḍhaparicchanne cūḷakacchanne anāpatti, cūḷakacchanne cūḷakaparicchanne anāpatti, sabbacchanne sabbaaparicchanneti ca ettha senambamaṇḍapavaṇṇaṃ hotī’’ti vuttaṃ. Imināpetaṃ veditabbaṃ – ‘‘yathā jagati parikkhepasaṅkhaya na gacchatī’’ti. Sesaṃ uttānatthameva.
ਏਲ਼ਕਲੋਮਸਮੁਟ੍ਠਾਨਂ – ਕਾਯਤੋ ਚ ਕਾਯਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਨੋਸਞ੍ਞਾવਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿવਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿવੇਦਨਨ੍ਤਿ।
Eḷakalomasamuṭṭhānaṃ – kāyato ca kāyacittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
ਸਹਸੇਯ੍ਯਸਿਕ੍ਖਾਪਦਂ ਪਞ੍ਚਮਂ।
Sahaseyyasikkhāpadaṃ pañcamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / વਿਨਯਪਿਟਕ • Vinayapiṭaka / ਮਹਾવਿਭਙ੍ਗ • Mahāvibhaṅga / ੧. ਮੁਸਾવਾਦવਗ੍ਗੋ • 1. Musāvādavaggo
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ੫. ਸਹਸੇਯ੍ਯਸਿਕ੍ਖਾਪਦવਣ੍ਣਨਾ • 5. Sahaseyyasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਜਿਰਬੁਦ੍ਧਿ-ਟੀਕਾ • Vajirabuddhi-ṭīkā / ੫. ਪਠਮਸਹਸੇਯ੍ਯਸਿਕ੍ਖਾਪਦવਣ੍ਣਨਾ • 5. Paṭhamasahaseyyasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ੫. ਸਹਸੇਯ੍ਯਸਿਕ੍ਖਾਪਦવਣ੍ਣਨਾ • 5. Sahaseyyasikkhāpadavaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੫. ਸਹਸੇਯ੍ਯਸਿਕ੍ਖਾਪਦਂ • 5. Sahaseyyasikkhāpadaṃ
