| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
16. ஸஹஸெய்யவினிச்ச²யகதா²
16. Sahaseyyavinicchayakathā
79. து³வித⁴ங் ஸஹஸெய்யகந்தி ‘‘யோ பன பி⁴க்கு² அனுபஸம்பன்னேன உத்தரிதி³ரத்ததிரத்தங் ஸஹஸெய்யங் கப்பெய்ய, பாசித்தியங் (பாசி॰ 49). யோ பன பி⁴க்கு² மாதுகா³மேன ஸஹஸெய்யங் கப்பெய்ய, பாசித்திய’’ந்தி (பாசி॰ 56) ஏவங் வுத்தங் ஸஹஸெய்யஸிக்கா²பத³த்³வயங் ஸந்தா⁴ய வுத்தங். தத்ராயங் வினிச்ச²யோ (பாசி॰ அட்ட²॰ 50-51) – அனுபஸம்பன்னேன ஸத்³தி⁴ங் திண்ணங் ரத்தீனங் உபரி சதுத்த²தி³வஸே அத்த²ங்க³தே ஸூரியே ஸப்³ப³ச்ச²ன்னஸப்³ப³பரிச்ச²ன்னே யேபு⁴ய்யச்ச²ன்னயேபு⁴ய்யபரிச்ச²ன்னே வா ஸேனாஸனே புப்³பா³பரியேன வா ஏகக்க²ணே வா நிபஜ்ஜந்தஸ்ஸ பாசித்தியங். தத்த² ச²த³னங் அனாஹச்ச தி³யட்³ட⁴ஹத்து²ப்³பே³தே⁴ன பாகாராதி³னா யேன கேனசி பரிச்ச²ன்னம்பி ஸப்³ப³பரிச்ச²ன்னமிச்சேவ வேதி³தப்³ப³ங். யங் ஸேனாஸனங் உபரி பஞ்சஹி ச²த³னேஹி அஞ்ஞேன வா கேனசி ஸப்³ப³மேவ பரிச்ச²ன்னங், இத³ங் ஸப்³ப³ச்ச²ன்னங் நாம ஸேனாஸனங். அட்ட²கதா²ஸு பன பாகடவோஹாரங் க³ஹெத்வா வாசுக்³க³தவஸேன ‘‘ஸப்³ப³ச்ச²ன்னங் நாம பஞ்சஹி ச²த³னேஹி ச²ன்ன’’ந்தி வுத்தங். கிஞ்சாபி வுத்தங், அத² கோ² து³ஸ்ஸகுடியங் ஸயந்தஸ்ஸபி ந ஸக்கா அனாபத்தி காதுங், தஸ்மா யங் கிஞ்சி படிச்சா²த³னஸமத்த²ங் இத⁴ ச²த³னஞ்ச பரிச்ச²ன்னஞ்ச வேதி³தப்³ப³ங். பஞ்சவித⁴ச்ச²த³னேயேவ ஹி க³ய்ஹமானே பத³ரச்ச²ன்னேபி ஸஹஸெய்யா ந ப⁴வெய்ய, தஸ்மா யங் ஸேனாஸனங் பூ⁴மிதோ பட்டா²ய யாவச²த³னங் ஆஹச்ச பாகாரேன வா அஞ்ஞேன வா கேனசி அந்தமஸோ வத்தே²னபி பரிக்கி²த்தங், இத³ங் ஸப்³ப³பரிச்ச²ன்னங் நாம ஸேனாஸனங். ச²த³னங் அனாஹச்ச ஸப்³ப³ந்திமேன பரியாயேன தி³யட்³ட⁴ஹத்து²ப்³பே³தே⁴ன பாகாராதி³னா பரிக்கி²த்தம்பி ஸப்³ப³பரிச்ச²ன்னமேவ. யஸ்ஸ பன உபரி ப³ஹுதரங் டா²னங் ச²ன்னங், அப்பங் அச்ச²ன்னங், ஸமந்ததோ வா ப³ஹுதரங் பரிக்கி²த்தங், அப்பங் அபரிக்கி²த்தங், இத³ங் யேபு⁴ய்யேனச²ன்னங் யேபு⁴ய்யேனபரிச்ச²ன்னங் நாம.
79. Duvidhaṃ sahaseyyakanti ‘‘yo pana bhikkhu anupasampannena uttaridirattatirattaṃ sahaseyyaṃ kappeyya, pācittiyaṃ (pāci. 49). Yo pana bhikkhu mātugāmena sahaseyyaṃ kappeyya, pācittiya’’nti (pāci. 56) evaṃ vuttaṃ sahaseyyasikkhāpadadvayaṃ sandhāya vuttaṃ. Tatrāyaṃ vinicchayo (pāci. aṭṭha. 50-51) – anupasampannena saddhiṃ tiṇṇaṃ rattīnaṃ upari catutthadivase atthaṅgate sūriye sabbacchannasabbaparicchanne yebhuyyacchannayebhuyyaparicchanne vā senāsane pubbāpariyena vā ekakkhaṇe vā nipajjantassa pācittiyaṃ. Tattha chadanaṃ anāhacca diyaḍḍhahatthubbedhena pākārādinā yena kenaci paricchannampi sabbaparicchannamicceva veditabbaṃ. Yaṃ senāsanaṃ upari pañcahi chadanehi aññena vā kenaci sabbameva paricchannaṃ, idaṃ sabbacchannaṃ nāma senāsanaṃ. Aṭṭhakathāsu pana pākaṭavohāraṃ gahetvā vācuggatavasena ‘‘sabbacchannaṃ nāma pañcahi chadanehi channa’’nti vuttaṃ. Kiñcāpi vuttaṃ, atha kho dussakuṭiyaṃ sayantassapi na sakkā anāpatti kātuṃ, tasmā yaṃ kiñci paṭicchādanasamatthaṃ idha chadanañca paricchannañca veditabbaṃ. Pañcavidhacchadaneyeva hi gayhamāne padaracchannepi sahaseyyā na bhaveyya, tasmā yaṃ senāsanaṃ bhūmito paṭṭhāya yāvachadanaṃ āhacca pākārena vā aññena vā kenaci antamaso vatthenapi parikkhittaṃ, idaṃ sabbaparicchannaṃ nāma senāsanaṃ. Chadanaṃ anāhacca sabbantimena pariyāyena diyaḍḍhahatthubbedhena pākārādinā parikkhittampi sabbaparicchannameva. Yassa pana upari bahutaraṃ ṭhānaṃ channaṃ, appaṃ acchannaṃ, samantato vā bahutaraṃ parikkhittaṃ, appaṃ aparikkhittaṃ, idaṃ yebhuyyenachannaṃ yebhuyyenaparicchannaṃ nāma.
இமினா லக்க²ணேன ஸமன்னாக³தோ ஸசேபி ஸத்தபூ⁴மிகோ பாஸாதோ³ ஏகூபசாரோ ஹோதி, ஸதக³ப்³ப⁴ங் வா சதுஸாலங், ஏகங் ஸேனாஸனமிச்சேவ ஸங்க²ங் க³ச்ச²தி. ஏவரூபே ஸேனாஸனே அனுபஸம்பன்னேன ஸத்³தி⁴ங் சதுத்த²தி³வஸே அத்த²ங்க³தே ஸூரியே நிபஜ்ஜந்தஸ்ஸ பாசித்தியங் வுத்தங். ஸசே பன ஸம்ப³ஹுலா ஸாமணேரா, ஏகோ பி⁴க்கு², ஸாமணேரக³ணனாய பாசித்தியா. தே சே உட்டா²யுட்டா²ய நிபஜ்ஜந்தி, தேஸங் பயோகே³ பயோகே³ பி⁴க்கு²ஸ்ஸ ஆபத்தி, பி⁴க்கு²ஸ்ஸ உட்டா²யுட்டா²ய நிபஜ்ஜனே பன பி⁴க்கு²ஸ்ஸேவ பயோகே³ன பி⁴க்கு²ஸ்ஸ ஆபத்தி. ஸசே ஸம்ப³ஹுலா பி⁴க்கூ², ஏகோ ஸாமணேரோ, ஏகோபி ஸப்³பே³ஸங் ஆபத்திங் கரோதி. தஸ்ஸ உட்டா²யுட்டா²ய நிபஜ்ஜனேனபி பி⁴க்கூ²னங் ஆபத்தியேவ. உப⁴யேஸங் ஸம்ப³ஹுலபா⁴வேபி ஏஸேவ நயோ.
Iminā lakkhaṇena samannāgato sacepi sattabhūmiko pāsādo ekūpacāro hoti, satagabbhaṃ vā catusālaṃ, ekaṃ senāsanamicceva saṅkhaṃ gacchati. Evarūpe senāsane anupasampannena saddhiṃ catutthadivase atthaṅgate sūriye nipajjantassa pācittiyaṃ vuttaṃ. Sace pana sambahulā sāmaṇerā, eko bhikkhu, sāmaṇeragaṇanāya pācittiyā. Te ce uṭṭhāyuṭṭhāya nipajjanti, tesaṃ payoge payoge bhikkhussa āpatti, bhikkhussa uṭṭhāyuṭṭhāya nipajjane pana bhikkhusseva payogena bhikkhussa āpatti. Sace sambahulā bhikkhū, eko sāmaṇero, ekopi sabbesaṃ āpattiṃ karoti. Tassa uṭṭhāyuṭṭhāya nipajjanenapi bhikkhūnaṃ āpattiyeva. Ubhayesaṃ sambahulabhāvepi eseva nayo.
80. அபிசெத்த² ஏகாவாஸாதி³கம்பி சதுக்கங் வேதி³தப்³ப³ங். யோ ஹி ஏகஸ்மிங் ஆவாஸே ஏகேனேவ அனுபஸம்பன்னேன ஸத்³தி⁴ங் திரத்தங் ஸஹஸெய்யங் கப்பேதி, தஸ்ஸ சதுத்த²தி³வஸதோ பட்டா²ய தே³வஸிகா ஆபத்தி. யோபி ஏகஸ்மிங்யேவ ஆவாஸே நானாஅனுபஸம்பன்னேஹி ஸத்³தி⁴ங் திரத்தங் ஸஹஸெய்யங் கப்பேதி, தஸ்ஸபி. யோபி நானாஆவாஸேஸு ஏகேனேவ அனுபஸம்பன்னேன ஸத்³தி⁴ங் திரத்தங் ஸஹஸெய்யங் கப்பேதி, தஸ்ஸபி. யோபி நானாஆவாஸேஸு நானாஅனுபஸம்பன்னேஹி ஸத்³தி⁴ங் யோஜனஸதம்பி க³ந்த்வா ஸஹஸெய்யங் கப்பேதி, தஸ்ஸபி சதுத்த²தி³வஸதோ பட்டா²ய தே³வஸிகா ஆபத்தி.
80. Apicettha ekāvāsādikampi catukkaṃ veditabbaṃ. Yo hi ekasmiṃ āvāse ekeneva anupasampannena saddhiṃ tirattaṃ sahaseyyaṃ kappeti, tassa catutthadivasato paṭṭhāya devasikā āpatti. Yopi ekasmiṃyeva āvāse nānāanupasampannehi saddhiṃ tirattaṃ sahaseyyaṃ kappeti, tassapi. Yopi nānāāvāsesu ekeneva anupasampannena saddhiṃ tirattaṃ sahaseyyaṃ kappeti, tassapi. Yopi nānāāvāsesu nānāanupasampannehi saddhiṃ yojanasatampi gantvā sahaseyyaṃ kappeti, tassapi catutthadivasato paṭṭhāya devasikā āpatti.
அயஞ்ச ஸஹஸெய்யாபத்தி நாம ‘‘பி⁴க்கு²ங் ட²பெத்வா அவஸேஸோ அனுபஸம்பன்னோ நாமா’’தி வசனதோ அந்தமஸோ பாராஜிகவத்து²பூ⁴தேன திரச்சா²னக³தேனபி ஸத்³தி⁴ங் ஹோதி, தஸ்மா ஸசேபி கோ³தா⁴பி³ளாலமங்கு³ஸாதீ³ஸு கோசி பவிஸித்வா பி⁴க்கு²னோ வஸனஸேனாஸனே ஏகூபசாரட்டா²னே ஸயதி, ஸஹஸெய்யாவ ஹோதி. யதி³ பன த²ம்பா⁴னங் உபரி கதபாஸாத³ஸ்ஸ உபரிமதலேன ஸத்³தி⁴ங் அஸம்ப³த்³த⁴பி⁴த்திகஸ்ஸ பி⁴த்தியா உபரிடி²தஸுஸிரதுலாஸீஸஸ்ஸ ஸுஸிரேன பவிஸித்வா துலாய அப்³ப⁴ந்தரே ஸயித்வா தேனேவ ஸுஸிரேன நிக்க²மித்வா க³ச்ச²தி, ஹெட்டா²பாஸாதே³ ஸயிதபி⁴க்கு²ஸ்ஸ அனாபத்தி. ஸசே ச²த³னே சி²த்³த³ங் ஹோதி, தேன பவிஸித்வா அந்தோச²த³னே வஸித்வா தேனேவ பக்கமதி, நானூபசாரே உபரிமதலே ச²த³னப்³ப⁴ந்தரே ஸயிதஸ்ஸ ஆபத்தி, ஹெட்டி²மதலே ஸயிதஸ்ஸ அனாபத்தி. ஸசே அந்தோபாஸாதே³னேவ ஆரோஹித்வா ஸப்³ப³தலானி பரிபு⁴ஞ்ஜந்தி, ஏகூபசாரானி ஹொந்தி, தேஸு யத்த² கத்த²சி ஸயிதஸ்ஸ ஆபத்தி, ஸபா⁴ஸங்கே²பேன கதே அட்³ட⁴குட்டகே ஸேனாஸனே ஸயிதஸ்ஸ துலாவாளஸகா⁴டாதீ³ஸு கபோதாத³யோ ஸயந்தி, ஆபத்தியேவ. பரிக்கே²பஸ்ஸ ப³ஹிக³தே நிப்³ப³கோஸப்³ப⁴ந்தரே ஸயந்தி, அனாபத்தி. பரிமண்ட³லங் வா சதுரஸ்ஸங் வா ஏகச்ச²த³னாய க³ப்³ப⁴மாலாய ஸதக³ப்³ப⁴ங் சேபி ஸேனாஸனங் ஹோதி, தத்ர சே ஏகேன ஸாதா⁴ரணத்³வாரேன பவிஸித்வா விஸுங் பாகாரேன அபரிச்சி²ன்னக³ப்³பூ⁴பசாரே ஸப்³ப³க³ப்³பே⁴பி பவிஸந்தி, ஏகக³ப்³பே⁴பி அனுபஸம்பன்னே நிபன்னே ஸப்³ப³க³ப்³பே⁴ஸு நிபன்னானங் ஆபத்தி. ஸசே ஸபமுகா² க³ப்³பா⁴ ஹொந்தி, பமுக²ஞ்ச உபரி அச்ச²ன்னங், பமுகே² ஸயிதோ க³ப்³பே⁴ ஸயிதானங் ஆபத்திங் ந கரோதி. ஸசே பன க³ப்³ப⁴ச்ச²த³னேனேவ ஸத்³தி⁴ங் ஸம்ப³ந்த⁴ச²த³னங், தத்ர ஸயிதோ ஸப்³பே³ஸங் ஆபத்திங் கரோதி. கஸ்மா? ஸப்³ப³ச்ச²ன்னத்தா ச ஸப்³ப³பரிச்ச²ன்னத்தா ச. க³ப்³ப⁴பரிக்கே²போயேவ ஹிஸ்ஸ பரிக்கே²போ.
Ayañca sahaseyyāpatti nāma ‘‘bhikkhuṃ ṭhapetvā avaseso anupasampanno nāmā’’ti vacanato antamaso pārājikavatthubhūtena tiracchānagatenapi saddhiṃ hoti, tasmā sacepi godhābiḷālamaṅgusādīsu koci pavisitvā bhikkhuno vasanasenāsane ekūpacāraṭṭhāne sayati, sahaseyyāva hoti. Yadi pana thambhānaṃ upari katapāsādassa uparimatalena saddhiṃ asambaddhabhittikassa bhittiyā upariṭhitasusiratulāsīsassa susirena pavisitvā tulāya abbhantare sayitvā teneva susirena nikkhamitvā gacchati, heṭṭhāpāsāde sayitabhikkhussa anāpatti. Sace chadane chiddaṃ hoti, tena pavisitvā antochadane vasitvā teneva pakkamati, nānūpacāre uparimatale chadanabbhantare sayitassa āpatti, heṭṭhimatale sayitassa anāpatti. Sace antopāsādeneva ārohitvā sabbatalāni paribhuñjanti, ekūpacārāni honti, tesu yattha katthaci sayitassa āpatti, sabhāsaṅkhepena kate aḍḍhakuṭṭake senāsane sayitassa tulāvāḷasaghāṭādīsu kapotādayo sayanti, āpattiyeva. Parikkhepassa bahigate nibbakosabbhantare sayanti, anāpatti. Parimaṇḍalaṃ vā caturassaṃ vā ekacchadanāya gabbhamālāya satagabbhaṃ cepi senāsanaṃ hoti, tatra ce ekena sādhāraṇadvārena pavisitvā visuṃ pākārena aparicchinnagabbhūpacāre sabbagabbhepi pavisanti, ekagabbhepi anupasampanne nipanne sabbagabbhesu nipannānaṃ āpatti. Sace sapamukhā gabbhā honti, pamukhañca upari acchannaṃ, pamukhe sayito gabbhe sayitānaṃ āpattiṃ na karoti. Sace pana gabbhacchadaneneva saddhiṃ sambandhachadanaṃ, tatra sayito sabbesaṃ āpattiṃ karoti. Kasmā? Sabbacchannattā ca sabbaparicchannattā ca. Gabbhaparikkhepoyeva hissa parikkhepo.
81. யேபி ஏகஸாலத்³விஸாலதிஸாலசதுஸாலஸன்னிவேஸா மஹாபாஸாதா³ ஏகஸ்மிங் ஓகாஸே பாதே³ தோ⁴வித்வா பவிட்டே²ன ஸக்கா ஹொந்தி ஸப்³ப³த்த² அனுபரிக³ந்துங், தேஸுபி ஸஹஸெய்யாபத்தியா ந முச்சதி. ஸசே தஸ்மிங் தஸ்மிங் டா²னே உபசாரங் பரிச்சி²ந்தி³த்வா கதா ஹொந்தி, ஏகூபசாரட்டா²னேயேவ ஆபத்தி. த்³வீஹி த்³வாரேஹி யுத்தஸ்ஸ ஸுதா⁴ச²த³னமண்ட³பஸ்ஸ மஜ்ஜே² பாகாரங் கரொந்தி, ஏகேன த்³வாரேன பவிஸித்வா ஏகஸ்மிங் பரிச்சே²தே³ அனுபஸம்பன்னோ ஸயதி, ஏகஸ்மிங் பி⁴க்கு², அனாபத்தி. பாகாரே கோ³தா⁴தீ³னங் பவிஸனமத்தங் சி²த்³த³ங் ஹோதி, ஏகஸ்மிஞ்ச பரிச்சே²தே³ கோ³தா⁴ ஸயந்தி, அனாபத்தியேவ. ந ஹி சி²த்³தே³ன கே³ஹங் ஏகூபசாரங் நாம ஹோதி. ஸசே பாகாரமஜ்ஜே² சி²ந்தி³த்வா த்³வாரங் யோஜெந்தி, ஏகூபசாரதாய ஆபத்தி. தங் த்³வாரங் கவாடேன பித³ஹித்வா ஸயந்தி, ஆபத்தியேவ. ந ஹி த்³வாரபித³ஹனேன கே³ஹங் நானூபசாரங் நாம ஹோதி, த்³வாரங் வா அத்³வாரங். கவாடஞ்ஹி ஸங்வரணவிவரணேஹி யதா²ஸுக²ங் வளஞ்ஜனத்தா²ய கதங், ந வளஞ்ஜுபச்சே²த³னத்தா²ய. ஸசே தங் த்³வாரங் புன இட்ட²காஹி பித³ஹந்தி, அத்³வாரங் ஹோதி, புரிமே நானூபசாரபா⁴வேயேவ திட்ட²தி. தீ³க⁴பமுக²ங் சேதியக⁴ரங் ஹோதி, ஏகங் கவாடங் அந்தோ, ஏகங் ப³ஹி, த்³வின்னங் கவாடானங் அந்தரே அனுபஸம்பன்னோ அந்தோசேதியக⁴ரே ஸயந்தஸ்ஸ ஆபத்திங் கரோதி ஏகூபசாரத்தா.
81. Yepi ekasāladvisālatisālacatusālasannivesā mahāpāsādā ekasmiṃ okāse pāde dhovitvā paviṭṭhena sakkā honti sabbattha anuparigantuṃ, tesupi sahaseyyāpattiyā na muccati. Sace tasmiṃ tasmiṃ ṭhāne upacāraṃ paricchinditvā katā honti, ekūpacāraṭṭhāneyeva āpatti. Dvīhi dvārehi yuttassa sudhāchadanamaṇḍapassa majjhe pākāraṃ karonti, ekena dvārena pavisitvā ekasmiṃ paricchede anupasampanno sayati, ekasmiṃ bhikkhu, anāpatti. Pākāre godhādīnaṃ pavisanamattaṃ chiddaṃ hoti, ekasmiñca paricchede godhā sayanti, anāpattiyeva. Na hi chiddena gehaṃ ekūpacāraṃ nāma hoti. Sace pākāramajjhe chinditvā dvāraṃ yojenti, ekūpacāratāya āpatti. Taṃ dvāraṃ kavāṭena pidahitvā sayanti, āpattiyeva. Na hi dvārapidahanena gehaṃ nānūpacāraṃ nāma hoti, dvāraṃ vā advāraṃ. Kavāṭañhi saṃvaraṇavivaraṇehi yathāsukhaṃ vaḷañjanatthāya kataṃ, na vaḷañjupacchedanatthāya. Sace taṃ dvāraṃ puna iṭṭhakāhi pidahanti, advāraṃ hoti, purime nānūpacārabhāveyeva tiṭṭhati. Dīghapamukhaṃ cetiyagharaṃ hoti, ekaṃ kavāṭaṃ anto, ekaṃ bahi, dvinnaṃ kavāṭānaṃ antare anupasampanno antocetiyaghare sayantassa āpattiṃ karoti ekūpacārattā.
அயஞ்ஹெத்த² ஸங்கே²போ – ஸேனாஸனங் கு²த்³த³கங் வா ஹோது மஹந்தங் வா, அஞ்ஞேன ஸத்³தி⁴ங் ஸம்ப³ந்த⁴ங் வா அஸம்ப³ந்த⁴ங் வா, தீ³க⁴ங் வா வட்டங் வா சதுரஸ்ஸங் வா, ஏகபூ⁴மிகங் வா அனேகபூ⁴மிகங் வா, யங் யங் ஏகூபசாரங், ஸப்³ப³த்த² ஸஹஸெய்யாபத்தி ஹோதீதி. எத்த² ச யேன கேனசி படிச்ச²த³னேன ஸப்³ப³ச்ச²ன்னே ஸப்³ப³பரிச்ச²ன்னே பாசித்தியங், யேபு⁴ய்யேனச²ன்னே யேபு⁴ய்யேனபரிச்ச²ன்னே பாசித்தியங், ஸப்³ப³ச்ச²ன்னே யேபு⁴ய்யேனபரிச்ச²ன்னே பாசித்தியங், ஸப்³ப³ச்ச²ன்னே உபட்³ட⁴பரிச்ச²ன்னே பாசித்தியங், யேபு⁴ய்யேனச²ன்னே உபட்³ட⁴பரிச்ச²ன்னே பாசித்தியங், ஸப்³ப³பரிச்ச²ன்னே யேபு⁴ய்யேனச²ன்னே பாசித்தியங், ஸப்³ப³பரிச்ச²ன்னே உபட்³ட⁴ச்ச²ன்னே பாசித்தியங், யேபு⁴ய்யேனபரிச்ச²ன்னே உபட்³ட⁴ச்ச²ன்னே பாசித்தியந்தி அட்ட² பாசித்தியானி. உபட்³ட⁴ச்ச²ன்னே உபட்³ட⁴பரிச்ச²ன்னே து³க்கடங், ஸப்³ப³ச்ச²ன்னே சூளகபரிச்ச²ன்னே து³க்கடங், யேபு⁴ய்யேனச²ன்னே சூளகபரிச்ச²ன்னே து³க்கடங், ஸப்³ப³பரிச்ச²ன்னே சூளகச்ச²ன்னே து³க்கடங், யேபு⁴ய்யேனபரிச்ச²ன்னே சூளகச்ச²ன்னே து³க்கடந்தி பஞ்ச து³க்கடானி வேதி³தப்³பா³னி. ஸப்³ப³ச்ச²ன்னே ஸப்³ப³அபரிச்ச²ன்னே, ஸப்³ப³பரிச்ச²ன்னே ஸப்³ப³அச்ச²ன்னே, யேபு⁴ய்யேனஅச்ச²ன்னே யேபு⁴ய்யேனஅபரிச்ச²ன்னே, உபட்³ட⁴ச்ச²ன்னே சூளகபரிச்ச²ன்னே, உபட்³ட⁴பரிச்ச²ன்னே சூளகச்ச²ன்னே சூளகபரிச்ச²ன்னே ச அனாபத்தி. மாதுகா³மேன ஸஹ நிபஜ்ஜந்தஸ்ஸபி அயமேவ வினிச்ச²யோ. அயஞ்ஹெத்த² விஸேஸோ – அனுபஸம்பன்னேன ஸத்³தி⁴ங் நிபஜ்ஜந்தஸ்ஸ சதுத்த²தி³வஸே ஆபத்தி, மாதுகா³மேன ஸத்³தி⁴ங் பட²மதி³வஸேதி. யக்கி²பேதீஹி பன தி³ஸ்ஸமானகரூபாஹி திரச்சா²னக³தித்தி²யா ச மேது²னத⁴ம்மவத்து²பூ⁴தாய ஏவ து³க்கடங், ஸேஸாஹி அனாபத்தி.
Ayañhettha saṅkhepo – senāsanaṃ khuddakaṃ vā hotu mahantaṃ vā, aññena saddhiṃ sambandhaṃ vā asambandhaṃ vā, dīghaṃ vā vaṭṭaṃ vā caturassaṃ vā, ekabhūmikaṃ vā anekabhūmikaṃ vā, yaṃ yaṃ ekūpacāraṃ, sabbattha sahaseyyāpatti hotīti. Ettha ca yena kenaci paṭicchadanena sabbacchanne sabbaparicchanne pācittiyaṃ, yebhuyyenachanne yebhuyyenaparicchanne pācittiyaṃ, sabbacchanne yebhuyyenaparicchanne pācittiyaṃ, sabbacchanne upaḍḍhaparicchanne pācittiyaṃ, yebhuyyenachanne upaḍḍhaparicchanne pācittiyaṃ, sabbaparicchanne yebhuyyenachanne pācittiyaṃ, sabbaparicchanne upaḍḍhacchanne pācittiyaṃ, yebhuyyenaparicchanne upaḍḍhacchanne pācittiyanti aṭṭha pācittiyāni. Upaḍḍhacchanne upaḍḍhaparicchanne dukkaṭaṃ, sabbacchanne cūḷakaparicchanne dukkaṭaṃ, yebhuyyenachanne cūḷakaparicchanne dukkaṭaṃ, sabbaparicchanne cūḷakacchanne dukkaṭaṃ, yebhuyyenaparicchanne cūḷakacchanne dukkaṭanti pañca dukkaṭāni veditabbāni. Sabbacchanne sabbaaparicchanne, sabbaparicchanne sabbaacchanne, yebhuyyenaacchanne yebhuyyenaaparicchanne, upaḍḍhacchanne cūḷakaparicchanne, upaḍḍhaparicchanne cūḷakacchanne cūḷakaparicchanne ca anāpatti. Mātugāmena saha nipajjantassapi ayameva vinicchayo. Ayañhettha viseso – anupasampannena saddhiṃ nipajjantassa catutthadivase āpatti, mātugāmena saddhiṃ paṭhamadivaseti. Yakkhipetīhi pana dissamānakarūpāhi tiracchānagatitthiyā ca methunadhammavatthubhūtāya eva dukkaṭaṃ, sesāhi anāpatti.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
ஸஹஸெய்யவினிச்ச²யகதா² ஸமத்தா.
Sahaseyyavinicchayakathā samattā.
