| Library / Tipiṭaka / তিপিটক • Tipiṭaka / ৰিনযসঙ্গহ-অট্ঠকথা • Vinayasaṅgaha-aṭṭhakathā |
১৬. সহসেয্যৰিনিচ্ছযকথা
16. Sahaseyyavinicchayakathā
৭৯. দুৰিধং সহসেয্যকন্তি ‘‘যো পন ভিক্খু অনুপসম্পন্নেন উত্তরিদিরত্ততিরত্তং সহসেয্যং কপ্পেয্য, পাচিত্তিযং (পাচি॰ ৪৯)। যো পন ভিক্খু মাতুগামেন সহসেয্যং কপ্পেয্য, পাচিত্তিয’’ন্তি (পাচি॰ ৫৬) এৰং ৰুত্তং সহসেয্যসিক্খাপদদ্ৰযং সন্ধায ৰুত্তং। তত্রাযং ৰিনিচ্ছযো (পাচি॰ অট্ঠ॰ ৫০-৫১) – অনুপসম্পন্নেন সদ্ধিং তিণ্ণং রত্তীনং উপরি চতুত্থদিৰসে অত্থঙ্গতে সূরিযে সব্বচ্ছন্নসব্বপরিচ্ছন্নে যেভুয্যচ্ছন্নযেভুয্যপরিচ্ছন্নে ৰা সেনাসনে পুব্বাপরিযেন ৰা একক্খণে ৰা নিপজ্জন্তস্স পাচিত্তিযং। তত্থ ছদনং অনাহচ্চ দিযড্ঢহত্থুব্বেধেন পাকারাদিনা যেন কেনচি পরিচ্ছন্নম্পি সব্বপরিচ্ছন্নমিচ্চেৰ ৰেদিতব্বং। যং সেনাসনং উপরি পঞ্চহি ছদনেহি অঞ্ঞেন ৰা কেনচি সব্বমেৰ পরিচ্ছন্নং, ইদং সব্বচ্ছন্নং নাম সেনাসনং। অট্ঠকথাসু পন পাকটৰোহারং গহেত্ৰা ৰাচুগ্গতৰসেন ‘‘সব্বচ্ছন্নং নাম পঞ্চহি ছদনেহি ছন্ন’’ন্তি ৰুত্তং। কিঞ্চাপি ৰুত্তং, অথ খো দুস্সকুটিযং সযন্তস্সপি ন সক্কা অনাপত্তি কাতুং, তস্মা যং কিঞ্চি পটিচ্ছাদনসমত্থং ইধ ছদনঞ্চ পরিচ্ছন্নঞ্চ ৰেদিতব্বং। পঞ্চৰিধচ্ছদনেযেৰ হি গয্হমানে পদরচ্ছন্নেপি সহসেয্যা ন ভৰেয্য, তস্মা যং সেনাসনং ভূমিতো পট্ঠায যাৰছদনং আহচ্চ পাকারেন ৰা অঞ্ঞেন ৰা কেনচি অন্তমসো ৰত্থেনপি পরিক্খিত্তং, ইদং সব্বপরিচ্ছন্নং নাম সেনাসনং। ছদনং অনাহচ্চ সব্বন্তিমেন পরিযাযেন দিযড্ঢহত্থুব্বেধেন পাকারাদিনা পরিক্খিত্তম্পি সব্বপরিচ্ছন্নমেৰ। যস্স পন উপরি বহুতরং ঠানং ছন্নং, অপ্পং অচ্ছন্নং, সমন্ততো ৰা বহুতরং পরিক্খিত্তং, অপ্পং অপরিক্খিত্তং, ইদং যেভুয্যেনছন্নং যেভুয্যেনপরিচ্ছন্নং নাম।
79. Duvidhaṃ sahaseyyakanti ‘‘yo pana bhikkhu anupasampannena uttaridirattatirattaṃ sahaseyyaṃ kappeyya, pācittiyaṃ (pāci. 49). Yo pana bhikkhu mātugāmena sahaseyyaṃ kappeyya, pācittiya’’nti (pāci. 56) evaṃ vuttaṃ sahaseyyasikkhāpadadvayaṃ sandhāya vuttaṃ. Tatrāyaṃ vinicchayo (pāci. aṭṭha. 50-51) – anupasampannena saddhiṃ tiṇṇaṃ rattīnaṃ upari catutthadivase atthaṅgate sūriye sabbacchannasabbaparicchanne yebhuyyacchannayebhuyyaparicchanne vā senāsane pubbāpariyena vā ekakkhaṇe vā nipajjantassa pācittiyaṃ. Tattha chadanaṃ anāhacca diyaḍḍhahatthubbedhena pākārādinā yena kenaci paricchannampi sabbaparicchannamicceva veditabbaṃ. Yaṃ senāsanaṃ upari pañcahi chadanehi aññena vā kenaci sabbameva paricchannaṃ, idaṃ sabbacchannaṃ nāma senāsanaṃ. Aṭṭhakathāsu pana pākaṭavohāraṃ gahetvā vācuggatavasena ‘‘sabbacchannaṃ nāma pañcahi chadanehi channa’’nti vuttaṃ. Kiñcāpi vuttaṃ, atha kho dussakuṭiyaṃ sayantassapi na sakkā anāpatti kātuṃ, tasmā yaṃ kiñci paṭicchādanasamatthaṃ idha chadanañca paricchannañca veditabbaṃ. Pañcavidhacchadaneyeva hi gayhamāne padaracchannepi sahaseyyā na bhaveyya, tasmā yaṃ senāsanaṃ bhūmito paṭṭhāya yāvachadanaṃ āhacca pākārena vā aññena vā kenaci antamaso vatthenapi parikkhittaṃ, idaṃ sabbaparicchannaṃ nāma senāsanaṃ. Chadanaṃ anāhacca sabbantimena pariyāyena diyaḍḍhahatthubbedhena pākārādinā parikkhittampi sabbaparicchannameva. Yassa pana upari bahutaraṃ ṭhānaṃ channaṃ, appaṃ acchannaṃ, samantato vā bahutaraṃ parikkhittaṃ, appaṃ aparikkhittaṃ, idaṃ yebhuyyenachannaṃ yebhuyyenaparicchannaṃ nāma.
ইমিনা লক্খণেন সমন্নাগতো সচেপি সত্তভূমিকো পাসাদো একূপচারো হোতি, সতগব্ভং ৰা চতুসালং, একং সেনাসনমিচ্চেৰ সঙ্খং গচ্ছতি। এৰরূপে সেনাসনে অনুপসম্পন্নেন সদ্ধিং চতুত্থদিৰসে অত্থঙ্গতে সূরিযে নিপজ্জন্তস্স পাচিত্তিযং ৰুত্তং। সচে পন সম্বহুলা সামণেরা, একো ভিক্খু, সামণেরগণনায পাচিত্তিযা। তে চে উট্ঠাযুট্ঠায নিপজ্জন্তি, তেসং পযোগে পযোগে ভিক্খুস্স আপত্তি, ভিক্খুস্স উট্ঠাযুট্ঠায নিপজ্জনে পন ভিক্খুস্সেৰ পযোগেন ভিক্খুস্স আপত্তি। সচে সম্বহুলা ভিক্খূ, একো সামণেরো, একোপি সব্বেসং আপত্তিং করোতি। তস্স উট্ঠাযুট্ঠায নিপজ্জনেনপি ভিক্খূনং আপত্তিযেৰ। উভযেসং সম্বহুলভাৰেপি এসেৰ নযো।
Iminā lakkhaṇena samannāgato sacepi sattabhūmiko pāsādo ekūpacāro hoti, satagabbhaṃ vā catusālaṃ, ekaṃ senāsanamicceva saṅkhaṃ gacchati. Evarūpe senāsane anupasampannena saddhiṃ catutthadivase atthaṅgate sūriye nipajjantassa pācittiyaṃ vuttaṃ. Sace pana sambahulā sāmaṇerā, eko bhikkhu, sāmaṇeragaṇanāya pācittiyā. Te ce uṭṭhāyuṭṭhāya nipajjanti, tesaṃ payoge payoge bhikkhussa āpatti, bhikkhussa uṭṭhāyuṭṭhāya nipajjane pana bhikkhusseva payogena bhikkhussa āpatti. Sace sambahulā bhikkhū, eko sāmaṇero, ekopi sabbesaṃ āpattiṃ karoti. Tassa uṭṭhāyuṭṭhāya nipajjanenapi bhikkhūnaṃ āpattiyeva. Ubhayesaṃ sambahulabhāvepi eseva nayo.
৮০. অপিচেত্থ একাৰাসাদিকম্পি চতুক্কং ৰেদিতব্বং। যো হি একস্মিং আৰাসে একেনেৰ অনুপসম্পন্নেন সদ্ধিং তিরত্তং সহসেয্যং কপ্পেতি, তস্স চতুত্থদিৰসতো পট্ঠায দেৰসিকা আপত্তি। যোপি একস্মিংযেৰ আৰাসে নানাঅনুপসম্পন্নেহি সদ্ধিং তিরত্তং সহসেয্যং কপ্পেতি, তস্সপি। যোপি নানাআৰাসেসু একেনেৰ অনুপসম্পন্নেন সদ্ধিং তিরত্তং সহসেয্যং কপ্পেতি, তস্সপি। যোপি নানাআৰাসেসু নানাঅনুপসম্পন্নেহি সদ্ধিং যোজনসতম্পি গন্ত্ৰা সহসেয্যং কপ্পেতি, তস্সপি চতুত্থদিৰসতো পট্ঠায দেৰসিকা আপত্তি।
80. Apicettha ekāvāsādikampi catukkaṃ veditabbaṃ. Yo hi ekasmiṃ āvāse ekeneva anupasampannena saddhiṃ tirattaṃ sahaseyyaṃ kappeti, tassa catutthadivasato paṭṭhāya devasikā āpatti. Yopi ekasmiṃyeva āvāse nānāanupasampannehi saddhiṃ tirattaṃ sahaseyyaṃ kappeti, tassapi. Yopi nānāāvāsesu ekeneva anupasampannena saddhiṃ tirattaṃ sahaseyyaṃ kappeti, tassapi. Yopi nānāāvāsesu nānāanupasampannehi saddhiṃ yojanasatampi gantvā sahaseyyaṃ kappeti, tassapi catutthadivasato paṭṭhāya devasikā āpatti.
অযঞ্চ সহসেয্যাপত্তি নাম ‘‘ভিক্খুং ঠপেত্ৰা অৰসেসো অনুপসম্পন্নো নামা’’তি ৰচনতো অন্তমসো পারাজিকৰত্থুভূতেন তিরচ্ছানগতেনপি সদ্ধিং হোতি, তস্মা সচেপি গোধাবিল়ালমঙ্গুসাদীসু কোচি পৰিসিত্ৰা ভিক্খুনো ৰসনসেনাসনে একূপচারট্ঠানে সযতি, সহসেয্যাৰ হোতি। যদি পন থম্ভানং উপরি কতপাসাদস্স উপরিমতলেন সদ্ধিং অসম্বদ্ধভিত্তিকস্স ভিত্তিযা উপরিঠিতসুসিরতুলাসীসস্স সুসিরেন পৰিসিত্ৰা তুলায অব্ভন্তরে সযিত্ৰা তেনেৰ সুসিরেন নিক্খমিত্ৰা গচ্ছতি, হেট্ঠাপাসাদে সযিতভিক্খুস্স অনাপত্তি। সচে ছদনে ছিদ্দং হোতি, তেন পৰিসিত্ৰা অন্তোছদনে ৰসিত্ৰা তেনেৰ পক্কমতি, নানূপচারে উপরিমতলে ছদনব্ভন্তরে সযিতস্স আপত্তি, হেট্ঠিমতলে সযিতস্স অনাপত্তি। সচে অন্তোপাসাদেনেৰ আরোহিত্ৰা সব্বতলানি পরিভুঞ্জন্তি, একূপচারানি হোন্তি, তেসু যত্থ কত্থচি সযিতস্স আপত্তি, সভাসঙ্খেপেন কতে অড্ঢকুট্টকে সেনাসনে সযিতস্স তুলাৰাল়সঘাটাদীসু কপোতাদযো সযন্তি, আপত্তিযেৰ। পরিক্খেপস্স বহিগতে নিব্বকোসব্ভন্তরে সযন্তি, অনাপত্তি। পরিমণ্ডলং ৰা চতুরস্সং ৰা একচ্ছদনায গব্ভমালায সতগব্ভং চেপি সেনাসনং হোতি, তত্র চে একেন সাধারণদ্ৰারেন পৰিসিত্ৰা ৰিসুং পাকারেন অপরিচ্ছিন্নগব্ভূপচারে সব্বগব্ভেপি পৰিসন্তি, একগব্ভেপি অনুপসম্পন্নে নিপন্নে সব্বগব্ভেসু নিপন্নানং আপত্তি। সচে সপমুখা গব্ভা হোন্তি, পমুখঞ্চ উপরি অচ্ছন্নং, পমুখে সযিতো গব্ভে সযিতানং আপত্তিং ন করোতি। সচে পন গব্ভচ্ছদনেনেৰ সদ্ধিং সম্বন্ধছদনং, তত্র সযিতো সব্বেসং আপত্তিং করোতি। কস্মা? সব্বচ্ছন্নত্তা চ সব্বপরিচ্ছন্নত্তা চ। গব্ভপরিক্খেপোযেৰ হিস্স পরিক্খেপো।
Ayañca sahaseyyāpatti nāma ‘‘bhikkhuṃ ṭhapetvā avaseso anupasampanno nāmā’’ti vacanato antamaso pārājikavatthubhūtena tiracchānagatenapi saddhiṃ hoti, tasmā sacepi godhābiḷālamaṅgusādīsu koci pavisitvā bhikkhuno vasanasenāsane ekūpacāraṭṭhāne sayati, sahaseyyāva hoti. Yadi pana thambhānaṃ upari katapāsādassa uparimatalena saddhiṃ asambaddhabhittikassa bhittiyā upariṭhitasusiratulāsīsassa susirena pavisitvā tulāya abbhantare sayitvā teneva susirena nikkhamitvā gacchati, heṭṭhāpāsāde sayitabhikkhussa anāpatti. Sace chadane chiddaṃ hoti, tena pavisitvā antochadane vasitvā teneva pakkamati, nānūpacāre uparimatale chadanabbhantare sayitassa āpatti, heṭṭhimatale sayitassa anāpatti. Sace antopāsādeneva ārohitvā sabbatalāni paribhuñjanti, ekūpacārāni honti, tesu yattha katthaci sayitassa āpatti, sabhāsaṅkhepena kate aḍḍhakuṭṭake senāsane sayitassa tulāvāḷasaghāṭādīsu kapotādayo sayanti, āpattiyeva. Parikkhepassa bahigate nibbakosabbhantare sayanti, anāpatti. Parimaṇḍalaṃ vā caturassaṃ vā ekacchadanāya gabbhamālāya satagabbhaṃ cepi senāsanaṃ hoti, tatra ce ekena sādhāraṇadvārena pavisitvā visuṃ pākārena aparicchinnagabbhūpacāre sabbagabbhepi pavisanti, ekagabbhepi anupasampanne nipanne sabbagabbhesu nipannānaṃ āpatti. Sace sapamukhā gabbhā honti, pamukhañca upari acchannaṃ, pamukhe sayito gabbhe sayitānaṃ āpattiṃ na karoti. Sace pana gabbhacchadaneneva saddhiṃ sambandhachadanaṃ, tatra sayito sabbesaṃ āpattiṃ karoti. Kasmā? Sabbacchannattā ca sabbaparicchannattā ca. Gabbhaparikkhepoyeva hissa parikkhepo.
৮১. যেপি একসালদ্ৰিসালতিসালচতুসালসন্নিৰেসা মহাপাসাদা একস্মিং ওকাসে পাদে ধোৰিত্ৰা পৰিট্ঠেন সক্কা হোন্তি সব্বত্থ অনুপরিগন্তুং, তেসুপি সহসেয্যাপত্তিযা ন মুচ্চতি। সচে তস্মিং তস্মিং ঠানে উপচারং পরিচ্ছিন্দিত্ৰা কতা হোন্তি, একূপচারট্ঠানেযেৰ আপত্তি। দ্ৰীহি দ্ৰারেহি যুত্তস্স সুধাছদনমণ্ডপস্স মজ্ঝে পাকারং করোন্তি, একেন দ্ৰারেন পৰিসিত্ৰা একস্মিং পরিচ্ছেদে অনুপসম্পন্নো সযতি, একস্মিং ভিক্খু, অনাপত্তি। পাকারে গোধাদীনং পৰিসনমত্তং ছিদ্দং হোতি, একস্মিঞ্চ পরিচ্ছেদে গোধা সযন্তি, অনাপত্তিযেৰ। ন হি ছিদ্দেন গেহং একূপচারং নাম হোতি। সচে পাকারমজ্ঝে ছিন্দিত্ৰা দ্ৰারং যোজেন্তি, একূপচারতায আপত্তি। তং দ্ৰারং কৰাটেন পিদহিত্ৰা সযন্তি, আপত্তিযেৰ। ন হি দ্ৰারপিদহনেন গেহং নানূপচারং নাম হোতি, দ্ৰারং ৰা অদ্ৰারং। কৰাটঞ্হি সংৰরণৰিৰরণেহি যথাসুখং ৰল়ঞ্জনত্থায কতং, ন ৰল়ঞ্জুপচ্ছেদনত্থায। সচে তং দ্ৰারং পুন ইট্ঠকাহি পিদহন্তি, অদ্ৰারং হোতি, পুরিমে নানূপচারভাৰেযেৰ তিট্ঠতি। দীঘপমুখং চেতিযঘরং হোতি, একং কৰাটং অন্তো, একং বহি, দ্ৰিন্নং কৰাটানং অন্তরে অনুপসম্পন্নো অন্তোচেতিযঘরে সযন্তস্স আপত্তিং করোতি একূপচারত্তা।
81. Yepi ekasāladvisālatisālacatusālasannivesā mahāpāsādā ekasmiṃ okāse pāde dhovitvā paviṭṭhena sakkā honti sabbattha anuparigantuṃ, tesupi sahaseyyāpattiyā na muccati. Sace tasmiṃ tasmiṃ ṭhāne upacāraṃ paricchinditvā katā honti, ekūpacāraṭṭhāneyeva āpatti. Dvīhi dvārehi yuttassa sudhāchadanamaṇḍapassa majjhe pākāraṃ karonti, ekena dvārena pavisitvā ekasmiṃ paricchede anupasampanno sayati, ekasmiṃ bhikkhu, anāpatti. Pākāre godhādīnaṃ pavisanamattaṃ chiddaṃ hoti, ekasmiñca paricchede godhā sayanti, anāpattiyeva. Na hi chiddena gehaṃ ekūpacāraṃ nāma hoti. Sace pākāramajjhe chinditvā dvāraṃ yojenti, ekūpacāratāya āpatti. Taṃ dvāraṃ kavāṭena pidahitvā sayanti, āpattiyeva. Na hi dvārapidahanena gehaṃ nānūpacāraṃ nāma hoti, dvāraṃ vā advāraṃ. Kavāṭañhi saṃvaraṇavivaraṇehi yathāsukhaṃ vaḷañjanatthāya kataṃ, na vaḷañjupacchedanatthāya. Sace taṃ dvāraṃ puna iṭṭhakāhi pidahanti, advāraṃ hoti, purime nānūpacārabhāveyeva tiṭṭhati. Dīghapamukhaṃ cetiyagharaṃ hoti, ekaṃ kavāṭaṃ anto, ekaṃ bahi, dvinnaṃ kavāṭānaṃ antare anupasampanno antocetiyaghare sayantassa āpattiṃ karoti ekūpacārattā.
অযঞ্হেত্থ সঙ্খেপো – সেনাসনং খুদ্দকং ৰা হোতু মহন্তং ৰা, অঞ্ঞেন সদ্ধিং সম্বন্ধং ৰা অসম্বন্ধং ৰা, দীঘং ৰা ৰট্টং ৰা চতুরস্সং ৰা, একভূমিকং ৰা অনেকভূমিকং ৰা, যং যং একূপচারং, সব্বত্থ সহসেয্যাপত্তি হোতীতি। এত্থ চ যেন কেনচি পটিচ্ছদনেন সব্বচ্ছন্নে সব্বপরিচ্ছন্নে পাচিত্তিযং, যেভুয্যেনছন্নে যেভুয্যেনপরিচ্ছন্নে পাচিত্তিযং, সব্বচ্ছন্নে যেভুয্যেনপরিচ্ছন্নে পাচিত্তিযং, সব্বচ্ছন্নে উপড্ঢপরিচ্ছন্নে পাচিত্তিযং, যেভুয্যেনছন্নে উপড্ঢপরিচ্ছন্নে পাচিত্তিযং, সব্বপরিচ্ছন্নে যেভুয্যেনছন্নে পাচিত্তিযং, সব্বপরিচ্ছন্নে উপড্ঢচ্ছন্নে পাচিত্তিযং, যেভুয্যেনপরিচ্ছন্নে উপড্ঢচ্ছন্নে পাচিত্তিযন্তি অট্ঠ পাচিত্তিযানি। উপড্ঢচ্ছন্নে উপড্ঢপরিচ্ছন্নে দুক্কটং, সব্বচ্ছন্নে চূল়কপরিচ্ছন্নে দুক্কটং, যেভুয্যেনছন্নে চূল়কপরিচ্ছন্নে দুক্কটং, সব্বপরিচ্ছন্নে চূল়কচ্ছন্নে দুক্কটং, যেভুয্যেনপরিচ্ছন্নে চূল়কচ্ছন্নে দুক্কটন্তি পঞ্চ দুক্কটানি ৰেদিতব্বানি। সব্বচ্ছন্নে সব্বঅপরিচ্ছন্নে, সব্বপরিচ্ছন্নে সব্বঅচ্ছন্নে, যেভুয্যেনঅচ্ছন্নে যেভুয্যেনঅপরিচ্ছন্নে, উপড্ঢচ্ছন্নে চূল়কপরিচ্ছন্নে, উপড্ঢপরিচ্ছন্নে চূল়কচ্ছন্নে চূল়কপরিচ্ছন্নে চ অনাপত্তি। মাতুগামেন সহ নিপজ্জন্তস্সপি অযমেৰ ৰিনিচ্ছযো। অযঞ্হেত্থ ৰিসেসো – অনুপসম্পন্নেন সদ্ধিং নিপজ্জন্তস্স চতুত্থদিৰসে আপত্তি, মাতুগামেন সদ্ধিং পঠমদিৰসেতি। যক্খিপেতীহি পন দিস্সমানকরূপাহি তিরচ্ছানগতিত্থিযা চ মেথুনধম্মৰত্থুভূতায এৰ দুক্কটং, সেসাহি অনাপত্তি।
Ayañhettha saṅkhepo – senāsanaṃ khuddakaṃ vā hotu mahantaṃ vā, aññena saddhiṃ sambandhaṃ vā asambandhaṃ vā, dīghaṃ vā vaṭṭaṃ vā caturassaṃ vā, ekabhūmikaṃ vā anekabhūmikaṃ vā, yaṃ yaṃ ekūpacāraṃ, sabbattha sahaseyyāpatti hotīti. Ettha ca yena kenaci paṭicchadanena sabbacchanne sabbaparicchanne pācittiyaṃ, yebhuyyenachanne yebhuyyenaparicchanne pācittiyaṃ, sabbacchanne yebhuyyenaparicchanne pācittiyaṃ, sabbacchanne upaḍḍhaparicchanne pācittiyaṃ, yebhuyyenachanne upaḍḍhaparicchanne pācittiyaṃ, sabbaparicchanne yebhuyyenachanne pācittiyaṃ, sabbaparicchanne upaḍḍhacchanne pācittiyaṃ, yebhuyyenaparicchanne upaḍḍhacchanne pācittiyanti aṭṭha pācittiyāni. Upaḍḍhacchanne upaḍḍhaparicchanne dukkaṭaṃ, sabbacchanne cūḷakaparicchanne dukkaṭaṃ, yebhuyyenachanne cūḷakaparicchanne dukkaṭaṃ, sabbaparicchanne cūḷakacchanne dukkaṭaṃ, yebhuyyenaparicchanne cūḷakacchanne dukkaṭanti pañca dukkaṭāni veditabbāni. Sabbacchanne sabbaaparicchanne, sabbaparicchanne sabbaacchanne, yebhuyyenaacchanne yebhuyyenaaparicchanne, upaḍḍhacchanne cūḷakaparicchanne, upaḍḍhaparicchanne cūḷakacchanne cūḷakaparicchanne ca anāpatti. Mātugāmena saha nipajjantassapi ayameva vinicchayo. Ayañhettha viseso – anupasampannena saddhiṃ nipajjantassa catutthadivase āpatti, mātugāmena saddhiṃ paṭhamadivaseti. Yakkhipetīhi pana dissamānakarūpāhi tiracchānagatitthiyā ca methunadhammavatthubhūtāya eva dukkaṭaṃ, sesāhi anāpatti.
ইতি পাল়িমুত্তকৰিনযৰিনিচ্ছযসঙ্গহে
Iti pāḷimuttakavinayavinicchayasaṅgahe
সহসেয্যৰিনিচ্ছযকথা সমত্তা।
Sahaseyyavinicchayakathā samattā.
