| Library / Tipiṭaka / ਤਿਪਿਟਕ • Tipiṭaka / વਿਨਯਸਙ੍ਗਹ-ਅਟ੍ਠਕਥਾ • Vinayasaṅgaha-aṭṭhakathā |
੧੬. ਸਹਸੇਯ੍ਯવਿਨਿਚ੍ਛਯਕਥਾ
16. Sahaseyyavinicchayakathā
੭੯. ਦੁવਿਧਂ ਸਹਸੇਯ੍ਯਕਨ੍ਤਿ ‘‘ਯੋ ਪਨ ਭਿਕ੍ਖੁ ਅਨੁਪਸਮ੍ਪਨ੍ਨੇਨ ਉਤ੍ਤਰਿਦਿਰਤ੍ਤਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਯ੍ਯ, ਪਾਚਿਤ੍ਤਿਯਂ (ਪਾਚਿ॰ ੪੯)। ਯੋ ਪਨ ਭਿਕ੍ਖੁ ਮਾਤੁਗਾਮੇਨ ਸਹਸੇਯ੍ਯਂ ਕਪ੍ਪੇਯ੍ਯ, ਪਾਚਿਤ੍ਤਿਯ’’ਨ੍ਤਿ (ਪਾਚਿ॰ ੫੬) ਏવਂ વੁਤ੍ਤਂ ਸਹਸੇਯ੍ਯਸਿਕ੍ਖਾਪਦਦ੍વਯਂ ਸਨ੍ਧਾਯ વੁਤ੍ਤਂ। ਤਤ੍ਰਾਯਂ વਿਨਿਚ੍ਛਯੋ (ਪਾਚਿ॰ ਅਟ੍ਠ॰ ੫੦-੫੧) – ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਤਿਣ੍ਣਂ ਰਤ੍ਤੀਨਂ ਉਪਰਿ ਚਤੁਤ੍ਥਦਿવਸੇ ਅਤ੍ਥਙ੍ਗਤੇ ਸੂਰਿਯੇ ਸਬ੍ਬਚ੍ਛਨ੍ਨਸਬ੍ਬਪਰਿਚ੍ਛਨ੍ਨੇ ਯੇਭੁਯ੍ਯਚ੍ਛਨ੍ਨਯੇਭੁਯ੍ਯਪਰਿਚ੍ਛਨ੍ਨੇ વਾ ਸੇਨਾਸਨੇ ਪੁਬ੍ਬਾਪਰਿਯੇਨ વਾ ਏਕਕ੍ਖਣੇ વਾ ਨਿਪਜ੍ਜਨ੍ਤਸ੍ਸ ਪਾਚਿਤ੍ਤਿਯਂ। ਤਤ੍ਥ ਛਦਨਂ ਅਨਾਹਚ੍ਚ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਯੇਨ ਕੇਨਚਿ ਪਰਿਚ੍ਛਨ੍ਨਮ੍ਪਿ ਸਬ੍ਬਪਰਿਚ੍ਛਨ੍ਨਮਿਚ੍ਚੇવ વੇਦਿਤਬ੍ਬਂ। ਯਂ ਸੇਨਾਸਨਂ ਉਪਰਿ ਪਞ੍ਚਹਿ ਛਦਨੇਹਿ ਅਞ੍ਞੇਨ વਾ ਕੇਨਚਿ ਸਬ੍ਬਮੇવ ਪਰਿਚ੍ਛਨ੍ਨਂ, ਇਦਂ ਸਬ੍ਬਚ੍ਛਨ੍ਨਂ ਨਾਮ ਸੇਨਾਸਨਂ। ਅਟ੍ਠਕਥਾਸੁ ਪਨ ਪਾਕਟવੋਹਾਰਂ ਗਹੇਤ੍વਾ વਾਚੁਗ੍ਗਤવਸੇਨ ‘‘ਸਬ੍ਬਚ੍ਛਨ੍ਨਂ ਨਾਮ ਪਞ੍ਚਹਿ ਛਦਨੇਹਿ ਛਨ੍ਨ’’ਨ੍ਤਿ વੁਤ੍ਤਂ। ਕਿਞ੍ਚਾਪਿ વੁਤ੍ਤਂ, ਅਥ ਖੋ ਦੁਸ੍ਸਕੁਟਿਯਂ ਸਯਨ੍ਤਸ੍ਸਪਿ ਨ ਸਕ੍ਕਾ ਅਨਾਪਤ੍ਤਿ ਕਾਤੁਂ, ਤਸ੍ਮਾ ਯਂ ਕਿਞ੍ਚਿ ਪਟਿਚ੍ਛਾਦਨਸਮਤ੍ਥਂ ਇਧ ਛਦਨਞ੍ਚ ਪਰਿਚ੍ਛਨ੍ਨਞ੍ਚ વੇਦਿਤਬ੍ਬਂ। ਪਞ੍ਚવਿਧਚ੍ਛਦਨੇਯੇવ ਹਿ ਗਯ੍ਹਮਾਨੇ ਪਦਰਚ੍ਛਨ੍ਨੇਪਿ ਸਹਸੇਯ੍ਯਾ ਨ ਭવੇਯ੍ਯ, ਤਸ੍ਮਾ ਯਂ ਸੇਨਾਸਨਂ ਭੂਮਿਤੋ ਪਟ੍ਠਾਯ ਯਾવਛਦਨਂ ਆਹਚ੍ਚ ਪਾਕਾਰੇਨ વਾ ਅਞ੍ਞੇਨ વਾ ਕੇਨਚਿ ਅਨ੍ਤਮਸੋ વਤ੍ਥੇਨਪਿ ਪਰਿਕ੍ਖਿਤ੍ਤਂ, ਇਦਂ ਸਬ੍ਬਪਰਿਚ੍ਛਨ੍ਨਂ ਨਾਮ ਸੇਨਾਸਨਂ। ਛਦਨਂ ਅਨਾਹਚ੍ਚ ਸਬ੍ਬਨ੍ਤਿਮੇਨ ਪਰਿਯਾਯੇਨ ਦਿਯਡ੍ਢਹਤ੍ਥੁਬ੍ਬੇਧੇਨ ਪਾਕਾਰਾਦਿਨਾ ਪਰਿਕ੍ਖਿਤ੍ਤਮ੍ਪਿ ਸਬ੍ਬਪਰਿਚ੍ਛਨ੍ਨਮੇવ। ਯਸ੍ਸ ਪਨ ਉਪਰਿ ਬਹੁਤਰਂ ਠਾਨਂ ਛਨ੍ਨਂ, ਅਪ੍ਪਂ ਅਚ੍ਛਨ੍ਨਂ, ਸਮਨ੍ਤਤੋ વਾ ਬਹੁਤਰਂ ਪਰਿਕ੍ਖਿਤ੍ਤਂ, ਅਪ੍ਪਂ ਅਪਰਿਕ੍ਖਿਤ੍ਤਂ, ਇਦਂ ਯੇਭੁਯ੍ਯੇਨਛਨ੍ਨਂ ਯੇਭੁਯ੍ਯੇਨਪਰਿਚ੍ਛਨ੍ਨਂ ਨਾਮ।
79. Duvidhaṃ sahaseyyakanti ‘‘yo pana bhikkhu anupasampannena uttaridirattatirattaṃ sahaseyyaṃ kappeyya, pācittiyaṃ (pāci. 49). Yo pana bhikkhu mātugāmena sahaseyyaṃ kappeyya, pācittiya’’nti (pāci. 56) evaṃ vuttaṃ sahaseyyasikkhāpadadvayaṃ sandhāya vuttaṃ. Tatrāyaṃ vinicchayo (pāci. aṭṭha. 50-51) – anupasampannena saddhiṃ tiṇṇaṃ rattīnaṃ upari catutthadivase atthaṅgate sūriye sabbacchannasabbaparicchanne yebhuyyacchannayebhuyyaparicchanne vā senāsane pubbāpariyena vā ekakkhaṇe vā nipajjantassa pācittiyaṃ. Tattha chadanaṃ anāhacca diyaḍḍhahatthubbedhena pākārādinā yena kenaci paricchannampi sabbaparicchannamicceva veditabbaṃ. Yaṃ senāsanaṃ upari pañcahi chadanehi aññena vā kenaci sabbameva paricchannaṃ, idaṃ sabbacchannaṃ nāma senāsanaṃ. Aṭṭhakathāsu pana pākaṭavohāraṃ gahetvā vācuggatavasena ‘‘sabbacchannaṃ nāma pañcahi chadanehi channa’’nti vuttaṃ. Kiñcāpi vuttaṃ, atha kho dussakuṭiyaṃ sayantassapi na sakkā anāpatti kātuṃ, tasmā yaṃ kiñci paṭicchādanasamatthaṃ idha chadanañca paricchannañca veditabbaṃ. Pañcavidhacchadaneyeva hi gayhamāne padaracchannepi sahaseyyā na bhaveyya, tasmā yaṃ senāsanaṃ bhūmito paṭṭhāya yāvachadanaṃ āhacca pākārena vā aññena vā kenaci antamaso vatthenapi parikkhittaṃ, idaṃ sabbaparicchannaṃ nāma senāsanaṃ. Chadanaṃ anāhacca sabbantimena pariyāyena diyaḍḍhahatthubbedhena pākārādinā parikkhittampi sabbaparicchannameva. Yassa pana upari bahutaraṃ ṭhānaṃ channaṃ, appaṃ acchannaṃ, samantato vā bahutaraṃ parikkhittaṃ, appaṃ aparikkhittaṃ, idaṃ yebhuyyenachannaṃ yebhuyyenaparicchannaṃ nāma.
ਇਮਿਨਾ ਲਕ੍ਖਣੇਨ ਸਮਨ੍ਨਾਗਤੋ ਸਚੇਪਿ ਸਤ੍ਤਭੂਮਿਕੋ ਪਾਸਾਦੋ ਏਕੂਪਚਾਰੋ ਹੋਤਿ, ਸਤਗਬ੍ਭਂ વਾ ਚਤੁਸਾਲਂ, ਏਕਂ ਸੇਨਾਸਨਮਿਚ੍ਚੇવ ਸਙ੍ਖਂ ਗਚ੍ਛਤਿ। ਏવਰੂਪੇ ਸੇਨਾਸਨੇ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਚਤੁਤ੍ਥਦਿવਸੇ ਅਤ੍ਥਙ੍ਗਤੇ ਸੂਰਿਯੇ ਨਿਪਜ੍ਜਨ੍ਤਸ੍ਸ ਪਾਚਿਤ੍ਤਿਯਂ વੁਤ੍ਤਂ। ਸਚੇ ਪਨ ਸਮ੍ਬਹੁਲਾ ਸਾਮਣੇਰਾ, ਏਕੋ ਭਿਕ੍ਖੁ, ਸਾਮਣੇਰਗਣਨਾਯ ਪਾਚਿਤ੍ਤਿਯਾ। ਤੇ ਚੇ ਉਟ੍ਠਾਯੁਟ੍ਠਾਯ ਨਿਪਜ੍ਜਨ੍ਤਿ, ਤੇਸਂ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਆਪਤ੍ਤਿ, ਭਿਕ੍ਖੁਸ੍ਸ ਉਟ੍ਠਾਯੁਟ੍ਠਾਯ ਨਿਪਜ੍ਜਨੇ ਪਨ ਭਿਕ੍ਖੁਸ੍ਸੇવ ਪਯੋਗੇਨ ਭਿਕ੍ਖੁਸ੍ਸ ਆਪਤ੍ਤਿ। ਸਚੇ ਸਮ੍ਬਹੁਲਾ ਭਿਕ੍ਖੂ, ਏਕੋ ਸਾਮਣੇਰੋ, ਏਕੋਪਿ ਸਬ੍ਬੇਸਂ ਆਪਤ੍ਤਿਂ ਕਰੋਤਿ। ਤਸ੍ਸ ਉਟ੍ਠਾਯੁਟ੍ਠਾਯ ਨਿਪਜ੍ਜਨੇਨਪਿ ਭਿਕ੍ਖੂਨਂ ਆਪਤ੍ਤਿਯੇવ। ਉਭਯੇਸਂ ਸਮ੍ਬਹੁਲਭਾવੇਪਿ ਏਸੇવ ਨਯੋ।
Iminā lakkhaṇena samannāgato sacepi sattabhūmiko pāsādo ekūpacāro hoti, satagabbhaṃ vā catusālaṃ, ekaṃ senāsanamicceva saṅkhaṃ gacchati. Evarūpe senāsane anupasampannena saddhiṃ catutthadivase atthaṅgate sūriye nipajjantassa pācittiyaṃ vuttaṃ. Sace pana sambahulā sāmaṇerā, eko bhikkhu, sāmaṇeragaṇanāya pācittiyā. Te ce uṭṭhāyuṭṭhāya nipajjanti, tesaṃ payoge payoge bhikkhussa āpatti, bhikkhussa uṭṭhāyuṭṭhāya nipajjane pana bhikkhusseva payogena bhikkhussa āpatti. Sace sambahulā bhikkhū, eko sāmaṇero, ekopi sabbesaṃ āpattiṃ karoti. Tassa uṭṭhāyuṭṭhāya nipajjanenapi bhikkhūnaṃ āpattiyeva. Ubhayesaṃ sambahulabhāvepi eseva nayo.
੮੦. ਅਪਿਚੇਤ੍ਥ ਏਕਾવਾਸਾਦਿਕਮ੍ਪਿ ਚਤੁਕ੍ਕਂ વੇਦਿਤਬ੍ਬਂ। ਯੋ ਹਿ ਏਕਸ੍ਮਿਂ ਆવਾਸੇ ਏਕੇਨੇવ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸ ਚਤੁਤ੍ਥਦਿવਸਤੋ ਪਟ੍ਠਾਯ ਦੇવਸਿਕਾ ਆਪਤ੍ਤਿ। ਯੋਪਿ ਏਕਸ੍ਮਿਂਯੇવ ਆવਾਸੇ ਨਾਨਾਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ। ਯੋਪਿ ਨਾਨਾਆવਾਸੇਸੁ ਏਕੇਨੇવ ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਤਿਰਤ੍ਤਂ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ। ਯੋਪਿ ਨਾਨਾਆવਾਸੇਸੁ ਨਾਨਾਅਨੁਪਸਮ੍ਪਨ੍ਨੇਹਿ ਸਦ੍ਧਿਂ ਯੋਜਨਸਤਮ੍ਪਿ ਗਨ੍ਤ੍વਾ ਸਹਸੇਯ੍ਯਂ ਕਪ੍ਪੇਤਿ, ਤਸ੍ਸਪਿ ਚਤੁਤ੍ਥਦਿવਸਤੋ ਪਟ੍ਠਾਯ ਦੇવਸਿਕਾ ਆਪਤ੍ਤਿ।
80. Apicettha ekāvāsādikampi catukkaṃ veditabbaṃ. Yo hi ekasmiṃ āvāse ekeneva anupasampannena saddhiṃ tirattaṃ sahaseyyaṃ kappeti, tassa catutthadivasato paṭṭhāya devasikā āpatti. Yopi ekasmiṃyeva āvāse nānāanupasampannehi saddhiṃ tirattaṃ sahaseyyaṃ kappeti, tassapi. Yopi nānāāvāsesu ekeneva anupasampannena saddhiṃ tirattaṃ sahaseyyaṃ kappeti, tassapi. Yopi nānāāvāsesu nānāanupasampannehi saddhiṃ yojanasatampi gantvā sahaseyyaṃ kappeti, tassapi catutthadivasato paṭṭhāya devasikā āpatti.
ਅਯਞ੍ਚ ਸਹਸੇਯ੍ਯਾਪਤ੍ਤਿ ਨਾਮ ‘‘ਭਿਕ੍ਖੁਂ ਠਪੇਤ੍વਾ ਅવਸੇਸੋ ਅਨੁਪਸਮ੍ਪਨ੍ਨੋ ਨਾਮਾ’’ਤਿ વਚਨਤੋ ਅਨ੍ਤਮਸੋ ਪਾਰਾਜਿਕવਤ੍ਥੁਭੂਤੇਨ ਤਿਰਚ੍ਛਾਨਗਤੇਨਪਿ ਸਦ੍ਧਿਂ ਹੋਤਿ, ਤਸ੍ਮਾ ਸਚੇਪਿ ਗੋਧਾਬਿਲ਼ਾਲਮਙ੍ਗੁਸਾਦੀਸੁ ਕੋਚਿ ਪવਿਸਿਤ੍વਾ ਭਿਕ੍ਖੁਨੋ વਸਨਸੇਨਾਸਨੇ ਏਕੂਪਚਾਰਟ੍ਠਾਨੇ ਸਯਤਿ, ਸਹਸੇਯ੍ਯਾવ ਹੋਤਿ। ਯਦਿ ਪਨ ਥਮ੍ਭਾਨਂ ਉਪਰਿ ਕਤਪਾਸਾਦਸ੍ਸ ਉਪਰਿਮਤਲੇਨ ਸਦ੍ਧਿਂ ਅਸਮ੍ਬਦ੍ਧਭਿਤ੍ਤਿਕਸ੍ਸ ਭਿਤ੍ਤਿਯਾ ਉਪਰਿਠਿਤਸੁਸਿਰਤੁਲਾਸੀਸਸ੍ਸ ਸੁਸਿਰੇਨ ਪવਿਸਿਤ੍વਾ ਤੁਲਾਯ ਅਬ੍ਭਨ੍ਤਰੇ ਸਯਿਤ੍વਾ ਤੇਨੇવ ਸੁਸਿਰੇਨ ਨਿਕ੍ਖਮਿਤ੍વਾ ਗਚ੍ਛਤਿ, ਹੇਟ੍ਠਾਪਾਸਾਦੇ ਸਯਿਤਭਿਕ੍ਖੁਸ੍ਸ ਅਨਾਪਤ੍ਤਿ। ਸਚੇ ਛਦਨੇ ਛਿਦ੍ਦਂ ਹੋਤਿ, ਤੇਨ ਪવਿਸਿਤ੍વਾ ਅਨ੍ਤੋਛਦਨੇ વਸਿਤ੍વਾ ਤੇਨੇવ ਪਕ੍ਕਮਤਿ, ਨਾਨੂਪਚਾਰੇ ਉਪਰਿਮਤਲੇ ਛਦਨਬ੍ਭਨ੍ਤਰੇ ਸਯਿਤਸ੍ਸ ਆਪਤ੍ਤਿ, ਹੇਟ੍ਠਿਮਤਲੇ ਸਯਿਤਸ੍ਸ ਅਨਾਪਤ੍ਤਿ। ਸਚੇ ਅਨ੍ਤੋਪਾਸਾਦੇਨੇવ ਆਰੋਹਿਤ੍વਾ ਸਬ੍ਬਤਲਾਨਿ ਪਰਿਭੁਞ੍ਜਨ੍ਤਿ, ਏਕੂਪਚਾਰਾਨਿ ਹੋਨ੍ਤਿ, ਤੇਸੁ ਯਤ੍ਥ ਕਤ੍ਥਚਿ ਸਯਿਤਸ੍ਸ ਆਪਤ੍ਤਿ, ਸਭਾਸਙ੍ਖੇਪੇਨ ਕਤੇ ਅਡ੍ਢਕੁਟ੍ਟਕੇ ਸੇਨਾਸਨੇ ਸਯਿਤਸ੍ਸ ਤੁਲਾવਾਲ਼ਸਘਾਟਾਦੀਸੁ ਕਪੋਤਾਦਯੋ ਸਯਨ੍ਤਿ, ਆਪਤ੍ਤਿਯੇવ। ਪਰਿਕ੍ਖੇਪਸ੍ਸ ਬਹਿਗਤੇ ਨਿਬ੍ਬਕੋਸਬ੍ਭਨ੍ਤਰੇ ਸਯਨ੍ਤਿ, ਅਨਾਪਤ੍ਤਿ। ਪਰਿਮਣ੍ਡਲਂ વਾ ਚਤੁਰਸ੍ਸਂ વਾ ਏਕਚ੍ਛਦਨਾਯ ਗਬ੍ਭਮਾਲਾਯ ਸਤਗਬ੍ਭਂ ਚੇਪਿ ਸੇਨਾਸਨਂ ਹੋਤਿ, ਤਤ੍ਰ ਚੇ ਏਕੇਨ ਸਾਧਾਰਣਦ੍વਾਰੇਨ ਪવਿਸਿਤ੍વਾ વਿਸੁਂ ਪਾਕਾਰੇਨ ਅਪਰਿਚ੍ਛਿਨ੍ਨਗਬ੍ਭੂਪਚਾਰੇ ਸਬ੍ਬਗਬ੍ਭੇਪਿ ਪવਿਸਨ੍ਤਿ, ਏਕਗਬ੍ਭੇਪਿ ਅਨੁਪਸਮ੍ਪਨ੍ਨੇ ਨਿਪਨ੍ਨੇ ਸਬ੍ਬਗਬ੍ਭੇਸੁ ਨਿਪਨ੍ਨਾਨਂ ਆਪਤ੍ਤਿ। ਸਚੇ ਸਪਮੁਖਾ ਗਬ੍ਭਾ ਹੋਨ੍ਤਿ, ਪਮੁਖਞ੍ਚ ਉਪਰਿ ਅਚ੍ਛਨ੍ਨਂ, ਪਮੁਖੇ ਸਯਿਤੋ ਗਬ੍ਭੇ ਸਯਿਤਾਨਂ ਆਪਤ੍ਤਿਂ ਨ ਕਰੋਤਿ। ਸਚੇ ਪਨ ਗਬ੍ਭਚ੍ਛਦਨੇਨੇવ ਸਦ੍ਧਿਂ ਸਮ੍ਬਨ੍ਧਛਦਨਂ, ਤਤ੍ਰ ਸਯਿਤੋ ਸਬ੍ਬੇਸਂ ਆਪਤ੍ਤਿਂ ਕਰੋਤਿ। ਕਸ੍ਮਾ? ਸਬ੍ਬਚ੍ਛਨ੍ਨਤ੍ਤਾ ਚ ਸਬ੍ਬਪਰਿਚ੍ਛਨ੍ਨਤ੍ਤਾ ਚ। ਗਬ੍ਭਪਰਿਕ੍ਖੇਪੋਯੇવ ਹਿਸ੍ਸ ਪਰਿਕ੍ਖੇਪੋ।
Ayañca sahaseyyāpatti nāma ‘‘bhikkhuṃ ṭhapetvā avaseso anupasampanno nāmā’’ti vacanato antamaso pārājikavatthubhūtena tiracchānagatenapi saddhiṃ hoti, tasmā sacepi godhābiḷālamaṅgusādīsu koci pavisitvā bhikkhuno vasanasenāsane ekūpacāraṭṭhāne sayati, sahaseyyāva hoti. Yadi pana thambhānaṃ upari katapāsādassa uparimatalena saddhiṃ asambaddhabhittikassa bhittiyā upariṭhitasusiratulāsīsassa susirena pavisitvā tulāya abbhantare sayitvā teneva susirena nikkhamitvā gacchati, heṭṭhāpāsāde sayitabhikkhussa anāpatti. Sace chadane chiddaṃ hoti, tena pavisitvā antochadane vasitvā teneva pakkamati, nānūpacāre uparimatale chadanabbhantare sayitassa āpatti, heṭṭhimatale sayitassa anāpatti. Sace antopāsādeneva ārohitvā sabbatalāni paribhuñjanti, ekūpacārāni honti, tesu yattha katthaci sayitassa āpatti, sabhāsaṅkhepena kate aḍḍhakuṭṭake senāsane sayitassa tulāvāḷasaghāṭādīsu kapotādayo sayanti, āpattiyeva. Parikkhepassa bahigate nibbakosabbhantare sayanti, anāpatti. Parimaṇḍalaṃ vā caturassaṃ vā ekacchadanāya gabbhamālāya satagabbhaṃ cepi senāsanaṃ hoti, tatra ce ekena sādhāraṇadvārena pavisitvā visuṃ pākārena aparicchinnagabbhūpacāre sabbagabbhepi pavisanti, ekagabbhepi anupasampanne nipanne sabbagabbhesu nipannānaṃ āpatti. Sace sapamukhā gabbhā honti, pamukhañca upari acchannaṃ, pamukhe sayito gabbhe sayitānaṃ āpattiṃ na karoti. Sace pana gabbhacchadaneneva saddhiṃ sambandhachadanaṃ, tatra sayito sabbesaṃ āpattiṃ karoti. Kasmā? Sabbacchannattā ca sabbaparicchannattā ca. Gabbhaparikkhepoyeva hissa parikkhepo.
੮੧. ਯੇਪਿ ਏਕਸਾਲਦ੍વਿਸਾਲਤਿਸਾਲਚਤੁਸਾਲਸਨ੍ਨਿવੇਸਾ ਮਹਾਪਾਸਾਦਾ ਏਕਸ੍ਮਿਂ ਓਕਾਸੇ ਪਾਦੇ ਧੋવਿਤ੍વਾ ਪવਿਟ੍ਠੇਨ ਸਕ੍ਕਾ ਹੋਨ੍ਤਿ ਸਬ੍ਬਤ੍ਥ ਅਨੁਪਰਿਗਨ੍ਤੁਂ, ਤੇਸੁਪਿ ਸਹਸੇਯ੍ਯਾਪਤ੍ਤਿਯਾ ਨ ਮੁਚ੍ਚਤਿ। ਸਚੇ ਤਸ੍ਮਿਂ ਤਸ੍ਮਿਂ ਠਾਨੇ ਉਪਚਾਰਂ ਪਰਿਚ੍ਛਿਨ੍ਦਿਤ੍વਾ ਕਤਾ ਹੋਨ੍ਤਿ, ਏਕੂਪਚਾਰਟ੍ਠਾਨੇਯੇવ ਆਪਤ੍ਤਿ। ਦ੍વੀਹਿ ਦ੍વਾਰੇਹਿ ਯੁਤ੍ਤਸ੍ਸ ਸੁਧਾਛਦਨਮਣ੍ਡਪਸ੍ਸ ਮਜ੍ਝੇ ਪਾਕਾਰਂ ਕਰੋਨ੍ਤਿ, ਏਕੇਨ ਦ੍વਾਰੇਨ ਪવਿਸਿਤ੍વਾ ਏਕਸ੍ਮਿਂ ਪਰਿਚ੍ਛੇਦੇ ਅਨੁਪਸਮ੍ਪਨ੍ਨੋ ਸਯਤਿ, ਏਕਸ੍ਮਿਂ ਭਿਕ੍ਖੁ, ਅਨਾਪਤ੍ਤਿ। ਪਾਕਾਰੇ ਗੋਧਾਦੀਨਂ ਪવਿਸਨਮਤ੍ਤਂ ਛਿਦ੍ਦਂ ਹੋਤਿ, ਏਕਸ੍ਮਿਞ੍ਚ ਪਰਿਚ੍ਛੇਦੇ ਗੋਧਾ ਸਯਨ੍ਤਿ, ਅਨਾਪਤ੍ਤਿਯੇવ। ਨ ਹਿ ਛਿਦ੍ਦੇਨ ਗੇਹਂ ਏਕੂਪਚਾਰਂ ਨਾਮ ਹੋਤਿ। ਸਚੇ ਪਾਕਾਰਮਜ੍ਝੇ ਛਿਨ੍ਦਿਤ੍વਾ ਦ੍વਾਰਂ ਯੋਜੇਨ੍ਤਿ, ਏਕੂਪਚਾਰਤਾਯ ਆਪਤ੍ਤਿ। ਤਂ ਦ੍વਾਰਂ ਕવਾਟੇਨ ਪਿਦਹਿਤ੍વਾ ਸਯਨ੍ਤਿ, ਆਪਤ੍ਤਿਯੇવ। ਨ ਹਿ ਦ੍વਾਰਪਿਦਹਨੇਨ ਗੇਹਂ ਨਾਨੂਪਚਾਰਂ ਨਾਮ ਹੋਤਿ, ਦ੍વਾਰਂ વਾ ਅਦ੍વਾਰਂ। ਕવਾਟਞ੍ਹਿ ਸਂવਰਣવਿવਰਣੇਹਿ ਯਥਾਸੁਖਂ વਲ਼ਞ੍ਜਨਤ੍ਥਾਯ ਕਤਂ, ਨ વਲ਼ਞ੍ਜੁਪਚ੍ਛੇਦਨਤ੍ਥਾਯ। ਸਚੇ ਤਂ ਦ੍વਾਰਂ ਪੁਨ ਇਟ੍ਠਕਾਹਿ ਪਿਦਹਨ੍ਤਿ, ਅਦ੍વਾਰਂ ਹੋਤਿ, ਪੁਰਿਮੇ ਨਾਨੂਪਚਾਰਭਾવੇਯੇવ ਤਿਟ੍ਠਤਿ। ਦੀਘਪਮੁਖਂ ਚੇਤਿਯਘਰਂ ਹੋਤਿ, ਏਕਂ ਕવਾਟਂ ਅਨ੍ਤੋ, ਏਕਂ ਬਹਿ, ਦ੍વਿਨ੍ਨਂ ਕવਾਟਾਨਂ ਅਨ੍ਤਰੇ ਅਨੁਪਸਮ੍ਪਨ੍ਨੋ ਅਨ੍ਤੋਚੇਤਿਯਘਰੇ ਸਯਨ੍ਤਸ੍ਸ ਆਪਤ੍ਤਿਂ ਕਰੋਤਿ ਏਕੂਪਚਾਰਤ੍ਤਾ।
81. Yepi ekasāladvisālatisālacatusālasannivesā mahāpāsādā ekasmiṃ okāse pāde dhovitvā paviṭṭhena sakkā honti sabbattha anuparigantuṃ, tesupi sahaseyyāpattiyā na muccati. Sace tasmiṃ tasmiṃ ṭhāne upacāraṃ paricchinditvā katā honti, ekūpacāraṭṭhāneyeva āpatti. Dvīhi dvārehi yuttassa sudhāchadanamaṇḍapassa majjhe pākāraṃ karonti, ekena dvārena pavisitvā ekasmiṃ paricchede anupasampanno sayati, ekasmiṃ bhikkhu, anāpatti. Pākāre godhādīnaṃ pavisanamattaṃ chiddaṃ hoti, ekasmiñca paricchede godhā sayanti, anāpattiyeva. Na hi chiddena gehaṃ ekūpacāraṃ nāma hoti. Sace pākāramajjhe chinditvā dvāraṃ yojenti, ekūpacāratāya āpatti. Taṃ dvāraṃ kavāṭena pidahitvā sayanti, āpattiyeva. Na hi dvārapidahanena gehaṃ nānūpacāraṃ nāma hoti, dvāraṃ vā advāraṃ. Kavāṭañhi saṃvaraṇavivaraṇehi yathāsukhaṃ vaḷañjanatthāya kataṃ, na vaḷañjupacchedanatthāya. Sace taṃ dvāraṃ puna iṭṭhakāhi pidahanti, advāraṃ hoti, purime nānūpacārabhāveyeva tiṭṭhati. Dīghapamukhaṃ cetiyagharaṃ hoti, ekaṃ kavāṭaṃ anto, ekaṃ bahi, dvinnaṃ kavāṭānaṃ antare anupasampanno antocetiyaghare sayantassa āpattiṃ karoti ekūpacārattā.
ਅਯਞ੍ਹੇਤ੍ਥ ਸਙ੍ਖੇਪੋ – ਸੇਨਾਸਨਂ ਖੁਦ੍ਦਕਂ વਾ ਹੋਤੁ ਮਹਨ੍ਤਂ વਾ, ਅਞ੍ਞੇਨ ਸਦ੍ਧਿਂ ਸਮ੍ਬਨ੍ਧਂ વਾ ਅਸਮ੍ਬਨ੍ਧਂ વਾ, ਦੀਘਂ વਾ વਟ੍ਟਂ વਾ ਚਤੁਰਸ੍ਸਂ વਾ, ਏਕਭੂਮਿਕਂ વਾ ਅਨੇਕਭੂਮਿਕਂ વਾ, ਯਂ ਯਂ ਏਕੂਪਚਾਰਂ, ਸਬ੍ਬਤ੍ਥ ਸਹਸੇਯ੍ਯਾਪਤ੍ਤਿ ਹੋਤੀਤਿ। ਏਤ੍ਥ ਚ ਯੇਨ ਕੇਨਚਿ ਪਟਿਚ੍ਛਦਨੇਨ ਸਬ੍ਬਚ੍ਛਨ੍ਨੇ ਸਬ੍ਬਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਛਨ੍ਨੇ ਯੇਭੁਯ੍ਯੇਨਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਚ੍ਛਨ੍ਨੇ ਯੇਭੁਯ੍ਯੇਨਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਪਰਿਚ੍ਛਨ੍ਨੇ ਯੇਭੁਯ੍ਯੇਨਛਨ੍ਨੇ ਪਾਚਿਤ੍ਤਿਯਂ, ਸਬ੍ਬਪਰਿਚ੍ਛਨ੍ਨੇ ਉਪਡ੍ਢਚ੍ਛਨ੍ਨੇ ਪਾਚਿਤ੍ਤਿਯਂ, ਯੇਭੁਯ੍ਯੇਨਪਰਿਚ੍ਛਨ੍ਨੇ ਉਪਡ੍ਢਚ੍ਛਨ੍ਨੇ ਪਾਚਿਤ੍ਤਿਯਨ੍ਤਿ ਅਟ੍ਠ ਪਾਚਿਤ੍ਤਿਯਾਨਿ। ਉਪਡ੍ਢਚ੍ਛਨ੍ਨੇ ਉਪਡ੍ਢਪਰਿਚ੍ਛਨ੍ਨੇ ਦੁਕ੍ਕਟਂ, ਸਬ੍ਬਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਦੁਕ੍ਕਟਂ, ਯੇਭੁਯ੍ਯੇਨਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਦੁਕ੍ਕਟਂ, ਸਬ੍ਬਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਦੁਕ੍ਕਟਂ, ਯੇਭੁਯ੍ਯੇਨਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਦੁਕ੍ਕਟਨ੍ਤਿ ਪਞ੍ਚ ਦੁਕ੍ਕਟਾਨਿ વੇਦਿਤਬ੍ਬਾਨਿ। ਸਬ੍ਬਚ੍ਛਨ੍ਨੇ ਸਬ੍ਬਅਪਰਿਚ੍ਛਨ੍ਨੇ, ਸਬ੍ਬਪਰਿਚ੍ਛਨ੍ਨੇ ਸਬ੍ਬਅਚ੍ਛਨ੍ਨੇ, ਯੇਭੁਯ੍ਯੇਨਅਚ੍ਛਨ੍ਨੇ ਯੇਭੁਯ੍ਯੇਨਅਪਰਿਚ੍ਛਨ੍ਨੇ, ਉਪਡ੍ਢਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ, ਉਪਡ੍ਢਪਰਿਚ੍ਛਨ੍ਨੇ ਚੂਲ਼ਕਚ੍ਛਨ੍ਨੇ ਚੂਲ਼ਕਪਰਿਚ੍ਛਨ੍ਨੇ ਚ ਅਨਾਪਤ੍ਤਿ। ਮਾਤੁਗਾਮੇਨ ਸਹ ਨਿਪਜ੍ਜਨ੍ਤਸ੍ਸਪਿ ਅਯਮੇવ વਿਨਿਚ੍ਛਯੋ। ਅਯਞ੍ਹੇਤ੍ਥ વਿਸੇਸੋ – ਅਨੁਪਸਮ੍ਪਨ੍ਨੇਨ ਸਦ੍ਧਿਂ ਨਿਪਜ੍ਜਨ੍ਤਸ੍ਸ ਚਤੁਤ੍ਥਦਿવਸੇ ਆਪਤ੍ਤਿ, ਮਾਤੁਗਾਮੇਨ ਸਦ੍ਧਿਂ ਪਠਮਦਿવਸੇਤਿ। ਯਕ੍ਖਿਪੇਤੀਹਿ ਪਨ ਦਿਸ੍ਸਮਾਨਕਰੂਪਾਹਿ ਤਿਰਚ੍ਛਾਨਗਤਿਤ੍ਥਿਯਾ ਚ ਮੇਥੁਨਧਮ੍ਮવਤ੍ਥੁਭੂਤਾਯ ਏવ ਦੁਕ੍ਕਟਂ, ਸੇਸਾਹਿ ਅਨਾਪਤ੍ਤਿ।
Ayañhettha saṅkhepo – senāsanaṃ khuddakaṃ vā hotu mahantaṃ vā, aññena saddhiṃ sambandhaṃ vā asambandhaṃ vā, dīghaṃ vā vaṭṭaṃ vā caturassaṃ vā, ekabhūmikaṃ vā anekabhūmikaṃ vā, yaṃ yaṃ ekūpacāraṃ, sabbattha sahaseyyāpatti hotīti. Ettha ca yena kenaci paṭicchadanena sabbacchanne sabbaparicchanne pācittiyaṃ, yebhuyyenachanne yebhuyyenaparicchanne pācittiyaṃ, sabbacchanne yebhuyyenaparicchanne pācittiyaṃ, sabbacchanne upaḍḍhaparicchanne pācittiyaṃ, yebhuyyenachanne upaḍḍhaparicchanne pācittiyaṃ, sabbaparicchanne yebhuyyenachanne pācittiyaṃ, sabbaparicchanne upaḍḍhacchanne pācittiyaṃ, yebhuyyenaparicchanne upaḍḍhacchanne pācittiyanti aṭṭha pācittiyāni. Upaḍḍhacchanne upaḍḍhaparicchanne dukkaṭaṃ, sabbacchanne cūḷakaparicchanne dukkaṭaṃ, yebhuyyenachanne cūḷakaparicchanne dukkaṭaṃ, sabbaparicchanne cūḷakacchanne dukkaṭaṃ, yebhuyyenaparicchanne cūḷakacchanne dukkaṭanti pañca dukkaṭāni veditabbāni. Sabbacchanne sabbaaparicchanne, sabbaparicchanne sabbaacchanne, yebhuyyenaacchanne yebhuyyenaaparicchanne, upaḍḍhacchanne cūḷakaparicchanne, upaḍḍhaparicchanne cūḷakacchanne cūḷakaparicchanne ca anāpatti. Mātugāmena saha nipajjantassapi ayameva vinicchayo. Ayañhettha viseso – anupasampannena saddhiṃ nipajjantassa catutthadivase āpatti, mātugāmena saddhiṃ paṭhamadivaseti. Yakkhipetīhi pana dissamānakarūpāhi tiracchānagatitthiyā ca methunadhammavatthubhūtāya eva dukkaṭaṃ, sesāhi anāpatti.
ਇਤਿ ਪਾਲ਼ਿਮੁਤ੍ਤਕવਿਨਯવਿਨਿਚ੍ਛਯਸਙ੍ਗਹੇ
Iti pāḷimuttakavinayavinicchayasaṅgahe
ਸਹਸੇਯ੍ਯવਿਨਿਚ੍ਛਯਕਥਾ ਸਮਤ੍ਤਾ।
Sahaseyyavinicchayakathā samattā.
