| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. রাজকারামৰগ্গো
2. Rājakārāmavaggo
১. সহস্সভিক্খুনিসঙ্ঘসুত্তৰণ্ণনা
1. Sahassabhikkhunisaṅghasuttavaṇṇanā
১০০৭. ধম্মিকত্তা দেসৰাসীহি অনুকম্পিতো রাজাতি রাজকো, তস্স আরামো রাজকারামো, তস্মিং। ভূমিসীসং সেট্ঠপ্পদেসো, যত্থ ৰসন্তো লাভগ্গযসগ্গপ্পত্তো হোতীতি তেসং অধিপ্পাযো।
1007. Dhammikattā desavāsīhi anukampito rājāti rājako, tassa ārāmo rājakārāmo, tasmiṃ. Bhūmisīsaṃ seṭṭhappadeso, yattha vasanto lābhaggayasaggappatto hotīti tesaṃ adhippāyo.
ৰারাপেহীতি পটিসেধেহি। যুজ্ঝাপেতুন্তি কলহং কারাপেতুং। পুন আগচ্ছন্তাতি অপরস্মিং সংৰচ্ছরে আগচ্ছন্তা। উব্বট্টেত্ৰাতি মহতী ৰীচিযো উব্বট্টেত্ৰা। যথা তস্স সকলমেৰ রট্ঠং একোদকীভূতং হোতি, এৰং কত্ৰা সমুদ্দমেৰ জাতং। তেন ৰুত্তং ‘‘সমুদ্দমেৰ অকংসূ’’তি।
Vārāpehīti paṭisedhehi. Yujjhāpetunti kalahaṃ kārāpetuṃ. Puna āgacchantāti aparasmiṃ saṃvacchare āgacchantā. Ubbaṭṭetvāti mahatī vīciyo ubbaṭṭetvā. Yathā tassa sakalameva raṭṭhaṃ ekodakībhūtaṃ hoti, evaṃ katvā samuddameva jātaṃ. Tena vuttaṃ ‘‘samuddameva akaṃsū’’ti.
ইসীনমন্তরং কত্ৰাতি ইসীনং কারণং কত্ৰা, ইসীনং হেতূতি অত্থো, ইসীনং ৰা অন্তরভেদং কত্ৰা। তথা লোকে কোলাহলস্স পত্থটতং ৰিভাৰেন্তো ভগৰা ‘‘মে সুত’’ন্তি আহ পচ্চক্খতো জানম্পি। উচ্ছিন্নোতি কুলচ্ছেদেন উচ্ছিন্নো। ন কেৰলং সযমেৰ, অথ খো সহ রট্ঠেহি। ৰিভৰন্তি ৰিনাসং উপগতো।
Isīnamantaraṃ katvāti isīnaṃ kāraṇaṃ katvā, isīnaṃ hetūti attho, isīnaṃ vā antarabhedaṃ katvā. Tathā loke kolāhalassa patthaṭataṃ vibhāvento bhagavā ‘‘me suta’’nti āha paccakkhato jānampi. Ucchinnoti kulacchedena ucchinno. Na kevalaṃ sayameva, atha kho saha raṭṭhehi. Vibhavanti vināsaṃ upagato.
তং সন্ধাযেতং ৰুত্তন্তি তং যথাৰুত্তং পসেনদিনা কোসলরাজেন কারিতং ৰিহারং সন্ধায এতং ‘‘রাজকারামে’’তি ৰুত্তং।
Taṃ sandhāyetaṃ vuttanti taṃ yathāvuttaṃ pasenadinā kosalarājena kāritaṃ vihāraṃ sandhāya etaṃ ‘‘rājakārāme’’ti vuttaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. সহস্সভিক্খুনিসঙ্ঘসুত্তং • 1. Sahassabhikkhunisaṅghasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সহস্সভিক্খুনিসঙ্ঘসুত্তৰণ্ণনা • 1. Sahassabhikkhunisaṅghasuttavaṇṇanā
