| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
२. राजकारामवग्गो
2. Rājakārāmavaggo
१. सहस्सभिक्खुनिसङ्घसुत्तवण्णना
1. Sahassabhikkhunisaṅghasuttavaṇṇanā
१००७. धम्मिकत्ता देसवासीहि अनुकम्पितो राजाति राजको, तस्स आरामो राजकारामो, तस्मिं। भूमिसीसं सेट्ठप्पदेसो, यत्थ वसन्तो लाभग्गयसग्गप्पत्तो होतीति तेसं अधिप्पायो।
1007. Dhammikattā desavāsīhi anukampito rājāti rājako, tassa ārāmo rājakārāmo, tasmiṃ. Bhūmisīsaṃ seṭṭhappadeso, yattha vasanto lābhaggayasaggappatto hotīti tesaṃ adhippāyo.
वारापेहीति पटिसेधेहि। युज्झापेतुन्ति कलहं कारापेतुं। पुन आगच्छन्ताति अपरस्मिं संवच्छरे आगच्छन्ता। उब्बट्टेत्वाति महती वीचियो उब्बट्टेत्वा। यथा तस्स सकलमेव रट्ठं एकोदकीभूतं होति, एवं कत्वा समुद्दमेव जातं। तेन वुत्तं ‘‘समुद्दमेव अकंसू’’ति।
Vārāpehīti paṭisedhehi. Yujjhāpetunti kalahaṃ kārāpetuṃ. Puna āgacchantāti aparasmiṃ saṃvacchare āgacchantā. Ubbaṭṭetvāti mahatī vīciyo ubbaṭṭetvā. Yathā tassa sakalameva raṭṭhaṃ ekodakībhūtaṃ hoti, evaṃ katvā samuddameva jātaṃ. Tena vuttaṃ ‘‘samuddameva akaṃsū’’ti.
इसीनमन्तरं कत्वाति इसीनं कारणं कत्वा, इसीनं हेतूति अत्थो, इसीनं वा अन्तरभेदं कत्वा। तथा लोके कोलाहलस्स पत्थटतं विभावेन्तो भगवा ‘‘मे सुत’’न्ति आह पच्चक्खतो जानम्पि। उच्छिन्नोति कुलच्छेदेन उच्छिन्नो। न केवलं सयमेव, अथ खो सह रट्ठेहि। विभवन्ति विनासं उपगतो।
Isīnamantaraṃ katvāti isīnaṃ kāraṇaṃ katvā, isīnaṃ hetūti attho, isīnaṃ vā antarabhedaṃ katvā. Tathā loke kolāhalassa patthaṭataṃ vibhāvento bhagavā ‘‘me suta’’nti āha paccakkhato jānampi. Ucchinnoti kulacchedena ucchinno. Na kevalaṃ sayameva, atha kho saha raṭṭhehi. Vibhavanti vināsaṃ upagato.
तं सन्धायेतं वुत्तन्ति तं यथावुत्तं पसेनदिना कोसलराजेन कारितं विहारं सन्धाय एतं ‘‘राजकारामे’’ति वुत्तं।
Taṃ sandhāyetaṃ vuttanti taṃ yathāvuttaṃ pasenadinā kosalarājena kāritaṃ vihāraṃ sandhāya etaṃ ‘‘rājakārāme’’ti vuttaṃ.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १. सहस्सभिक्खुनिसङ्घसुत्तं • 1. Sahassabhikkhunisaṅghasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १. सहस्सभिक्खुनिसङ्घसुत्तवण्णना • 1. Sahassabhikkhunisaṅghasuttavaṇṇanā
