| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
២. រាជការាមវគ្គោ
2. Rājakārāmavaggo
១. សហស្សភិក្ខុនិសង្ឃសុត្តវណ្ណនា
1. Sahassabhikkhunisaṅghasuttavaṇṇanā
១០០៧. ធម្មិកត្តា ទេសវាសីហិ អនុកម្បិតោ រាជាតិ រាជកោ, តស្ស អារាមោ រាជការាមោ, តស្មិំ។ ភូមិសីសំ សេដ្ឋប្បទេសោ, យត្ថ វសន្តោ លាភគ្គយសគ្គប្បត្តោ ហោតីតិ តេសំ អធិប្បាយោ។
1007. Dhammikattā desavāsīhi anukampito rājāti rājako, tassa ārāmo rājakārāmo, tasmiṃ. Bhūmisīsaṃ seṭṭhappadeso, yattha vasanto lābhaggayasaggappatto hotīti tesaṃ adhippāyo.
វារាបេហីតិ បដិសេធេហិ។ យុជ្ឈាបេតុន្តិ កលហំ ការាបេតុំ។ បុន អាគច្ឆន្តាតិ អបរស្មិំ សំវច្ឆរេ អាគច្ឆន្តា។ ឧព្ពដ្ដេត្វាតិ មហតី វីចិយោ ឧព្ពដ្ដេត្វា។ យថា តស្ស សកលមេវ រដ្ឋំ ឯកោទកីភូតំ ហោតិ, ឯវំ កត្វា សមុទ្ទមេវ ជាតំ។ តេន វុត្តំ ‘‘សមុទ្ទមេវ អកំសូ’’តិ។
Vārāpehīti paṭisedhehi. Yujjhāpetunti kalahaṃ kārāpetuṃ. Puna āgacchantāti aparasmiṃ saṃvacchare āgacchantā. Ubbaṭṭetvāti mahatī vīciyo ubbaṭṭetvā. Yathā tassa sakalameva raṭṭhaṃ ekodakībhūtaṃ hoti, evaṃ katvā samuddameva jātaṃ. Tena vuttaṃ ‘‘samuddameva akaṃsū’’ti.
ឥសីនមន្តរំ កត្វាតិ ឥសីនំ ការណំ កត្វា, ឥសីនំ ហេតូតិ អត្ថោ, ឥសីនំ វា អន្តរភេទំ កត្វា។ តថា លោកេ កោលាហលស្ស បត្ថដតំ វិភាវេន្តោ ភគវា ‘‘មេ សុត’’ន្តិ អាហ បច្ចក្ខតោ ជានម្បិ។ ឧច្ឆិន្នោតិ កុលច្ឆេទេន ឧច្ឆិន្នោ។ ន កេវលំ សយមេវ, អថ ខោ សហ រដ្ឋេហិ។ វិភវន្តិ វិនាសំ ឧបគតោ។
Isīnamantaraṃ katvāti isīnaṃ kāraṇaṃ katvā, isīnaṃ hetūti attho, isīnaṃ vā antarabhedaṃ katvā. Tathā loke kolāhalassa patthaṭataṃ vibhāvento bhagavā ‘‘me suta’’nti āha paccakkhato jānampi. Ucchinnoti kulacchedena ucchinno. Na kevalaṃ sayameva, atha kho saha raṭṭhehi. Vibhavanti vināsaṃ upagato.
តំ សន្ធាយេតំ វុត្តន្តិ តំ យថាវុត្តំ បសេនទិនា កោសលរាជេន ការិតំ វិហារំ សន្ធាយ ឯតំ ‘‘រាជការាមេ’’តិ វុត្តំ។
Taṃ sandhāyetaṃ vuttanti taṃ yathāvuttaṃ pasenadinā kosalarājena kāritaṃ vihāraṃ sandhāya etaṃ ‘‘rājakārāme’’ti vuttaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. សហស្សភិក្ខុនិសង្ឃសុត្តំ • 1. Sahassabhikkhunisaṅghasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. សហស្សភិក្ខុនិសង្ឃសុត្តវណ្ណនា • 1. Sahassabhikkhunisaṅghasuttavaṇṇanā
