| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೨. ರಾಜಕಾರಾಮವಗ್ಗೋ
2. Rājakārāmavaggo
೧. ಸಹಸ್ಸಭಿಕ್ಖುನಿಸಙ್ಘಸುತ್ತವಣ್ಣನಾ
1. Sahassabhikkhunisaṅghasuttavaṇṇanā
೧೦೦೭. ಧಮ್ಮಿಕತ್ತಾ ದೇಸವಾಸೀಹಿ ಅನುಕಮ್ಪಿತೋ ರಾಜಾತಿ ರಾಜಕೋ, ತಸ್ಸ ಆರಾಮೋ ರಾಜಕಾರಾಮೋ, ತಸ್ಮಿಂ। ಭೂಮಿಸೀಸಂ ಸೇಟ್ಠಪ್ಪದೇಸೋ, ಯತ್ಥ ವಸನ್ತೋ ಲಾಭಗ್ಗಯಸಗ್ಗಪ್ಪತ್ತೋ ಹೋತೀತಿ ತೇಸಂ ಅಧಿಪ್ಪಾಯೋ।
1007. Dhammikattā desavāsīhi anukampito rājāti rājako, tassa ārāmo rājakārāmo, tasmiṃ. Bhūmisīsaṃ seṭṭhappadeso, yattha vasanto lābhaggayasaggappatto hotīti tesaṃ adhippāyo.
ವಾರಾಪೇಹೀತಿ ಪಟಿಸೇಧೇಹಿ। ಯುಜ್ಝಾಪೇತುನ್ತಿ ಕಲಹಂ ಕಾರಾಪೇತುಂ। ಪುನ ಆಗಚ್ಛನ್ತಾತಿ ಅಪರಸ್ಮಿಂ ಸಂವಚ್ಛರೇ ಆಗಚ್ಛನ್ತಾ। ಉಬ್ಬಟ್ಟೇತ್ವಾತಿ ಮಹತೀ ವೀಚಿಯೋ ಉಬ್ಬಟ್ಟೇತ್ವಾ। ಯಥಾ ತಸ್ಸ ಸಕಲಮೇವ ರಟ್ಠಂ ಏಕೋದಕೀಭೂತಂ ಹೋತಿ, ಏವಂ ಕತ್ವಾ ಸಮುದ್ದಮೇವ ಜಾತಂ। ತೇನ ವುತ್ತಂ ‘‘ಸಮುದ್ದಮೇವ ಅಕಂಸೂ’’ತಿ।
Vārāpehīti paṭisedhehi. Yujjhāpetunti kalahaṃ kārāpetuṃ. Puna āgacchantāti aparasmiṃ saṃvacchare āgacchantā. Ubbaṭṭetvāti mahatī vīciyo ubbaṭṭetvā. Yathā tassa sakalameva raṭṭhaṃ ekodakībhūtaṃ hoti, evaṃ katvā samuddameva jātaṃ. Tena vuttaṃ ‘‘samuddameva akaṃsū’’ti.
ಇಸೀನಮನ್ತರಂ ಕತ್ವಾತಿ ಇಸೀನಂ ಕಾರಣಂ ಕತ್ವಾ, ಇಸೀನಂ ಹೇತೂತಿ ಅತ್ಥೋ, ಇಸೀನಂ ವಾ ಅನ್ತರಭೇದಂ ಕತ್ವಾ। ತಥಾ ಲೋಕೇ ಕೋಲಾಹಲಸ್ಸ ಪತ್ಥಟತಂ ವಿಭಾವೇನ್ತೋ ಭಗವಾ ‘‘ಮೇ ಸುತ’’ನ್ತಿ ಆಹ ಪಚ್ಚಕ್ಖತೋ ಜಾನಮ್ಪಿ। ಉಚ್ಛಿನ್ನೋತಿ ಕುಲಚ್ಛೇದೇನ ಉಚ್ಛಿನ್ನೋ। ನ ಕೇವಲಂ ಸಯಮೇವ, ಅಥ ಖೋ ಸಹ ರಟ್ಠೇಹಿ। ವಿಭವನ್ತಿ ವಿನಾಸಂ ಉಪಗತೋ।
Isīnamantaraṃ katvāti isīnaṃ kāraṇaṃ katvā, isīnaṃ hetūti attho, isīnaṃ vā antarabhedaṃ katvā. Tathā loke kolāhalassa patthaṭataṃ vibhāvento bhagavā ‘‘me suta’’nti āha paccakkhato jānampi. Ucchinnoti kulacchedena ucchinno. Na kevalaṃ sayameva, atha kho saha raṭṭhehi. Vibhavanti vināsaṃ upagato.
ತಂ ಸನ್ಧಾಯೇತಂ ವುತ್ತನ್ತಿ ತಂ ಯಥಾವುತ್ತಂ ಪಸೇನದಿನಾ ಕೋಸಲರಾಜೇನ ಕಾರಿತಂ ವಿಹಾರಂ ಸನ್ಧಾಯ ಏತಂ ‘‘ರಾಜಕಾರಾಮೇ’’ತಿ ವುತ್ತಂ।
Taṃ sandhāyetaṃ vuttanti taṃ yathāvuttaṃ pasenadinā kosalarājena kāritaṃ vihāraṃ sandhāya etaṃ ‘‘rājakārāme’’ti vuttaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ಸಹಸ್ಸಭಿಕ್ಖುನಿಸಙ್ಘಸುತ್ತಂ • 1. Sahassabhikkhunisaṅghasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧. ಸಹಸ್ಸಭಿಕ್ಖುನಿಸಙ್ಘಸುತ್ತವಣ್ಣನಾ • 1. Sahassabhikkhunisaṅghasuttavaṇṇanā
